மகாராஷ்டிர ஆளுநர் திரு. ஆச்சார்யா தேவ்ரத் அவர்களே, மகாராஷ்டிர முதலமைச்சர் திரு. தேவேந்திர ஃபட்னாவிஸ் அவர்களே, மத்திய அமைச்சரவையில் உள்ள எனது சகாக்களான திரு. சர்பானந்த சோனோவால் அவர்களே, திரு. சாந்தனு தாக்கூர் அவர்களே மற்றும் திரு. கீர்த்தி வர்தன் சிங் அவர்களே, மகாராஷ்டிர துணை முதலமைச்சர்கள் திரு. ஏக்நாத் ஷிண்டே அவர்களே மற்றும் திரு. அஜித் பவார் அவர்களே, கப்பல் போக்குவரத்து மற்றும் இதர தொழில்துறை தலைவர்களே, இதர சிறப்பு விருந்தினர்களே, பெரியோர்களே மற்றும் தாய்மார்களே,

நண்பர்களே,

உலகளாவிய கடல்சார் தலைவர்கள் மாநாட்டிற்கு உங்கள் அனைவரையும் அன்புடன் வரவேற்கிறேன். இந்த நிகழ்வு 2016-ஆம் ஆண்டு மும்பையில் தொடங்கியது. இன்று இந்த உச்சிமாநாடு உண்மையான ஒரு உலகளாவிய நிகழ்வாக உருவெடுத்துள்ளது என்பது நம் அனைவருக்கும் மிகுந்த பெருமைக்குரிய விஷயமாகும். இந்த நிகழ்ச்சியில் 85-க்கும் மேற்பட்ட நாடுகளின் பிரதிநிதிகள் பங்கேற்பது ஒரு வலிமையான செய்தியை உலகுக்குச் சொல்கிறது. கப்பல் போக்குவரத்துத் துறையின் முன்னணி நிறுவனங்களின் தலைமைச் செயல் அதிகாரிகள் முதல் புத்தொழில் நிறுவனங்கள் வரை, கொள்கை வகுப்பாளர்கள் முதல் முதலீட்டாளர்கள் வரை அனைவரும் இன்று இங்கு கூடியிருக்கிறார்கள். சிறிய தீவு நாடுகளின் பிரதிநிதிகளும் இதில் கலந்து கொண்டுள்ளனர். உங்கள் அனைவரது கூட்டுத் தொலைநோக்குப் பார்வை, இந்த உச்சிமாநாட்டின் ஒருங்கிணைப்பையும் ஆற்றலையும் மேம்படுத்தியுள்ளது.

நண்பர்களே,

கப்பல் போக்குவரத்துத் துறை தொடர்பான பல முக்கியமான திட்டங்கள் இன்று தொடங்கி வைக்கப்பட்டுள்ளன. இத்துறையில் பல இலட்சம் கோடி ரூபாய் மதிப்பிலான புரிந்துணர்வு ஒப்பந்தங்களும் கையெழுத்தாகியுள்ளன. இது பாரதத்தின் கடல்சார் ஆற்றல் மீது உலகம் கொண்டுள்ள வளர்ந்து வரும் நம்பிக்கையைத் தெளிவாகக் காட்டுகிறது. இந்த நிகழ்வில் நீங்கள் பங்கேற்பது நமது பகிரப்பட்ட அர்ப்பணிப்பின் பிரதிபலிப்பாகும்.

