ଭୂଟାନର ରାଜା ଜିଗମେ ଖେସର ନାମଗୟାଲ ୱାଙ୍ଗ୍‌ଚୁକଙ୍କ ନିମନ୍ତ୍ରଣ କ୍ରମେ, ଭାରତର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୧୧-୧୨ ନଭେମ୍ବର ୨୦୨୫ ପର୍ଯ୍ୟନ୍ତ ଦୁଇ ଦିନିଆ ଭୂଟାନ ଗସ୍ତରେ ଯାଇଥିଲେ ।

ଏହି ଗସ୍ତ ସମୟରେ, ପ୍ରଧାନମନ୍ତ୍ରୀ ମୋଦୀ ୧୧ ନଭେମ୍ବର ୨୦୨୫ରେ ଚାଙ୍ଗଲମିଥାଙ୍ଗରେ ଚତୁର୍ଥ ଡ୍ରୁକ ଗ୍ୟାଲପୋଙ୍କ ୭୦ତମ ଜୟନ୍ତୀ ଅବସରରେ ଭୂଟାନର ଲୋକଙ୍କ ସହିତ ସମ୍ମାନିତ ଅତିଥି ଭାବରେ ଯୋଗ ଦେଇଥିଲେ । ପ୍ରଧାନମନ୍ତ୍ରୀ ଶ୍ରୀ ମୋଦୀ ଥିମ୍‌ପୁରେ ଚାଲିଥିବା ବିଶ୍ୱ ଶାନ୍ତି ପ୍ରାର୍ଥନା ମହୋତ୍ସବରେ ମଧ୍ୟ ଅଂଶଗ୍ରହଣ କରିଥିଲେ । ଭୂଟାନର ରାଜା ମହୋତ୍ସବ ସମୟରେ ସାର୍ବଜନୀନ ସମ୍ମାନ ପାଇଁ ଥିମ୍‌ପୁରରେ ଭାରତରୁ ଆସିଥିବା ଭଗବାନ ବୁଦ୍ଧଙ୍କ ପବିତ୍ର ପିପରାହୱା ଅବଶେଷର ଉପସ୍ଥିତିକୁ ପ୍ରଶଂସା କରିଥିଲେ ।

ପ୍ରଧାନମନ୍ତ୍ରୀ ମୋଦୀ ରାଜା ଏବଂ ଚତୁର୍ଥ ଡ୍ରୁକ ଗୟାଲପୋଙ୍କ ସହିତ ଦର୍ଶକଙ୍କୁ ସ୍ୱାଗତ କରିଥିଲେ ଏବଂ ଭୁଟାନର ପ୍ରଧାନମନ୍ତ୍ରୀ ଦାସୋ ଶେରିଂ ଟୋବଗେଙ୍କ ସହିତ ଆଲୋଚନା କରିଥିଲେ । ନେତାମାନଙ୍କ ମଧ୍ୟରେ ଦ୍ୱିପାକ୍ଷିକ ସହଯୋଗର ପ୍ରମୁଖ କ୍ଷେତ୍ର ଏବଂ ପାରସ୍ପରିକ ସ୍ୱାର୍ଥର ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗଗୁଡିକ ଉପରେ ଆଲୋଚନା ହୋଇଥିଲା ।

ରାଜା ନଭେମ୍ବର ୧୦ ତାରିଖରେ ଦିଲ୍ଲୀରେ ହୋଇଥିବା ବିସ୍ଫୋରଣରେ ହୋଇଥିବା ଜୀବନହାନୀ ପାଇଁ ରାଜକୀୟ ସରକାର ଏବଂ ଭୂଟାନ ଲୋକଙ୍କ ତରଫରୁ ଗଭୀର ସମବେଦନା ଜଣାଇଥିଲେ । ଏଥିସହ ଆହତମାନଙ୍କ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରିଥିଲେ । ଭାରତ ପକ୍ଷରୁ ଭୁଟାନର ସମର୍ଥନ ଏବଂ ଏକତାର ବାର୍ତ୍ତାକୁ ପ୍ରଶଂସା କରାଯାଇଥିଲା ।

