Ki heh ophisar na ki tnad Petroleum bad Natural Gas, Ports, Shipping and Waterways, External Affairs ki la ai jingtip sha ki lad pathai khubor halor ki jingjia mynta ha West Asia mynta ka sngi ha National Media Centre. Kum kine ki jingïakren la pynlong man ka por ban ai jingtip sha ki nongshong shnong lyngba ki lad pathai khubor shaphang ka jinglong jingman kaba nang kylla. Ha ka jingi jingtip ba mynta ka sngi, la ïasam ïa ki jingtip ba thymmai halor ka jingdon ka umphniang, ki kam duriaw, bad ki jingïarap ïa ki nong India ba don ha ka thaiñ.

Ka jingpynbiang bording bad ka jingdon ka umphniang

Ka Tnad Petroleum and Natural Gas ka la ai ka jingtip ba thymmai halor ka jinglong jingman ba iadei bad ka jingpynbiang umphniang bad ki sienjam ba la shim ban pynthikna ia ka jingdon ki mar umphniang bad ka LPG, hapdeng ka jingkhang ïa ka Strait of Hormuz. Ka Tnad ka la ong:

Ka umphniang bym pat pynkhuid bad ki jaka pynkhuid umphniang

• Baroh ki jaka pynkhuid umphning ki dang trei borbah bad ki dang pynbiang ia ka umphning ka bym pat pynkhuid. Ka India ka don ia ka jingpynmih petrol bad diesel kaba biang, bad ym donkam ban wanrah namar ri ban pyndap ia ka jingdonkam hapoh ka ri.
• Ka jingpynmih LPG hapoh ka ri na ki jaka pynkhuid umphniang la kiew kumba 40 percent.

Ki Jaka die umphniang

• Ym don kano kano ka jingjia ha kaba ym don umphniang kumba la ioh jingtip na ki jaka die umphniang jong ki kompani pynbiang umphniang bad ka jingpynbiang petrol bad diesel ka dang bteng na ka por sha ka por.
• La kyntu ia ki nongshong shnong ban ym thied kyrkieh namar ki stock ki biang bad ki don.