நண்பர்களே,

இந்த 21-ம் நூற்றாண்டில், நாட்டின் கடல்சார் துறை மிகுந்த வேகத்துடனும் புத்துயிருடனும் முன்னோக்கிச் சென்று கொண்டிருக்கிறது. குறிப்பாக, 2025-ம் ஆண்டு பாரதத்தின் கடல்சார் தொழில்துறைக்கு ஒரு மைல்கல் ஆண்டாக அமைந்துள்ளது. இந்த ஆண்டின் சில முக்கிய சாதனைகளை நான் இங்கு சுட்டிக்காட்ட விரும்புகிறேன். விழிஞ்ஞம்  துறைமுகத்தில் பாரதத்தின் முதல் ஆழ்கடல் சர்வதேச சரக்கு பரிமாற்ற முனையம் இப்போது செயல்பாட்டுக்கு வந்துள்ளது. சமீபத்தில், உலகின் மிகப்பெரிய கொள்கலன் கப்பல் அங்கு வந்தது; இது ஒவ்வொரு இந்தியருக்கும் மட்டற்ற பெருமிதத்தை அளித்த தருணமாகும்.

2024-25 நிதியாண்டில், இந்தியாவின் முக்கிய துறைமுகங்கள் இதுவரை இல்லாத அளவிற்கு அதிக அளவிலான சரக்குகளைக் கையாண்டு புதிய சாதனை படைத்துள்ளன. அதுமட்டுமல்லாமல், ஒரு இந்தியத் துறைமுகம் முதல்முறையாக மெகாவாட் அளவிலான உள்நாட்டுப் பசுமை ஹைட்ரஜன் வசதியைத் தொடங்கியுள்ளது; இந்தச் சாதனையை நமது கண்ட்லா துறைமுகம் நிகழ்த்தியுள்ளது. மற்றொரு முக்கிய மைல்கல்லாக, ஜே.என்.பி.டி (ஜவஹர்லால் நேரு துறைமுகம்)-ல் பாரத் மும்பை கொள்கலன் முனையத்தின் இரண்டாம் கட்டம் தொடங்கி வைக்கப்பட்டுள்ளது. இது முனையத்தின் கையாளும் திறனை இரட்டிப்பாக்கியுள்ளதுடன், இதனை பாரதத்தின் மிகப்பெரிய கொள்கலன் துறைமுகமாகவும் மாற்றியுள்ளது. பாரதத்தின் துறைமுக உள்கட்டமைப்பில் மேற்கொள்ளப்பட்ட மிகப்பெரிய நேரடி அந்நிய முதலீட்டின்  காரணமாகவே இது சாத்தியமானது; இதற்காக எமது கூட்டாளிகளான சிங்கப்பூருக்கு நான் எனது சிறப்பான நன்றிகளைத் தெரிவித்துக் கொள்கிறேன்.

நண்பர்களே,

இந்த ஆண்டு, கடல்சார் துறையில் அடுத்த தலைமுறை சீர்திருத்தங்களை நோக்கிய முக்கிய நடவடிக்கைகளையும் பாரதம் எடுத்துள்ளது. ஒரு நூற்றாண்டு பழமையான காலனித்துவ கப்பல் போக்குவரத்துச் சட்டங்களை நாம் நீக்கிவிட்டு, அவற்றுக்குப் பதிலாக நவீன மற்றும் எதிர்காலத் தேவைகளைக் கருத்தில் கொண்ட 21-ம் நூற்றாண்டுச் சட்டங்களைக் கொண்டு வந்துள்ளோம். இந்த புதிய சட்டங்கள் மாநில கடல்சார் வாரியங்களுக்கு அதிகாரம் அளிக்கின்றன; பாதுகாப்பு மற்றும் நிலைத்தன்மைக்கு முக்கியத்துவம் அளிக்கின்றன; மேலும் துறைமுக நிர்வாகத்தின் டிஜிட்டல்மயமாக்கலை விரிவுபடுத்துகின்றன.

நண்பர்களே,

வணிகக் கப்பல் போக்குவரத்துச் சட்டத்தின் கீழ், இந்திய கடல்சார் சட்டங்களை சர்வதேச உடன்படிக்கைகளுடன் நாம் ஒருங்கிணைத்துள்ளோம். இந்த ஒருங்கிணைப்பு பாதுகாப்பு உத்தரவாதத்தை வலுப்படுத்தியுள்ளதுடன், தொழில் புரிவதை எளிதாக்கியுள்ளது மற்றும் அரசின் தலையீட்டைக் குறைத்துள்ளது. இந்த முயற்சிகள் முதலீட்டாளர்கள் மற்றும் அனைத்து பங்குதாரர்களின் நம்பிக்கையை மேலும் அதிகரிக்கும் என்று நான் நம்புகிறேன்.

