પશ્ચિમ એશિયાના ઘટનાક્રમ અંગેની આંતર-મંત્રાલય મીડિયા બ્રીફિંગ આજે નેશનલ મીડિયા સેન્ટર ખાતે યોજાઈ હતી. બદલાતી પરિસ્થિતિ અંગે અપડેટ્સ આપવા માટે આવી બ્રીફિંગ નિયમિતપણે કરવામાં આવે છે. આજની બ્રીફિંગમાં, પેટ્રોલિયમ અને કુદરતી ગેસ, બંદરો, શિપિંગ અને જળમાર્ગો અને વિદેશ મંત્રાલયે ઇંધણ પુરવઠો, દરિયાઇ કામગીરી, પ્રદેશમાં ભારતીય નાગરિકોની સ્થિતિ અને જાહેર માહિતીના પ્રયાસો અંગે અપડેટ્સ આપ્યા હતા.

ઊર્જા પુરવઠો અને ઇંધણની ઉપલબ્ધતા

પેટ્રોલિયમ અને કુદરતી ગેસ મંત્રાલયે હોર્મુઝની સામુદ્રધુની (Strait of Hormuz) ને લગતી પરિસ્થિતિને ધ્યાનમાં રાખીને વર્તમાન ઇંધણ પુરવઠાની સ્થિતિ અને પેટ્રોલિયમ ઉત્પાદનો અને LPG ની સતત ઉપલબ્ધતા સુનિશ્ચિત કરવાના પગલાં વિશે માહિતી આપી હતી. મંત્રાલયે જણાવ્યું:

ક્રૂડ અને રિફાઇનરીઓ

તમામ રિફાઇનરીઓ ઉચ્ચ ક્ષમતા પર કાર્યરત છે અને પૂરતો ક્રૂડ ઓઇલનો સ્ટોક જાળવી રહી છે. ભારત પેટ્રોલ અને ડીઝલના ઉત્પાદનમાં આત્મનિર્ભર છે અને સ્થાનિક માંગને પહોંચી વળવા માટે કોઈ આયાતની જરૂર નથી.

રિટેલ આઉટલેટ્સ

ઓઇલ માર્કેટિંગ કંપનીઓ દ્વારા રિટેલ આઉટલેટ્સ પર ઇંધણ ખૂટી જવાના (dry-outs) કોઈ કિસ્સા નોંધાયા નથી, અને પેટ્રોલ અને ડીઝલનો પુરવઠો નિયમિતપણે જાળવવામાં આવી રહ્યો છે. નાગરિકોને સલાહ આપવામાં આવે છે કે પૂરતો સ્ટોક ઉપલબ્ધ હોવાથી ગભરાઈને ખરીદી (panic buying) ન કરે.

કુદરતી ગેસ

પ્રાથમિકતા ધરાવતા ક્ષેત્રોને સુરક્ષિત ગેસ પુરવઠો મળવાનું ચાલુ છે, જેમાં PNG અને CNG નો 100 ટકા પુરવઠાનો સમાવેશ થાય છે, જ્યારે ઔદ્યોગિક અને વ્યાપારી ગ્રાહકોને સપ્લાય લગભગ 80 ટકા પર નિયંત્રિત કરવામાં આવી રહ્યો છે.

શહેરી વિસ્તારોમાં વ્યાપારી LPG ગ્રાહકોને PNG નો ઉપયોગ કરવા પ્રોત્સાહિત કરવામાં આવે છે, અને હોટેલ્સ, રેસ્ટોરન્ટ્સ, હોસ્પિટલો અને હોસ્ટેલ્સ જેવી સંસ્થાઓ અધિકૃત સિટી ગેસ ડિસ્ટ્રિબ્યુશન (CGD) સંસ્થાઓ પાસેથી PNG જોડાણો મેળવી શકે છે.

IGL, MGL, GAIL Gas અને BPCL સહિતની CGD કંપનીઓ ઘરેલું અને વ્યાપારી PNG જોડાણો માટે પ્રોત્સાહન આપી રહી છે.