Natural Gas

• Ia ki kam ba kongsan la ai jingiada ban ïoh ïa ka jingpynbiang gas, kynthup ïa 100% ka jingpynbiang ia ka jingkit PNG bad CNG hapoh ka ri, katba ïa ka jingpynbiang sha ki nongpyndonkam ha ki karkhana bad ki nongkhaii la buh kumba 80 percent.
• La pynshlur ia ki nongpyndonkam LPG na ka bynta ka kam khaii ban kylla sha ka PNG, bad ki jaka treikam kum ki hotel, ki jaka bam, ki hospital bad ki hostel ki lah ban ioh ia ki connection PNG na ki kynhun ka City Gas Distribution (CGD) ba la ioh jingmynjur.
• Ki kompeni CGD kiba kynthup ia ka IGL, MGL, GAIL Gas bad BPCL ki ai jingmyntoi ban kyntiew ia ka jingpyniasoh PNG hapoh ka ri bad ka kam khaii.
• Ka Sorkar ka dang pyniar ia ka rynsan jong ka CGD bad ka PNGRB ka la ai jingmut ia ki tnad CGD ban pynsted ia ka rynsan jong ka CGD ban kyntiew ia ka jingpyndonkam ia ka PNG kaba khuid bad kaba paka, bad la pynshlur ia ki kam khaii ban leit sha ki kynhun CGD kiba la ioh jingithuh na ka bynta ki jingpyniasoh.
• La ai jingmut ia ki kynhun ka CGD ban pynthikna ia ka jingpynpoi gas kaba bun tam sha ki kam kiba kongsan kum ki jaka pyntyrkhong ia ki symbai bad ki jaka buh jingdait thah.
• Ka Petroleum and Natural Gas Regulatory Board (PNGRB) ka la bthah ia ki kynhun jong ka CGD ban pynduna ia ka por hapdeng ka jingpyndonkam bad ka jingsdang ban pynbiang ia ka umphniang, katba ki dang pyntip shai ia ki por sha ki nongpyndonkam ban pynshlur ia ka jingpdiang.
• La ai jingmut ruh ia ki kynhun jong ka CGD ban sdang ia ki sienjam pynsngewthuh paidbah hapoh ka kam ba iadei bad ka PNG, kynthup ia ki campaign lyngba ki kot khubor, ki radio, social media bad ki kam pynphriang jingtip paidbah kiba kynthup ia kito kiba don bynta ha ka kam bad ki influencer.
• Ka sorkar India, lyngba ka shithi ha ka 16 tarik Lber 2026, ka la kyrpad ïa ki Jylla bad ki UT ban pynsuk ïa ka jingpyniar ïa ka CGD da kaba ai ïa ki jingbit ba la shim na ka bynta ki aplikeshon kiba dang sahteng, ban mynjur ïa ki jingbit ba thymmai hapoh 24 kynta, ban pyllait ïa ka jingsiew ban pynbha ïa ki surok bad ka jingsiew bai ai jingbit, ban pynduna ïa ki por trei bad ki kynta treikam, bad ka jingthung ia ki nodal officer jong ki jylla na ka bynta ka jingiatreilang bad ka jingpyntreikam kaba kham sted.
• Ka Sorkar India, lyngba ka shithi ha ka 18 tarik Lber 2026, ka la tyrwa ïa ki Jylla bad ki UT ban mang pisa shuh shuh 10 percent na ka bynta ka LPG ba pyndonkam ha ka kam khaii kaba ïadei bad ki jingpynkylla kiba kyrshan ïa ka jingkylla na ka LPG sha ka PNG, kynthup
  • 1% ka jingmang shuh shuh na ka bynta ban thaw ia ki komiti jong ka jylla bad distrik na ka bynta ban ai jingmynjur ia ki aplikeshon CGD bad ban pynbeit ia ki jingeh,
  • 2% ka jingmang shuh shuh na ka bynta ban pynmih hukum ban ai ia ki jingbit ba la shim ba ki dei ki CGD,
  • 3% ka jingmang shuh shuh na ka bynta ban wanrah ia ka “Skhim tih bad pynthymmai” na ka bynta ki kynhun ka CGD bad
  • 4% ka jingmang shuh shuh na ka bynta ban pynduna ia ka bai wai/ bai wai man la u snem,
• La pynshlur ia ki jylla bad ki UT ban rah shakhmat ia kine ki jingpynkylla ban pynsted ia ka jingpyniar ia ka rynsan jong ka CGD bad ban pynsted ia ki jingpyniasoh PNG na ka bynta ki nongpyndonkam hapoh ka ri, ki nongkhaii bad ki karkhana.
• La khmih lynti ba kine ki sienjam kin pynduna ia ka jingeh ha ka jingdawa LPG bad pynsuk ia ka jingkylla sha ka PNG da ki nongpyndonkam ha ka kam khaii.

LPG

• La bteng ban buddien ia ka jingpynbiang ia ka LPG ha kaba iadei bad ka jinglong jingman ka sain pyrthei mynta.
• Ym don kano kano ka jingjia ha kaba ym don umphniang kumba la ioh jingtip ha ki jaka sam.
• Ka jingphah buh LPG online ka la kiew na ka 83% sha ka 93%.
• La pyniar ia ka jingkynthup ia ka Delivery Authentication Code (DAC) na ka 53% (Rymphang 2026) sha kumba 81% ban iada na ka jingpynkylla.
• Ka jingpynpoi ia ki tyndong LPG hapoh ka ri ka dang bteng kumba ju long.
• Kumba 15 tylli ki Jylla/UT kum ka Bihar, Chhattisgarh Delhi, Gujarat, Haryana, Himachal Pradesh, Jharkhand, Karnataka, Kerala, Manipur, Rajasthan, Uttarakhand bad kiwei kiwei, ki la pynmih ia ki hukum ban ai ia ka non-domestic LPG, bad ka jingpynbiang LPG na ka bynta ka kam khaii ka dang don ha ka ri baroh kawei.

Ka umphniang sharak

• La mang sa 48,000 KL ka umphniang sharak sha ki Jylla bad ki UT, kiba la kyrpad ban ithuh ia ki jaka sam.
• Kumba 12 tylli ki Jylla kum ka Bihar, Chhattisgarh, Gujarat, Karnataka, Keralam, Manipur, Tamil Nadu, Uttar Pradesh bad kiwei kiwei, ki la pynmih ïa ki hukum ban ai bhah SKO, katba ki don ki Jylla kiba la pyni ba ym donkam satia.

