ജയ് ജോഹർ! ഗുജറാത്ത് ഗവർണർ ആചാര്യ ദേവവ്രത് ജി, ജനപ്രിയ മുഖ്യമന്ത്രി ശ്രീ ഭൂപേന്ദ്രഭായ് പട്ടേൽ, ഗുജറാത്ത് ബിജെപി പ്രസിഡന്റ് ജഗദീഷ് വിശ്വകർമ ജി, ഗുജറാത്ത് ​ഗവൺമെന്റിലെ മന്ത്രിമാരായ നരേഷ്ഭായ് പട്ടേൽ, ജയറാംഭായ് ഗമിത് ജി, പാർലമെന്റിലെ എന്റെ പഴയ സഹപ്രവർത്തകൻ മൻസുഖ്ഭായ് വാസവ ജി, വേദിയിൽ സന്നിഹിതരായ ഭഗവാൻ ബിർസ മുണ്ടയുടെ കുടുംബത്തിലെ എല്ലാ അംഗങ്ങളും, ഈ പരിപാടിയുടെ ഭാഗമായ രാജ്യത്തിന്റെ എല്ലാ കോണുകളിൽ നിന്നുമുള്ള എന്റെ ഗോത്ര സഹോദരീ സഹോദരന്മാരേ, മറ്റ് വിശിഷ്ട വ്യക്തികളേ, നിരവധി ദേശീയ പരിപാടികൾ ഈ സമയത്ത് നടക്കുന്നതിനാൽ സാങ്കേതികവിദ്യയിലൂടെ ഞങ്ങളുമായി ബന്ധപ്പെട്ടിരിക്കുന്ന  ഗവർണർമാർക്കും, മുഖ്യമന്ത്രിമാർക്കും, മന്ത്രിമാർക്കും, നിങ്ങൾക്കെല്ലാവർക്കും ജനജാതിയ ഗൗരവ് ദിവസ് വേളയിൽ എന്റെ ഹൃദയംഗമമായ ആശംസകൾ നേരുന്നു.

സാധാരണയായി, ഞാൻ നിങ്ങളുടെ അടുത്തേക്ക് വരുമ്പോൾ, ഗുജറാത്തിയിലാണ് സംസാരിക്കേണ്ടത്, എന്നാൽ രാജ്യമെമ്പാടുമുള്ള ആളുകൾ ഈ പരിപാടിയുമായി ബന്ധപ്പെട്ടിരിക്കുന്നതിനാൽ, നിങ്ങളുടെ അനുഗ്രഹത്തോടും അനുമതിയോടും കൂടി ഞാൻ ഇപ്പോൾ ഹിന്ദിയിൽ സംസാരിക്കുകയാണ്.

മാതാവായ നർമ്മദയുടെ ഈ പുണ്യഭൂമി ഇന്ന് വീണ്ടും ഒരു ചരിത്രസംഭവത്തിന് സാക്ഷ്യം വഹിക്കുകയാണ്. ഒക്ടോബർ 31 ന്, സർദാർ പട്ടേലിന്റെ 150-ാം ജന്മവാർഷികം നാം ഇവിടെ ആഘോഷിച്ചു. ഭാരത് പർവ് നമ്മുടെ ഐക്യവും വൈവിധ്യവും ആഘോഷിക്കാൻ തുടങ്ങി, ഇന്ന്, ഭഗവാൻ ബിർസ മുണ്ടയുടെ 150-ാം ജന്മവാർഷികം അടയാളപ്പെടുത്തുന്ന ഈ മഹത്തായ ചടങ്ങോടെ, ഭാരത് പർവിന്റെ പരിസമാപ്തിക്ക് നാം സാക്ഷ്യം വഹിക്കുകയാണ്. ഈ പുണ്യവേളയിൽ, ഭഗവാൻ ബിർസ മുണ്ടയെ ഞാൻ വണങ്ങുന്നു. സ്വാതന്ത്ര്യ സമരകാലത്ത് ഗോവിന്ദ് ഗുരു കൊളുത്തിയ സ്വാതന്ത്ര്യ ജ്വാലയിൽ നിന്ന് ഗുജറാത്ത്, രാജസ്ഥാൻ, മധ്യപ്രദേശ്, മുഴുവൻ ഗോത്ര മേഖലയും പ്രചോദനം ഉൾക്കൊണ്ടു. ഈ വേദിയിൽ നിന്ന് ഞാൻ ഗോവിന്ദ് ഗുരുവിനെയും വണങ്ങുന്നു. കുറച്ചുനാൾ മുമ്പ്, ദേവമോഗ്ര മാതാവിന്റെ ദർശനം നടത്താനുള്ള ഭാഗ്യം എനിക്കും ലഭിച്ചു. ഞാൻ വീണ്ടും അവരുടെ കാൽക്കൽ വണങ്ങുന്നു. കാശി വിശ്വനാഥ ഇടനാഴി, ഉജ്ജൈൻ മഹാകൽ ഇടനാഴി, അയോധ്യ രാമക്ഷേത്രം, കേദാർനാഥ് ധാം എന്നിവയെക്കുറിച്ച് ആളുകൾ സംസാരിക്കുന്നു. കഴിഞ്ഞ ദശകത്തിൽ, അത്തരം നിരവധി മതപരവും ചരിത്രപരവുമായ സ്ഥലങ്ങൾ വികസിപ്പിച്ചെടുത്തിട്ടുണ്ട്. എന്നാൽ 2003-ൽ പെൺകുട്ടികളുടെ വിദ്യാഭ്യാസത്തിനായുള്ള ഒരു പരിപാടിയിൽ പങ്കെടുക്കാൻ റാലിയ പത്താനിൽ മുഖ്യമന്ത്രിയായി എത്തിയപ്പോൾ ഞാൻ അമ്മയുടെ കാൽക്കൽ വണങ്ങി എന്ന് ചുരുക്കം ചിലർക്ക് മാത്രമേ അറിയൂ. അക്കാലത്ത് ഒരു ചെറിയ കുടിലുപോലുള്ള സ്ഥലം മാത്രമായിരുന്നു നിലനിന്നിരുന്നത്. എന്റെ ജീവിതത്തിൽ ഞാൻ ചെയ്തിരിക്കാവുന്ന എല്ലാ പ്രധാന വികസന പ്രവർത്തനങ്ങളിലും, ദേവമോഗ്ര മാതാ സ്ഥലത്തിന്റെ വികസനത്തോടെയാണ് തുടക്കം കുറിച്ചതെന്ന് എനിക്ക് അഭിമാനത്തോടെ പറയാൻ കഴിയും. ഇന്ന് ഞാൻ സ്ഥലം സന്ദർശിച്ചപ്പോൾ, ലക്ഷക്കണക്കിന് ആളുകൾ, പ്രത്യേകിച്ച് നമ്മുടെ ആദിവാസി സഹോദരീസഹോദരന്മാർ, ഇപ്പോൾ അമ്മയോടുള്ള അതിരറ്റ ഭക്തിയോടെ അവിടെ എത്തുന്നത് കണ്ടതിൽ എനിക്ക് വളരെ സന്തോഷം തോന്നി.

