#IFFIWood, 27 नोव्‍हेंबर 2025

भारताचा 56 वा आंतरराष्ट्रीय चित्रपट महोत्सव, आंतरराष्ट्रीय चित्रपट, दूरचित्रवाणी आणि दृक्-श्राव्य प्रसारण परिषद (आयसीएफटी) यांच्या सहकार्याने प्रतिष्ठित आयसीएफटी–युनेस्को गांधी पदक प्रदान करीत आहे. युनेस्कोकडून जपल्या जाणाऱ्या सहिष्णुता, सांस्कृतिक संवाद आणि जागतिक शांततेच्या मूल्यांचे समर्थन करणाऱ्या चित्रपटांना हा सन्मान दिला जातो. 2016 मधील 46व्या इफ्फीपासून सुरू झालेल्या या पुरस्काराने अर्थपूर्ण, करुणामय आणि सामाजिक जबाबदारीची भावना जागवणाऱ्या चित्रपटांचा गौरव करणारा एक मानाचा पुरस्कार म्हणून लौकिक मिळवला आहे.

यावर्षी जगभरातील दहा उल्लेखनीय चित्रपट या पुरस्कारासाठी स्पर्धेत आहेत. या यादीत युनायटेड किंगडम, नॉर्वे, कोसोव्हो, इराण, इराक, चिली, जपान तसेच भारतातील तीन चित्रपटांचा समावेश असून, विविध कथा आणि जागतिक प्रतिनिधित्वाबाबत इफ्फीची बांधिलकी यामधून स्पष्ट होते.

स्पर्धेतील चित्रपट पुढीलप्रमाणे आहेत: ब्राइड्स (यु.के.), हाना (कोसोव्हो), के पॉपेर (इराण), द प्रेसिडेंट्स केक (यूएसए–इराक–कतार), सेफ हाउस (नॉर्वे), तान्वी द ग्रेट (भारत), द वेव्ह (चिली), विमुक्त (भारत), व्हाईट स्नो (भारत) आणि याकुशिमाज इल्युजन (बेल्जियम–फ्रान्स–जपान–लक्झेंबर्ग).

इफ्फी 2025 साठीच्या आयसीएफटी–युनेस्को गांधी पदक परीक्षक मंडळाचे अध्यक्ष अल्जेरियाचे डॉ. प्रा. अहमद बेजाउई असून, सदस्यांत चीनच्या झूयुआन हुन, फ्रान्सचे सर्ज मिशेल, स्वित्झर्लंडचे टोबियास बिआनकोने आणि लक्झेंबर्गचे जॉर्ज दुपॉं यांचा समावेश आहे.

पीआयबीच्या पत्रकार परिषदेत बोलताना आयसीएफटी–युनेस्को पॅरिसचे मानद प्रतिनिधी, नामांकित चित्रपट दिग्दर्शक मनुज कदम यांनी सांगितले की, हा पुरस्कार मानवतावादी मूल्यांचे संवर्धन करणारे तसेच अहिंसा, सामाजिक सलोखा आणि न्याय यांच्या तत्त्वांचे प्रतिनिधित्व करणारे दृश्यभान असलेले चित्रपट अधोरेखित करतो. त्यांनी हेही नमूद केले की २०२५ हे आयसीएफटी आणि आयएफएफआय यांच्या सहकार्याचे अकरावे वर्ष असून, अर्थपूर्ण आणि सामाजिक भान असलेल्या चित्रपटांना प्रोत्साहन देण्याचे दोन्ही संस्थांचे ध्येय समान आहे.

956 मध्ये स्थापन झालेली आयसीएफटी ही चित्रपट तंत्रज्ञांसाठीची सर्वात जुनी जागतिक संघटना आहे आणि विविध ऑडिओव्हिज्युअल संकल्पनांवर काम करत आहे, यावर मनोज कदम यांनी प्रकाश टाकला. त्यांनी चित्रपट निर्मितीमध्ये एआय यासंदर्भातील उदयोन्मुख संभाषणांवरही चर्चा केली. त्यांनी नमूद केले की चित्रित करण्यास कठीण असणारी दृश्ये तयार करण्यात एआय मदत करू शकते, परंतु "चित्रपटांमध्ये मानवी घटक असणे आवश्यक आहे - भावना संगणकीकृत केल्या जाऊ शकत नाहीत."

एनएफडीसीचे कला संचालक (प्रोग्रामिंग) पंकज सक्सेना यांनी यावर भर दिला की आयसीएफटी-युनेस्को गांधी पदक ही स्पर्धा इफ्फीच्या तीन वैशिष्ट्यपूर्ण स्पर्धांपैकी एक आहे आणि शांतता आणि समृद्धीला प्रोत्साहन देणाऱ्या सिनेमाद्वारे सभ्यता आणि संस्कृती एकत्र आणण्याच्या एका अद्वितीय आदेशाचा तिच्यावर प्रभाव आहे. त्यांनी महोत्सवात महिला चित्रपट निर्मात्यांचे वाढते प्रतिनिधित्व पाहिले, महिलांच्या  नेतृत्वाखालील शक्तिशाली चित्रपटांची वाढती संख्या लक्षात घेतली आणि इफ्फी कोणत्याही एका प्रदेशाचे वर्चस्व न ठेवता जगाचे प्रतिबिंबित करण्याचे उद्दिष्ट ठेवते, याचा पुनरुच्चार केला. 

पंकज सक्सेना यांनी यावर भर दिला की चित्रपट महोत्सवांनी अशा कलाकृतींना योग्य स्थान दिले पाहिजे ज्या चित्रपट विषयक अभिरुची वाढवतात, कलात्मक अखंडतेचा उत्सव साजरा करतात आणि मानवी स्थिती प्रतिबिंबित करतात. हिंसा ही एक आदिम प्रवृत्ती आहे हे मान्य करून, तरीही व्यावसायिक सनसनाटी निर्माण करण्याचे साधन म्हणून नव्हे तर जबाबदारीने ती चित्रित करण्याची गरज अधोरेखित केली.

आयसीएफटी - युनेस्को गांधी पदकाबद्दल:

महात्मा गांधींच्या वैश्विक आदर्शांचे प्रतिनिधित्व करणारा, इफ्फीचा आयसीएफटी - युनेस्को विभाग शांती, अहिंसा आणि आंतरसांस्कृतिक समजुतीचे प्रतीक असलेल्या चित्रपटांना सन्मानित करतो. हा जागतिक स्तरावर प्रतिष्ठित मानला जाणारा पुरस्कार कलात्मक प्रतिभेच्या पलीकडे जाऊन समावेशकता, सामाजिक जागरूकता आणि नैतिक प्रतिबिंब या विषयांना स्वीकारणाऱ्या कामांना मान्यता देतो. गेल्या काही वर्षांत गांधी पदकाने अशा चित्रपट निर्मात्यांना प्रकाशझोतात आणले आहे ज्यांच्या कथा संस्कृतींमधील करुणा, एकता आणि संवादाला चालना देतात - मानवता उजळून टाकण्यासाठी आणि समाजांमध्ये सेतू बांधण्यासाठी सिनेमाच्या परिवर्तनीय शक्तीची पुष्टी करतात.

संपूर्ण पत्रकार परिषद पहा:

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, Click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | गोपाळ चिप्‍पलकट्टी/निखिलेश चित्रे/नंदिनी मथुरे/दर्शना राणे | IFFI 56