ভাৰত মাতা কী জয়!

ভাৰত মাতা কী জয়!

ভাৰত মাতা কী জয়!

উদ্বোধন হৈ গ'ল নেকি? উদ্বোধন হৈ গ'ল নেকি? নাই, এতিয়ালৈকে আধা কামহে কৰা হৈছে। মই কেৱল পৰ্দাখন উন্মোচন কৰিছো; কিন্তু  মই বিচাৰিছো যে  ইয়াত উপস্থিত থকা প্ৰতিজন ব্যক্তিয়ে এই বিমানবন্দৰটো উদ্বোধন কৰক। গতিকে প্ৰত্যেকই মোবাইল ফোন উলিয়াই, টৰ্চ অন কৰক আৰু আপোনালোকেই উদ্বোধন কৰক। আপোনালোকৰ মোবাইল ফোনৰ লাইট জ্বলাৰ লগে লগেই —আজি ইয়াত উপস্থিত প্ৰতিজন ব্যক্তিয়ে এই বিমানবন্দৰটো উদ্বোধন কৰিলে। এয়া আপোনালোকৰ সম্পদ; এয়া আপোনালোকৰ ভৱিষ্যত; এয়া আপোনালোকৰ কঠোৰ পৰিশ্ৰম আৰু উদ্যোগৰ ফল।  ঠিক সেইবাবেই ইয়াৰ উদ্বোধনী আপোনালোকৰ  হাতেৰেই কৰা হৈছে। হাত দুখন ওপৰলৈ তুলি কওক, "ভাৰত মাতা কী জয়" । আপোনালোকৰ টৰ্চবোৰ সকলোকে দেখাকৈ  উজ্জ্বলভাৱে জিলিকিবলৈ দিয়ক! "ভাৰত মাতা কী জয়" !"ভাৰত মাতা কী জয়" ! "ভাৰত মাতা কী জয়" ! আপোনালোকক অশেষ ধন্যবাদ। এতিয়া—উদ্বোধন সম্পূর্ণ হ'ল!

উত্তৰ প্ৰদেশৰ মহামহিম ৰাজ্যপাল আনন্দীবেন পেটেল; মুখ্যমন্ত্ৰী যোগী আদিত্যনাথ জী; উপ-মুখ্যমন্ত্ৰী কেশৱ প্ৰসাদ মৌৰ্য আৰু ব্ৰজেশ পাঠক; কেন্দ্ৰীয় মন্ত্ৰীসভাত মোৰ সহকৰ্মী শ্ৰী ৰাম মোহন নাইডু জী আৰু শ্ৰী পংকজ চৌধুৰী জী; জুৰিখ বিমানবন্দৰৰ অধ্যক্ষ মিষ্টাৰ জোচেফ ফেল্ডাৰ; আন মন্ত্ৰী, সংসদৰ সদস্যসকল, বিধানসভাৰ সদস্যসকল, অন্যান্য গণ্যমান্য ব্যক্তি আৰু মোৰ প্ৰিয় ভাই-ভনীসকল।

আজি ইফালে সিফালে চাই থাকোঁতে—মোৰ দৃষ্টি য’তেই পৰিছে—ত’তেই সকলোতে যিৱ শক্তিৰ  বাহিৰে একো দেখা পোৱা নাই। মই দেখিছোঁ যুৱক-যুৱতীসকলৰ মন  উৎসাহেৰে ভৰি আছে, শক্তি আৰু উদ্যমেৰে উপচি পৰিছে। কাৰণ এই যুৱক-যুৱতীসকলে বুজি পায় যে ইয়াত বৰ্তমান চলি থকা কামটো এক কীৰ্তিচিহ্নস্বৰূপ প্ৰচেষ্টা—যুৱক-যুৱতীসকলৰ ভৱিষ্যতৰ বাবে এক  নতুন অধ্যায়, তেওঁলোকক  নতুন উৰণ দিয়াৰ প্ৰয়াস। আজি আমি "উন্নত উত্তৰ প্ৰদেশ ,উন্নত ভাৰত"ৰ অভিযানৰ এক নতুন অধ্যায়ত নামিছো। দেশৰ সৰ্ববৃহৎ ৰাজ্যখনে আন্তঃৰাষ্ট্ৰীয় বিমানবন্দৰৰ সংখ্যাৰ ক্ষেত্ৰত আজি দেশৰ অন্যতম আগশাৰীৰ ৰাজ্য হিচাপে আত্মপ্ৰকাশ কৰিছে।  আজি মোৰ গৌৰৱ আৰু আনন্দ অনুভৱ  কৰাৰ দুটা সুকীয়া কাৰণ আছে। প্ৰথম কাৰণটো হ’ল আপোনালোক সকলোৱে মোক এই বিমানবন্দৰৰ আধাৰশিলা স্থাপনৰ সুবিধা প্ৰদান কৰিলে; আৰু তাৰ পিছত আপোনালোকে  মোক ইয়াৰ উদ্বোধন কৰাৰ সুবিধাও প্ৰদান কৰিলে। অৱশ্যে মই সেই সুবিধা  আপোনালোকৰ সৈতে ভাগ কৰিবলৈ বাছি স্থিৰ কৰিলো—আৰু এইদৰে, মই নিশ্চিত কৰিছো যে উদ্বোধনী অনুষ্ঠানটো আপোনালোকৰ নিজৰ হাতেৰেই কৰা হ’ব। দ্বিতীয়তে, এই সুন্দৰ বিমানবন্দৰৰ নামটো এতিয়া উত্তৰ প্ৰদেশৰ পৰিচয়ৰ সৈতে অবিচ্ছেদ্যভাৱে জড়িত হৈ পৰিছে— যিখন ৰাজ্যই মোক নিজৰ প্ৰতিনিধি হিচাপে বাছি লৈ সংসদ সদস্য হিচাপে নিৰ্বাচিত কৰিছিল এই মহান বিমানবন্দৰৰ নামটোও উত্তৰ প্ৰদেশৰ পৰিচয়ৰ সৈতে জড়িত হৈ পৰিছে।