સરકાર CGD નેટવર્કનો વિસ્તાર કરી રહી છે અને રાજ્યો તથા કેન્દ્રશાસિત પ્રદેશોને વિનંતી કરી છે કે તેઓ CGD પાઇપલાઇન બિછાવવા માટેની પેન્ડિંગ અરજીઓ માટે મંજૂરીઓ ઝડપી બનાવે અને 'ડીમ્ડ પરમિશન' આપે, રોડ રિસ્ટોરેશન અને પરવાનગી શુલ્ક માફ કરે, કામ કરવાની પરિસ્થિતિઓમાં છૂટછાટ આપે અને ઝડપી અમલીકરણ માટે નોડલ ઓફિસરોની નિમણૂક કરે.

LPG

પ્રવર્તમાન ભૌગોલિક રાજકીય પરિસ્થિતિને ધ્યાનમાં રાખીને LPG સપ્લાય પર દેખરેખ રાખવામાં આવી રહી છે.

LPG વિતરકો (distributorships) પાસે કોઈ સ્ટોક ખૂટવાની ઘટના નોંધાઈ નથી.

રિફાઇનરીઓમાંથી ઘરેલું LPG ઉત્પાદનમાં આશરે 38% નો વધારો કરવામાં આવ્યો છે.

ઓનલાઇન LPG બુકિંગ વધીને લગભગ 94% થયું છે, જ્યારે ડાયવર્ઝન (ગેરરીતિ) અટકાવવા માટે ડિલિવરી ઓથેન્ટિકેશન કોડ (DAC) કવરેજ કટોકટી પહેલા 53% હતું જે વધીને લગભગ 76% થયું છે.

ઘરેલું LPG સિલિન્ડરની ડિલિવરી સામાન્ય રીતે ચાલુ છે.

બિહાર, દિલ્હી, ગુજરાત, હરિયાણા, હિમાચલ પ્રદેશ, કર્ણાટક, મણિપુર, રાજસ્થાન અને ઉત્તરાખંડ જેવા અનેક રાજ્યો અને કેન્દ્રશાસિત પ્રદેશોએ સરકારી માર્ગદર્શિકા મુજબ બિન-ઘરેલું LPG ની ફાળવણી માટે ઓર્ડર જારી કર્યા છે, અને વ્યાપારી LPG પુરવઠો તમામ રાજ્યો અને કેન્દ્રશાસિત પ્રદેશોમાં ઉપલબ્ધ કરાવવામાં આવી રહ્યો છે.

કેરોસીન

રાજ્યો અને કેન્દ્રશાસિત પ્રદેશોને 48,000 KL કેરોસીનની વધારાની ફાળવણી પૂરી પાડવામાં આવી છે, જેનાં વિતરણ પોઈન્ટ્સ ઓળખવા વિનંતી કરવામાં આવી છે.

બિહાર, છત્તીસગઢ, મણિપુર, કેરળ, તમિલનાડુ, ઉત્તર પ્રદેશ, ગુજરાત અને કર્ણાટક સહિત અનેક રાજ્યોએ SKO (કેરોસીન) ફાળવણીના આદેશો જારી કર્યા છે.

રાજ્ય સરકારો દ્વારા લેવામાં આવેલી બેઠકો

આવશ્યક વસ્તુ ધારા, 1955 અને LPG કંટ્રોલ ઓર્ડર, 2000 હેઠળ, રાજ્યો/કેન્દ્રશાસિત પ્રદેશો સંગ્રહખોરી અને કાળાબજાર સામે પગલાં લેવા માટે સત્તા ધરાવે છે.

પેટ્રોલ, ડીઝલ અને LPG ના પુરવઠાનું નિરીક્ષણ અને નિયમન કરવાની પ્રાથમિક જવાબદારી રાજ્યો/કેન્દ્રશાસિત પ્રદેશોની છે.

