প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা অসামগী কালিয়াবোরদা লুপা করোর ৬,৯৫০ হেনবগী কাজিরঙ্গা ইলাবেতেদ কোরিদোর প্রোজেক্কী উরেপ-উয়ুং তমখ্রে
কাজিরঙ্গা নেসনেল পার্ক অমা ওইবগী মথক্ত, মসি অসামগী থৱায়নি, ভারতকী বাইওদাইভরসিতিগী মমল নাইদ্রবা মনি অমনি, ৱার্ল্দ হেরিতেচ সাইত অমা ওইনা য়ুনেস্কোনা শক খঙলে: প্রধান মন্ত্রী
মহৌশাগী অকোয়বগী ফিবম ঙাক-শেনবা মতমদা, মসিগা লোয়ননা খুদোংচাবা কয়া ফংই; চহি খর অসিদা, কাজিরঙ্গাদা তুরিজম চাউখৎপা উরে অমসুং হোমষ্টেশিং, লমজিংবগী থবকশিং, ত্রান্সপোর্ত, হেন্দিক্রাফশিং অমসুং অপীকপা ললোন-ইতিক্কী থবকশিংগী খুৎথাংদা মফম অসিগী নহারোলশিংগী অনৌবা হিংনবা লম্বীশিং ফংলে: প্রধান মন্ত্রী
মতম শাংনা, মহৌশাগী অকোয়বগী ফিবম অমসুং চাউখৎপা য়েক্নবনি, মখোয় অনি পুন্না চৎমিন্নবা য়ারোই হায়না থাজনখি। ঙসিদি অনিমক নাকল অমমমদা খুমাঙচাউশিনবা য়াগনি হায়বা মালেমদা ভারতনা উৎলে: প্রধান মন্ত্রী
অৱাং-নোংপোক মখা তানা চাউখৎপগী মতাইদা লৈত্রে; লমদম অসি লৈবাক অসিগী ময়োল অমসুং দিল্লি ফাওবগা নকশিন্নরে: প্রধান মন্ত্রী
प्रविष्टि तिथि:
18 JAN 2026 12:49PM by PIB Imphal
ঙসি প্রধান মন্ত্রী শ্রী নরেন্দ্র মোদীনা অসামগী কালিয়াবোরদা লুপা করোর ৬,৯৫০ হেনবগী কাজিরঙ্গা ইলাবেতেদ কোরিদোর প্রোজেক(এন.ঐচ-৭১৫ গী কালিয়াবোর-নুমালিহর সেক্সন লেন মরি ওনখৎপা) উরেপ-উয়ুং তমখ্রে। থৌরম অদুদা মীয়ামদা ৱা ঙাংবদা, প্রধান মন্ত্রীনা হায়খি থৌরম অসিদা মীওই মশিং য়াম্না তিনবা অসিগীদমক থাগৎপা ফোঙদোকচরি। কাজিরঙ্গাদা অমুক হন্না লাকপদা, মহাক্কী হান্নগী খোঙচৎশিং অমুক নিংশিংহল্লে, চহি অনিগী মমাঙদা মহাক্না কাজিরঙ্গাদা চৎখিবা অদু মহাক্কী পুন্সিগী খ্বাইদগী নুংঙাইবা থৌদোকশিংগী মনুংদা য়াওরে। মহাক কাজিরঙ্গা নেসনেস পার্কতা অহিং অমা লৈবগী খুদোংচাবা ফংখি অমসুং মথংগী অয়ুক্ত শামুগী সাফারি অমদা মহাক্না লমদম অসিগী ফজবা য়াম্না নক্না য়েংখি।
