Ka Sorkar India ka la thung ia ka High-Level Committee ban wad bniah ia ki jingkylla ha ka jingbun briew kiba mih na ka jingwan buhai shnong beain bad kiwei kiwei ki daw ki bym thikna, bad ban ai jingmut ia ki lad ki lynti ban ialeh pyrshah ia kine ki jingkylla ha ka jingbun briew. U Myntri Rangbahduh ka ri u Narendra Modi u la pynbna ïa ka “High-powered Demography Mission” ha ka 15 tarik u Nailar 2025. Ka Kynhun Myntri jong ka sorkar pdeng ka la ai jingmynjur ïa kane ka jingtyrwa ha ka 11 tarik u Nailur 2025.

U Justice Prakash Prabhakar Navlekar (ba la shongthait) un long kum u Chairman jong kane ka Committee. Nalor u Census Commissioner, lai ngut ki riew shemphang kiba pawkhmat — u Durga Shankar Mishra (IAS ba la shongthait), u Balaji Srivastava (IPS ba la shongthait), bad Dr. Shamika Ravi – kin long ki dkhot jong ka Committee. U Joint Secretary (Foreigners-I), ka Tnad kam pohiing, un long kum u Member Secretary jong ka Committee. Kane ka Committee kan ai ia ka kaiphod jong ka hapoh shisnem. Lada donkam, ka Tnad kam pohiing ka lah ban pynjlan ia ka por treikam jong ka Committee haduh hynriew bnai.

U Myntri kam pohïing jong ka sorkar pdeng bad u Myntri ka Tnat ïatreilang u Amit Shah u la ong ha ka post ha ka rynsan X: “Ka jingwan rung beain bad kiwei kiwei ki daw kiba ïalam sha ka jingkylla ka bym iahap ha kaba iadei bad ka jingbun briew kalong ka jingeh kaba khraw na ka bynta ka mynta bad ka lawei jong kano kano ka ri. Ban iakhun pyrshah ia kane ka jingeh, u Myntri Rangbah duh Narendra Modi u la pynbna ia ka ‘High-Level Committee on Demographic Change’ ha ka15 tarik Nailar 2025. Nga dap da ka jingkmen ban pyntip ba ka sorkar ka la thung ia kane ka Committee. Kane ka Committee, kaba la thaw hapoh ka jingpyniaid jong u Justice Prakash Prabhakar Navlekar (ba la shongthait), kan don ia u Census Commissioner ryngkat bad u Durga Shankar Mishra (IAS ba la shongthait), u Balaji Srivastava (IPS ba la shongthait), bad Dr. Shamika Ravi kum ki dkhot jong ka. U Joint Secretary (Foreigners-I), ka Tnad kam pohiing, un long kum u Member Secretary jong kane ka Committee.

Ka jingkylla ha ka jingbun briew kadei ka jingeh kaba khraw kaba iadei ym tang bad ka bor jong ngi ban synshar ialade hynrei bad ka jingshngain jong ka ri, ka shongsuk shongsain, ki jingkylla kiba khraw ha ka jinglong jingman jong ka imlang sahlang, bad ka jingiada ia ki jaitbynriew riewlum. Kane ka Committee kan pynlong ia ka jingpeit bniah ia ki jingkylla ha ka jingbun briew kiba jia ha kylleng ka ri India namar ka jingwan buhai shnong beain bad kiwei kiwei ki daw kiba kyrpang. Kan bishar bniah ia ki jingkylla ha kaba iadei bad ka jingbun briew katkum ka niam bad ka imlang sahlang bad kan wanrah ia ka jingpynbeit kaba la pyrkhat sani bha bad kaba la buh por ban weng ia ka jingeh.”

Kane ka High-Level Committee kan peit katkum ka jingstad science ia ki jingkylla ha ka jingbun briew kiba jia ha ki bynta bapher bapher jong ka ri namar ka jingwan buhai shnong beain bad kiwei kiwei ki daw kiba kyrpang, kan bishar bniah ia ki daw jong ki, bad kan ai jingmut ia ki polisi, ki ain, bad ki lad synshar kiba iahap. Ka jingai jingmut shaphang ka jinglong bad ka kam jong ka Committee ki long kumne harum:

1. Ban pyrkhat bniah ia ki jingeh kiba mih na ki jingkylla ha ka jingbun briew, kynthup ia ka jingwan buhai shnong beain.
2. Ban wad bniah ia ki daw kiba lah ban mih na kum kine ki jingkylla ha ka jingbun briew, kum ki kam kiba jam ia u pud u sam jong ka ri (kynthup ia ka jingwan buhai shnong beain), ki lad kamai, bad kiwei kiwei ki jingeh ha ka imlang sahlang bad ka mariang.
3. Ban ithuh ia ki daw kiba don ha lyndet jong kine ki jingkylla, kiba kynthup ia ka jingwan buhai shnong beain, ki rukom shong shnong kiba i phylla, bad ka jingwan buhai shnong ba la pynkhreh lypa.
4. Ban bishar bniah ia ki jingkylla ha ka jingbun briew katkum ka niam bad ka imlang sahlang, khamtam ha kaba ki pher na ki jinglong jingman kiba man ka por.
5. Ban ai jingmut ia ka rukom treikam kaba ryntih bad kaba neh na ka bynta ka jingithuh katkum ka ain, kaba shai, bad kaba la buh por, ka jingkem, bad jingpynphai ia ki briew kiba rung beain kiba don lypa ha ka ri.
6. Ban ai jingmut ia ka rukom treikam kaba biang ban pynkhlain ia ka jingiada ia ka thain khappud, ka jingpynbeit ia ka jingbun briew, bad ki rukom ithuh na ka bynta ban iai buddien ia kum kine ki jinglong.
7. Ban tyrwa ia ka rukom treikam katkum ka polisi ban kyntiew ia ka jingiatreilang hapdeng ka sorkar pdeng bad ki sorkar jylla halor ki mat kiba iadei bad ka jingwan buhai shnong be-ain bad ka jingbym iahap jong ka jingbun briew kaba mih na kata.
8. Ka Committee ka lah ban ai jingmut ia kino kino kiwei pat ki sienjam kiba ka sngewdei ban weng ia ki jingeh kiba mih na ki jingkylla ha ka jingbun briew, kynthup ia ka jingwan buhai shnong beain.

********