സുഹൃത്തുക്കളേ,

ദേഡിയപാ‍ഡ, സാഗ്ബറ എന്നീ ഈ പ്രദേശം കബീർ ജിയുടെ പഠിപ്പിക്കലുകളിൽ നിന്ന് വളരെക്കാലമായി പ്രചോദനം ഉൾക്കൊണ്ടിട്ടുണ്ട്. ഞാൻ വിശുദ്ധ കബീറിന്റെ നാടായ ബനാറസിൽ നിന്നുള്ള പാർലമെന്റ് അംഗമാണ്. അതിനാൽ, വിശുദ്ധ കബീർ സ്വാഭാവികമായും എന്റെ ജീവിതത്തിൽ ഒരു പ്രത്യേക സ്ഥാനം വഹിക്കുന്നു. ഈ വേദിയിൽ നിന്ന് ഞാൻ അദ്ദേഹത്തെയും വണങ്ങുന്നു. 

സുഹൃത്തുക്കളേ, 

ഇന്ന്, രാജ്യത്തിന്റെ വികസനവും ആദിവാസി സമൂഹങ്ങളുടെ ക്ഷേമവുമായി ബന്ധപ്പെട്ട നിരവധി പദ്ധതികൾ ഉദ്ഘാടനം ചെയ്യുകയും അവയുടെ തറക്കല്ലിടുകയും ചെയ്തിട്ടുണ്ട്. പ്രധാനമന്ത്രി ജൻമൻ പദ്ധതിക്കും മറ്റ് പദ്ധതികൾക്കും കീഴിൽ ഒരു ലക്ഷം കുടുംബങ്ങൾക്ക് സ്ഥിരമായ വീടുകൾ ഇവിടെ നൽകിയിട്ടുണ്ട്. നിരവധി ഏകലവ്യ മോഡൽ സ്കൂളുകളും ആശ്രമ സ്കൂളുകളും ഉദ്ഘാടനം ചെയ്യുകയും അവയുടെ ശിലാസ്ഥാപനം നടത്തുകയും ചെയ്തു. ബിർസ മുണ്ട ട്രൈബൽ യൂണിവേഴ്സിറ്റിയിൽ ശ്രീ ഗോവിന്ദ് ഗുരു ചെയർ സ്ഥാപിച്ചിട്ടുണ്ട്. ആരോഗ്യം, റോഡുകൾ, ഗതാഗതം എന്നിവയുമായി ബന്ധപ്പെട്ട നിരവധി പദ്ധതികൾ ആരംഭിച്ചു. ഈ വികസന പ്രവർത്തനങ്ങൾക്കും സേവന സംരംഭങ്ങൾക്കും ക്ഷേമ പദ്ധതികൾക്കും നിങ്ങൾക്കെല്ലാവർക്കും, പ്രത്യേകിച്ച് ഗുജറാത്തിലെയും രാജ്യത്തുടനീളമുള്ള എന്റെ ആദിവാസി കുടുംബങ്ങൾക്കും എന്റെ ഹൃദയംഗമമായ അഭിനന്ദനങ്ങൾ.

സുഹൃത്തുക്കളേ,

2021 ൽ, ഭഗവാൻ ബിർസ മുണ്ടയുടെ ജന്മദിനം ജൻജാതിയ ഗൗരവ് ദിവസ് (ഗോത്ര അഭിമാന ദിനം) ആയി ആഘോഷിക്കാൻ തുടങ്ങി. ആയിരക്കണക്കിന് വർഷങ്ങളായി ഗോത്ര അഭിമാനം ഭാരതത്തിന്റെ ബോധത്തിന്റെ അവിഭാജ്യ ഘടകമാണ്. രാജ്യത്തിന്റെ ബഹുമാനം, അന്തസ്സ് അല്ലെങ്കിൽ സ്വയംഭരണം അപകടത്തിലായപ്പോഴെല്ലാം, നമ്മുടെ ഗോത്ര സമൂഹം മുൻപന്തിയിൽ നിന്നു. നമ്മുടെ സ്വാതന്ത്ര്യസമരം ഇതിന് ഏറ്റവും വലിയ ഉദാഹരണമാണ്. ഗോത്ര സമൂഹത്തിൽ നിന്നുള്ള നിരവധി നായകന്മാരും നായികമാരുമായ തിലക മാഞ്ചി, റാണി ഗൈഡിൻലിയു, സിദ്ധോ-കൻഹു, ഭൈരവ് മുർമു, ബുദ്ധു ഭഗത്, അല്ലൂരി സീതാരാമ രാജു പോലുള്ള പ്രചോദനാത്മക വ്യക്തികൾ  സ്വാതന്ത്ര്യത്തിന്റെ ദീപശിഖ മുന്നോട്ട് കൊണ്ടുപോയി. അതുപോലെ, മധ്യപ്രദേശിലെ താന്തിയ ഭിൽ, ഛത്തീസ്ഗഡിലെ വീർ നാരായൺ സിംഗ്, ജാർഖണ്ഡിലെ തെലങ്ക ഖരിയ, അസമിലെ രൂപ്ചന്ദ് കൊൻവാർ, ഒഡീഷയിലെ ലക്ഷ്മൺ നായിക് എന്നിവരുൾപ്പെടെ നിരവധി ധീരരായ യോദ്ധാക്കൾ സ്വാതന്ത്ര്യത്തിനായി വലിയ ത്യാഗങ്ങൾ ചെയ്തു, അക്ഷീണം പോരാടി, ബ്രിട്ടീഷുകാരെ സമാധാനത്തിൽ ഇരിക്കാൻ ഒരിക്കലും അനുവദിച്ചില്ല. ഗോത്ര സമൂഹം എണ്ണമറ്റ വിപ്ലവങ്ങൾക്ക് നേതൃത്വം നൽകി, സ്വാതന്ത്ര്യത്തിനായി രക്തം ചൊരിഞ്ഞു.

സുഹൃത്തുക്കളേ,

ഇവിടെ ഗുജറാത്തിലും, ആദിവാസി സമൂഹം അത്തരം നിരവധി ധീരരായ ദേശസ്‌നേഹികളെ സൃഷ്ടിച്ചിട്ടുണ്ട്. ഭഗത് പ്രസ്ഥാനത്തിന് നേതൃത്വം നൽകിയ ഗോവിന്ദ് ഗുരു; പഞ്ച്മഹലിൽ ബ്രിട്ടീഷുകാർക്കെതിരെ ദീർഘകാലം പോരാടിയ രാജാ രൂപ്‌സിംഗ് നായക്; ഏകി പ്രസ്ഥാനത്തിന് നേതൃത്വം നൽകിയ മോത്തിലാൽ തേജാവത്. പാൽ ചിത്താരിയയിലേക്ക് പോയാൽ, അവിടെ രക്തസാക്ഷികളായ നൂറുകണക്കിന് ആദിവാസികളുടെ സ്മാരകം നിങ്ങൾക്ക് കാണാം. ജാലിയൻവാലാബാഗിന് സമാനമായ ഒരു സംഭവം സബർകന്തയിലെ പാൽ ചിത്താരിയയിൽ നടന്നു. ഗാന്ധിജിയുടെ തത്വങ്ങൾ ആദിവാസി സമൂഹത്തിലേക്ക് എത്തിച്ച നമ്മുടെ ദശ്രിബെൻ ചൗധരിയുണ്ട്. നമ്മുടെ സ്വാതന്ത്ര്യസമരത്തിന്റെ നിരവധി അധ്യായങ്ങൾ ഗോത്ര അഭിമാനവും ഗോത്ര വീര്യവും കൊണ്ട് നിറഞ്ഞിരിക്കുന്നു.