প্রধান মন্ত্রীনা হায়খি অসাম থৌনা ফরবা ইচানুপাশিং অমসুং ইচানুপীশিংগী লমদম অমা ওইনা হিরম খুদিংমক্ত মখোয়গী হৈথোই-শিংথোইবা উৎলে। ঙরাং মহাক গুৱাহাতিদা বাগুরুম্বা দহৌ থৌরম শরুক য়াখ্রে, মফম অদুদা বোরোগী ইচানুপীশিংনা মখোয়গী জগোয়গী অনৌবা রেকোর্দ অমা থমখ্রে। খামগী তান্থ অমসুং সিফুংগী অমেংবা সুরগা লোয়ননা কলাকার ১০,০০০ হেনবনা বাগুরুম্বা উৎখিবা অদুনা মীওই খুদিংমক অঙকপা পোকহনখ্রে। বাগুরুম্বগী ফজবা মীওই খুদিংমক্কী মীৎ অমসুং থম্মোয়দা য়ৌরে। মখোয়গী মশক থোকপা থবক, শেম-শাবা অমসুং পুন্না থবক তৌমিন্নবগীদমক অসামগী কলাকারশিং থাগৎপা ফোঙদোকচরি অমসুং মসি তশেংনা অঙকপনি। বাগুরুম্বা দহৌ কুহ্মৈদা শরুক য়াখিবা মীওইশিং অমুক হন্না থাগৎপা ফোঙদোকচরি। থৌরম অসি লৈবাক অমসুং মালেম শীনবা থুংনা য়ৌহনখিবগীদমক সোসিএল মেদিয়া ইনফ্লুয়েন্সরশিং অমসুং তি.ভি মেদিয়া থাগৎপা ফোঙদোকচরি।
হৌখিবা চহিদা মহাক্না ঝুমোইর মহোৎসব শরুক য়াখিবা অদু নিংশিংলদুনা, প্রধান মন্ত্রীনা হায়খি মদুদি হন্দক মাঘ বিহু মনুংদা অসামদা লাকপগী খুদোংচাবা ফংলে। থা অমগী মমাঙদা মহাক্না চাউখৎ-থৌরাংগী প্রোজেকশিংগী লাকখি অমসুং গুৱাহাতিদা লোকপ্রিয়া গোপিনাথ বারদোলোই ইন্তরনেসনেল এয়রপোর্তকী অনৌবা তর্মিনেল বিল্দিং শঙ্গাখি অমসুং নামরুপতা এম্মোনিয়া য়ুরিয়া কমপ্লেক্সকী উরেপ-উয়ুং তমখি। অসিগুম্বা থৌরমশিংনা মখা তানা মখোয়গী সরকারগী “বিকাস ভি, বিরাসত ভি” গী লাইৱা মপাঙ্গল কনখৎহল্লে।
প্রধান মন্ত্রীনা হায়খি মদুদি অসামগী হৌখিবা, হৌজিক অমসুং তুংদা কালিয়াবোরগী মরুওইবা লৈরি, মসি কাজিরঙ্গা নেসনেল পার্ককী থোঙ্গালনি অমসুং অপ্পর অসামগা শম্ননবা মফম অমনি। কালিয়াবোরদগী অথৌবা লচিত বোরফুকান্না মুঙ্গলশিং তান্থোক্নবা লাল্লোং য়াৎখি অমসুং মহাক্কী লমজিং মখাদা অসামগী মীয়াম্না থৌনা, অপুনবা অমসুং খাংবা কনবগা লোয়ননা মুঙ্গল লান্মী মাইথিবা পীখি। মসি ইচম চম্বা লান্মীগী মাইপাকপা অমা নত্তে, মসি অসামগী চাউথোকচবা অমসুং মশানা মশাবু থাজবগী লাউথোকপা অমনি। অহোম লৈঙাক মতমদগী, কালিয়াবোর মরুওইবা মফম ওইদুনা লাক্লি অমসুং মখোয়গী সরকার মখাদা হৌজিক লমদম অসি লম্বী-থোঙ অমসুং চাউখৎপগী মরুওইবা মফম অমা ওইরকপদা হরাওই। হৌখিবা চহি অমা মখাইদা দল অসিদা থাজবা হেনগৎলক্তুনা ঙসিদি মখোয়গী দল লৈবাক শীনবা থুংনা মীয়ামগী অহানবা অপাম্বা ওইরে। চহি ২০ গী মতুংদা অহানবা ওইনা বিহারগী মীয়ামদা মখোয়দা রেকোর্দ ওইনা ভোৎশিং অমসুং সিতশিং পীরে। নুমিৎ নিনিগী মমাঙদা লাউথোকখিবা