পশ্চিমবংগৰ ৰাজ্যপাল চি ভি আনন্দ বসুজী, কেন্দ্ৰীয় মন্ত্ৰীসভাৰ মোৰ সহযোগী অশ্বিনী বৈষ্ণৱজী, শান্তনু ঠাকুৰজী, সুকান্ত মজুমদাৰজী, পশ্চিমবংগৰ বিৰোধী দলৰ নেতা শুভেন্দু অধিকাৰীজী, সংসদৰ মোৰ সহযোগী শৌমিক ভট্টাচাৰ্যজী, খগেন মুৰ্মুজী, কাৰ্তিক চন্দ্ৰপালজী, অন্যান্য জনপ্ৰতিনিধিসকল, ভদ্ৰ পুৰুষ-মহিলাসকল।

আজি মালদাৰ পৰা পশ্চিমবংগৰ প্ৰগতিৰ গতি বৃদ্ধিৰ অভিযান অধিক ত্বৰান্বিত হৈছে। অলপ আগতে পশ্চিমবংগৰ বিকাশৰ সৈতে জড়িত বহুতো প্ৰকল্পৰ আধাৰশিলা স্থাপন আৰু উদ্বোধন কৰা হৈছে। পশ্চিমবংগলৈ নতুন ৰে'লসেৱা আগবঢ়োৱা হৈছে। এই প্ৰকল্পসমূহে জনসাধাৰণৰ যাতায়াত আৰু ব্যৱসায়-বাণিজ্য সহজ কৰি তুলিব। ৰে'লগাড়ীৰ মেৰামতিৰ সৈতে জড়িত এই সুবিধাসমূহে বংগৰ যুৱক-যুৱতীসকলক নতুন সুযোগ প্ৰদান কৰিব।

বন্ধুসকল,

বংগৰ এই পবিত্ৰ ভূমিৰ পৰা আজি ভাৰতীয় ৰে'লৰ আধুনিকীকৰণৰ দিশত এক ডাঙৰ পদক্ষেপ গ্ৰহণ কৰা হৈছে। আজিৰে পৰা ভাৰতত বন্দে ভাৰত শ্লিপাৰ ৰে'লৰ আৰম্ভণি হৈছে। এই নতুন বন্দে ভাৰত শ্লিপাৰ ৰে'লখনে দেশবাসীৰ দীঘলীয়া যাত্ৰা অধিক আৰামদায়ক, সুন্দৰ আৰু স্মৰণীয় কৰি তুলিব। উন্নত ভাৰতৰ ৰে'লসমূহ কেনে হোৱা উচিত? এই বন্দে ভাৰত শ্লিপাৰ ট্ৰেইনত এতিয়া স্পষ্টকৈ দেখা পোৱা যায়। অলপ আগতে মালদা ষ্টেচনত মই যাত্ৰীসকলৰ সৈতে কথা পাতি আছিলো, সকলোৱে কৈছিল যে এই ৰে’লখনত বহাটো তেওঁলোকৰ বাবে এক অদ্ভুত আনন্দৰ কথা। কেতিয়াবা আমি ফটো বা ভিডিঅ'ত বিদেশৰ ৰে'ল দেখিছিলোঁ আৰু কৈছিলোঁ যে যদি এনে ৰে'ল ভাৰতত থাকিলহেতেন। আজি আমি সেই সপোন বাস্তৱত পৰিণত হোৱা দেখিবলৈ পাইছো। আৰু মই দেখিছোঁ যে শেহতীয়াকৈ বিদেশীসকলে ভাৰতৰ মেট্ৰ'ৰ ভিডিঅ' নিৰ্মাণ কৰিছে, ভাৰতৰ ৰে'লৰ ভিডিঅ' নিৰ্মাণ কৰিছে আৰু সমগ্ৰ বিশ্বক কৈছে যে ভাৰতত ৰে'লৱেত কিদৰে বিপ্লৱৰ সূচনা হৈছে। এই বন্দে ভাৰত ৰে'লখন মেড ইন ইণ্ডিয়া, ইয়াক নিৰ্মাণ কৰিবলৈ আমি ভাৰতীয়সকলে শ্ৰম কৰিছো। দেশৰ এই প্ৰথম বন্দে ভাৰত শ্লিপাৰ ৰে’লে মা কালীৰ ভূমি, মা কামাখ্যাৰ ভূমিৰ সৈতে সংযোগ স্থাপন কৰিছে। আগন্তুক সময়ত এই অত্যাধুনিক ৰে'ল সমগ্ৰ দেশতে সম্প্ৰসাৰিত হ'ব। এই অত্যাধুনিক শ্লিপাৰ ৰে'লৰ বাবে মই বংগ, অসম আৰু সমগ্ৰ দেশক অভিনন্দন জনাইছো।

