• ପ୍ରଧାନମନ୍ତ୍ରୀ  ୮,୧୪୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ବିକାଶ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କଲେ
• ଉତ୍ତରାଖଣ୍ଡ ନିର୍ମାଣ ପାଇଁ ସଂଘର୍ଷ କରିଥିବା ପ୍ରତ୍ୟେକ ବ୍ୟକ୍ତି ଆଜି ଏହି ସୁନ୍ଦର ରାଜ୍ୟ ଯେଉଁ ଶିଖରରେ ପହଞ୍ଚିଛି ତାହା ଦେଖି ଖୁସି ହେବା ସ୍ୱାଭାବିକ: ପ୍ରଧାନମନ୍ତ୍ରୀ
• ଏହା ଉତ୍ତରାଖଣ୍ଡର ଉତଥାନ ଏବଂ ପ୍ରଗତି ପାଇଁ ପ୍ରକୃତରେ ଏକ ନିର୍ଣ୍ଣାୟକ ଯୁଗ: ପ୍ରଧାନମନ୍ତ୍ରୀ
• ଦେବଭୂମି ଉତ୍ତରାଖଣ୍ଡ ହେଉଛି ଭାରତର ଆଧ୍ୟାତ୍ମିକ ଜୀବନର ହୃଦସ୍ପନ୍ଦନ: ପ୍ରଧାନମନ୍ତ୍ରୀ
• ଉତ୍ତରାଖଣ୍ଡର ପ୍ରକୃତ ପରି ଚୟ ଏହାର ଆଧ୍ୟାତ୍ମିକ ଶକ୍ତିରେ ନିହିତ: ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଡେରାଡୁନରେ ଉତ୍ତରାଖଣ୍ଡ ପ୍ରତିଷ୍ଠାର ରୌପ୍ୟ ଜୟନ୍ତୀ ସମାରୋହରେ ଉଦବୋଧନ ଦେଇଛନ୍ତି। ଏହି ଅବସରରେ, ପ୍ରଧାନମନ୍ତ୍ରୀ ୮,୧୪୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ବିକାଶମୂଳକ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିଥିଲେ। ଏହି ଅବସରରେ ତାଙ୍କ ଅଭିଭାଷଣରେ, ଶ୍ରୀ ମୋଦୀ ଦେବଭୂମି ଉତ୍ତରାଖଣ୍ଡର ଜନସାଧାରଣଙ୍କୁ ତାଙ୍କର ଶୁଭେଚ୍ଛା ଜଣାଇ ସମସ୍ତଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ ସମ୍ମାନ ଏବଂ ସେବାର ବାର୍ତ୍ତା ଦେଇଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ ନଭେମ୍ବର ୯ ତାରିଖ ହେଉଛି ଏକ ଦୀର୍ଘ ଏବଂ ଉତ୍ସର୍ଗୀକୃତ ସଂଘର୍ଷର ପରିଣାମ । ଏହି ଦିନ ଆମ ସମସ୍ତଙ୍କ ମଧ୍ୟରେ ଗର୍ବର ଗଭୀର ଭାବନା ସୃଷ୍ଟି କରେ। ସେ କହିଥିଲେ ଯେ ଉତ୍ତରାଖଣ୍ଡର ଦେବତୁଲ୍ୟ ଲୋକମାନେ ଏକ ସ୍ୱପ୍ନ ଦେଖିଥିଲେ, ଯାହା ୨୫ ବର୍ଷ ପୂର୍ବେ ଶ୍ରୀ ଅଟଳ ବିହାରୀ ବାଜପେୟୀଙ୍କ ନେତୃତ୍ୱରେ ପୂରଣ ହୋଇଥିଲା। ଗତ ୨୫ ବର୍ଷର ଯାତ୍ରା ଉପରେ ପ୍ରତିଫଳିତ କରି ଶ୍ରୀ ମୋଦୀ କହିଥିଲେ ଯେ ଆଜି ଉତ୍ତରାଖଣ୍ଡ ଯେଉଁ ଉଚ୍ଚତାରେ ପହଞ୍ଚିଛି ତାହା ଦେଖି, ଏହି ସୁନ୍ଦର ରାଜ୍ୟ ନିର୍ମାଣ ପାଇଁ ସଂଘର୍ଷ କରୁଥିବା ପ୍ରତ୍ୟେକଙ୍କ ପାଇଁ ଆନନ୍ଦିତ ହେବା ସ୍ୱାଭାବିକ। ସେ କହିଥିଲେ ଯେ ଯେଉଁମାନେ ପର୍ବତକୁ ଭଲ ପାଆନ୍ତି, ଉତ୍ତରାଖଣ୍ଡର ସଂସ୍କୃତି, ଏହାର ପ୍ରାକୃତିକ ସୌନ୍ଦର୍ଯ୍ୟକୁ ଆଦର କରନ୍ତି ଏବଂ ଦେବଭୂମିର ଲୋକଙ୍କ ପ୍ରତି ସ୍ନେହ ରଖନ୍ତି, ସେମାନେ ଆଜି ଆନନ୍ଦ ଏବଂ ଖୁସିରେ ପରିପୂର୍ଣ୍ଣ।
କେନ୍ଦ୍ର ଏବଂ ରାଜ୍ୟ ସରକାରଙ୍କ ଉତ୍ତରାଖଣ୍ଡର ସମ୍ଭାବନାକୁ ନୂତନ ଉଚ୍ଚତାରେ ପହଞ୍ଚାଇବା ପାଇଁ ପ୍ରତିବଦ୍ଧତାରେ ସନ୍ତୋଷ ପ୍ରକାଶ କରି ଶ୍ରୀ ମୋଦୀ ଉତ୍ତରାଖଣ୍ଡର ରୌପ୍ୟ ଜୟନ୍ତୀରେ ସମସ୍ତଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ। ଏହି ଅବସରରେ, ସେ ଆନ୍ଦୋଳନ ସମୟରେ ପ୍ରାଣବଳି ଦେଇଥିବା ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ଏବଂ ସେ ସମୟର ସମସ୍ତ ଆନ୍ଦୋଳନକାରୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ଉତ୍ତରାଖଣ୍ଡ ସହିତ ତାଙ୍କର ଗଭୀର ଭାବନାତ୍ମକ ସମ୍ପର୍କ କଥା ଉଲ୍ଲେଖ କରି ଶ୍ରୀ ମୋଦୀ ମନେ ପକାଇଥିଲେ ଯେ ଏହି ଅଞ୍ଚଳକୁ ତାଙ୍କର ଆଧ୍ୟାତ୍ମିକ ଗସ୍ତ ସମୟରେ, ପର୍ବତାଞ୍ଚଳରେ ରହୁଥିବା ତାଙ୍କ ଭାଇ ଏବଂ ଭଉଣୀମାନଙ୍କ ସଂଘର୍ଷ, କଠିନ ପରିଶ୍ରମ ଏବଂ ଦୃଢ଼ ସଂକଳ୍ପ ତାଙ୍କୁ ସର୍ବଦା ପ୍ରେରଣା ଦେଇଥିଲା। ସେ କହିଥିଲେ ଯେ ଉତ୍ତରାଖଣ୍ଡରେ ତାଙ୍କର ସମୟ ତାଙ୍କୁ ରାଜ୍ୟର ଅପାର ସମ୍ଭାବନାର ପ୍ରତ୍ୟକ୍ଷ ଅଭିଜ୍ଞତା ଦେଇଥିଲା। ପ୍ରଧାନମନ୍ତ୍ରୀ କହିଥିଲେ ଯେ ଏହି ଦୃଢ଼ ବିଶ୍ୱାସ ହିଁ ତାଙ୍କୁ ବାବା କେଦାରଙ୍କୁ ଭେଟିବା ପରେ ଘୋଷଣା କରିବାକୁ ପ୍ରେରଣା ଦେଇଥିଲା ଯେ ଏହି ଦଶନ୍ଧି ଉତ୍ତରାଖଣ୍ଡର। ରାଜ୍ୟର ୨୫ ବର୍ଷ ପୂରଣ ହେବା ପରେ, ସେ କହିଥିଲେ ଯେ ଏହା ଉତ୍ତରାଖଣ୍ଡର ପ୍ରଗତି ଏବଂ ବିକାଶ ପାଇଁ ପ୍ରକୃତରେ ଏକ ନିର୍ଣ୍ଣାୟକ ଯୁଗ। 