Ki Jingialang ba la pynlong da ki Sorkar Jylla

• Ki Sorkar Jylla bad ki UT ki dang buddien ia ka jingpynpoi ia ki mar ba kongsan hapoh ka Essential Commodities Act bad LPG Control Order ban shim ia ka sienjam pyrshah ia kano kano ka jingpynlang bad jingpyniaid iew beain.
• Ka Sorkar India ka la ai jingmut ia ki Jylla bad ki UT ban pynlong ia ki jingjurip ba iatreilang bad ki jingpeit bniah ban tehlakam ia ki kam beain.
• 30 tylli ki jylla bad ki UT ki la sdang ia kicontrol room bad 22 tylli ki la thaw ia ki komiti peitngor ha ki distrik, bad la ai jingmut ia kiwei ban leh kloi ia kane.
• 22 tylli ki Jylla/UT kum ka Rajasthan, Telangana, Goa, Himachal Pradesh, J&K, Maharashtra, Odisha, Tamil Nadu bad kiwei kiwei ki la thaw ïa ka Komiti ban peit bniah ha ki District.
• La kyrpad ïa baroh kito ki Jylla/UT ki bym pat buh ïa ki Control room bad ki District Monitoring Committee ba kin leh kyrkieh ïa kane.

Ki kam na ka bynta ka jingtehlakam

• Ki Sorkar Jylla ki la shim ia ki sienjam ban khanglad ia ka jingpynlang bad pyniaid iew beain ia ka LPG.
• Ki jingjia ba dang shen ki kynthup ia ka jingioh kurup ia ki tyndong LPG ha Jharkhand bad Madhya Pradesh, ryngkat ki jingtreilang ba la pynlong da ki bor ba dei khmih.
• Ki Kompani umphniang PSU ki la pynlong palat 2,300 tylli ki jingjurip kynsan ha ki jaka umphniang bad ki jaka sam LPG ban pynthikna ka jingpynbiang kaba iaid beit iaid ryntih bad ban iada na ka jingpyndonkam bakla.

Kiwei kiwei ki sienjam jong ka Sorkar

• Ka Sorkar ka dang bteng ban buh hakhmat eh ïa ka jingpynbiang LPG khlem jingthut bad ka jingpyniar ïa ka PNG, khamtam na ka bynta ki longïing bad ki kam ba kongsan kum ki hospital bad ki jaka pule.
• Ki sienjam ba iadei bad ka jingpynbiang bad jingdawa ki kynthup ïa ka jingkyntiew ïa ka jingpynmih ïa ki jaka pynkhuid umphniang, ka jingpynkylla ïa ka por phah buh kaba 25 sngi ha ki jaka sor bad haduh 45 sngi ha ki jaka nongkyndong, bad ka jingpeit kyrpang ban mang.
• La pynbiang ia kiwei pat ki umphniang kum ka umphniang sharak bad dewiong ban pynduna ia ka jingeh ha ka jingdawa LPG.
• Ki Kompani Umphniang PSU ki kyntiew ia ka jingphah buh lyngba ki lad digital bad kiar na ki jingphah buh kyrkieh, da kaba kyntiew ia ka jingpyndonkam ia ki rukom phah buh online.
• La sdang ban pynpoi LPG na ka bynta ka kam khaii ha ki katto katne ki Jylla da ka jingkyrshan na ki Sorkar Jylla.

Ka jingai jingmut ia ki paidbah

• La kyntu ia ki nongshong shnong ban shaniah ha ki tyllong khubor jong ka sorkar bad ban kiar na ki khubor hamsaia.
• La kyrpad ia ki nongpyndonkam ban kiar na ka jingphah buh kyrkieh, pyndonkam ia ki rynsan phah buh lyngba ki lad digital bad ban kiar na kaba leit sha ki jaka LPG khlem da donkam.
• La pynshlur ia ki nongshong shnong ban pyndonkam da kiwei pat ki umphniang kum ka PNG bad ki kor shet elektrik ne induction bad ban tyngkai ia ka bording.

Ka jingshngain ha ki kam duriaw bad ki kam pyniaid jhad

Ha kane ka jingialang ai jingtip, la iasam ia ki jingtip halor ka jinglong jingman jong ka kam duriaw ha Persian Gulf mynta bad ki sienjam ba la buh ban pynthikna ia ka jingshngain jong ki jhad bad ki nongtrei jong ka India da ka Tnad Ports, Shipping and Waterways. Ka tnad ka la ong ba:

• Baroh ki nongleit nongwan jong ka India lyngba ki duriaw kiba don ha ka thain ki don ha ka jingshngain bad ym don kano kano ka jingjia ba iadei bad ki jhad kiba don ka lama India ha kine ki 24 kynta ba la dep.

