પ્રધાનમંત્રી 11 જાન્યુઆરી, 2026ના રોજ રાજકોટની મુલાકાત લેશે. કચ્છ અને સૌરાષ્ટ્ર પ્રદેશો માટે વાઇબ્રન્ટ ગુજરાત પ્રાદેશિક પરિષદમાં ભાગ લેશે. બપોરે 1:30 વાગ્યે, તેઓ કોન્ફરન્સમાં ટ્રેડ શોનું ઉદ્ઘાટન કરશે. ત્યારબાદ, બપોરે 2 વાગ્યે પ્રધાનમંત્રી રાજકોટમાં મારવાડી યુનિવર્સિટી ખાતે કચ્છ અને સૌરાષ્ટ્ર પ્રદેશો માટે વાઇબ્રન્ટ ગુજરાત પ્રાદેશિક પરિષદનું ઉદ્ઘાટન કરશે. તેઓ સભાને પણ સંબોધિત કરશે. આ કાર્યક્રમ દરમિયાન પ્રધાનમંત્રી 14 ગ્રીનફિલ્ડ સ્માર્ટ ગુજરાત ઇન્ડસ્ટ્રિયલ ડેવલપમેન્ટ કોર્પોરેશન લિમિટેડ (GIDC) એસ્ટેટના વિકાસની જાહેરાત કરશે અને રાજકોટમાં GIDC મેડિકલ ડિવાઇસ પાર્કનું ઉદ્ઘાટન કરશે.

11-12 જાન્યુઆરી, 2026ના રોજ યોજાનારી વાઇબ્રન્ટ ગુજરાત પ્રાદેશિક પરિષદ, કચ્છ અને સૌરાષ્ટ્ર પ્રદેશોના 12 જિલ્લાઓને આવરી લે છે. આ પ્રદેશો માટે ખાસ આયોજિત, આ પરિષદનો હેતુ પશ્ચિમ ગુજરાતમાં રોકાણ અને ઔદ્યોગિક વિકાસને નવી ગતિ આપવાનો છે. આ કોન્ફરન્સના મુખ્ય ક્ષેત્રોમાં સિરામિક્સ, એન્જિનિયરિંગ, બંદરો અને લોજિસ્ટિક્સ, મત્સ્યઉદ્યોગ, પેટ્રોકેમિકલ્સ, કૃષિ અને ખાદ્ય પ્રક્રિયા, ખનિજો, ગ્રીન એનર્જી ઇકોસિસ્ટમ્સ, કૌશલ્ય વિકાસ, સ્ટાર્ટઅપ્સ, MSME, પર્યટન અને સંસ્કૃતિનો સમાવેશ થાય છે. જાપાન, દક્ષિણ કોરિયા, રવાન્ડા અને યુક્રેન આ કોન્ફરન્સ માટે ભાગીદાર દેશો રહેશે.

સફળ વાઇબ્રન્ટ ગુજરાત મોડેલની પહોંચ અને અસરને વધુ વિસ્તૃત કરવા માટે, રાજ્યભરમાં ચાર વાઇબ્રન્ટ ગુજરાત પ્રાદેશિક પરિષદોનું આયોજન કરવામાં આવી રહ્યું છે. ઉત્તર ગુજરાત ક્ષેત્ર માટે પ્રાદેશિક પરિષદનું પ્રથમ સંસ્કરણ 9-10 ઓક્ટોબર, 2025ના રોજ મહેસાણામાં યોજાયું હતું. વર્તમાન સંસ્કરણ કચ્છ અને સૌરાષ્ટ્ર પ્રદેશો માટે યોજાઈ રહ્યું છે. દક્ષિણ ગુજરાત (9-10 એપ્રિલ, 2026) અને મધ્ય ગુજરાત (10-11 જૂન, 2026) પ્રદેશો માટે પ્રાદેશિક પરિષદો અનુક્રમે સુરત અને વડોદરામાં યોજાશે.

પ્રધાનમંત્રીના 2047 સુધીમાં વિકસિત ભારતના વિઝન અને વાઇબ્રન્ટ ગુજરાત ગ્લોબલ સમિટની સફળતા અને વારસાના આધારે, આ પ્રાદેશિક પરિષદોનો ઉદ્દેશ્ય પ્રદેશ-વિશિષ્ટ ઔદ્યોગિક વિકાસને પ્રોત્સાહન આપવા, ક્ષેત્રોમાં રોકાણ આકર્ષવા અને વૈશ્વિક જોડાણ વધારવાનો છે. વાઇબ્રન્ટ ગુજરાત પ્લેટફોર્મને પ્રદેશોની નજીક લાવીને, આ પહેલ વિકેન્દ્રિત વિકાસ, વ્યવસાય કરવાની સરળતા, નવીનતા-આધારિત વૃદ્ધિ અને ટકાઉ રોજગારીની તકોના સર્જન પર પ્રધાનમંત્રીના ભારને પણ પ્રતિબિંબિત કરે છે.

આ પ્રાદેશિક પરિષદો માત્ર પ્રાદેશિક સિદ્ધિઓ દર્શાવવા અને નવી પહેલોની જાહેરાત કરવા માટેનું પ્લેટફોર્મ બનશે નહીં, પરંતુ પ્રાદેશિક અર્થતંત્રોને મજબૂત કરીને, નવીનતાને પ્રોત્સાહન આપીને અને રાજ્યના દરેક ભાગમાં વ્યૂહાત્મક રોકાણને સરળ બનાવીને ગુજરાતની વિકાસગાથાને સંયુક્ત રીતે ઘડવાનું એક માધ્યમ પણ બનશે. પ્રાદેશિક પરિષદોની સિદ્ધિઓ જાન્યુઆરી 2027માં વાઇબ્રન્ટ ગુજરાત ગ્લોબલ સમિટના આગામી સંસ્કરણ દરમિયાન પ્રદર્શિત કરવામાં આવશે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com