প্ৰধানমন্ত্ৰী শ্ৰী নৰেন্দ্ৰ মোদীয়ে আজি ২৩-২৪ জুলাই, ২০২৫লৈ গ্ৰেট ব্ৰিটেইন ভ্ৰমণৰ সময়ত গ্ৰেট ব্ৰিটেইনৰ প্ৰধানমন্ত্ৰী ছাৰ কেইৰ ষ্টাৰমাৰৰ সৈতে বৈঠকত মিলিত হয়। বাকিংহামশ্বাৰৰ চেকাৰছত থকা ব্ৰিটেইনৰ প্ৰধানমন্ত্ৰীৰ বাসগৃহত উপস্থিত হোৱাৰ লগে লগে তেওঁক প্ৰধানমন্ত্ৰী ষ্টাৰমাৰে উষ্ম আদৰণি জনায়। দুয়োগৰাকী নেতাই পাৰস্পৰিক বৈঠকৰ লগতে প্ৰতিনিধি পৰ্যায়ৰ আলোচনাতো মিলিত হয়।

দুয়োগৰাকী প্ৰধানমন্ত্ৰীয়ে ঐতিহাসিক ভাৰত-ব্ৰিটেইনৰ ব্যাপক অৰ্থনৈতিক আৰু বাণিজ্য চুক্তিৰ স্বাক্ষৰিত হোৱাক আদৰণি জনায়, যিয়ে ব্যাপক কৌশলগত অংশীদাৰিত্বক এক নতুন স্তৰলৈ উন্নীত কৰাৰ লগতে দুয়োখন দেশৰ অৰ্থনীতিত দ্বিপাক্ষিক বাণিজ্য, বিনিয়োগ, অৰ্থনৈতিক সহযোগিতা আৰু চাকৰি সৃষ্টিৰ ক্ষেত্ৰত যথেষ্ট সহায়ক হ’ব। দুয়োপক্ষই ডাবল কনট্ৰিবিউচন কনভেনচনৰ আলোচনাতো সন্মত হয়, যিটো চিইটিএৰ সৈতে কাৰ্যকৰী হ’ব আৰু ই প্ৰতিযোগিতামূলক ক্ষমতাক প্ৰসাৰিত কৰি আৰু বাণিজ্যিক সত্তাসমূহৰ বাবে ব্যৱসায় কৰাৰ ব্যয় হ্ৰাস কৰি দুয়োখন দেশৰ পেছাদাৰী আৰু সেৱা উদ্যোগক সুবিধা প্ৰদান কৰিব। মূলধনী বজাৰ আৰু বিত্তীয় সেৱাৰ ক্ষেত্ৰত ক্ৰমবৰ্ধমান সহযোগিতাক লক্ষ্য কৰি প্ৰধানমন্ত্ৰী মোদীয়ে আলোকপাত কৰে যে দুয়োপক্ষই ভাৰতৰ প্ৰথম আন্তঃৰাষ্ট্ৰীয় বিত্তীয় সেৱা কেন্দ্ৰ গুজৰাটৰ গিফ্ট চিটি আৰু ব্ৰিটেইনৰ সজীৱ বিত্তীয় পৰিস্থিতিতন্ত্ৰৰ মাজত অধিক পাৰস্পৰিক মত বিনিময় বৃদ্ধিৰ বাবে কাম কৰিব পাৰে।

দুয়োগৰাকী নেতাই দ্বিপাক্ষিক সম্পৰ্কৰ সমগ্ৰ দিশ পৰ্যালোচনা কৰি ভাৰত-ব্ৰিটেইন ভিজন ২০৩৫ গ্ৰহণ কৰে।ভিজন ২০৩৫ৰ নথিখনে অৰ্থনীতি আৰু বৃদ্ধি, প্ৰযুক্তি, উদ্ভাৱন, গৱেষণা আৰু শিক্ষা, প্ৰতিৰক্ষা আৰু নিৰাপত্তা, জলবায়ু কাৰ্য্য, স্বাস্থ্য আৰু জনসাধাৰণৰ মূল ক্ষেত্ৰসমূহত অহা দহ বছৰৰ বাবে সম্পৰ্কটোক পৰিচালিত কৰি ব্যাপক কৌশলগত অংশীদাৰিত্বত অধিক উচ্চাকাংক্ষা আৰু নৱীকৃত গতিৰ সৃষ্টি কৰিব।

দুয়োখন দেশৰ লগতে বিশ্ব বজাৰৰ ক্ৰমবৰ্ধমান চাহিদা পূৰণৰ বাবে প্ৰতিৰক্ষা সামগ্ৰীৰ সহ-ডিজাইন, সহ-বিকাশ আৰু সহ-উৎপাদনৰ ক্ষেত্ৰত সহযোগিতাক প্ৰসাৰিত কৰাৰ বাবে প্ৰতিৰক্ষা ঔদ্যোগিক ৰোডমেপ চূড়ান্ত কৰাটোও দুয়োগৰাকী নেতাই আদৰণি জনায়। দুয়োখন দেশৰ সশস্ত্ৰ বাহিনীৰ নিয়মীয়া সংযোগক আদৰণি জনাই তেওঁলোকে প্ৰতিৰক্ষা আৰু নিৰাপত্তাৰ অংশীদাৰিত্ব গভীৰ হৈ অহাত সন্তুষ্টি প্ৰকাশ কৰে।

