U Myntri Rangbahduh ka ri u Narendra Modi un leit sha Madhya Pradesh ha ka 17 tarik Nailur. Un plie paidbah ïa ka ‘Swasth Nari Sashakt Parivar’ bad ‘8th Rashtriya Poshant Maah’ ha Dhar, ha ka por kumba 12 baje shiteng sngi. Un buh ruh ia u maw nongrim bad plie ia ki katto katne kiwei pat ki sienjam bad un ai jingkren ha ka jingialang ha katei ka sngi.

Katkum ka jingkular jong u na ka bynta ka Koit ka Khiah, ka Poshan, ka Jingkilan met, bad ka Swashth bad Sashakt Bharat, u Myntri Rangbahduh un sdang ïa ki pynsdang ia ka ‘Swasth Nari Sashakt Parivar’ bad ‘8th Rashtriya Poshant Maah’. Ïa kane ka kam yn pynlong naduh ka 17 tarik u Nailur haduh ka 2 tarik Risaw ha ki Ayushman Arogya Mandir, ki Community Health Centre (CHC), ki District Hospital bad kiwei kiwei ki jaka ai jingsumar jong ka sorkar ha kylleng ka ri. Yn pynlong ha palat shi lak tylli ki jaka ai jingsumar, kaba pynlong ia kane kum ka jingai jingsumar kaba heh tam na ka bynta ki kynthei bad ki khynnah ha ka ri. Yn pynlong ia ki health camp man ka sngi ha baroh ki jaka ai jingsumar jong ka sorkar ha baroh kawei ka ri.

Kane ka sienjam ha ka ri baroh kawei ka thmu ban ai ia ki jingshakri ha ka koit ka khiah kiba pynshong nongrim ha ki jingiada ia ki kynthei, pynroi, bad koit ka khiah ha ka imlang sahlang. Kan pynkhlain ia ka jingpeit bniah, ka jinglap kloi, bad ki jingpyniasoh ia ki jingsumar na ka bynta ki jingpang bym lah ban pur hapdeng ki briew, ka jingduna snam, ka tuberculosis, bad ka jingpang sickle cell, katba ka kyntiew ruh ia ka koit ka khiah jong ki kmie, ki khynnah, bad ki samla lyngba ka jingsumar shwa ban kha khun, ka jingai dawai, ka jingbam, ka jingkhuid jingsuba ha ka por ba kha khun, ka rukom im bad ka jingpynsngewthuh shaphang ka koit ka khiah. Ia ki jingshakri ba kyrpang kynthup ia ka Gynaecology, Paediatrics, Eye, ENT, Dental, Dermatology, and Psychiatry pyntreikam lyngba ki Medical College, ki Hospital District, ki jaka treikam jong ka Sorkar Pdeng, bad ki Hospital shimet.

Hapoh kane ka kam yn pynlong ruh ïa ki jingai snam ha kylleng ka ri. Ia ki nongnoh synniang yn pynrung kyrteng ha ka rynsan e-Raktkosh bad ia ki kam ai jingsmai yn pyniaid lyngba ka MyGov. Kito kiba ioh jingmyntoi yn pynrung kyrteng hapoh ka PM-JAY, Ayushman Vaya Vandana, bad ka ABHA. Yn buh ia ki jaka ai jingiarap ha ki jaka sumar na ka bynta ban pynshisha ia ki card bad ban pynbeit ia ki jingeh. Yn pynlong ia ki jinghikai Yoga, ki jingai jingmut ha ka Ayurveda, bad kiwei kiwei ki jingshakri jong ka Ayush ban kyntiew ia ka koit ka khiah ba pura na ka bynta ki kynthei bad ki longiing. Ka kam kan ialam lynti ruh ïa ki paidbah sha ki rukom im kiba kyntiew ia ka koit ba khiah da kaba pynleit jingmut kyrpang ha ka jingïada na ka jingsngaid palat, ka jingkyntiew ia ka jingioh ia ka bam kaba tei met, bad ka jingai snam mon sngewbha. Yn pynshlur ruh ïa ki nongshong shnong ban pynrung kyrteng kum ki Nikshay Mitra ha ka rynsan ba kyrpang (www.nikshay.in) ban kyrshan ïa ki nongpang TB da ki jingbam, jingai jingmut bad jingsumar ha ka jingtreikam jong ka imlang sahlang baroh kawei.