ભારત સરકારે તારીખ 13.03.2026 ના પત્ર દ્વારા મુખ્ય સચિવોને DM/કલેક્ટર્સ અને અમલીકરણ એજન્સીઓને નિરીક્ષણ અને આકસ્મિક તપાસ કરવા નિર્દેશ આપવા જણાવ્યું છે.

27 રાજ્યો/કેન્દ્રશાસિત પ્રદેશોએ કંટ્રોલ રૂમ ઉભા કર્યા છે અને પ્રેસ બ્રીફિંગ પણ કરી રહ્યા છે.

રાજસ્થાન, તેલંગાણા, ગોવા, હિમાચલ પ્રદેશ, જમ્મુ અને કાશ્મીર, મહારાષ્ટ્ર, ઓડિશા અને તમિલનાડુ સહિતના અનેક રાજ્યો/કેન્દ્રશાસિત પ્રદેશોએ જિલ્લા સ્તરીય મોનિટરિંગ કમિટીઓની રચના કરી છે; અન્ય રાજ્યોને તાત્કાલિક તેમ કરવા વિનંતી કરવામાં આવી છે.

અમલીકરણ કાર્યવાહી

દેશભરમાં LPG ની સંગ્રહખોરી અને કાળાબજારને ડામવા માટે અમલીકરણની કાર્યવાહી તેજ કરવામાં આવી રહી છે.

12,000 થી વધુ દરોડા પાડવામાં આવ્યા છે અને 15,000 થી વધુ સિલિન્ડર જપ્ત કરવામાં આવ્યા છે, જેમાં દિલ્હી, ગોવા, ઉત્તર પ્રદેશ, જમ્મુ અને કાશ્મીર, કેરળ અને મધ્ય પ્રદેશમાં મુખ્ય કાર્યવાહી નોંધાઈ છે.

PSU ઓઇલ માર્કેટિંગ કંપનીઓએ સુચારુ પુરવઠો સુનિશ્ચિત કરવા અને ગેરરીતિઓ રોકવા માટે રિટેલ આઉટલેટ્સ અને LPG વિતરકો પર 2,500 થી વધુ સરપ્રાઈઝ ઇન્સ્પેક્શન કર્યા છે.

અન્ય સરકારી પગલાં

સરકારની સર્વોચ્ચ અગ્રતા અવિરત LPG સપ્લાય સુનિશ્ચિત કરવાની છે, ખાસ કરીને ઘરો અને હોસ્પિટલો તથા શૈક્ષણિક સંસ્થાઓ જેવા અગ્રતા ક્ષેત્રો માટે.

PNG ગ્રાહકોને LPG સપ્લાય પરનું દબાણ ઘટાડવા માટે 14 માર્ચ 2026 ના LPG કંટ્રોલ ઓર્ડર સુધારા હેઠળ LPG કનેક્શન સરેન્ડર કરવાની સલાહ આપવામાં આવી છે.

સમાન વિતરણ સુનિશ્ચિત કરવા માટે બુકિંગ અંતરાલ (Interval) શહેરી વિસ્તારોમાં 25 દિવસ અને ગ્રામીણ વિસ્તારોમાં 45 દિવસ સુધી સુધારવામાં આવ્યા છે.

LPG ની માંગ પરનું દબાણ ઘટાડવા માટે કેરોસીન અને કોલસા જેવા વૈકલ્પિક ઇંધણ ઉપલબ્ધ કરાવવામાં આવ્યા છે.

PSU ઓઇલ કંપનીઓ ડિજિટલ બુકિંગને પ્રોત્સાહન આપી રહી છે અને ગભરાટમાં કરાતા બુકિંગને નિરુત્સાહિત કરી રહી છે.

રાજ્ય સરકારોના સહયોગથી અનેક રાજ્યોમાં વ્યાપારી LPG પુરવઠો શરૂ કરવામાં આવ્યો છે.

જાહેર સલાહ

નાગરિકોને ગભરાવાની જરૂર નથી કારણ કે ઘરો અને આવશ્યક ક્ષેત્રો માટે પર્યાપ્ત LPG પુરવઠો જાળવવામાં આવી રહ્યો છે.

