মহারাস্ত্রাগী রাজ্যপাল আচার্য় দেবব্রতজী, মহারাস্ত্রাগী মুখ্য মন্ত্রী দেবেন্দ্র ফদনবীসজী, কেন্দ্রগী মন্ত্রীমন্দলদা লৈরিবা ঐহাক্কী মরুপশিং সর্বানন্দ সোনোৱালজী, শান্তনু থাকুরজী, কীর্তি বর্ধন সিংহজী, মহারাস্ত্রাগী দিপুতি সি.এম. একনাথ শিন্দেজী, অজিত পৱারজী, শিপ্পিং অমসুং অতোপ্পা ইন্দস্ত্রীগী লুচিংবশিং, অতোপ্পা মশক নাইবা মীওইশিং, নুপীশিং অমসুং নুপাশিং!

মরুপশিং,

গ্লোবেল মেরিতাইম লীদর্স কনক্লেবতা ময়াম পুম্নমকপু ঐহাক্না তরাম্না ওকচরি। থৌরম অসি 2016দা মুম্বাইদা হৌদোকখিবনি অমসুং ঙসিদি মসিগী সম্মিৎ অসি মালেমগী থৌরম অমা ওইরকপা অসি ঐখোয় পুম্নমক্কী ওইনা য়াম্না নুংঙাইবা ৱাফম অমনি। ঙসিগী থৌরম অসিদা লৈবাক 85 হেনবনা শরুক য়াবা অসিনা য়াম্না মরু ওইবা পাউজেল অমা পীরি। শিপ্পিং জাইন্তশিং অমসুং মখোয়গী CEOশিংদগী হৌরগা স্তার্ত-অপশিং, পোলিসী মেকরশিংদগী হৌরগা ইনভেস্তরশিং ফাওবা, মীপুম খুদিংমক মফম অসিদা লৈরি। অপীকপা ইথৎ লৈবাক্কী মীহুৎশিংসু মফম অসিদা লৈরি। ময়াম পুম্নমক্কী মীৎয়েং অসিনা মীফম অসিগী সিনর্জী অমসুং ইনর্জী অনিমক হেনগৎহনখ্রে।

মরুপশিং,

মফম অসিদা শিপ্পিং সেক্তরগী প্রোজেক্ত কয়া অমা হৌদোকখ্রে। লুপা করোর লাখ কয়াগী MOUশিং খুৎয়েক পীনখ্রে। মসিনা ভারতকী মেরিতাইম কেপাসিতীশিংদা মালেমনা থাজবা থম্লিবা অদু উৎলি। থৌরম অসিদা অদোমনা শরুক য়াবা অসি ঐখোয়গী অপুনবা ইন্তিগ্রেসনগী খুদম অমনি।

মরুপশিং,

21শুবা চহিচাগী মতম অসিদা, ভারতকী মেরিতাইম সেক্তর অসি য়াম্না থুনা অমসুং ইনর্জীগা লোয়ননা চাউখৎলক্লি। ভারতকী মেরিতাইম সেক্তরগী ওইনা 2025 অসি মরুওইবা চহি অমা ওইগনি। ঐহাক্না অদোমগা লোয়ননা চহি অসিগী মরুওইবা মাইপাকপশিং শেয়র তৌবা পাম্মি! ভারতকী অহানবা দীপৱাতর ইন্তরনেস্নেল ত্রান্সশিপমেন্ত হব, বিঝিঞ্জাম পোর্ত অসি হৌজিক মথৌ তৌরে। ইকুই কুইদ্রিঙৈদা, মালেমগী খ্বাইদগী চাউবা কন্তেনরগী জহাজ অদু মফম অদুদা য়ৌখি। মসি ভারত মচা খুদিংমক্কী চাউথোকচনীংঙাই ওইবা মীকুপ অমনি। 2024-25দা, ভারতকী মরুওইবা পোর্তশিংনা খ্বাইদগী ৱাংবা কার্গো হেন্দল তৌদুনা অনৌবা রেকোর্দ অমা শেমখি। মসিগী মথক্তা, অহানবা ওইনা, ভারতকী পোর্ত অমনা মেগাৱাৎ স্কেলগী ইন্দিজেনস গ্রীন হায়দ্রোজেন ফেসিলিতী অমা হৌদোকখ্রে। ঐখোয়গী কন্দলা পোর্তনা মসিগী মাইপাকপা অসি ফংলে। JNPTদা অতোপ্পা মরু ওইবা চাউখৎ-থৌরাং অমা পাংথোকখ্রে: ভারত মুম্বাই কন্তেনর তর্মিনেল ফেজ 2সু থবক হৌখ্রে। মসিনা তর্মিনেল অসিগী হেন্দলিং কেপাসিতী শরুক অনি হেনগৎহল্লে, মসিনা ভারতকী খ্বাইদগী চাউবা কন্তেনর পোর্ত ওইহল্লে। মসি ভারতকী পোর্ত ইনফ্রাস্ত্রকচরদা খ্বাইদগী চাউবা FDIনা মরম ওইদুনা ওইথোকপা ঙমখ্রে। মসিগীদমক্তা ঐহাক্না সিঙ্গাপুরগী ঐহাক্কী মরুপশিংবুসু অখন্ননা থাগৎপা ফোংদোকচরি।

