U Myntri kam pohiing jong ka sorkar pdeng uba dei ruh u Myntri ka tnad treilang, u Amit Shah mynta ka sngi u la pyllait paidbah ia ka National Cooperation Policy – 2025 ha nongbah New Delhi. U Myntri ka sorkar pdeng ba dei peit ia ka jingiatreilang u Krishan Pal Gurjar, u Murlidhar Mohol, u secretary ka sorkar pdeng u Dr. Ashish Kumar Bhutani, Myntri barim ka sorkar pdeng bad u chairman jong ka drafting committee jong ka Cooperation Policy ba thymmai, u Suresh Prabhu, bad bun kiwei pat ki riew pawkhmat ki la don lang ha kane ka sngi.

Haba kren ha ka jingïalang ban pyllait paidbah ïa ka National Cooperation Policy – 2025, u Myntri ka tnad treilang jong ka sorkar pdeng u Amit Shah u la ong ba hapoh ka jingïalam jong u Suresh Prabhu, ka komiti kaba don 40 ngut ki dkhot ka la wanrah ïa ka polisi ïatreilang kaba bniah bad kaba peit jngai na ka bynta ka kam iatreilang jong ka ri hadien ba la pynlong ïa ki jingïakren bapher bapher. U Myntri ka tnad iatreilang u la ong ba na ka bynta ka lawei kaba bha jong ka jingiatreilang, la thaw ia ka komiti kaba don 40 ngut ki dkhot, kaba la pynlong ia ki jingialang ha ki thain bad pynlong ia ki jingiakren kiba bniah bad ki nongialam jong ka kam iatreilang, ki riew shemphang, ki riewstad, ki tnad treikam, bad baroh kiwei pat kiba don bynta ban thaw ia ka polisi. Ka komiti ka la ioh kumba 750 tylli ki jingai jingmut, ka la pynlong 17 tylli ki jingialang, bad hadien ka jingiasyllok bad ka RBI bad ka NABARD, ka la pyndep ia ka policy.

U Amit Shah u la ong ba ha u snem 2002, ha ka sien kaba nyngkong, ka sorkar India, ka la wanrah ia ka Cooperation Policy, bad wat ha katei ka por, ka dei ka party jong ki, kaba synshar, ha kaba u Atal Bihari Vajpayee, uba la khlad noh, u long kum u Myntri Rangbah Duh. Mynta ha u snem 2025, haba ka sorkar India ka la wanrah ia ka Cooperation Policy kaba ar, ka dei biang ka party jong ki kaba synshar, ha kaba u Narendra Modi u long u Myntri Rangbah Duh. U Amit Shah u la ong ba dei tang ka party kaba don ka jingiohi jngai bad ka jingsngewthuh jong ka na ka liang ka synshar khadar kaba lah ban pynurlong ia kaei kaba donkam na ka bynta ka ri bad ka roi ka par jong ka, kaba lah ban ai ka jingkongsan ia ka tnad treilang.

U Myntri ka tnat treilang jong ka sorkar pdeng u Amit Shah u la ong ba kane ka Cooperation Policy kaba thymmai ka dei ka sienjam kaba khraw ban pynurlong ïa ka jingthmu jong u Myntri Rangbahduh ka ri u Narendra Modi kaba long ‘Sahkar Se Samriddhi’ (Ka jingroi jingpar lyngba ka jingïatreilang). U la ong ba ka sorkar Modi ka la buh ia ka thong ba ka India kan long ka ri kaba lai ha ka ioh ka kot ha ka pyrthei shuwa u snem 2027. Ryngkat bad kata, ka India ka bat ruh ia ka jingkitkhlieh na ka bynta ka roi ka par kaba kynthup lang ia ki 1.4 billion ngut ki nongshong shnong jong ka. U la ong ba ka jingmut ba kongsan jong ka India ka long ban wanrah ia ka jinglong jingman ha kaba ka don ka roi ka par kaba iatylli na ka bynta baroh, ka roi ka par kaba iaryngkat na ka bynta baroh, bad ka jingkiew jong ka ri lyngba ki jingnoh synniang na baroh.

U Amit Shah u la ong ba, jan 75 snem hadien ka jinglaitluid, u Myntri Rangbah Duh u Narendra Modi u la seng ia ka tnad iatreilang. Ha ka por ba la seng ia ka, ka tnad iatreilang ka la don ha ka jinglong kaba la jot rathai. U la bynrap ruh ba ka jingjop kaba khraw tam jong ka tnad ïatreilang — ia kaba la seng ban pyndep ïa ka jingkut jingmut jong u Myntri Rangbah Duh Modi ‘Sahkar Se Samriddhi’— ka long ba mynta, wat ki dkhot jong ka kynhun treilang kaba rit tam ha ka ri ki sngew sarong bad sngewskhem. U la ong ba ha kine ki saw snem ba la dep, ka tnad iatreilang ka la ieng ha kajuh ka kyrdan bad ka tnad kam kompani ha man la ki bynt. U la bynrap ba shwa u snem 2020, ki don ki briew kiba la ong ba ka tnad iatreilang ka la duh noh, hynrei mynta, ki pdiang ruh ia ka jingdonkam jong ka bad ka lawei jong ka.

U Myntri ka tnad iatreilang jong ka sorkar pdeng u Amit Shah u la ong ba watla ka long kaba kongsan bha ïa ka ri India ban long ka ri kaba lai ha ka ïoh ka kot ha ka pyrthei, hynrei dei ban pyrkhat lang ïa ka roi ka par jong ki 1.4 billion ngut ki briew jong ka. U la ban jur ba tang ka tnad iatreilang ka don ka bor ban kyntiew ia ka ioh ka kot jong ka ri kaba kynthup lang ia baroh lyngba ki jingnoh synniang na baroh 1.4 billion ngut ki nongshong shnong. U la ong ba ka tnad iatreilang ka don ia ka bor kaba kyrpang ban pyniasoh ia ka pisa kaba duna na kiba bun ki riew shimet ban thaw ia ki karkhana kiba heh. U la pynpaw ba haba thaw ïa ka Cooperation Policy, la pynthikna ba ka jingthmu ba kongsan jong ka kan dei ha ka roi ka par jong ki 1.4 billion ngut ki briew jong ka ri India—khamtam eh ïa ki shnong ki thaw, ka rep ka riang, ki kynthei ha ki jaka nongkyndong, ki Dalit, bad ki riewlum. U la ong ruh ba ka jingthmu jong ka polisi ïatreilang kaba thymmai ka long ban tei ïa ka Viksit Bharat shuwa u snem 2047 lyngba ka ‘Sahkar Se Samriddhi’. U la batai ba ka thong jong ka polisi ka long ban kyntiew ia ki kynhun iatreilang kiba rit kiba tbit, kiba shai, kiba pyndonkam da ka teknoloji, kiba don ka jingkitkhlieh, kiba lah ban shaniah ha ka ioh ka kot, bad kiba jop—bad ban pynthikna ba la kumno kumno kawei ka kynhun iatreilang kan don ha man la ka shnong.

U Amit Shah u la ong shuh shuh ba la buh ia ki hynriew tylli ki nongrim ban pynurlong ia ki thong ba la buh na ka bynta ka tnad iatreilang. Kine ki long: Ka jingpynskhem ia ka nongrim, Ka jingkyntiew ia ka jinglong ba shlur, Ka jingpynkhreh ia ki seng iatreilang na ka bynta ka lawei, Ka jingkyntiew ia ka jinglong ba kynthup lang ia baroh bad ka jingpynheh ia ka jingpoi ia ki kam, Ka jingpyniar sha ki bynta ba thymmai, bad ka jingpynkhreh ia ki samla na ka bynta ka jingroi ka kam iatreilang.

