নমস্কার!

চহি অসিগী অহানবা বজেত ৱেবিনার অসিদা ঐনা ময়াম্বু তরাম্না ওকচরি। হৌখিবা চহি খরসিদা বজেত ৱেবিনারশিং অসি চৎনবী অমা ওইরক্লি। বজেত অসি তোঙান তোঙানবা পেরামিতরশিংদা হেক হেক নৈনৈ: করিগুম্বা মতমদা স্তোক মার্কেতকী খোঙজেলদা, করিগুম্বা মতমদনা ইনকম তেক্সকী ৱাফমদা খন্ন-নৈনৈ। অশেঙবদি লৈবাক্কী বজেত অসি অতেনবা মতমগী লল্লোন ইতিক্কী চে-চাং নত্তে; মসি খুজিল থৌরাংগী য়াত্থোক্লবা লম্বী অমনি। মরম অদুনা বজেতকী মতিং অসি মশক লেপথোকপা য়াবা পেরামিতরশিংদা য়ুম্ফম ওইরগা নৈনগদবনি। ইনফ্রাস্ত্রকচর পাকথোক চাউথোকহনবা, ক্রেদিত ফ্লো লৈহনবা, ইজ ওফ দুইং বিজিনেস ফগৎহনবা, লৈঙাক্তা অরোন অথুপ লৈহন্দবা হেনগৎহনবা, অমদি মীয়ামগী পুন্সি কোমহনবা অমসুং মখোয়গীদমক অনৌবা খুদোংচাবশিং শেম্নবা খুজিল থৌরাংনি। শেন্মিৎলোন্দা মতম শাংনা মপাঙ্গল হাপকদবা বজেতকী ফিরেপ মরু ওই। অদুগা খ্বায়দগী মরুওইনা, বজেত অমত্তা নাইতোম ওইনা য়েংলোইদবনি। লৈবাক শেমগৎপা হায়বসি লেপ্পা নাইদবা থৌওং অমনি। বজেত খুদিংমক হেন্না পাক চাউবা পান্দম অমগী মায়কৈদা থাংজিনবা খোঙথাং অমনি, অমদি ঐখোয়গী মাঙদা তারিবা হেন্না পাক চাউবা পান্দম অদুদ ২০৪৭ ফাওবদা চাওখৎপা ভারত অমা শেমগৎপনি। রিফোর্ম খুদিংমক, এলোকেসন খুদিংমক, অহোংবা খুদিংমক অশাংবা খোঙচৎ অমগী শরুক অমা ওইনা উগদবনি। মরম অদুনা চহি খুদিংগী বজেত মতুংদা পাঙথোক্লিবা ৱেবিনার অসি য়াম্না মরু ওই। ঐহাক্না ৱেবিনারশিং অসি ৱাখল্লোন ফোঙদোক্নবখক্তদা লোইশিনফম থোক্তে, মসি মতিং লৈবা ৱাখল পুথোক্তুনা নৈনবগী থৌরম অমা ওইগনি হায়না ঐনা থাজৈ। অদোম্না থেংনরকপশিং অমদি হকথেংননা থেংনরিবা শিংনবশিংদা য়ুম্ফম ওইবা অদোমগী ৱাফমশিংনা শেন্মিৎলোনগী লাল্লোং য়াৎপদা অমদি পাম্বৈ পুথোকপদা তশেংনা মতেঙ ওইগদৌরিবনি। ইন্দস্ত্রী, একাদমিয়া, এনালিস্ত, অমদি খুজিল থৌরাং য়াৎলিবশিংনা পুন্না ৱাখল খনমিন্নবা মতমদা খুজিল থৌরাংশিং থবক ওইনা পায়খৎপগী মওং হেন্না ফগৎলকই অমদি মদুগী মহৈ চপ চানা ফংবা ঙম্মি। মসিমক ৱেবিনার পরিং অসিগী মরুমদা লৈরিবা ৱাখল্লোন অদুনি।