মরুপশিং,

চহি অসিদা, ভারতনা মাগী মেরিতাইম সেক্তরদা নেক্স জেনরেসনগী রিফোর্মশিংগী মায়কৈদা অচৌবা খোঙথাং কয়া লৌখৎখ্রে। ঐখোয়না চহি চা অমমগী মমাংগী কোলোনিএল শিপ্পিং লোশিংবু 21শুবা চহিচাগী মোদর্ন অমসুং ফ্যুচরিস্তিক্কী ওইবা লোশিংনা মহুৎ শিনখ্রে। অনৌবা আইনশিং অসিনা স্তেত মেরিতাইম বোর্দশিংবু শক্তি পীরি, সেফতী অমসুং সস্তেনেবিলিতীদা মীৎয়েং থম্লি, অমসুং পোর্ত মেনেজমেন্তদা দিজিতেলাইজেসন হেনগৎহল্লি।

মরুপশিং,

মর্চেন্ত শিপ্পিং এক্ততা, ঐখোয়না মালেমগী থাক্তা ভারতকী আইনশিং অসি মালেমগী থাক্তা চৎনবা কনভেন্সনশিংগা লোয়ননা মান্নহনখ্রে। মসিনা সেক্যুরিতীগী এশুরেন্স হেনগৎহল্লে, ললোন-ইতিক তৌবদা লাইথোকহল্লে, অমসুং সরকারগী ইন্তরফরেন্স হন্থহল্লে। ঐহাক্না থাজবা থম্লি মদুদি মসিগী খোঙথাং অসিনা অদোমগী থাজবা, ঐখোয়গী ইনভেস্তরশিংগী থাজবা হেন্না হেনগৎহল্লগনি।

মরুপশিং,

কোস্তেল শিপ্পিং এক্ত অসি ললোন-ইতিক লাইথোকহন্নবগীদমক শেমখ্রে। মসিনা সপ্লাই চেনগী সেক্যুরিতী মপাঙ্গল কনখৎহল্লি। মসিনা ভারতকী অশাংবা কোস্তলাইন্দা চপ মান্নবা চাউখৎ-থৌরাংসু লৈহল্লগনি। মতৌ অসুম্না, ৱান নেসন - ৱান পোর্ত প্রোসেসনা পোর্তকা মরী লৈনবা থৌওংশিংবু স্তেন্দর্দাইজ তৌরগনি অমসুং দোক্যুমেন্তেসন য়াম্না হন্থহল্লগনি।

মরুপশিং,

শিপ্পিং সেক্তরদা শেমদোক-শাদোকপা অসি হৌখিবা চহি তরাগী খুজিং অসিদা ঐখোয়না শেমদোক-শাদোকপগী খোঙচৎকী মখা তাবনি। ঐখোয়না হৌখিবা চহি 10-11 অসিদা য়েংবীরবদি, ভারতকী মেরিতাইম সেক্তরদা থোকখিবা অহোংবশিং অসি পুৱারী ওইরি। মেরিতাইম ইন্দিয়া ভিজনগী মখাদা অনৌবা খোঙথাং 150 হেন্না হৌদোকখ্রে। মখোয়না মরুওইবা পোর্তশিংগী কেপাসিতী শরুক অনি হেনগৎহনখ্রে, তর্ন-অরাউন্দ তাইম য়াম্না হন্থহনখ্রে, ক্রুজ তুরিজমদা অনৌবা থৌনা অমা ফংখ্রে, ঙসি ইন্তলেন্দ ৱাতরৱেজশিংদা কার্গো মুভমেন্তদা চাদা 700 হেনগৎখ্রে, ওপরেস্নেল ৱাতরৱেজশিংগী মশিং অহুমদগী কুনথ্রানিথোইদা হেনগৎখ্রে, ঐখোয়গী পোর্তশিংগী নেৎ এন্যুএল সরপ্লসসু দিকেদ অমদা শরুক মাপন হেনগৎখ্রে।

