കേന്ദ്ര ധനകാര്യ, കോർപ്പറേറ്റ് കാര്യ മന്ത്രി ശ്രീമതി നിർമ്മല സീതാരാമൻ  2026-27 സാമ്പത്തികവർഷത്തിലെ കേന്ദ്ര ബജറ്റ് ഇന്ന്  പാർലമെന്റിൽ അവതരിപ്പിച്ചു . ഏഴ് തന്ത്രപ്രധാന–മുൻനിര മേഖലകളിൽ ഉൽപ്പാദനം വർദ്ധിപ്പിക്കുന്നതിന് ബജറ്റ് ഊന്നൽ നൽകുന്നു. ബജറ്റിലെ ‘പ്രഥമ  കർത്തവ്യം’ എന്ന തലക്കെട്ടിന് കീഴിലുള്ള ആറ് പ്രധാന മേഖലകളുടെ  ഭാഗമായാണ് ഈ നിർദ്ദിഷ്ട  ഇടപെടലുകളെന്ന് കേന്ദ്ര ബജറ്റ്  പാർലമെന്റിൽ അവതരിപ്പിക്കവെ  കേന്ദ്ര ധനമന്ത്രി ശ്രീമതി നിർമ്മല സീതാരാമൻ വ്യക്തമാക്കി.  

ഇന്ത്യയെ ആഗോള ബയോഫാർമ നിർമ്മാണ കേന്ദ്രമായി വികസിപ്പിക്കുന്നതിന്, ബയോഫാർമ ശക്തി എന്ന പദ്ധതിയ്ക്ക് 10,000 കോടി  രൂപ  ബജറ്റിൽ  വകയിരുത്തി . ഇതിലൂടെ ബയോളജിക്സും ബയോസിമിലേഴ്സും ആഭ്യന്തരമായി നിർമ്മിക്കുന്നതിനുള്ള സമഗ്ര പരിസ്ഥിതി (ecosystem) സൃഷ്ടിക്കും.  ബയോഫാർമയെ കേന്ദ്രീകരിച്ചുള്ള ശൃംഖലയുടെ ഭാഗമായി 3 പുതിയ നാഷണൽ ഇൻസ്റ്റിറ്റ്യൂട്ട്സ് ഓഫ് ഫാർമസ്യൂട്ടിക്കൽ എജുക്കേഷൻ ആൻഡ് റിസർച്ച് (NIPER) സ്ഥാപിക്കുന്ന കാര്യവും  നിലവിലുള്ള 7 NIPER കളെ നവീകരിക്കുന്നത് ഉൾപ്പെടെയുള്ള കാര്യങ്ങൾ ബജറ്റിൽ പ്രതിപാദിച്ചു . കൂടാതെ, 1000-ത്തിലധികം അംഗീകൃത ഇന്ത്യ ക്ലിനിക്കൽ ട്രയൽ സൈറ്റുകളുടെ ഒരു ശൃംഖലയും സൃഷ്ടിക്കും. ആഗോള മാനദണ്ഡങ്ങളും  അംഗീകൃത സമയപരിധികളും പാലിക്കുന്നതിനായി, പ്രത്യേക ശാസ്ത്രീയ അവലോകന കാഡറും വിദഗ്ധരുമുള്‍പ്പെട്ട   സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷൻ ശക്തിപ്പെടുത്താനും ബജറ്റ് നിർദ്ദേശിക്കുന്നു.