বন্ধুসকল,

নয়ডাৰ এই বিমানবন্দৰটোৱে আগ্ৰা, মথুৰা, আলিগড়, গাজিয়াবাদ, মীৰুট, ইটাৱা, বুলণ্ডশ্বাৰ, আৰু ফৰিদাবাদ আদি চহৰক সামৰি সমগ্ৰ অঞ্চলটোৰ বাবে অপৰিসীম সুবিধা কঢ়িয়াই আনিব। স্বাভাৱিকতে ভাৰত আৰু সামগ্ৰিকভাৱে উত্তৰ প্ৰদেশৰ বাবে ইয়াৰ লাভ যথেষ্ট হোৱাটো নিশ্চিত। এই বিমানবন্দৰটোৱে কৃষক, ক্ষুদ্ৰ আৰু মজলীয়া উদ্যোগ তথা পশ্চিম উত্তৰ প্ৰদেশৰ যুৱক-যুৱতীসকলৰ বাবে অসংখ্য নতুন সুযোগৰ সূচনা কৰিব। ইয়াৰ পৰা বিমানে নিশ্চিতভাৱে সমগ্ৰ বিশ্বৰ গন্তব্যস্থানলৈ বিমান যাত্ৰা কৰিব ।এই বিমানবন্দৰটোৱে উন্নত উত্তৰ প্ৰদেশৰ আকাশস্পৰ্শী  অগ্ৰগতিৰ এক শক্তিশালী প্ৰতীক হিচাপেও কাম কৰিব। উত্তৰ প্ৰদেশৰ জনসাধাৰণলৈ—আৰু বিশেষকৈ পশ্চিম উত্তৰ প্ৰদেশৰ বাসিন্দালৈ—এই সুন্দৰ  বিমানবন্দৰটোৰ বাবে মোৰ আন্তৰিক অভিনন্দন জ্ঞাপন কৰিলোঁ।

বন্ধুসকল,

আজিৰ এই অনুষ্ঠান ভাৰতৰ নতুন মনোভাৱৰ প্ৰতীক হিচাপে থিয় দিছে। আপোনালোকে সকলোৱে লক্ষ্য কৰিব পাৰে যে বৰ্তমান সমগ্ৰ বিশ্বক গভীৰ উদ্বিগ্নতাই আৱৰি ধৰিছে। পশ্চিম এছিয়াত এতিয়া এমাহৰো অধিক সময় ধৰি  যুদ্ধ চলি আছে। ফলস্বৰূপে খাদ্য যোগান, পেট্ৰ’ল, ডিজেল, গেছ, সাৰকে ধৰি অত্যাৱশ্যকীয় সামগ্ৰীৰ ক্ষেত্ৰত অসংখ্য ৰাষ্ট্ৰত এক ব্যাপক সংকটৰ সৃষ্টি হৈছে। প্ৰতিখন  দেশে  এই সংকটৰ সন্মুখীন হ’বলৈ যৎপৰোনাস্তি প্ৰচেষ্টা চলাইছে আৰু ব্যৱস্থা গ্ৰহণ কৰিছে।  আমাৰ ভাৰতেও নিজৰ নাগৰিকৰ স্থিতিস্থাপকতাৰ পৰা শক্তি তথা আত্মবিশ্বাস লাভ কৰি পূৰ্ণ শক্তিৰে এই সংকটৰ সন্মুখীন হৈছে। ভাৰতে পূৰ্বৰে পৰা  বিপুল পৰিমাণৰ খাৰুৱা তেল আৰু গেছ আমদানি কৰি আহিছে, যিটো অঞ্চলত বৰ্তমান এই সংঘাতৰ সূচনা হৈছে—যুদ্ধৰ প্ৰত্যক্ষ প্ৰভাৱ পৰা অঞ্চলৰ পৰাই। এই সংকটৰ বোজা যাতে সাধাৰণ পৰিয়াল বা আমাৰ কৃষক ভাই-ভনীৰ ওপৰত নপৰে তাৰ বাবে চৰকাৰে প্রতিটো প্রয়োজনীয় পদক্ষেপ গ্ৰহণ কৰিছে।

