പ്രധാനമന്ത്രി ശ്രീ നരേന്ദ്ര മോദി സെപ്റ്റംബർ 17 ന് മധ്യപ്രദേശ് സന്ദർശിക്കും. ഉച്ചയ്ക്ക് 12 മണിയോടെ ധാറിൽ വെച്ച് 'സ്വസ്ത് നാരി സശക്ത് പരിവാർ', 'എട്ടാമത് രാഷ്ട്രീയ പോഷൻ മാഹ്' എന്നീ കാമ്പെയ്‌നുകൾക്ക് അദ്ദേഹം തുടക്കം കുറിക്കും. അദ്ദേഹം മറ്റ് നിരവധി സംരംഭങ്ങൾക്ക് തറക്കല്ലിടുകയും, തുടക്കം കുറിക്കുകയും, ചടങ്ങിൽ സദസ്സിനെ അഭിസംബോധന ചെയ്യുകയും ചെയ്യും.

ആരോഗ്യം, പോഷണം, ഫിറ്റ്‌നസ്, സ്വസ്ത് സശക്ത് ഭാരത് എന്നിവയോടുള്ള തന്റെ പ്രതിബദ്ധതയ്ക്ക് അനുസൃതമായി, പ്രധാനമന്ത്രി 'സ്വസ്ത് നാരി സശക്ത് പരിവാർ', 'എട്ടാമത് രാഷ്ട്രീയ പോഷൻ മാഹ്' കാമ്പെയ്‌നുകൾക്ക് തുടക്കം കുറിക്കും. സെപ്റ്റംബർ 17 മുതൽ ഒക്ടോബർ 2 വരെ രാജ്യത്തുടനീളമുള്ള ആയുഷ്മാൻ ആരോഗ്യ മന്ദിറുകൾ, കമ്മ്യൂണിറ്റി ഹെൽത്ത് സെന്ററുകൾ (സിഎച്ച്സി), ജില്ലാ ആശുപത്രികൾ, മറ്റ് ​ഗവൺമെന്റ് ആരോഗ്യ കേന്ദ്രങ്ങൾ എന്നിവിടങ്ങളിൽ കാമ്പെയ്‌ൻ സംഘടിപ്പിക്കും. ഒരു ലക്ഷത്തിലധികം ആരോഗ്യ ക്യാമ്പുകൾ സംഘടിപ്പിക്കും, ഇത് രാജ്യത്തെ സ്ത്രീകൾക്കും കുട്ടികൾക്കും വേണ്ടിയുള്ള എക്കാലത്തെയും വലിയ ആരോഗ്യ പ്രവർത്തനമായിരിക്കും. രാജ്യവ്യാപകമായി എല്ലാ ​ഗവൺമെന്റ് ആരോഗ്യ കേന്ദ്രങ്ങളിലും ദിവസേന ആരോഗ്യ ക്യാമ്പുകൾ നടക്കും.

രാജ്യവ്യാപകമായി നടക്കുന്ന ഈ തീവ്രമായ കാമ്പെയ്‌ൻ, സമൂഹ്യ തലത്തിൽ സ്ത്രീ കേന്ദ്രീകൃത പ്രതിരോധ, പ്രോത്സാഹന, രോഗശാന്തി ആരോഗ്യ സേവനങ്ങൾ നൽകാൻ ലക്ഷ്യമിടുന്നു. സാംക്രമികേതര രോഗങ്ങൾ, വിളർച്ച, ക്ഷയം, അരിവാൾ കോശ രോഗം എന്നിവയ്ക്കുള്ള സ്‌ക്രീനിംഗ്, നേരത്തെയുള്ള കണ്ടെത്തൽ, ചികിത്സാ ബന്ധങ്ങൾ എന്നിവ ശക്തിപ്പെടുത്തുന്നതിനൊപ്പം, പ്രസവപൂർവ പരിചരണം, പ്രതിരോധ കുത്തിവയ്പ്പ്, പോഷകാഹാരം, ആർത്തവ ശുചിത്വം, ജീവിതശൈലി, മാനസികാരോഗ്യ അവബോധ പ്രവർത്തനങ്ങൾ എന്നിവയിലൂടെ മാതൃ, ശിശു, കൗമാര ആരോഗ്യം എന്നിവ പ്രോത്സാഹിപ്പിക്കുകയും ചെയ്യും. ഗൈനക്കോളജി, പീഡിയാട്രിക്സ്, നേത്ര, ഇഎൻടി, ദന്തൽ, ഡെർമറ്റോളജി, സൈക്യാട്രി എന്നിവയുൾപ്പെടെയുള്ള സ്പെഷ്യലിസ്റ്റ് സേവനങ്ങൾ മെഡിക്കൽ കോളേജുകൾ, ജില്ലാ ആശുപത്രികൾ, കേന്ദ്ര ​ഗവൺമെന്റ് സ്ഥാപനങ്ങൾ, സ്വകാര്യ ആശുപത്രികൾ എന്നിവയിലൂടെ സമാഹരിക്കും.