நண்பர்களே,

கடலோரக் கப்பல் போக்குவரத்துச் சட்டம் வர்த்தகத்தை மென்மையாகவும் எளிதாகவும் மாற்றும் வகையில் வடிவமைக்கப்பட்டுள்ளது. இது விநியோகச் சங்கிலிப் பாதுகாப்பை மேம்படுத்துவதுடன், பாரதத்தின் நீண்ட கடற்கரை நெடுகிலும் சமச்சீரான வளர்ச்சியை உறுதி செய்கிறது. அதேபோல், 'ஒரே நாடு - ஒரே துறைமுக நடைமுறை'  என்பது துறைமுகம் சார்ந்த நடைமுறைகளைத் தரப்படுத்துவதுடன், ஆவணப் பணிகளைப் பெருமளவு குறைக்கும்.

நண்பர்களே,

கப்பல் போக்குவரத்துத் துறையில் மேற்கொள்ளப்பட்டுள்ள இந்தச் சீர்திருத்தங்கள், ஒரு வகையில் எங்களது பத்தாண்டுகாலச் சீர்திருத்தப் பயணத்தின் தொடர்ச்சியாகும். கடந்த பத்து முதல் பதினொரு ஆண்டுகளைத் திரும்பிப் பார்த்தால், பாரதத்தின் கடல்சார் துறையில் ஏற்பட்டுள்ள மாற்றம் உண்மையிலேயே வரலாற்றுச் சிறப்புமிக்கது. 'கடல்சார் இந்தியா தொலைநோக்குத் திட்டத்தின்' கீழ், 150-க்கும் மேற்பட்ட புதிய முயற்சிகள் தொடங்கப்பட்டுள்ளன. இதன் விளைவாக, முக்கிய துறைமுகங்களின் கையாளும் திறன் கிட்டத்தட்ட இரட்டிப்பாகியுள்ளது; கப்பல்கள் வந்து செல்லும் நேரம் கணிசமாகக் குறைக்கப்பட்டுள்ளது; கப்பல் சுற்றுலா  புதிய வேகத்தைப் பெற்றுள்ளது; உள்நாட்டு நீர்வழிப் போக்குவரத்தில் சரக்கு போக்குவரத்து 700%-க்கும் மேல் வளர்ச்சியடைந்துள்ளது; செயல்பாட்டில் உள்ள நீர்வழிப் பாதைகளின் எண்ணிக்கை 3-லிருந்து 32-ஆக அதிகரித்துள்ளது; மேலும் எமது துறைமுகங்களின் நிகர ஆண்டு உபரி வருமானம் ஒரே தசாப்தத்தில் ஒன்பது மடங்கு அதிகரித்துள்ளது.

நண்பர்களே,

இன்று இந்தியாவின் துறைமுகங்கள் வளரும் நாடுகளிலேயே மிகவும் திறமையானவையாகக் கருதப்படுகின்றன என்பதும், பல அம்சங்களில் வளர்ந்த நாடுகளின் துறைமுகங்களை விடவும் சிறப்பாகச் செயல்படுகின்றன என்பதும் பெருமைக்குரிய விஷயமாகும். இன்னும் சில புள்ளிவிவரங்களைப் பகிர்கிறேன்: பாரதத்தில் சராசரி கொள்கலன் தங்கும் நேரம் மூன்று நாட்களுக்கும் குறைவாகக் குறைந்துள்ளது; இது பல வளர்ந்த நாடுகளை விடச் சிறந்ததாகும். கப்பல்கள் வந்து செல்லும் சராசரி நேரம் 96 மணிநேரத்திலிருந்து வெறும் 48 மணிநேரமாகக் குறைந்துள்ளது. இந்த முன்னேற்றங்கள் இந்தியத் துறைமுகங்களை உலகளாவிய கப்பல் போக்குவரத்து நிறுவனங்களுக்கு மிகவும் போட்டித்தன்மை வாய்ந்ததாகவும், ஈர்க்கக்கூடியதாகவும் மாற்றியுள்ளன. உலக வங்கியின் லாஜிஸ்டிக்ஸ் செயல்திறன் குறியீட்டிலும் இந்தியா குறிப்பிடத்தக்க முன்னேற்றத்தைக் காட்டியுள்ளது.