মহারাষ্ট্রাগী অচৌবা সহরশিংগী মেয়র অমসুং কাউন্সিল্লরশিংগী মীখলশিংদা অহানবা ওইনা মালেমদা খ্বাইদগী চাউবা ম্যুনিসিপাল কাউন্সিল অমা ওইরিবা মুম্বাইনা মখোয়গী দলদা থাজবা উৎলে। মহারাষ্ট্রাগী অয়াম্বা সহরশিংগী মীয়াম্না মখোয়গী থবক তৌনবা মখোয়দা খুদোংচাবা পীরে। মমাঙদা, কেরলাগী মীয়াম্না মখোয়গী দল শিংথাবা য়ানা শৌগৎখ্রে, অহানবা ওইনা রাজ্যগী কোনুং তিরুবনন্থপুরমদা দলনা মেয়রগী সিত অমা মাইপাক্লে। হন্দক লৈবাক শীনবা থুংবগী মীখলগী ফলশিংগী মতুংইন্না ভোত্তরশিংনা অফবা লৈঙাক অমসুং চাউখৎপা পাম্মী হায়বা নাখৈ শেংনা তাক্লে।
প্রধান মন্ত্রীনা হায়খ মদুদি মীখলশিং অসিনা অতোপ্পা পাউজেল অমসু পীরে- মদুদি লৈবাক অসিনা ওপোজিসন দলগী নেগেতিপ পোলিতিক্স পামদ্রে। ওপোজিসন দল পোকখিবা মুম্বাই সহরদা হৌজিক মরিশুবা নত্ত্রগা মঙাশুবদা লৈরে অমসুং মখোয়না মহারাষ্ট্রাদা চহি কয়া পাল্লকখিবা অদু মপুংফানা থুপচিনখ্রে। চাউখৎপগী মতাংদা ওপোজিসনগী এজেন্দা লৈতবদগী লৈবাক অসিনা ওপোজিসন্দা থাজবা লৈত্রে অমসুং অসিগুম্বা দল অমনা কৈদৌঙৈদা অসাম নত্ত্রগা কাজিরঙ্গাগী য়াইফনবা থবক তৌরোই।
প্রধান মন্ত্রীনা হায়খি মদুদি কাজিরঙ্গাগী ফজবা ফোঙদোকখিবা ভারত রত্ন দোক্তর ভুপেন হাজারিকাগী ৱাহৈশিং নিংশিংলি। মহাক্কী ৱাহৈশিংদা কাজিরঙ্গা নুংশিবা অমসুং অসামগী মীয়াম্না মহৌশাগা অচেৎপা মরী লৈনবা অদু মমি তাখি। কাজিরঙ্গা নেসনেল পার্ক অমা ওইবগী মথক্ত, মসি অসামগী থৱায়নি, ভারতকী বাইওদাইভরসিতিগী মমল নাইদ্রবা মনি অমনি, ৱার্ল্দ হেরিতেচ সাইত অমা ওইনা য়ুনেস্কোনা শক খঙলে। কাজিরঙ্গা অমসুং মসিগী লম্লক্কী শা-উচেকশিং ঙাক-শেনবা অসি মহৌশাগী অকোয়বগী ফিবম ঙাক-শেনবা খক নত্তনা মসি অসামগী তুংগী অমসুং লাক্লিবা মীরোলশিংগী থৌদাং অমসুনি। অসামগী লৈহাওদগী অনৌবা প্রোজেকশিং হৌদোক্লে অমসুং মীয়ামদা কান্নবা পীগদবা থবকশিং অসিগীদমক মীয়ামদা হরাওবা ফোঙদোকচরি।