സഹോദരീ സഹോദരന്മാരേ,

സ്വാതന്ത്ര്യ പ്രസ്ഥാനത്തിന് ഗോത്ര സമൂഹം നൽകിയ സംഭാവന നമുക്ക് മറക്കാൻ കഴിയില്ല. സ്വാതന്ത്ര്യാനന്തരം, ഈ അംഗീകാരം അവർക്ക് നൽകേണ്ടതായിരുന്നു, പക്ഷേ കുറച്ച് കുടുംബങ്ങൾക്ക് മാത്രം സ്വാതന്ത്ര്യത്തിന്റെ ബഹുമതി നൽകാനുള്ള ആഗ്രഹം കാരണം, എന്റെ ഗോത്ര സഹോദരീ സഹോദരന്മാരുടെ ത്യാഗം, തപസ്സ്, സമർപ്പണം എന്നിവ അവഗണിക്കപ്പെട്ടു. 2014 ന് മുമ്പ് രാജ്യത്ത് ആരും ഭഗവാൻ ബിർസ മുണ്ടയെ ശരിക്കും ഓർമ്മിച്ചിരുന്നില്ല, അടുത്തുള്ള ഗ്രാമങ്ങൾ മാത്രമാണ് അദ്ദേഹത്തെക്കുറിച്ച് സംസാരിച്ചത്. നമ്മുടെ സ്വാതന്ത്ര്യം നേടിത്തന്നതിലൂടെ എന്റെ ഗോത്ര സഹോദരീസഹോദരന്മാർ നമുക്ക് എത്ര വലിയ സമ്മാനമാണ് നൽകിയതെന്ന് നമ്മുടെ അടുത്ത തലമുറ അറിയണമെന്ന് ആഗ്രഹിച്ചതിനാലാണ് ഞങ്ങൾ അത് മാറ്റിയത്. ഈ പൈതൃകം സംരക്ഷിക്കുന്നതിനും ഭാവി തലമുറകളെ ഓർമ്മിപ്പിക്കുന്നതിനുമായി, രാജ്യത്തുടനീളം നിരവധി ഗോത്ര മ്യൂസിയങ്ങൾ ഞങ്ങൾ നിർമ്മിക്കുന്നു. ഗുജറാത്തിൽ, രാജ്പിപ്ലയിൽ തന്നെ 25 ഏക്കർ സ്ഥലത്ത് ഒരു മഹത്തായ ഗോത്ര മ്യൂസിയം രൂപം കൊള്ളുന്നു. കുറച്ച് ദിവസങ്ങൾക്ക് മുമ്പ്, ഞാൻ ഛത്തീസ്ഗഢ് സന്ദർശിച്ചു, അവിടെ ഞാൻ ഷഹീദ് വീർ നാരായൺ സിംഗ് ഗോത്ര മ്യൂസിയം ഉദ്ഘാടനം ചെയ്തു. അതുപോലെ, റാഞ്ചിയിൽ, ഭഗവാൻ ബിർസ മുണ്ടയെ തടവിലാക്കിയ ജയിൽ തന്നെ ഇപ്പോൾ അദ്ദേഹത്തിനും ആ കാലഘട്ടത്തിലെ സ്വാതന്ത്ര്യ പ്രസ്ഥാനത്തിനും സമർപ്പിച്ചിരിക്കുന്ന ഒരു മനോഹരമായ മ്യൂസിയമായി രൂപാന്തരപ്പെട്ടിരിക്കുന്നു.

സുഹൃത്തുക്കളേ,

ഇന്ന്, ശ്രീ ഗോവിന്ദ് ഗുരു ചെയർ ഒരു ഗോത്ര ഭാഷാ പ്രോത്സാഹന കേന്ദ്രമായി സ്ഥാപിതമായി. ഭിൽ, ഗാമിത്, വാസവ, ഗരാസിയ, കോക്നി, സന്താൽ, രത്‌വ, നായക്, ദാബ്ല, ചൗധരി, കോക്ന, കുംബി, വാർലി, ദോഡിയ തുടങ്ങി നിരവധി ആദിവാസി സമൂഹങ്ങളുടെ ഭാഷാഭേദങ്ങളെക്കുറിച്ചുള്ള പഠനങ്ങൾ ഇവിടെ നടത്തും. അവരുടെ കഥകളും ഗാനങ്ങളും സംരക്ഷിക്കപ്പെടും. ആയിരക്കണക്കിന് വർഷത്തെ അനുഭവങ്ങളിൽ നിന്ന് നേടിയെടുത്ത അറിവിന്റെ ഒരു വലിയ നിധി ഗോത്ര സമൂഹത്തിലുണ്ട്. ശാസ്ത്രം അവരുടെ ജീവിതശൈലിയിൽ ഉൾച്ചേർന്നിരിക്കുന്നു, തത്ത്വചിന്ത അവരുടെ കഥകളിൽ മറഞ്ഞിരിക്കുന്നു, അവരുടെ ഭാഷ പരിസ്ഥിതിയെക്കുറിച്ചുള്ള ആഴത്തിലുള്ള ധാരണ ഉൾക്കൊള്ളുന്നു. ശ്രീ ഗോവിന്ദ് ഗുരു ചെയർ പുതിയ തലമുറയെ ഈ സമ്പന്നമായ പാരമ്പര്യവുമായി ബന്ധിപ്പിക്കാൻ സഹായിക്കും.

സുഹൃത്തുക്കളേ,

ജനജാതിയ ഗൗരവ് ദിവസ് ദിനം നമ്മുടെ കോടിക്കണക്കിന് ആദിവാസി സഹോദരീസഹോദരന്മാരോട് ചെയ്ത അനീതിയെ ഓർമ്മിപ്പിക്കുന്നു. ആറ് പതിറ്റാണ്ടുകളായി രാജ്യം ഭരിച്ച കോൺഗ്രസ്, ആദിവാസി സമൂഹങ്ങളെ സ്വയം സംരക്ഷിക്കാൻ വിട്ടു. പോഷകാഹാരക്കുറവ്, ആരോഗ്യ സുരക്ഷയുടെ അഭാവം, വിദ്യാഭ്യാസത്തിന്റെ അഭാവം, യാതൊരു കണക്ടിവിറ്റിയുമില്ലാത്ത അവസ്ഥ എന്നിവ ഗോത്ര മേഖലകളെ ബാധിച്ചു. ഈ പോരായ്മകൾ ഗോത്ര മേഖലകളുടെ സ്വത്വമായി മാറി. കോൺഗ്രസ് ​ഗവൺമെന്റുകൾ വെറുതെ ഇരുന്നു.