দুয়োগৰাকী নেতাই নতুন আৰু উদীয়মান প্ৰযুক্তিৰ ক্ষেত্ৰত ক্ৰমবৰ্ধমান সহযোগিতাৰ ওপৰত সন্তুষ্টি প্ৰকাশ কৰি টেলিকম, জটিল খনিজ পদাৰ্থ, এআই, জৈৱ প্ৰযুক্তি আৰু স্বাস্থ্য প্ৰযুক্তি, অৰ্ধপৰিবাহী, উন্নত সামগ্ৰী আৰু কোৱাণ্টামৰ ওপৰত গুৰুত্ব আৰোপ কৰা প্ৰযুক্তি আৰু সুৰক্ষা পদক্ষেপ (টিএছআই) ক্ষিপ্ৰতাৰে ৰূপায়ণৰ আহ্বান জনায়। আজি টিএছআইৰ এবছৰ সম্পূৰ্ণ হ’ল।

ভাৰত আৰু ব্ৰিটেইনৰ মাজত শিক্ষা খণ্ডত ক্ৰমবৰ্ধমান অংশীদাৰিত্বকো আদৰণি জনায়, য’ত ব্ৰিটেইনৰ ছখন বিশ্ববিদ্যালয়ে নতুন শিক্ষা নীতি (এনইপি)ৰ অধীনত ভাৰতত কেম্পাছ খুলিবলৈ কাম কৰি আছে। ২০২৫ চনৰ ১৬ জুনত গুৰুগ্ৰামত কেম্পাছ মুকলি কৰা ছাউথমপটন বিশ্ববিদ্যালয় এনইপিৰ অধীনত ভাৰতত কেম্পাছ মুকলি কৰা প্ৰথমখন বিদেশী বিশ্ববিদ্যালয়।

উভয় পক্ষই ব্ৰিটেইনত থকা ভাৰতীয় প্ৰব্ৰজনকাৰীসকলে শিক্ষা, কলা, সাহিত্য, চিকিৎসা, বিজ্ঞান, ক্ৰীড়া, ব্যৱসায় আৰু ৰাজনীতিৰ ক্ষেত্ৰত আগবঢ়োৱা বহুমূলীয়া অৱদানক স্বীকাৰ কৰে। ভাৰত-ব্ৰিটেইনৰ সম্পৰ্কৰ বৃদ্ধি আৰু প্ৰগতিৰ বাবে এই সজীৱ দলংখন এক মূল স্তম্ভ বুলি তেওঁলোকে সহমত প্ৰকাশ কৰে।

পেহেলগাম সন্ত্ৰাসবাদী আক্ৰমণৰ পৰিপ্ৰেক্ষিতত প্ৰধানমন্ত্ৰী ষ্টাৰমাৰক ভাৰতৰ জনসাধাৰণলৈ আগবঢ়োৱা দৃঢ় সমৰ্থন আৰু সংহতিৰ বাবে প্ৰধানমন্ত্ৰী মোদীয়ে ধন্যবাদ জ্ঞাপন কৰে। সন্ত্ৰাসবাদৰ বিৰুদ্ধে বৈশ্বিক যুঁজখন শক্তিশালী কৰাৰ প্ৰতিশ্ৰুতি দিছিল দুয়োগৰাকী নেতাই। উগ্ৰবাদ আৰু উগ্ৰবাদে দুয়োখন সমাজৰ বাবে ভাবুকি কঢ়িয়াই অনা বুলি লক্ষ্য কৰি তেওঁলোকে এই ভাবুকিৰ বিৰুদ্ধে যুঁজিবলৈ দ্বিপাক্ষিক সহযোগিতা আৰু অধিক বৃদ্ধি কৰিবলৈ সন্মত হয়। প্ৰধানমন্ত্ৰী শ্ৰী মোদীয়ে অৰ্থনৈতিক অপৰাধী আৰু পলাতকসকলক ন্যায়ৰ কাষ চাপিবলৈ ব্ৰিটেইনৰো সহযোগিতা বিচাৰিছিল।

ভাৰত-প্ৰশান্ত মহাসাগৰীয়, পশ্চিম এছিয়া আৰু ৰাছিয়া-ইউক্ৰেইন সংঘাতৰ পৰিঘটনাকে ধৰি পাৰস্পৰিক স্বাৰ্থৰ বৈশ্বিক আৰু আঞ্চলিক বিষয়সমূহৰ ওপৰতো দুয়োগৰাকী নেতাই মত বিনিময় কৰে।

প্ৰধানমন্ত্ৰীয়ে প্ৰধানমন্ত্ৰী ষ্টাৰমাৰক তেওঁৰ উষ্ম আতিথ্যৰ বাবে ধন্যবাদ জ্ঞাপন কৰি অতি সোনকালে সুবিধামতে ভাৰত ভ্ৰমণ কৰিবলৈ আমন্ত্ৰণ জনায়।

এই ভ্ৰমণৰ সময়ত দুয়োপক্ষই তলত দিয়া নথি-পত্ৰত স্বাক্ষৰ/গ্ৰহণ কৰে:

● ব্যাপক অৰ্থনৈতিক আৰু বাণিজ্য চুক্তি [চিইটিএ]

● ভাৰত-ব্ৰিটেইন ভিজন ২০৩৫ [লিংক]

● প্ৰতিৰক্ষা ঔদ্যোগিক ৰোডমেপ

● প্ৰযুক্তি আৰু সুৰক্ষা পদক্ষেপৰ ওপৰত বিবৃতি [লিংক]

● ভাৰতৰ কেন্দ্ৰীয় তদন্তকাৰী ব্যুৰো আৰু ব্ৰিটেইনৰ ৰাষ্ট্ৰীয় অপৰাধ সংস্থাৰ মাজত বুজাবুজি চুক্তি

*****

MJPS/VJ/DB