LPG સિલિન્ડર IVRS, SMS, WhatsApp, મોબાઇલ એપ્લિકેશન અને ઇ-કોમર્સ પ્લેટફોર્મ જેવા ડિજિટલ પ્લેટફોર્મ દ્વારા બુક કરી શકાય છે.

નાગરિકોને ગભરાટમાં બુકિંગ કરવાનું ટાળવા, ડિજિટલ મોડનો ઉપયોગ કરવા અને LPG વિતરકોની બિનજરૂરી મુલાકાત ટાળવા અપીલ કરવામાં આવી છે.

ગ્રાહકોને PNG અને ઇલેક્ટ્રિક અથવા ઇન્ડક્શન કૂકટોપ જેવા વૈકલ્પિક ઇંધણનો ઉપયોગ કરવા અને ઊર્જા બચાવવા પ્રોત્સાહિત કરવામાં આવે છે.

નાગરિકોને સચોટ માહિતી માટે સત્તાવાર સ્ત્રોતો પર આધાર રાખવા અને અફવાઓથી બચવા સલાહ આપવામાં આવે છે.

દરિયાઈ સુરક્ષા અને શિપિંગ કામગીરી

બંદરો, શિપિંગ અને જળમાર્ગ મંત્રાલયે પર્શિયન ગલ્ફમાં દરિયાઈ પ્રવૃત્તિઓની તાજેતરની સ્થિતિ અને ભારતીય જહાજો અને ક્રૂની સુરક્ષા માટે લેવાયેલા પગલાં શેર કર્યા હતા. મંત્રાલયે નોંધ્યું છે કે:

આ પ્રદેશમાં તમામ ભારતીય ખલાસીઓ સુરક્ષિત છે અને છેલ્લા 24 કલાકમાં ભારતીય ખલાસીઓ સાથે જોડાયેલી કોઈ શિપિંગ ઘટના નોંધાઈ નથી.

હાલમાં, 611 ભારતીય ખલાસીઓ સાથે 22 ભારતીય ધ્વજ ધરાવતા જહાજો પશ્ચિમ પર્શિયન ગલ્ફ ક્ષેત્રમાં છે. ડાયરેક્ટોરેટ જનરલ ઓફ શિપિંગ (DGS) જહાજ માલિકો, RPSL એજન્સીઓ અને ભારતીય મિશન્સ સાથે સંકલન કરીને પરિસ્થિતિ પર નજર રાખી રહ્યું છે.

DG શિપિંગ કંટ્રોલ રૂમના સક્રિયકરણ પછી, ખલાસીઓ, તેમના પરિવારો અને દરિયાઇ હિતધારકો તરફથી 3,180 કોલ્સ અને 5,875 ઇમેઇલ્સ હેન્ડલ કરવામાં આવ્યા છે, જેમાં છેલ્લા 24 કલાકમાં 150 કોલ્સ અને 378 ઇમેઇલ્સનો સમાવેશ થાય છે.

DG શિપિંગે ગલ્ફના એરપોર્ટ અને પ્રાદેશિક સ્થળોએથી છેલ્લા 24 કલાકમાં 161 સહિત 447 થી વધુ ભારતીય ખલાસીઓના સુરક્ષિત સ્વદેશ પરત ફરવાની સુવિધા આપી છે.

LPG કેરિયર જહાજ શિવાલિક મુંદ્રા બંદરે પહોંચ્યું છે અને કાર્ગો ઉતારવાનું કામ ચાલુ છે, જ્યારે જહાજ નંદા દેવી આજે વહેલી સવારે કંડલા પહોંચ્યું છે અને એન્નોર અને હલ્દિયા સહિત પૂર્વ કિનારે આગળ ટ્રાન્સફર કરવા માટે કાર્ગો ઉતારવાનું શરૂ કર્યું છે.