പക്ഷേ സുഹൃത്തുക്കളേ,

ആദിവാസി ക്ഷേമം എപ്പോഴും ബിജെപിയുടെ ഏറ്റവും ഉയർന്ന മുൻഗണനയാണ്. ആദിവാസി സമൂഹങ്ങൾ നേരിടുന്ന അനീതികൾ അവസാനിപ്പിക്കാനും അവർക്ക് വികസന നേട്ടങ്ങൾ നൽകാനുമുള്ള ദൃഢനിശ്ചയത്തോടെയാണ് ഞങ്ങൾ എപ്പോഴും മുന്നോട്ട് പോയിട്ടുള്ളത്. 1947 ൽ രാജ്യം സ്വാതന്ത്ര്യം നേടിയിരിക്കാം, പക്ഷേ പുരാതന കാലം മുതൽ ആദിവാസി സമൂഹം ശ്രീരാമനുമായി ബന്ധപ്പെട്ടിരിക്കുന്നു, അവരുടെ ചരിത്രം വളരെ പുരാതനമാണ്. എന്നിട്ടും ആറ് പതിറ്റാണ്ട് ഭരിച്ചവർക്ക് ഇത്രയും വലിയ ഒരു ആദിവാസി സമൂഹത്തിന്റെ വികസനത്തിനായി പ്രവർത്തിക്കേണ്ടതിന്റെ ആവശ്യകത പോലും മനസ്സിലായില്ല.

സുഹൃത്തുക്കളേ,

രാജ്യത്ത് ആദ്യമായി ആദിവാസി കാര്യങ്ങൾക്കായി ഒരു പ്രത്യേക മന്ത്രാലയം സൃഷ്ടിക്കപ്പെട്ടത് അടൽ ബിഹാരി വാജ്‌പേയി ആദ്യമായി പ്രധാനമന്ത്രിയാകുകയും ബിജെപി ​ഗവൺമെന്റ് രൂപീകരിക്കുകയും ചെയ്തപ്പോഴാണ്. അതിനുമുമ്പ്, അത്തരമൊരു മന്ത്രാലയം നിലവിലില്ല. എന്നാൽ അടൽ ജിയുടെ ​ഗവൺമെന്റിന്റെ പതനത്തിനുശേഷം, കോൺഗ്രസ് വീണ്ടും പത്ത് വർഷം ഭരിക്കാൻ ലഭിച്ചപ്പോൾ, അവർ ഈ മന്ത്രിസഭയെ അവഗണിക്കുകയും പൂർണ്ണമായും തമസ്ക്കരിക്കുകയും ചെയ്തു. 2013 ൽ കോൺഗ്രസ് ആദിവാസി ക്ഷേമത്തിനായി ഏതാനും ആയിരം കോടി രൂപ മാത്രമേ അനുവദിച്ചിട്ടുള്ളൂ എന്ന് നിങ്ങൾക്ക് ആലോചിക്കാവുന്നതാണ്. ഏതാനും ആയിരം കോടി മാത്രം! ഒരു ​​ജില്ലയിൽ, ആയിരം കോടി എന്നത് ജോലി പൂർത്തിയാക്കാൻ പോലും പര്യാപ്തമല്ല. ഞങ്ങളുടെ ​ഗവൺമെന്റ് അധികാരത്തിൽ വന്നതിനുശേഷം, ഇതിൽ ഞങ്ങൾ ഗണ്യമായ വർദ്ധനവ് വരുത്തി, ആദിവാസി താൽപ്പര്യങ്ങൾക്കായി ശ്രദ്ധിച്ചു, ഗോത്രകാര്യ മന്ത്രാലയത്തിന്റെ ബജറ്റ് വിപുലീകരിച്ചു. ഇന്ന്, ഈ ബജറ്റ് പലമടങ്ങ് വർദ്ധിപ്പിച്ചുകൊണ്ട് ഗോത്ര മേഖലകളുടെ വികസനത്തിന്റെ ഉത്തരവാദിത്തം ഞങ്ങൾ ഏറ്റെടുത്തിരിക്കുന്നു. വിദ്യാഭ്യാസം, ആരോഗ്യം, കണക്റ്റിവിറ്റി എന്നിങ്ങനെ എല്ലാ മേഖലകളിലും മുന്നോട്ട് പോകാൻ ഞങ്ങൾ ശ്രമിക്കുന്നു.

സുഹൃത്തുക്കളേ,

ഗുജറാത്തിലെ ഗോത്ര മേഖലകളിലെ സ്ഥിതി നല്ലതല്ലാത്ത ഒരു കാലമുണ്ടായിരുന്നു. മുഴുവൻ ഗോത്ര മേഖലയിലും ഒരു സയൻസ്-സ്ട്രീം സ്കൂൾ പോലും നിലവിലില്ലായിരുന്നു, അംബാജി മുതൽ ഉമർഗാം വരെയുള്ള ഒരു സയൻസ് സ്കൂൾ പോലും ഇല്ലായിരുന്നു. ദെഡിയപാഡ, സാഗ്ബറ പോലുള്ള പ്രദേശങ്ങളിൽ വിദ്യാർത്ഥികൾക്ക് ഉന്നത പഠനത്തിന് അവസരങ്ങൾ ലഭിച്ചിരുന്നില്ല. ഗുജറാത്ത് മുഖ്യമന്ത്രിയായിരുന്നപ്പോൾ, ദെഡിയപാഡയിൽ നിന്നാണ് ഞാൻ കന്യ കേളവണി മഹോത്സവം ആരംഭിച്ചതെന്ന് ഞാൻ ഓർക്കുന്നു. ആ സമയത്ത്, നിരവധി കുട്ടികൾ എന്നെ കാണുമായിരുന്നു, അവർക്ക് വലിയ സ്വപ്നങ്ങളുണ്ടായിരുന്നു. ചിലർ ഡോക്ടർമാരും എഞ്ചിനീയർമാരും ശാസ്ത്രജ്ഞരും ആകാൻ ആഗ്രഹിച്ചു. വിദ്യാഭ്യാസം മാത്രമാണ് ഏക വഴി എന്ന് ഞാൻ അവരോട് വിശദീകരിക്കുമായിരുന്നു. അവരുടെ സ്വപ്നങ്ങൾക്ക് തടസ്സമാകുന്ന എന്ത് തടസ്സങ്ങളും ഞങ്ങൾ നീക്കം ചെയ്യുമെന്ന് ഞാൻ അവർക്ക് ഉറപ്പ് നൽകി.

