প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা ন্যু দিল্লিদা ভগবন বুদ্ধগা মরী লৈনবা শেংলবা পিপরহৱা রেলিকশিংগী মালেমগী এক্সপোজিসন হৌদোকখ্রে
ভারতকীদমক, ভগবন বুদ্ধগী শেংলবা পিপরহৱা রেলিকশিং ইচ চম্বা কলাগী পোৎলমশিং নত্তে; মখোয় ঐখোয়গী নাৎকী শরুক অমনি অমসুং ঐখোয়গী সভ্যতাগী শরুক অমনি: প্রধান মন্ত্রী
ভগবন বুদ্ধনা তাক্লম্বা লৌশিং অমসুং লম্বী অপুনবা মীওইবা খুন্নাইগীনি: প্রধান মন্ত্রী
ভগবন বুদ্ধ মীওই খুদিংমক্কীনি অমসুং ঐখোয় পুম্নমক অমতা ওইনা পুনশিনহনখি: প্রধান মন্ত্রী
ভারতনা ভগবন বুদ্ধগী শেংলবা রেলিকশিংগী মপু ওইবতা নত্তনা, মুৎপা নাইদ্রবা চৎনবী অসি পুদুনা চৎলিবা অহিংবা অমসু ওইরি: প্রধান মন্ত্রী
ভগবন বুদ্ধনা পালি লোলদা পাউতাকশিং পীখি, ঐখোয়গী থবক্তি পালি পাক-শন্না মীয়ামদা য়ৌহনবনি অমসুং মসিগীদমক পালি ক্লাসিকেল লোল অমগী থাক্ত পুখৎলে: প্রধান মন্ত্রী
प्रविष्टि तिथि:
03 JAN 2026 1:48PM by PIB Imphal
ঙসি ন্যু দিল্লিগী রাই পিথোরা কলচরেল কমপ্লেক্সতা, “মঙাল অমসুং থম্বাল: মঙাল ফংলবা অমগী শেংলবা হকচাংগী শরুকশিং” হায়না মিংথোনবা ভগবন বুদ্ধগা মরী লৈনবা শেংলবা পিপরহৱা রেলিকশিংগী মালেমগী এক্সপোজিসন প্রধান মন্ত্রী শ্রী নরেন্দ্র মোদীনা হৌদোকখ্রে। থৌরম অদুদা ৱা ঙাংবদা, প্রধান মন্ত্রীনা হায়খি চহি ১২৫ ঙাইরবা মতুংদা, ভারতকী হেরিতেচ অমুক পুরক্লে, ভারতকী পুৱারি অমুক হন্না লাক্লে। ঙসিদগী ভারতকী মীয়াম্না ভগবন বুদ্ধগী শেংলবা হকচাংগী শরুকশিং উবা ফংলগনি অমসুং মহাক্কী থৌজালশিং ফংলগনি। শেংলবা থৌরম অসিদা শরুক য়াখিবা মীওই খুদিংমক প্রধান মন্ত্রীনা তরাম্না ওকখি অমসুং য়াইফ পাউজেল পীখি। মহাক্না হায়খি মদুদি বুদ্ধিষ্ট চৎনবীগা মরী লৈনবা লম্বোইবশিং অমসুং মাইচৌশিং থৌরম অসিদা শরুক য়ারি অমসুং মখোয়গী মফমদা মহাক্না ইকায়খুম্নবা উৎখি। মখোয় শরুক য়াবা অসিনা থৌরম অসিদা অনৌবা থৌনা অমা হাপ্লে হায়না প্রধান মন্ত্রীনা ফোঙদোকখি। প্রধান মন্ত্রীনা হায়খি মদুদি ২০২৬ হৌরকপদা, শেংলবা থৌরম অসিনা পুক্নিং য়াম্না থৌগৎলে। ভগবন বুদ্ধগী থৌজালদগী ২০২৬ অসিনা মালেমদা শান্তি, নুংঙাই-য়াইফবা অমসুং নুংশিন্না হিংমিন্নবগী অনৌবা যুগ অমা পুরকপা ওইরসনু।