বন্ধুসকল,

আজি ভাৰতীয় ৰে'লৱে এক নতুন যুগৰ মাজেৰে পাৰ হৈছে। ৰে'লৱেৰ বৈদ্যুতিকৰণ কৰা হৈছে, ৰে'লৱে ষ্টেচনবোৰ আধুনিকীকৰণ কৰা হৈছে। আজি পশ্চিমবংগকে ধৰি দেশত ডেৰশতাধিক বন্দে ভাৰত ৰে'ল চলি আছে। ইয়াৰ সমান্তৰালভাৱে, আধুনিক আৰু দ্ৰুতগামী ৰে'লৰ এক সম্পূৰ্ণ নেটৱৰ্ক গঢ় লৈ উঠিছে আৰু ইয়াৰ পৰা পশ্চিমবংগৰ দৰিদ্ৰ আৰু মধ্যবিত্ত পৰিয়ালসমূহ উপকৃত হৈছে।

বন্ধুসকল,

আজি বংগই চাৰিখনকৈ আধুনিক অমৃত ভাৰত এক্সপ্ৰেছ লাভ কৰিছে। নিউ জলপাইগুৰি, নাগাৰকোই অমৃত ভাৰত এক্সপ্ৰেছ, নিউ জলপাইগুৰিৰ পৰা তিৰুচিৰাপল্লী অমৃত ভাৰত এক্সপ্ৰেছ, আলিপুৰ দ্বাৰ বেংগালুৰু অমৃত ভাৰত এক্সপ্ৰেছ, আলিপুৰ দ্বাৰ মুম্বাই অমৃত ভাৰত এক্সপ্ৰেছ। ইয়াৰ দ্বাৰা বংগ আৰু বিশেষকৈ উত্তৰ বংগৰ দক্ষিণ আৰু পশ্চিম ভাৰতৰ সৈতে সংযোগ শক্তিশালী হ'ব। বিশেষকৈ দেশৰ বিভিন্ন প্ৰান্তৰ পৰা অহা যাত্ৰীসকলে পশ্চিমবংগ আৰু পূব ভাৰত ভ্ৰমণ কৰিবলৈ আহে। যিসকলে গংগা সাগৰ, দক্ষিণেশ্বৰ আৰু কালিঘাটৰ দৰ্শনলৈ আহে আৰু তামিলনাডু আৰু মহাৰাষ্ট্ৰলৈ যাতায়াত কৰে তেওঁলোকৰ বাবে এই অমৃত ভাৰত এক্সপ্ৰেছ ৰে'লসমূহে যাত্ৰা সহজ কৰি তুলিব।

বন্ধুসকল,

আজি ভাৰতীয় ৰে'ল আধুনিক হোৱাৰ লগতে আত্মনিৰ্ভৰশীল হৈছে। ভাৰতৰ ৰে'ল ইঞ্জিন, ভাৰতৰ ৰে'লৰ ডবা, ভাৰতৰ মেট্ৰ' ডবা, এই সকলোবোৰ ভাৰতৰ প্ৰযুক্তিৰ পৰিচয় হৈ পৰিছে। আজি আমি আমেৰিকা আৰু ইউৰোপতকৈও অধিক ইঞ্জিন নিৰ্মাণ কৰি আছো। বিশ্বৰ বিভিন্ন দেশলৈ যাত্ৰীবাহী ৰে'ল আৰু মেট্ৰ' ৰে'লৰ ডবা ভাৰতৰ পৰা ৰপ্তানি কৰা হয়। আৰু এই সকলোবোৰে আমাৰ অৰ্থনীতিৰ বাবে বহুতো লাভ কঢ়িয়াই আনিছে, আমাৰ যুৱক-যুৱতীসকলৰ বাবে নিয়োগৰ সৃষ্টি কৰিছে।

বন্ধুসকল,

ভাৰতক সংযোগ কৰাটো আমাৰ প্ৰাথমিকতা, দূৰত্ব কমোৱাটো আমাৰ লক্ষ্য আৰু এয়া আজিৰ এই কাৰ্যসূচীত প্ৰতিফলিত হৈছে। পুনৰবাৰ আপোনালোক সকলোকে এই প্ৰকল্পসমূহৰ বাবে মোৰ তৰফৰ পৰা বহুত বহুত শুভকামনা জনাইছো। মই ইয়াৰ কাষতে থকা এটা ডাঙৰ অনুষ্ঠানলৈ যাব লাগিব, তাত বহু মানুহ অপেক্ষা কৰি আছে, যিবোৰ কথা ইয়াত কোৱা হোৱা নাই, সেইবোৰ কথা মই তাত বিস্তাৰিতভাৱে ক'ম আৰু সংবাদ মাধ্যমৰ মনোযোগো সেই ভাষণত অধিক হ'ব। সকলোকে বহুত ধন্যবাদ।

***

MJPS/SS/AK/DK/DB