ইকায়খুম্নরবা রাষ্ট্রপতি রামাফোসা,

ইকায়খুম্নরবা রাষ্ট্রপতি লুলা,

মরুপশিং,

খুরুমজরি!

ফজরবা জোহান্নেসবার্গ সহরদা আই.বি.এস.এ লুচিংবশিংগী মীফমদা শরুক য়াবা ফংবা অসি অপেনবা ফাওই। মীফম অসিগীদমক, আই.বি.এস.এগী চিয়ার, রাষ্ট্রপতি লুলা ঐনা থাগৎপা ফোঙদোকচরি। মহাক্না তরাম্না ওকপগীদমক ঐনা রাষ্টপতি রামাফোসা থাগৎপা ফোঙদোকচরি।

আই.বি.এস.এ অসি লৈবাক অহুমগী লুপা অমা খক নত্তে; মসি মহাদেস অহুম, অচৌবা গনতন্ত্রগী শক্তি অহুম, অচৌবা ইকোনোমি অহুম শম্ননবা মরুওইবা মফম অমনি। মসি খেন্নবা, গুনশিং শরুক য়ামিন্নবা অমসুং মান্নবা অনিংবশিংনা মশক তাকপা মরা চেৎপা মরী অমসুনি।

মরুপশিং,

ঙসিগী আই.বি.এস.এ লুচিংবশিংগী মীফম অসি পুৱারি ওইরবা অমসুং মতম চারবা অনিমক্নি। অফ্রিকাগী অহানবা জি-২০ মীফম অসি গ্লোবেল সাউথকী লৈবাকশিংনা মথং মথং জি-১০গী প্রসিদেন্ত ওইরকপগী অরোইবনি। হৌখিবা চহি অহুমদা আই.বি.এস.এ লৈবাক অহুমনা জি-২০ গী প্রসিদেন্ত ওইখ্রে। হায়রিবা মীফম অহুম অদুদা, মীওইবদা য়ুম্ফম ওইবা চাউখৎ-থৌরাং, মালেমগী লুপশিং অমুক হন্না শেমদোকপা অমসুং তুংকোইনা চৎনবা য়াগদবা চাউখৎ-থৌরাংগুম্বা মরুওইবা থবক কয়া ঐখোয়না পায়খৎলে। হৌজিক, হায়রিবা থবকশিং অসি ফগৎহনবা হায়বসি ঐখোয়গী থৌদাংনি। মসি ফংনবা, ঐখোয় মতেং পাংনবগী মতাংদা ঐনা পাউতাক খরা পীবা পাম্মী।

মরুপশিং,

অহানবদা, মালেমগী লুপশিং অসি ২১ শুবা চহিচাগী অশেংবা শক্তমশিংদগী য়াম্না লাপখ্রে হায়বা ঐখোয় লৈবাক অহুম্না য়ানরে। ঐখোয় লৈবাক অহুম অসি য়ু.এন সেকুরিতি কাউন্সিলগী লেংদ্রবা মেম্বর অমতা ওইদ্রি। মালেমগী লুপশিং অসি ঙসিগী মালেমগী মহুৎশীনবা নত্তে হায়বা মসিনা নাখৈ শেংনা তাক্লে। মরম অদুনা, লুপশিংগী অওনবা পুরকপা হায়বসি মখা তানা খনগদবা হিরম ওইদ্রে, তঙাইফদবা অমা ওইরে হায়না মালেম শীনবা থুংবদা আই.বি.এস.এনা অমতা ওইনা পাউজেল অমা পীগদবনি।

তেরোরিজম থেংননবা, ঐখোয় পুন্না থবক তৌমিন্নদুনা মাঙলোমদা চঙশিনগদবনি। অসিগুম্বা অরুবা ৱাফম অমদা ময়াইদা লেপ্পগী মফম অমত লৈতে। মালেমগী শান্তি অমসুং নুংঙাই য়াইফবা পুরক্নবা, হিরম অসিদা ঐখোয়না অপুনবা থবক অমা পায়খৎকদবনি। 