মরূপশিং,

২১শুবা চহিচাগী মশুং অমদি হৌজিনখ্রে। করিগুম্বা অদোম্না ইশাগী মরমদা খনবিরবদি অদোম্না অদোমগী পুন্সিগী য়াম্না ফবা অমদি মরুওইবা তাঙ্কক থেংনবিখ্রবনি। ঐখোয় হৌজিক ঈরৈবাক অসিগী চাওখৎ লমজেলগী য়াম্না লুবা তানফম অমদা লৈরি। মীৎকুপ অসি ঐখোয়গী শেন্মিৎলোন্না খোঙজেল য়াঙনা চাউখৎলক্লিবা মতম্নি, অমদি হৌখিবা দেকেদ অসিদ ভারতনা তোপ তোপ্না খাঙবা কনবগী মতৌ উৎলি। মসি তাঞ্জা চানরুবা নত্তে; ঐখোয়না খাঙবা কল্লিবা অসি ঐখোয়গী খোঙফম চেৎনা পুরকখিবা রিফোর্মশিং অদুননি। ঐখোয়না থবক থৌওংশিং লায়থোকহল্লে, ইজ ওফ দুইং বিজিনেস ফগৎহল্লে, তেক্নোলোজীনা লমজিংবা লাক্লোন পাকথোক চাউথোকহল্লে, ইন্সতিত্যুসনশিং মপাঙ্গল কনখৎহল্লে, অমদি ঙসিমকসু লৈবাক অসিনা রিফোর্ম এক্সপ্রেস তোংদুনা চৎলি। খোঙজেল অসি কায়হন্দনা থম্নবগীদমক ঐখোয়না খুজিল থৌরাং য়াৎপগী ফিরেপখক্তদা মীৎয়েঙ থম্বতা নত্তনা খ্বায়দগী ফবা মওংদা মীয়ামদা ফংহনবদসু মীৎয়েঙ থমগদবনি। রিফোর্মশিং অসি ইচম চম্না লাউথোকখিবদুদা য়েংলগা নৈনরোইদবনি, মখোয়না লৈমায়দা পীরিবা ইথিলদা নৈনগদবনি। ঐখোয়না AI, ব্লোকচেন অমদি দেতা এনালাইতিক শীজিন্নদুনা, লোয়ননা ৱাকৎ ৱাখৈবগী থৌওংনা পীরিবা ইথিল কুপ্না নৈনদুনা অরোন অথুপ লৈতবা, খোঙজেল অমদি একাউন্তেবিলিতী হেনগৎহনবা তাই।

মরূপশিং,

হৌখিবা দেকেদ অসিদা, ঐখোয়না ইনফ্রাস্ত্রকচরদা অকনবা মীৎয়েঙ থমখি। ঐখোয়না ৱাখল খন্থরগা ভারত চাওখৎপা হায়বসি হায়ৱে, রেলৱে, হিথাংফম, দিজিতেল নেতৱর্ক, পৱার সিস্তেম, অমদি অতৈ তাংদাংবা লনশিং শেমগৎলবা খক্তদা ওইরক্কনি হায়না ফিরেপ লৌখি। মখোয়না লাক্কদৌরিবা দেকেদ কয়াদা প্রদক্তিবিতী লেপ্তনা পুরক্কনি। মরম অসিমক্না পব্লিক কেপিতেল এক্সপেন্দিচর লেপ্পা লৈতনা হেনগৎহল্লক্লি। চহি তরামাথোইগী মমাঙদা, পব্লিক কেপেক্সকী বজেত চাউরাক্না লুপা লাখ করোর ২ রোম ওইরম্মি; হন্দক্কী বজেত্তা মসি লুপা লাখ করোর ১২ গী ময়াদা হেনগৎলে। অসুম্না লৈঙাক্না ইনভেস্তমেন্ত চাউনা তৌবা অসিনা প্রাইভেত সেক্তরদসু তশেং তশেংবা পাউজেল অমা পীরি।

মরূপশিং,

হৌজিক ইন্দস্ত্রী অমদি ফাইনেন্সিএল ইন্সতিত্যুসনশিংনা অনৌবা ইহুলগা লোয়ননা মাঙদা থোক্লকপা মতম্নি। ঐখোয়না ইনফ্রাস্ত্রকচরদা হেন্না শরুক য়াশিনবা, ফাইনেন্সিং মোদেলদা অহেনবা ইনোভেসন পুরকপা, অমদি নৌনা থোরক্লিবা সেক্তরশিংদা হেন্না কন্না খুৎশম্ননা চৎমিন্নবা মথৌ তাই। মায়কৈ অসিদা ঐনা হৌদোকচনিংবা ৱাফম অমসু লৈরি: ঐখোয়না প্রোজেক্ত সেংসন মেথোদোলোজী অমদি এপ্রাইজেল ক্বালিতী মখা তানা কনখৎহনবা তাই। ঐখোয়না কোস্ত-বেনিফিত এনালাইসিস অমদি লাইফসাইকল কোস্তিংদা অহেনবা মীৎয়েঙ চঙদুনা অমাঙ অতা অমদি থিন্থবা লৈহল্লোইদবনি।

মরূপশিং,

ঐখোয়না মখা তানা ফোরেন এক্সচেঞ্জ ফ্রেমৱর্ক লায়থোকহল্লি। ঐখোয়না হোৎনরিবসি সিস্তেম অসি হেন্না তম্বা ঙম্বা অমদি ইনভেস্তরগা চুনবা ওইহন্নবনি। ঐখোয়না লোং-তর্ম ফাইনান্সকী ফীভম ফগৎহন্নবা অমদি বোন্দ মার্কেত হেন্না ইচঙ থৌহন্নবা খোঙথাঙশিংসু পায়খৎলি। বোন্দ লৈবা অমদি য়োনবগী থৌওং লাইথোকহল্লি।

