نمسکار!

کیرالہ کے گورنر جناب راجندر آرلیکر جی اور آریہ ویدیا شالہ سے وابستہ تمام معززخواتین و حضرات،

اس پروقار موقع پر آپ سب کے ساتھ اس تقریب میں  شامل ہونا میرے لیے خوشی کی بات ہے۔ آریہ ویدیا شالہ نے آیوروید کے تحفظ اور اسے آگے بڑھانے میں اہم کردار ادا کیا ہے۔ اپنے 125 سالہ سفر میں اس ادارے نے آیوروید کو علاج کے ایک طاقتور نظام کے طور پر  متعارف کرایا ہے۔ اس موقع پر میں آریہ ویدیا شالہ کے بانی ویدیا رتنم پی ایس واریئر جی کے گراں قدر تعاون کو یاد کرتا ہوں اور آیوروید کے تئیں ان کا نقطہ نظر اور عوامی فلاح و بہبود کے لیے ان کی لگن ہمیں ہمیشہ متاثر کرتی رہتی ہے۔

ساتھیو،

کیرالہ کا آریہ ویدیا شالہ ہندوستان کےعلاج معالجے کی روایت کی زندہ علامت ہے، جس نے صدیوں سے انسانیت کی خدمت کی ہے۔ ہندوستان میں آیوروید کسی ایک دور یا علاقے تک محدود نہیں رہا ہے۔ ہر دور میں طب کے اس قدیم نظام نے زندگی کو سمجھنے، توازن حاصل کرنے اور فطرت کے ساتھ ہم آہنگ رہنے کا راستہ دکھایا ہے۔ آج آریہ ویدیاشالہ600 سے زیادہ آیورویدک ادویات تیار کرتی ہے۔ ملک کے مختلف علاقوں میں تنظیم کے ہسپتال آیورویدک طریقوں سے مریضوں کا علاج کرتے ہیں،جس میں دنیا بھر کے 60 سے زیادہ ممالک کے ہسپتال شامل ہیں۔ آریہ ویدیا شالہ نے اس ٹرسٹ کو اپنے کام سے بنایا ہے،جب لوگ تکلیف میں ہوتے ہیں تو آپ سب ان کے لیے امید کا ذریعہ بن جاتے ہیں۔

ساتھیو،

آریہ ویدیا شالہ کے لیے، خدمت صرف ایک خیال نہیں ہے۔ یہ جذبہ ان کے اعمال، نقطہ نظر اور اداروں میں جھلکتا ہے۔ تنظیم کا چیریٹیبل ہسپتال پچھلے 100 سالوں سے مسلسل لوگوں کی خدمت کر رہا ہے - 100 سال کوئی چھوٹا عرصہ نہیں ہے۔ ہسپتال سے وابستہ ہر فرد نے اس میں اپنا تعاون پیش کیا ہے۔ میں اسپتال کے وید، ڈاکٹروں، نرسنگ اسٹاف اور باقی سبھی ممبران کو بھی مبارکباد دیتا ہوں۔ چیریٹیبل ہسپتال کا 100 سالہ سفر مکمل کرنے پر آپ سب مبارکباد کے مستحق ہیں۔ کیرالہ کے لوگوں نے صدیوں سے آیورویدک روایات کو زندہ رکھا ہوا ہے۔ آپ ان روایات کو محفوظ کررہے ہیں اور فروغ دے رہے ہیں۔

ساتھیو،

ملک میں طویل عرصے تک قدیم طبی نظام کو الگ تھلگ دیکھا جاتا رہا ہے۔ گزشتہ 10سے11 برسوں میں اس نقطۂ نظر میں بڑی تبدیلی آئی ہے۔ اب صحت کی خدمات کو مجموعی  نظریے سے دیکھا جا رہا ہے۔ آیوروید، یونانی، ہومیوپیتھک، سدھ اور یوگا،ان سب کو ہم ایک چھت کے نیچےلے آئے ہیں اور اسی مقصد کے لیے خاص طور پر وزارت آیوش قائم کی گئی ہے۔ہم نے احتیاطی صحت (پریوینٹیو ہیلتھ) پر مسلسل توجہ دی ہے۔ اسی سوچ وفکر کے تحت نیشنل آیوش مشن کا آغاز کیا گیا ہے اور 12 ہزار سے زائد آیوش ویلنیس سینٹرز قائم کیے گئے، جہاں یوگا، احتیاطی نگہداشت اور کمیونٹی ہیلتھ سروسز جیسی سہولیات فراہم کی جاتی ہیں۔ہم نے ملک کے دیگر اسپتالوں کو بھی آیوش خدمات سے منسلک کیا ہے اور آیوش ادویات کی باقاعدہ فراہمی پر بھی توجہ دی ہے۔ اس کا مقصد بالکل واضح ہے کہ بھارت کے روایتی طبی علم کا فائدہ ملک کے ہر کونے کی عوام تک پہنچایا جائے۔

ساتھیو،

حکومت کی پالیسیوں کا واضح طور پر آیوش محکمے پر اثر پڑا ہے۔ آیوش مینوفیکچرنگ سیکٹر نے تیزی سے ترقی کی ہے اور اس میں توسیع کی ہے۔ ہندوستانی روایتی دیکھ بھال کے طریقہ کار  کو دنیا میں فروغ دینے کے لیے حکومت نے آیوش ایکسپورٹ پروموشن کونسل قائم کی ہے۔ ہماری کوشش عالمی منڈیوں میں آیوش کی مصنوعات اور خدمات کو فروغ دینا ہے۔ ہم اس کے بہت مثبت اثرات دیکھ رہے ہیں۔ 2014 میں، ہندوستان نے تقریباً 3,000 کروڑ روپے  مالیت کی آیوش اور جڑی بوٹیوں کی مصنوعات برآمد کیں۔ اب، ہندوستان  6,500 کروڑ روپے مالیت کی آیوش اور جڑی بوٹیوں کی مصنوعات برآمد کرتا ہے۔ اس سے ملک کے کسانوں کو بھی کافی فائدہ پہنچ رہا ہے۔

ساتھیو،

ہندوستان آیوش پر مبنی طبی قدر کے سفر کے لیے بھی ایک قابل اعتماد مقام کے طور پر ابھر رہا ہے۔ لہذا، ہم نے آیوش ویزا جیسے اقدامات کیے ہیں۔ یہ بیرون ملک سے آنے والے لوگوں کو آیوش طبی سہولیات تک بہتر رسائی فراہم کر رہا ہے۔

ساتھیو،

آیوروید جیسے قدیم طبی نظام کو فروغ دینے کے لیے حکومت ہر بڑے پلیٹ فارم پر فخر کے ساتھ اسے فروغ دے رہی ہے۔ چاہے وہ برکس سربراہ  اجلاس ہو یا جی-20 اجلاس، جہاں بھی مجھے موقع ملا، میں نے آیوروید کو مجموعی صحت کی دیکھ بھال  کے لیے ایک ذریعہ کے طور پر پیش کیا ہے۔ صحت کی عالمی تنظیم (ڈبلیو ایچ او) کا عالمی روایتی میڈیسن سنٹر بھی جام نگر، گجرات میں قائم کیا جا رہا ہے۔ جام نگر میں آیوروید کی درس و تدریس اور تحقیق کا ادارہ بھی کام کرنا شروع کر دیا ہے۔ آیورویدک ادویات کی بڑھتی ہوئی مانگ کو پورا کرنے کے لیے دریائے گنگا کے کنارے دواؤں کی کھیتی کو بھی فروغ دیا جا رہا ہے۔