୨୫ ବର୍ଷ ପୂର୍ବେ ଉତ୍ତରାଖଣ୍ଡ ନବଗଠିତ ହେବା ସମୟରେ ସାମ୍ନା କରିଥିବା ବିଶାଳ ଆହ୍ୱାନଗୁଡ଼ିକୁ ମନେ ପକାଇ ଶ୍ରୀ ମୋଦୀ କହିଥିଲେ ଯେ ସମ୍ବଳ ସୀମିତ ଥିଲା, ରାଜ୍ୟର ବଜେଟ୍ ଛୋଟ ଥିଲା, ଆୟର ଉତ୍ସ କମ ଥିଲା ଏବଂ ଅଧିକାଂଶ ଆବଶ୍ୟକତା କେନ୍ଦ୍ରୀୟ ସହାୟତା ମାଧ୍ୟମରେ ପୂରଣ କରାଯାଉଥିଲା। ସେ କହିଥିଲେ ଯେ ଚିତ୍ର ଏବେ ସମ୍ପୂର୍ଣ୍ଣ ବଦଳି ଯାଇଛି। କାର୍ଯ୍ୟକ୍ରମରେ ପହଞ୍ଚିବା ପୂର୍ବରୁ, ସେ ରୌପ୍ୟ ଜୟନ୍ତୀ ପାଳନ ପାଇଁ ଆୟୋଜିତ ଏକ ଭବ୍ୟ ପ୍ରଦର୍ଶନୀ ପରିଦର୍ଶନ କରିଥିଲେ, ଯେଉଁଥିରେ ଗତ ୨୫ ବର୍ଷର ଉତ୍ତରାଖଣ୍ଡର ଯାତ୍ରାର ଝଲକ ପ୍ରଦର୍ଶିତ ହୋଇଥିଲା। ସେ କହିଥିଲେ ଯେ ଭିତ୍ତିଭୂମି, ଶିକ୍ଷା, ଶିଳ୍ପ, ପର୍ଯ୍ୟଟନ, ସ୍ୱାସ୍ଥ୍ୟ, ବିଦ୍ୟୁତ୍ ଏବଂ ଗ୍ରାମୀଣ ବିକାଶ ଭଳି କ୍ଷେତ୍ରର ସଫଳତାର କାହାଣୀ ପ୍ରକୃତରେ ପ୍ରେରଣାଦାୟକ। ପ୍ରଧାନମନ୍ତ୍ରୀ କହିଥିଲେ ଯେ ୨୫ ବର୍ଷ ପୂର୍ବେ ଉତ୍ତରାଖଣ୍ଡର ବଜେଟ୍ ମାତ୍ର ୪,୦୦୦ କୋଟି ଟଙ୍କା ଥିଲା, ଯାହା ଏବେ ୧ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଏହି ସମୟ ମଧ୍ୟରେ ରାଜ୍ୟରେ ବିଦ୍ୟୁତ୍ ଉତ୍ପାଦନ ଚାରିଗୁଣ ବୃଦ୍ଧି ପାଇଛି ଏବଂ ରାସ୍ତାର ଲମ୍ବ ଦ୍ୱିଗୁଣିତ ହୋଇଛି। ସେ କହିଥିଲେ ଯେ ପୂର୍ବରୁ ଛଅ ମାସରେ କେବଳ ୪,୦୦୦ ବିମାନ ଯାତ୍ରୀ ଏଠାକୁ ଯାତ୍ରା କରୁଥିଲେ, ଯେତେବେଳେ ଆଜି ପ୍ରତିଦିନ ୪,୦୦୦ ରୁ ଅଧିକ ଯାତ୍ରୀ ବିମାନରେ ଯାତ୍ରା କରନ୍ତି।
ଶ୍ରୀ ମୋଦୀ କହିଥିଲେ ଯେ ଗତ ୨୫ ବର୍ଷ ମଧ୍ୟରେ ଉତ୍ତରାଖଣ୍ଡରେ ଇଞ୍ଜିନିୟରିଂ କଲେଜ ସଂଖ୍ୟା ଦଶ ଗୁଣରୁ ଅଧିକ ବୃଦ୍ଧି ପାଇଛି। ପୂର୍ବରୁ ରାଜ୍ୟରେ କେବଳ ଗୋଟିଏ ମେଡିକାଲ କଲେଜ ଥିଲା, ଆଜି ଦଶଟି ଅଛି। ସେ କହିଛନ୍ତି ଯେ ୨୫ ବର୍ଷ ପୂର୍ବେ ଟୀକାକରଣ କଭରେଜ୍ ୨୫ ପ୍ରତିଶତରୁ କମ୍ ଥିଲା, କିନ୍ତୁ ଏବେ ଉତ୍ତରାଖଣ୍ଡର ପ୍ରାୟ ପ୍ରତ୍ୟେକ ଗ୍ରାମ ଟୀକାକରଣ ଦ୍ୱାରା ଅନ୍ତର୍ଭୁକ୍ତ। ପ୍ରଧାନମନ୍ତ୍ରୀ କହିଛନ୍ତି ଯେ ଉତ୍ତରାଖଣ୍ଡ ଜୀବନର ସମସ୍ତ ଦିଗରେ ଉଲ୍ଲେଖନୀୟ ପ୍ରଗତି କରିଛି। ସେ ବିକାଶର ଏହି ଯାତ୍ରାକୁ ଉଲ୍ଲେଖନୀୟ ବୋଲି ବର୍ଣ୍ଣନା କରିଛନ୍ତି ଏବଂ ଏହି ପରିବର୍ତ୍ତନକୁ ଅନ୍ତର୍ଭୁକ୍ତିମୂଳକ ବିକାଶ ନୀତି ଏବଂ ଉତ୍ତରାଖଣ୍ଡର ପ୍ରତ୍ୟେକ ନାଗରିକଙ୍କ ସାମୂହିକ ସଂକଳ୍ପକୁ ଶ୍ରେୟ ଦେଇଛନ୍ତି। ସେ କହିଛନ୍ତି ଯେ ପୂର୍ବରୁ, ଉଚ୍ଚ ପର୍ବତ ଚଢ଼ିବା ବିକାଶରେ ବାଧା ସୃଷ୍ଟି କରୁଥିଲା, କିନ୍ତୁ ବର୍ତ୍ତମାନ ନୂତନ ରାସ୍ତା ଖୋଲିବାରେ ଲାଗିଛି।
ଉତ୍ତରାଖଣ୍ଡର ଯୁବପିଢ଼ି ଏବଂ ଉଦ୍ୟୋଗୀମାନଙ୍କ ସହିତ ତାଙ୍କର ପୂର୍ବ ଆଲୋଚନା ଉପରେ ପ୍ରଧାନମନ୍ତ୍ରୀ କହିଛନ୍ତି ଯେ ରାଜ୍ୟର ବିକାଶ ପାଇଁ ସମସ୍ତେ ବହୁତ ଉତ୍ସାହିତ। ସେ କହିଛନ୍ତି ଯେ ଆଜି ଉତ୍ତରାଖଣ୍ଡର ଲୋକଙ୍କ ଭାବନା ଗରୱାଲିରେ ସଂକ୍ଷେପରେ ଏହିପରି କୁହାଯାଇପାରିବ: "୨୦୪୭ ସୁଦ୍ଧା, ଯେତେବେଳେ ଭାରତ ବିକଶିତ ଦେଶମାନଙ୍କ ମଧ୍ୟରେ ସାମିଲ ହେବ, ମୋର ଉତ୍ତରାଖଣ୍ଡ, ମୋର ଦେବଭୂମି, ସମ୍ପୂର୍ଣ୍ଣ ପ୍ରସ୍ତୁତ ହୋଇଯିବ।"
ଉତ୍ତରାଖଣ୍ଡର ବିକାଶ ଯାତ୍ରାକୁ ତ୍ୱରାନ୍ୱିତ କରିବା ପାଇଁ ଆଜି ଅନେକ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏଗୁଡ଼ିକର ଘୋଷଣା କରି ଶ୍ରୀ ମୋଦୀ କହିଛନ୍ତି ଯେ ଶିକ୍ଷା, ସ୍ୱାସ୍ଥ୍ୟ, ପର୍ଯ୍ୟଟନ ଏବଂ କ୍ରୀଡା ସହିତ ଜଡିତ ଏହି ପ୍ରକଳ୍ପଗୁଡ଼ିକ ଏହି ଅଞ୍ଚଳରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ। ସେ ଜୋର ଦେଇ କହିଛନ୍ତି ଯେ ଜାମରାନି ଏବଂ ସୋଙ୍ଗ୍ ଡ୍ୟାମ୍ ପ୍ରକଳ୍ପ ଡେରାଡୁନ୍ ଏବଂ ହଲଦ୍ୱାନୀର ପାନୀୟ ଜଳ ସମସ୍ୟା ସମାଧାନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଏହି ପ୍ରକଳ୍ପଗୁଡ଼ିକରେ ୮,୦୦୦ କୋଟିରୁ ଅଧିକ ବିନିଯୋଗ କରାଯିବ। ଏହି ପଦକ୍ଷେପଗୁଡ଼ିକ ପାଇଁ ସେ ଉତ୍ତରାଖଣ୍ଡର ଲୋକମାନଙ୍କୁ ଅଭିନନ୍ଦନ ଜଣାଇଥିଲେ।
