নেসনেল ষ্টার্দঅপ দে থৌরমদা, ঙসি ন্যু দিল্লিগী ভারত মন্দাপমদা প্রধান মন্ত্রী শ্রী নরেন্দ্র মোদী ন্যু দিল্লিদা ষ্টার্দঅপ ইন্দিয়া চহি ১০ মপুংফারকপগী থৌরমদা ৱা ঙাংখ্রে। থৌরম অদুদা প্রধান মন্ত্রীনা হায়খি ঙসি অখন্নবা থৌরম অমদা মীওই খুদিংমক তিল্লে, নেসনেল ষ্টার্দঅপ দে পাংথোক্লি অমসুং অনৌবা অমসুং বিকসিত ভারত অমগী তুংলমচৎ ওইরিবা ষ্টার্দঅপ ফাউন্দরশিং অমসুং ইন্নোবেতরশিং শরুক য়ারি। মহাক্না হায়খি মদুদি ঙাইহাক্কী মমাঙদা মহাক্না লৌউ-শিংউ, ফিনতেক, মোবিলিতি, হকশেল অমসুং ষ্টেনেবিলিতিদা থবক তৌরিবা মীওই খরগা মহাক্কা ৱারি শানখ্রে। মখোয়গী অনৌবা ৱাখলশিং অদুদা মহাক অঙকপা পোকখি, মখোয়গী থাজবা অমসুং অনিংবশিংনা মহাক অঙকপা ফাওহনখি। চহি ১০ গী মমাঙদা ষ্টার্দঅপ ইন্দিয়া হৌদোকখিবনি, থবক অসি চাউখৎলকপদা অপেনবা ফাওই অমসুং নহারোলশিং উনবদা হরাওই। ভারতকী নহারোলশিংগী খ্বাইদগী মরুওইবা পান্দমদি খুদোংচাদবশিং কোকহনবনি। অনৌবা মঙলানশিং মঙনবা থৌনা উৎখিবা নহা ওইরিবা ইন্নোবেতরশিং থাগৎপা ফোঙদোক্লি।

প্রধান মন্ত্রীনা হায়খি ঙসি ষ্টার্দঅপ ইন্দিয়া চহি ১০ গী মাইপাকপগী থৌরম পাংথোক্লি অমসুং খোঙচৎ অসি সরকারগী স্কিম অমা ইচম চম্না মাইপাকপা নত্তে, মসি মঙলান কয়াগী খোঙচৎনি অমসুং মশিং থিঙমদ্রবা ৱাখলনা শাগৎপশিং মঙফাওনবনি। চহি ১০ গী মমাঙদা লনাই হোৎনবশিং অমসুং অনৌবা থবক্কী চন্নফম খর খক লৈরমখি, অদুবু মতম অদুগী ফিবমশিং খুদোংচাদবা ওইখি অমসুং ষ্টার্দঅপ ইন্দিয়া থৌরম হৌদোকখি, নহারোলশিংদা অহাংবা অতিয়া অমা ফংহনখি অমসুং ঙসিদি লৈবাক মমাঙদা ফলশিং উবা ফংলে। শুপ্নগী চহি ১০ দা, ষ্টার্দঅপ ইন্দিয়া মিসনা য়াওল অমা ওইরে; মালেমগী অহুমশুবা খ্বাইদগী চাউবা ষ্টার্দঅপ ইকোসিষ্টেম ভারতনা ওইরে। চহি ১০ গী মমাঙদা লৈবাক অসিদা ষ্টার্দঅপ ৫০০ য়ৌদনা লৈরমখি, অদুগা ঙসিনা মশিং লাখ ২ হেল্লে। ২০১৪ দা য়ুনিকোর্ন ৪ খক লৈরমখি, ঙসিনা য়ুনিকোর্ন ১২৫ হেন্না লৈরে অমসুং অঙকপগা লোয়ননা মসিগী মাইপাকপগী ৱারি অসি মালেম্না য়েংলি। ভারতকী ষ্টার্দঅপকী খোঙচৎকী খন্নবা মতমদা, হোল অসিদা লৈরিবা নহারোল কয়া মখোয় মশামক অফবা কেস ষ্টদিশিং ওইগনি। ষ্টার্দঅপ ইন্দিয়াগী খোঙজেল মখা তানা কনখৎহনগদবনি, ঙসিগী ষ্টার্দঅপশিং য়ুনিকোর্নশিং ওইরকপগা লোয়ননা, আই.পি.ওশিং হৌদোক্লে অমসুং থবক কয়া ফংহল্লে। ২০২৫ খক্তদা, অনৌবা ষ্টার্দঅপ ৪৪,০০ রোম রেজিষ্টার তৌরে, মসি ষ্টার্দঅপ ইন্দিয়া হেক হৌদোকপগী চহি অমদা খ্বাইদগী য়াম্না মশিং হেনগৎপনি অমসুং হায়রিবা মশিংশিং অসিনা কমদৌনা ভারতকী ষ্টার্দঅপশিংনা থবক ফংবা, ইন্নোবেসন অমসুং চাউখৎপা হেনগৎহনবগে হায়বা তাক্লে।