বন্ধুসকল,

এই সংকটৰ সময়তো ভাৰতে নিজৰ দ্রুত বিকাশৰ গতি অটলভাৱে বজাই ৰাখিছে৷ যদি মই বিশেষভাৱে পশ্চিম উত্তৰ প্ৰদেশৰ কথা কওঁ, তেন্তে মাত্ৰ যোৱা কেইসপ্তাহমানৰ ভিতৰতে হোৱা এয়া  চতুৰ্থটো বৃহৎ প্ৰকল্প— আধাৰশিলা স্থাপন বা উদ্বোধনী অনুষ্ঠান যিয়েই নহওক। মাত্ৰ এই কেইসপ্তাহমানৰ ভিতৰতে—এই সময়ছোৱাতে—নয়ডাত এটা বৃহৎ অৰ্ধপৰিবাহী কাৰখানাৰ আধাৰশিলা স্থাপন কৰা হৈছে; এই একে সময়সীমাৰ ভিতৰতে দেশৰ প্ৰথমখন দিল্লী-মীৰুট ‘নমো ভাৰত’ ৰে’লে গতি লাভ কৰিছে; মীৰুট মেট্ৰ’ৰ সম্প্ৰসাৰণ কৰা হৈছে; আৰু এতিয়া ইমান কম সময়ৰ ভিতৰতে আপোনালোক সকলোৰে হাতত আজি নয়ডা আন্তঃৰাষ্ট্ৰীয় বিমান বন্দৰ আপোনালোকৰ হাতেৰেই উদ্বোধন কৰা হৈছে।

বন্ধুসকল,

এই সকলোবোৰ প্ৰকল্পই উত্তৰ প্ৰদেশৰ উন্নয়নৰ দিশত ‘ডাবল ইঞ্জিন’ চৰকাৰৰ প্ৰচেষ্টাৰ  উদাহৰণ হিচাপে কাম কৰিছে। অৰ্ধপৰিবাহী কাৰখানাটোৱে ভাৰতক প্ৰযুক্তিৰ ক্ষেত্ৰত স্বাৱলম্বী কৰি তুলিছে। মীৰুট মেট্ৰ’ আৰু ‘নমো ভাৰত’ ৰে’ল সেৱাই দ্ৰুত আৰু স্মাৰ্ট সংযোগ প্ৰদান কৰিছে।  আমাৰ এই জেৱাৰ বিমানবন্দৰটোৱে সমগ্ৰ উত্তৰ ভাৰতক বিশ্বৰ বাকী অংশৰ সৈতে সংযোগ কৰিছে।  আপোনালোকে  মাত্ৰ ভিডিঅ’টোত দেখাৰ দৰে এই বিমানবন্দৰটো এনেদৰে বিকশিত কৰা হৈছে যে প্ৰতি দুইমিনিটৰ মূৰে মূৰে এখন বিমানৰ উৰণ হ’ব—প্ৰতিটো দুইমিনিটৰ মূৰে মূৰে! ইয়াৰ পূৰ্বে সমাজবাদী পাৰ্টীয়ে লুণ্ঠনৰ বাবে নয়ডাক নিজৰ ব্যক্তিগত এটিএমলৈ ৰূপান্তৰিত কৰিছিল। কিন্তু আজি বিজেপি চৰকাৰৰ অধীনত সেই একেখন নয়ডা উত্তৰ প্ৰদেশৰ উন্নয়নৰ ক্ষেত্ৰত  এক শক্তিশালী ইঞ্জিন হিচাপে আত্মপ্ৰকাশ কৰিছে।

বন্ধুসকল,

এই জেৱাৰ বিমানবন্দৰটোও ‘ডাবল ইঞ্জিন’ চৰকাৰৰ কৰ্ম সংস্কৃতিৰ এক উৎকৃষ্ট প্ৰমাণ। এবাৰ ভাবি চাওকচোন: অটল বিহাৰী বাজপেয়ী জী নেতৃত্বাধীন চৰকাৰে ২০০৩ চনত এই বিমানবন্দৰৰ বাবে নীতিগত অনুমোদন দিছিল।২০০৩ চনত—যি সময়ত ইয়াত থকা আপোনালোকৰ বহুতৰেই হয়তো জন্মও হোৱা নাছিল—আন কিছুমানৰ বয়স হয়তো ২৫, ৩০, বা ৩৫ বছৰ আছিল; তেতিয়াৰ সেই লোকসকলৰ বহুতে অৱসৰ লৈছে, তথাপিও বিমানবন্দৰটো নিৰ্মাণ নোহোৱাকৈয়ে আছিল। ইয়াৰ পূৰ্বৰ ৰাজ্য চৰকাৰসমূহৰ লগতে কেন্দ্ৰৰ কংগ্ৰেছ চৰকাৰেও বছৰ বছৰ ধৰি এই বিমানবন্দৰৰ আধাৰশিলাও স্থাপন কৰিবলৈ নিদিলে। ২০০৪ চনৰ পৰা ২০১৪ চনলৈকে এই বিমানবন্দৰ প্ৰকল্পটো চৰকাৰী ফাইলৰ মাজতে আবদ্ধ আছিল। আমাৰ চৰকাৰে কেন্দ্ৰত কাৰ্যভাৰ গ্ৰহণ কৰাৰ সময়ত  উত্তৰ প্ৰদেশত সমাজবাদী পাৰ্টিৰ ক্ষমতা আছিল। প্রথম দুই-তিনি বছৰত এই প্রকল্পৰ  কামত বাধা প্রদান কৰিছিল সমাজবাদী প্রশাসনে৷ কিন্তু যি মুহূৰ্তত ইয়াত এইখন ৰাজ্যত বিজেপি-এনডিএ চৰকাৰ গঠন হ’ল—দিল্লীৰ বিজেপি-এনডিএ চৰকাৰৰ প্ৰতিশ্ৰুতিক  প্ৰতিফলিত কৰি—জেৱাৰ বিমানবন্দৰৰ আধাৰশিলা স্থাপন কৰা  হ’ল, নিৰ্মাণকাৰ্য আৰম্ভ হ’ল আৰু এতিয়া ই কাৰ্যক্ষম হৈ উঠিছে।

