കേന്ദ്ര വിദ്യാഭ്യാസ മന്ത്രാലയം MyGov യുമായി സഹകരിച്ച് 2018 മുതല്‍ വിജയകരമായി സംഘടിപ്പിച്ചുവരുന്ന പ്രധാനമന്ത്രി ശ്രീ നരേന്ദ്ര മോദിയുടെ മുന്‍നിര സംരംഭമായ പരീക്ഷ പേ ചര്‍ച്ച(PPC) ഒരു പൗര പങ്കാളിത്ത പ്ലാറ്റ് ഫോമില്‍ ഒരു മാസത്തിനിടെ ഏറ്റവും കൂടുതല്‍ ആളുകള്‍ രജിസ്റ്റര്‍ ചെയ്തതിനുള്ള ഗിന്നസ് വേള്‍ഡ് റെക്കോര്‍ഡ് കരസ്ഥമാക്കി. പി പി സിയുടെ എട്ടാം പതിപ്പിന്  MyGov പോര്‍ട്ടല്‍ വഴി ലഭിച്ച 3.53 കോടി രജിസ്‌ട്രേഷനുകളെന്ന അഭൂതപൂര്‍വമായ നേട്ടത്തെ ഈ അംഗീകാരം ആഘോഷിക്കുന്നു.

പ്രധാനമന്ത്രി ശ്രീ നരേന്ദ്ര മോദി വിഭാവനം ചെയ്യുകയും നയിക്കുകയും ചെയ്യുന്ന സവിശേഷമായ ഒരു ആഗോള വേദിയാണ് പരീക്ഷ പേ ചര്‍ച്ച.അവിടെ അദ്ദേഹം വിദ്യാര്‍ത്ഥികളുമായും അധ്യാപകരുമായും മാതാപിതാക്കളുമായും നേരിട്ട് സംവദിക്കുന്നു.ഈ സംരംഭം പരീക്ഷാ കാലത്തെ ഉത്സാഹത്തിന്റേയും തയ്യാറെടുപ്പിന്റേയും ഉദ്ദേശപൂര്‍ണമായ പഠനത്തിന്റേയും ആഘോഷമാക്കി മാറ്റുന്നു.ഒപ്പം പരീക്ഷകളെ സമ്മര്‍ദ്ദത്തേക്കാള്‍ പ്രോത്സാഹനത്തിനുള്ള സമയമാക്കി മാറ്റുന്നു.

ന്യൂഡല്‍ഹിയില്‍ നടന്ന ചടങ്ങില്‍ ഗിന്നസ് വേള്‍ഡ് റെക്കോര്‍ഡ് സര്‍ട്ടിഫിക്കറ്റ് ഔദ്യോഗികമായി സമ്മാനിച്ചു.കേന്ദ്ര വിദ്യാഭ്യാസ മന്ത്രി ശ്രീ ധര്‍മേന്ദ്ര പ്രധാന്‍;കേന്ദ്ര ഇലക്ട്രോണിക്‌സ്,വിവരസാങ്കേതിക, റെയില്‍വേ,വാര്‍ത്താ വിതരണ പ്രക്ഷേപണ മന്ത്രി ശ്രീ അശ്വിനി വൈഷ്ണവ്; കേന്ദ്ര ഇലക്ട്രോണിക്‌സ്,വിവരസാങ്കേതിക സഹമന്ത്രി ശ്രീ ജിതിന്‍ പ്രസാദ; സ്‌കൂള്‍ വിദ്യാഭ്യാസ,സാക്ഷരതാ വകുപ്പ് സെക്രട്ടറി ശ്രീ സഞ്ജയ് കുമാര്‍; MyGov സി.ഇ.ഒ ശ്രീ നന്ദ് കുമാരും; വിദ്യാഭ്യാസ, ഇലക്ട്രോണിക്‌സ്, വിവരസാങ്കേതിക മന്ത്രാലയങ്ങളിലെ മുതിര്‍ന്ന ഉദ്യോഗസ്ഥര്‍, മറ്റ് പ്രധാന പങ്കാളികള്‍ തുടങ്ങിയവര്‍  പരിപാടിയില്‍ പങ്കെടുത്തു.ഗിന്നസ് വേള്‍ഡ് റെക്കോര്‍ഡിന്റെ ഔദ്യോഗിക വിധികര്‍ത്താവായ ശ്രീ ഋഷി നാഥ് ഈ റെക്കോര്‍ഡ് വിലയിരുത്തുകയും ഔദ്യോഗികമായി പ്രഖ്യാപിക്കുകയും ചെയ്തു.