ഇന്ത്യ സെമികണ്ടക്ടർ മിഷൻ (ISM) 1.0 യുടെ നേട്ടങ്ങളെ അടിസ്ഥാനമാക്കി സെമികണ്ടക്ടർ മേഖലയിലെ ശേഷി വർധിപ്പിക്കുന്നതിനായി, ISM 2.0 ആരംഭിക്കാനും ബജറ്റിൽ  നിർദ്ദേശം . ഉപകരണങ്ങളും വസ്തുക്കളും നിർമ്മിക്കുക, പൂർണ സ്റ്റാക്ക് ഇന്ത്യൻ ഐപി രൂപകൽപ്പന ചെയ്യുക, വിതരണ ശൃംഖലകൾ ശക്തിപ്പെടുത്തുക എന്നിവയാണ് ഇതിന്റെ ലക്ഷ്യങ്ങൾ. വ്യവസായ നേതൃത്വത്തിലുള്ള ഗവേഷണ-പരിശീലന കേന്ദ്രങ്ങളിലൂടെ സാങ്കേതികവിദ്യയും വൈദഗ്ധ്യമുള്ള തൊഴിലാളി ഗവേഷണ പരിശീലന കേന്ദ്രങ്ങളിലാണ് ശ്രദ്ധ കേന്ദ്രീകരിക്കുന്നതെന്ന് ശ്രീമതി സീതാരാമൻ പറഞ്ഞു.

2025 ഏപ്രിലിൽ ആരംഭിച്ച ഇലക്ട്രോണിക്സ് ഘടകങ്ങളുടെ നിർമ്മാണ പദ്ധതിക്ക് 22,919 കോടി രൂപയാണ് വിഹിതം.നിലവിലെ പുരോഗതി കണക്കിലെടുത്ത് 2026-27 ലെ കേന്ദ്ര ബജറ്റിൽ  ഇതിനുള്ള  വിഹിതം 40,000 കോടി രൂപയായി  ഉയർത്തി .

അപൂർവ ധാതുഖനനം സംബന്ധിച്ച പദ്ധതിയിൽ ധാതു സമ്പന്നമായ ഒഡിഷ, കേരളം, ആന്ധ്രപ്രദേശ്, തമിഴ്നാട് എന്നീ സംസ്ഥാനങ്ങളിൽ ഖനനം, സംസ്കരണം, ഗവേഷണം, ഉൽപ്പാദനം എന്നിവ പ്രോത്സാഹിപ്പിക്കുന്നതിനായി  അപൂർവ ധാതുഇടനാഴി  സ്ഥാപിക്കാൻ പിന്തുണ നൽകാൻ  ബജറ്റ് നിർദ്ദേശിക്കുന്നു.

ആഭ്യന്തര രാസവസ്തുക്കളുടെ ഉത്പാദനം വർദ്ധിപ്പിക്കുന്നതിനും ഇറക്കുമതിയെ ആശ്രയിക്കുന്നത് കുറയ്ക്കുന്നതിനുമായി, ക്ലസ്റ്റർ അധിഷ്ഠിത പ്ലഗ്-ആൻഡ്-പ്ലേ മാതൃകയിൽ,  മൂന്ന് സമർപ്പിത കെമിക്കൽ പാർക്കുകൾ സ്ഥാപിക്കുന്നതിന് സംസ്ഥാനങ്ങളെ പിന്തുണയ്ക്കുന്നതിനുള്ള ഒരു പദ്ധതി ആരംഭിക്കാൻ ബജറ്റിൽ  നിർദ്ദേശം