বন্ধুসকল,

কেৱল বিমানবন্দৰৰ বাহিৰেও এই অঞ্চলটোৱে দেশৰ দুটা ডাঙৰ মালবাহী কৰিডৰৰ কেন্দ্ৰ হিচাপেও আত্মপ্ৰকাশ কৰিছে। এই মালবাহী কৰিডৰসমূহ কেৱল মালবাহী ৰে’লৰ বাবে স্থাপন কৰা বিশেষ ৰে’লপথৰে গঠিত। এই আন্তঃগাঁথনিয়ে উত্তৰ ভাৰতৰ বংগ আৰু গুজৰাটৰ সাগৰীয় বন্দৰৰ সৈতে সংযোগৰ যথেষ্ট উন্নতি সাধন কৰিছে।  দাদ্ৰী হৈছে এই দুটা গুৰুত্বপূৰ্ণ কৰিডৰ একত্ৰিত হোৱা নিৰ্দিষ্ট স্থান। অৰ্থাৎ ইয়াত কৃষকসকলে যি উৎপাদন কৰে  আৰু ইয়াত  উদ্যোগে যি উৎপাদন কৰে, এতিয়া পৃথিৱীৰ প্ৰতিটো কোণত সেয়া  দ্ৰুতগতিত উপনীত হ’ব পাৰে— স্থলপথেৰেই হওক বা আকাশী পথেৰেই হওক। এনে বহু-মডাল সংযোগৰ বাবেই উত্তৰ প্ৰদেশে সমগ্ৰ বিশ্বৰ বিনিয়োগকাৰীক আকৰ্ষণ কৰা এক ডাঙৰ চুম্বক হিচাপে আত্মপ্ৰকাশ কৰিছে।

বন্ধুসকল,

এসময়ত অন্ধবিশ্বাসৰ বাবে নিজৰ ভাগ্যকে ধিয়াই  পৰিত্যক্ত হৈ পৰিছিল নয়ডাখন—য’ত পূৰ্বৰ শাসকসকলে এনে কৰিছিল যে  তেওঁলোকে  ক্ষমতাৰ হেৰুৱাব বুলি ভয় খাইছিল। এতিয়া ই  ৰূপান্তৰিত হৈছে। এটা সময়ৰ কথা মনত আছে যেতিয়া ইয়াত সমাজবাদী পাৰ্টি (এছ পি) ক্ষমতাত আছিল; যেতিয়া মই নয়ডা ভ্ৰমণৰ সময় নিৰ্ধাৰণ কৰিছিলো, তেতিয়া মুখ্যমন্ত্ৰী ইমানেই আতংকিত হৈছিল যে তেওঁ অনুষ্ঠানত অংশগ্ৰহণ নকৰাটোকে বাছি লৈছিল। আনকি মানুহে মোক নয়ডালৈ অহাৰ পৰা বিৰত ৰাখিবলৈ চেষ্টা কৰিছিল, মোক সকীয়াই দিছিল, "মোদী জী, নয়ডালৈ নাযাবা; তুমি মাত্ৰ প্ৰধানমন্ত্ৰী হৈছাহে।" মই উত্তৰ দিছিলোঁ, "মই এই দেশৰ আশীৰ্বাদ বিচাৰিম—আশীৰ্বাদ, যিয়ে মোক আগন্তুক বহুদিনলৈ সেৱা কৰাৰ সুযোগ দিব।" আজি সেই অঞ্চলটোৱেই সমগ্ৰ বিশ্বক আদৰিবলৈ সাজু হৈ আছে। এই সমগ্ৰ অঞ্চলটোৱে এখন ‘আত্মনিৰ্ভৰ ভাৰত’—এখন আত্মনিৰ্ভৰ ভাৰতৰ সংকল্পক সক্ৰিয়ভাৱে শক্তিশালী কৰি তুলিছে।

