ঙসি প্রধান মন্ত্রী শ্রী নরেন্দ্র মোদীনা মালেমদা রাষ্ট্রপতিগী ওফিসতা মালদিবসকী রাষ্ট্রপতি দোক্তর মোহমদ মুইজু উনখ্রে। রাষ্ট্রপতি মুইজুনা প্রধান মন্ত্রী তরাম্না ওকখি অমসুং রিপব্লিক স্কারদা চৎনবগী মতুংইন্না তরাম্না ওকখি। উনখিবা অদুনা লৈবাক অনিগী মরক্ত লৈনরিবা অচেৎপা মরুপ-মপাং ওইবগী মরী হেন্না চেৎশীনহনখ্রে।

মহাক অমসুং মহাক্কী মীহুৎ কাংবু তরাম্না ওকপগীদমক প্রধান মন্ত্রীনা থাগৎপা ফোঙদোকখ্রে অমসুং মালদিবসকী ৬০ শুবা নিংতম্বগী থৌরম অমসুং লৈবাক অনিগী মরক্ত কুতনিতিগী মরী লৈনরকপগী চহি ৬০ মপুংফারকপগী অখন্নবা থৌরমদা প্রধান মন্ত্রীনা মহাক্কী য়াইফ পাউজেল পীখ্রে।

চহি কয়া শুরবা মরুপ-মপাং ওইবা অমসুং থাজনবগী মরীশিং অমসুং মীগা মীগা লৈনবা অকনবা মরীশিং লুচিংবশিংনা খন্নখি। ওক্তোবর ২০২৪ দা মালদিবসকী রাষ্ট্রপতিগী ভারত খোঙচত্ত চৎনবা হৌখিবা “কমপ্রেহেন্সিপ ইকোনোমিক এন্দ মেরিতাইম সেকুরিতি পার্তনরশিপ” গী ইন্দিয়া-মালদিবস জোইন্ত ভিজন থবক ওইনা পায়খৎপদা লৈরিবা ফিবমসু লুচিংবা অনিনা য়েংশিনখ্রে। লৈবাক অসিগী “য়ুম্লোন্নবনা হান্না” অমসুং ভিজন মহাসাগর থৌশিলশিংগা লোয়ননা মালদিবসকা লৈনবা মরীশিং মখা তানা ফগৎহন্নবা ভারতকী থাজবা প্রধান মন্ত্রীনা অমুক হন্না ফোঙদোকখি। খুদোংথিবা অমা লাকপা মতমদা মালদিবসকী অহানবা মতেং পাংবা লৈবাক অমা ওইরিবা ভারতকী থবকশিং রাষ্ট্রপতি মুইজুনা থাগৎপা ফোঙদোকখি। চাউখৎ-থৌরাং, ইনফ্রাষ্ট্রকচর, কেপাসিতি বিল্দিং, ক্লাইমেত এক্সন অমসুং হকশেলগী হিরমশিংদা মতেং পাংন্নবা মখোয়না খন্নখি। দিফেন্স অমসুং মেরিতাইম সেকুরিতিগী মতেং পাংনবা হেনগৎহন্নবসু মখোয়না খন্নখি অমসুং হিরম অশিদা কলম্বো সেকুরিতি কনক্লেপকী মখাদা লৈবাক অনিগী মরক্ত মতেং পাংনবগী মতাংদা খন্নখি।

লৈবাক অনিগী মরক্ত লৈনরিবা শেন-থুমগী মরীশিংসু লুচিংবা অনিনা হন্না য়েংশিনখ্রে। থৌরাং তৌরিবা ফ্রি ত্রেদ এগ্রিমেন্ত অমসুং বাইলেতরেল ইনভেষ্টমেন্ত ত্রিতিনা নাকল অনিমক্ত পীগদৌরিবা অনৌবা খুদোংচাবশিং প্রধান মন্ত্রীনা পনখি। মরুওইনা তুরিজম চাউখৎনবা, লৈবাক অনিনা দিজিতেল ইকোনোমিগী খুদোংচাবা লৌনবা পল্লদুনা, য়ু.পি.আই শীজিন্নবা, রুপে কার্দ অয়াবা পীবা অমসুং লোকেল করেন্সিশিংদা ললোন-ইতিক পাংথোক্নবা য়ানবা পুরকপদা প্রধান মন্ত্রীনা তরাম্না ওকখি। লৈবাক অনিগী মরক্ত চাউখৎ-থৌরাংগী মতাংদা অচেৎপা মরী লৈনবা অসিনা হান্নদগী লৈরক্লবা মীগা মীগা লৈনবা মরীশিংদা অনৌবা মগুন অমা হাপচিল্লগনি হায়না লুচিংবা অনিনা ফোঙদোকখি।