நண்பர்களே,

கப்பல் போக்குவரத்துத் துறையின் மனிதவள மேம்பாட்டிலும் இந்தியா உலக அளவில் முத்திரை பதித்து வருகிறது. இந்திய மாலுமிகளின் எண்ணிக்கை கடந்த தசாப்தத்தில் 1.25 இலட்சத்திலிருந்து 3 இலட்சத்திற்கும் அதிகமாக உயர்ந்துள்ளது. உலகில் நீங்கள் எந்தக் கடற்கரைக்குச் சென்றாலும், அங்கு இந்திய மாலுமிகளைக் கொண்ட ஒரு கப்பலை நிச்சயமாகக் காணலாம். இன்று, மாலுமிகளின் எண்ணிக்கையில் உலகிலேயே முதல் மூன்று நாடுகளுக்குள் இந்தியா இடம்பிடித்துள்ளது.

நண்பர்களே,

21-ம் நூற்றாண்டின் கால் பகுதி ஏற்கனவே கடந்துவிட்டது. இந்த நூற்றாண்டின் அடுத்த 25 ஆண்டுகள் இன்னும் முக்கியமானதாக இருக்கப்போகின்றன. அதனால்தான் எமது கவனம் 'நீலப் பொருளாதாரம்'  மற்றும் நிலையான கடலோர வளர்ச்சியின் மீது உள்ளது. பசுமைத் தளவாடங்கள் துறைமுக இணைப்பு மற்றும் கடலோரத் தொழில் தொகுப்புகள் ஆகியவற்றிற்கு நாம் அதிக முக்கியத்துவம் அளித்து வருகிறோம்.

நண்பர்களே,

கப்பல் கட்டும் கலை இன்று பாரதத்தின் மிக முக்கியமான முன்னுரிமைகளில் ஒன்றாக உள்ளது. ஒரு காலத்தில் பாரதம் உலகின் முதன்மையான கப்பல் கட்டும் மையங்களில் ஒன்றாகத் திகழ்ந்தது. இங்கிருந்து வெகு தொலைவில் இல்லாத அஜந்தா குகைகளில், ஆறாம் நூற்றாண்டைச் சேர்ந்த ஓவியம் ஒன்றில் மூன்று பாய்மரங்களைக் கொண்ட கப்பல் வடிவமைப்பு சித்தரிக்கப்பட்டுள்ளதைக் காணலாம். மற்ற நாடுகள் பல நூற்றாண்டுகளுக்குப் பின்னரே ஏற்றுக்கொண்ட இத்தகைய மேம்பட்ட மூன்று பாய்மரக் கப்பல் வடிவமைப்பை, ஆறாம் நூற்றாண்டிலேயே ஒரு கலைப்படைப்பில் பார்க்க முடிகிறது என்றால் கற்பனை செய்து பாருங்கள்; இதில் பல நூற்றாண்டுகள் இடைவெளி இருந்தது.