বন্ধুসকল,

এই অঞ্চলৰ অৰ্থনীতিত কৃষিৰ অপৰিসীম তাৎপৰ্য আছে। আজি মই সেই কৃষক ভাই-ভনীসকলৰ প্ৰতি বিশেষ কৃতজ্ঞতা জ্ঞাপন কৰিছো, যিসকলে স্বেচ্ছাই নিজৰ মাটি ত্যাগ কৰি এই প্ৰকল্পটো সাৰ্থক কৰি তোলাত সহায় কৰিছে। আহক আমি এই কৃষকসকলক বাবে হাতচাপৰিৰৰে  অভিনন্দন জনাও, বন্ধু-বান্ধৱীসকলৰ বাবে— মোৰ কৃষক ভাই-ভনীসকলৰ বাবে এক শক্তিশালী হাত চাপৰি! মোৰ মৰমৰ কৃষক ভাই-ভনীসকল, ঠিক আপোনালোকৰ অৱদানৰ বাবেই এই সমগ্ৰ অঞ্চলটোত উন্নয়নৰ এক নতুন যুগৰ সূচনা হ’বলৈ ওলাইছে। বৰ্তমান ইয়াত চলি থকা আধুনিক সংযোগৰ সম্প্ৰসাৰণে পশ্চিম উত্তৰ প্ৰদেশৰ খাদ্য প্ৰক্ৰিয়াকৰণ উদ্যোগৰ সম্ভাৱনাক যথেষ্ট বৃদ্ধি কৰিব। ফলস্বৰূপে এই অঞ্চলৰ কৃষিজাত সামগ্ৰীয়ে এতিয়া বিশ্বৰ বজাৰত বহুত বেছি ফলপ্ৰসূভাৱে প্ৰৱেশ কৰিবলৈ সক্ষম হ’ব।

বন্ধুসকল,

লগতে এই সুযোগতে মোৰ সতীৰ্থ কৃষকসকলৰ প্ৰতি আন এক কাৰণত কৃতজ্ঞতা জ্ঞাপন কৰিব বিচাৰিছো। আপোনালোকে  খেতি কৰা কুঁহিয়াৰৰ পৰা উৎপাদিত ইথানলে খাৰুৱা তেলৰ বাবে দেশৰ  নিৰ্ভৰশীলতা হ্ৰাস কৰাত গুৰুত্বপূৰ্ণ ভূমিকা পালন কৰিছে। ইথানলৰ উৎপাদন বৃদ্ধি নকৰিলে—আৰু পেট্ৰ’লৰ সৈতে ইয়াৰ মিশ্ৰণ বৃদ্ধি নকৰিলে—দেশখনে প্ৰতি বছৰে বিদেশৰ পৰা অতিৰিক্ত ৪৫ মিলিয়ন বেৰেল—হয়, ৪৫ মিলিয়ন বেৰেল বা প্ৰায় ৭ বিলিয়ন লিটাৰ—খাৰুৱা তেল আমদানি কৰিবলৈ বাধ্য হ’লহেঁতেন। আমাৰ কৃষকৰ কঠোৰ পৰিশ্ৰমে এই সংকটৰ সময়ত দেশক অপৰিসীম সকাহ দিছে।

বন্ধুসকল,

ইথানলে কেৱল দেশক উপকৃত কৰাই নহয়, ইয়াৰ দ্বাৰা আমাৰ কৃষকসকলো যথেষ্ট লাভাৱান্বিত হৈছে। ইয়াৰ দ্বাৰা প্ৰায় ১.৫ লাখ কোটি টকা বৈদেশিক মুদ্ৰা  ৰাহি হৈছে। অৰ্থাৎ আমি ইথানল উৎপাদন নকৰিলে এই ধনৰাশি  দেশৰ বাহিৰলৈ ওলাই গ’লহেঁতেন। যোৱা কেইবছৰমানৰ পৰা এই বিপুল ধনৰাশি দেশৰ কৃষকসকলৰ হাতলৈ গৈছে—বিশেষকৈ আমাৰ কুঁহিয়াৰ খেতিয়কসকলৰ হাতলৈ গৈছে।

বন্ধুসকল,

ইয়াৰ কুঁহিয়াৰ খেতিয়কসকলে অতীতৰ সেই দিনবোৰ প্ৰত্যক্ষ কৰিছে যেতিয়া কুঁহিয়াৰৰ  বাবে তেওঁলোককে পাবলৈ  বাকী থকা ধন বছৰ বছৰ ধৰি বাকী হৈয়েই আছিল। কিন্তু আজি—বিজেপিৰ "ডাবল ইঞ্জিন" চৰকাৰৰ প্ৰচেষ্টাৰ বাবেই—কুঁহিয়াৰ খেতিয়কৰ অৱস্থা যথেষ্ট উন্নত হৈছে।

