ભારતની સાંસ્કૃતિક રાજદ્વારી અને વૈશ્વિક પહોંચને મજબૂત કરવાની દિશામાં એક મહત્વપૂર્ણ પગલું ભરતા, દૂરદર્શન (પ્રસાર ભારતી) એ 7 એપ્રિલ, 2026 ના રોજ નવી દિલ્હીના દૂરદર્શન ભવન ખાતે ઈન્ડિયન કાઉન્સિલ ફોર કલ્ચરલ રિલેશન્સ (ICCR) સાથે સમજૂતી પત્ર (MoU) પર હસ્તાક્ષર કર્યા હતા.

આ MoU પર દૂરદર્શનના ડાયરેક્ટર જનરલ શ્રી કે. સતીશ નંબુદિરીપાદ અને ICCR ના ડાયરેક્ટર જનરલ શ્રીમતી કે. નંદિની સિંગલા દ્વારા બંને સંસ્થાઓના વરિષ્ઠ અધિકારીઓની હાજરીમાં હસ્તાક્ષર કરવામાં આવ્યા હતા, અને તેમાં દૂરદર્શન (પ્રસાર ભારતી) અને ICCR ના અધિકારીઓ ઉપસ્થિત રહ્યા હતા.

આ ભાગીદારી ICCR દ્વારા પૂરી પાડવામાં આવતી સાંસ્કૃતિક સામગ્રીની પહોંચ વધારવા માટે દૂરદર્શન (પ્રસાર ભારતી) ની વિસ્તૃત ટેલિવિઝન, રેડિયો અને ડિજિટલ ઇકોસિસ્ટમનો લાભ લેવા માંગે છે. આમાં વિદેશમાં આવેલા ભારતીય મિશન જેમ કે એમ્બેસી (દૂતાવાસ), કોન્સ્યુલેટ અને ભારતીય સાંસ્કૃતિક કેન્દ્રો દ્વારા આયોજિત સાંસ્કૃતિક કાર્યક્રમો તેમજ ICCR મુખ્યાલય અને ભારતભરની તેની ઝોનલ અને પ્રાદેશિક કચેરીઓ દ્વારા સંચાલિત કાર્યક્રમોનો સમાવેશ થાય છે.

MoU હેઠળ, ICCR સાંસ્કૃતિક સામગ્રી અને પ્રદર્શન પ્રદાન કરશે, જ્યારે દૂરદર્શન (પ્રસાર ભારતી) ટેલિવિઝન ચેનલો, રેડિયો નેટવર્ક, OTT પ્લેટફોર્મ અને સોશિયલ મીડિયા સહિતના વિવિધ પ્લેટફોર્મ પર તેમનું કવરેજ અને પ્રસાર કરશે. આ વ્યવસ્થા વિદેશમાં આવેલા ભારતીય મિશન પાસેથી પ્રાપ્ત રેકોર્ડ કરેલી સાંસ્કૃતિક સામગ્રીના પ્રસારણને પણ સરળ બનાવે છે, જેથી વિવિધ ભૌગોલિક વિસ્તારોમાં ભારતની સાંસ્કૃતિક અભિવ્યક્તિઓ સુધી વ્યાપક પહોંચ સુનિશ્ચિત કરી શકાય.

આ કરારનું એક મુખ્ય લક્ષણ ડિજિટલ અધિકારો સહિત કાયમી ધોરણે સામગ્રીના અધિકારોની સંયુક્ત માલિકીની જોગવાઈ છે, જે બંને સંસ્થાઓને લાંબા ગાળાના ઉપયોગ માટે સામગ્રીને આર્કાઇવ અને પ્રસારિત કરવા સક્ષમ બનાવે છે. દૂરદર્શન (પ્રસાર ભારતી) પ્રેક્ષકોની ભાગીદારી વધારવા માટે શક્ય હોય ત્યાં કાર્યક્રમ પૂર્વેની પબ્લિસિટી અને ક્રોસ-પ્લેટફોર્મ પ્રમોશન પણ હાથ ધરશે.

વધુમાં MoU દૂરદર્શન (પ્રસાર ભારતી) ને આ સહયોગ હેઠળ જનરેટ થયેલી સામગ્રીમાંથી ઉદ્ભવતી મુદ્રીકરણની તકો શોધવા માટે સક્ષમ બનાવે છે, જે સાંસ્કૃતિક પ્રસારણ પહેલોની ટકાઉપણામાં ફાળો આપે છે.

આ કરાર ત્રણ વર્ષના સમયગાળા માટે અમલમાં રહેશે, જેમાં પરસ્પર સંમતિ દ્વારા વિસ્તરણની જોગવાઈઓ છે. આ સહયોગથી ભારતની સમૃદ્ધ અને વૈવિધ્યસભર સાંસ્કૃતિક વિરાસતની વિઝિબિલિટી (દૃશ્યતા) અને સુલભતામાં નોંધપાત્ર વધારો થવાની અપેક્ષા છે, જ્યારે સાંસ્કૃતિક પ્રમોશનના પ્રયાસોને સમકાલીન મીડિયા પ્લેટફોર્મ અને વૈશ્વિક પ્રેક્ષકો સાથે સુસંગત બનાવવામાં આવશે.

SM/IJ/JD