ପ୍ରଧାନମନ୍ତ୍ରୀ ମୋଦୀ ଆର୍ଥିକ ପ୍ରୋତ୍ସାହନ କାର୍ଯ୍ୟକ୍ରମ ସମେତ ଭୂଟାନର ତ୍ରୟୋଦଶ ପଞ୍ଚବାର୍ଷିକ ଯୋଜନା ପ୍ରତି ଭାରତର ନିରନ୍ତର ସମର୍ଥନକୁ ପୁନଃଦୋହରାଇଥିଲେ । ଏଥିସହ ଭୂଟାନର ପ୍ରମୁଖ ବିକାଶ ପ୍ରାଥମିକତା ହାସଲ କରିବାରେ ଏବଂ ବିଭିନ୍ନ କ୍ଷେତ୍ରରେ ସ୍ଥାୟୀ ଅଭିବୃଦ୍ଧିକୁ ଆଗେଇ ନେବାରେ ସକ୍ରିୟ ଭାବରେ ସହାୟତା କରିବା ପାଇଁ ଭାରତର ପ୍ରତିବଦ୍ଧତା ଉପରେ ମଧ୍ୟ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଭୂଟାନର ପ୍ରତିନିଧିମଣ୍ଡଳ ଭୂଟାନର ତ୍ରୟୋଦଶ ପଞ୍ଚବାର୍ଷିକ ଯୋଜନା ଅବଧିରେ ଭୂଟାନରେ କାର୍ଯ୍ୟାନ୍ୱୟନାଧୀନ ବିଭିନ୍ନ ପ୍ରକଳ୍ପ ଏବଂ ଦେଶର ବିକାଶରେ ସେମାନଙ୍କର ଅବଦାନ ପାଇଁ ଭାରତର ସହାୟତାକୁ ପ୍ରଶଂସା କରିଥିଲେ ।

ଗେଲେଫୁ ମାଇଣ୍ଡଫୁଲନେଓ ସିଟି ପାଇଁ ମହାମହିମଙ୍କୁ ଦୃଷ୍ଟିକୋଣକୁ ସାକାର କରିବା ପାଇଁ ପ୍ରଧାନମନ୍ତ୍ରୀ ମୋଦୀ ଭାରତ ସରକାରଙ୍କ ପୂର୍ଣ୍ଣ ସମର୍ଥନ ଜଣାଇଥିଲେ । ଗେଲେଫୁକୁ ନିବେଶକ ଏବଂ ପରିଦର୍ଶକଙ୍କ ସହଜ ଗତିବିଧିକୁ ସୁଗମ କରିବା ପାଇଁ ସେ ଆସାମର ହତିସାରରେ ଏକ ଇମିଗ୍ରେସନ ଚେକ ପୋଷ୍ଟ ସ୍ଥାପନ କରିବାକୁ ଘୋଷଣା କରିଥିଲେ । ଗୟାସୁଙ୍ଗ ଏକାଡେମୀ ନିର୍ମାଣ ପାଇଁ ଭାରତ ସରକାରଙ୍କ ସମର୍ଥନକୁ ରାଜା ପ୍ରଶଂସା କରିଥିଲେ ।

ରାଜା ଏବଂ ପ୍ରଧାନମନ୍ତ୍ରୀ ମୋଦୀ ୧୧ ନଭେମ୍ବର ୨୦୨୫ରେ ଭଗବାନ ବୁଦ୍ଧଙ୍କ ପବିତ୍ର ପପିରାହୱା ଅବଶେଷର ଉପସ୍ଥିତିରେ ମିଳିତ ଭାବରେ ୧୦୨୦ ମେଗାୱାଟ ପୁନାତସାଂଚୁ-୨ ଜଳବିଦ୍ୟୁତ ପ୍ରକଳ୍ପର ଉଦ୍‌ଘାଟନ କରିଥିଲେ । ଏହି ପ୍ରକଳ୍ପ ଜଳବିଦ୍ୟୁତ କ୍ଷେତ୍ରରେ ଭୂଟାନ ଏବଂ ଭାରତ ମଧ୍ୟରେ ବନ୍ଧୁତା ଏବଂ ଅନୁକରଣୀୟ ସହଯୋଗର ପ୍ରମାଣ ସ୍ୱରୂପ ରହିଛି । ସେମାନେ ପୁନାତସାଂଚୁ-୨ରୁ ଭାରତକୁ ବିଦ୍ୟୁତ ରପ୍ତାନି ଆରମ୍ଭକୁ ସ୍ୱାଗତ କରିଥିଲେ । ଉଭୟ ପକ୍ଷ ମାର୍ଚ୍ଚ ୨୦୨୪ରେ ଶକ୍ତି ସହଭାଗୀତା ଉପରେ ମିଳିତ ଦୃଷ୍ଟିକୋଣର କାର୍ଯ୍ୟାନ୍ୱୟନରେ ସନ୍ତୋଷ ପ୍ରକାଶ କରିଥିଲେ ।