ശക്തമായ മൂലധന വസ്തുക്കളുടെ ശേഷി വിവിധ മേഖലകളിലെ ഉൽപ്പാദനക്ഷമതയും ഗുണനിലവാരവും നിർണ്ണയിക്കുന്നതാണെന്ന് ശ്രീമതി നിർമ്മല സീതാരാമൻ ബജറ്റ് പ്രസംഗത്തിൽ പറഞ്ഞു. ഈ ശേഷി വളർത്തുന്നതിനായി, സി‌പി‌എസ്‌ഇകൾ  മുഖേന 2 കേന്ദ്രങ്ങളിൽ ഹൈ-ടെക് ടൂൾ റൂമുകൾ സ്ഥാപിക്കും. ഇവ ഡിജിറ്റലി സജ്ജീകരിച്ച ഓട്ടോമേറ്റഡ് സർവീസ് ബ്യൂറോകളായി പ്രവർത്തിക്കുന്നതോടൊപ്പം , ഉയർന്ന കൃത്യതയുള്ള ഘടകങ്ങൾ കുറഞ്ഞ ചെലവിൽ പ്രാദേശികമായി രൂപകൽപ്പന ചെയ്യാനും പരിശോധന നടത്താനും വലിയ തോതിൽ നിർമ്മിക്കാനും സഹായിക്കും. ഉയർന്ന മൂല്യമുള്ളതും സാങ്കേതികമായി പുരോഗമിച്ചതുമായ നിർമാണ-അവസര സൗകര്യ ഉപകരണങ്ങളുടെ (CIE) ആഭ്യന്തര നിർമ്മാണം ശക്തിപ്പെടുത്തുന്നതിനായി കൺസ്ട്രക്ഷൻ ആൻഡ് ഇൻഫ്രാസ്ട്രക്ചർ എക്വിപ്പ്മെന്റ് എൻഹാൻസ്‌മെന്റ് സ്കീം അവതരിപ്പിക്കും. ബഹുനില കെട്ടിടങ്ങളിലെ ലിഫ്റ്റുകൾ മുതൽ ഫയർഫൈറ്റിംഗ് ഉപകരണങ്ങൾ, മെട്രോ നിർമ്മാണത്തിനും ഉയർന്ന പ്രദേശങ്ങളിലെ റോഡുകൾക്കും വേണ്ട ടണൽ ബോറിംഗ് ഉപകരണങ്ങൾ വരെ ഇതിൽ ഉൾപ്പെടും. കൂടാതെ, ആഗോള തലത്തിൽ മത്സരക്ഷമമായ കണ്ടെയ്നർ നിർമ്മാണ പരിസ്ഥിതി സൃഷ്ടിക്കുന്നതിനായി, 5 വർഷത്തേക്ക് 10,000 കോടി രൂപ  ചെലവിൽ കണ്ടെയ്നർ മാനുഫാക്ചറിംഗ് പദ്ധതിക്കും  ബജറ്റിൽ  നിർദ്ദേശം .

തൊഴിൽ സാന്ദ്രമായ ടെക്സ്റ്റൈൽ മേഖലയ്ക്ക്, 5 ഉപഭാഗങ്ങളുള്ള ഒരു സംയോജിത പരിപാടി നിർദ്ദേശിക്കുന്നു;

 ഒന്നാമതായി, പട്ട്, കമ്പിളി, ചണം, മനുഷ്യനിർമ്മിത നാരുകൾ, നവയുഗ നാരുകൾ തുടങ്ങിയ പ്രകൃതിദത്ത നാരുകളിൽ സ്വയംപര്യാപ്തത കൈവരിക്കുന്നതിനുള്ള ദേശീയ ഫൈബർ പദ്ധതി; രണ്ടാമതായി, യന്ത്രസാമഗ്രികൾ, സാങ്കേതികവിദ്യ നവീകരണം, പൊതു പരിശോധന, സർട്ടിഫിക്കേഷൻ കേന്ദ്രങ്ങൾ എന്നിവയ്ക്കുള്ള മൂലധന പിന്തുണയോടെ പരമ്പരാഗത ക്ലസ്റ്ററുകളെ നവീകരിക്കുന്നതിനുള്ള ടെക്സ്റ്റൈൽ എക്സ്പാൻഷൻ ആൻഡ് എംപ്ലോയ്‌മെന്റ് പദ്ധതി; മൂന്നാമതായി, നിലവിലുള്ള പദ്ധതികൾ സംയോജിപ്പിക്കുന്നതിനും ശക്തിപ്പെടുത്തുന്നതിനും നെയ്ത്തുകാർക്കും കരകൗശല വിദഗ്ധർക്കും ലക്ഷ്യമിട്ടുള്ള പിന്തുണ ഉറപ്പാക്കുന്നതിനുമുള്ള ഒരു ദേശീയ കൈത്തറി, കരകൗശല പരിപാടി; നാലാമതായി, ആഗോളതലത്തിൽ മത്സരാധിഷ്ഠിതവും സുസ്ഥിരവുമായ തുണിത്തരങ്ങളും വസ്ത്രങ്ങളും പ്രോത്സാഹിപ്പിക്കുന്നതിനുള്ള ടെക്സ്-ഇക്കോ ഇനിഷ്യേറ്റീവ്; അഞ്ചാമതായി, വ്യവസായ, അക്കാദമിക് സ്ഥാപനങ്ങളുമായി സഹകരിച്ച് തുണിത്തരങ്ങൾ നൈപുണ്യമുള്ള ആവാസവ്യവസ്ഥ നവീകരിക്കുന്നതിനും ആധുനികവത്കരിക്കുന്നതിനുമുള്ള സമർത്ഥ് 2.0.