സുഹൃത്തുക്കളേ,

മാറ്റം കൊണ്ടുവരാൻ ഞങ്ങൾ രാവും പകലും പ്രവർത്തിച്ചു. തൽഫലമായി, ഇന്ന് ഗുജറാത്തിലെ ഗോത്ര മേഖലയിൽ പതിനായിരത്തിലധികം സ്കൂളുകളുണ്ട്, അവിടെ ഞാൻ മുഖ്യമന്ത്രിയാകുന്നതിന് മുമ്പ് ഒരു സയൻസ്-സ്ട്രീം സ്കൂൾ പോലും ഇല്ലായിരുന്നു. കഴിഞ്ഞ രണ്ട് പതിറ്റാണ്ടുകളായി, കൊമേഴ്‌സ്, ആർട്‌സ് കോളേജുകൾക്കൊപ്പം ഗോത്ര മേഖലകളിൽ രണ്ട് ഡസൻ സയൻസ് കോളേജുകൾ സ്ഥാപിക്കപ്പെട്ടു. ആദിവാസി കുട്ടികൾക്കായി ബിജെപി ​ഗവൺമെന്റ് നൂറുകണക്കിന് ഹോസ്റ്റലുകൾ നിർമ്മിച്ചു. ഗുജറാത്തിൽ, ഞങ്ങൾ രണ്ട് ഗോത്ര സർവകലാശാലകളും സ്ഥാപിച്ചു. അത്തരം ശ്രമങ്ങൾ കാരണം, ഇവിടെ വലിയ മാറ്റങ്ങൾ സംഭവിച്ചു. ഇന്ന്, 20 വർഷം മുമ്പ് എനിക്ക് സ്വപ്നങ്ങൾ തന്ന കുട്ടികളിൽ ചിലർ ഡോക്ടർമാരും എഞ്ചിനീയർമാരുമാണ്, ചിലർ ഗവേഷണ മേഖലകളിൽ ജോലി ചെയ്യുന്നു.

സുഹൃത്തുക്കളേ,

ഗോത്രവർഗ കുട്ടികൾക്ക് ശോഭനമായ ഭാവി ഉറപ്പാക്കാൻ ഞങ്ങൾ രാവും പകലും പ്രവർത്തിക്കുന്നു. കഴിഞ്ഞ 5-6 വർഷത്തിനുള്ളിൽ മാത്രം, രാജ്യത്തുടനീളമുള്ള ഗോത്രവർഗ വിദ്യാർത്ഥികൾക്കായി ഏകലവ്യ മോഡൽ റെസിഡൻഷ്യൽ സ്കൂളുകൾക്കായി കേന്ദ്ര ​ഗവൺമെന്റ് 18,000 കോടിയിലധികം രൂപ ചെലവഴിച്ചു. ഈ സ്കൂളുകളിൽ പെൺകുട്ടികൾക്ക് ആവശ്യമായ സൗകര്യങ്ങൾ ഒരുക്കിയിട്ടുണ്ട്. തൽഫലമായി, ഈ സ്കൂളുകളിൽ പ്രവേശനം നേടുന്ന ഗോത്രവർഗ കുട്ടികളുടെ എണ്ണം 60 ശതമാനം വർദ്ധിച്ചു.

സുഹൃത്തുക്കളേ,

ഗോത്രവർഗ യുവാക്കൾക്ക് അവസരങ്ങൾ ലഭിക്കുമ്പോൾ, എല്ലാ മേഖലകളിലും മികവ് പുലർത്താനുള്ള ശക്തി അവർക്കുണ്ട്. അവരുടെ പാരമ്പര്യത്തിൽ നിന്നും പൈതൃകത്തിൽ നിന്നും അവർക്ക് ധൈര്യവും കഠിനാധ്വാനവും കഴിവും ലഭിക്കുന്നു. ഇന്ന്, കായിക ലോകത്തിലെ മാതൃകകൾ എല്ലാവരുടെയും മുന്നിലുണ്ട്. ലോകമെമ്പാടും ദേശീയ പതാകയുടെ മഹത്വം ഉയർത്തുന്നതിൽ ഗോത്രവർഗ പുത്രന്മാരും പുത്രിമാരും ഒരു പ്രധാന പങ്ക് വഹിച്ചിട്ടുണ്ട്! അടുത്ത കാലം വരെ, മേരി കോം, തോനക്കൽ ഗോപി, ദ്യൂട്ടി ചന്ദ്, ബൈച്ചുങ് ബൂട്ടിയ തുടങ്ങിയ പേരുകൾ നമുക്കെല്ലാവർക്കും അറിയാമായിരുന്നു. ഇപ്പോൾ, എല്ലാ പ്രധാന മത്സരങ്ങളിലും ഗോത്രമേഖലകളിൽ നിന്ന് പുതിയ കളിക്കാർ ഉയർന്നുവരുന്നു. അടുത്തിടെ, വനിതാ ലോകകപ്പ് നേടി ഭാരതത്തിന്റെ വനിതാ ക്രിക്കറ്റ് ടീം ചരിത്രം സൃഷ്ടിച്ചു. ആ വിജയത്തിൽ നമ്മുടെ ഗോത്രസമൂഹത്തിൽ നിന്നുള്ള ഒരു മകളും ഒരു പ്രധാന പങ്ക് വഹിച്ചു. ഗോത്രമേഖലകളിലെ പുതിയ പ്രതിഭകളെ തിരിച്ചറിയുന്നതിനും അവരെ പ്രോത്സാഹിപ്പിക്കുന്നതിനും നമ്മുടെ സർക്കാർ നിരന്തരം പ്രവർത്തിക്കുന്നു. ഗോത്രമേഖലകളിൽ കായിക സൗകര്യങ്ങളും വികസിപ്പിച്ചുകൊണ്ടിരിക്കുന്നു.

സുഹൃത്തുക്കളേ,

നമ്മുടെ ഗവൺമെന്റ് ദരിദ്രർക്ക് മുൻഗണന നൽകുക എന്ന കാഴ്ചപ്പാടോടെയാണ് പ്രവർത്തിക്കുന്നത്. ഇതിന് ഒരു വലിയ ഉദാഹരണമാണ് നമ്മുടെ നർമ്മദ ജില്ല. മുമ്പ്, ഇത് വേറിട്ടതായിരുന്നില്ല, ബറൂച്ച് ജില്ലയുടെ ഭാഗവും ഭാഗികമായി സൂറത്ത് ജില്ലയുടെ ഭാഗവുമായിരുന്നു. ഈ മുഴുവൻ പ്രദേശവും ഒരുകാലത്ത് പിന്നോക്കമായി കണക്കാക്കപ്പെട്ടിരുന്നു. ഞങ്ങൾ ഇതിന് മുൻഗണന നൽകി, ഈ ജില്ലയെ ഒരു അഭിലാഷ ജില്ലയാക്കി, ഇന്ന് ഇത് നിരവധി വികസന മാനദണ്ഡങ്ങളിൽ വളരെയധികം മുന്നേറിയിട്ടുണ്ട്. ഇത് ഇവിടെ താമസിക്കുന്ന ആദിവാസി സമൂഹത്തിന് വളരെയധികം ഗുണം ചെയ്തിട്ടുണ്ട്. ആദിവാസി ഭൂരിപക്ഷ സംസ്ഥാനങ്ങളിലേക്കും പിന്നാക്ക സമൂഹങ്ങളിലേക്കും നേരിട്ട് പോയി നിരവധി കേന്ദ്ര ​ഗവൺമെന്റ് പദ്ധതികൾ ഞങ്ങൾ ആരംഭിക്കുന്നത് നിങ്ങൾ കണ്ടിട്ടുണ്ട്. സൗജന്യ വൈദ്യചികിത്സയ്ക്കുള്ള ആയുഷ്മാൻ ഭാരത് പദ്ധതി 2018 ൽ ആരംഭിച്ചത് നിങ്ങൾ ഓർക്കുന്നുണ്ടാകും. ജാർഖണ്ഡിലെ റാഞ്ചിയിലെ ആദിവാസി മേഖലയിൽ നിന്നാണ് ഞങ്ങൾ ഈ പദ്ധതി ആരംഭിച്ചത്. ഇന്ന്, രാജ്യത്തെ കോടിക്കണക്കിന് ആദിവാസി സഹോദരീ സഹോദരന്മാർക്ക് ഈ പദ്ധതി പ്രകാരം 5 ലക്ഷം രൂപ വരെ സൗജന്യ വൈദ്യചികിത്സ ലഭിക്കുന്നു. ആദിവാസി ഭൂരിപക്ഷ പ്രദേശമായ ഛത്തീസ്ഗഡിൽ നിന്ന് ആയുഷ്മാൻ ആരോഗ്യ മന്ദിർ സംരംഭവും ​ഗവൺമെന്റ് ആരംഭിച്ചു. ഇതും ആദിവാസി സമൂഹത്തിന് വളരെയധികം ഗുണം ചെയ്തിട്ടുണ്ട്.

