శ్రీహరి, వసుదేవ సుతుడు, కంస, చాణూరులను సంహరించినవాడు, దేవకికి పరమానందాన్ని ప్రసాదించిన, జగద్గురువైన ఆ శ్రీకృష్ణునికి వందనం.

ఉత్తరప్రదేశ్ గౌరవ గవర్నర్ ఆనందీబెన్ పటేల్, ముఖ్యమంత్రి శ్రీ యోగి ఆదిత్యనాథ్,  గీతా ప్రెస్ కు చెందిన శ్రీ కేశోరామ్ అగర్వాల్, శ్రీ విష్ణు ప్రసాద్, పార్లమెంట్ సభ్యులు రవి కిషన్, ఇతర ప్రముఖులు, సోదరీ,సోదరులారా!

పవిత్ర శ్రావణ మాసం, దేవేంద్రుని ఆశీస్సులు, శివుని అవతారమైన గురు గోరఖ్‌నాథుని నివాసస్థలం, అనేక మంది సంతుల పుణ్యభూమి -  ఇదే గీతా ప్రెస్, గోరఖ్‌పూర్! సంతుల ఆశీర్వాదాలు సాకారమయ్యేటప్పుడు ఇలాంటి ఆనందకర క్షణాలను మనం అనుభూతి చెందుతాం. ఈసారి నా గోరఖ్‌పూర్ పర్యటన ‘వికాస్ భీ, విరాసత్ భీ’ (అభివృద్ధితో పాటు వారసత్వం) అనే విధానానికి ఒక విశిష్ట ఉదాహరణ. గీతా ప్రెస్ కార్యక్రమంలో భాగంగా చిత్రాలతో కూడిన శివ పురాణం, అలాగే నేపాలి భాషలోని శివ పురాణాన్ని ఆవిష్కరించే సౌభాగ్యం నాకు కలిగింది. ఈ కార్యక్రమం అనంతరం నేను గోరఖ్‌పూర్ రైల్వే స్టేషన్‌ను సందర్శిస్తాను.

గోరఖ్‌పూర్ రైల్వే స్టేషన్ ఆధునికీకరణ పనులు ఈ రోజు ప్రారంభమవుతున్నాయి. నేను సోషల్ మీడియాలో పంచుకున్న ఆ చిత్రాలను చూసి ప్రజలు ఆశ్చర్యపోతున్నారు. రైల్వే స్టేషన్లు ఈ విధంగా మార్పు చెందగలవని ప్రజలు ఎప్పుడూ ఊహించలేదు. అదే కార్యక్రమంలో, నేను గోరఖ్‌పూర్ నుంచి లక్నోకు వెళ్లే వందే భారత్ రైలును ప్రారంభిస్తాను. అలాగే, జోధ్‌పూర్, అహ్మదాబాద్ మధ్య నడిచే వందే భారత్ ఎక్స్‌ప్రెస్ రైలును కూడా అదే సమయంలో ప్రారంభిస్తారు. వందే భారత్ రైలు మన దేశంలోని మధ్యతరగతి ప్రజలకు సౌలభ్యం, సౌకర్యాల కొత్త అనుభూతిని అందించింది. ఒకప్పుడు రాజకీయ నాయకులు తమ నియోజకవర్గాల్లో ఒక నిర్దిష్ట రైలును ఆపాలని కోరుతూ లేఖలు రాసేవారు. ఈ రోజు, దేశం నలుమూలల నుంచి  నాయకులు తమ నియోజకవర్గాల్లో వందే భారత్ రైలును ప్రవేశపెట్టాలని కోరుతూ నాకు లేఖలు రాస్తున్నారు. వందే భారత్ ఒక ఆకర్షణగా మారింది.  గోరఖ్‌పూర్ ప్రజలకు,  మన దేశ ప్రజలకు ఈ కార్యక్రమాలన్నింటి సందర్భంగా నా హృదయపూర్వక శుభాకాంక్షలు.