২০২১ দা, ভারতনা আই.বি.এস.এগী চিয়ারমেন ওইবগী মখাদা লৈবাক অহুমগী এন.এস.এশিংগী অহানবা মীফম পাংথোকখ্রে। সেকুরিতি মতেং পাংনবা মপাঙ্গল কনখৎনবা, ঐখোয়না মসি ইন্সতিতুসন অমা ওইহনগদবনি।

মরুপশিং,

মীওইবা চাউখৎহনবদা তেক্নোলোজিনা মরুওইবা থৌদাং অমা লৌরি। মরুওইনা দি.পি.আই অমসুং আর্তিফিসিএল ইন্তিলিজেন্স য়াওনা, মরুওইবা অমসুং নৌনা থোক্লকপা তেক্নোলোজিশিংদা আই.বি.এস.এনা মরুওইবা থৌদাং অমা লৌবা ঙমগনি। য়ু.পি.আইগুম্বা দিজিতেল পব্লিক ইনফ্রাষ্ট্রকচর, কোৱিনগুম্বা হেল্থ প্লেতফোর্মশিং, সাইবরসেকুরিতি ফ্রেমৱার্কশিং অমসুং নুপীশিংনা লমজিংবা তেক্নোলোজিগী থবকশিং লৈবাক অহুমগী মরক্ত শরুক য়ামিন্ননবা ঐখোয়না “আই.বি.এস.এ দিজিতেল ইন্নোবেসন এল্লাইন্স” লিংখৎপা য়াগনি। অমতা ওইনা, অশোই-অঙাম লৈতবা, মরম চাবা অমসুং মীওইবগী য়াইফনবা এ.আইগী নিয়মশিং শেম্নবা ঐখোয় মতেং পাংগদবনি। মথং চহিদা ভারত্ত পাংথোক্কদৌরিবা এ.আই ইম্পেক্ত সম্মিৎতা মসি হৌদোক্কনি।

মরুপশিং,

তুংকোইনা চাউখৎনবগীদমক, লৈবাক অহুমগী চাউখৎপদা আই.বি.এস.এনা অমনা অমগী মতেং পাংনবা খক নত্তনা, মসিনা মালেম শীনবা থুংবগী খুদম অমা ওইগনি। মিল্লেতশিং নত্ত্রগা মহৌশাগী লৌউ-শিংউগী থবকশিং, অমাং-অতা মায়োক্নবা নত্ত্রগা গ্রিন ইনর্জি, মহৌশাগী হিদাক-লাংথকশিং নত্ত্রগা হেল্থ সেকুরিতি ওইবা য়াই, হিরম খুদিংমক্ত ঐখোয়গী পাঙ্গল পুনশিনবনা মালেমগী য়াইফবা পুরক্কনি।

মসিগী ৱাখল্লোন অসিগা লোয়ননা ঐখোয়না আই.বি.এস.এ ফন্দ লিংখৎলে। মসিগা মতেংগা লোয়ননা, ঐখোয়না হৌজিক ফাওবদা, লৈবাক ৪০ দা প্রোজেক ৫০ রোম লোইশিনখ্রে। লাইরিক-লাইশু, হকশেল, নুপীশিংদা শক্তি পীবা অমসুং সোলার ইনর্জিগুম্বা হিরমশিংদা লমদম অসিগী মীয়ামগী দরকার ওইবদা য়ুম্ফম ওইদুনা প্রোজেকশিং অদু পায়খৎপনি। মসিগী থবক অসি মখা তানা ফগৎনবা, ঐখোয়না ক্লাইমেত রেসিলিয়েন্ত এগ্রিকলচরগী আই.বি.এস.এ ফন্দ লিংখৎপা য়াগনি। 

মরুপশিং,

ঙসিগী মালেম মচেৎ মচেৎ তারে অমসুং মাইকৈ কয়াদা খায়দোক্নরে। অসিগুম্বা মতম অমদা, আই.বি.এস.এনা অপুনবা, পুন্না থবক তৌমিন্নবা অমসুং মীওইবগী খনবগী পাউজেল অমা পীরি। মসি ঐখোয়গী গনতন্ত্র চৎপা লৈবাক অহুমগী থৌদাং অমসুং মপাঙ্গল অনিমক্নি।

অদোম থাগৎপা ফোঙদোকচরি।

***