প্রধান মন্ত্রীনা হায়খি মদুদি ঈশিং ইচাউ মনুংদা শা-উচেকশিংনা অৱাংবা মফম থিরকপদা খুদোংচাবা কয়া মায়োক্নরি অমসুং নেসনেল হায়ৱে লানবদা য়াম্না তোইনা খুদোংথিবা মায়োক্নরি। উমং ফজনা থম্বগা লোয়ননা নুংঙাইনা চৎথোক-চৎশিন তৌবা য়াহন্নবা সরকারনা থবক পায়খৎলি। পান্দম অসিগী মখাদা, লুপা করোর ৭,০০০ রোম চঙনা কালিয়াবোরদগী নুমালিগর ফাওবা কিমি ৯০ গী কোরিদোর অমা শেমগৎলে, মসিগী মনুংদা কিমি ৩৫ গী ৱাইল্দলাইফ কোরিদোর অমা য়াওরি। গারিশিং মথক্ত চেনখিবা মতমদা মখাদা লম্লক্কী শা-উচেকশিং চৎথোক-চৎশিন তৌবদা অপনবা লৈররোই, মসি শামু গন্দাশিং, শামুশিং অমসুং কৈশিং চৎথোক-চৎশিন য়ানবা দিজাইন তৌরবনি। কোরিদোর অসিনা অপ্পর অসাম অমসুং অরুনাচল প্রদেসকী মরক্ত চৎথোক-চৎশিন ফগৎহনগনি অমসুং অনৌবা রেল সর্বিস লৈবগা লোয়ননা মীয়ামদা অনৌবা খুদোংচাবশিং পীরগনি। হায়রিবা মরুওইবা প্রোজেকশিং অসিগীদমক অসাম অমসুং লৈবাক্কী মীয়ামদা প্রধান মন্ত্রীনা থাগৎপা ফোঙদোকখি।
প্রধান মন্ত্রীনা হায়খি মদুদি মহৌশাগী অকোয়বগী ফিবম ঙাক-শেনবা মতমদা, মসিগা লোয়ননা খুদোংচাবা কয়া ফংই; চহি খর অসিদা, কাজিরঙ্গাদা তুরিজম চাউখৎপা উরে অমসুং হোমষ্টেশিং, লমজিংবগী থবকশিং, ত্রান্সপোর্ত, হেন্দিক্রাফশিং অমসুং অপীকপা ললোন-ইতিক্কী থবকশিংগী খুৎথাংদা মফম অসিগী নহারোলশিংগী অনৌবা হিংনবা লম্বীশিং ফংলে।
প্রধান মন্ত্রীনা হায়খি মদুদি মতম অমদা শামু গন্দা হাৎপা অসি অচৌবা নুংনাঙবা অমা ওইখি। ২০১৩ অমসুং ২০১৪ মনুংদা মচি অমা পানবা শামু গন্দা কয়া হাৎখি। মসি মখা তানা চৎথদনবা মখোয়গী সরকারনা ৱারেপ লৌরে অমসুং সেকুরিতিগী থবকশিং ফগৎহল্লে, ফোরেষ্ট দিপার্তমেন্তদা অনৌবা খুদোংচাবশিং পীরে, য়েংশিনবা হেনগৎহল্লে অমসুং বন দুর্গাগী খুৎথাংদা নুপীশিং শরুক য়াবা হেনগৎলে। মসিগী ফল ওইনা, ২০২৫ দা শামু গন্দা অমতা হাৎপগী পাউ লৈত্রে, মসি সরকারগী রাজনিতিগী অচেৎপা পান্দম অমসুং অসামগী মীয়ামগী থবকশিংনা ঙমহনবনি।
প্রধান মন্ত্রীনা হায়খি মদুদি মতম শাংনা, মহৌশাগী অকোয়বগী ফিবম অমসুং চাউখৎপা য়েক্নবনি, মখোয় অনি পুন্না চৎমিন্নবা য়ারোই হায়না থাজনখি। ঙসিদি অনিমক নাকল অমমমদা খুমাঙচাউশিনবা য়াগনি হায়বা মালেমদা ভারতনা উৎলে। হৌখিবা চহি ১০ দা উমং অমসুং উগী শরুক শিংথাবা য়ানা হেনগৎলে অমসুং মীয়াম্না “এক পের মা কে নাম” কেম্পেন থৱায় য়াওনা শরুক য়াবদগী মসিগী মখাদা উ পাম্বী করোর ২৬০ হেন্না থাখ্রে। ২০১৪ দগী, কৈ অমসুং শামুগী রিজার্বশিং মশিং হেনগৎলক্লে অমসুং ঙাক-শেনবা অমসুং মীয়ামগী মফমশিং পাকথোক-চাউথোক্লে। ভারত্তগী