২০২৫গী জুলাই ২৩-২৪দা য়ুনাইতেদ কিংদমদা চৎখিবা মহাক্কী ওফিসিয়েল ওইবা খোঙচৎ অমগী মনুংদা, প্রধান মন্ত্রী, শ্রী নরেন্দ্র মোদীনা ঙসি য়ুনাইতেদ কিংদমগী প্রধান মন্ত্রী, রাইত ওনরেবল সর কীর স্তারমরগা উনখ্রে। য়ুনাইতেদ কিংদমগী বকিংহামশায়রগী চেকর্সতা লৈবা য়ু.কে.গী প্রধান মন্ত্রীগী লৈফমদা য়ৌরকপদা প্রধান মন্ত্রী স্তার্মারনা মহাকপু নুংশি-চান্ননা তরাম্না ওকখি। লুচিংবা অনিমক্না মশা-মশা উনদুনা ৱারী শানখি অমসুং দেলিগেসনগী থাক্তা ৱারী শানখি।

প্রধান মন্ত্রী অনিমক্না ভারত-য়ু.কে. কম্প্রিহেন্সিব ইকোনোমিক এন্দ ত্রেদ এগ্রীমেন্ত (CETA)গী খুৎয়েক পীনবগীদমক নুংঙাইবা ফোংদোকখি। মসিনা কম্প্রিহেন্সিব স্ত্রেতেজিক পার্তনরশিপ অসিবু অনৌবা থাক অমদা পুখৎকনি। মসিনা নাকল অনিগী ত্রেদ, ইনভেস্তমেন্ত, ইকোনোমিক কোলাবোরেসন অমসুং ইকোনোমী অনিমক্তা থবক ফংহনবদা চাউনা মতেং পাংগনি। CETAগা লোইননা চৎনবা হৌগদবা দবল কন্ত্রিব্যুসন কনভেন্সনগী মতাংদা ৱারী শানবদা নাকল অনিমক্না য়ানখি। মসিনা কম্পিতিতিব ওইবা হেনগৎহন্দুনা অমসুং কম্মর্সিয়েল এন্তিতীশিংদা ব্যুজিনেস তৌবগী মমল হন্থহন্দুনা লৈবাক অনিমক্কী প্রোফেস্নেলশিং অমসুং সর্বিস ইন্দস্ত্রীদা মতেং পাংগনি। কেপিতেল মার্কেতশিং অমসুং ফাইনান্সিয়েল সর্ভিসশিংগী লমদা মতেং পীনবা হেনগৎলক্লিবা অদু পল্লদুনা প্রধান মন্ত্রী মোদীনা হায়খি মদুদি নাকল অনিমক্না গুজরাতকী GIFT সিতি, ভারতকী অহানবা ইন্তর্নেস্নেল ফাইনান্সিয়েল সর্ভিসেস সেন্তর অমসুং য়ু.কে.গী ভাইব্রেন্ত ফাইনান্সিয়েল ইকোসিস্তেমগী মরক্তা হেন্না চাওনা মতেং পীননবগী থবক পায়খৎপা য়াই।

লুচিংবা অনিনা লৈবাক অনিগী মরীগী হিরম পুম্নমক য়েংশিনখি অমসুং ইন্দিয়া-য়ু.কে. ভিজন ২০৩৫ এদোপ্ত তৌখি। ভিজন ২০৩৫ দোক্যুমেন্ত অসিনা মরুওইবা ইকোনোমী অমসুং গ্রোথ, তেক্নোলোজী, ইন্নোবেসন, রিসর্স অমসুং এজুকেসন, দিফেন্স অমসুং সেক্যুরিতী, ক্লাইমেৎ এক্সন, হেল্থ অমসুং পিপল-তু-পিপল লিঙ্কশিংদা মথংগী চহী ১০ অসিদা মরী অসিবু মাইকৈ চুমদুনা কমপ্রিহেন্সিভ স্ত্রেতেজিক পার্তনরশিপ অসিদা অহেনবা এম্বিসন অমসুং অনৌবা মোমেন্তম অমা হাপ্লগনি।

লৈবাক অনিমক্তা অমসুং মালেমগী কৈথেলদা হেনগৎলক্লিবা দিমান্দ অসি ফংহন্নবা দিফেন্স প্রদক্তশিংগী কো-দিজাইন, কো-দেবেলপমেন্ত অমসুং কো-প্রদক্সনদা মতেং পীননবা দিফেন্স ইন্দস্ত্রিয়েল রোদমেপ অমা ৱারোইশিন পুরকপদা লুচিংবা অনিমক্না নুংঙাইবা ফোংদোকখি। লৈবাক অনিগী আর্মদ ফোর্সেসকী চাং নাইনা থবক তৌমিন্নবগীদমক মখোয়না তরাম্না ওকখি। মখোয়না দিফেন্স অমসুং সেক্যুরিতী পার্তনরশিপ হেন্না চেৎশিল্লকপদা নুংঙাইবা ফোংদোকখি।