ষ্টার্দঅপ ইন্দিয়ানা লৈবাক অসিদা অনৌবা চৎনবী অমা শেম্বদা হরাওবা ফোঙদোক্লদুনা, প্রধান মন্ত্রীনা হায়খি মদুদি মমাংঙৈদা, অনৌবা ললোন-ইতিক্কী থবকশিং অয়াম্বনা অচৌবা উদ্যোগশিংগী ইমুংশিংগী অঙাংশিংনা হৌদোক্লমখি, মখোয় খক্তনা লাইনা শেন অমসুং মতেং ফংখি, অদুগা মিদল ক্লাস অমসুং লায়রবা অঙাংশিংনা থবকশিং খক্তগী মঙ মঙখি। ষ্টার্দঅপ ইন্দিয়ানা মসিগী ৱাখল্লোন অসি হোংহল্লে অমসুং হৌজিক তয়র-২ অমসুং তয়র-৩, খুঙ্গংশিং ফাওবগী নহারোলশিং মখোয় মশাগী ষ্টার্দঅপশিং লিংখৎলে, খ্বাইদগী খুদোংচাদবশিং কোকহন্নবা হোৎনরে। খুন্নাইগী অমসুং লৈবাক্কীদমক করিগুম্বা খর পাংথোক্নবা হোৎনরিবা মহাক অদু মগুন য়াম্না লৈরবনি।

প্রধান মন্ত্রীনা হায়খি মদুদি অওনবা অসিদা লৈবাক অসিগী ইচানুপীশিংনা মরুওইবা থৌদাং অমা লৌরে, শকখঙলবা ষ্টার্দঅপশিংগী চাদা ৪৫ হেন্না য়ামদ্রবদা নুপী অমনা দিরেক্তর নত্ত্রগা পার্তনর ওইরে। নুপীশিংনা লুচিংবা ওইবা মালেমদা অনিশুবা খ্বাইদগী চাউবা ষ্টার্দঅপশিং লৈবা লৈবাক ভারতনা ওইরে, মসিনা তাক্লিবদি ভারতকী তৌবা ঙম্বা মখা তানা হেনগৎলক্লি হায়বনি।

প্রধান মন্ত্রীনা হায়খি মদুদি ঙসিদি লৈবাক অসিনা মসিগী তুংগী ফিবম ষ্টার্দঅপগী অওনবদা উবা ফংলে অমসুং করিগীদমক ষ্টার্দঅপশিং অসুক্কী মতিক মরুওইরিবনো হায়না হংলবদি, পাউখুম কয়া লৈগনি: ভারত মালেমদা নহারোলশিং খ্বাইদগী য়াম্না লৈবা লৈবাক্নি, ভারত য়াংনা চাউখৎলক্লিবা অচৌবা ইকোনোমিনি, ভারত্ত মালেম থাক্কী ইনফ্রাষ্ট্রকচরশিং শেমগৎলি অমসুং অনৌবা হিরমশিং থোক্লক্লি- হায়রিবা ৱাফমশিং অসি অচুম্বনি। অদুবু, মহাক্কী থম্মোয় খ্বাইদগী য়াম্না শোক্লিবদি, ভারতকী নহারোলশিংনা ভারতকী নহারোলশিংনা পামদ পামদা মখোয় পুন্সি মতম লেন্থোক্তুনা লৈবা নত্ত্রগা অমনবা লম্বীদা চৎপা অসিনি, অদুবু মখোয় মশামক্কী অনৌবা লম্বী শেম্বা, অনৌবা পন্থুংশিং অমসুং অনৌবা মাইপাকপশিং থিবা পাম্মী।