U Myntri ka sorkar pdeng u la ong ba ka tnad ka la pynkhreh ia ka plan kaba bniah na ka bynta ki bynta kum ka kam jngohkai pyrthei, ka jingshakri taksi, ka insurance, bad ka bording kaba khuid. U la kdew kyrpang ba ka jingsdang kaba phylla kan long ha ki kam taksi bad insurance ha ka por kaba lyngkot bha. U la batai ba ka jingiashim bynta jong ki cooperative unit ha kine ki bynta kiba dang mih ka mut ba ki cooperative kiba jop kin iawan lang ban thaw ia ki kynhun cooperative kiba thymmai, ki ban sdang treikam ha kine ki bynta kiba thymmai. Ka jingmyntoi kaba mih lyngba kine ki unit kan poi ha kaba kut sha ki dkhot jong ki Primary Agricultural Credit Society (PACS) ha ki jaka nongkyndong. U la ban jur ba ka thong ka long ban tei ia ka jinglong jingman kaba iar bad kaba khlain. Ha kajuh ka por, ka jingthmu ka long ban pynskhem ia ka jingngeit ba ka jingiatreilang ka lah ban long ka atiar kaba kongsan na ka bynta ka roi ka par jong ka ri na ka bynta ki pateng ban wan.

U Amit Shah u la ong ba ka sorkar jong u Myntri Rangbah Duh ka ri u Narendra Modi ka long kaba la pynkhreh pura ban kyrshan ïa ki jaka treikam ïatreilang ha man la ki bynta, 24 kynta ha ka shi sngi. Hynrei u la ban jur ba ki unit ki dei ban pynkhlain ruh ialade. Ban pyndep ia kane, la ithuh ia 83 tylli ki kam ban ai jingiarap. Na kine, la pyndep ia ka jingtrei ha ki 58 tylli ki mat, bad 3 tylli ki mat la pyntreikam pura. Ki don 2 tylli ki mat kiba donkam ban pyntreikam beit bad iaid beit iaid ryntih. Ia ki mat kiba dang sah mynta yn sa dang peit. U la bynrap ba haba baroh ki jylla ki pyntreikam ïa kane ka polisi da kaba minot, kan ïalam sha ka jingthaw ïa ka rukom treikam kaba kynthup lang ia baroh, kaba lah ban shaniah ha lade, bad kaba lah ban pynkhreh na ka bynta ka lawei, ka ban ai ïa ka dur kaba thymmai ïa ka rukom treikam jong ka ri.

U Myntri ka tnat iatreilang jong ka sorkar pdeng u la ong ba la buh thong ban kyntiew lai shah ïa ka jingnoh synñiang jong ka tnat iatreilang sha ka GDP jong ka ri shuwa u snem 2034. U la ong ba kane ka dei ka thong kaba kongsan, hynrei u la bynrap ba la pynkhreh ïa ki jingpynkhreh kiba bniah ban pynurlong ïa ka. Ka jingthmu kaba kongsan ka long ban wanrah ia 50 klur ngut ki nongshong shnong, ki bym dei ki dkhot ne ki bym treikam ha ki kam iatreilang, sha ka jingiashim bynta lang. Nalor kata, ka don ka thong ban pynbun ia ki seng iatreilang da 30 per cent. Mynta, ki don 8.3 lak tylli ki society, bad ia kane yn pynkiew da 30 per cent.

Kan don la kumno kumno kawei ka jaka iatreikam ba kongsan ha man la ka panchayat, kaba lah ban long ka Primary Agricultural Credit Society (PACS), Primary Dairy Cooperative, Primary Fisheries Cooperative, Primary Multipurpose PACS, lane kano kano ka kynhun treikam ba kongsan. Kine ki unit kin iarap ruh ban thaw kham bun ki lad ioh kam ioh jam ia ki samla. U la ban jur ba khnang ban kyntiew ia ka jinglong kaba shai, ka jinglong shngain ha ka liang ka pisa tyngka, bad ka jingshaniah ha ki jaka treikam, dei ban pynkup bor ia kawei pa kawei ka unit. Na ka bynta kane, yn sa pynwandur ruh ia ka cluster bad ka rukom peit bniah.

