సమాచార, ప్రసార మంత్రిత్వ శాఖ
తప్పుడు వార్తలు ప్రజాస్వామ్యానికి ముప్పు: సమాచార, ప్రసార శాఖ మంత్రి అశ్వినీ వైష్ణవ్
· తప్పుడు వార్తలు, ఏఐ ఆధారిత డీప్ఫేక్లను అరికట్టేలా చట్టపరమైన నిబంధనల బలోపేతానికి కట్టుబడి ఉన్న ప్రభుత్వం
प्रविष्टि तिथि:
03 DEC 2025 2:58PM by PIB Hyderabad
సామాజిక మాధ్యమాలు, తప్పుడు వార్తలకు సంబంధించి లేవనెత్తిన అంశం చాలా తీవ్రమైన విషయమని కేంద్ర సమాచార, ప్రసార శాఖ మంత్రి శ్రీ అశ్వినీ వైష్ణవ్ లోకసభకు తెలిపారు. తప్పుడు వార్తలు భారత ప్రజాస్వామ్యానికి ముప్పుగా పరిణమించాయన్న ఆయన.. సామాజిక మాధ్యమ వేదికలు, తప్పుడు వార్తలు, ఏఐ ఆధారిత డీప్ ఫేక్లపై కఠిన చర్యలు తీసుకోవడం అత్యావశ్యకమని స్పష్టం చేశారు. సామాజిక మాధ్యమాలను ఉపయోగించే విధానం... భారత రాజ్యాంగాన్ని అనుసరించడానికి లేదా పార్లమెంటు రూపొందించిన చట్టాలను పాటించడానికి ఇష్టపడని కొన్ని వ్యవస్థలను సృష్టించిందని ఆయన అభిప్రాయపడ్డారు. నిశ్చితమైన చర్యలు తీసుకోవాల్సిన, కఠిన నిబంధనలను రూపొందించాల్సిన ఆవశ్యకత ఉందని ఆయన తేల్చి చెప్పారు.
పార్లమెంటులో ఒక ప్రశ్నకు సమాధానమిస్తూ.. ఇటీవల కొత్త నియమాలను ప్రవేశపెట్టామని, 36 గంటల్లోపు తొలగించాలన్న నిబంధన కూడా అందులో ఉందని శ్రీ వైష్ణవ్ తెలిపారు. ఏఐ ఆధారిత డీప్ఫేక్లను గుర్తించి, తగిన చర్యలు తీసుకోవడానికి ముసాయిదా నియమాన్ని కూడా ప్రచురించామని, ప్రస్తుతం దీనిపై సంప్రదింపులు జరుగుతున్నాయని తెలిపారు. పార్లమెంటరీ కమిటీ కృషిని మంత్రి అభినందించారు. చట్టపరమైన ఏర్పాట్లను బలోపేతం చేసేందుకు కీలక సిఫార్సులతో కూడిన నివేదికను సమర్పించిన శ్రీ నిశికాంత్ దూబేకు, ఇతర సభ్యులందరికీ కృతజ్ఞతలు తెలిపారు.
తప్పుడు వార్తలు, సామాజిక మాధ్యమాలకు సంబంధించిన విషయాల్లో.. వాక్ స్వాతంత్య్రానికి, మన ప్రజాస్వామ్య రక్షణకు మధ్య సునిశిత సమతౌల్యం ఒక అంశంగా ఉందని మంత్రి పేర్కొన్నారు. ఈ సమతౌల్యం కోసం ప్రభుత్వం పూర్తి జాగరూకతతో కృషి చేస్తోందన్నారు. ప్రధానమంత్రి శ్రీ నరేంద్ర మోదీ నాయకత్వంలో డిజిటల్ ఇండియా కార్యక్రమం విప్లవాత్మక మార్పులను తెచ్చిందని, సాంకేతికతను అందరికీ అందుబాటులోకి తెచ్చిందని ఆయన వివరించారు. దాని సానుకూల ఫలితాలను కూడా తప్పక గుర్తించాలన్నారు. సామాజిక మాధ్యమాలు ప్రతి పౌరుడికీ ఓ వేదికను కూడా అందించాయని ఆయన అన్నారు. ఈ అంశాలన్నింటినీ పరిగణనలోకి తీసుకుని.. సమాజానికి పునాదిగా నిలిచే సంస్థలను, విశ్వాసాన్ని బలోపేతం చేయడానికి ప్రభుత్వం కృషి చేస్తోంది.
***
(रिलीज़ आईडी: 2199165)
आगंतुक पटल : 6
इस विज्ञप्ति को इन भाषाओं में पढ़ें:
English
,
Khasi
,
Urdu
,
Marathi
,
हिन्दी
,
Bengali-TR
,
Bengali
,
Assamese
,
Punjabi
,
Gujarati
,
Kannada
,
Malayalam