நண்பர்களே,

பாரதத்தில் கட்டப்பட்ட கப்பல்கள் ஒரு காலத்தில் உலக வர்த்தகத்தில் முக்கியப் பங்கு வகித்தன. பின்னர், நாம் கப்பல் உடைக்கும் துறையிலும் முன்னேறினோம். இப்போது, கப்பல் கட்டும் கலையில் பாரதம் மீண்டும் புதிய உயரங்களை எட்ட தனது முயற்சிகளை முடுக்கிவிட்டுள்ளது. பெரிய கப்பல்களுக்கு 'உள்கட்டமைப்பு சொத்து' என்ற அந்தஸ்தை பாரதம் இப்போது வழங்கியுள்ளது. இந்த கொள்கை முடிவு இங்கு கூடியிருக்கும் அனைத்து கப்பல் கட்டுபவர்களுக்கும் புதிய வழிகளைத் திறந்துவிடும். இது புதிய நிதி விருப்பங்களை வழங்கும், வட்டிச் செலவுகளைக் குறைக்கும் மற்றும் கடன் வசதிகளைப் பெறுவதை எளிதாக்கும்.

நண்பர்களே,

இந்தச் சீர்திருத்தத்தை மேலும் விரைவுபடுத்த, அரசு சுமார் 70,000 கோடி ரூபாய் முதலீடு செய்யும். இது உள்நாட்டுத் திறனை மேம்படுத்தும், நீண்ட கால நிதியுதவியை ஊக்குவிக்கும், புதிய மற்றும் ஏற்கனவே உள்ள  கப்பல் கட்டும் தளங்களின் வளர்ச்சிக்கு வழிவகுக்கும்; மேலும் மேம்பட்ட கடல்சார் திறன்களை உருவாக்கவும், நமது இளைஞர்களுக்கு லட்சக்கணக்கான வேலைவாய்ப்புகளை உருவாக்கவும் உதவும். இது உங்கள் அனைவருக்கும் புதிய முதலீட்டு வாய்ப்புகளையும் பெற்றுத்தரும்.

நண்பர்களே,

இது சத்ரபதி சிவாஜி மகாராஜ் வாழ்ந்த மண். சத்ரபதி சிவாஜி மகாராஜ் கடல்சார் பாதுகாப்பிற்கு அடித்தளம் அமைத்தது மட்டுமல்லாமல், அரபிக்கடல் வர்த்தகப் பாதைகளில் பாரதத்தின் வலிமையையும் பறைசாற்றினார். கடல்கள் என்பவை வெறும் எல்லைகள் மட்டுமல்ல, அவை வாய்ப்புகளுக்கான நுழைவாயில்கள் என்பதையும் அவரது தொலைநோக்குப் பார்வை நமக்குக் கற்றுக்கொடுத்தது. இன்று, பாரதம் அதே உணர்வுடனும் தொலைநோக்குப் பார்வையுடனும் முன்னோக்கிச் செல்கிறது.

நண்பர்களே,

உலகளாவிய விநியோகச் சங்கிலியின் உறுதித்தன்மையை வலுப்படுத்துவதே பாரதத்தின் நோக்கமாகும். நாம் உலகத்தரம் வாய்ந்த மெகா துறைமுகங்களை உருவாக்கி வருகிறோம்; குறிப்பாக இங்கு மகாராஷ்டிராவின் வாதவனில், 76,000 கோடி ரூபாய் மதிப்பில் புதிய துறைமுகம் கட்டப்பட்டு வருகிறது. எமது முக்கிய துறைமுகங்களின் கையாளும் திறனை நான்கு மடங்காக அதிகரிக்க நாம் பணியாற்றி வருகிறோம். கொள்கலன் மூலம் கையாளப்படும் சரக்குகளில் இந்தியாவின் பங்கினை அதிகரிக்கவும் நாம் விரும்புகிறோம்; இந்த இலக்குகளை அடைவதில் நீங்கள் எங்களது முக்கிய கூட்டாளிகளாக இருக்கிறீர்கள். உங்கள் கருத்துக்கள், கண்டுபிடிப்புகள் மற்றும் முதலீடுகளை நாம் வரவேற்கிறோம். உங்களுக்குத் தெரிந்தபடி, துறைமுகங்கள் மற்றும் கப்பல் போக்குவரத்துத் துறையில் 100% அந்நிய நேரடி முதலீட்டை இந்தியா அனுமதிக்கிறது. பொது-தனியார் பங்களிப்புகள் வேகமாக வளர்ந்து வருகின்றன. "இந்தியாவில் தயாரிப்போம், உலகிற்காகத் தயாரிப்போம்" என்ற தொலைநோக்குப் பார்வையின் கீழ் நாம் பல்வேறு சலுகைகளை வழங்கி வருகிறோம். முதலீடுகளை ஈர்க்க மாநில அரசுகளையும் நாம் ஊக்குவித்து வருகிறோம். எனவே, பல்வேறு நாடுகளைச் சேர்ந்த முதலீட்டாளர்களுக்கு, பாரதத்தின் கப்பல் போக்குவரத்துத் துறையில் இணைந்து செயல்படவும், அதனை விரிவுபடுத்தவும் இதுவே சரியான நேரம், ஆகச் சிறந்த தருணமாகும்.

