ஜெய் சுவாமிநாராயண்!

இன்று நாம் அனைவரும் ஒரு சிறப்பான நிகழ்விற்குச் சாட்சிகளாக மாறிக் கொண்டிருக்கிறோம். பகவான் சுவாமிநாராயணின் சிக்ஷாபத்ரி 200ம் ஆண்டு விழாக் கொண்டாட்டத்தின் இந்தத் தருணம், நம் அனைவருக்கும் கிடைத்த நற்பேறாகும்; இந்த புனிதமான திருவிழாவில் நாம் அனைவரும் பங்கேற்பாளர்களாக மாறியுள்ளோம். இந்தப் புண்ணிய காலத்தில், உங்கள் துறவிகள் அனைவரையும் நான் வணங்குகிறேன். லார்ட் சுவாமிநாராயணின் கோடிக்கணக்கான சீடர்களுக்கு இந்த 200ம் ஆண்டு விழாவிற்காக எனது வாழ்த்துகளைத் தெரிவித்துக் கொள்கிறேன்.

நண்பர்களே,

இந்தியா ஞான யோகத்திற்கு அர்ப்பணிக்கப்பட்ட நாடாகும். ஆயிரக்கணக்கான ஆண்டுகள் பழமையான வேதங்கள் இன்றும் நமக்கு ஊக்கமளிப்பவையாக உள்ளன. நமது முனிவர்களும் துறவிகளும், சமகால காலத்திற்கு ஏற்பவும் வேதங்களின் ஒளியிலும், அக்காலத்தின் அமைப்புகளைத் தொடர்ச்சியாக மேம்படுத்தினர். வேதங்கள் முதல் உபநிடதங்கள் வரை, உபநிடதங்கள் முதல் புராணங்கள், ஸ்ருதிகள், ஸ்மிருதிகள், கதை சொல்லுதல், பாடுதல் என நமது பாரம்பரியம் இத்தகைய பலதரப்பட்ட பரிமாணங்களின் மூலம் தொடர்ந்து வலிமையடைந்து வந்தது.

நண்பர்களே,

காலத்தின் தேவைக்கேற்ப, வெவ்வேறு காலகட்டங்களில் மகாத்மாக்கள், முனிவர்கள் மற்றும் சிந்தனையாளர்கள் இந்தப் பாரம்பரியத்தில் புதிய அத்தியாயங்களைச் சேர்த்தனர். பகவான் சுவாமிநாராயணின் வாழ்க்கை நிகழ்வுகள் பொதுக் கல்வி மற்றும் பொதுச் சேவையுடன் தொடர்புடையவை என்பதை நாம் அனைவரும் அறிவோம். இந்த அனுபவத்தையே அவர் எளிய வார்த்தைகளில் விளக்கினார். சிக்ஷாபத்ரி வடிவில், பகவான் சுவாமிநாராயண் நமக்கு வாழ்க்கைக்கான விலைமதிப்பற்ற வழிகாட்டுதலை வழங்கியுள்ளார்.

நண்பர்களே,

இன்று, இந்த இருநூறாம் ஆண்டு விழாவின் சிறப்பான தருணம், சிக்ஷாபத்ரியிலிருந்து நாம் என்ன புதிய விஷயங்களைக் கற்றுக்கொள்கிறோம் என்பதையும், அதன் இலட்சியங்களை நமது வாழ்க்கையில் எந்த அளவிற்கு வாழ்ந்து காட்டுகிறோம் என்பதையும் மதிப்பீடு செய்வதற்கான வாய்ப்பை நமக்கு வழங்குகிறது.

நண்பர்களே,

பகவான் சுவாமிநாராயணின் வாழ்க்கை ஆன்மீகப் பயிற்சியுடன் கூடிய சேவையின் உருவகமாக இருந்தது. இன்று, அவரது சீடர்களால் சமூகம், தேசம் மற்றும் மனிதகுலத்தின் சேவைக்காகப் பல இயக்கங்கள் நடத்தப்பட்டு வருகின்றன. கல்வி மற்றும் ஆரோக்கியம் தொடர்பான திட்டங்கள், விவசாயிகளின் நலனுக்கான தீர்மானங்கள், நீர் மேலாண்மை தொடர்பான இயக்கங்கள் என இவை அனைத்தும் உண்மையிலேயே பாராட்டத்தக்கவை. சமூக சேவையை நோக்கிய உங்கள் பொறுப்புகளைத் துறவிகளும் ஹரி பக்தர்களுமான நீங்கள் தொடர்ந்து விரிவுபடுத்துவதைக் காண்பது மிகவும் ஊக்கமளிக்கிறது.

நண்பர்களே,

இன்று நாடு சுதேசி மற்றும் தூய்மை போன்ற மக்கள் இயக்கங்களை முன்னோக்கி எடுத்துச் செல்கிறது. 'உள்ளூர் பொருட்களுக்குக் குரல் கொடுப்போம்'  என்ற மந்திரத்தின் எதிரொலி ஒவ்வொரு வீட்டையும் சென்றடைகிறது. உங்கள் முயற்சிகள் இந்த இயக்கங்களுடன் இணைந்தால், சிக்ஷாபத்ரியின் இந்த இருநூறாம் ஆண்டு புனிதக் கொண்டாட்டம் இன்னும் மறக்க முடியாததாக மாறும். பண்டைய கையெழுத்துப் பிரதிகளைப் பாதுகாப்பதற்காக நாடு 'ஞான பாரதம்'  திட்டத்தைத் தொடங்கியுள்ளதை நீங்கள் அனைவரும் அறிவீர்கள். உங்களைப் போன்ற அறிவார்ந்த அமைப்புகள் இந்தப் பணியில் அதிக ஒத்துழைப்பு வழங்க வேண்டும் என்பது எனது கோரிக்கை. நமது இந்தியாவின் பண்டைய அறிவைப் பாதுகாக்க வேண்டும், அதன் அடையாளத்தைப் பாதுகாக்க வேண்டும், இதில் உங்கள் ஒத்துழைப்பு 'ஞான பாரதம்' திட்டத்தின் வெற்றியைப் புதிய உயரத்திற்கு எடுத்துச் செல்லும்.

நண்பர்களே,

இத்தருணத்தில், நாட்டில் சோமநாத் பெருமிதத் திருவிழா  எனும் பிரம்மாண்ட கலாச்சாரத் திருவிழா நடைபெற்று வருகிறது. சோமநாதர் ஆலயம் முதன்முதலில் சிதைக்கப்பட்டதிலிருந்து இப்போது வரை ஆயிரமாண்டு காலப் பயணத்தை 'சோமநாத் பெருமிதத் திருவிழாவாக நாடு கொண்டாடி வருகிறது. நீங்கள் அனைவரும் இந்தத் திருவிழாவிலும் இணைந்து, அதன் நோக்கங்களை ஒவ்வொருவரிடமும் கொண்டு செல்லப் பணியாற்ற வேண்டும் என்பது எனது கோரிக்கை. உங்கள் மூலம் இந்தியாவின் வளர்ச்சிப் பயணம் பகவான் சுவாமிநாராயணின் ஆசிகளைத் தொடர்ந்து இதுபோலவே பெறும் என்று நான் நம்புகிறேன். மீண்டும் ஒருமுறை, துறவிகள், ஹரி பக்தர்கள் மற்றும் யாத்ரீகர்கள் அனைவருக்கும் எனது மனமார்ந்த நல்வாழ்த்துகளைத் தெரிவித்துக் கொள்கிறேன்.

ஜெய் சுவாமிநாராயண்!

மிக்க நன்றி!

----

(Release ID:2217628)

AD/VK/KR