মরূপশিং,

ঐখোয়না বোন্দ মার্কেত্তা পুরক্লিবা রিফোর্ম অসি অশাংবা মতমগী গ্রোথ পুরক্নবা মচাক অমা ওইনা উগদবনি। ঐখোয়না তম্বা ঙম্বা ফীভম লৈহনগদবনি, লিকুইদিতী হেনগৎহনগদবনি, অনৌবা মচাকশিং পুথোক্কদবনি, অমদি খুদোংথিবশিং মতিং লৈনা শিন্দোক্কদবনি। মদুতদা ঐখোয়না তুং কোইগদবা ফোরেন কেপিতেল চিংশিনবা ঙমগদৌরিবনি। অদোম্না মালেমগী খ্বায়দগী ফবা থৌওংশিংদগী মতৌ তম্নবা অমদি ফোরেন ইনভেস্তমেন্ত ফ্রেমৱর্ক অমসুং বোন্দ মার্কেত মপাঙ্গল কনখৎহন্নবা ময়েক শেংবা অমদি চপ চাবা পাউতাকশিং পীরক্কনি হায়না ঐহাক্না থাজৈ।

মরূপশিং,

মীওই অমা হেক্তনা খুজিল থৌরাংগী পরম য়াত্থোকপদি ঙমগনি, অদুবু মদু মায় পাকহনবা হায়বসি অদোমগী খুত্তা লৈরে। ইন্দস্ত্রীনা অনৌবা ইনভেস্তমেন্ত অমদি ইনোভেসনগা লোয়ননা মাঙদা থোরকপা তাই। ফাইনেন্সিএল ইন্সতিত্যুসনশিং অমসুং এনালিস্তশিংনা থবক ওইনা পায়খৎপা য়াবা পাম্বৈশিং শেমগৎপদা অমদি কৈথেলদা থাজবা হেনগৎহনবদা মতেং পাংবা তাই। লৈঙাক, ইন্দস্ত্রী, অমদি ৱাখল লৌশিংগী খোঙবুশিংনা মাঙদা পুন্না চঙশিনমিন্নরবা মতমদা রিফোর্মশিংগী মহৈ চাগদৌরিবনি। মদুতদা লাউথোক্লিবশিং অসি লৈমায়দা মায় পাকপা হায়বদু ওইগদৌরিবনি। ঐখোয়না ময়েক শেংবা রিফোর্ম পার্ত্নরসিপ চার্তর অমা শেম্নবা ৱাফম হৌদোকচরি। মসিনা লৈঙাক, ইন্দস্ত্রী, ফাইনেন্সিএল ইন্সতিত্যুসন, অমদি একাদমিয়াগী অপুনবা খোঙফম ওইগদৌরিবনি। চার্তর অসি চাওখৎপা ভারত অমা ওইরক্নবগী ভারতকী খোঙচত্তা মরুওইবা চে-চাং অমা ওইগদৌরিবনি।

মরূপশিং,

ঐহাক্না স্তেকহোল্দর পুম্নমক, ফাইনেন্সিএল ইন্সতিত্যুসনশিং, কৈথেলশিং, ইন্দস্ত্রী, প্রোফেস্নেলশিং, অমদি ইনোভেতরশিংগী মফমদা বজেত অসিনা পুরক্লিবা অনৌবা খুদোংচাবশিং অসি লৌহৌনবা অমদি অনৌবা খুদোংচাবশিং অসি হেক থোক্লকপদা চঙশিলহনবা ৱাফম থমজরি। অদোম্না শরুক য়াবসিনা স্কীমশিং পায়খৎপগী মওং মতৌ ফগৎহনগদৌরিবনি, অমদি অদোমগী ফীদবে্ অমসুং তেংবাংনা অফবা মহৈ পুরক্কদৌরিবনি। ঐখোয় পুন্না রিফোর্ম তৌনবা, চাওখৎনবা, চাওখৎপা ভারত অমগী মঙলান হেক য়ারিবমখৈ থুনা মঙফাওনহনগদবা তুংলমচৎ অমা শেম্নবা পুন্না থমক তৌমিন্নসি।

ঙসি অদোম্না কুপ্না খন্নবিগনি, অদোমগী মীৎয়েঙ থৌওংশিং অসি লায়থোকহনবদা থমবিগনি হায়না ঐহাক্না থাজৈ অমদি ঐখোয়না অশোয়বা অরানবা তৌদনবা বজেতকী মমাঙদা ফাওবা অদোমগা তানখিবনি, মসিগী পান্দম তোঙাল্লি, মসিগী পান্দমদি বেজিত অসি হেন্না ফগৎহন্নবনি। অদুবু হৌজিক বজেত অসি শেম্লে, হৌজিক বজেত অসি হন্দুনা খন্নবগী ৱাফম অমত্তা লেত্রে, হৌজিক্তি বজেত অসিদা য়াওরিবশিং অসি লৈমায়দা হেক য়ারিবমখৈ থুনা, খ্বায়দগী লায়বা মওংদা অমদি মীপুম খুদিংমক্না, স্তেকহোল্দর পুম্নমক্না কান্নগদবা, মখোয়বু শরুক য়াহনগদবা মওংদা থবক ওইনা পায়খৎপা তাই হায়বা ৱাফমসি পুক্নিংদা থম্বিরগা অদোম্না খন্ন-নৈনবিগনি। মতমদুদা ৱেবিনার অসিনা তশেং তশেংনা মশক মচু নাইবা শেন্মিৎলোন অমগী থোঙ হাংগদৌরিবনি।

ময়াম পুম্নমকপু থাগৎচরি!

নমস্কার!

***