বন্ধুসকল,

যিকোনো দেশতে বিমানবন্দৰ কেৱল এটা মানক সুবিধাই নহয়; বিমানবন্দৰসমূহে  অগ্ৰগতিক নতুন ডেউকা দিছে। ২০১৪ চনৰ পূৰ্বে দেশত মাত্ৰ ৭৪টা বিমানবন্দৰ আছিল। আজি সমগ্ৰ দেশতে ১৬০ টাতকৈও অধিক বিমানবন্দৰ আছে। এতিয়া কেৱল ডাঙৰ ডাঙৰ মহানগৰসমূহৰ বাহিৰেও দেশৰ সৰু সৰু চহৰ-নগৰসমূহলৈও বিমান সংযোগ সম্প্ৰসাৰিত হৈছে। পূৰ্বৰ চৰকাৰসমূহে এই ধাৰণা পোষণ কৰিছিল  যে বিমান যাত্ৰা কেৱল ধনী লোকৰ বাবেহে সংৰক্ষিত হ’ব লাগে। কিন্তু বিজেপি চৰকাৰে সাধাৰণ ভাৰতীয়ৰ বাবেও বিমান যাত্ৰা সুলভ  কৰি তুলিছে। আমাৰ চৰকাৰে উত্তৰ প্ৰদেশৰ বিমানবন্দৰৰ নেটৱৰ্ক দ্ৰুতগতিত সম্প্ৰসাৰণ কৰি মুঠ সংখ্যা সোতৰটালৈ বৃদ্ধি কৰিছে।

বন্ধুসকল,

নতুন বিমানবন্দৰ নিৰ্মাণ হ’লেও বিমান ভাড়া সাধাৰণ পৰিয়ালৰ হাতৰ মুঠিত থকাটো নিশ্চিত কৰিবলৈ বিজেপি চৰকাৰে ধাৰাবাহিক প্ৰচেষ্টা চলাই গৈছে। এই উদ্দেশ্যেৰেই আমি উড়ান আঁচনি আৰম্ভ কৰিছিলোঁ। এই পদক্ষেপৰ ফলত বিগত কেইবছৰমানৰ পৰা ১ কোটি ৬০ লাখতকৈ অধিক নাগৰিকে উড়ান আঁচনিৰ সুবিধা লৈ সুলভ মূল্যত বিমানযোগে যাত্ৰা কৰিছে। তদুপৰি মই আপোনালোকৰ সৈতে আন এটা তথ্য ভাগ-বাটোৱাৰা কৰিব বিচাৰিছো যে কেন্দ্ৰীয় চৰকাৰে শেহতীয়াকৈ উড়ান আঁচনিৰ পৰিসৰ আৰু অধিক সম্প্ৰসাৰিত কৰিছে। ইয়াৰ বাবে প্ৰায় ২৯,০০০ কোটি টকাৰ আবণ্টনত অনুমোদন জনোৱা হৈছে। এই পদক্ষেপৰ অধীনত অনাগত বছৰবোৰত সৰু চহৰ আৰু নগৰত ১০০টা নতুন বিমানবন্দৰ আৰু ২০০টা নতুন হেলিপেড নিৰ্মাণৰ পৰিকল্পনা কৰা হৈছে। উত্তৰ প্ৰদেশেও এই সম্প্ৰসাৰণৰ দ্বাৰা অপৰিসীম লাভ অৰ্জন কৰিবলৈ সক্ষম হ'ব ।

বন্ধুসকল,

ভাৰতৰ বিমান পৰিবহণ খণ্ডৰ দ্ৰুত গতিত বৃদ্ধি আৰু বিকাশ ঘটিছে। সমগ্ৰ ভাৰতত নতুন বিমানবন্দৰ নিৰ্মাণৰ কাম অব্যাহত থকাৰ লগে লগে নতুন বিমানৰ চাহিদাও ক্ৰমাৎ বৃদ্ধি পাইছে। ফলস্বৰূপে দেশৰ ভিতৰৰ বিভিন্ন বিমান সংস্থাই শ শ নতুন বিমানৰ ফৰমাইচ দিছে। এই নতুন সুবিধা তথা বিমানসমূহৰ বাবে এক বৃহৎ কৰ্মশক্তিৰ প্ৰয়োজন হ’ব—য’ত এইবোৰ উৰুৱাবলৈ পাইলট, অনব’ৰ্ড সেৱা প্ৰদান কৰিবলৈ কেবিন ক্ৰু, ৰক্ষণাবেক্ষণৰ বাবে কৰ্মী আৰু আন প্ৰতিটো আনুষংগিক কামৰ  বাবে কৰ্মচাৰী লাগিব। ইয়াৰ দ্বাৰা যুৱক-যুৱতীসকলৰ বাবে সুযোগৰ সৃষ্টি হ’ব । সেয়ে আমাৰ চৰকাৰে বিমান পৰিবহণ খণ্ডৰ ভিতৰতে প্ৰশিক্ষণৰ সুবিধাও সম্প্ৰসাৰণ কৰি আছে।