মরুপশিং,

ঙসিদি ভারতকী পোর্তশিং অসি চাউখৎলক্লিবা মালেমগী পোর্তশিংগী মরক্তা খ্বাইদগী ইফিসিএন্ত ওইবা পোর্তশিংগী মরক্তা অমা ওইরে হায়বসিদা ঐখোয়না চাউথোকচবা পোকই। তাঙ্কক কয়াদা, মখোয়না চাউখৎলবা মালেমগী পোর্তশিংদগী হেন্না ফবা থবকশিং তৌরি। ঐহাক্না অদোমদা স্তেতিস্তিক্স খরা পীজগে। ঙসিদি ভারত্তা কন্তেনরশিং অদুগী দ্বেল তাইম অসি নুমিৎ হুমনিদগী তারে। মসি চাউখৎলবা লৈবাক কয়াদগী হেন্না ফৈ। জহাজ অমগী চাংচত্তা চত্থোক চৎশিন তৌবগী মতম অসি পুং 96তগী পুং 48দা হন্থরে। মসিনা ভারতকী পোর্তশিং অসি মালেমগী শিপ্পিং লাইনশিংগীদমক্তা হেন্না কম্পিতিতিব অমসুং পুক্নিং চিংশিনবা ঙম্বা ওইহল্লে। ভারতনা ৱার্ল্দ বেঙ্ককী লোজিস্তিক্স পর্ফোমেন্স ইন্দেক্সতা মশক থোক্না ফগৎলক্লি।

অমসুং মরুপশিং,

ভারতনা শিপ্পিং সেক্তরগী হ্যুমেন রিসোর্সকী লমদা খোঙজেল য়াংনা চংশিল্লি। হৌখিবা দিকেদ অমদা ভারতকী সমুদ্র চৎপা মীশিংগী মশিং লাখ 1.25দগী 300,000দা হেনখ্রে। অদোম্না মালেমগী কোস্তলাইন অমা হেক্তদা চৎলবদি, অদোম্না ভারতকী সমুদ্র চৎপা মীওই অমা পুদুনা চৎলিবা জহাজ অমা থেংনগনি। ঙসিদি, ভারত অসি সমুদ্রদা চৎপা মীশিংগী মশীংগী মতুং ইন্না মালেমগী খ্বাইদগী মকোক থোংবা লৈবাক অহুমগী মনুংদা লৈরি।

মরুপশিং,

21শুবা চহি-চাগী ক্বার্তর অমা হৌখ্রে। মথংগী চহি 25 অসি হেন্না মরু ওইগনি। মরম অসিনা, ঐখোয়গী মীৎয়েং অসি "ব্লু ইকোনোমী", "সস্তেনেবল কোস্তেল দিবেলপমেন্ত", অমসুং ঐখোয়না গ্রীন লোজিস্তিক্স, পোর্ত কনেক্তিবিতী, অমসুং কোস্তেল ইন্দস্ত্রীএল ক্লস্তরশিংদা মরুওইবা পীরি।

মরুপশিং,

ঙসি ভারতকী ওইনা শিপ বিল্দিং অসিসু খ্বাইদগী মরুওইবা অমনি। মতম অমদা ভারত অসি মালেমগী মরুওইবা শিপ বিল্দিং সেন্তর অমা ওইরম্মি। এজান্তা শুরুশিং অসি মফমসিদগী য়াম্না লাপ্না লৈতে। মফম অদুদা, নহাক্না তরুকশুবা চহি চাগী পেন্তিং অমা উগনি, মসিদা মস্তেদ শিপ অহুমগী দিজাইন উৎলি। তরুকশুবা চহি চাগী পেন্তিং অমদা য়াওরিবা মস্তেদ শিপ অহুমগী দিজাইন অদু অদোম্না ৱাখলদা শাগৎপীয়ু। মসিগী দিজাইন অসি অতোপ্পা লৈবাকশিংনা চহি চা কয়াগী মতুংদা শিজিন্নখি; চহি চা কয়াগী গেপ লৈখি।