প্রধান মন্ত্রীনা হায়খি মদুদি একজিবিসন পাংথোক্লিবা মফম অসিমক অখন্নবনি। কিলা রাই পিথোরাগী মফম অসি ভারতনা মপাল ফরিঙৈগী পুৱারিগী লমদম অমনি অমসুং মফম অসিদা চহি লিশিং অমগী মমাংদা হান্নগী নিংথৌশিংনা অকনবা অমসুং অফবা ফক্লাংশিংনা কোইনশিনবা সহর অমা শেমগৎলমখি। ঙসি হায়রিবা পুৱারি ওইরবা সিতি কমপ্লেক্স অদুদা, পুৱারিগী অধ্যতিক ওইবা অমসুং শেংলবা পন্দুব অমা হাপচিল্লে। মফম অসিদা লাক্ত্রিঙৈদা মহাক পুৱারি ওইরবা একজিবিসন মপুংফানা য়েংখ্রে। ঐখোয়গী মরক্ত ভগবন বুদ্ধগী শেংলবা হকচাংগী শরুকশিং লৈবা অসিনা মীওই খুদিংমক্ত থৌজাল পীরে। মখোয় ভারত্তগী পুখিবা অমসুং মখা তানা অমুক পুরকপা অনিমক মখোয়দা মরুওইবা পারাশিং তম্বীরবনি। পারা অদুদা মীনাই ওইবনি, রাজিনিতি অমসুং শেন-থুমগী নত্তে, অদুবু মসিনা ঐখোয়গী নাৎ অমসুং চৎনবীশিং মাঙহনখি। মদুগা চপ মান্নবা ভগবন বুদ্ধগী শেংলবা হকচাংগী শরুকশিংদা থোকখি, মীনাই ওইরিঙৈ মনুংদা মখোয় পুখি অমসুং চহি ১২৫ হেন্না মপান লৈবাক্ত লৈখি। ভগবন বুদ্ধগী শেংলবা হকচাংগী শরুকশিং পুখিবা মীওইশিং, মখোয়গী মচা-মশুশিং, ভগবন বুদ্ধগী শেংলবা হকচাংগী শরুকশিং অসি থৱায় পান্দবা অরিবা পোৎলমশিংনি। মরম অদুনা মখোয়না ভগবন বুদ্ধগী শেংলবা হকচাংগী শরুকশিং অসি মালেমগী কৈথেলদা নিলাম লাওনবা হোৎনখিবনি। ভারতনা হায়রিবা শেংলবা হকচাংগী শরুকশিং অদু ঐখোয়গী শেংলবা ঈশ্বরগী শরুক অমনি, ঐখোয়গী সভ্যতগী থাদোক্নবা য়াদ্রবা শরুক অমনি। মখোয়না মীয়ামদা নিলাম লাউবগী অয়াবা পীদনবা ভারতনা ৱারেপ লৌখি। মহাক্কী কর্মাগী লমদম, মহাক্কী ধ্যানগী লমদম, মহাক্কী মহাবোধিগী লমদম অমসুং মহাক্কী মহাপরিনির্ভনা লমদমদা ভগবন বুদ্ধগী শেংলবা হকচাংগী শরুকশিং অমুক পুরক্নবা হোৎনবদা মখোয়না মতেং পাংবগীদমক গোদ্রেজ গ্রুপ থাগৎপা ফোঙদোকচরি।
প্রধান মন্ত্রীনা হায়খি ভগবন বুদ্ধনা তাক্লম্বা লৌশিং অমসুং লম্বী অপুনবা মীওইবা খুন্নাইগীনি। মসিগী ৱাখল্লোন অসি হৌখিবা থা খর অসিদা হঞ্জিন হঞ্জিন থেংনখ্রে। হন্দক থা খর অসিদা ভগবন বুদ্ধগী শেংলবা হকচাংগী শরুকশিং মফম কয়াদা পুবদা, থাজবা অমসুং চঙজবগী ইথকশিং হেনগৎলকখি। থাইলেন্দা তোঙান তোঙানবা মফমশিংদা অসিগুম্বা ভগবন বুদ্ধগী শেংলবা হকচাংগী শরুকশিং থম্বদা, থা অমা ফাদবা মতমগী মনুংদা ভক্ত লাখ ৪০ হেন্না য়েংবা লাকখি। ভিয়েতনামদা মীয়াম্না থৱায় য়াম্না য়াওবদগী একজিবিসনগী মতম শাংদোকখি অমসুং সহর ৯ দা মীওই করোর ১.