বন্ধুসকল,

যেতিয়া আপোনালোকে  এখন বাহন ক্ৰয় কৰে, তেতিয়া আপোনালোকে  নিৰৱচ্ছিন্নভাৱে পৰীক্ষা কৰে যে বাহন নিৰ্মাতাৰ সেৱা কেন্দ্ৰ ওচৰতে আছে নে নাই। আপোনালোকে জানি আচৰিত হ’ব যে শেহতীয়াকৈ আমাৰ দেশত বিমানৰ চাৰ্ভিচিঙৰ বাবে শক্তিশালী আন্তঃগাঁথনিৰ অভাৱ আছিল—বিশেষকৈ, মেইণ্টেনেন্স, মেৰামতি আৰু অভাৰহ’ল (এম আৰ অ’)ৰ বাবে। আজিও সমগ্ৰ ভাৰতৰ ৮৫টা বিমানবন্দৰত চলাচল কৰা বিমানসমূহৰ ৮৫ শতাংশই এম আৰ অ’ সেৱাৰ বাবে বহিঃ দেশলৈ প্ৰেৰণ কৰিব লাগে। ফলস্বৰূপে আমাৰ চৰকাৰে এম আৰ অ’ খণ্ডতো ভাৰতক স্বাৱলম্বী কৰি তোলাৰ সংকল্প লৈছে৷ এতিয়া ভাৰতৰ ভিতৰতে এম আৰ অ’ৰ সুবিধাসমূহ বৃহৎ পৰিসৰত বিকশিত কৰা হৈছে। আজি  জেৱাৰত এটা এম আৰ অ’ৰ সুবিধাৰ আধাৰশিলা স্থাপন কৰা হৈছে। এই সুবিধা সম্পূৰ্ণ হ’লে ঘৰুৱা আৰু আন্তঃৰাষ্ট্ৰীয় উভয় বিমান সেৱাৰ বাবে ই সেৱা আগবঢ়াব। ইয়াৰ দ্বাৰা দেশৰ বাবে ৰাজহ আহৰণ হ’ব, আমাৰ মূলধন যাতে দেশৰ ভিতৰতে থাকিব, যুৱক-যুৱতীসকলৰ বাবে অসংখ্য কৰ্মসংস্থাপনৰ সুযোগৰ সৃষ্টি হ’ব।

বন্ধুসকল,

আজি আমাৰ চৰকাৰৰ সৰ্বোচ্চ অগ্ৰাধিকাৰ হৈছে দেশৰ নাগৰিকৰ সুবিধা বৃদ্ধি কৰা। আমাৰ উদ্দেশ্য হৈছে নাগৰিকসকলৰ আৰ্থিক বোজা যাতে নূন্যতম হৈ থাকে তাৰ বাবে তেওঁলোকৰ সময় ৰাহি কৰা। আধুনিক ৰে'ল সেৱা—যেনে মেট্ৰ’ আৰু বন্দে ভাৰত এক্সপ্ৰেছ—ঠিক এই দৃষ্টিভংগীৰ প্ৰতি লক্ষ্য ৰাখি সম্প্ৰসাৰণ কৰা হৈছে। দিল্লী-মীৰুট ‘নমো ভাৰত’ ৰে’ল সেৱাই যি অপৰিসীম সম্ভাৱনা কঢ়িয়াই আনিছে  সেয়া আমি সকলোৱে প্ৰত্যক্ষ কৰি আছো। আজিলৈকে ২.৫ কোটিতকৈ অধিক লোকে নমো ভাৰত ৰে’লত যাত্ৰা কৰিছে। দিল্লী আৰু মীৰুটৰ মাজৰ যাত্ৰা— আগতে ঘণ্টাৰ পিছত ঘণ্টা সময় লৈছিল—এতিয়া মিনিটৰ ভিতৰতে সম্পূৰ্ণ হৈছে।

বন্ধুসকল,

আমাৰ চৰকাৰে ‘উন্নত ভাৰত’ (বিকশিত ভাৰত)ৰ বাবে আধুনিক আন্তঃগাঁথনি বিকাশৰ ক্ষেত্ৰত অভূতপূৰ্ব বিনিয়োগ কৰিছে। বিগত ১১ বছৰত আন্তঃগাঁথনিৰ বাজেট ছগুণতকৈও অধিক বৃদ্ধি কৰা হৈছে। এই সময়ছোৱাত ঘাইপথ আৰু এক্সপ্ৰেছৱেৰ বাবে ১৭ লাখ কোটিতকৈ অধিক ধন ব্যয় কৰা হৈছে, যাৰ ফলত এক লাখ কিলোমিটাৰতকৈ অধিক ঘাইপথ নিৰ্মাণ কৰা হৈছে। ২০১৪ চনৰ পূৰ্বে মাত্ৰ ২০ হাজাৰ কিলোমিটাৰ ৰে'লপথত বিদ্যুৎ সংযোগ কৰা হৈছিল। কিন্তু  ২০১৪ চনৰ পৰা ৪০ হাজাৰ কিলোমিটাৰতকৈও অধিক ৰে’লপথত বিদ্যুৎ সংযোগ কৰা হৈছে। আজি ব্ৰডগজৰ নেটৱৰ্ক প্ৰায় ১০০ শতাংশ বিদ্যুৎচালিত হৈ পৰিছে। কাশ্মীৰ উপত্যকাই হওক বা উত্তৰ-পূৰ্বাঞ্চলৰ ৰাজধানীয়েই হওক, এই অঞ্চলসমূহক প্ৰথমবাৰৰ বাবে ৰে’ল নেটৱৰ্কৰ সৈতে সংযোগ কৰা হৈছে। বিগত দশকত বন্দৰৰ ক্ষমতা দুগুণতকৈও অধিক বৃদ্ধি পাইছে। দেশত আভ্যন্তৰীণ জলপথৰ সংখ্যাও ক্ৰমাগতভাৱে বৃদ্ধি পাইছে। এখন উন্নত ভাৰত গঢ়াৰ বাবে প্ৰয়োজনীয় প্ৰতিটো খণ্ডতে ভাৰতে দ্ৰুতগতিত কাম কৰি আছে।

