প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা অসামগী নামরুপতা অসাম ভেল্লি ফর্তিলাইজর এন্দ কেমিকেল কম্পেনি লিমিতেদকী এম্মোনিয়ন-য়ুরিয়া ফর্তিলাইজর প্রোজেক্কী উরেপ-উয়ুং তমখ্রে
অসাম চাউখৎপগী অনৌবা খোঙজেল অমদা চেল্লে: প্রধান মন্ত্রী
ঐখোয়গী সরকারনা মসিগী থবক খুদিংমক্কী ময়াইদা লৌমীশিংগী য়াইফনবনা ময়াইদা থম্লি: প্রধান মন্ত্রী
লৌউ-শিংউ চাউখৎনবা অমসুং লৌমীশিং শৌগৎনবা পি.এম ধন কৃষি য়োজনা অমসুং দলহান অত্মনির্ভরতা মিসনগুম্বা থবকশিং হৌদোক্লে: প্রধান মন্ত্রী
সবকা সাথ, সবকা বিকাসগী পান্দম্না লমজিংদুনা, ঐখোয়গী থবকশিংনা লায়রবশিংগী পুন্সি অওনবা পুরক্লে: প্রধান মন্ত্রী
प्रविष्टि तिथि:
21 DEC 2025 2:57PM by PIB Imphal
ঙসি প্রধান মন্ত্রী শ্রী নরেন্দ্র মোদীনা অসাম, দিব্রুগরগী নামরুপতা অসাম ভেল্লি ফর্তিলাইজর এন্দ কেমিকেল কম্পেনি লিমিতেদকী এম্মোনিয়ন-য়ুরিয়া ফর্তিলাইজর প্রোজেক্কী উরেপ-উয়ুং তমখ্রে। থৌরম অদুদা ৱা ঙাংবদা, প্রধান মন্ত্রীনা হায়খি মদুদি লমদম অসি চাউলুং সুখাপা অমসুং মহাবীর লচিত বোরফুকানগুম্বা শক্নাইরবা অথৌবশিংগী লমদম অমনি। ভিমবার দেয়ুরি, সহিত কুসাল কুনৱার, মোরান নিংথৌ বোদৌসা, মালাতি মেম, ইন্দিরা মিরি, শ্বরগদিও সর্বনান্দ সিংহ অমসুং সতি সধানিগী অচৌবা থৌদাশিং পনবা য়াই। থৌনা ফবা অমসুং কৎথোকপগী লমদম, উজানি অসামগী শেংলবা লৈহাওদা মহাক্না কোক নোঞ্জরি।
থৌরম অদুদা মীওই মশিং য়াম্না তিনখিবা অদু অপেনবা ফোঙদোক্লদুনা, প্রধান মন্ত্রীনা হায়খি ইমাশিং অমসুং ইচলশিং মশিং য়াম্না থৌরম অসিদা শরুক য়ারি অমসুং মখোয়না অখন্নবা নুংশিবা অমসুং বরশিং পুরক্লে। ইচল কয়া অসামগী চাগী বগানশিংগী নুংশিবা মনম পুদুনা লাক্লি। মসিগী নুংশিরবা মনম অসিনা অসামগা মহাক্কা লৈনবা মরীদা তোপ-তোপ্পা অমা ফাওহল্লে। থৌরম অদুদা শরুক য়াখিবশিংদা মহাক্না কোক নোনখি অমসুং মখোয়গী মীনুংশিংগীদমক তৌবীমল খঙবা উৎখি।
ঙসি অসি অসাম অমসুং অৱাং-নোংপোক্কী পুৱারি ওইরবা নুমিৎ অমনি হায়না ফোঙদোক্লদুনা, প্রধান মন্ত্রীনা হায়খি লমদম অসিদা উদ্যোগ চাউখৎপগী অনৌবা তাঙ্কক অমা হৌবগা লোয়ননা নামরুপ অমসুং দিব্রুগরগী মতম কয়াগী মঙদুনা লাক্লবা মঙলান মঙফাওনরে। ঙাইহাক্কী মমাঙদা মহাক্না অম্মোনিয়া-য়ুরিয়া ফর্তিলাইজর প্লান্তগী উরেপ-উয়ুং তমখ্রে অমসুং দিব্রুগরদা থুংলদ্রিঙৈদা, গুৱাহাতি এয়রপোর্ততা অনৌবা তর্মিনেল শঙ্গাখ্রে। হৌজিক অসাম চাউখৎপগী অনৌবা খোঙজেল অমদা চেল্লে হায়না মীওই খুদিংমক্না হায়নরে। ঙসি উরিবা অসি অহৌবা খক্তনি অমসুং অসাম মখা তানা চাউখৎলক্কনি। অহোম লৈবাক্কী মতমদা অসামনা লৌখিবা থৌদাং কাউদ্রি অমসুং বিকসিত ভারত অমদা, অসামনা চপ মান্নবা মপাঙ্গল কনবা থৌদাং অমা লৌগনি। অনৌবা উদ্যোগশিং শেমগৎপা হৌরে, মতমগী অনৌবা ইনফ্রাষ্ট্রকচরশিং শেমগৎলি, সেমিকন্দক্তর শারে, লৌউ-শিংউগী অনৌবা খুদোংচাবশিং লৈরে, চা বগানশিং অমসুং মখোয়গী শিন্মীশিং চাউখৎলে অমসুং তুরিজমগী খুদোংচাবা হেনগৎলক্লি, হিরম খুদিংমক্ত অসাম চাউখৎলক্লি। অনৌবা ফর্তিলাইজর প্লান্তগী প্রধান মন্ত্রীনা মহাক্কী য়াইফ পাউজেল পীখি অমসুং গুৱাহাতি এয়রপোর্তকী অনৌবা তর্মিনেলগীদমক মীয়ামদা হরাওবা ফোঙদোকখি। মহাক্না হায়খি মদুদি কেন্দ্র অমসুং রাজ্যদা মখোয়গী সরকারশিং লৈরি অমসুং উদ্যোগ অমসুং লম্বী-থোঙ পুন্না চৎমিন্নদুনা অসামগী মঙলানশিং মঙফাওনহল্লে অমসুং অচৌবা মঙশিং মঙনবা নহারোলশিংদা ইথিল পীরে।
প্রধান মন্ত্রীনা হায়খি বিকসিত ভারত অমা শেমগৎপদা, লৈবাক অসিগী লৌমীশিং অমসুং চীঞ্জাক পুথোক্লিবশিংগী মরুওইবা থৌদাং অমা লৈরি। ঐখোয়গী সরকারনা মসিগী থবক খুদিংমক্কী ময়াইদা লৌমীশিংগী য়াইফনবনা ময়াইদা থম্লি অমসুং লৌমীশিংগী য়াইফনবা স্কিমশিং লৌমী খুদিংমক্ত ফংহল্লে। লৌউ-শিংউগী য়াইফনবা থবকশিং পায়খৎপগা লোয়ননা, লৌমীশিংদা লেপ্তনা হারশিং ফংহনবা অসি তঙাইফদে। তুংদা, অনৌবা য়ুরিয়া প্লান্ত অসিনা শোইদনা হার ফংহল্লগনি। ফর্তিকলাইজর প্রোজেক অসিদা লুপা করোর ১১,০০০ হেন্না থাদগনি, মসিনা চহি অমদা হার মেত্রিক তন লাখ ১২ হেন্না পুথোক্কনি। পুথোক্কদৌরিবা পোৎথোকশিংনা লমদম অসিগী ফংহনবগা লোয়ননা, য়াংনা ফংহগনি অমসুং পোৎথোক-পুশিনগী ভারা হন্থরগনি। নামরুপ য়ুনিত অসিনা অনৌবা থবক লিশিং কয়া অমসুং মশানা মশাবু থবক পীজনবা খুদোংচাবা কয়া পীরগনি। প্লান্ত অসিনা থবক হৌরকপদা, লমদম অসিগী মীওই কয়া থবক ফংলগনি। রিপ্যার, সপ্লাই অমসুং অতোপ্পা মরী লৈনবা থবকশিংনা নহারোলশিংদা থবক ফংনবগী খুদোংচাবসু পীরগনি।
প্রধান মন্ত্রীনা হায়খি মখোয়গী সরকার লাক্লবা মতম খক্তদা করিগী অসিগুম্বা লৌমীশিংগী য়াইফনবা থবকশিং পায়খৎলিবনো। মতম কয়াগী মমাঙদগী নামরুপ হারগী মফম অমা ওইদুনা লাক্লি অমসুং মফম অসিদা পুথোকপা হারনা অৱাং-নোংপোক্কী লৌবুকশিং ফগৎহল্লি অমসুং লৌমীশিংগী মহৈ-মরোংশিং ফহল্লি। লৈবাক অসিগী মফম কয়াদা হার ফংনদবা মতমদা, নামরুপ লৌমীশিংগী থাজবগী হৌরকফম অমা ওইখি। অদুবু, অরিবা প্লান্তশিংগী তেক্নোলোজি মতমগা চুনদ্রে অমসুং হৌখিবা সরকারশিংনা পুক্নিং চঙখিদে। মদুগী ফল ওইনা, নামরুপকী য়ুনিতি কয়া থবক লেপখি, অৱাং-নোংপোক্কী লৌমীশিং অৱাবা তাখি, মখোয়গী শেন্থোক হন্থখি অমসুং লৌ উবদা খুদোংচাদবা হেনগৎলকখি। মমাংগী লৈঙাক্কী অশোইবনা থোকহনবা খুদোংচাদবশিং ঙসিদি কেন্দ্র অমসুং রাজ্যগী মখোয়গী সরকারশিংনা কোকহল্লে। অসামগুম্না, অতোপ্পা রাজ্যশিংগী হারগী ফেক্তরি কয়াসু থবক লেপ্লে। মতম অদুদা লৌমীশিংনা খুদোংচাদবা কয়া মায়োক্নখি, য়ুরিয়া ফংনবা মখোয়গী পরেং শাংনা লেপখি, দুকানশিংদা পুলিস ঙাকখি অমসুং লৌমীশিং লিচৈনা কনখি। হায়রিবা ফিবমশিং অসি ওপোজিসন্না ফিবম হেন্না শোকচিনহনখি অমসুং হৌজিক পাল্লিবা সরকারনা মখোয়গী ফিবম ফগৎহল্লে। মমাঙগী সরকারশিংগী মতমদা য়ুরিয়া ফেক্তরিশিং থিংজিনখি, হৌজিক্কী সরকারনা গোরাখপুর, সিনদ্রি, বরাওনি অমসুং রামাগুন্দামদা প্লান্তশিং থবক হৌরে। হিরম অসিদা লনাই কাংবুশু শরুক য়ারে। থবকশিং অসিগী ফল ওইনা, য়ুরিয়াগী লমদা ভারত মশাগী ওক্নবগী পুথোকচবগী মাইকৈদা চঙশিল্লি।
প্রধান মন্ত্রীনা হায়খি ২০১৪ দা লৈবাক অসিনা য়ুরিয়া মেত্রিক তন লাখ ২২৫ খক পুথোকখি, ঙসিনা মেত্রিক তন ৩০৬ রোম য়ৌরে। চহি অমদা ভারতনা য়ুরিয়া মেত্রিক তন লাখ ৩৮০ রোম দরকার ওই অমসুং অৱাৎপা অসি মেনখৎনবা সরকারনা য়াংনা থবক পায়খৎলি। লৌমীশিংগী য়াইফনবা সরকারনা থৱায় য়াওনা হোৎনরি। মপান লৈবাকশিংদগী মমল ৱাংনা য়ুরিয়া পুশিল্লক্লবা ফাওবদা মসিগী অৱাবা লৌমীশিংদা ফংহন্দে, মখোয়না সরকারনা সবসিদিশিংগী খুৎথাংদা অহেনবা শেনফম পুথোক্লি। ভারতকী লৌমীশিংনা য়ুরিয়া বেগ অমদা লুপা ৩০০ দা ফংলি, অদুগা সরকারনা বেগ অদুগী মমল অতোপ্পা লৈবাকশিংদা লুপা ৩০০০ রোমদা পীরি। লৌমীশিংগী শেন-থুমগী অৱাবা কোক্নবা অৱাৎপা শেনফম অদু মখোয়গী সরকারনা পুথোকপনি। য়ুরিয়া অমসুং অতোপ্পা হারশিং চাং চানা চাইদুনা লৌমীশিংগী লৈবাক-লৈহাও কনগদবনি।
প্রধান মন্ত্রীনা হায়খি মদুদি ঙসিদি, মরুদগী হৌরগা কৈথেল ফাওবদা, মখোয়গী সরকারনা লৌমীশিংগীদমক লেপ্লি। লৌ উনবগী শেনফম লৌমীশিংগী একাউন্তশিংদা হকথেংননা হাপচিল্লে, মসিনা লৌমীশিংগী লোন লৌনবা কোইচেন চেল্লরোই। হৌজিক ফাওবদা, পি.এম কিষান সম্মান নিধিগী মখাদা লৌমীশিংগী একাউন্তশিংদা লুপা করোর লাখ ৪ রোম হাপখ্রে। চহি অসি খক্তদা, লৌমীশিংগী মতেং পাংনবা লুপা করোর ৩৫,০০০ গী স্কিম অসি হৌদোক্লে। পি.এম ধন ধন্যা কৃষি য়োজনা অমসুং দলহান অত্মনির্ভরত মিসন্না মখা তানা লৌউ-শিংউ চাউখৎহনগনি।
লৌমীশিংগী দরকার ওইবা খুদিংমক ৱাখলদা থমদুনা সরকারনা থবক পায়খৎলি হায়না ফোঙদোক্লদুনা, প্রধান মন্ত্রীনা হায়খি অকনবা নোংজু-নুংশানা মরম ওইদুনা মহৈ-মরোংশিং মাঙহনবা মতমদা, ক্রোপ ইন্সুরেন্স স্কিমগী খুৎথাংদা লৌমীশিংঈ মতেং পাংলি। লৌমীশিংনা মখোয়গী পোৎথোক্কী চুনবা মমল ফংনবা পোৎথোকশিং লৈশিনবগী থবকশিং ফগৎহল্লে। লৌমীশিংগী ফিবম ফগৎলকপা মতমদা লৈবাক অসি চাউখৎকনি হায়না সরকারনা থাজৈ অমসুং মসিগীদমক পায়খৎপা য়াবা থবকশিং পায়খৎলে।
প্রধান মন্ত্রীনা হায়খি কেন্দ্রদা সরকার শেম্লবা মতুংদা, শা-ষন লোইবা লৌমীশিং অমসুং ঙামীশিংসু কিষান ক্রেদিৎ কার্দকী খুদোংচাবা ফংহল্লে অমসুং মখোয় মসিদগী কান্নবা য়াম্না ফংলে। চহি অসিদা লৌমীশিংনা কিষান ক্রেদিৎ কার্দতগী লুপা করোর লাখ ১০ ফংলে। বাইও-ফর্তিলাইজরশিংদা জি.এস.তি হন্থবগী কান্নবশিং লৌমীশিংনা ফংলে। মখোয়গী সরকারনা নেচরেল ফার্মিংগী নেসনেল মিসন হৌদোক্লে অমসুং লৌমীশিংগী পুক্নিং থৌগৎলে। হন্দক লৈবাক শীনবা থুংনা ফার্মর প্রদুসর ওর্গনাইজেসন ১০,০০০ লিংখৎলে। অৱাং-নোংপোক্ত অখন্নবা মীৎয়েং থমদুনা, সরকারনা ওইল প্লামগা মরী লৈনবা মিসন অমা হৌদোক্লে, মসিনা ভারতনা মশাগী ওক্নবা অচাথাউ পুথোকপা খক নত্তনা লমদম অসিগী লৌমীশিংগী শেন্থোক হেনগৎহনগনি।
প্রধান মন্ত্রীনা হায়খি অসামগী চাগী শিন্মী লাখ ৭.৫ রোমগী জন ধন একাউন্তশিং হাংদোক্নবা মখোয়গী সরকারনা মতেং পাংখি। বেঙ্কগা শম্নবদগী, হায়রিবা শিন্মীশিং অসি হৌজিক মখোয়গী একাউন্তশিংদা হকথেংননা শেন হাপচিনবগী কান্নবশিং ফংলে। চা বগানগী লমদমশিংদা স্কুলশিং, লম্বীশিং, মৈ, ঈশিং অমসুং হোস্পিতালশিংগী খুদোংচাবশিং সরকারনা শেমগৎলে। সবকা সাথ, সবকা বিকাসগী পান্দম্না লমজিংদুনা, ঐখোয়গী থবকশিংনা লায়রবশিংগী পুন্সি অওনবা পুরক্লে। হায়রিবা থবকশিং অসিদগী হৌখিবা চহি ১১ দা, লৈবাক অসিদা মীওই করোর ২৫ লায়রবা কোক্লে অমসুং নিও-মিদল ক্লাম অমা থোক্লক্লে। চহি খর অসিদা লেপতনা লায়রবা ইমুংশিংগী হিংবগী থাক ৱাংখৎলকপদগী মসি ওইথোকপনি।
প্রধান মন্ত্রীনা হায়খি ভারত্ত অওনবা লাকপগী ফিবমশিং উৎপা অনৌবা দেতাশিং উবা ফংলে। মমাংদা, খুঙ্গংশিংদা খ্বাইদগী লায়রবা ইমুংশিংগী মনুংদা, ইমুং ১০ গী মনুংদা ইমুং অমা বাইক লৈরমখি, অদুবু হৌজিক খুঙ্গংশিংদা ইমুং তঙ্খায় অমরোম বাইক অমা নত্ত্রগা কার অমা লৈরে। য়ুমথোঙ খুদিংমক্ত মোবাইল ফোনশিং লৈরে অমসুং মতম অমদা অকে-অমৌ ওইনা লৌনরম্বা, রেফ্রিজেরেতরশিংগুম্বা পোৎলমশিং, হৌজিক পাক-শন্না শীজিন্নরে, খুঙ্গংগী চাকশঙশিং ফাওবদা লৈরে। স্মার্দফোনশিং পায়নরবসু, খুঙ্গংশিংদা তেলিবিজন লৈবা মশিং হেনগৎলক্লি। হায়রিবা অহোংবশিং অসি মখোয় মশানা ওইহনবা নত্তে, লৈবাক অসিগী লায়রবশিং ফিবম ফগৎলকপদগী ওইরকপনি অমসুং মনুং-হুঞ্জিনবা মফমশিংদা লৈবা মীওইশিং ফাওবা হৌজিক চাউখৎপগী কান্নবা ফংলে।
প্রধান মন্ত্রীনা হায়খি মদুদি কেন্দ্র অমসুং রাজ্যগী মখোয়গী সরকারশিং অসি লায়রবা, ত্রাইবেলশিং, নহারোল অমসুং নুপীশিংগীনি অমসুং অসাম অমসুং অৱাং-নোংপোক্কী চহি কয়াগী ইরাং লোইশিন্নবা থবক পায়খৎলি। মতম পুম্নমক্ত সরকারনা অসামগী শক্তম অমসুং নাৎ মরুওইনা লৌরি, মফম খুদিংমক্ত অসামগী চাউথোকচবগী খুদমশিং উবা ফংলি। মরম অসিদগী সরকারনা মহাবীর লচিত বোরফুকানগী ফিত ১২৫ ৱাংবা মীতম অমা শারে, ভুপেন হজারিকাগী চহি ১০০শুবা মপোক কুমওন পাংথোক্লে অমসুং অসামগী কলা, ক্রাফশিং অমসুং গামোসা মালেমদা মশক তাক্লে। নুমিৎ খরগী মমাঙদা, রুসিয়াগী রাষ্ট্রপতি ব্লাদিমির পুতিন দিল্লিদা লাকপদা, মহাক্কী মফমদা চাউথোকচবগা লোয়ননা অসামগী চা খুদোল ওইনা পীখ্রে।
প্রধান মন্ত্রীনা মখা তানা হায়খি অসামগী ইকায়খুম্নবা হেনগৎহন্নবা থবক খুদিংমক মরুওইনা লৌরি। মখোয়না অসিগুম্বা থবক পায়খৎলকপদা, মসিনা ওপোজিসনদা য়াম্না নুংঙাইতবা থোকহল্লে। সরকার অসিনা ভুপেন হজারিকাদা ভারত রত্ন পীবা মতমদা, মসি ওপোজিসন্না য়েৎখি, ওপোজিসনগী নেসনেল প্রসিদেন্তনা হায়খি, ‘ মোদীনা শৈশকপশিং অমসুং পর্ফোমরশিংদা ভারত রত্ন পীরে’। অসামদা সেমিকন্দক্তর য়ুনিত অমা লিংখৎপা ফাওবদা, মখোয়না থিংখি। ওপোজিসন সরকারনা চহি কয়া চাগী থবক তৌরিবা ইনাওশিং অমসুং ইচলশিংদা লমগী হকশিংদা পীখিদে, মখোয়গী সরকার লাকপা মতমদা মখোয়দা লমগী হকশিং ফংহল্লে অমসুং ইকায়খুম্নবা পুন্সি অমা লৈরে। ওপোজিসন্না মখা তানা ভারতকী মায়োক্ত লৈবা ৱাখল্লোন চেল্লি, মখোয়গী ভোৎ ফংনবা অসামগী উমংশিং অমসুং লমশিংদা নারোন্দা চংলকপা বাংলাদেসমচাশিং লৈহন্নবা হোৎনরি।
প্রধান মন্ত্রীনা হায়খি ওপোজিসন্না অসাম, মসিগী মীয়াম, নত্ত্রগা মখোয়গী শক্তমগী খন্দে, অমসুং মখোয়না শক্তি অমসুং সরকার খক্তগী খল্লি। ওপোজিসন্না আইন্না য়াদবা নারোন্দ চঙলকপা বাংলদেসমচাশিং, মখোয় খুন্দা-লৈতাহনবা অমসুং মখা তানা মখোয় শৌগৎপা খক্তগী খল্লি। মরম অদুনা ভোত্তর লিষ্ট চুমথোকপদা ওপোজিসন্না য়েৎলিবনি। ওপোজিসনগী পেনহলবা অমসুং ভোৎ-বেঙ্ক রাজনিতিগী হুদগী অসাম ঙাকথোক্কদবনি। অসামগী শক্তম অমসুং ইকায়খুম্নবা ঙাক্নবা চুঙ্গোই অমগুম্না মখোয়গী দলনা লেপ্লি।
প্রধান মন্ত্রীনা হায়খি মদুদি বিকসিত ভারত অমা শেমগৎনবা নোংপোক ভারত অমসুং অৱাং-নোংপোক্কী থৌদাং মখা তানা হেনগৎলক্লি। নোংপোক ভারতনা লৈবাক অসি চাউখৎনবগী ইঞ্জিন ওইগনি। অনৌবা নামরুপ য়ুনিত অসি অওনবা অসিগী খুদম অমনি, মফম অসিদগী পুথোকপা হারনা অসামগী লৌবুকশিং খক্তগী নত্তনা বিহার, ঝারখন্দ, নোংচুপ বেঙ্গল অমসুং নোংপোক থংবা উত্তর প্রদেস য়ৌগনি। মসি লৈবাক অসিগী হার দরকার ওইবদা অৱাং-নোংপোক্কী মরুওইবা মতেং অমনি। নামরুপগুম্বা প্রোজেকশিংনা তুংদা অৱাং-নোংপোক্না অত্মনির্ভর ভারতকী মরুওইবা মফম অমা ওইরক্কনি অমসুং অষ্টলক্ষমী ওইনা লৈগনি হায়বগী উৎপনি। অনৌবা হারগী প্লান্ত অসিগীদমক মহাক অমুক হন্না থাগৎপা ফোঙদোকখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা অসামগী রাজ্যপাল শ্রী লাক্ষমন প্রসাদ অচার্য়া, অসামগী চীফ মিনিষ্টর শ্রী হিমান্ত বিশ্বা শর্মা, য়ুনিয়ন মিনিষ্টর শ্রী সর্বনন্দা সোনোৱাল য়াওখি।
নুঙগীৱারোল
ব্রাহ্মপুত্র ভেল্লি ফর্তিলাইজর কোর্পোরেসন লিমিতেদ (বি ভি এফ সি এল) গী হৌজিক লৈরিবা মফম অসিগী মনুংদা, অসামগী বিব্রুগরগী নামরুপদা অনৌবা ব্রাউনফিল্দ এম্মোনিয়ন-য়ুরিয়া ফর্তিলাইজর প্রোজেক্কী প্রধান মন্ত্রীনা উরেপ-উয়ুং তমখ্রে।
লৌমীশিং য়াইফনবা প্রধান মন্ত্রীনা পান্দমগী শরুক অমা ওইনা, লুপা করোর ১০,৬০০ হেনবগী প্রোজেক অসিনা অসাম অমসুং য়ুম্লোন্নবা রাজ্যশিংগী দরকার ওইবা হার ফংহনগনি, মপান্দগী পুশিল্লকপগী মখা পোনবা হন্থহনগনি, য়াম্লবা থবক ফংহনগনি অমসুং লমদম অসিগী শেন-থুম চাউখৎপা য়াংখৎহনগনি। মসি উদ্যোগ অমুক হিঙ্গৎহনবা অমসুং লৌমীশিংগী য়াইফনবা থবক পায়খৎপগী মরুওইবা অমনি।
***
(रिलीज़ आईडी: 2207268)
आगंतुक पटल : 5