സുഹൃത്തുക്കളേ,

ആദിവാസി സമൂഹങ്ങളിൽ, ഏറ്റവും പിന്നോക്കം നിൽക്കുന്ന വിഭാഗങ്ങൾക്ക് നമ്മുടെ ​ഗവൺമെന്റ് പ്രത്യേക മുൻഗണന നൽകുന്നു. സ്വാതന്ത്ര്യം ലഭിച്ച് പതിറ്റാണ്ടുകൾക്ക് ശേഷവും വൈദ്യുതി, ജലവിതരണം, റോഡുകൾ, ആശുപത്രികൾ എന്നിവയില്ലാത്ത പ്രദേശങ്ങളിൽ, ഈ പ്രദേശങ്ങൾ വികസിപ്പിക്കുന്നതിനായി ജാർഖണ്ഡിലെ ഖുന്തിയിൽ നിന്ന് ഞങ്ങൾ പിഎം-ജൻമാൻ യോജന ആരംഭിച്ചു. ഭഗവാൻ ബിർസ മുണ്ട ഗ്രാമത്തിൽ ഞാൻ പോയിരുന്നു. ആ പുണ്യമണ്ണ് എന്റെ നെറ്റിയിൽ പുരട്ടി, ആദിവാസി സമൂഹങ്ങളുടെ ക്ഷേമത്തിനായി ഞാൻ പ്രതിജ്ഞയെടുത്തു. ആ പ്രതിബദ്ധതയോടെ മുന്നോട്ട് പോയ വ്യക്തിയാണ് ഞാൻ. ഭഗവാൻ ബിർസ മുണ്ടയുടെ വീട് സന്ദർശിച്ച ആദ്യത്തെ പ്രധാനമന്ത്രി ഞാനായിരുന്നു, ഇന്നും അദ്ദേഹത്തിന്റെ കുടുംബാംഗങ്ങളുമായി എനിക്ക് ആഴത്തിലുള്ള ബന്ധമുണ്ട്. പിഎം-ജൻമൻ പദ്ധതി പ്രകാരം 24,000 കോടി രൂപ ചെലവഴിക്കുന്നു.

സുഹൃത്തുക്കളേ,

പിന്നോക്ക ആദിവാസി ഗ്രാമങ്ങളുടെ വികസനത്തിൽ ധർത്തി ആബ ജൻജാതിയ ഗ്രാം ഉത്കഷ് അഭിയാൻ ഒരു പുതിയ അധ്യായം രചിക്കുന്നു. രാജ്യത്തുടനീളമുള്ള 60,000-ത്തിലധികം ഗ്രാമങ്ങൾ ഇതുവരെ ഈ കാമ്പെയ്‌നിൽ പങ്കുചേർന്നു. ഇതിൽ ആയിരക്കണക്കിന് ഗ്രാമങ്ങൾക്ക് ആദ്യമായി പൈപ്പിലൂടെ കുടിവെള്ളം ലഭിച്ചു. നൂറുകണക്കിന് ഗ്രാമങ്ങളിൽ ടെലി-മെഡിസിൻ സൗകര്യങ്ങൾ ആരംഭിച്ചു. ഈ കാമ്പെയ്‌നിന്റെ കീഴിൽ, ഗ്രാമസഭകളെ വികസനത്തിന്റെ കേന്ദ്രമാക്കി മാറ്റി. ആരോഗ്യം, വിദ്യാഭ്യാസം, പോഷകാഹാരം, കൃഷി, ഉപജീവനമാർഗ്ഗങ്ങൾ എന്നിവയെക്കുറിച്ചുള്ള കമ്മ്യൂണിറ്റി അധിഷ്ഠിത പദ്ധതികൾ ഗ്രാമങ്ങൾക്കായി തയ്യാറാക്കിക്കൊണ്ടിരിക്കുന്നു. എന്തെങ്കിലും നേടാൻ നാം ദൃഢനിശ്ചയം ചെയ്യുമ്പോൾ, ഏറ്റവും അസാധ്യമായ ലക്ഷ്യങ്ങൾ പോലും സാധ്യമാകുമെന്ന് ഈ കാമ്പെയ്‌ൻ കാണിക്കുന്നു.

സുഹൃത്തുക്കളേ,

ആദിവാസി സമൂഹങ്ങളുടെ ജീവിതത്തിന്റെ എല്ലാ വശങ്ങളും മനസ്സിൽ വെച്ചാണ് നമ്മുടെ ​ഗവൺമെന്റ് പ്രവർത്തിക്കുന്നത്. എം‌എസ്‌പിക്ക് അർഹമായ ചെറുകിട വന ഉൽ‌പന്നങ്ങളുടെ എണ്ണം 20 ൽ നിന്ന് ഏകദേശം 100 ആയി വർദ്ധിപ്പിച്ചു, കൂടാതെ എം‌എസ്‌പി നിരക്കുകളും വർദ്ധിപ്പിച്ചു. ആദിവാസി മേഖലകളിൽ കൃഷിയിൽ ഏർപ്പെട്ടിരിക്കുന്ന നമ്മുടെ ആദിവാസി സഹോദരീസഹോദരന്മാർക്ക് പ്രയോജനം ചെയ്യുന്ന ശ്രീ അന്നയെ നമ്മുടെ ​ഗവൺമെന്റ് ശക്തമായി പ്രോത്സാഹിപ്പിക്കുന്നു. ഗുജറാത്തിൽ, ഞങ്ങൾ നിങ്ങൾക്കായി വൻബന്ധു കല്യാൺ യോജന ആരംഭിച്ചു. ഇത് നിങ്ങൾക്ക് പുതിയ സാമ്പത്തിക ശക്തി നൽകി. ഞാൻ ഈ പദ്ധതി ആരംഭിച്ചപ്പോൾ, വിവിധ ഗോത്ര മേഖലകളിൽ നിന്നുള്ള ആളുകൾ മാസങ്ങളോളം എനിക്ക് നന്ദി പറയാനും അനുഗ്രഹിക്കാനും വന്നിരുന്നുവെന്ന് ഞാൻ ഓർക്കുന്നു. ഇത് വളരെ പരിവർത്തനാത്മകമായ ഒരു പദ്ധതിയായിരുന്നു. ഭൂപേന്ദ്രഭായ് , വൻബന്ധു കല്യാൺ യോജന വികസിപ്പിക്കുന്നു എന്നതിൽ എനിക്ക് സന്തോഷമുണ്ട്, ഇപ്പോൾ അത് ജൻജാതിയ കല്യാൺ യോജന പോലുള്ള പുതിയതും വിപുലവുമായ പരിപാടികൾ നിങ്ങൾക്കായി അവതരിപ്പിക്കുന്നു.