মুৎখ্রবা চিতাহশিং অমুক পুরক্লে অমসুং হৌজিক নৌনা পাম্নরে। পাৎ ঙাক-শেন্নবা ভারতনা লেপ্তনা থবক পায়খৎলি অমসুং এসিয়াগী খ্বাইদগী চাউবা রামসার নেতৱার্ক ওইদুনা, রামসার সাইতশিং লৈবদা মালেমগী অহুমশুবা মফমদা লৈরি। চৎনবী ঙাক-শেনবগা লোয়ননা মহৌশাগী অকোয়বগী ফিবম ঙাক্তুনা কমদৌনা চাউখৎপগা খুৎশম্ননা চৎমিন্নগনি হায়বা অসামনসু মালেমদা উৎলে।
প্রধান মন্ত্রী মোদীনা হায়খি মদুদি অৱাং-নোংপোক্কী খ্বাইদগী অৱাবদি মতম পুম্নমক্ত থাপ্নবনি- থম্মোয়শিং লাপ্নবা অমসুং মফমশিং লাপ্নবনি। লমদম অসিগী মীয়াম্না খনখি মদুদি চাউখৎপা হায়বদু অতোপ্পা মফমদা চৎখ্রে অমসুং মখোয় হুন্দোক্লম্লে হায়বনি, মসিনা শেন-থুম খক শোকহনবদা নত্তনা থাজবসু লৈহন্দ্রে। কেন্দ্র অমসুং রাজ্যগী সরকারশিংগী খুৎথাংদা মখোয়গী সরকারনা অৱাং-নোংপোক চাউখৎনবা মরুওইনা লৌরে। লম্বীশিং, রেলৱেশিং, এয়রৱেশিং অমসুং ঈশিং লম্বীশিংদা অসামগা শম্ননবা থবক পায়খৎপা হৌরে।
প্রধান মন্ত্রীনা হায়খি রেলগী খুদোংচাবা হেনগৎহনবা অসিনা খুন্নাই অমসুং শেন-থুম অনিমক্ত কান্নবশিং ফংহল্লি, মসি অৱাং-নোংপোক্কী ওইনা য়াম্না মরুওইবনি। কেন্দ্রদা ওপোজিসন্না সরকার পায়বা মতমদা অসামগী রেলৱেগী লুপা করোর ২,০০০ খক্তগী বজেত ফংখি, অদুগা মহাক্কী সরকারগী মতমদা মসি লুপা করোর ১০,০০০ দা হেনখৎখি- শরুক মঙা হেনগৎলে। শেন থাদবা হেনগৎপা অসিনা অনৌবা রেল লাইনশিং, রেলৱে দবল ওইহনবা অমসুং মৈ ফংহনবা অমসুং পেসেঞ্জরশিংগী খুদোংচাবশিং য়াওনা ইনফ্রাষ্ট্রকচর ফগৎহল্লে।
কালিয়াবোরদগী অনৌবা ত্রেন অহুম লমথাখিবা অসিনা অসামগী রেলগী চৎথোক-চৎথোকশিন শিংথাবা য়ানা ফগৎহল্লে। বন্দে ভারত শ্লিপ্পর ত্রেন্না গুৱাহতি অমসুং কোলকাতা শম্নরে, অমৃত ভারত এক্সপ্রেস ত্রেনশিংনা অসাম, নোংচুপ বেঙ্গল, বিহার অমসুং উত্তর প্রদেসকী মরুওইবা ষ্টেসনশিং কোনশিনগনি অমসুং মসিনা পেসেঞ্জর লাখ কয়াদা কান্নবা পীরগনি। ত্রেনশিং অসিনা অসামগী ললোনবা মীওইশিং অনৌবা কৈথেলশিংগা শম্নহনগনি, মহৈরোয়শিং লাইরিক তম্বদা লাইহল্লগনি অমসুং লৈবাক অসিগী অতৈ মফমশিংদা চৎপা নুংঙাইহল্লগনি। লম্বী-থোং ফগৎলকপা অসিনা অৱাং-নোংপোক মখা তানা চাউখৎপগী মতাইদা লৈত্রে; লমদম অসি লৈবাক অসিগী ময়োল অমসুং দিল্লি ফাওবগা নকশিন্নরে।