প্রধান মন্ত্রীনা হায়খি মদুদি থবক কন্না শুবা নোম্বা খক্তনা অনৌবা পন্থুংশিং য়ৌবা ঙম্মী, অনিংবা খক্তনা থবকশিং পাংথোকপা ঙমদে, হোৎনবনা ঙম্মী হায়নবা অমা লৈরি। থবক অমা হৌনবা অহানবা লৈগদবা অসি থৌনানি, তাঙ্কক অসিদা য়ৌরকপা অসি অঙকপা থৌনা অমসুং নহারোলশিংনা খুদোংথিবা মায়োক্নবা ঙম্বদগী ঙম্বনি। মমাঙদা লৈবাক অসিদা খুদোংচাদবা মায়োক্নবা অসি পুক্নিং থৌগৎলমদে, অদুবু ঙসিদি মসি চৎনবী অমা ওইরে অমসুং থাগী তোলোবশিংগী ৱাংমদা খনবা মীওইশিং মরুওইনা লৌরমদে অদুবু ইকায়খুম্নবদি উৎখি। মতম অমদা মৱা লৌরমদবা অনৌবা ৱাখল্লোনশিং হৌজিক চৎনবী ওইরক্লে।

খুদোংথিবা মাইরোং য়াবদা মহাক্না অকনবা মীৎয়েং চঙলদুনা, প্রধান মন্ত্রীনা হায়খি মদুদি মসি মতম কয়াগী মমাঙদগী লৈরক্লবা মহাক্কী হৈনবীনি। কনাগুম্বা অমনা পাংথোক্নিংবদা থবক, মীখলদা মাইথিগনি হায়না কিবদগী চহি কয়া সরকারনা পায়খৎতবা থবকশিং অমসুং রাজনিতিগী ওইনা খুদোংথিনিঙাই ওই হায়না মখোয়না খনবা থবকশিং, মদু পাংথোকপা হায়বসি মহাক্কী থৌদাংনি হায়না মহাক্না খল্লি। ইন্নোবেতরশিংগুম্না, লৈবাক্কীদমক করিগুম্বা খর দরকার ওইরবদি, কনাগুম্বা অমনা খুদোংথিবা মাইরোং য়াগদবনি হায়না মহাক্না থাজৈ অমসুং মসিদা মহাক্কী মাঙজবা ওইবা য়াই, কান্নবদি মীওই মিল্লিয়ন কয়ানা ফংগনি।

প্রধান মন্ত্রীনা হায়খি মদুদি হৌখিবা চহি ১০ দা, ইন্নোবেসন য়োকখৎনবা থবক অমা লৈবাক অসিদা শেমগৎলে। অঙাংশিংগী মরক্ত অনৌবা থবক পায়খৎনবা মিকপ থোকহন্নবা স্কুলশিংদা অতল তিনকরিং লেবশিং লিংখৎলে, লৈবাক্কী খুদোংচাদবশিংগী কোকহন্নবা নহারোলশিংগী পুক্নিং থৌগৎনবা হেক্কাথোনশিং হৌদোক্লে অমসুং শেন-থুম লৈতদবগী অনৌবা ৱাখল্লোনশিং মাঙখিদনবা ইনকুবেসন সেন্তরশিং লিংখৎলে।

প্রধান মন্ত্রীনা হায়খি মতম অমদা অরুবা কমপ্লাইয়েন্সশিং, অয়াবা লৌবদা মতম শাংনা চঙবা অমসুং ইন্সপেক্তর রাজগী অকিবনা ইন্নোবেসন্দা অচৌবা খুরৌ থাংবা ওইখি। মরম অদুনা মহাক্কী সরকারনা থাজবা অমসুং অরোন-অথুপ লৈতবা ফিবম অমা শেমগৎলিবনি। জন বিশ্বাস এক্তগী মখাদা, প্রোবিজন ১৮০ হেন্না দিক্রিমিনেলাইজ তৌখ্রে, কোর্তকী থবকশিংদা পুক্নিং চঙবগী মহুত্ত মখোয়গী থবকশিংদা পুক্নিং চঙনবা ইন্নোবেতরশিংগী মমল য়াম্লবা মতম কনবা ঙম্লে। হৌজিক ষ্টার্দঅপশিং মশানা মশাবু সর্তিফিকেদ পীজবগী কান্নবা ফংলে অমসুং মর্জ তৌবা অমসুং তোকপগী থবকশিং লাইথোকহল্লে।

প্রধান মন্ত্রীনা হায়খি ষ্টার্দঅপ ইন্দিয়া শুপ্নগী স্কিম অমা খক নত্তে, মসি তোঙান তোঙানবা হিরমশিং অনৌবা খুদোংচাবশিংগা শম্নহনবা চুমথাংগী পান্দম অমনি। দিফেন্স মেনুফেকচরিংদা, চহি কয়াগী মমাঙদা লিংখৎখ্রবা কম্পেনিশিংগা লাম্বা তৌনবগী মতাংদা ষ্টার্দঅপশিংনা ৱাখলদা ফাওবা খনখিদে, অদুবু আইদেক্সকী খুৎথাংদা, ষ্ট্রাতেজিক সেক্তরশিংদা অনৌবা পোৎ-চৈ লৈনবা লম্বীশিং হাংদোক্লে। মতম অমদা লনাই কাংবু শরুক য়াবা য়ারমদবা স্পেস সেক্তর হৌজিক হাংদোক্লে, হিরম অসিদা ষ্টার্দঅপ ২০০ রোম থবক তৌরি অমসুং মালেম্না মশক খঙলে। দ্রোন সেক্তরদা অরিবা রুলশিংনা মতম শাংনা ভারত মনিংদা লৈহনখি অদুবু ইন্নোবেতরশিংদা থাজবা অমসুং অওনবশিংনা অহোংবা পুরক্লে। সরকারনা পোৎ-চৈ লৈবদা, গভর্নমেন্ত ই-মার্কেতপ্লেস (জি ই এম) না কৈথেলশিং য়াম্না ফংহনবা ঙম্লে, মসিদা ষ্টার্দঅপ অমসুং অপীকপা ললোন-ইতিক ৩৫,০০০ রোম শরুক য়ারে, লুপা করোর ৫০,০০০ রোমগী ওর্দর লাখ ৫ রোম ফংলে। ষ্টার্দঅপশিং মাইপাকপদগী, হিরম খুদিংমক্ত অনৌবা চাউখৎপা পুরক্লে।

প্রধান মন্ত্রীনা হায়খি মদুদি থবক অমা হৌদোক্নবা শেনফম য়াওদনা, খ্বাইদগী ফবা অনৌবা ৱাখলশিং কৈথেল য়ৌবা ঙম্লোই, মরম অসিনা ইন্নোবেতরশিং শেন্থং ফংহন্নবা মখোয়গী সরকারনা মীৎয়েং চঙলিবনি। ষ্টার্দঅপশিংগী ফন্দশিংগী খুৎথাংদা, লুপা করোর ২৫,০০০ হেন্না থাদখ্রে, ষ্টার্দঅপ ইন্দিয়া সিত ফন্দ, ইন-স্পেস সিদ ফন্দ অমসুং নিধি সিদ সপোর্ত প্রোগ্রামগুম্ব স্কিমশিংনা ষ্টার্দঅপশিংদা শেন থাদরে। শেন্থং ফংবা হেনগৎহন্নবা, ক্রেদিৎ গরেন্তি স্কিম হৌদোকপদগী গরেন্তর লৈতদবগী অফবা থবক পাংথোকপা ঙমদবা অদু কোকহল্লে। ঙসিগী থিজিনবগী থবকশিং হয়েংগী ইন্তেলেকচুয়েল প্রোপরতি ওইরে। মসি য়োকখৎনবগীদমক, লুপা করোর লাখ অমগী রিছার্স, দিবলপমেন্ত অমসুং ইন্নোবেসন স্কিম হৌদোক্লে অমসুং মসিগা লোয়ননা সনরাইজ সেক্তরশিংদা মতম শাংনা শেন থাদনবা দিপ তেক ফন্দগী ফন্দশিং লৈরে।

প্রধান মন্ত্রীনা হায়খি মদুদি নৌনা থোক্লকপা হিরমশিংদা অনৌবা ৱাখল্লোনশিংদা তুংগীদমক থবক পায়খৎপা অসিনা শেন-থুমগী ফিবম ফনা লৈহনবা অমসুং ষ্ট্রাতেজিক ওতোনোমিদা মরুওইবা থৌদাং অমা লৌগনি, মসিগী মরুওইবা খুদম এ.আইনা ওইরে। এ.আইগী অওনবা থবকশিংদা মাঙজিল থারিবা লৈবাকশিংনা হেন্না খুদোংচাবা ফংগনি অমসুং ভারতকীদমক মসিগী থৌদাং লৈবাক অসিগী ষ্টার্দঅপশিংগী খুৎতা লৈরে। ফেব্রুৱারি ২০২৬ দা ভারতনা এ.আই ইম্পেক্ত সম্মিৎ য়ুম্বু ওইগনি। মসি নহারোলশিংগী অচৌবা খুদোংচাবা অমনি। ইন্দিয়া এ.আই মিসনগী খুৎথাংদা শেন য়াম্না চঙবা অৱাংবা থাক্কী কম্পুতিংগী থবকশিংগী পাম্বৈশিং পুথোকপা ঙমগনি, অপীকপা ষ্টার্দঅপশিংদা অচৌবা তেক্নোলোজি ফংহনবা ঙম্নবা জি.পি.য়ু ৩৮,০০০ ওনবোর্দ লৈহনবগা লোয়ননা ভারতকী সর্ভরশিংদা ভারতকী হৈথোই-শিংথোইরবা মীওইশিংনা এ.আই শেমগৎলে। মসিগা চপ মান্নবা থবকশিং সেমিকন্দক্তরশিং, দেতা সেন্তরশিং, গ্রিন হায়দ্রোজেন অমসুং অতোপ্পা সেক্তরশিংদা চৎথরি।

প্রধান মন্ত্রীনা হায়খি ভারতকী পান্দম শরুক য়াবা খক ওইরোইদবনি, মালেমগী লুচিংবা ওইনবা পান্দম থমগদবনি,                              অনৌবা ৱাখলশিংদা থবক তৌনবা অমসুং খুদোংচাদবশিং কোকহন্নবা ষ্টার্দঅপশিংনা থবক তৌগদবনি। হৌখিবা চহি ১০ দা, ভারতনা মসিগী দিজিতেল ষ্টার্দঅপশিং অমসুং সর্বিস সেক্তরশিং মাইপাক্লে অমসুং হৌজিক ষ্টার্দঅপশিংনা মেনুফেকচরিং সেক্তরদা মীৎয়েং চঙগদবনি। তুংদা মাঙজিল থানবা মালেম থাক্কী মগুন লৈবা পোৎথোকশিং অমসুং অঙকপা তেক্নোলোজিগী অনৌবা ৱাখলশিং পুথোক্কদবনি। থবক খুদিংমক্ত ষ্টার্দঅপশিংগীদমক সরকারনা খোঙফম চেৎনা লেপ্লি, ভারতকী তুংলমচৎ শেম্লিবা মখোয়গী থৌনা, থাজবা অমসুং অনৌবা থবক্ত থাজবা থম্লি। হৌখিবা চহি ১০ দা লৈবাক অসিনা তৌবা ঙম্বশিং উৎখ্রে অমসুং মথং চহি ১০ গী ভারতকী পান্দমদি অনৌবা ষ্টার্দঅপশিং অমসুং তেক্নোলোজিশিংদা ভারতনা মালেম লমজিংবা ওইগদবনি।

থৌরম অদুদা শরুক য়াখিবা শক্নাইরবা মীওইশিংগী মনুংদা য়ুনিয়ন মিনিষ্টর শ্রী পিয়ুস গোয়াল য়াওখি।

নুঙগীৱারোল

ভারত থবক থিবা লৈবাক অমা ওইবগী মহুত্ত থবক পীবা ঙম্বা লৈবাক অমা ওইনবা পান্দমগা লোয়ননা, ইন্নোবেসন, ওন্ত্রেপ্রেন্যুরশিপ য়োকখৎনবা অমসুং শেন থাদুনা চাউখৎপা পুরক্নবা লৈবাক্কী অওনবা পুরকপা থৌরম অমা ওইনা প্রধান মন্ত্রীনা জনুৱারি ১৬, ২০১৬ দা ষ্টার্দঅপ ইন্দিয়া হৌদোকখি।

হৌখিবা চহি ১০ দা, ভারতকী শেন-থুম অমসুং ইন্নোবেসন চাউখৎহনবদা ষ্টার্দঅপ ইন্দিয়া য়াম্না মরুওইবা অমা ওইরে। মসিনা ইন্সতিতুসনশিংগী থবকশিং ফগৎহল্লে, থবক পায়খৎনবা শেন অমসুং লমজিং লমতাকপা ফংহল্লে অমসুং তোঙান তোঙানবা হিরমশিং অমসুং লমদমশিংদা ষ্টার্দঅপশিং চাউখৎনবা ফিবম শেমগৎলে। হায়রিবা মতম অসিগী মনুংদা ভারতকী ষ্টার্দঅপকী থবক মমাঙদা অমুক্ত ওইখিদ্রিবা ম ওংদা চাউখৎলে, লৈবাক শীনবা থুংনা ষ্টার্দঅপ ২,০০,০০০ হেন্না মশক খঙলে। মখোয়গী ললোন-ইতিক্কী থবকশিংনা থবক ফংহনবা, শেন-থুম চাউখৎহনবা অমসুং হিরম কয়াদা লৈবাক অসিগী ভেলু চেনশিং ফগৎহনবদা মতেং পাংলে।

Driven by innovation and enterprise, India’s Startups are shaping a self-reliant and resilient economy. Addressing a programme in Delhi marking #10YearsOfStartupIndia.
https://t.co/SY8JUUCvT7

— Narendra Modi (@narendramodi) January 16, 2026

***