പ്രധാനമന്ത്രി ശ്രീ നരേന്ദ്ര മോദിയുടെ ദാര്‍ശനിക നേതൃത്വത്തില്‍ പരീക്ഷ സമ്മര്‍ദ്ദത്തെ പഠനത്തിന്റെ  ഉത്സവമാക്കി മാറ്റിക്കൊണ്ട് പരീക്ഷകളോടുള്ള ദേശീയ സമീപനമായി പരീക്ഷ പേ ചര്‍ച്ചയെ പുനര്‍നിര്‍വചിച്ചതായി ചടങ്ങില്‍ സംസാരിച്ച ശ്രീ ധര്‍മേന്ദ്ര പ്രധാന്‍ പറഞ്ഞു.2025 ലെ പി പി സിയുടെ എട്ടാം പതിപ്പിന് എല്ലാ മാധ്യമ പ്ലാറ്റ് ഫോമുകളിലുമായി മൊത്തം 21 കോടിയിലധികം കാഴ്ച്ചക്കാരുണ്ടായിരുന്നതായി ശ്രീ പ്രധാന്‍ അറിയിച്ചു.സമഗ്രവും എല്ലാവരേയും ഉള്‍ക്കൊള്ളുന്നതുമായ വിദ്യാഭ്യാസത്തോടും വികസിത് ഭാരതമെന്ന ദര്‍ശനവുമായി പൊരുത്തപ്പെടുന്നതിനുമുള്ള രാജ്യത്തിന്റെ കൂട്ടായ പ്രതിബദ്ധതയുടെ പ്രതിഫലനമായാണ് പി പി സി 2025 ലെ  വന്‍തോതിലുള്ള പങ്കാളിത്തത്തെ കാണുന്നതെന്നും അദ്ദേഹം കൂട്ടിച്ചേര്‍ത്തു.

സന്തോഷകരവും സമ്മര്‍ദ്ദരഹിതവുമായ പഠനം പ്രോത്സാഹിപ്പിക്കുന്നതിന് വിദ്യാര്‍ത്ഥികളേയും മാതാപിതാക്കളേയും അധ്യാപകരേയും ഒരുമിച്ച് ചേര്‍ക്കുന്ന പ്രധാനമന്ത്രി ശ്രീ നരേന്ദ്ര മോദിയുടെ സവിശേഷ സംരംഭമാണ് പരീക്ഷ പേ ചര്‍ച്ച എന്ന് ശ്രീ അശ്വിനി വൈഷ്ണവ് തന്റെ പ്രസംഗത്തില്‍ പറഞ്ഞു.ഈ അമൃത കാലത്ത് വിദ്യാര്‍ത്ഥികള്‍ക്ക് ലഭിക്കുന്ന വിപുലമായ തൊഴില്‍ അവസരങ്ങളെക്കുറിച്ച് അദ്ദേഹം എടുത്തുപറഞ്ഞു.ഏറ്റവും ഉയര്‍ന്ന രജിസ്‌ട്രേഷനുള്ള ഗിന്നസ് വേള്‍ഡ് റെക്കോര്‍ഡ് നേട്ടം കരസ്ഥമാക്കിയത്  ഈ സംരംഭത്തിലുള്ള ശക്തമായ പൊതുജനവിശ്വാസത്തെ പ്രകടമാക്കുന്നുവെന്നും അദ്ദേഹം കൂട്ടിച്ചേര്‍ത്തു..

