Ka sienjam ba kongsan jong u Myntri Rangbahduh ka ri, ka Pariksha Pe Charcha (PPC), kaba la pynlong da ka Tnad Pule Puthi ryngkat ka jingïatreilang bad ka MyGov naduh u snem 2018, ka la shah pynkup burom da ka Guinness World Record na ka bynta ka “Most people registered on a Citizen Engagement Platform in one month.” Kane ka jingithuh ka rakhe ia ka jingjop kaba ym pat ju jia kaba long 3.53 klur ki jingpynrung kyrteng kiba biang kiba la ioh ha ka por ba pynlong ia ka prokram kaba 8, kaba la pynlong ha ka rynsan MyGov.

Ka Pariksha Pe Charcha ka dei ka rynsan kaba kyrpang ha ka pyrthei kaba la saindur bad ïalam da u Myntri Rangbahduh ka ri u Narendra Modi, ha kaba u iakren markhmat bad ki khynnah pule, ki nonghikai, bad ki kmie ki kpa. Ka sienjam ka pynkylla ia ka aiom eksamin sha ka tamasa jong ka jinglong babha, ka jingpynkhreh, bad ka jingpule kaba don jingthmu, kaba pynlong ia ki eksamin kum ka por ban ai mynsiem ban ia ka jingkhuslai.

Ia ka syrnot Guinness World Record la aiti paidbah ha ka jingialang kaba la pynlong ha New Delhi. Ia kane ka jingialang la plie da u Myntri ka Tnad Pule Puthi jong ka sorkar pdeng u Dharmendra Pradhan; u Myntri Sorkar Pdeng ba dei peit ia ka tnad Electronics bad Information Technology, Railway bad Information & Broadcasting u Ashwini Vaishnaw; u Myntri Khynnah ka Sorkar Pdeng ba dei peit ia ka Tnad Electronics bad IT, u Jitin Prasada; Secretary ka School Education and Literacy, u Sanjay Kumar; u CEO ka MyGov u Nand Kumarum; bad ki heh ophisar na ki Tnad pule puthi bad Electronics & IT, ryngkat bad kiwei kiwei kiba don bynta ha kane ka kam. Ia kane ka rekod la pynthikna bad pynbna da u Rishi Nath, u nongbishar jong ka Guinness World Records.

Haba ai jingkren ha kane ka sngi, u Dharmendra Pradhan u la ong ba hapoh ka jingïalam ba ïohi jngai jong u Myntri Rangbahduh ka ri u Narendra Modi,  ïa ka Pariksha Pe Charcha la pynkylla thymmai kum ka rukom pynkhreh jong ka ri ban thoh eksamin da kaba pynkylla ïa ka jingkhuslai sha ka tamasa jong ka jingpule. U Pradhan u la pyntip ba ka bynta kaba 8 jong ka PPC ka la sakhi ïa ka jingdon baroh 21 klur tam ki nongpeit ha ki rynsan social media ha u snem 2025. Ka jingïashim bynta shitrhem ha ka PPC 2025 la ïohi kum ka jingpynpaw ïa ka jingkut jingmut jong ka ri sha ka pule puthi kaba pura bad kaba kynthup lang, bad kaba iadei bad ka jingthmu jong ka Viksit Bharat, u la bynrap.

Haba ai jingkren ha kane ka sngi, u Ashwini Vaishnaw u la khot ia ka Pariksha Pe Charcha kum ka sienjam ba kyrpang jong u Myntri Rangbah duh Narendra Modi kaba wanrah lang ia ki khynnah skul, ki kmie ki kpa, bad ki nonghikai ban kyntiew ia ka bha ka miat bad ka jingpule kaba lait na ki jingkhuslai. U la pynpaw ïa ki lad treikam kiba bun jait kiba lah ban ïoh da ki samla pule ha kane ka Amrit Kaal bad ong ba ka Guinness World Record na ka bynta ki jingpynrung kyrteng ba heh tam ka pyni ïa ka jingshaniah kaba khlaiñ jong ki paidbah ha kane ka sienjam, u la bynrap.

U Jitin Prasada u la ïaroh ruh ïa ka MyGov halor ki sinjam jong ka ban pynlong ïa ka jingsynshar kaba kham ïashim bynta lang. U la ong ba ka Guinness World Record ka pynpaw kumno ka MyGov ka la pyndonkam ïa ka teknoloji ban pyniar ïa ka jingïadei bad ki nongshong shnong bad ban kyntiew ïa ka jingpoi jong ka Pariksha Pe Charcha ha ka ri baroh kawei.

Ka NEP 2020 ka ban jur ha ka jingpule kaba lait na ka jingkhuslai bad kaba kmen. Ka pynshlur ban kylla na ka jingpule lyndet sha ka jingkyntiew ia ki jingtbit ban sngewthuh ba la pynshong nongrim ha ka jingpule lyngba ka jingpyrshang dalade. Naduh ba la sdang ia ka, ka Pariksha Pe Charcha ka la nang kiew sha ka jingïakhih ha ka ri baroh kawei kaba pynkylla ïa ki eksamin sha ki lad ban pynpaw ïalade bad ban kiew. Lyngba ki jingïakren markhmat, u Myntri Rangbahduh Narendra Modi u pynbeit ïa ki jingeh ba kongsan kum ka jingpynïaid ïa ka por, ki jingpynthut jong ki lad digital, ka jingpyrkhat, bad jingmut jingpyrkhat kaba skhem, da kaba ialam lynti bad ka jingpynshlur ia ki khynnah pule, ki kmie ki kpa bad kumjuh ruh ki nonghikai.

Ka jingjop jong ka PPC 2025 ka dei ka jingjop jong baroh, bad baroh kito kiba don bynta ha ka kam, ki jaka pule, bad ki nongshong shnong kiba la noh synniang sha une u mawmer ba la iaroh da ki Myntri. Ka jingkular ban pynkhlain shuh shuh ia ka jingsynshar kaba iashim bynta bad ka pule puthi kaba pura ka dang skhem.

Ka jinglong ba kynthup lang jong ka prokram, ka jingpoi ia ki lad digital, bad ki rukom treikam ba thymmai ki pynthikna ïa ka jingjop ba bteng jong ka kum u mawjam jong ka jingïadei jong ki samla pule ha India. Man la u snem, ka PPC ka pynskhem ia ka khubor ba ki eksamin kim dei ka jingkut hynrei ka dei ka jingsdang.

****