বন্ধুসকল,

এখন উন্নত ভাৰত গঢ়াৰ বাবে সকলোৰে সামূহিক প্ৰচেষ্টা নিতান্তই প্ৰয়োজনীয়। দেশৰ ১৪০ কোটি নাগৰিকে পৰম অধ্যৱসায়েৰে কাম কৰি ঐক্যবদ্ধভাৱে  বিশ্ব সংকটৰ সন্মুখীন হোৱাটো অতি জৰুৰী৷ ইতিমধ্যে মই বিতংভাৱে বুজাই বাখ্যা কৰিছো— আনকি সংসদৰ ভিতৰতো— যুদ্ধৰ পৰা উদ্ভৱ হোৱা সংকটৰ সৈতে আমি কেনেদৰে মোকাবিলা কৰাৰ কথা  মনস্থ কৰিছো। কালি দেশৰ সকলো মুখ্যমন্ত্রীৰ সৈতেও বিস্তৃত আৰু অতি গঠনমূলক আলোচনাত মিলিত হৈছিলোঁ৷ আজি মই আপোনালোক সকলোকে—ৰাইজক, যিসকলে অদম্য সাহসক মূৰ্ত কৰি ৰাখিছে—আৰু মোৰ সকলো  নাগৰিকক পুনৰ ক’ব বিচাৰিছো যে আমি এই সংকটৰ সন্মুখীন হ’ব লাগিব শান্ত মনেৰে, ধৈৰ্য্যৰে, সংহতিৰে আৰু সামূহিক প্ৰচেষ্টাৰে। এই সংকটে সমগ্ৰ বিশ্বতে উদ্বেগৰ  সৃষ্টি কৰিছে। আমাৰ প্ৰধান চিন্তা হ’ব লাগিব আমাৰ নিজৰ দেশৰ  মংগল; সঁচাকৈয়ে, এয়াই আমাৰ ভাৰতীয়সকলৰ আটাইতকৈ ডাঙৰ শক্তি। লগতে উত্তৰ প্ৰদেশ আৰু সমগ্ৰ দেশৰ সকলো ৰাজনৈতিক দলকে আন্তৰিকতাৰে আবেদন জনাব বিচাৰো—আৰু বিনম্ৰভাবে অনুৰোধ জনাব বিচাৰো—এনে সংকটৰ সময়ত দেশৰ বাবে ক্ষতিকাৰক বক্তব্য দিয়াৰ পৰা বিৰত থাকক। ভাৰত চৰকাৰৰ নীতি আৰু কৌশল কেৱল ভাৰতীয় জনসাধাৰণৰ স্বাৰ্থ আৰু কল্যাণৰ দিশেৰেই পৰিচালিত হয়। ৰাজনীতিৰ স্বাৰ্থত দায়িত্বহীন বাক্যবাণ নিক্ষেপত লিপ্ত হোৱাসকলে হয়তো ৰাজনৈতিক বিতৰ্কত কেইটামান পইণ্ট লাভ কৰিব পাৰে, কিন্তু এই দেশৰ জনসাধাৰণে দেশৰ ক্ষতিসাধন কৰা কামবোৰ কেতিয়াও ক্ষমা নকৰে। আনকি ক’ভিড-১৯ মহামাৰীৰ দৰে বৃহৎ সংকটৰ সময়তো একাংশ ব্যক্তিয়ে ভেকচিন সন্দৰ্ভত উৰাবাতৰি বিয়পাইছিল,  কেৱল চৰকাৰৰ প্ৰচেষ্টাত বাধাৰ সৃষ্টি কৰি দেশৰ ক্ষতিসাধন কৰিবলৈ। তাৰ পৰিণাম কি হ’ল? নিৰ্বাচনৰ সময়ত জনসাধাৰণে নিৰ্ণায়কভাৱে তেওঁলোকক নাকচ কৰি এনে ৰাজনীতি একাষৰীয়া কৰি পেলালে। মই সম্পূৰ্ণ বিশ্বাসী যে দেশৰ সকলো ৰাজনৈতিক দলে ইয়াৰ পৰা শিক্ষা ল’ব আৰু দেশৰ ঐক্যবদ্ধ প্ৰচেষ্টাক শক্তি যোগোৱাৰ লগতে সমৰ্থন আগবঢ়াব। এই আহ্বানৰ জৰিয়তে পুনৰবাৰ উত্তৰ প্ৰদেশৰ জনসাধাৰণক এই সুন্দৰ  বিমানবন্দৰৰ বাবে আন্তৰিক অভিনন্দন জ্ঞাপন কৰিলোঁ।

অনুগ্ৰহ কৰি মোৰ লগত যোগ দি কওক:

ভাৰত মাতা কী জয়!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

বন্দে মাতৰম!

আপোনালোকক অশেষ ধন্যবাদ।

***

MJPS/SS/DK/DM