ଉଭୟ ନେତା ୧୨୦୦ ମେଗାୱାଟ ପୁନାତସାଂଚୁ-୧ ଜଳବିଦ୍ୟୁତ ପ୍ରକଳ୍ପର ମୁଖ୍ୟ ବନ୍ଧ ଗଠନ ଉପରେ କାର୍ଯ୍ୟ ପୁନଃଆରମ୍ଭ ସମ୍ପର୍କରେ ହୋଇଥିବା ବୁଝାମଣାକୁ ସ୍ୱାଗତ କରିଥିଲେ ଏବଂ ପ୍ରକଳ୍ପର ତ୍ୱରିତ ସମାପ୍ତି ପାଇଁ କାର୍ଯ୍ୟ କରିବାକୁ ରାଜି ହୋଇଥିଲେ । ପୁନାତସାଂଚୁ-୧ ଜଳବିଦ୍ୟୁତ ପ୍ରକଳ୍ପର କାର୍ଯ୍ୟ ସମାପ୍ତ ହେବା ପରେ, ଏହା  ଉଭୟ ସରକାରଙ୍କ ଦ୍ୱାରା ମିଳିତ ଭାବରେ ବିକଶିତ ସର୍ବବୃହତ ଜଳବିଦ୍ୟୁତ ପ୍ରକଳ୍ପ ହେବ ।

ସେମାନେ ଭୂଟାନରେ ଜଳବିଦ୍ୟୁତ ପ୍ରକଳ୍ପରେ ଭାରତୀୟ କମ୍ପାନୀଗୁଡିକର ସକ୍ରିୟ ଯୋଗଦାନକୁ ସ୍ୱାଗତ କରିଛନ୍ତି । ଭୂଟାନରେ ଶକ୍ତି ପ୍ରକଳ୍ପଗୁଡିକୁ ପାଣ୍ଠି ଯୋଗାଇବା ପାଇଁ ଭାରତ ସରକାରଙ୍କ ଦ୍ୱାରା ୪୦ ବିଲିୟନ ଟଙ୍କା ରିହାତି ଋଣ ସହାୟତା ଘୋଷଣା ପାଇଁ ଭୂଟାନ ପକ୍ଷ ପ୍ରଶଂସା କରିଛନ୍ତି ।