અગ્રતાના ધોરણે બર્થિંગ અને ઝડપી ડિસ્ચાર્જ સુનિશ્ચિત કરવા માટે તમામ દસ્તાવેજો અને આગમન પૂર્વેની ઔપચારિકતાઓ અગાઉથી પૂર્ણ કરવામાં આવી હતી.

મુખ્ય બંદરો જહાજોની અવરજવર અને કાર્ગો કામગીરી પર નજીકથી દેખરેખ રાખી રહ્યા છે અને જરૂરી સહાય પૂરી પાડી રહ્યા છે, જેમાં ટ્રાન્સશિપમેન્ટ કન્ટેનર માટે વી.ઓ. ચિદમ્બરનાર પોર્ટ ઓથોરિટી (VOCPA) દ્વારા પૂરી પાડવામાં આવેલી લગભગ 90,000 ચોરસ મીટરની વધારાની સ્ટોરેજ જગ્યાનો સમાવેશ થાય છે.

જવાહરલાલ નેહરુ પોર્ટ ઓથોરિટી (JNPA) ની બહાર રસ્તાઓ પર કન્ટેનર પડ્યા હોવાના અહેવાલો ખોટા છે. કન્ટેનર હાલમાં સામાન્ય લોજિસ્ટિક્સ ઓપરેશનના ભાગ રૂપે કન્ટેનર ફ્રેટ સ્ટેશન, વેરહાઉસ અથવા ફેક્ટરી પરિસરમાં સ્થિત છે.

JNPA પર ભીડ ઓછી થઈ રહી છે, જેમાં નાશવંત વસ્તુઓના કન્ટેનર લગભગ 2,000 થી ઘટીને આશરે 1,000 થયા છે.

સલાલાહ અને ખોર ફક્કાન જેવા બંદરો પર જહાજો રવાના થયા છે, જેમાં આજે વધુ એક જહાજ લગભગ 200 કન્ટેનર લઈને રવાના થવાનું છે. અટવાયેલા કન્ટેનરની સંખ્યા આગામી 24-48 કલાકમાં વધુ ઘટીને 600 ની આસપાસ થવાની ધારણા છે.

બંદરો, શિપિંગ અને જળમાર્ગ મંત્રાલય પશ્ચિમ અશિયામાં બદલાતી પરિસ્થિતિને ધ્યાનમાં રાખીને શિપિંગ હિલચાલ, પોર્ટ કામગીરી, ભારતીય ખલાસીઓની સુરક્ષા અને દરિયાઈ વેપારની સાતત્યતા પર નજીકથી દેખરેખ રાખવાનું ચાલુ છે.

ક્ષેત્રમાં ભારતીય નાગરિકોની સુરક્ષા

પ્રદેશ સંબંધિત વિકાસ અંગેના અપડેટ્સ શેર કરવામાં આવ્યા હતા, જેમાં મિશન્સ દ્વારા ચાલુ સહાય અને પહોંચનો સમાવેશ થાય છે. વિદેશ મંત્રાલયે જાણ કરી હતી કે:

વિદેશ મંત્રાલય પશ્ચિમ અશિયા અને ગલ્ફ ક્ષેત્રમાં બદલાતી પરિસ્થિતિ પર નજીકથી નજર રાખી રહ્યું છે. ભારતીય સમુદાયની સલામતી, સુખાકારી અને સુરક્ષા સર્વોચ્ચ અગ્રતા છે. સમર્પિત MEA કંટ્રોલ રૂમ કાર્યરત છે અને રાજ્ય સરકારો અને કેન્દ્રશાસિત પ્રદેશો સાથે સંકલન ચાલુ છે.

વિદેશ મંત્રીએ EU હાઈ રિપ્રેઝન્ટેટિવ અને વાઈસ પ્રેસિડેન્ટ સુશ્રી કાજા કાલાસના આમંત્રણ પર EU ફોરેન અફેર્સ કાઉન્સિલમાં હાજરી આપવા માટે બેલ્જિયમની મુલાકાત લીધી હતી.