অনৌবা অমসুং নৌনা থোরক্লিবা তেক্নোলোজীশিংদা মতেং পীনবা হেনগৎলকপদা লুচিংবা অনিমক্না নুংঙাইবা ফোংদোকখি। তেক্নোলোজী অমসুং সেক্যুরিতী ইনিসিয়েতিব (TSI) গী থবক য়াংনা পায়খৎনবা মখোয়না হায়খি। তেক্নোলোজী অমসুং সেক্যুরিতী ইনিসিয়েতিব অসি তেলিকোম, ক্রিতিকেল মিনরেলস, AI, বায়োতেক্নোলোজী অমসুং হেল্থ তেক্নোলোজী, সেমিকন্দক্তরশিং, এদভান্স মেতরিয়েলশিং অমসুং ক্বান্তমদা মীৎয়েং থম্লি। ঙসি TSIনা চহি অমা মপুং ফারে।

প্রধান মন্ত্রী অনিমক্না এজুকেসন সেক্তরদা ভারত অমসুং য়ুনাইতেদ কিংদমগী মরক্তা হেনগৎলক্লিবা পার্তনরশিপ অসিবু তরাম্না ওকখি। য়ুনাইতেদ কিংদমগী য়ুনিভর্সিতী তরুক্না অনৌবা এজুকেসন পোলিসী (NEP)গী মখাদা ভারত্তা কেম্পস হাংনবা থবক পায়খৎলি। ২০২৫গী জুন ১৬দা গুরুগ্রামদা কেম্পস হাংবা সাউথেম্পতন য়ুনিভর্সিতী অসি NEPগী মখাদা ভারত্তা কেম্পস হাংবা অহানবা মপান লৈবাক্কী য়ুনিভর্সিতীনি।

নাকল অনিমক্না য়ু.কে.দা লৈরিবা ভারত মচাশিংনা একাদেমিয়া, আর্ত, লিতরেচর, মেদিসিন, সাইন্স, স্পোর্তস, বিজিনেস অমসুং রাজনিতীগী লমশিংদা মরুওইবা থৌদাং লৌবগীদমক থাগৎপা ফোংদোকখি। মখোয়না মসিগী অহিংবা থোং অসি ভারত-য়ুনাইতেদ কিংদমগী মরী হেনগৎহন্নবা অমসুং চাউখৎহন্নবগী মরুওইবা য়ুম্বী অমা অমনি হায়না ফোংদোকখি।

পহলগাম তেরোরিস্ত এতেক্কী মতুংদা ভারতকী মীয়ামদা মখোয়না পীখিবা চাউরবা মতেং অমসুং অমত্তা ওইনা লেপখিবগীদমক প্রধান মন্ত্রী, মোদীনা প্রধান মন্ত্রী, স্তারমরদা থাগৎপা ফোংদোকখি। লুচিংবা অনিমক্না তেরোরিজমগী মায়োক্তা মালেমগী থাক্তা লান্থেংনরিবা অসি মপাঙ্গল কনখৎহন্নবা ৱাশক লৌখি। এক্সত্রিমিজম অমসুং রেদিকেলাইজেসন্না খুন্নাই অনিমক্তা খুদোংথীবা পীরি হায়না পল্লদুনা মখোয়না খুদোংথীবা অসি থেংননবা নাকল অনিগী ওইবা মতেং পীনবা মখা তানা হেনগৎনবা য়ানখি। প্রধান মন্ত্রী মোদীনা ইকোনোমিক ওফেন্দরশিং অমসুং ফ্যুজিতিবশিংবু ৱায়েল বিচার পীনবা য়ু.কে.গী মাইকৈদগী তেংবাং পীনবসু হায়খি।

লুচিংবা অনিমক্না ইন্দো-পেসিফিক, নোংচুপ এসিয়া অমসুং রসিয়া-য়ুক্রেনগী চয়েৎনবা য়াওনা নাকল অনিমক্কী ইন্তরেস্তকী  ওইবা গ্লোবল অমসুং রিজনেল ইশুশিংদা মখোয়গী ৱাখল্লোনশিং ফোংদোকখি।

প্রধান মন্ত্রীনা প্রধান মন্ত্রী, স্তারমরদা মহাকপু তরাম্না ওকপীবগীদমক্তা থাগৎপা ফোংদোকখি অমসুং মহাকপু অথুবা মতমদা ভারত্তা লাক্নবা চাবাউ পীখি।

খোঙচৎ অদুগী মনুংদা নাকল অনিমক্না মখাদা পীরিবা দোক্যুমেন্তশিংদা খুৎয়েক পীনখি/ লৌখৎখি:

● কম্প্রিহেন্সিব ইকোনোমিক অমসুং ত্রেদ এগ্রীমেন্ত [CETA]

● ইন্দিয়া-য়ু.কে. ভিজন ২০৩৫ [Link]

● দিফেন্স ইন্দস্ত্রীএল রোদমেপ

● তেক্নোলোজী অমসুং সেক্যুরিতী ইনিসিয়েতিবকী মতাংদা স্তেতমেন্ত [Link]

● ভারতকী সেন্ত্রেল ব্যুরো ওফ ইনভেস্তিগেসন অমসুং য়ু.কে.গী নেস্নেল ক্রাইম এজেন্সীগী মরক্তা MoU

*****