സഹോദരന്മാരേ,

നമ്മുടെ ആദിവാസി സമൂഹങ്ങൾക്കുള്ളിൽ അരിവാൾ കോശ രോഗം ഒരു പ്രധാന ഭീഷണിയായി മാറിയിരിക്കുന്നു. ഇതിനെ ചെറുക്കുന്നതിനായി, ആദിവാസി മേഖലകളിലെ ഡിസ്പെൻസറികൾ, മെഡിക്കൽ സെന്ററുകൾ, ആശുപത്രികൾ എന്നിവയുടെ എണ്ണം വർദ്ധിപ്പിച്ചിട്ടുണ്ട്. അരിവാൾ കോശ രോഗം പരിഹരിക്കുന്നതിനായി ഒരു ദേശീയ തല കാമ്പെയ്‌നും നടക്കുന്നുണ്ട്. ഈ സംരംഭത്തിന്റെ കീഴിൽ, രാജ്യത്തുടനീളം 6 കോടി ആദിവാസി സഹോദരീസഹോദരന്മാരെ ഇതിനകം പരിശോധിച്ചിട്ടുണ്ട്.

സുഹൃത്തുക്കളേ,

പുതിയ ദേശീയ വിദ്യാഭ്യാസ നയത്തിന് കീഴിൽ, പ്രാദേശിക ഭാഷകളിൽ വിദ്യാഭ്യാസവും ലഭ്യമാക്കിയിട്ടുണ്ട്. മുമ്പ്, ആദിവാസി സമൂഹങ്ങളിൽ നിന്നുള്ള നിരവധി കുട്ടികൾ ഭാഷാ തടസ്സങ്ങൾ കാരണം മാത്രം പിന്നിലായിരുന്നു. ഇപ്പോൾ, സ്വന്തം പ്രാദേശിക ഭാഷകളിൽ പഠിക്കുന്നതിലൂടെ, അവർ സ്വയം പുരോഗമിക്കുകയും രാജ്യത്തിന്റെ വികസനത്തിന് കൂടുതൽ കൂടുതൽ സംഭാവനകൾ നൽകുകയും ചെയ്യുന്നു.

സുഹൃത്തുക്കളേ,

ഗുജറാത്തിലെ നമ്മുടെ ആദിവാസി സമൂഹത്തിനും അസാധാരണമായ ഒരു കലാസമ്പത്ത് ഉണ്ട്. അവരുടെ ചിത്രങ്ങളും കലാസൃഷ്ടികളും അവരുടേതായ രീതിയിൽ സവിശേഷമാണ്. ഇവിടെ ഒരു മകൾ ഒരു പെയിന്റിംഗുമായി ഇരിക്കുന്നു. അവൾ അത് എനിക്കായി കൊണ്ടുവന്നതായി തോന്നുന്നു. SPG ഉദ്യോഗസ്ഥർ, ദയവായി മകളിൽ നിന്ന് അത് എടുക്കുക. അതിൽ എനിക്ക് വാർലി പെയിന്റിംഗുകൾ കാണാൻ കഴിയും. നന്ദി കുഞ്ഞേ. നിങ്ങളുടെ വിലാസം അതിനൊപ്പം ലഭ്യമാണെങ്കിൽ, ഞാൻ നിങ്ങൾക്ക് ഒരു കത്ത് എഴുതാം. വളരെ നന്ദി. കലാപരമായ ആവിഷ്കാരം ഇവിടെ സ്വാഭാവികമാണ്. നമ്മുടെ പരേഷ്ഭായ് രത്വയെപ്പോലുള്ള കലാകാരന്മാർ ഈ കലാരൂപങ്ങളെ മുന്നോട്ട് കൊണ്ടുപോകുന്നു. നമ്മുടെ ​ഗവൺമെന്റ് പരേഷ്ഭായ് രത്വയെ പത്മ അവാർഡ് നൽകി ആദരിച്ചതിൽ എനിക്ക് സംതൃപ്തി തോന്നുന്നു.

സുഹൃത്തുക്കളേ,

ഏതൊരു സമൂഹത്തിന്റെയും പുരോഗതിക്ക് ജനാധിപത്യത്തിൽ ശരിയായ പങ്കാളിത്തം ഒരുപോലെ പ്രധാനമാണ്. അതുകൊണ്ടാണ് നമ്മുടെ ലക്ഷ്യം നമ്മുടെ ആദിവാസി സഹോദരീസഹോദരന്മാർ രാജ്യത്ത് ഉയർന്ന സ്ഥാനങ്ങളിൽ എത്തുകയും രാജ്യത്തെ നയിക്കുകയും ചെയ്യുന്നുവെന്ന് ഉറപ്പാക്കുക എന്നതാണ്. നോക്കൂ, ഇന്ന് രാജ്യത്തിന്റെ രാഷ്ട്രപതി ഒരു ആദിവാസി സ്ത്രീയാണ്. അതുപോലെ, ബിജെപിയും എൻഡിഎയും എപ്പോഴും ആദിവാസി സമൂഹത്തിലെ കഴിവുള്ള അംഗങ്ങളെ ഉന്നത സ്ഥാനങ്ങളിലേക്ക് ഉയർത്താൻ ശ്രമിച്ചിട്ടുണ്ട്. ഇന്ന്, ഛത്തീസ്ഗഢ് മുഖ്യമന്ത്രിയായ നമ്മുടെ ആദിവാസി സഹോദരൻ ശ്രീ വിഷ്ണു ദിയോ സായ് സംസ്ഥാനത്തെ പരിവർത്തനം ചെയ്യുകയാണ്. ശ്രീ മോഹൻ ചരൺ മാജി ഭഗവാൻ ജഗന്നാഥന്റെ അനുഗ്രഹത്താൽ ഒഡീഷയുടെ വികസനത്തിന് നേതൃത്വം നൽകുന്നു. അരുണാചൽ പ്രദേശിൽ, നമ്മുടെ ആദിവാസി സഹോദരൻ പേമ ഖണ്ഡു മുഖ്യമന്ത്രിയായി സേവനമനുഷ്ഠിക്കുന്നു. നാഗാലാൻഡിൽ, നമ്മുടെ ആദിവാസി സഹോദരൻ നെയ്ഫിയു റിയോയും സേവനമനുഷ്ഠിക്കുന്നു. നിരവധി സംസ്ഥാനങ്ങളിൽ ഞങ്ങൾ ആദിവാസി മുഖ്യമന്ത്രിമാരെ നിയമിച്ചിട്ടുണ്ട്. പല സംസ്ഥാന അസംബ്ലികളിലും, ഞങ്ങളുടെ പാർട്ടി ആദിവാസി സ്പീക്കറെ നിയമിച്ചിട്ടുണ്ട്. നമ്മുടെ ഗുജറാത്തിൽ നിന്നുള്ള മംഗുഭായ് പട്ടേൽ മധ്യപ്രദേശ് ഗവർണറാണ്. നമ്മുടെ കേന്ദ്ര സർക്കാരിൽ, സർബാനന്ദ സോനോവാൾ ഒരു ആദിവാസി സമൂഹത്തിൽ നിന്നുള്ളയാളാണ്, മുഴുവൻ ഷിപ്പിംഗ് മന്ത്രാലയവും കൈകാര്യം ചെയ്യുന്ന അദ്ദേഹം ഒരിക്കൽ അസം മുഖ്യമന്ത്രിയായിരുന്നു.