৭৫ রোম্না ভগবন বুদ্ধগী শেংলবা হকচাংগী শরুকশিংদা ইকায়খুম্নবা উৎখি। মোঙ্গোলিয়াদা মীওই লিশিং কয়া পুং কয়া গনদান মোনাষ্ট্রিদা ঙাইদুনা লৈনখি অমসুং বুদ্ধগী লমদমদগী লাকপনি হায়দুনা ভারতকী মীহুৎশিংগী মশা শোক্নবা মখোয়না হোৎনখি। রুসিয়াগী কালমিদিয়া লমদমদা চয়োল অমদা ভক্ত লাখ ১.৫ হেনবনা ভগবন বুদ্ধগী শেংলবা হকচাংগী শরুকশিং য়েংখি, মসি মফম অদুগী অপুনবা মীশিংগী তঙ্খায় অমদগী হেনখি। তোঙান তোঙানবা লৈবাকশিংগী হায়রিবা থৌরমশিং অসিদা, মীচম মীয়াম নত্ত্রগা সরকারতগী লুচিংবশিং ওইগেরা, মখোয় অমতা ওইনা পুনখি। ভগবন বুদ্ধ মীওই খুদিংমক্কীনি অমসুং মীওই খুদিংমক শম্নহল্লে।
মহাক্কী পুন্সিদা ভগবন বুদ্ধনা অচৌবা মফম অমা কনবনা, মহাক মশামক লাইবক য়াম্না ফৈ হায়না খল্লি হায়না ফোঙদোক্লদুনা, প্রধান মন্ত্রীনা হায়খি মহাক্কী পোক্নফম লমদম ভাদনগর বুদ্ধগী মরমদা তম্নবা মরুওইবা মফম অমনি অমসুং ভগবন বুদ্ধনা মহাক্কী অহানবা পাউজেল শন্দোকখিবা সরনাথ অসি মহাক্কী কর্মভুমিনি। সরকারগী থবকশিং শুদবা মতমদা, মহাক লাই খুরুম্বা চৎপা মীওই অমা ওইনা বুদ্ধগী মফমশিংদা চৎখি অমসুং মহাক মালেম শীনবা থুংবদা লৈরিবা বুদ্ধগী মফমশিং চৎপা ফংলে।
প্রধান মন্ত্রীনা হায়খি মদুদি মহাক্না নেপালগী লুম্বীনিদা লৈবা শেংলবা ময়া দেবী লাইশঙদা খুরুমখিবা অদু অঙকপা অমনি। জপানগী তো-জি লাইশঙ অমসুং কিনকাকু-জি লাইশঙদা বুদ্ধগী পাউজেল মতম কয়াগী মতুংদা তাবগুম ফাওখি। বুদ্ধগী অরিবা লাইরিকশিং এসিয়া শীনবা থুংনা শন্দোরকখিবা চাইনাগী সিয়ানদা লৈবা জেন্ত ৱাইল্দ গুস পেগোদা চৎলুরে অমসুং মফম অদুদা ভারতকি থৌদাং হৌজিক ফাওবা নিংশিংলি। মোঙ্গালিয়াগী গান্দান মোনাষ্ট্রিদা চৎলুবদা, মীয়াম্না বুদ্ধগী ৱারিগা থম্মোয়গী ওইবা মরী অমা লৈনবা অদু উবা ফংখি। শ্রী লঙ্কাগী অনুরাধাপুরাদা লৈবা জয়া শ্রী মহাবোধি উবদা, নিংথৌরেল অসোক, ভিকখু মহিন্দা অমসুং শঙ্গমিত্রানা মরু হুল্লম্বা চৎনবী অদু উবা ফংখি। মহাক্না থাইলেন্দগী ৱাত ফো আমসুং শিঙ্গাপুরগী বুদ্ধ তুদ রেলিক তেম্পলদা চৎলুবদা, মহাক্না ভগবন বুদ্ধগী পাউতাকশিং মখা তানা খঙবা হেনগৎলকখি। মহাক্না চৎলুবা মফম খুদিংমক্ত, ভাগবন বুদ্ধগী পুৱারিগী খুদম অমা পুরক্নবা মহাক্না হোৎনখি। চাইনা, জপান, কোরিয়া অমসুং মোঙ্গোলিয়াদা চৎপদা বোধি উগী চারাশিং পুখি। এতোম বোম্বনা মাঙহনখ্রবা হিরোসিমা সরকারগী বোতানিকেল গার্দেন্দা বোধি উ অমা হৌবা মতমদা মীওইবা খুন্নাইগীদমক পীরিবা অকনবা পাউজেল অদু কনাগুম্বা অমনা খন্দুনা য়েংউ।
প্রধান মন্ত্রীনা হায়খি রাজনিতি, কুতনিতি অমসুং শেন্মিৎলোনগী খুৎথাংদা ভারতকা মরী লৈনবা নত্তে, ভগবন বুদ্ধগী শরুক য়ামিন্নরিবা হেরিতেচগী খুৎথাংদা অচেৎপা মরীশিং লৈনবনি। ৱাখল অমসুং থম্মোয়গী মরীশিং, লাইনিং অমসুং অধ্যতিক্কী খুৎথাংদা ভারতকা মরী লৈনরি। ভারতনা ভগবন বুদ্ধগী শেংলবা রেলিকশিংগী মপু ওইবতা নত্তনা, মুৎপা নাইদ্রবা চৎনবী অসি পুদুনা চৎলিবা অহিংবা অমসু ওইরি। পিপরহৱা, বাইসালি, দেবনি মোরি অমসুং নাগরজুনাকোন্দাদা ফংলিবা ভগবন বুদ্ধগী শেংলবা হকচাংগী শরুকশিং অসি বুদ্ধগী অহিংবা পাউজেলনি। সাইন্স অমসুং অধ্যতিক অনিমক্কী খুৎথাংদা মওং খুদিংমক্ত হায়রিবা শেংলবা ভগবন বুদ্ধগী শেংলবা হকচাংগী শরুকশিং ভারতনা ঙাক-শেল্লি।
প্রধান মন্ত্রীনা হায়খি মদুদি মালেম শীনবা থুংনা লৈরিবা বুদ্ধগা মরী লৈনবা অরিবা মফমশিং শেমগৎপদা ভারতনা লেপ্তনা মতেং পাংলি। য়ুহা হাবদা নেপালদা থায়নাগী ষ্টুপা অমা নিংখায়বদা, মসি অমুক হন্না শেমজিনবদা ভারতনা মতেং পাংখি। য়ুহা হাখ্রবা মতুংদা ম্যান্মারগী বাগান্দা ভারতনা পেগোদা ১১ হেন্না শেমজিনবগী থবক ভারতনা পায়খৎখি। মসিগুম্বা খুদম কয়া লৈরি। ভারত মনুংদসু, বুদ্ধগা মরী লৈনবা মফমশিং অমসুং ভগবন বুদ্ধগী শেংলবা হকচাংগী শরুকশিং থিবা অমসুং ঙাক-শেনবগী থবকশিং লেপ্না পায়খৎলি। মহাক্কী পোক্নফম লমদম ওইরিবা গুজরাতকী ভাদনগর অসি বুদ্ধিষ্ট চৎনবীগী অচৌবা মফম অমনি অমসুং মহাক্না চীফ মিনিষ্টর ওইরিঙৈদা মফম অদুদা বু্দ্ধিজমগা মরী লৈনবা রেলিক লিশিং কয়া পুথোকখি। মখোয় চেকশিন্না থম্নবা অমসুং মখোয়গা হৌজিক্কী মীরোলগা শম্নহন্নবা ঙসিগী সরকারনা থবক পায়খৎলি। মফম অদুদা চহি ২৫০০ রোমগী পুৱারি অমা উৎপা চিংলেম্নবা এক্সপেরিমেন্তেল ম্যুজিয়ম অমা শেমগৎলে। থা খরগী মমাংদা, জম্মু অমসুং কাস্মিরগী বরামুল্লাদা বুদ্ধ মতমগী অচৌবা মফম অমা ফংখ্রে অমসুং মসি ঙাক-শেনবগী থবক হৌজিক য়াংনা পায়খৎলি।
প্রধান মন্ত্রীনা হায়খি মদুদি হৌখিবা চহি ১০-১১ দা বুদ্ধগী মফমশিংগা মতমগা চুন্ননা শেমগৎনবা ভারতনা থবক পায়খৎলে। বোধ গয়াদা কনভেন্সন সেন্তর অমসুং মেদিতেসন সেন্তর অমা অমসুং এক্সপেরিয়েন্স সেন্তর অমা লিংখৎলে। সরনাথকী ধামেকতা লাইত অমসুং সাউন্দ সো অমা অমসুং বুদ্ধ থিম পার্ক অমা শেমগৎলে। শ্রবাষ্টি, কাবিলবাষ্টু অমসুং কুসিনগরদা অনৌবা মতমগী খুদোংচাবশিং শেমগৎলে। সাঞ্চি, নাগর্জুন সাগর অমসুং অমারাবতিদা লাই খুরুম্বা লাকপা মীওইশিংগী অনৌবা খুদোংচাবশিং শেমগৎলে। ভারত্ত লৈরিবা বুদ্ধগা মরী লৈনবা মফমশিং হেন্না চৎথোক-চৎশিন নুংঙাইনবা ঙসি বুদ্ধিষ্ট সর্কুইত অমা শেমগৎলে। মসিনা মালেম শীনবা থুংবগী ভক্তশিং অমসুং লাইফম কোইবা মীওইশিংদা লাইনিং অমসুং অধ্যাতিক্কী অঙকপা মহাও অমা পীরগনি।
প্রধান মন্ত্রীনা হায়খি মদুদি মহৌশাগী ওইবা মওং অমদা, তুংগী মীরোলশিংদা বুদ্ধগী পুৱারি য়ৌহন্নবা ভারতনা থবক পায়খৎলি। ৱাখল্লোন অসিনা লমজিংদুনা গ্লোবেল বুদ্ধিষ্ট সম্মিৎ অমসুং বাইসাখ অমসুং অশারা পুর্নিমাগুম্বা মালেমগী থৌরমশিং পাংথোকপনি। ভগবন বুদ্ধগী অভিধর্ম, মহাক্কী ৱাহৈশিং অমসুং মহাক্কী পাউতাকশিং পালি লোলদা লৈরি অমসুং মীচম মীয়াম্না পালি লোল খঙবা ঙম্নবা ভারতনা থবক পায়খৎলে। মরম অসিদগী পালি লোল অসি ক্লাসিকেল লোলগী থাক্ত পুখৎলে অমসুং মসিনা মসিগী অশেংবা মওংদা ধর্ম অসি খঙবা অমসুং শন্দোকা তাকপা ঙমগনি অমসুং বুদ্ধগী মরমদা থিজিনবা হেন্না ফগৎহনগনি।
প্রধান মন্ত্রীনা হায়খি ভগবন বুদ্ধগী শেংলবা হকচাংগী শরুকশিং অসি ভারতকী অরিবা লন্নি অমসুং চহি চা কয়া ঙাইরবা মতুংদা মখোয় লৈবাক অসিদা অমুক পুরক্লে। ভগবন বুদ্ধগী ৱাখলশিংগা শম্নবা ঙম্নবা লৈবাক শীনবা থুংবগী মীয়াম হায়রিবা ভগবন বুদ্ধগী শেংলবা হকচাংগী শরুকশিং য়েংগদবনি অমসুং মফম অসিদা অমুক্ত ওইরবসু লাক্কদবনি। স্কুলগী মহৈরোয়শিং, কোলেজগী মহৈরোয়শিং, নহারোলশিং অমসুং ইচানুপাশিং অমসুং ইচানুপীশিং শোইদনা একজিবিসন অসি য়েংগদবনি। ঐখোয়গী তুংগী মঙলানশিংগা লোয়ননা ফজরবা ঐখোয়গী হৌখ্রবা পুৱারিগা শম্ননবা একজিবিসন অমা অচৌবা পাম্বৈ অমনি। লৈবাক শীনবা থুংবগী মীয়াম একজিবিসন অসিদা শরুক য়াগদবনি অমসুং থৌরম অসি মাইপাক্নবা মহাক্না মীয়ামদা মহাক্কী য়াইফ পাউজেল পীখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা য়ুনিয়ন মিনিষ্টরশিং শ্রী গজেন্দ্র সিংহ সেখাৱাত, শ্রী কিরেন রিজিজু, শ্রী রামদাস অথাৱালে, শ্রী রাও ইন্দ্রজিত সিংহ, দিল্লিগী লেপ্তনেন্ত গভর্নর শ্রী বিজয় সক্সেনা য়াওখি।
নুঙগীৱারোল
এক্সপোজিসন অসিনা অহানবা ওইনা নেস্নেল ম্যুজিয়ম, ন্যু দিল্লী অমসুং ইন্দিয়ন ম্যুজিয়ম, কলকাতাগী কাংলুপশিংদা ঙাক-শেন্দুনা থম্লিবা পিপরহৱানা পুথোকপা অশেংবা হকচাংগী শরুকশিং অমসুং আর্কিওলোজিকেল মেতরিএলশিংগা লোয়ননা চহি চা অমা হেনবগী মতুংদা লৈবাক অসিদা অমুক হন্না পুরকখিবা পিপরহৱানা অশেংবা হকচাংগী শরুকশিং পুনশিল্লি।
