চৰকাৰে এনিমেচন, ভিজুৱেল ইফেক্ট, গেমিং আৰু কমিক্স (এভিজিচি) খণ্ডকে ধৰি সংবাদ মাধ্যম আৰু মনোৰঞ্জন উদ্যোগৰ সুশৃংখল বিকাশৰ দিশত সক্ৰিয়ভাৱে প্ৰচেষ্টা অব্যাহত ৰাখিছে। কমলা অৰ্থনীতিক অধিক শক্তিশালী কৰা আৰু ভাৰতক বিষয়বস্তু সৃষ্টিৰ এক বিশ্বব্যাপী কেন্দ্ৰ হিচাপে প্ৰতিষ্ঠা কৰাৰ লক্ষ্যৰে বিভিন্ন কৌশলগত পদক্ষেপ গ্ৰহণ কৰা হৈছে।

কেন্দ্ৰীয় বাজেট ২০২৬-২৭ত ঘোষণা কৰা অনুসৰি, সমগ্ৰ দেশৰ ১৫,০০০ মাধ্যমিক বিদ্যালয় আৰু ৫০০খন মহাবিদ্যালয়ত এভিজিচি কন্টেন্ট ক্ৰিয়েটৰ লেব (চিচিএল) স্থাপনৰ প্ৰস্তাৱ আগবঢ়োৱা হৈছে। এই গুৰুত্বপূৰ্ণ পদক্ষেপৰ বাবে ২৫০ কোটি টকা আবণ্টন নিৰ্ধাৰণ কৰা হৈছে।

এভিজিচি-এক্সআৰ খণ্ডৰ বাবে ৰাষ্ট্ৰীয় উৎকৰ্ষতাৰ কেন্দ্ৰ (এনচিঅ’ই) হিচাপে আইআইচিটি ২০২৫ চনৰ জুলাই মাহৰ পৰা মুম্বাইস্থিত আইআইচিটি–নেচনেল ফিল্ম ডেভেলপমেণ্ট কৰ্প’ৰেশ্যন (এনএফডিচি) কেম্পাছৰ পৰা কাৰ্যকৰীভাৱে পৰিচালিত হৈ আছে। বৰ্তমান ১৮টা পাঠ্যক্ৰম প্ৰৱৰ্তন কৰা হৈছে, য’ত ১৩৬ জন ছাত্ৰ-ছাত্ৰীয়ে নামভৰ্তি কৰিছে আৰু ১৫ জন অংশগ্ৰহণকাৰীয়ে ট্ৰেইন-দ্য-ট্ৰেইনাৰ কাৰ্যসূচী সফলতাৰে সম্পূৰ্ণ কৰিছে। কন্টেন্ট ক্ৰিয়েটৰ লেবসমূহৰ পৰিকল্পনা, সমন্বয় আৰু পৰ্যায়ক্ৰমে বাস্তৱায়নৰ বাবে মুম্বাইস্থিত ইণ্ডিয়ান ইনষ্টিটিউট অৱ ক্ৰিয়েটিভ টেকন’লজিছ (আইআইচিটি)ক ন’ডেল সংস্থা হিচাপে নিযুক্তি প্ৰদান কৰা হৈছে। প্ৰযুক্তিগত ষ্টেক, অংশীদাৰী প্ৰতিষ্ঠানৰ চিনাক্তকৰণ আৰু বাস্তৱায়ন পদ্ধতি সম্পৰ্কে সংশ্লিষ্ট অংশীদাৰসকলৰ সৈতে পৰামৰ্শ প্ৰক্ৰিয়া অব্যাহত আছে।

এভিজিচি-এক্সআৰ খণ্ডৰ বিস্তৃতি আৰু সৰ্বাংগীণ বিকাশৰ বাবে এক বিস্তৃত কৌশল প্ৰণয়ন আৰু নীতিগত পৰামৰ্শ প্ৰদানৰ উদ্দেশ্যে চৰকাৰে ২০২২ চনৰ এপ্ৰিল মাহত এভিজিচি প্ৰমোচন টাস্ক ফ’ৰ্চ গঠন কৰিছিল। ২০২২ চনৰ ডিচেম্বৰ মাহত দাখিল কৰা প্ৰতিবেদনত উল্লেখ কৰা হৈছে যে এই খণ্ডটোৱে উল্লেখযোগ্য পৰিমাণে কৰ্মসংস্থাপনৰ সুযোগ সৃষ্টি কৰিব আৰু ২০৩০ চনৰ ভিতৰত এভিজিচি-এক্সআৰ, কন্টেন্ট প্ৰডাকচন, ডিজাইন, প্ৰগ্ৰেমিং আৰু সংশ্লিষ্ট ক্ষেত্ৰসমূহত প্ৰায় ২০ লাখ দক্ষ পেছাদাৰীৰ প্ৰয়োজন হ’ব পাৰে।