· Kumba ka long mynta, ki don 22 tylli ki jhad kiba don ka lama India kiba don 611 ngut ki nongleit jingleit jong ka India lyngba ki duriaw kiba dang sah ha ka thaiñ Persian Gulf ba shaphang sepngi, ha kaba ka Directorate General of Shipping ka dang ïai bteng ban buddien ha ryngkat ka jingïatreilang bad ki trai jhad, ki agency jong ka RPSL bad ki Indian Mission.

· Ki jhad kit LPG ka Shivalik bad Nanda Devi mynta ki dang pynhap ia ki mar katkum ka por ba la buh ia ki kompeni kit umphniang.

· Ka DG Shipping Control Room ka dang bteng ban treikam baroh arphew saw kynta bad ka la lah ban jubab haduh 3,305 tylli ki phone call bad 6,324 tylli ki email naduh ba la pyntreikam ïa ka, kynthup ïa ki 125 tylli ki jingphone bad 449 tylli ki email ha ki 24 kynta ba ladep.

· Ka DG Shipping ka la pynsuk ban pynphai biang ïa palat 472 ngut ki nongleit jingleit na India haduh mynta, kynthup ïa ki 25 ngut ha ki 24 kynta ba ladep, na ki kad liengsuiñ bad ki jaka ba don ha ka thaiñ.

· Ka kam duriaw jong ka India ka dang ïai bteng ban treikam khlem kano kano ka jingkhapngiah ha ki kad lieng, kynthup ka jingpynthikna na ki Maritime Board jong ki Jylla kum ka Gujarat bad Maharashtra.

· Ki kad lieng ki buddien bha ia ka jingleit jingwan jong ki lieng bad ka jingpynkit ia ki mar bad ki don ia ka jaka buh mar kaba biang, ryngkat bad ka jaka buh mar ba la wanrah shuh shuh, kynthup ia kumba 2,260 sq. meter at Visakhapatnam Port Authority.

· Ha JNPA, ka jinglong jingman ka dang long kumjuh ha kaba ka jingdon jong ki container kiba sahkut ka la nang hiar shuh shuh na kumba 1,000 sha ka 770 tylli eiei.

· Ka tnad Ports, Shipping and Waterways ka dang bteng ban buddien ia ka jingleit jingwan jong ki lieng, ki jingtreikam jong ki kad lieng, ka jingshngain jong ki nongleit nongwan lyngba ki duriaw bad ka jingbteng jong kam khaii pateng lyngba ki duriaw ha kaba iadei bad ka jinglong jingman kaba nang kylla ha ka thain West Asia.

Ka jingshngain jong ki briew ka India ha ka thain

Ka tnad Kam Bar ri ka la iasam ia ki jingtip ba thymmai halor ki jingjia ba dang shen ha ka thain, kynthup ka jingai jingiarap ba dang iaid shakhmat bad ka jingai jingtip lyngba ki Indian Mission. Ka Tnad ka la ai jingtip ba ka:

· Ka tnad kam bar ri ka dang bteng ban buddien bha ïa ki jingjia ha West Asia bad ka thaiñ Gulf, ha kaba ka jingshngaiñ, bad ka bha ka miat jong ki briew jong ka ri ka long kaba kongsan tam.

· U Myntri Rangbahduh u la ïakren bad u President ka UAE, u HH Sheikh Mohamed bin Zayed Al Nahyan, bad ai khublei lypa na ka bynta ka Eid.

· Kine ki nongialam ki la iakren halor ka jinglong jingman kaba mynta ha West Asia. U Myntri Rangbahduh u la pynpaw biang ïa ka jingpynrem jur jong ka India ïa ki jingshah thombor ha UAE kaba la wanrah ïa ka jingduh ïa ki mynsiem briew bad ka jingjulor ki jingdon jingem jong ki riew paidbah.

· Baroh arngut ki nongialam ki la ban jur ia ka jingdonkam ban pynthikna ia ka jingleit jingwan kaba shngain bad kaba laitluid lyngba ka Strait of Hormuz bad ki la mynjur ban bteng ban trei na ka bynta ban wanrah biang ia ka jingsuk, jingshngain bad jingskhem ha ka thain.