ഭരണസംവിധാനത്തില്‍ പൗര പങ്കാളിത്തം വര്‍ദ്ധിപ്പിക്കുന്നതില്‍ MyGov നടത്തിയ ശ്രമങ്ങളെ ശ്രീ ജിതിന്‍ പ്രസാദ അഭിനന്ദിച്ചു.പൗരന്മാരുടെ ഇടപെടല്‍ വര്‍ദ്ധിപ്പിക്കുന്നതിനും രാജ്യവ്യാപകമായി പരീക്ഷ പേ ചര്‍ച്ചയുടെ വ്യാപ്തി വര്‍ദ്ധിപ്പിക്കുന്നതിനും MyGov സാങ്കേതികവിദ്യ എങ്ങനെ പ്രയോജനപ്പെടുത്തിയെന്ന് ഗിന്നസ് വേള്‍ഡ് റെക്കോര്‍ഡ് എടുത്തുകാണിക്കുന്നുവെന്ന് അദ്ദേഹം അഭിപ്രായപ്പെട്ടു.

ദേശീയ വിദ്യാഭ്യാസ നയം 2020 സമ്മര്‍ദ്ദരഹിതവും സന്തോഷകരവുമായ പഠനത്തിന് ഊന്നല്‍ നല്‍കുന്നു.വായിച്ചു പഠിച്ചതില്‍ നിന്ന് മാറി അനുഭവങ്ങളിലൂടെയുള്ള പഠനത്തെ അടിസ്ഥാനമാക്കിയുള്ള നിര്‍ണായക വൈജ്ഞാനിക കഴിവുകള്‍ വികസിപ്പിക്കുന്നത്  ഇത് പ്രോത്സാഹിപ്പിക്കുന്നു.തുടക്കം  മുതല്‍ തന്നെ പരീക്ഷാ പേ ചര്‍ച്ച ഒരു ദേശീയ പ്രസ്ഥാനമായി മാറുകയും പരീക്ഷകളെ  സ്വയം പ്രകടിപ്പിക്കുന്നതിനും വളര്‍ച്ചയ്ക്കുമുള്ള അവസരങ്ങളാക്കി മാറ്റുകയും ചെയ്തിട്ടുണ്ട്.പ്രധാനമന്ത്രി ശ്രീ നരേന്ദ്ര മോദി നേരിട്ട് നടത്തിയ സംവാദങ്ങളിലൂടെ സമയം നിയന്ത്രണം,ഡിജിറ്റല്‍ ശ്രദ്ധ വ്യതിചലിപ്പിക്കല്‍,ജാഗ്രത, വൈകാരിക പ്രതിരോധശേഷി എന്നിവയെ സംബന്ധിച്ച പ്രധാന വെല്ലുവിളികളെ അഭിസംബോധന ചെയ്യുകയും വിദ്യാര്‍ത്ഥികള്‍ക്കും മാതാപിതാക്കള്‍ക്കും അധ്യാപകര്‍ക്കും ഒരുപോലെ പ്രായോഗിക മാര്‍ഗനിര്‍ദേശവും പ്രചോദനവും നല്‍കുകയും ചെയ്യുന്നു.


പിപിസി 2025 ന്റെ  വിജയം ഒരു കൂട്ടായ നേട്ടമാണ്.ഈ നേട്ടത്തില്‍ പങ്കുവഹിച്ച എല്ലാ പങ്കാളികളെയും, വിദ്യാഭ്യാസ സ്ഥാപനങ്ങളെയും, പൗരന്മാരെയും മന്ത്രിമാര്‍ ഹൃദയപൂര്‍വം അഭിനന്ദിച്ചു.പങ്കാളിത്ത ഭരണവും സമഗ്ര വിദ്യാഭ്യാസവും കൂടുതല്‍ ശക്തിപ്പെടുത്തുന്നതിനുള്ള പ്രതിബദ്ധത നിലനില്‍ക്കുന്നുവെന്ന് അവര്‍ ഉറപ്പുനല്‍കി.

പരിപാടിയുടെ ഉള്‍ച്ചേര്‍ക്കല്‍, ഡിജിറ്റല്‍ വ്യാപ്തി, നൂതന സമീപനങ്ങള്‍ എന്നിവ ഇന്ത്യയിലെ വിദ്യാര്‍ത്ഥി ഇടപെടലിന്റെ അടിസ്ഥാനമായി  അതിന്റെ  തുടര്‍ച്ചയായ വിജയം ഉറപ്പാക്കുന്നു.കടന്നുപോകുന്ന ഓരോ വര്‍ഷവും, പരീക്ഷകള്‍ അവസാനമല്ല, ഒരു തുടക്കമാണെന്ന സന്ദേശം പിപിസി ശക്തിപ്പെടുത്തുകയാണ്.