બેઠક દરમિયાન ભારત-EU સંબંધો અને દબાણયુક્ત વૈશ્વિક પડકારો, ખાસ કરીને પશ્ચિમ અશિયાની સ્થિતિ અને ઊર્જા સુરક્ષા પર તેની અસરો પર ચર્ચા કરવામાં આવી હતી, જેમાં સંવાદ અને મુત્સદ્દીગીરી પર ભાર મૂકવામાં આવ્યો હતો.

કાઉન્સિલની બાજુમાં, વિદેશ મંત્રીએ EU હાઈ રિપ્રેઝન્ટેટિવ અને બેલ્જિયમ, સાયપ્રસ, જર્મની, નેધરલેન્ડ અને સ્લોવાકિયાના વિદેશ મંત્રીઓ સાથે દ્વિપક્ષીય બેઠકો યોજી હતી, જ્યાં તાજેતરના આંતરરાષ્ટ્રીય વિકાસ પર વિચારોનું આદાનપ્રદાન કરવામાં આવ્યું હતું.

700 થી વધુ ભારતીય નાગરિકો ઈરાનથી આર્મેનિયા (લગભગ 600) અને અઝરબૈજાનમાં પ્રવેશ્યા છે, જેમાં ગઈકાલે આર્મેનિયામાં વધારાના 50 પ્રવેશનો સમાવેશ થાય છે.

આર્મેનિયામાં પ્રવેશ કરનારા 284 ભારતીય શ્રદ્ધાળુઓમાંથી લગભગ 130 આજે દિલ્હી પહોંચવાની અપેક્ષા છે.

ભારતીય નાગરિકોને મદદ કરવા માટે MEA કંટ્રોલ રૂમ કાર્યરત છે. જો કે, કંટ્રોલ રૂમમાં કોલ્સ અથવા ઇમેઇલ્સની સંખ્યામાં નોંધપાત્ર ઘટાડો થયો છે. ગઈકાલે 22 કોલ્સ અને 6 ઇમેઇલ્સ પ્રાપ્ત થયા હતા અને તેનો નિકાલ કરવામાં આવ્યો હતો.

સમગ્ર ક્ષેત્રમાં ભારતીય મિશન્સ અને પોસ્ટ્સ ચોવીસ કલાક કાર્યરત છે, 24x7 હેલ્પલાઇન ચલાવે છે, ભારતીય સમુદાયના સંગઠનો સાથે સંપર્ક જાળવી રાખે છે અને નિયમિત એડવાઈઝરી જારી કરે છે. મિશન્સ સ્થાનિક સત્તાવાળાઓના સંપર્કમાં રહે છે અને અટવાયેલા ભારતીયો, વિદ્યાર્થીઓ, ખલાસીઓ અને ટૂંકા ગાળાના મુલાકાતીઓને વિઝા સપોર્ટ, લોજિસ્ટિકલ આસિસ્ટન્સ અને ટ્રાન્ઝિટ સુવિધા સહિતની સહાય પૂરી પાડી રહ્યા છે.

28 ફેબ્રુઆરીથી અત્યાર સુધીમાં લગભગ 2,44,000 મુસાફરો આ પ્રદેશમાંથી ભારત પરત ફર્યા છે.

UAE માં, આજે વહેલી સવારે હવાઈ ક્ષેત્ર અસ્થાયી રૂપે બંધ કરવામાં આવ્યું હતું અને બાદમાં ફરીથી ખોલવામાં આવ્યું હતું. મર્યાદિત નોન-શેડ્યૂલ ફ્લાઇટ્સ ચાલુ છે, જેમાં 16 માર્ચ 2026 ના રોજ લગભગ 55 ફ્લાઇટ્સ અને આજે વિવિધ UAE એરપોર્ટ પરથી ભારત માટે આશરે 70 ફ્લાઇટ્સની અપેક્ષા છે. મુસાફરોને એરલાઇન્સ સાથે અપડેટેડ શેડ્યૂલ તપાસવાની સલાહ આપવામાં આવે છે અને સહાય માટે ભારતીય મિશન્સનો સંપર્ક કરી શકે છે.

