بین الاقوامی مصنوعی منشیات کی اسمگلنگ کے نیٹ ورکس کے خلاف ایک بڑی کامیابی حاصل کرتے ہوئے، نارکوٹکس کنٹرول بیورو (این سی بی) نے ’’آپریشن ریج پِل‘‘ کے تحت کیپٹاگون منشیات کی اسمگلنگ میں ملوث ایک بین الاقوامی گروہ کا پردہ فاش کیا ہے۔ اس کارروائی کے دوران تقریباً 227.7 کلوگرام کیپٹاگون گولیاں اور پاؤڈر ضبط کیے گئے، جبکہ اس گروہ سے وابستہ ایک ایسے شامی شہری کو گرفتار کیا گیا جو مقررہ مدت سے زائد بھارت میں مقیم تھا۔

کیپٹاگون میں بنیادی طور پر فینیٹائلین اور ایمفیٹامین شامل ہوتے ہیں، جو این ڈی پی ایس ایکٹ کے تحت نفسیاتی اثرات رکھنے والے ممنوعہ مادّے شمار کیے جاتے ہیں۔

مرکزی وزیرِ داخلہ و وزیرِ تعاون امت شاہ نے ’’آپریشن ریج پِل‘‘ کی کامیاب انجام دہی پر این سی بی کے بہادر اور مستعد اہلکاروں کو مبارکباد دی۔ انہوں نے کہا کہ اس کارروائی کے ذریعے ہماری ایجنسیوں نے پہلی مرتبہ ’’کیپٹاگون‘‘ نامی منشیات، جسے نام نہاد ’’جہادی ڈرگ‘‘ بھی کہا جاتا ہے، ضبط کرنے میں کامیابی حاصل کی ہے۔

امت شاہ نے سوشل میڈیا پلیٹ فارم ایکس (سابقہ ٹوئٹر) پر اپنے پیغام میں کہا:

’’مودی حکومت ‘منشیات سے پاک بھارت’ کے عزم پر قائم ہے۔ مجھے یہ بتاتے ہوئے خوشی ہو رہی ہے کہ ‘آپریشن ریج پِل’ کے ذریعے ہماری ایجنسیوں نے پہلی مرتبہ 182 کروڑ روپے مالیت کی نام نہاد ‘جہادی ڈرگ’ کیپٹاگون ضبط کی ہے۔ مشرقِ وسطیٰ بھیجی جانے والی اس منشیات کی کھیپ کی ضبطی اور ایک غیر ملکی شہری کی گرفتاری منشیات کے خلاف ہماری صفر برداشت پالیسی کی روشن مثال ہے۔ میں ایک بار پھر واضح کرتا ہوں کہ بھارت میں داخل ہونے والی یا ہماری سرزمین کو راہداری کے طور پر استعمال کرتے ہوئے بیرونِ ملک بھیجی جانے والی ہر ذرّہ منشیات کے خلاف سخت کارروائی کی جائے گی۔ این سی بی کے بہادر اور چوکنا اہلکار مبارکباد کے مستحق ہیں۔‘‘

ایک غیر ملکی انسدادِ منشیات قانون نافذ کرنے والی ایجنسی سے موصولہ اطلاعات کی بنیاد پر، جن میں بتایا گیا تھا کہ بھارت کو کیپٹاگون منشیات کی اسمگلنگ کے لیے راہداری کے طور پر استعمال کیا جا رہا ہے، نئی دہلی کے علاقے نب سرائے میں ایک مکان کی نشاندہی کی گئی۔

11 مئی 2026 کو اس مکان کی تلاشی کے دوران تقریباً 31.5 کلوگرام کیپٹاگون گولیاں برآمد کی گئیں، جنہیں ایک تجارتی چپاتی کاٹنے والی مشین میں نہایت مہارت سے چھپایا گیا تھا۔ ابتدائی تحقیقات سے معلوم ہوا کہ یہ کھیپ سعودی عرب کے شہر جدہ بھیجی جانی تھی۔

ابتدائی تفتیش سے یہ بھی انکشاف ہوا کہ شامی شہری 15 نومبر 2024 کو سیاحتی ویزے پر بھارت آیا تھا، تاہم اس کا ویزا 12 جنوری 2025 کو ختم ہو گیا تھا اور وہ غیر قانونی طور پر بھارت میں مقیم تھا۔ اس نے نب سرائے میں مذکورہ مکان کرائے پر لے رکھا تھا۔

ملزم سے مزید پوچھ گچھ کے نتیجے میں 14 مئی 2026 کو گجرات کے مُندرا میں واقع کنٹینر فسیلیٹیشن اسٹیشن (سی ایف ایس) سے ایک کنٹینر میں موجود تقریباً 196.2 کلوگرام کیپٹاگون پاؤڈر بھی برآمد کیا گیا۔ یہ کنٹینر شام سے درآمد کیا گیا تھا اور دستاویزات میں اس میں بھیڑ کی اون درج تھی۔