চৰকাৰে মুম্বাইত ৱৰ্ল্ড অডিঅ’ ভিজুৱেল এণ্ড এণ্টাৰটেইনমেণ্ট ছামিট (ৱেভছ ২০২৫) সাফল্যৰ সৈতে আয়োজন কৰিছিল। এই অনুষ্ঠান “ভাৰতত সৃষ্টি কৰক, বিশ্বৰ বাবে সৃষ্টি কৰক” শীৰ্ষক উদ্যোগৰ অধীনত ভাৰতক বিষয়বস্তু সৃষ্টিৰ এক বিশ্বব্যাপী কেন্দ্ৰ হিচাপে গঢ়ি তোলাৰ লক্ষ্যৰে সম্পূৰ্ণ সামঞ্জস্য ৰাখে। এই সন্মিলনে ভাৰতীয় সৃষ্টিকৰ্তা, উৎপাদক আৰু ষ্টাৰ্টআপসমূহৰ বাবে ১০০ খনতকৈও অধিক দেশৰ বিশ্বব্যাপী ক্ৰেতা, বিনিয়োগকাৰী, অ’টিটি প্লেটফৰ্ম আৰু প্ৰযুক্তি নেতৃত্বৰ সৈতে যোগাযোগ স্থাপনৰ এক সংহত মঞ্চ প্ৰদান কৰিছে।

ৱৰ্ল্ড অডিঅ’ ভিজুৱেল এণ্ড এণ্টাৰটেইনমেণ্ট ছামিট (ৱেভছ)ৰ অধীনত আৰম্ভ কৰা ৱেভএক্স ষ্টাৰ্টআপ এক্সিলেৰেটৰ কাৰ্যসূচীয়ে গাঁথনিগত ইনকিউবেচন, মেণ্টৰশ্বিপ আৰু বৈশ্বিক নেটৱৰ্কত প্ৰৱেশৰ সুবিধাৰ জৰিয়তে মিডিয়া-টেক ষ্টাৰ্টআপসমূহক শক্তিশালী সমৰ্থন আগবঢ়াইছে। প্ৰথম গোটৰ ষ্টাৰ্টআপসমূহে উদ্যোগ বিশেষজ্ঞৰ পৰা মেণ্টৰশ্বিপ, বিনিয়োগকাৰীৰ সৈতে সংযোগ, বৌদ্ধিক সম্পত্তি সৃষ্টি আৰু সুৰক্ষাৰ ক্ষেত্ৰত সহায় লাভ কৰিছে। এই কাৰ্যসূচীয়ে আন্তঃৰাষ্ট্ৰীয় মঞ্চত অংশগ্ৰহণ, উদ্যোগিক অংশীদাৰিত্ব আৰু বৈশ্বিক বজাৰৰ সৈতে সংহতিৰ সুযোগো প্ৰদান কৰে, যাৰ ফলত ষ্টাৰ্টআপসমূহে তেওঁলোকৰ উদ্ভাৱনী উদ্যোগসমূহ অধিক বিস্তৃত কৰিবলৈ সক্ষম হৈছে।

সমগ্ৰ সংবাদ মাধ্যম আৰু মনোৰঞ্জন খণ্ডত সৃষ্টিশীল প্ৰতিভাসমূহক চিনাক্ত, লালন-পালন আৰু প্ৰদৰ্শনৰ উদ্দেশ্যে ক্ৰিয়েট ইন ইণ্ডিয়া চেলেঞ্জ (চিআইচি)ক এক ৰাষ্ট্ৰীয় মঞ্চ হিচাপে ব্যৱহাৰ কৰা হৈছে। চিআইচিৰ প্ৰথম ছিজনত উদ্যোগিক অংশীদাৰসকলৰ সহযোগত ৩৩টা প্ৰত্যাহ্বান সফলতাৰে অনুষ্ঠিত কৰা হৈছিল আৰু ইয়াৰ শিখৰত উপনীত হৈছিল ৱেভছ ২০২৫ত। নিৰ্বাচিত সৃষ্টিকৰ্তাসকলক ৰাষ্ট্ৰীয় আৰু আন্তঃৰাষ্ট্ৰীয় মঞ্চত তেওঁলোকৰ বিষয়বস্তু উপস্থাপনৰ বাবে ৱেভএক্স আৰু ৱেভছ বজাৰৰ দৰে প্লেটফৰ্মসমূহৰ জৰিয়তে সক্ৰিয় সমৰ্থন আগবঢ়োৱা হৈছে।

তথ্য আৰু সম্প্ৰচাৰ ৰাজ্যিক মন্ত্ৰী ড° এল মুৰুগানে এই তথ্য লোকসভাত শ্ৰীমতী কৃতি দেৱী দেববৰ্মন আৰু শ্ৰী ইতলা ৰাজেন্দ্ৰে সোধা প্ৰশ্নৰ লিখিত উত্তৰত আনুষ্ঠানিকভাৱে দাখিল কৰে।

*****

Mahesh Kumar/ Vivek Vishwash/AA