মরুপশিং,

ভারত্তা শাবা জহাজশিং অসি মালেমগী ললোন-ইতিক্কী মরু ওইবা শরুক অমা ওইরম্মি। মতুংদা ঐখোয়না শিপব্রেকিংগী লমদা খুমাং চাউশিল্লকখি। হৌজিক, ভারতনা নৌনা শিপ-মেকিংদা অনৌবা অৱাংবা থাক্তা য়ৌনবা হোৎনরি। ভারতনা অচৌবা জহাজশিংদা ইনফ্রাস্ত্রকচর এসেৎকী থাক পীরি। মসিগী পোলিসীগী ৱারেপ অসিনা প্রোগ্রাম অসিদা শরুক য়ারিবা শিপ বিল্দর পুম্নমক্কীদমক অনৌবা লম্বীশিং হাংদোক্কনি। মসিনা ফাইনান্সিংগী অনৌবা ওপ্সনশিং ফংহল্লগনি, শেন্দোইগী চাদিং হন্থহল্লগনি, অমসুং ক্রেদিৎ ফংহনবদা হেন্না লায়থোকহল্লগনি।

অমসুং মরুপশিং,

মসিগী রিফোর্ম অসি খোঙজেল য়াংশিন্নবা, সরকারনা চাউরাক্না লুপা করোর 70,000 থাদগনি। মসিনা দোমেস্তিক কেপাসিতী হেনগৎহল্লগনি, মতম শাংনা শেল থাদবা হেনগৎহল্লগনি, গ্রীনফিল্দ অমসুং ব্রাউনফিল্দ শিপয়ার্দশিং চাউখৎহল্লগনি, অৱাংবা থাক্কী মেরিতাইম স্কিলশিং চাউখৎহল্লগনি, অমসুং নহারোলশিংদা থবক মিলিয়ন কয়া ফংহল্লগনি। অমসুং মসিনা ময়াম পুম্নমক্কীদমক্তা ইনভেস্তমেন্তকী অনৌবা লম্বীশিংসু হাংদোক্কনি।

মরুপশিং,

মসিগী লম অসি ছত্রপতি শিবাজী মহারাজকী লমনি। ছত্রপতি শিবাজী মহারাজনা মেরিতাইম সেক্যুরিতীগী য়ুম্ফম থোনবতা নত্তনা আরবিয়ন সীগী ললোন-ইতিক্কী লম্বীশিংদা ভারতকী শক্তিগী ফিরালসু চিংখৎখি। সমুদ্রশিং অসি ঙমখৈশিং খক্তা নত্তে, খুদোংচাবশিংগী থোঙজাওশিংসু ওইরি হায়বসি মহাক্কী মীৎয়েং অদুনা ঐখোয়দা তাকখি। ঙসিদি, ভারত অসি মান্নবা ভিজন অমগা লোয়ননা মাংলোমদা চংশিল্লি।

