2026 ജനുവരി 11 ന് പ്രധാനമന്ത്രി രാജ്കോട്ട് സന്ദർശിക്കുകയും കച്ച്, സൗരാഷ്ട്ര മേഖലകൾക്കായുള്ള വൈബ്രന്റ് ഗുജറാത്ത് മേഖലാ സമ്മേളനത്തിൽ പങ്കെടുക്കുകയും ചെയ്യും. ഉച്ചയ്ക്ക് 1.30 ന്, സമ്മേളനത്തിൽ അദ്ദേഹം വ്യാപാര പ്രദർശനം ഉദ്ഘാടനം ചെയ്യും. തുടർന്ന്, ഉച്ചയ്ക്ക് 2 മണിക്ക്, രാജ്കോട്ടിലെ മാർവാഡി സർവകലാശാലയിൽ പ്രധാനമന്ത്രി കച്ച്, സൗരാഷ്ട്ര മേഖലകൾക്കായുള്ള വൈബ്രന്റ് ഗുജറാത്ത് മേഖലാ സമ്മേളനം ഉദ്ഘാടനം ചെയ്യും. ചടങ്ങിൽ അദ്ദേഹം സദസ്സിനെ അഭിസംബോധന ചെയ്യും. ചടങ്ങിൽ, പ്രധാനമന്ത്രി 14 ഗ്രീൻഫീൽഡ് സ്മാർട്ട് ഗുജറാത്ത് ഇൻഡസ്ട്രിയൽ ഡെവലപ്‌മെന്റ് കോർപ്പറേഷൻ ലിമിറ്റഡ് (ജിഐഡിസി) എസ്റ്റേറ്റുകളുടെ വികസനം പ്രഖ്യാപിക്കുകയും രാജ്കോട്ടിൽ ജിഐഡിസിയുടെ മെഡിക്കൽ ഉപകരണ പാർക്ക് ഉദ്ഘാടനം ചെയ്യുകയും ചെയ്യും.

കച്ച്, സൗരാഷ്ട്ര മേഖലകളിലെ 12 ജില്ലകളെ കേന്ദ്രീകരിച്ച് 2026 ജനുവരി 11 മുതൽ 12 വരെയാണ് വൈബ്രന്റ് ഗുജറാത്ത് മേഖലാ സമ്മേളനം നടക്കുന്നത്. ഈ മേഖലകൾക്ക് മാത്രമായി സമർപ്പിച്ചിരിക്കുന്ന സമ്മേളനം പടിഞ്ഞാറൻ ഗുജറാത്തിലെ നിക്ഷേപത്തിനും വ്യാവസായിക വളർച്ചയ്ക്കും പുതിയ ആക്കം കൂട്ടുക എന്ന ലക്ഷ്യത്തോടെയാണ് സംഘടിപ്പിച്ചിട്ടുള്ളത്. സെറാമിക്സ്, എഞ്ചിനീയറിംഗ്, തുറമുഖങ്ങൾ & ലോജിസ്റ്റിക്‌സ്, ഫിഷറീസ്, പെട്രോകെമിക്കൽസ്, കാർഷിക & ഭക്ഷ്യ സംസ്‌കരണം, ധാതുക്കൾ, ഹരിത ഊർജ്ജ പരിസ്ഥിതി വ്യവസ്ഥ, നൈപുണ്യ വികസനം, സ്റ്റാർട്ടപ്പുകൾ, എംഎസ്എംഇകൾ, ടൂറിസം, സംസ്കാരം എന്നിവ സമ്മേളനത്തിന്റെ ശ്രദ്ധാകേന്ദ്ര മേഖലകളിൽ ഉൾപ്പെടുന്നു. ജപ്പാൻ, ദക്ഷിണ കൊറിയ, റുവാണ്ട, ഉക്രെയ്ൻ എന്നിവ സമ്മേളനത്തിന്റെ പങ്കാളി രാജ്യങ്ങളാണ്.