کنٹینر کی مکمل تلاشی کے دوران تین تھیلوں سے 196.2 کلوگرام کیپٹاگون پاؤڈر برآمد ہوا۔ ابتدائی تحقیقات سے معلوم ہوا ہے کہ یہ کھیپ خلیجی ممالک، خصوصاً سعودی عرب اور مشرقِ وسطیٰ کے دیگر پڑوسی ممالک منتقل کی جانی تھی، جہاں کیپٹاگون کا استعمال قانون نافذ کرنے والے اداروں اور صحتِ عامہ کے لیے ایک سنگین مسئلہ بن چکا ہے۔

’’آپریشن ریج پِل‘‘ کے دوران مجموعی طور پر تقریباً 227.7 کلوگرام کیپٹاگون گولیاں اور پاؤڈر ضبط کیے گئے، جن کی خلیجی اور مشرقِ وسطیٰ کی منڈیوں میں غیر قانونی بین الاقوامی مالیت تقریباً 182 کروڑ روپے بتائی گئی ہے۔

یہ کارروائی بھارت میں کیپٹاگون کی پہلی ضبطی ہے اور اس سے یہ انکشاف ہوا ہے کہ بین الاقوامی منشیات گروہ بھارت کو راہداری مرکز کے طور پر استعمال کرنے کی کوشش کر رہے تھے۔

یہ کارروائی اس بات کی بھی نمایاں مثال ہے کہ بین الاقوامی خفیہ معلومات کے تبادلے اور قانون نافذ کرنے والے اداروں کے باہمی تعاون کے ذریعے مختلف ممالک میں سرگرم بین الاقوامی منشیات اسمگلنگ نیٹ ورکس کی نشاندہی، ان کی روک تھام اور ان کے خاتمے میں کس قدر اہم کردار ادا کیا جا سکتا ہے۔

یہ ضبطی حال ہی میں ممبئی میں این سی بی کی ایک اور بڑی کارروائی کے تناظر میں بھی غیر معمولی اہمیت رکھتی ہے، جس میں ایکواڈور سے آنے والے کنٹینر میں چھپائی گئی 349 کلوگرام کوکین برآمد کی گئی تھی۔ اس سے یہ ظاہر ہوتا ہے کہ بین الاقوامی منشیات گروہ تجارتی سامان اور کنٹینر کے ذریعے ہونے والی تجارت کو مختلف خطّوں میں منشیات کی اسمگلنگ کے لیے بڑھتے ہوئے پیمانے پر استعمال کر رہے ہیں۔

نارکوٹکس کنٹرول بیورو (این سی بی) نے اس گروہ سے وابستہ منشیات کی خریداری کے ذرائع، مالی اور حوالہ روابط، ترسیلی معاونین، بین الاقوامی وصول کنندگان، اور وسیع بین الاقوامی نیٹ ورک کی شناخت کے لیے جامع تحقیقات شروع کر دی ہیں۔

بھارت، خفیہ معلومات کے تبادلے، منشیات کے سرغناؤں کی حوالگی، اور نارکو دہشت گردی و منشیات کارٹیلز کے خلاف مشترکہ کارروائی کے ذریعے بین الاقوامی تعاون کو مزید مضبوط بنانے کے لیے پُرعزم ہے، تاکہ منشیات کی اسمگلنگ اور منشیات کے استعمال جیسے عالمی مسئلے کا اجتماعی طور پر مقابلہ کیا جا سکے۔

وزیر اعظم نریندر مودی کی قیادت اور مرکزی وزیرِ داخلہ امت شاہ کی رہنمائی میں این سی بی نے منشیات کے استعمال کے خلاف ’’صفر برداشت‘‘ کی پالیسی پر اپنے غیر متزلزل عزم کا اعادہ کیا ہے۔ ادارہ قومی اور بین الاقوامی ایجنسیوں کے ساتھ قریبی تعاون کے ذریعے سرحد پار سرگرم بین الاقوامی منشیات نیٹ ورکس کے خاتمے کے لیے مسلسل کام کر رہا ہے۔

این سی بی نے عوام سے بھی اپیل کی ہے کہ وہ منشیات سے متعلق کسی بھی اطلاع کو ایم اے این اے ایس ہیلپ لائن (ٹول فری: 1933) پر فراہم کریں۔ اطلاع دینے والوں کی شناخت مکمل طور پر خفیہ رکھی جاتی ہے۔

******

ش ح۔ ش ا ر۔ ول

Uno-7148