La pynlong ia ka jingiakren halor “New North-East Cinema and Film Schools” ha Kala Academy Auditorium ha ka sngi kaba 8 jong ka International Film Festival of India (IFFI) kaba 56 ha Goa 2025. Ka jingïalang ka la ban jur ïa ka bynta ba pynkylla dur jong ki skul phlim ha kaba pynwandur ïa ki nongshna phlim jong ka thaiñ bad ki rukom ïathuhkhana. Ki sur ba kongsan na ka thain shatei lammihngi ki la iasam ia ki jingiaid lynti shimet, ki jingshem, bad ki jingshemphang halor ka jingkylla jong ka jinglong ka kam shna phlim ha ka thain.

Ïa kane ka jingïakren la pynïaid da u Dominic Sangma bad la ïashim bynta da ki nongshna phlim ba pawkhmat na Manipur Haobam Paban Kumar bad ki nongshna phlim na Assam ka Reema Borah bad u Mahrishi Tuhin Kashyap.

“Ka jingialeh ban ioh ia ka jingithuh ka dang iai bteng, ka pynwandur ia ka kam shna phlim kaba ngi thaw.” — Haobam Paban Kumar

U Haobam Paban Kumar, u nongshna phlim ba la rim bha na Manipur, u la ïathuh ïa ka jingïaid lynti shimet jong u ban ïaid lyngba ki jingeh jong ka jinghikai shna phlim ba pura ha ki snem 1990. Ha ka por ba ki don tang artylli ki jaka pule ba khraw—ka FTII Pune bad ka SRFTI Kolkata—ki nongshna phlim kiba kwah ban shna phlim na ka thain shatei lammihngi ki iakynduh ia ka jingiakhun kaba jur bad ki lad ki lynti kiba duna. U Paban u la ïathuh ïa ka jingïaid lynti jong u kaba hynriew snem ban ïoh rung ha ka SRFTI, ha kaba u la shah hikai ruh hapoh u nongshna phlim ba pawnam u Aribam Shyam Sharma. U la kynmaw kumno kane ka jinghikai kaba eh ka la iarap ia u ban pynbha ia ka kam jong u, ban pynroi ia ka jingpyrkhat kaba jylliew shaphang ka kam shna phlim, bad ban sngewthuh ia ki bynta bapher bapher jong ka kam iathuhkhana. Wat hapdeng ka jingkiew ha ki snem kiba la leit noh, u la ban jur ba ki nongshna phlim na ka thaiñ Shatei Lammihngi ki dang ïaleh ban ïoh ïa ka jingithuh bad ki rynsan ban pyni ïa ki kam jong ki. U la ïathuh ba ki briew na ka imlang sahlang jong u hi na ka jaka pule phlim jong u ki la ïarap ïa u ban tei ïa ka kam jong u.

“Ki khana kiba shisha ki wan na la iing, bad ka jingsngewthuh ia ka ka long kaba pynwandur ia ka sur jong u nongshna phlim.” —  Maharshi Tuhin Kashyap

U Maharshi Tuhin Kashyap u la kren shaphang kumno ka por jong u ha ka SRFTI ka la pynkylla dur bha ïa ka jingthmu jong u kum u nongshna phlim. Ha kaba sdang u la shah khring ha ka jingshongshit jong ka Bollywood, u Kashyap u la sngewthuh ïa ka jingdonkam ban wad ïa ki khana kiba shisha kiba don tynrai ha Assam. U la ai burom ia ka jingpule phlim jong u kaba la hikai ia u ban peit bniah, ban pyrkhat jylliew, bad ban pdiang ia ka kolshor jong u kum ka tyllong jong ka jingai mynsiem ban saindur. “Ka jingsngewthuh ïa la ka jong ka ri bad ka histori kam dei tang ka jingpule—ka long kaba donkam bha na ka bynta ka jingïathuhkhana kaba pynsawa ha ka thaiñ bad ha ka pyrthei,” u la ong.

“Ka kam shna phlim jong ka thaiñ shatei lammihngi ka don ïa ka histori kaba riewspah kaba dei hok ban ïohi bad ïohsngew ha ki phlim jong ka ri bad ka pyrthei.” —Reema Borah

Ka Reema Borah ka la ïathuh kumno ka FTII ka la kyntiew ïa ka jingsngewthuh jong ka ha ka kam shna phlim bad ka jingroi jingpar shimet, wat haba ka la ïaid lyngba ïa ka jingbymdon ka kam shna phlim ha ka thaiñ Shatei Lammihngi ha ki jinghikai ba pura. Ka la pynpaw ba wat hapdeng ka histori ba riewspah jong ka thaiñ—naduh ka Ishanou haduh ka Ganga Siloni Pakhi, bad ki phlim Assam kiba sdang naduh u snem 1935—ka kam shna phlim jong ka thaiñ shatei lammihngi ka la sah khlem pynpaw ha ka ri. Ka Borah ka la iaroh ia ka jingseng ia ka jaka pule phlim thymmai ha Arunachal Pradesh, da kaba batai ia ka kum ka sienjam kaba kongsan ban wanrah ia ki ktien, ki riti dustur, bad ki jingiathuhkhana jong ka thain shatei lammihngi sha ki paidbah kiba kham bun.

“Ki jingiathuhkhana kiba bha tam ki wan na la ka jong ka ri. Ka jaka pule phlim ka hikai ia phi kumno ban iathuh ia ki.” —Dominic Sangma

U Dominic Sangma, uba long u nongpyniaid, u la buh ia ka jingiakren hapoh ka jinglong kaba kham iar jong ka jingiathuhkhana bad ka jinghikai. Da kaba shim na ki tynrai jong u ha ki rukom ïathuhkhana, u Sangma u la ban jur ba ka jingshah ktah ha ki phlim pyrthei ka la tynjuh bad pynïar ïa ka jingsngewthuh jong u shaphang ki rukom ïathuhkhana. U la ban jur ba ki khana kiba pynsngewtynnat tam bunsien ki mih na ka jingsngewthuh kaba jan ia ka kolshor, ka jaka bad ka imlang sahlang jong uwei. Ka jingpule shaphang ki phlim, katkum ka jingong jong u Sangma, ka ai ia ki nongshna phlim ia ka jingtbit ha ka liang ka teknikal, ka jingshong nongrim ha ka theory, bad ka jingsngew skhem ban pynkylla ia kine ki khana sha ka screen.

Ka jingiakren ka la kut da ka jingpdiang lang ba ki skul phlim ki don ka bynta kaba kongsan ha kaba pynroi ia ka sap, ban pynneh pynsah ia ka jinglong tynrai, bad ban pynkupbor ia ki nongshna phlim jong ka thain shatei lammihngi ban thaw ia ki phlim kiba sawa ha ka thain bad ha ka pyrthei. Ka la ban jur ruh ia ka jingdonkam ban bteng ban bei tyngka ha ki jingdon jingem, ka jinghikai, bad ki rynsan ban pynkhlain ia ka sur jong ki nongiathuh khana jong ka thain shatei lammihngi.

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *