U Myntri Sorkar Pdeng ba dei khmih ia ka Tnad Information and Broadcasting u Ashwini Vaishnaw u la pyntip sha ka iing dorbar thawain Lok Sabha ba ka mat ba la wanrah ha kaba iadei bad ka social media bad ki khubor lamler ka dei ka mat kaba khia bha. U la ong ba ki khubor lamler ki buh jingma ïa ka synshar paidbah jong ka India bad u la ban jur ïa ka jingdonkam ia ka sienjam kaba tyngeh ha kaba iadei bad ki rynsan social media, ki khubor lamler bad ki deepfake ba la pynmih da ka AI. U la ïohi ba ka rukom pyndonkam ïa ki social media ka la wanrah ïa katto katne ki jinglong jingman ki bym kwah ban bud ïa ka Riti Synshar jong ka ri India ne ban bud ïa ki aiñ ba la thaw da ka Parliament. U la ban jur ia ka jingdonkam kyrkieh ban shim ia ka sienjam ba tyngeh bad ban thaw ia ki kyndon kiba kham khlain.

Haba jubab ia ka jingkylli ha Parliament u Vaishnaw u la pyntip ba dang shen la wanrah ia ki kyndon ba thymmai, ba kynthup ia ka kyndon kaba bthah ban weng noh hapoh laiphew hynriew kynta. La pynmih ruh ia ka kyndon ba la shna na ka bynta ban ithuh bad shim ia ka sienjam kaba donkam halor ki deepfake ba la pynmih da ka AI bad ki jingiamir jingmut halor kane ki dang iaid mynta. U Myntri u la iaroh ia ka jingtrei jong ka Parliamentary Committee bad ai khublei ia u Nishikant Dubey bad ia baroh ki dkhot kiba la ai ia ka kaiphod kaba bniah kaba don ia ki jingai jingmut ba kongsan na ka bynta ban pynkhlain ia ka ain.

U Myntri u la ong ba ki mat kiba ïadei bad ki khubor thok bad ki social media ki kynthup ïa ka jingïaryngkat hapdeng ka jinglaitluid ban kren bad ka jingïada ïa ka synshar paidbah jong ngi bad ka Sorkar ka trei da ka jingsngewthuh kaba pura ïa kane ka jingïahap. U la bna jur ruh ba hapoh ka jingïalam jong u Myntri Rangbahduh ka ri u Narendra Modi, ka sienjam Digital India ka la wanrah ïa ka jingkylla kaba khraw bad ka teknoloji kaba baroh ki lah ban ioh bynta, kaba dei ban pdiang ïa ki jingktah kiba bha jong ka. U la ong ruh ba ka Social media ka la ai ruh ka rynsan ïa man la uwei pa uwei u nongshong shnong. Da kaba shim khia ia kine ki bynta baroh, ka Sorkar ka trei ban pynkhlain ia ki jaka treikam bad ka jingshaniah kaba long ka nongrim jong ka imlang sahlang.

*****