· Ka Embassy jong ka India ha Tehran ka dang ïai bteng ban ïarap ïa ki samla pule na India kiba don ha Iran, kynthup ïa kito kiba kwah ban rung lyngba ki jaka khappud sha Azerbaijan.

· La bthah ia ki nong India ban bud ryntih ia ki jingbthah jong ka Embassy ban pynsuk ia ka jingiaid lynti kaba suk sha ki pud ki sam sha Armenia bad Azerbaijan.

· Ka control room ba kyrpang jong ka MEA ka dang treikam ban iarap ia ki nong India bad ki bahaiing jong ki, bad ka jingiatreilang ka dang iaid shakhmat bad ki Sorkar Jylla bad ki Union Territory.

· Ki Indian Mission bad ki Post ha kylleng ka thain ki dang bteng ban treikam baroh arphew saw kynta, ki iakren bad ki kynhun ha ka imlang sahlang bad ki sengbhalang bad ki pynmih ia ki jingai jingmut ba thymmai. Ka jinghiar ki jingkylli na ki helpline ka pyni ba la lah ban pynbeit ïa ba bun ki mat ba kyrkieh jong ki nongshong shnong kiba sahkut.

· Ki Mission ki dang ïakren bad ki bor synshar ha ka thain bad ki dang ïai bteng ban ïarap ïa ki nongleit nongwan lyngba ki duriaw, ki nong India kiba sahkut bad ki nongleit jngohkai da ki visa, ki jingshakri jong ki nongkitkam bad ka jingkyrshan ha ka liang ka jingdonkam.

· La shim ia ki sienjam ba kyrpang na ka bynta ki samla pule jong ka India ha ka thain, ha kaba ki Mission ki la iatreilang bad ki skul bad ki board ba iadei bad ka pule puthi.

· Ia ki eksamin CBSE na ka bynta ka klas X la pynsangeh noh bad, mynta ki klas XII board ruh la pynsangeh. La pynsangeh ruh ia ki eksamin ICSE bad Kerala Board.

· Ki Board bapher bapher kin sa pynbna ia ka rukom ban buh ia ki mark ha kine ki khep ha ka por kaba biang.

· Ha Iran, la pynkynriah noh ïa ki samla pule na India na Tehran, Isfahan bad Shiraz sha ki jaka ba kham shngaiñ, ha kaba ïa baroh ki jingïarap ba donkam la pynbiang da ka Embassy.

· Naduh ka 28 tarik Rymphang 2026, ki don kumba 2,60,000 ngut ki nongleit nongwan kiba la wanphai na katei ka thain sha India.

· Ka jingtreikam jong ki liengsuiñ ka nang kiew suki suki da kaba wanrah shuh ia kiwei ki jingshakri ha kylleng ka thaiñ.

· Ha UAE, kumba 70 tylli ki liengsuiñ ki la treikam ha ka 17 tarik Lber 2026 bad kumba 75 tylli ki liengsuiñ la khmih lynti ba kin leit mynta ka sngi sha ki jaka bapher bapher ha India. Palat 50 tylli ki liengsuiñ ki la treikam man ka sngi naduh ka 5 tarik Lber 2026, kaba pyni ka jingkiew ka jingïasoh.

· Ki liengsuin ki la bteng ka jingtreikam na Saudi Arabia bad Oman sha India.

· Ka Qatar airspace ka dang plie shi bynta, ha kaba 5 tylli ki liengsuiñ ki la treikam hynnin ka sngi bad la pynbna ia ki jingshakri sha 9 tylli ki jaka ha India naduh mynta ka sngi.

· Ka Kuwait airspace ka dang khang naduh ka 28 tarik Rymphang 2026. La khmih lynti ba ki liengsuiñ ba kyrpang ki bym shym la buh por jong ka Jazeera Airways ki wan na ka kad liengsuiñ Al Qaisumah ha Saudi Arabia.

· Na ka bynta ki nong India kiba don ha Kuwait, Bahrain bad Iraq, ha kaba dang khang ia ka airspace, ka jingïaid lynti lyngba ka Saudi Arabia ka dang ïai bteng ban pynsuk.

Ka Sorkar ka la ban jur ba ka dang long kaba husiar bad ka dang pynneh ïa ka jingïatreilang hapdeng ki Tnad Sorkar Pdeng, ki agency, bad ki sorkar Jylla/UT, da kaba shim ia ki lad ki lynti kiba donkam ban iada ia ki kam ba kongsan bad ki jingmyntoi jong ka ri.