మిత్రులారా,

గీతా ప్రెస్ ప్రపంచంలోనే తనదైన ప్రత్యేకత కలిగిన ఏకైక ప్రింటింగ్ ప్రెస్. ఇది కేవలం ఒక సంస్థ కాదు. సజీవమైన విశ్వాసం. లక్షలాది మంది ప్రజలకు గీతా ప్రెస్ కార్యాలయం ఒక దేవాలయంతో సమానం.  ఇది దాని పేరులోనే కాకుండా, దాని పనిలో కూడా భగవద్గీత సారాంశాన్ని కలిగి ఉంది. ఎక్కడ గీత ఉందో, అక్కడ కృష్ణుడు స్వయంగా ఉన్నాడు. ఎక్కడ కృష్ణుడు ఉన్నాడో, అక్కడ కరుణ, కర్మ ఉంటాయి. అక్కడ జ్ఞానోదయం, విజ్ఞానాన్వేషణ కూడా జరుగుతుంది. ఎందుకంటే గీతా శ్లోకంలో చెప్పినట్లుగా ‘వాసుదేవః సర్వం’ - అన్నీ వాసుదేవుడే (కృష్ణుడే). అన్నీ వాసుదేవుని నుంచే ఉద్భవించాయి, అన్నీ వాసుదేవునిలోనే లీనమై ఉన్నాయి.

సోదరీ సోదరులారా,

1923లో గీతా ప్రెస్ రూపంలో ఇక్కడ వెలిగిన ఆధ్యాత్మిక వెలుగు, నేడు మొత్తం మానవాళికి మార్గనిర్దేశం చేస్తోంది. ఈ మానవతా మిషన్ శతాబ్ది ఉత్సవాలకు మనం సాక్షులుగా ఉండటం అదృష్టం. ఈ చరిత్రాత్మక సందర్భంగా, మన ప్రభుత్వం గీతా ప్రెస్‌ను గాంధీ శాంతి బహుమతితో కూడా సత్కరించింది. గాంధీజీకి గీతా ప్రెస్‌తో లోతైన భావోద్వేగ అనుబంధం ఉండేది. ఒకప్పుడు, గాంధీజీ గీతా ప్రెస్ కోసం కల్యాణ్ పత్రిక ద్వారా రచనలు చేసేవారు. కల్యాణ్ పత్రికలో ఎటువంటి ప్రకటనలు ప్రచురించవద్దని సూచించింది గాంధీజీనే అని నాకు తెలియజేశారు.   నేటికీ, కల్యాణ్ పత్రిక గాంధీజీ సలహాను విశ్వసనీయంగా పాటిస్తోంది.  గీతా ప్రెస్‌కు ఈ రోజు ఈ పురస్కారం లభించడం నాకు సంతోషంగా ఉంది. ఇది దేశం గీతా ప్రెస్‌కు ఇచ్చిన గౌరవం, దాని సేవలకు గుర్తింపు, అలాగే వందేళ్ల వారసత్వానికి సమర్పించిన నివాళి. ఈ 100 సంవత్సరాలలో, గీతా ప్రెస్ కోట్లాది పుస్తకాలను ప్రచురించింది. కొన్ని అంచనాలు ఈ సంఖ్యను 70 కోట్లుగా, కొన్ని 80 కోట్లుగా, మరికొన్ని 90 కోట్లుగా పేర్కొంటున్నాయి! ఈ సంఖ్య ఎవరినైనా ఆశ్చర్యపరచగలదు. ఈ పుస్తకాలు వాటి విలువ కంటే తక్కువ ధరకు అమ్ముడై ప్రతి ఇంటికి చేరుతున్నాయి. ఈ విజ్ఞాన ప్రవాహం ద్వారా ఎంత మంది ఆధ్యాత్మిక, మేధో సంతృప్తిని పొంది ఉంటారో, సమాజం కోసం ఇది ఎంత మంది అంకితభావం గల పౌరులను తీర్చిదిద్దిందో మీరు ఊహించవచ్చు. ఎటువంటి ప్రచారం లేకుండా నిస్వార్థంగా ఈ ప్రయత్నానికి మద్దతు ఇచ్చిన ఆ మహానుభావులను నేను అభినందిస్తున్నాను. ఈ సందర్భంగా సేథ్ జయదయాళ్ గోయెంకా,  భాయిజీ హనుమాన్ ప్రసాద్ పొద్దార్ వంటి ప్రముఖులకు కూడా నా గౌరవాన్ని తెలియజేస్తున్నాను.

మిత్రులారా,

గీతా ప్రెస్ వంటి సంస్థ కేవలం మతం,  కర్మతో మాత్రమే అనుసంధానమై ఉండకుండా, ఒక జాతీయ స్వభావాన్ని కూడా కలిగి ఉంది. గీతా ప్రెస్ భారతదేశాన్ని ఏకం చేస్తోంది. భారత దేశ ఐక్యతను బలపరుస్తోంది. దేశవ్యాప్తంగా దీనికి 20 శాఖలు ఉన్నాయి.  దేశం ప్రతి మూలలోని రైల్వే స్టేషన్లలో గీతా ప్రెస్ స్టాళ్లను మనం చూస్తున్నాం. ఇది 15 భిన్నమైన భాషల్లో సుమారు 1600 ప్రచురణలను వెలువరిస్తోంది.  వివిధ భాషల ద్వారా భారతదేశ మౌలిక విలువలను ప్రజల వరకు తీసుకెళ్తోంది. ఒక విధంగా చెప్పాలంటే, గీతా ప్రెస్ ‘ఏక్ భారత్, శ్రేష్ఠ భారత్’ భావనకు ప్రతిరూపంగా నిలుస్తోంది.

మిత్రులారా,

భారత్ తన స్వాతంత్ర్యానికి 75 సంవత్సరాలు జరుపుకుంటున్న సమయంలో గీతా ప్రెస్ తన 100 ఏళ్ల ప్రయాణాన్ని పూర్తి చేసుకుంది. ఇలాంటి సమకాలిక సంఘటనలు యాదృచ్ఛికమైనవి కావు. 1947కి ముందే భారతదేశం తన పునరుజ్జీవనానికి వివిధ రంగాల్లో నిరంతర ప్రయత్నాలు చేసింది. భారత ఆత్మను మేల్కొలిపేందుకు అనేక సంస్థలు ఆవిర్భవించాయి. దీనివల్ల 1947 నాటికి మానసిక, మానసిక బానిసత్వపు సంకెళ్లను తెంచుకునేందుకు భారత్ పూర్తిగా సిద్ధంగా నిలిచింది. ఇందులో గీతా ప్రెస్ స్థాపన కీలక పాత్ర పోషించింది. వందేళ్ల క్రితం శతాబ్దాల పాటు కొనసాగిన పరాధీనత భారత చైతన్యాన్ని మసకబార్చింది. వందల సంవత్సరాల క్రితమే విదేశీ ఆక్రమణదారులు మన గ్రంథాలయాలను దగ్ధం చేసిన సంగతి మీకు తెలుసు. బ్రిటిష్ పాలన కాలంలో గురుకులాలు, గురు - శిష్య పరంపర దాదాపుగా నశించిపోయే స్థితికి చేరాయి. అటువంటి పరిస్థితుల్లో విజ్ఞానం, వారసత్వం అంతరించిపోయే అంచున నిలవడం సహజమే. మన పూజ్య గ్రంథాలు క్రమంగా కనుమరుగవడం ప్రారంభించాయి. అప్పట్లో భారతదేశంలో ఉన్న ముద్రణ యంత్రాలు అధిక ఖర్చుల కారణంగా సామాన్య ప్రజలకు అందుబాటులో లేవు. గీత, రామాయణం వంటి గ్రంథాల ఉనికి లేకుండా మన సమాజం ఎలా కొనసాగేదో ఒకసారి ఊహించండి? విలువలు, ఆదర్శాల మూలాలు ఎండిపోయినప్పుడు, సమాజ ప్రవాహం దానంతటదే స్తంభించిపోతుంది. కానీ మిత్రులారా, మనం ఒక విషయం గుర్తు చేసుకోవాలి. భారతదేశ శాశ్వత ప్రయాణంలో, ఎన్నో సందర్భాల్లో మనం మెరుగుపడిన, పరిపక్వత పొందిన స్థితికి చేరుకున్నాం. అన్యాయం, భయంకర పరిస్థితులు ఎన్నోసార్లు బలంగా ఏర్పడాయి.  సంక్షోభపు మేఘాలు సత్యాన్ని మసకబార్చాయి. కానీ ఆ సమయంలో, మనకు అత్యంత శక్తివంతమైన నమ్మకం శ్రీమద్భగవద్గీత నుంచే వచ్చింది. “యదా యదా హి ధర్మస్య గ్లానిర్భవతి భారతః అభ్యుత్థానమధర్మస్య తదా ఆత్మానం సృజామ్యహమ్.” అంటే, ధర్మం అణచివేతకు గురైనప్పుడు, అసత్యం అధికారం పొందినప్పుడు, భగవంతుడు స్వయంగా అవతరిస్తాడు.గీతలోని పదవ అధ్యాయం భగవంతుడు వివిధ రూపాలలో వ్యక్తమవుతాడని వెల్లడిస్తుంది. కొన్నిసార్లు సమాజానికి కొత్త దిశను చూపించడానికి సాధువులు వస్తారు. కొన్నిసార్లు మానవ విలువలు, ఆదర్శాలను పునరుద్ధరించడానికి గీతా ప్రెస్ వంటి సంస్థలు పుడతాయి. అందుకే, గీతా ప్రెస్ 1923లో తన పనిని ప్రారంభించినప్పుడు, అది భారతదేశంలో చైతన్యం, ఆధ్యాత్మిక చింతన ప్రవాహాన్ని వేగవంతం చేసింది.  గీత సహా మన పూజ్య గ్రంథాలు మళ్లీ ప్రతి ఇంటిలో ప్రతిధ్వనించడం ప్రారంభమయ్యాయి. భారతీయ హృదయం మళ్లీ ఉత్కంఠకు లోనయ్యింది. ఈ గ్రంథాలు కుటుంబ పరంపరలను జాగ్రత్తగా నిలుపుతూ, కొత్త తరాలకు మన పవిత్ర గ్రంథాలతో సంబంధం ఏర్పరచి, భవిష్యత్తు తరాలకు వెలుగు దారి చూపడం ప్రారంభించాయి.

మిత్రులారా,

లక్ష్యాలు పవిత్రంగా ఉండి, విలువలు స్వచ్ఛంగా ఉన్నప్పుడు, విజయం  పర్యాయపదంగా మారుతుందని గీతా ప్రెస్ రుజువు చేసింది. గీతా ప్రెస్ అనేది నిరంతరం సామాజిక విలువలను సుసంపన్నం చేస్తూ, ప్రజలకు కర్తవ్య మార్గాన్ని చూపించే సంస్థ.  గంగా నది శుభ్రత గురించి అయినా, యోగా శాస్త్రం అయినా, పతంజలి యోగ సూత్రాల ప్రచురణ అయినా, ఆయుర్వేదానికి సంబంధించిన 'ఆరోగ్య అంక్' అయినా, ప్రజలకు భారతీయ జీవన విధానాన్ని పరిచయం చేసే 'జీవనచర్య అంక్' అయినా, సమాజంలో సేవా ఆదర్శాలను బలోపేతం చేసే 'సేవా అంక్', 'దాన్ మహిమ' అయినా, ఈ ప్రయత్నాలన్నింటి వెనుక జాతి నిర్మాణ స్ఫూర్తి  ముడిపడి ఉంది.

మిత్రులారా,

సాధువుల తపస్సు ఎప్పుడూ వృధా కాదు.  వారి సంకల్పాలు ఎన్నటికీ వృథా కావు. ఈ సంకల్పాల కారణంగానే నేడు మన భారతదేశం ప్రతిరోజూ కొత్త విజయ శిఖరాలను అధిరోహిస్తోంది. నేను ఎర్రకోట నుంచి చెప్పాను, మీకు గుర్తుండే ఉంటుంది.  “బానిసత్వ మనస్తత్వం నుంచి విముక్తి పొంది, మన వారసత్వం పట్ల గర్వపడాల్సిన సమయం ఇది” అని ఎర్రకోట నుంచి చెప్పాను. అందుకే, ప్రారంభంలో కూడా, దేశం ఈ రోజు అభివృద్ధి,  వారసత్వం రెండింటితో ముందుకు సాగుతోందని చెప్పాను. భారత్ ఈ రోజు ఒకవైపు డిజిటల్ సాంకేతికతలో కొత్త రికార్డులను సృష్టిస్తోంది.  మరోవైపు, కాశీ విశ్వనాథ్ ధామ్ దివ్య రూపం శతాబ్దాల తరువాత దేశం ముందు సాక్షాత్కారం అవుతోంది. మనం ప్రపంచ స్థాయి మౌలిక సదుపాయాలను అభివృద్ధి చేస్తున్నాం. అదే సమయంలో, కేదార్‌నాథ్, మహాకాల్ మహాలోక్ వంటి పుణ్యక్షేత్రాల వైభవాన్ని మనం చూస్తున్నాం. అయోధ్యలో భవ్యమైన రామమందిరం కల శతాబ్దాల తర్వాత నెరవేరబోతోంది. స్వాతంత్ర్యం వచ్చి 75 సంవత్సరాలు దాటినా, మనం ఇప్పటికీ మన నావికాదళం పతాకంపై బానిసత్వ చిహ్నాలను రాజధాని ఢిల్లీలో, భారత పార్లమెంటు పక్కన, మనం ఆంగ్ల సంప్రదాయాలను అనుసరిస్తున్నాం. మనం వాటిని మార్చడానికి పూర్తి విశ్వాసంతో కృషి చేశాం. మన వారసత్వానికి, భారతీయ ఆలోచనలకు తగిన స్థానాన్ని ఇచ్చాం. అందుకే, ఇప్పుడు భారత నావికాదళం జెండా ఛత్రపతి శివాజీ మహారాజ్ కాలం నాటి చిహ్నాన్ని ప్రదర్శిస్తోంది. ఇప్పుడు బానిసత్వ కాలం నాటి రాజ్‌పథ్  కర్తవ్యపథ్‌గా మారి, కర్తవ్య స్ఫూర్తిని ప్రేరేపిస్తోంది. ఈ రోజు, దేశంలోని గిరిజన సంప్రదాయాన్ని గౌరవించడానికి దేశవ్యాప్తంగా గిరిజన స్వాతంత్ర్య సమరయోధుల మ్యూజియంలను ఏర్పాటు చేస్తున్నారు.  మన దేవాలయాల నుంచి అపహరణకు గురై బయటకు దేశం బయటకు వెళ్లిన పురాతన పవిత్ర విగ్రహాలు కూడా మన దేవాలయాలకు తిరిగి వస్తున్నాయి. మన ఋషులు, మునులు మనకు ఇచ్చిన అభివృద్ధి చెందిన, ఆధ్యాత్మిక భారతదేశం ఆలోచన ఈ రోజు సార్ధకమవుతోంది.  మన సాధువులు, ఋషులు, సంతుల ఆధ్యాత్మిక సాధన భారత సర్వతోముఖాభివృద్ధికి నిరంతరం శక్తిని అందిస్తాయని నేను నమ్ముతున్నాను. మనం నవభారతాన్ని నిర్మిస్తాం. ప్రపంచ సంక్షేమం అనే మన దృష్టిని విజయవంతం చేస్తాం. ఈ పవిత్రమైన సందర్భంగా మీ మధ్యకు వచ్చే అవకాశాన్ని మీరందరూ నాకు ఇచ్చారు. ఈ పవిత్రమైన కార్యంలో కొన్ని క్షణాలు గడపడం నా అదృష్టం. మరోసారి మీ అందరికీ హృదయపూర్వక ధన్యవాదాలు.  హృదయపూర్వక శుభాకాంక్షలు. 

గమనిక: ఇది ప్రధానమంత్రి హిందీ ప్రసంగానికి సుమారు తెలుగు అనువాదం.

***