প্রধান মন্ত্রীনা হায়খি মদুদি অসামনা মসিগী শক্তম অমসুং নাৎ ঙাকপগী অচৌবা খুদোংচাদবা মায়োক্নরি। অসামগী মখোয়গী সরকারনা নারোন্দা চঙলকপা মপুংফানা লাকশিল্লে, উমংশিং মী তাহন্দ্রে, পুৱারি অমসুং নাৎকী মফমশিং অমসুং মীয়ামগী লমশিং নারোন্দা চঙলকপা মীওইশিংনা আইন্না য়াদনা লৌশিল্লম্বগী কনবা ঙম্লে, মসিদা মীয়াম্না থাগৎনরে। চহি কয়া ওপোজিসন্না মখোয়গী ভোৎশিং ফংনবা অমসুং সরকার শেম্নবা অসামগী লম নারোন্দা চঙলকপা মীওইশিংদা শীন্নখি। ওপোজিসনগী সরকার মতমদা, নারোন্দা চঙলকপা মশিং হেনগৎলকখি অমসুং হায়রিবা নারোন্দা চঙলকপা মীওইশিং অঙসিনা অসামগী পুৱারি, নাৎ নত্ত্রগা লাইনিংগী মতাংদা খন্দে, পাক-শন্না লম খোপচিনখি। নারোন্দা চঙলকপদগী শা-উচেকশিংগী লম্বীশিং খোপচিনখি, আইন্না য়াদনা শা-উচেক হাৎপা হেনগৎলকখি অমসুং নারোন্দা য়োনবা অমসুং লৈবা অমসুং অতোপ্পা ক্রাইমশিং হেনগৎলকখি।
প্রধান মন্ত্রীনা হায়খি মদুদি নারোন্দা চঙলকপা মীওইশিংনা চৎনবীদা শিংনখি, লায়রবা অমসুং নহারোলশিংগী থবক মুনখি অমসুং ত্রাইবেলশিংগী লম আইন্না য়াদনা লৌশিনখি। মসিনা অসাম অমসুং লৈবাক্কী সেকুরিতিদা অচৌবা শিংনবা অমা ওইখি। মীয়াম্না ওপোজিসন্দগী মিকুপ-নাহুম শিংনা লৈগদবনি, মখোয়গী অমতা ঙাইরবা থৌশিলদি নারোন্দা চঙলকপা মীওইশিং ঙাক-শেনবা অমসুং সরকার পায়বনি। ওপোজিসন অমসুং মখোয়গা চৎমিন্নরবশিংনা মসিগী থবক অসি লৈবাক শীনবা থুংনা চৎথরি। মখোয়না বিহারদা নারোন্দা চঙলকপা মীওইশিং ঙাকথোক্নবা খোঙচৎশিং অমসুং রেল্লিশিং শীনখি অদুবু বিহারগী মীয়াম্না মখোয় মপুংফানা য়াখিদ্রে। অসামগী মীয়াম্না ওপোজিসন্দা অকনবা পাউখুম অমা পীগনি হায়না মহাক্না থাজবা থম্লি।
প্রধান মন্ত্রীনা হায়খি মদুদি অসাম চাউখৎপনা অপুনবা অৱাং-নোংপোক চাউখৎনবা অনৌবা থোঙশিং হাংদোক্লে অমসুং এক্ত ইষ্ট পোলিসিদা মাইকৈ তাক্লে। অসাম চাউখৎপা মতমদা অৱাং-নোংপোক চাউখৎলি অমসুং সরকারগী থবকশিং অমসুং মীয়ামগী থাজবগা লোয়ননা, লমদম অসি অনৌবা থাকশিংদা য়ৌবা ঙমগনি। মসিগা লোয়ননা, ঙসি শঙ্গাখিবা প্রোজেকশিংগীদমক প্রধান মন্ত্রীনা মীয়াম অমুক হন্না থাগৎপা ফোঙদোকখি।