കാമ്പെയ്‌നിന് കീഴിൽ രാജ്യവ്യാപകമായി രക്തദാന ഡ്രൈവുകളും സംഘടിപ്പിക്കും. ഇ-രക്ത്കോഷ് പോർട്ടലിൽ (e-Raktkosh portal) ദാതാക്കൾ രജിസ്റ്റർ ചെയ്യുകയും MyGov വഴി പ്രതിജ്ഞാ കാമ്പെയ്‌നുകൾ നടത്തുകയും ചെയ്യും. PM-JAY, ആയുഷ്മാൻ വയ വന്ദന, ABHA എന്നിവയിൽ ഗുണഭോക്താക്കളെ ചേർക്കും. കാർഡ് പരിശോധനയ്ക്കും പരാതി പരിഹാരത്തിനുമായി ആരോഗ്യ ക്യാമ്പുകളിൽ ഹെൽപ്പ് ഡെസ്‌കുകൾ സ്ഥാപിക്കും. സ്ത്രീകൾക്കും കുടുംബങ്ങൾക്കും സമഗ്രമായ ആരോഗ്യ-ക്ഷേമ രീതികൾ പ്രോത്സാഹിപ്പിക്കുന്നതിനായി യോഗ സെഷനുകൾ, ആയുർവേദ കൺസൾട്ടേഷനുകൾ, മറ്റ് ആയുഷ് സേവനങ്ങൾ എന്നിവ സംഘടിപ്പിക്കും. പൊണ്ണത്തടി പ്രതിരോധം, മെച്ചപ്പെട്ട പോഷകാഹാരം, സ്വമേധയാ രക്തദാനം എന്നിവയിൽ പ്രത്യേക ഊന്നൽ നൽകിക്കൊണ്ട് ആരോഗ്യകരമായ ജീവിതശൈലി രീതികളിലേക്ക് സമൂഹങ്ങളെ സജ്ജമാക്കാനും ഈ കാമ്പെയ്ൻ സഹായിക്കും. ക്ഷയരോഗികൾക്ക് പോഷകാഹാരം, കൗൺസിലിംഗ്, പരിചരണം എന്നിവ സമൂഹത്തിന്റെ മുഴുവൻ സമീപനത്തിലൂടെയും നൽകുന്നതിനായി സമർപ്പിത പ്ലാറ്റ്‌ഫോമിൽ (www.nikshay.in) നിക്ഷയ് മിത്രങ്ങളായി രജിസ്റ്റർ ചെയ്യാൻ പൗരന്മാരെ പ്രോത്സാഹിപ്പിക്കും.

പ്രധാനമന്ത്രി മാതൃ വന്ദന യോജനയ്ക്ക് കീഴിലുള്ള ഫണ്ടുകൾ രാജ്യത്തുടനീളമുള്ള യോഗ്യരായ സ്ത്രീകളുടെ ബാങ്ക് അക്കൗണ്ടുകളിലേക്ക് ഒറ്റ ക്ലിക്കിലൂടെ നേരിട്ട് കൈമാറും. രാജ്യത്തെ ഏകദേശം പത്ത് ലക്ഷം സ്ത്രീകൾക്ക് പ്രയോജനം ലഭിക്കും.

മാതൃ-ശിശു ആരോഗ്യത്തെക്കുറിച്ച് അവബോധം വളർത്തുന്നതിനായി പ്രധാനമന്ത്രി സുമൻ സഖി ചാറ്റ്ബോട്ട് ആരംഭിക്കും. ഗ്രാമപ്രദേശങ്ങളിലെയും വിദൂര പ്രദേശങ്ങളിലെയും ഗർഭിണികൾക്ക് ചാറ്റ്ബോട്ട് സമയബന്ധിതവും കൃത്യവുമായ വിവരങ്ങൾ നൽകുകയും അവശ്യ ആരോഗ്യ സേവനങ്ങൾ ലഭ്യമാക്കുകയും ചെയ്യും.