ساتھیو،

آج میں ملک کی ایک اور کامیابی آپ سب کے ساتھ شیئر کرنا چاہتا ہوں۔ آپ سب جانتے ہیں کہ ابھی ابھی یورپی یونین کے ساتھ ایک تاریخی تجارتی معاہدے کا اعلان کیا گیا ہے۔ مجھے یہ بتاتے ہوئے خوشی ہو رہی ہے کہ یہ تجارتی معاہدہ ہندوستانی روایتی ادویات کی خدمات اور پریکٹیشنرز کو بڑا فروغ دے گا۔ یورپی یونین کے رکن ممالک میں جہاں ضابطے موجود نہیں ہیں، ہمارے آیوش پریکٹیشنرز ہندوستان میں حاصل کردہ اپنی پیشہ ورانہ قابلیت کی بنیاد پر اپنی خدمات فراہم کر سکیں گے۔ اس سے آیوروید اور یوگا سے وابستہ ہمارے نوجوانوں کو بہت فائدہ ہوگا۔ یہ معاہدہ یورپ میں آیوش فلاحی مراکز کے قیام میں بھی سہولت فراہم کرے گا۔ میں آیوروید اور آیوش سے وابستہ آپ سب کو اس معاہدے پر مبارکباد دیتا ہوں۔

ساتھیو،

آیوروید کے ذریعے بھارت میں صدیوں سے علاج معالجے کا کام جاری رہا ہے۔ لیکن یہ بھی ایک تلخ حقیقت رہی ہے کہ ہمیں ملک میں اور بیشتر غیر ممالک میں لوگوں کو آیوروید کی اہمیت سمجھانی پڑتی ہے۔ اس کی بڑی وجہ ایویڈنس بیسڈ ریسرچ کی کمی اور تحقیقی مقالوں کی کمی ہے۔ جب آیورویدک طریقہ کار کو سائنس کے اصولوں کی بنیاد پر پرکھا جاتا ہے تو عوام کا اعتماد مزید مضبوط ہو جاتا ہے۔اسی لیے مجھے یہ جان کر خوشی ہوئی ہے کہ آریہ ویدیشالہ نے آیوروید کو مسلسل سائنس اور تحقیق کی کسوٹی پر پرکھا ہے۔ یہ ادارہ سی  ایس آئی آر اور آئی آئی ٹی جیسے اداروں کے ساتھ مل کر کام کر رہا ہے۔ آپ نے ڈرگ ریسرچ، کلینیکل ریسرچ، اور کینسر کیئر پر بھی خاص توجہ دی ہے۔ آیوش وزارت کے تعاون سے کینسر ریسرچ کے لیے سینٹر آف ایکسیلنس کا قیام اسی سمت میں ایک اہم قدم ہے۔

ساتھیو،

اب ہمیں بدلتے وقت کے مطابق آیوروید میں جدید ٹیکنالوجی اور اے آئی کا استعمال بڑھانا چاہیے۔ بیماریوں کے امکانات  کا پتہ لگانے اور مختلف طریقوں سے علاج  معالجہ کرنے کے لیے بہت سی جدت طرازی کی جا سکتی ہے۔

ساتھیو،

آریہ ویدیا شالہ نے ثابت کیا ہے کہ روایت اور جدیدیت ایک ساتھ رہ سکتی ہے، اور یہ کہ صحت کی دیکھ بھال لوگوں کی زندگیوں میں اعتماد کی بنیاد بن سکتی ہے۔ اس ادارے نے آیوروید کی قدیم حکمت کو محفوظ رکھتے ہوئے جدید ضروریات کے مطابق ڈھال دیا ہے اور علاج معالجے کوآسان بنایا ہے  اور بلا رکاوٹ رسائی فراہم  کیا ہے اور مریضوں کو خدمات دستیاب کرائی  ہے۔ میں ایک بار پھر آریہ ویدیا شالہ کو اس متاثر کن سفر کے لیے مبارکباد دیتا ہوں۔ میری خواہش ہے کہ یہ ادارہ آنے والے سالوں میں بھی اسی لگن اور خدمت کے جذبے کے ساتھ لوگوں کی زندگیوں میں بہتری لاتا رہے۔ آپ کا بہت بہت شکریہ۔

نمسکارم۔

********

ش ح۔ م م ع ۔ر ب

U-1192