સાઉદી અરેબિયા અને ઓમાનથી ભારતના વિવિધ સ્થળો માટે ફ્લાઇટ્સ ચાલુ છે.

કતાર હવાઈ ક્ષેત્ર આંશિક રીતે ખુલ્લું છે, 16 માર્ચ 2026 ના રોજ ભારત માટે ત્રણ ફ્લાઈટ્સ ઓપરેટ થઈ હતી અને આજે ત્રણ ફ્લાઈટ્સની અપેક્ષા છે.

કુવૈત હવાઈ ક્ષેત્ર 28 ફેબ્રુઆરી 2026 થી બંધ છે. જઝીરા એરવેઝ દ્વારા સાઉદી અરેબિયાના અલ કૈસુમાહ એરપોર્ટથી ભારત માટે વિશેષ નોન-શેડ્યૂલ ફ્લાઇટ્સ ચલાવવાની અપેક્ષા છે.

બહેરીન અને ઇરાકમાં રહેલા ભારતીય નાગરિકો માટે, જ્યાં હવાઈ ક્ષેત્ર બંધ છે, સાઉદી અરેબિયા દ્વારા ટ્રાન્ઝિટની સુવિધા આપવામાં આવી રહી છે.

13 માર્ચ 2026 ના રોજ સોહારની ઘટનામાં જીવ ગુમાવનારા બે ભારતીય નાગરિકોના પાર્થિવ દેહ જયપુરમાં તેમના પરિવારો દ્વારા સ્વીકારવામાં આવ્યા છે. આ માટે ભારત સરકાર ઊંડી સંવેદના વ્યક્ત કરે છે.

એમ્બેસી હોસ્પિટલના સત્તાવાળાઓ અને સંબંધિત કંપની સાથે સંપર્કમાં રહીને ઘાયલ ભારતીય નાગરિકોની હાલત પર નજર રાખી રહી છે, જેમાંથી કોઈ ગંભીર રીતે ઘાયલ નથી.

બસરામાં મિશનની ટીમ 15 ભારતીય ક્રૂ સભ્યોને મદદ કરવાનું ચાલુ રાખે છે.  જેમને સુરક્ષિત રીતે બહાર કાઢવામાં આવ્યા હતા અને હાલમાં તેઓ હોટેલમાં રોકાયા છે. તેઓ વહેલી તકે ભારત પરત ફરે તે માટેના પ્રયત્નો ચાલુ છે.

મિશન મૃતક ભારતીય નાગરિકના પાર્થિવ દેહને વહેલી તકે સ્વદેશ લાવવા માટે ઈરાકી સત્તાવાળાઓ સાથે પણ સંકલન કરી રહ્યું છે.

તાજેતરની ઘટનાઓમાં પાંચ ભારતીય નાગરિકોએ જીવ ગુમાવ્યા છે અને એક લાપતા છે. ઓમાનના બે ભારતીય નાગરિકોના પાર્થિવ દેહ આજે ભારત લાવવામાં આવ્યા છે.

ઓમાન, ઇરાક અને UAE માં ભારતીય મિશન્સ લાપતા વ્યક્તિ અંગે સંબંધિત સત્તાવાળાઓના સંપર્કમાં છે અને જરૂરી ઔપચારિકતાઓ પૂર્ણ થયા પછી બાકીના પાર્થિવ દેહને વહેલી તકે સ્વદેશ લાવવા માટે કાર્યરત છે.

સરકારે પુનરોચ્ચાર કર્યો કે તે સતર્ક છે અને સંબંધિત મંત્રાલયો અને એજન્સીઓ વચ્ચે ગાઢ સંકલન ચાલુ રાખે છે, મુખ્ય ક્ષેત્રો અને રાષ્ટ્રીય હિતોની સુરક્ષા માટે જરૂરી પગલાં લેવામાં આવી રહ્યા છે.

SM/IJ/JD