গ্লোবেল সাউথকী মরুপশিং ওইনা, গ্রহ অমসুং মসিগী মীয়ামগী য়াইফনবা  ক্লাইমেত চেঞ্জ, রিন্যুএবল ইনর্জি য়োকখৎপা, দিজাষ্টর রিক্স হন্থহনবা অমসুং ৱেদর সাইন্সকী হিরমশিংদা মখোয় মখা তানা থবক তৌমিন্নগনি হায়না লুচিংবশিংনা ফোঙদোকখি।

পহালগাম তেরর এক্তেক অকনবা মওংদা য়ানিংদবা ফোঙদোকখিবা অমসুং তেরোরিজমগী মায়োক্ত লান্থেংনরিবা অসিদা ভারত মপুংফানা শৌগৎপগীদমক প্রধান মন্ত্রীনা রাষ্ট্রপতি মুইজু থাগৎপা ফোঙদোকখি।

ফিসরিজ অমসুং এক্বাকলচর, মেতিওরোলোজি, দিজিতেল পব্লিক ইনফ্রাষ্ট্রকচর, য়ু.পি.আই, ইন্দিয়ান ফার্মাকোপোইয়া অমসুং কন্সেসেনেল লাইন ওফ ক্রেদিৎকী হিরমশিংদা এম.ও.য়ু ৬ খুৎশীন্নবদা লুচিংবশিংনা শরুক য়াখ্রে। মালদিবসতা ইনফ্রাষ্ট্রকচর চাউখৎনবা অমসুং অতোপ্পা থবকশিংগীদমক লুপা করোর ৪৮৫০ গী অনৌবা লাইন ওফ ক্রেদিৎ পীরে। হৌজিক লৈনরিবা এল.ও.সিশিংগী অমেন্দতোরি এগ্রিমেন্ত অমসু খুৎশীন্নখ্রে। মসিনা মালদিবসনা শেন তোনবগী চহিগী শেন শিংদোকপা চাদা ৪০ হন্থহল্লগনি। থৌরাং তৌরিবা ফ্রিদ ত্রেদ এগ্রিমেন্তগীদমক নাকল অনিনা তার্ম ওফ রিফরেন্সসু খুৎশীন্নখ্রে।

লুচিংবা অনিনা ভর্চুএল ওইনা অদু সিতিদা লম্বী অমসুং খোঙবালগী প্রোজেক অমা অমসুং অতোপ্পা সহরশিংদা হায় ইম্পেক্ত কম্মুনিতি দিবলপমেন্ত প্রোজেক ৬ শঙ্গাখ্রে। মালদিবস নেসনেল দিফেন্স ফোর্স অমসুং ইমিগ্রেসন ওথোরিতিশিংগীদমক সোসিএল হাওসিং য়ুনিতি ৩৩০০ অমসুং গারি ৭২ প্রধান মন্ত্রীনা খুৎশীন্নখ্রে।

প্রধান মন্ত্রীনা মালদিবস সরকারদা অরোগ্যা মাইত্রি হেল্থ ক্যুবকী য়ুনিতি অনি খুৎশীন্নখ্রে। ক্যুব অদুদা য়াওরিবা অনৌবা মেদিকেলগী খুৎলায়শিং অদুনা অশোক-অপনা ২০০ হেনবদা মেদিকেলগী মতেং পাংগনি অমসুং  মসিদা মেদিকেলগী মীওই ৬ পুং ৭২ ফাওবা লৈবা য়াগনি।

মহৌশাগী অকোয়বগী ফিবম ঙাক-শেন্নবা মখোয়গী থাজবগা লোয়ননা, ভারতকী “এক পের মা কে নাম” অমসুং মালদিবসকী “উ মিল্লিয়ন ৫ থানবা ৱাশক” কেম্পেনশিংগী শরুক অমা ওইনা লুচিংবা অনিনা হৈনৌ পাম্বীশিং থাখ্রে।

লৈবাক অসিগী দরকার ওইবা অমসুং মরুওইবশিংগী মতুংইন্না অমসুং ভারত মহাসাগর লমদমদা শান্তি, চাউখৎপা অমসুং নুংঙাই য়াইফবা পুরক্নবা মালদিবস অমসুং মসিগী মীয়াম শৌগৎনবা ভারতকী থাজবা অদু প্রধান মন্ত্রীনা অমুক হন্না ফোঙদোকখি।

***