വൈബ്രന്റ് ഗുജറാത്തിന്റെ വിജയകരമായ മാതൃകയുടെ വ്യാപ്തിയും സ്വാധീനവും കൂടുതൽ വികസിപ്പിക്കുന്നതിനായി, സംസ്ഥാനത്തുടനീളം നാല് വൈബ്രന്റ് ഗുജറാത്ത് മേഖലാ സമ്മേളനങ്ങൾ നടക്കുന്നു. വടക്കൻ ഗുജറാത്ത് മേഖലയ്ക്കായുള്ള ആദ്യ മേഖലാ സമ്മേളനം 2025 ഒക്ടോബർ 9-10 തീയതികളിൽ മെഹ്‌സാനയിൽ നടന്നു. നിലവിലെ പതിപ്പ് കച്ച്, സൗരാഷ്ട്ര മേഖലയ്ക്കായാണ് നടക്കുന്നത്. ദക്ഷിണ ഗുജറാത്ത് (2026 ഏപ്രിൽ 9-10), മധ്യ ഗുജറാത്ത് (2026 ജൂൺ 10-11) മേഖലകൾക്കായുള്ള പ്രാദേശിക സമ്മേളനങ്ങൾ പിന്നീട് യഥാക്രമം സൂറത്തിലും വഡോദരയിലും സംഘടിപ്പിക്കും.

പ്രധാനമന്ത്രിയുടെ വികസിത് ഭാരത് @2047 എന്ന ദർശനവുമായി യോജിപ്പിച്ച്, വൈബ്രന്റ് ഗുജറാത്ത് ആഗോള ഉച്ചകോടിയുടെ വിജയവും പൈതൃകവും കെട്ടിപ്പടുക്കുന്ന ഈ പ്രാദേശിക സമ്മേളനങ്ങൾ, മേഖലാ കേന്ദ്രീകൃത വ്യാവസായിക വികസനം പ്രോത്സാഹിപ്പിക്കുക, വൈവിധ്യമാർന്ന മേഖലകളിലുടനീളം നിക്ഷേപങ്ങൾ ആകർഷിക്കുക, ആഗോള ഇടപെടൽ വർദ്ധിപ്പിക്കുക എന്നിവയാണ് ലക്ഷ്യമിടുന്നത്. വൈബ്രന്റ് ഗുജറാത്ത് പ്ലാറ്റ്‌ഫോമിനെ പ്രാദേശിക മേഖലകളിലേക്ക് അടുപ്പിക്കുന്നതിലൂടെ, വികേന്ദ്രീകൃത വികസനം, ബിസിനസ്സ് എളുപ്പമാക്കൽ, നവീകരണത്താൽ നയിക്കപ്പെടുന്ന വളർച്ച, സുസ്ഥിര തൊഴിലവസരങ്ങൾ സൃഷ്ടിക്കൽ എന്നിവയിൽ പ്രധാനമന്ത്രിയുടെ ഊന്നൽ പ്രതിഫലിപ്പിക്കുന്നു.

പ്രാദേശിക നേട്ടങ്ങൾ പ്രദർശിപ്പിക്കുന്നതിനും പുതിയ സംരംഭങ്ങൾ പ്രഖ്യാപിക്കുന്നതിനുമുള്ള ഒരു വേദിയായി മാത്രമല്ല, പ്രാദേശിക സമ്പദ്‌വ്യവസ്ഥകളെ ശാക്തീകരിക്കുന്നതിലൂടെയും, നവീകരണത്തെ പ്രോത്സാഹിപ്പിക്കുന്നതിലൂടെയും, സംസ്ഥാനത്തിന്റെ എല്ലാ ഭാഗങ്ങളിലും തന്ത്രപരമായ നിക്ഷേപങ്ങൾ സുഗമമാക്കുന്നതിലൂടെയും ഗുജറാത്തിന്റെ വളർച്ചാ ​ഗാഥ സൃഷ്ടിക്കുന്നതിനുള്ള ഉപകരണങ്ങളായും മേഖലാ സമ്മേളനങ്ങൾ പ്രവർത്തിക്കും. 2027 ജനുവരിയിൽ നടക്കുന്ന വൈബ്രന്റ് ഗുജറാത്ത് ഗ്ലോബൽ ഉച്ചകോടിയുടെ അടുത്ത പതിപ്പിൽ മേഖലാ സമ്മേളനങ്ങളുടെ നേട്ടങ്ങൾ പ്രദർശിപ്പിക്കും.

***

SK