நண்பர்களே,

இந்தியாவின் மற்றொரு பெரிய பலம் எமது துடிப்பான ஜனநாயகம் மற்றும் நம்பகத்தன்மை ஆகும். உலகளாவிய கடல் சீற்றமாக இருக்கும்போது, உலகம் ஒரு நிலையான கலங்கரை விளக்கத்தைத் தேடுகிறது; இந்தியா அந்த கலங்கரை விளக்கத்தின் பாத்திரத்தை மிகுந்த வலிமையுடன் வகிக்க முடியும். உலகளாவிய பதட்டங்கள், வர்த்தகத் தடைகள் மற்றும் மாறிவரும் விநியோகச் சங்கிலிகளுக்கு மத்தியில், உத்திசார் சுயாட்சி அமைதி மற்றும் உள்ளடக்கிய வளர்ச்சியின் அடையாளமாக பாரதம் திகழ்கிறது. எமது கடல்சார் மற்றும் வர்த்தக முயற்சிகள் இந்த விரிவான தொலைநோக்குப் பார்வையின் ஒரு பகுதியாகும். இதற்கு ஒரு சிறந்த உதாரணம், இந்தியா-மத்திய கிழக்கு-ஐரோப்பா பொருளாதார வழித்தடம் ஆகும். இது உலகளாவிய வர்த்தகப் பாதைகளை மறுவரையறை செய்வதுடன், தூய்மையான எரிசக்தி மற்றும் சீர்மிகு தளவாடங்களை  ஊக்குவிக்கும்.

நண்பர்களே,

இன்று எமது கவனம் உள்ளடக்கிய கடல்சார் வளர்ச்சியின் மீதும் உள்ளது. தொழில்நுட்பம், பயிற்சி மற்றும் உள்கட்டமைப்பு ஆகியவற்றின் மூலம் சிறிய தீவு வளரும் நாடுகளும் மற்றும் மிகவும் குறைவான வளர்ச்சியடைந்த நாடுகளும்  அதிகாரம் பெறும்போது மட்டுமே இதனைச் சாதிக்க முடியும். பருவநிலை மாற்றம், விநியோகச் சங்கிலித் தடைகள், பொருளாதார நிச்சயமற்ற தன்மை மற்றும் கடல்சார் பாதுகாப்பு ஆகிய சவால்களை நாம் அனைவரும் இணைந்து எதிர்கொள்ள வேண்டும்.

நண்பர்களே,

அமைதி, முன்னேற்றம் மற்றும் செழுமையை மேம்படுத்தவும், உலகிற்கு ஒரு நிலையான எதிர்காலத்தை உருவாக்கவும் நாம் அனைவரும் ஒன்றிணைவோம். இந்த உச்சிமாநாட்டின் ஒரு பகுதியாக இருப்பதற்காக உங்கள் அனைவருக்கும் மீண்டும் ஒருமுறை எனது நல்வாழ்த்துகளையும் பாராட்டுகளையும் தெரிவித்துக் கொள்கிறேன்.

மிக்க நன்றி.

***

(Release ID: 2183906)

AD/VK/PD