১৮৯৮ দা ফংখিবা, পিপরহৱা অশেংবা হকচাংগী শরুকশিং অসি অঙনবা মতমগী বুদ্ধ ধর্মগী আর্কিওলোজিকেল ষ্টদীদা মরুওইবা মফম অমা লৌরি। মসি ভগবান বুদ্ধগা হকথেংননা মরী লৈনবা খ্বাইদগী অঙনবা অমসুং পুৱারীগী ওইবা মগুন লৈবা অশেংবা হকচাংগী শরুকশিংগী মনুংদা অমনি। পিপরহৱা মফমগা শাগোন্নবা আর্কিওলোজিকেল ইভিদেন্সশিংনা অরিবা মতমগী কপিলাবস্তু, ভগবান বুদ্ধনা পুম্নমক থাদোক্তুনা চৎত্রিঙৈ মমাংগী মহাক্কী পুন্সিগী অঙনবা মতম মফম অসিদা লৈরমখিবগীদমক পাক শন্না খঙনরিবা অসিগা মরী লৈনহল্লি।
এক্সপোজিসন অসিনা ভগবান বুদ্ধগী তম্বীরোলগা লোয়ননা ভারতকী অচেৎপা অমসুং লেপ্তনা লৈরক্লিবা সভ্যতাগী মরী অদু উৎলি অমসুং মসিনা ভারতকী ইনাক খুল্লবা স্পিরিচুএল অমসুং কলচরেল হেরিতেজ ঙাক্নবা প্রধান মন্ত্রীগী অচেৎপা ফিরেপ অদু উৎলি। হন্দক্তা মপান লৈবাক্তগী অমুক হন্না হল্লকখিবা অসি সরকারগী লেপ্পা লৈতবা খোঙথাং, ইন্সতিত্যুস্নেল কোওপরেসন অমসুং অনৌবা পব্লিক-প্রাইবেৎ পার্তনরশিপকী খুত্থাংদা ঙমখিবনি।
একজিবিসন অসি থিমগী মতুং ইন্না শীন-লাঙখি। মসিগী ময়াইদা সঞ্চি স্তুপাদগী ইথিল লৌদুনা শেমদোক্লবা ইন্তর্প্রিতিব মোদেল অমা লৈ, মসিদা নেস্নেল কলেক্সনশিংদগী অশেংবা হকচাংগী শরুকশিং অমসুং লৈবাক অসিদা অমুক হল্লকখিবা মনিশিংবু পুনশিল্লি। অতোপ্পা সেক্সনশিংগী মনুংদা পিপরহৱা রিভিজিতেদ, বুদ্ধকী পুন্সিগী ভিগনেৎশিং, ইন্তেঞ্জিবলল ইন দি তেঞ্জিবেল: দি এস্থেতিক লেঙ্গুৱেজ ওফ বুদ্ধিস্ত তীচিংস, এক্সপান্সন ওফ বুদ্ধিস্ত আর্ত এন্দ আইদিএলস বিয়োন্দ বোর্দরস, অমসুং রিপেত্রিএসন ওফ কলচরেল আর্তেফেক্তস: দি কন্তিন্যুয়িং এনদেবর য়াওরি।
মীয়াম্না হেন্না খঙবা ঙম্নবা, এক্সপোজিসন অসি ইম্মর্সিব ফিল্মশিং, দিজিতেল রিকনস্ত্রক্সনশিং, ইন্তর্প্রেতিব প্রোজেক্সনশিং, অমসুং মল্তিমেদিয়া প্রজেন্তেসনশিং য়াওনা মপুং ফানা ওদিও-ভিজুএল কম্পোনেন্ত অমনা সপ্পোর্ত তৌরি। হায়রিবা ইলিমেন্তশিং অসিনা ভগবান বুদ্ধগী পুন্সি, পিপরহৱাগী লৈহৌরিবা পোৎলমশিং ফংলকপা, লমদম কয়াদা মখোয়গী খোঙচৎ, অমসুং মখোয়গা মরী লৈনবা আর্তিস্তিক ত্রেদিসনশিংগী মতাংদা খঙবা ঙমহল্লি।
***
(रिलीज़ आईडी: 2211321)
आगंतुक पटल : 6
इस विज्ञप्ति को इन भाषाओं में पढ़ें:
English
,
Urdu
,
Marathi
,
हिन्दी
,
Bengali
,
Bengali-TR
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam