బోర్డు, అడ్వైజరీ ప్యానెళ్లలో మూడో వంతు మహిళా సభ్యులను తప్పనిసరి చేసిన సినిమాటోగ్రాఫ్ (ధ్రువీకరణ) నియమాలు-2024 ప్రకారం మహిళా ప్రాతినిధ్యానికి తగిన ప్రాధాన్యం లభించింది. అలాగే, నిబంధనలకు అనుగుణంగా చిత్రాలను సమీక్షించేందుకు ఏర్పాటు చేసిన సమీక్షా (ఎగ్జామినింగ్) కమిటీ, పునఃసమీక్షా (రివైజింగ్) కమిటీల్లో 50 శాతం మహిళలు ఉండేలా సీబీఎఫ్‌సీ చర్యలు తీసుకుంది.

సినిమాటోగ్రాఫ్ చట్టం - 1952లో పేర్కొన్న నియమాలకు అనుగుణంగా బోర్డు సభ్యుల పదవీకాలం నిర్ణయిస్తారు. సినిమాటోగ్రాఫ్ (ధ్రువీకరణ) నియమాలు 2024 – ప్రకారం కేంద్ర ప్రభుత్వ అభీష్టం మేరకు మూడేళ్ల పదవీకాలాన్ని మించకుండా బోర్డు సభ్యులు పనిచేస్తారు. అయితే వారి పదవీకాలం.. నూతన సభ్యుల నియామకం పూర్తయ్యే వరకు కొనసాగుతుంది.

బోర్డు సభ్యులతో సీబీఎఫ్‌సీ ఆన్‌లైన్ సమావేశాలు నిర్వహిస్తుంది. 2017 నుంచీ ఈ-సినీప్రమాణ్ ఆన్‌లైన్ సర్టిఫికేషన్ వేదిక ద్వారా ధ్రువీకరణకు సంబంధించిన ప్రక్రియలు డిజిటల్ రూపంలోకి మారాయి. దీని ద్వారా దరఖాస్తుల సమర్పణ, విశ్లేషణ, ఆమోదం అన్నీ ఆన్‌లైన్‌లోనే జరుగుతున్నాయి. దరఖాస్తు చేసుకున్న సినిమాల సంఖ్య ఆధారంగా సకాలంలో ధ్రువీకరణ పూర్తయ్యేలా ఎగ్జామినింగ్, రివైజింగ్ కమిటీలు సమావేశాలు నిర్వహిస్తాయి.

సినిమా పేరు, భాష, వ్యవధి, దరఖాస్తుదారుని పేరు, నిర్మాత పేరు, సారాంశం, నటీనటులు/నిపుణుల వివరాలు వంటి ధ్రువీకరణకు సంబంధించిన ప్రాథమిక సమాచారం.. క్యూఆర్ కోడ్ ద్వారా ప్రజలకు అందుబాటులో ఉంటుంది. డేటా భద్రతకు, వ్యవస్థ విశ్వసనీయతకు హామీ ఇస్తూ, గోప్యతా నియమాలకు అనుగుణంగా.. క్యూఆర్‌ కోడ్ రూపంలో ఈ-సినీప్రమాణ్ పోర్టల్లో అందుబాటులో ఉంచే సమాచారంలో మార్పులు జరిగాయి. అయితే సర్టిఫికేషన్‌కు సంబంధించి ప్రజలకు అందించే సమాచారంపై ఈ మార్పులు ఎలాంటి ప్రభావం చూపించవు.

ప్రతి ఏటా వార్షిక నివేదికను కేంద్ర సమాచార, ప్రసార మంత్రిత్వ శాఖకు సీబీఎఫ్‌సీ సమర్పిస్తుంది. ఈ సమాచారాన్ని మంత్రిత్వ శాఖకు చెందిన పూర్తి వార్షిక నివేదికలో పొందుపరుస్తారు. క్రమం తప్పకుండా ప్రచురించే ఈ నివేదిక మంత్రిత్వ శాఖ వెబ్‌సైట్లో అందుబాటులో ఉంటుంది.

రాజ్యసభలో శ్రీమతి సాగరికా ఘోష్ అడిగిన ప్రశ్నకు స్పందనగా కేంద్ర సమాచార, ప్రసారాలు, పార్లమెంటరీ వ్యవహారాల సహాయ మంత్రి డాక్టర్ ఎల్.మురుగన్ ఈ సమాచారాన్ని లిఖితపూర్వకంగా అందించారు.

***