থৌরম অসিদা শরুক য়াখিবা অতোপ্পা শক্নাইরবা মীওইশিংগী মনুংদা অসামগী রাজ্যপাল শ্রী লক্ষমন প্রসাদ অর্চারয়া, অসামগী চীফ মিনিষ্টর শ্রী হিমান্ত বিশ্বা শর্মা, য়ুনিয়ন মিনিষ্টরশিং শ্রী সর্বনন্দা সোনোৱাল, শ্রী পবিত্রা মারঘেরিতা য়াওখি।
নুঙগীৱারোল
প্রধান মন্ত্রী শ্রী নরেন্দ্র মোদীনা অসামগী কালিয়াবোরদা লুপা করোর ৬,৯৫০ হেনবগী কাজিরঙ্গা ইলাবেতেদ কোরিদোর প্রোজেক(এন.ঐচ-৭১৫ গী কালিয়াবোর-নুমালিহর সেক্সন লেন মরি ওনখৎপা) উরেপ-উয়ুং তমখ্রে।
কিমি ৮৬ শাংবা কাজিরঙ্গা ইলাবেতেদ কোরিদোর অসি মহৌশাগী অকোয়বগী ফিবমদা অকায়বা পীদবা নেসনেল হায়ৱে প্রোজেক অমনি। কিমি ৩৫ শাংবা কাজিরঙ্গা ইলাবেতেদ কোরিদোরনা কাজিরঙ্গা নেসনেল পার্ক, কিমি ২১ গী বাইপাস সেক্সন ফাওদুনা চৎকনি অমসুং হৌজিক লৈরিবা এন.ঐচ-৭১৫ গী কিমি ৩০ গী শরুক লেন অনিদগী লেন মরিদা ওনখৎকনি। প্রোজেক অসিনা পার্ককী শা-উচেকশিং ঙাক-শেনবগা লোয়ননা লমদম অসিগী চৎথোক-চৎশিন ফগৎহন্নবা পান্দম থম্লি।
প্রোজেক অসিনা নাগাউন, কার্বি অংলোং অমসুং গোলাঘাত জিলাশিং ফাওদুনা চৎকনি অমসুং দিব্রুগর অমসুং তিনসুকিয়া য়াওনা অপ্পর অসামদা শিংথাবা য়ানা লম্বী-থোঙ ফগৎহনগনি। কাজিরঙ্গা ইলাবেতেদ কোরিদোর অসিনা শাশিং অপনবা লৈতনা চৎথোক-চৎশিন য়াহনগনি, মীওইবা অমসুং শাশিংগী মরক্ত মুক্নবা হন্থহনগনি। মসিনা লম্বীগী অশোই-অঙাম থোক্তবা হেনগৎহনগনি, লম্বী চৎপগী মতম অমসুং খুদোংথিবা থোকপগী চাং হন্থহনগনি অমসুং পেসেঞ্জর অমসুং পোৎ-চৈ পুথোক-পুশিন হেনগৎহনগনি। প্রোজেক অসিগী শরুক অমা ওইনা, সহরশিংদা চিনবা হন্থহন্নবা, সহরগী চৎথোক-চৎশিন ফগৎনবা অমসুং মফম অদুগী মীয়ামগী পুন্সি মহিং ফগৎনবা জখালাবন্ধা অমসুং বোলাখাত্ত বাইপাস শেমগৎকনি।
থৌরম মনুংদা, প্রধান মন্ত্রীনা অনৌবা অমৃত ভারত এক্সপ্রেস ত্রেন অনি- গুৱাহাতি (কমাক্ষ্য)-রোতাক অমৃত ভারত এক্সপ্রেস অমসুং দিব্রুগর-লাখনৌ(গোমতি নাগর) অমৃত ভারত এক্সপ্রেস লমথাখ্রে। অনৌবা ত্রেনশিং অসিনা অৱাং-নোংপোক অমসুং অৱাং ভারতকী মরক্ত রেলগী চৎথোক-চৎশিন ফগৎহনগনি অমসুং মীয়াম অশোই-অঙাম য়াওদনা অমসুং হেন্না নুংঙাইনা চৎপা ঙমহনগনি।
***
(रिलीज़ आईडी: 2215904)
आगंतुक पटल : 12
इस विज्ञप्ति को इन भाषाओं में पढ़ें:
English
,
Urdu
,
Marathi
,
हिन्दी
,
Nepali
,
Assamese
,
Bengali
,
Gujarati
,
Tamil
,
Telugu
,
Kannada
,
Malayalam