ଉଭୟ ପକ୍ଷ ସମନ୍ୱିତ ଚେକ୍ ପୋଷ୍ଟ ସ୍ଥାପନ ସମେତ ସୀମାପାର ସଂଯୋଗୀକରଣ ଏବଂ ସୀମାନ୍ତ ଭିତ୍ତିଭୂମିର ସମ୍ପ୍ରସାରଣର ଗୁରୁତ୍ୱକୁ ରେଖାଙ୍କିତ କରିଥିଲେ । ସେମାନେ ନଭେମ୍ବର ୨୦୨୪ରେ ଦର୍‌ରଙ୍ଗାରେ ଇମିଗ୍ରେସନ ଚେକ୍ ପୋଷ୍ଟ ଏବଂ ମାର୍ଚ୍ଚ ୨୦୨୫ରେ ଜୋଗିଗୋଫାରେ ଆଭ୍ୟନ୍ତରୀଣ ଜଳପଥ ଟର୍ମିନାଲ ଏବଂ ମଲ୍‌ଟିମୋଡାଲ ଲଜିଷ୍ଟିକ୍ସ ପାର୍କ କାର୍ଯ୍ୟକ୍ଷମକୁ ସ୍ୱାଗତ କରିଛନ୍ତି । ଉଭୟ ପକ୍ଷ ସେପ୍ଟେମ୍ବର ୨୦୨୫ରେ ସୀମାପାର ରେଳ ସଂଯୋଗ (ଗେଲେଫୁ-କୋକରାଝାର ଏବଂ ସମତ୍ସେ-ବାନରହାଟ) ନିର୍ମାଣ ପାଇଁ ବୁଝାମଣାପତ୍ର (ଏମ୍‌ଓୟୁ) ସ୍ୱାକ୍ଷର ଏବଂ ପରବର୍ତ୍ତୀ ସମୟରେ ପ୍ରକଳ୍ପ କାର୍ଯ୍ୟାନ୍ୱୟନ ପାଇଁ ପ୍ରକଳ୍ପ ପରିଚାଳନା କମିଟି ପ୍ରତିଷ୍ଠାକୁ ମଧ୍ୟ ସ୍ୱାଗତ କରିଛନ୍ତି ।

ଭୂଟାନୀ ପକ୍ଷ ଭୂଟାନକୁ ଅତ୍ୟାବଶ୍ୟକ ସାମଗ୍ରୀ ଏବଂ ସାର ନିରନ୍ତର ଯୋଗାଣ ପାଇଁ ବ୍ୟବସ୍ଥାକୁ ସଂସ୍ଥାଗତ କରିବା ପାଇଁ ଭାରତ ସରକାରଙ୍କ ଦ୍ୱାରା ନିଆଯାଇଥିବା ପଦକ୍ଷେପ ପାଇଁ ପ୍ରଶଂସା କରିଛନ୍ତି । ନୂତନ ବ୍ୟବସ୍ଥା ଅଧୀନରେ ଭାରତରୁ ସାରର ପ୍ରଥମ ପଠାଣକୁ ଉଭୟ ପକ୍ଷ ସ୍ୱାଗତ କରିଛନ୍ତି ।

ଉଭୟ ପକ୍ଷ ଏସ୍‌ଟିଇଏମ, ଫିନ୍‌ଟେକ୍ ଏବଂ ମହାକାଶ ଭଳି ନୂତନ କ୍ଷେତ୍ରରେ ବୃଦ୍ଧି ପାଉଥିବା ସହଯୋଗ ଉପରେ ସନ୍ତୋଷ ପ୍ରକାଶ କରିଛନ୍ତି । ସେମାନେ ୟୁପିଆଇର ଦ୍ୱିତୀୟ ପର୍ଯ୍ୟାୟ କାର୍ଯ୍ୟକୁ ସ୍ୱାଗତ କରିଛନ୍ତି, ଯାହା ଭାରତକୁ ଆସୁଥିବା ଭୂଟାନ ପରିଦର୍ଶକମାନଙ୍କୁ କ୍ୟୁଆର୍ କୋଡ ସ୍କାନ କରି ସ୍ଥାନୀୟ ମୋବାଇଲ ଆପ୍ଲିକେସନ ବ୍ୟବହାର କରି ପେମେଣ୍ଟ କରିବାକୁ ସକ୍ଷମ କରିବ । ସେମାନେ ମହାକାଶ ସହଯୋଗ ଉପରେ ମିଳିତ କାର୍ଯ୍ୟ ଯୋଜନା କାର୍ଯ୍ୟକାରୀ କରିବାରେ ସନ୍ତୋଷ ପ୍ରକାଶ କରିଛନ୍ତି । ଉଭୟ ପକ୍ଷ ସେମାନେ ଭୂଟାନରେ ଏସ୍‌ଟିଇଏମ୍ ଶିକ୍ଷା ଏବଂ ସ୍ୱାସ୍ଥ୍ୟସେବା ବୃଦ୍ଧି କରିବାରେ ଭାରତୀୟ ଶିକ୍ଷକ ଏବଂ ନର୍ସମାନଙ୍କ ଅମୂଲ୍ୟ ଅବଦାନକୁ ମଧ୍ୟ ସ୍ୱୀକାର କରିଛନ୍ତି ।