U Myntri Rangbahduh un pyllait ruh ia ka pisa hapoh ka Pradhan Mantri Matru Vandana Yojana beit beit sha ki bank account jong ki kynthei kiba dei hok ban ioh ia kane ha kylleng ka ri. Haduh shi lak ngut ki kynthei ha ka ri kin ioh jingmyntoi.

U Myntri Rangbahduh un pyllait paidbah ia ka Suman Sakhi Chatbot, ban kyntiew ia ka jingsngewthuh shaphang ka koit ka khiah jong ki longkmie bad ki khunlung. Ka chatbot kan ai jingtip ha ka por kaba biang bad kaba thikna sha ki kynthei ba armet ha ki jaka nongkyndong bad ki jaka ba jngai, ban pynthikna ba kin ioh ia ki jingshakri ba kongsan ha ka koit ka khiah.

Ban pynïaid shakhmat ïa ka jingïakhun lang jong ka ri pyrshah ïa ka jingpang sickle cell anemia, u Myntri Rangbahduh un sam ïa ka Sickle Cell Screening and Counseling Card kaba dap sha ka shi klur tylli na ka bynta ka jylla.

Kum shi bynta jong ka Adi Karmyogi Abhiyan, u Myntri Rangbahduh un plie paidbah ïa ka ‘Adi Seva Parv’, na ka bynta ka MP, ka ban long ka dak jong ka jingïakynduh jong ka jingsarong ia ka jinglong riewlum bad ka mynsiem ban tei ïa ka ri. Ka jingthmu kan kynthup ia ki kam kiba iadei bad ka jingshakri ha ki thain riewlum, kiba pynleit jingmut ha ka koit ka khiah, ka pule puthi, ka jingioh ia ka bam kaba tei met, ka jingkyntiew ia ki sap, ka jingkyntiew ia ka kamai kajih, ka jingkhuid jingsuba, ka jingtyngkai ia ka um, bad ka jingiada ia ka mariang. Yn pynleit jingmut kyrpang ha ka Tribal Village Action Plan bad ka Tribal Village Vision 2030, kaba thmu ban pynkhreh ia ka rukom treikam na ka bynta ka roi ka par kaba jrong samoi na ka bynta kawei pa kawei ka shnong.

Katkum ka 5F Vision jong u – ‘Farm to Fibre, Fibre to Factory, Factory to Fashion, bad Fashion to Foreign, u Myntri Rangbahduh un plie ïa ka PM MITRA Park ha Dhar. Ka park kaba heh palat 2,150 akar, kan don ki jingshakri katkum ka juk mynta, kynthup ïa ka Common Effluent Treatment Plant, ka jaka pynmih bording na ka sngi, ki surok kiba katkum ka juk mynta bad kiwei kiwei kiba pynlong ïa ka kum ka shnong karkhana kaba biang lut ha baroh ki bynta. Kan ai jingmyntoi ruh shibun ia ki nongrep cotton ha ka thain da kaba kyntiew ia ka ioh ka kot jong ki nongrep da kaba ai dor kaba kham heh ia ki mar rep jong ki.

Ki kompeni kiba trei ha ki kam jain ki la kular ban bei tyngka palat T.23,140 klur, kaba plie lad ia ki karkhana thymmai bad ki kam kiba heh. Kan pynmih haduh 3 lak tylli ki lad kamai katba kan kyntiew shibun ia ka jingshalan mar shabar ri.

Katkum ka jingkular jong u ban pynneh pynsah ïa ka mariang bad ban pynkupbor ïa ki kynthei ha ka liang ka ioh ka kot, u Myntri Rangbahduh un ai sngewbha ïa ki tynrai dieng sha ki dkhot ka self help group jong ki kynthei hapoh ka sienjam Ek Bagiya Maa Ke Naam ha ka jylla. Palat 10,000 ngut ki kynthei na Madhya Pradesh kin wanrah ia ka ‘Maa Ki Bagiya’. La pynbiang ruh ia ki kynhun kynthei ia ki jingdonkam baroh ban pynthikna ia ka jingiada ia ki jingthung.

***