അരിവാൾ കോശ രോ​ഗത്തിനെതിരായ രാജ്യത്തിന്റെ കൂട്ടായ പോരാട്ടത്തിന് കൂടുതൽ ഊന്നൽ നൽകിക്കൊണ്ട്, സംസ്ഥാനത്തിനായി ഒരു കോടി എണ്ണം തികയുന്ന അരിവാൾ കോശ പരിശോധനാ- കൗൺസിലിംഗ് കാർഡ് പ്രധാനമന്ത്രി വിതരണം ചെയ്യും.
ആദി കർമ്മയോഗി അഭിയാന്റെ ഭാഗമായി, ഗോത്ര അഭിമാനത്തിന്റെയും രാഷ്ട്രനിർമ്മാണത്തിന്റെയും സംഗമത്തെ പ്രതീകപ്പെടുത്തുന്ന 'ആദി സേവ പർവ്' പ്രധാനമന്ത്രി മധ്യപ്രദേശിനായി ഉദ്ഘാടനം ചെയ്യും. ആരോഗ്യം, വിദ്യാഭ്യാസം, പോഷകാഹാരം, നൈപുണ്യ വികസനം, ഉപജീവനമാർഗം മെച്ചപ്പെടുത്തൽ, ശുചിത്വം, ജലസംരക്ഷണം, പരിസ്ഥിതി സംരക്ഷണം എന്നിവയിൽ ശ്രദ്ധ കേന്ദ്രീകരിച്ച് ഗോത്ര മേഖലകളിലെ സേവനാധിഷ്ഠിത പ്രവർത്തനങ്ങൾ ഈ സംരംഭത്തിൽ ഉൾപ്പെടും. ഓരോ ഗ്രാമത്തിനും ദീർഘകാല വികസന രൂപരേഖകൾ തയ്യാറാക്കാൻ ലക്ഷ്യമിട്ടുള്ള ഗോത്ര ഗ്രാമ ആക്ഷൻ പ്ലാനിലും ഗോത്ര ഗ്രാമ ദർശനം 2030 ലും പ്രത്യേക ഊന്നൽ നൽകും.

ഫാമിൽ നിന്ന് ഫൈബർ, ഫൈബർ മുതൽ ഫാക്ടറി, ഫാക്ടറിയിൽ നിന്ന് ഫാഷൻ, ഫാഷൻ മുതൽ ഫോറിൻ എന്നിവയുൾപ്പെടെയുള്ള അദ്ദേഹത്തിന്റെ 5F ദർശനത്തിന് അനുസൃതമായി, പ്രധാനമന്ത്രി ധറിൽ പിഎം മിത്ര പാർക്ക് ഉദ്ഘാടനം ചെയ്യും. 2,150 ഏക്കറിലധികം വിസ്തൃതിയുള്ള പാർക്കിൽ പൊതു മാലിന്യ സംസ്കരണ പ്ലാന്റ്, സൗരോർജ്ജ പ്ലാന്റ്, ആധുനിക റോഡുകൾ എന്നിവയുൾപ്പെടെ ലോകോത്തര സൗകര്യങ്ങളുണ്ടാകും, ഇത് ഇതിനെ ഒരു മികച്ച വ്യാവസായിക ടൗൺഷിപ്പാക്കി മാറ്റും. കർഷകരുടെ വരുമാനം വർദ്ധിപ്പിച്ചുകൊണ്ട് മേഖലയിലെ പരുത്തി കർഷകർക്ക് ഇത് ഗണ്യമായി പ്രയോജനം ചെയ്യും, അവരുടെ ഉൽപ്പന്നങ്ങൾക്ക് മികച്ച മൂല്യം നൽകും.

വിവിധ ടെക്സ്റ്റൈൽ കമ്പനികൾ 23,140 കോടി രൂപയുടെ നിക്ഷേപ നിർദ്ദേശങ്ങൾ സമർപ്പിച്ചിട്ടുണ്ട്, ഇത് പുതിയ വ്യവസായങ്ങൾക്കും വലിയ തോതിലുള്ള തൊഴിലവസരങ്ങൾക്കും വഴിയൊരുക്കുന്നു. ഇത് ഏകദേശം 3 ലക്ഷം തൊഴിലവസരങ്ങൾ സൃഷ്ടിക്കുകയും കയറ്റുമതി ഗണ്യമായി വർദ്ധിപ്പിക്കുകയും ചെയ്യും.

പരിസ്ഥിതി സംരക്ഷണത്തിനും സ്ത്രീകളുടെ സാമ്പത്തിക ശാക്തീകരണത്തിനുമുള്ള പ്രതിബദ്ധതയ്ക്ക് അനുസൃതമായി, സംസ്ഥാനത്തെ ഏക് ബഗിയ മാ കേ നാം സംരംഭത്തിന് കീഴിൽ ഒരു വനിതാ സ്വയം സഹായ ഗ്രൂപ്പിന്റെ ഗുണഭോക്താവിന് പ്രധാനമന്ത്രി ഒരു തൈ സമ്മാനിക്കും. മധ്യപ്രദേശിലെ 10,000-ത്തിലധികം സ്ത്രീകൾ 'മാ കി ബഗിയ' വികസിപ്പിക്കും. സസ്യ സംരക്ഷണം ഉറപ്പാക്കാൻ ആവശ്യമായ എല്ലാ വിഭവങ്ങളും വനിതാ ഗ്രൂപ്പുകൾക്ക് നൽകുന്നുണ്ട്.

***

SK