ରାଜଗିରରେ ରୟାଲ ଭୂଟାନ ମନ୍ଦିରର ଅଭିଷେକ ଏବଂ ଭୂଟାନ ମନ୍ଦିର ତଥା ଅତିଥି ଭବନ ନିର୍ମାଣ ପାଇଁ ଭାରତ ସରକାରଙ୍କ ବାରଣାସୀରେ ଜମି ପ୍ରଦାନ ନିଷ୍ପତ୍ତିକୁ ସ୍ୱାଗତ କରିଛନ୍ତି ।

ଗସ୍ତ ସମୟରେ ଦୁଇ ଦେଶ ମଧ୍ୟରେ ନିମ୍ନଲିଖିତ ବୁଝାମଣା ପତ୍ର ସ୍ୱାକ୍ଷରିତ ହୋଇଥିଲା:

କ. ନବୀକରଣୀୟ ଶକ୍ତି କ୍ଷେତ୍ରରେ ସହଯୋଗ ପାଇଁ ଭୂଟାନର ରାଜକୀୟ ସରକାରଙ୍କ ଶକ୍ତି ଏବଂ ପ୍ରାକୃତିକ ସମ୍ପଦ ମନ୍ତ୍ରଣାଳୟ (ଆର୍‌ଜିଓବି) ଏବଂ ଭାରତ ସରକାରଙ୍କ ନୂତନ ଏବଂ ନବୀକରଣୀୟ ଶକ୍ତି ମନ୍ତ୍ରଣାଳୟ (ଜିଓଆଇ) ମଧ୍ୟରେ ବୁଝାମଣା;

ଖ. ସ୍ୱାସ୍ଥ୍ୟ ଏବଂ ଔଷଧ କ୍ଷେତ୍ରରେ ସହଯୋଗ ପାଇଁ ଭୂଟାନର ସ୍ୱାସ୍ଥ୍ୟ ମନ୍ତ୍ରଣାଳୟ ଏବଂ ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ମଧ୍ୟରେ ବୁଝାମଣାପତ୍ର;

ଗ. ସଂସ୍ଥାଗତ ସଂଯୋଗ ସ୍ଥାପନ ପାଇଁ ପିଇଏମ୍‌ଏ ସଚିବାଳୟ ଏବଂ ଭାରତ ସରକାରଙ୍କ ଜାତୀୟ ମାନସିକ ସ୍ୱାସ୍ଥ୍ୟ ଏବଂ ନ୍ୟୁରୋ ସାଇନ୍ସ ସଂସ୍ଥାନ ମଧ୍ୟରେ ବୁଝାମଣା;

ଭୂଟାନ-ଭାରତ ସହଭାଗୀତା ସମସ୍ତ ସ୍ତରରେ ଗଭୀର ବିଶ୍ୱାସ, ମଧୁର ବନ୍ଧୁତା, ପାରସ୍ପରିକ ସମ୍ମାନ ତଥା ବୁଝାମଣା ଉପରେ ନିର୍ମିତ ଏବଂ ଦୃଢ଼ ଲୋକ-ସମ୍ପର୍କ ସହିତ ନିକଟତମ ଆର୍ଥିକ ଏବଂ ବିକାଶମୂଳକ ସହଯୋଗ ଦ୍ୱାରା ଆହୁରି ମଜବୁତ ହୋଇଛି । ଏହି ଗସ୍ତ ଦୁଇ ଦେଶ ମଧ୍ୟରେ ନିୟମିତ ଉଚ୍ଚସ୍ତରୀୟ ଆଦାପ୍ରଦାନର ପରମ୍ପରାକୁ ପୁନଃନିର୍ଦ୍ଦିଷ୍ଟ କରିଛି ଏବଂ ଭବିଷ୍ୟତରେ ଏହାକୁ ବଳବତ୍ତର ରଖିବାକୁ ଉଭୟ ପକ୍ଷ ସହମତ ହୋଇଛନ୍ତି ।

SR