സുഹൃത്തുക്കളേ,

ഈ നേതാക്കൾ രാഷ്ട്രത്തിന് നൽകിയ സേവനവും രാജ്യത്തിന്റെ വികസനത്തിന് അവർ നൽകിയ സംഭാവനയും അതുല്യവും അഭൂതപൂർവവുമാണ്.

സുഹൃത്തുക്കളേ,

ഇന്ന് നമ്മുടെ രാജ്യത്തിന് "സബ്കാ സാത്ത്, സബ്കാ വികാസ്" (എല്ലാവർക്കും ഒപ്പം, എല്ലാവരുടേയും വികസനം) എന്ന മന്ത്രത്തിന്റെ ശക്തിയുണ്ട്. സമീപ വർഷങ്ങളിൽ കോടിക്കണക്കിന് ആളുകളുടെ ജീവിതത്തെ ഈ മന്ത്രം പരിവർത്തനം ചെയ്തിട്ടുണ്ട്. ഈ മന്ത്രം നമ്മുടെ രാജ്യത്തിന്റെ ഐക്യത്തെ ശക്തിപ്പെടുത്തി. പതിറ്റാണ്ടുകളായി അവഗണിക്കപ്പെട്ടിരുന്ന ആദിവാസി സമൂഹങ്ങളെ മുഖ്യധാരയുമായി ഈ മന്ത്രം ബന്ധിപ്പിച്ചു. അത് അവരെ ബന്ധിപ്പിക്കുക മാത്രമല്ല, സമൂഹത്തെ മൊത്തത്തിൽ നയിക്കാൻ അവരെ പ്രാപ്തരാക്കുകയും ചെയ്തു. അതിനാൽ, ഭഗവാൻ ബിർസ മുണ്ടയുടെ 150-ാം ജന്മവാർഷികത്തിന്റെ പവിത്രമായ വേളയിൽ, "സബ്കാ സാത്ത്, സബ്കാ വികാസ്" എന്ന മന്ത്രം ശക്തിപ്പെടുത്താൻ നാം ദൃഢനിശ്ചയം ചെയ്യണം. ആരും വികസനത്തിൽ പിന്നോട്ട് പോകരുത്, ആരും അതിൽ നിന്ന് ഒഴിവാക്കപ്പെടരുത്. ധർത്തി ആബയുടെ കാൽക്കൽ അർപ്പിക്കുന്ന യഥാർത്ഥ ശ്രദ്ധാഞ്ജലി ഇതാണ്. നമ്മൾ ഒരുമിച്ച് മുന്നോട്ട് പോകുമെന്നും 'വികസിത് ഭാരത്' (വികസിത ഇന്ത്യ) എന്ന സ്വപ്നം സാക്ഷാത്കരിക്കുമെന്നും എനിക്ക് ഉറപ്പുണ്ട്. ഈ ദൃഢനിശ്ചയത്തോടെ, ഗോത്ര അഭിമാന ദിനത്തിൽ നിങ്ങൾക്കെല്ലാവർക്കും ഞാൻ വീണ്ടും ആശംസകൾ നേരുന്നു. എല്ലാ പൗരന്മാരോടും ഞാൻ പറയാൻ ആഗ്രഹിക്കുന്നു, ജൻജാതിയ ഗൗരവ് ദിവസ് നമ്മുടെ മണ്ണിന്റെ സുഗന്ധം വഹിക്കുന്നു. രാജ്യത്തിന്റെ സാംസ്കാരിക പൈതൃകം സംരക്ഷിച്ച നമ്മുടെ ഗോത്ര സമൂഹങ്ങളുടെ പാരമ്പര്യങ്ങൾ അതിൽ ഉൾക്കൊള്ളുന്നു. അവരുടെ ശക്തി, ധൈര്യം, വരാനിരിക്കുന്ന കാലഘട്ടത്തിനായുള്ള അവരുടെ അഭിലാഷങ്ങൾ എന്നിവ ഇതിൽ ഉൾപ്പെടുന്നു. അതിനാൽ, ഭഗവാൻ ബിർസ മുണ്ടയുടെ ജന്മദിനമായ നവംബർ 15, രാജ്യത്തിന്റെ എല്ലാ കോണുകളിലും നാം വലിയ ബഹുമാനത്തോടെ ജൻജാതിയ ഗൗരവ് ദിവസ് ആയി ആഘോഷിക്കണം. പുതിയ ശക്തിയോടെ, പുതുക്കിയ ആത്മവിശ്വാസത്തോടെ നാം മുന്നോട്ട് പോകണം, പുതിയ ഉയരങ്ങൾ കൈവരിക്കുമ്പോൾ ഭാരതത്തിന്റെ വേരുകളുമായി ബന്ധം പുലർത്തണം. ഈ വിശ്വാസത്തോടെ, വളരെ നന്ദി.

ഭാരത് മാതാ കീ ജയ്!

ഭാരത് മാതാ കീ ജയ്!

ഭാരത് മാതാ കീ ജയ്!

വന്ദേമാതരം 150 വർഷം പൂർത്തിയാക്കിയതായി നമുക്കെല്ലാവർക്കും അറിയാം. അത് ഭാരതത്തിന്റെ മഹത്തായ പ്രചോദനത്തെയും, അതിന്റെ നീണ്ട യാത്രയെയും, അതിന്റെ നീണ്ട പോരാട്ടത്തെയും പ്രതിനിധീകരിക്കുന്നു. എല്ലാ വിധത്തിലും, വന്ദേമാതരം ഒരു മന്ത്രമായി മാറിയിരിക്കുന്നു. നാം അതിന്റെ 150 വർഷങ്ങൾ ആഘോഷിക്കുകയാണ്. എന്നോടൊപ്പം പറയൂ -

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വന്ദേമാതരം!

വളരെ നന്ദി.

****