സാങ്കേതിക തുണിത്തരങ്ങൾക്ക് മൂല്യവർദ്ധനവ് നൽകുന്നതിൽ ശ്രദ്ധ കേന്ദ്രീകരിച്ചുകൊണ്ട്, വെല്ലുവിളി നിറഞ്ഞ രീതിയിൽ മെഗാ ടെക്സ്റ്റൈൽ പാർക്കുകൾ സ്ഥാപിക്കാൻ കേന്ദ്ര ബജറ്റ് നിർദ്ദേശിക്കുന്നു.

ഖാദി, കൈത്തറി, കരകൗശല വസ്തുക്കൾ എന്നിവ ശക്തിപ്പെടുത്തുന്നതിനായി മഹാത്മാഗാന്ധി ഗ്രാമ സ്വരാജ് സംരംഭം ആരംഭിക്കാനും കേന്ദ്ര ബജറ്റ് നിർദ്ദേശിക്കുന്നു. ഇത് ആഗോള വിപണി ബന്ധത്തിലും ബ്രാൻഡിംഗിലും സഹായിക്കും. പരിശീലനം, വൈദഗ്ദ്ധ്യം, പ്രക്രിയയുടെയും ഉൽ‌പാദനത്തിന്റെയും ഗുണനിലവാരം എന്നിവ കാര്യക്ഷമമാക്കുകയും പിന്തുണയ്ക്കുകയും ചെയ്യുമെന്ന് ബജറ്റ് വ്യക്തമാക്കുന്നു. ഇത് നമ്മുടെ നെയ്ത്തുകാർക്കും, ഗ്രാമ വ്യവസായങ്ങൾക്കും, ഒരു ജില്ല - ഒരു ഉൽപ്പന്ന സംരംഭത്തിനും, ഗ്രാമീണ യുവാക്കൾക്കും ഗുണം ചെയ്യുമെന്ന് ബജറ്റ് കൂട്ടിച്ചേർത്തു.

ഉയർന്ന നിലവാരമുള്ളതും താങ്ങാനാവുന്ന വിലയുള്ളതുമായ കായിക വസ്തുക്കളുടെ ആഗോള കേന്ദ്രമായി ഉയർന്നുവരാൻ ഇന്ത്യയ്ക്ക് കഴിയുമെന്ന്  ബജറ്റ് അവതരണ വേളയിൽ ശ്രീമതി സീതാരാമൻ പറഞ്ഞു. ഈ ശ്രമത്തിൽ, ഉപകരണ രൂപകൽപ്പനയിലും മെറ്റീരിയൽ സയൻസുകളിലും നിർമ്മാണം, ഗവേഷണം, നവീകരണം എന്നിവ പ്രോത്സാഹിപ്പിക്കുന്ന കായിക ഉൽപ്പന്നങ്ങൾക്കായി ഒരു സമർപ്പിത സംരംഭത്തിനും  ബജറ്റിൽ നിർദ്ദേശം 

***