U Amit Shah u la ong ba ia kane ka jingthmu jong ka Model Cooperative Village la sdang nyngkong eh ha Gandhinagar, bad ka dei ka sienjam jong ka NABARD. U la ong ba yn pyrshang ban seng san tylli ki shnong ki ban long ki nuksa jong ka jing iatreilang ha man la ka tehsil lyngba ki cooperative bank jong ka jylla. Ia ka jingiashim bynta jong ki kynthei yn pyniahap bad kane ka jingthmu lyngba ka White Revolution 2.0. U Shah u la bynrap ruh ba la pynkhreh ïa ka rukom treikam ban pyntreikam ïa kine ki skhim baroh lyngba ar tylli ki komiti ba kyrpang. Hapoh ka jingialam jong u Myntri Rangbah Duh ka ri u Narendra Modi, ka tnad iatreilang ka long kaba la pynkhreh pura ban pyntreikam ia kane ka polisi ha ka jinglong ba pura. U la ong ba ka polisi ka kynthup ïa ki bynta ba kongsan kiba thmu ban wanrah ïa ka jingkylla kaba khraw ha ka imlang sahlang jong ki shnong bad ban pynthikna ba ka teknoloji kan poi wat sha ki kynhun treikam kiba rit tam ha kine ki arphew snem ban wan. Ka jingpyndonkam da ka kompiwtor ha ka jingtreikam kan pynkylla khongpong ia ki rukom treikam, kaba ialam sha ka jingshai bad jingtreikam kaba kham bha. Ban kyntiew ia ka bor ban iakhun, ka jinglong shngain ha ka liang ka pisa tyngka, ka jinglong kaba shai, bad ka jinglah ban shah ia ki jingeh ha ki kam iatreilang, ia kine ki jingkylla yn pyntreikam ha ki shnong lyngba ka rukom peit bniah. Nalor kata, la buh ia ka rukom ban pynkylla ia ki ain kiba donkam man la ka 10 snem ban pynlong ia ka policy kaba iahap bad kaba seisoh.

U Myntri kam pohiing jong ka sorkar pdeng bad u Myntri ka tnad iatreilang u la ong ba lyngba kane ka polisi iatreilang, ka thong ka long ban wanrah ia ka jinglong jingman ha ki jaka nongkyndong bad ka rep ka riang, ha ryngkat bad kiba duk ba suk jong ka ri, kum ka bynta kaba lah ban shaniah bad kaba donkam bha ha ka ioh ka kot jong ka ri India ban pynurlong ia ka jingthmu jong ka Aatmanirbhar Bharat. U la ong ba la pynkhreh ia ka rukom treikam na ka bynta ka jingpynroi ia ka jingiatreilang kaba iahap na ka bynta man la ka jylla. U la ban jur ba kane ka polisi iatreilang ka long kaba don jingthmu, kaba lah ban pyntreikam, bad kaba pynleit jingmut ha ka jingseisoh. U Shah u la ong ba da kaba pynshong nongrim ha kane ka polisi, ka jingïatreilang jong ka India kan ïaid shakhmat sha u snem 2047, u snem ba dap shispah snem ka jingioh jinglaitluid ka India. U la bynrap ruh ba ka thong jong ka ‘Sahkar Se Samriddhi’ kam kynthup tang ïa ka jingkiew ha ka Gross Domestic Product (GDP), hynrei ka thmu ruh ban thaw kam thaw jam bad ban kyntiew ïa ka jingburom ïalade. La pynbiang ia ka rukom treikam kaba pynshong nongrim ha ki dkhot kum ka nongrim jong kane ka polisi. U la ban jur ba ka bha ka miat jong u dkhot ka dei ban long ka thong ba kongsan jong ka jingiatreilang, bad kane ka nongrim ka la ialam ia ka jingthaw ia ka polisi. Ka polisi ka phaikhmat ruh ban thaw ki lad ki lynti ban kyntiew ïa ka jingïashim bynta jong ki kynthei, ki samla, ki riewlum, bad ki Dalit ha ka roi ka par jong ka ri.

U Amit Shah u la ong ba yn pyrshang ban pynthikna ba ki scheduled cooperative bank kiba treikam bha kin shah khein ha kajuh ka kyrdan bad ki commercial bank, bad ba kin nym iakynduh ia kano kano ka jait jingleh shiliang ha kano kano ka jaka. U la pynpaw ba ban ioh ia ka jingpynpoi kam sha kylleng ka pyrthei bad ban ioh rung sha ki iew ki hat jong ka pyrthei, la seng ia ka National Cooperative Exports Limited. U la pynpaw ruh ba ïa ka rukom treikam na ka bynta ki PACS (Primary Agricultural Credit Societies) kaba pynshong nongrim ha ka jingpynïaid kaba khuid ba la pynïaid da ka teknoloji la dep ban pynbiang, bad ha ki por ban wan, baroh ki jait seng iatreilang kin pdiang ïa ki rukom pynïaid ba khuid ba la pynshong nongrim ha ka teknoloji. U la bynrap shuh shuh ba ka jingkiew kan long lyngba ka jingpynneh pynsah ia ka mariang bad ka nongrim jong "Ka jingiatreilang hapdeng ki seng iatreilang."