মরুপশিং,

ঙসিদি ভারতনা মালেমগী থাক্তা সপ্লাই চেনগী রেসিলিয়েন্স মপাঙ্গল কনখৎহনবা পাম্লি। ঐখোয়না মালেমগী থাক্কী মেগা পোর্তশিং শেমগৎনবা হোৎনরি। মহারাস্ত্রাগী ভাধবনদা অনৌবা পোর্ত অমা লুপা করোর 76,000গী শেনফমগা লোয়ননা শেমগৎলি। ঐখোয়না ঐখোয়গী মরুওইবা পোর্তশিংগী কেপাসিতী শরুক মরি হেনগৎহন্নবা থবক পায়খৎলি। ঐখোয়না কন্তেনরাইজ কার্গোদা ভারতকী শরুকসু হেনগৎহনবা পাম্মি, অমসুং পান্দমশিং অসি ফংবদা, ময়াম পুম্নমক ঐখোয়গী মরুওইবা পার্তনরশিংনি। ঐখোয়না অদোমগী ৱাখল্লোনশিং, ইন্নোবেসনশিং অমসুং ইনভেস্তমেন্তশিং তরাম্না ওকচরি। ভারতকী পোর্তশিং অমসুং শিপ্পিংদা 100% FDIগী অয়াবা লৈ হায়বা অদোম্না খঙই। পব্লিক-প্রাইবেৎ পার্তনরশিপশিং অসি হৌজিক য়াম্না থুনা হেনগৎলক্লি। "মেক ইন ইন্দিয়া, মেক ফোর ৱার্ল্দ"গী ভিজনগী মখাদা ইন্সেন্তিবশিংসু পীরক্লি। ঐখোয়না রাজ্যশিংদা ইনভেস্তমেন্তশিং পুক্নিং থৌগৎলি। মরম অদুনা, লৈবাক কয়াদগী লাকপা ইনভেস্তর পুম্নমক্কীদমক্তা, ভারতকী শিপ্পিং সেক্তরদা থবক তৌনবা অমসুং অদোমগী ললোন-ইতিক চাউথোকহন্নবা, মসি মতম ওইরে, অচুম্বা মতমনি।

মরুপশিং,

ভারতকী অতোপ্পা অখন্নবা শক্তম অমা হায়রগদি ঐখোয়গী অচৌবা দেমোক্রেসী অমসুং থাজবা য়াবা অসিনা ওইরি। মালেমগী সমুদ্রশিং অসি অয়েৎপা লৈরকপা মতমদা, মালেম অসিনা লেংদবা লাইৎহাউস অমা থিরকই। অদুগা ভারতনা অসিগুম্বা লাইৎহাউসকী শক্তম অসি য়াম্না মপাঙ্গল কন্না লৌবা ঙম্মী। মালেমগী ওইবা অৱাবা, ললোন-ইতিক্কী অৱাবা অমসুং সপ্লাই চেন হোংলকপগী মরক্তা, ভারত অসি স্ত্রেতেজিক ওতোনোমী, শান্তি অমসুং ইনক্লুসিব গ্রোথকী খুদম্নি। ঐখোয়গী মেরিতাইম অমসুং ত্রেদকী খোঙথাংশিং অসি হেন্না চাউবা মীৎয়েং অসিগী শরুক অমনি। মসিগী খুদম অমা হায়রবদি ইন্দিয়া-মিদ্দল ইস্ত-য়ুরোপ ইকোনোমিক কোরিদোরনি। মসিনা ললোন-ইতিক্কী লম্বীশিং অমুক হন্না মশক তাক্লগনি অমসুং ক্লিন ইনর্জী অমসুং স্মার্ত লোজিতিক্সপু প্রমোৎ তৌগনি।

মরুপশিং,

ঙসিদি, ঐখোয়গী মীৎয়েং অসি ইনক্লুসিব মেরিতাইম দিবেলপমেন্তদসু ওইরি। মসি তেক্নোলোজী, ত্রেনিং অমসুং ইনফ্রাস্ত্রকচরগী খুত্থাংদা অপীকপা ইথৎকী দিবেলপিং স্তেতশিং অমসুং দিবেলপ তৌদ্রবা লৈবাকশিংদা শক্তি পীরকপা মতমদা খক্তদা ওইথোকপা ঙমগনি। ঐখোয়না অইং-অশা হোংলকপা, সপ্লাই চেন্দা অপনবা লৈরকপা, শেন্মিৎলোনগী ওইবা তম্বা ঙমদবা অমসুং সমুদ্রগী ঙাকশেলগী মতাংদা পুন্না থবক তৌমিন্নগদবনি।

মরুপশিং,

লাক্লো, ঐখোয় পুম্নমক্না শান্তি, খুমাং চাউশিনবা অমসুং চাউখৎপা অসি হেন্না থুনা পুরক্নবা, তুং কোইনা চৎকদবা তুংলমচৎ অমা শেমগৎনবা পুন্না হোৎনমিন্নসি। ঐহাক্না অমুক্কা হন্না ময়াম পুম্নমকপু মীফম অসিগী শরুক অমা ওইবগীদমক্তা থাগৎচরি অমসুং ময়াম পুম্নমকপু য়াইফ-পাউজেল পীজরি।

থাগৎচরি।

***