U Myntri ka tnad iatreilang jong ka sorkar pdeng u la ong ba ka sorkar Modi ka thmu ban tei ia ka kam treilang ha ka ri ha kaba ki samla hadien ba ki la ioh ia ka jinghikai kaba bha tam, ki jied ia ki kynhun iatreilang katkum ka kam. U la ong ba ka Cooperation Policy kaba thymmai ka don ia ka bor ban pynbeit ia baroh ki jingeh jong ka kam iatreilang, ban pynthikna ia ka jingkiew jong ka ha kine ki 25 snem ban wan, bad ban buh ia ka ha ka kyrdan kaba iaryngkat bad baroh kiwei pat ki kam kiba noh synniang sha ka ioh ka kot jong ka ri. U Shah u la ong ba baroh ki jylla ki la pdiang ia ki model bylaw da kaba kyntait noh ia kino kino ki jingiapher jingmut ha ka sain pyrthei. U la bynrap ruh ba ka kam ban seng ïa ki 45,000 tylli ki Primary Agricultural Credit Society (PACS) kiba thymmai ka la jan dep, ka jingpyndonkam da ka kompiwtor ïa ka PACS ruh ka la dep, bad ka jingïaid shaphrang ka la don ha kawei pa kawei na ki 25 tylli ki kam ba thymmai ba la bynshet ha ka PACS. Shuh shuh u la kdew ba haduh mynta, ki don 4,108 tylli ki PACS kiba la mynjur ban plie ïa ki PM Jan Aushadhi Kendra, 393 tylli ki PACS ki la aplai ban pynïaid ïa ki jaka die petrol bad diesel, palat 100 tylli ki PACS ki la aplai ban sam LPG, bad ki PACS ki dang trei ruh ban pynïaid ïa ka “Harya Ghar” Nal Sescheme ka Ghar Yojana.

U Shah u la ong ba la dep buh ia u maw nongrim jong ka Tribhuvan Sahkari University ban pynbiang ia ki briew kiba la pyntbit na ka bynta kine ki kam baroh. U la ong ba ha kaba kut jong une u snem, ka sorkar kan sdang ruh ia ka sienjam ‘Sahkar Taxi’, ha kaba ka jingmyntoi baroh kan leit beit beit sha ki nongñiah. U la bynrap ruh ba na ka bynta ka International Year of Cooperatives, ka India ka la buh ïa la ki jong ki thong bad ka dang trei ban pynurlong ïa ki.

U Amit Shah u la ong ba ka sorkar suki suki ka nang pynkhlaiñ ïa ka rukom treikam jong ka jingïatreilang. U la ong ba la seng lai tylli ki seng iatreilang jong ki bun tylli ki jylla na ka bynta ka jingshalan mar shabar ri, ka jingpynmih symbai, bad ka jingpynpaw & jingpyniaid iew ia ki mar organic. U la ban jur ba ka White Revolution 2.0 kan long ka mawjam ba kongsan jong ka roi ka par jong ki jaka nongkyndong ha ki sngi ban wan, ha kaba ka jingpynbun ïa ka jingïashim bynta jong ki kynthei kan long ka mat ba kongsan.

U Myntri ka tnad iatreilang u la ong ruh ba u Myntri Rangbah Duh ka ri u Modi u la seng ïa ka tnad ïatreilang da ka jingïohi jngai, da ka jingthmu ban pynkup bor ïa man la ka bynta jong ka imlang sahlang bad ban wanrah ïa ka roi ka par kaba kynthup lang ia baroh bad kaba iar. U la pynkut da kaba ong ba kane ka Cooperation Policy kan pynlong ba ka kam iatreilang kan long kaba iahap ha ki 25 snem ban wan, da kaba pynkylla ia ka sha ka bynta kaba noh synniang bad kaba la pynkhreh na ka bynta ka lawei.

****