ଉତ୍ତରାଖଣ୍ଡ ସରକାରଙ୍କ ଦ୍ୱାରା ଡିଜିଟାଲ ମୁଦ୍ରାରେ ସେଓ ଏବଂ କିୱି ଚାଷୀମାନଙ୍କୁ ସବସିଡି ପ୍ରଦାନ କରିବାର ଆରମ୍ଭ ବିଷୟରେ ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଆଧୁନିକ ପ୍ରଯୁକ୍ତିବିଦ୍ୟା ଯୋଗୁଁ ବର୍ତ୍ତମାନ ପ୍ରଦାନ କରାଯାଉଥିବା ଆର୍ଥିକ ସହାୟତାକୁ ସମ୍ପୂର୍ଣ୍ଣ ଭାବରେ ତଦାରଖ କରିବା ସମ୍ଭବ ହେଉଛି। ପ୍ରଧାନମନ୍ତ୍ରୀ ରାଜ୍ୟ ସରକାର, ଭାରତୀୟ ରିଜର୍ଭ ବ୍ୟାଙ୍କ ଏବଂ ଏହି ପଦକ୍ଷେପରେ ସାମିଲ ସମସ୍ତ ଅଂଶୀଦାରଙ୍କ ପ୍ରୟାସକୁ ପ୍ରଶଂସା କରିଥିଲେ।
ଶ୍ରୀ ମୋଦୀ କହିଛନ୍ତି ଯେ, ଦେବଭୂମି ଉତ୍ତରାଖଣ୍ଡ ହେଉଛି ଭାରତର ଆଧ୍ୟାତ୍ମିକ ଜୀବନର ହୃଦସ୍ପନ୍ଦନ। ସେ ଗଙ୍ଗୋତ୍ରୀ, ଯମୁନୋତ୍ରୀ, କେଦାରନାଥ, ବଦ୍ରିନାଥ, ଜାଗେଶ୍ୱର ଏବଂ ଆଦି କୈଳାସକୁ ପବିତ୍ର ତୀର୍ଥସ୍ଥଳ ଭାବରେ ବର୍ଣ୍ଣନା କରିଥିଲେ ଯାହା ଆମର ବିଶ୍ୱାସର ପ୍ରତୀକ। ପ୍ରତିବର୍ଷ, ଲକ୍ଷ ଲକ୍ଷ ଭକ୍ତ ଏହି ପବିତ୍ର ତୀର୍ଥସ୍ଥଳଗୁଡ଼ିକୁ ପରିଦର୍ଶନ କରନ୍ତି । ଏହା କେବଳ ଭକ୍ତିର ପଥ ପ୍ରଶସ୍ତ କରେ ନାହିଁ ବରଂ ଉତ୍ତରାଖଣ୍ଡର ଅର୍ଥନୀତିରେ ନୂତନ ଶକ୍ତି ମଧ୍ୟ ସଞ୍ଚାର କରେ।
ଉତ୍ତରାଖଣ୍ଡର ବିକାଶରେ ଉନ୍ନତ ସଂଯୋଗୀକରଣର ଅଭୂତପୂର୍ବ ଅବଦାନ ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ କହିଛନ୍ତି ଯେ ରାଜ୍ୟରେ ବର୍ତ୍ତମାନ ୨ ଲକ୍ଷ କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପ ଚାଲିଛି। ଋଷିକୂଣ୍ଡ-କର୍ଣ୍ଣପ୍ରୟାଗ ରେଳ ପ୍ରକଳ୍ପ ଚାଲିଛି, ଏବଂ ଦିଲ୍ଲୀ-ଡେରାଡୁନ ଏକ୍ସପ୍ରେସୱେ ପ୍ରାୟ ସମ୍ପୂର୍ଣ୍ଣ ହୋଇଛି। ସେ ସୂଚନା ଦେଇଥିଲେ ଯେ ଗୌରୀକୁଣ୍ଡ-କେଦାରନାଥ ଏବଂ ଗୋବିନ୍ଦଘାଟ-ହେମକୁଣ୍ଡ ସାହିବ ରୋପୱେ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏହି ପ୍ରକଳ୍ପଗୁଡ଼ିକ ଉତ୍ତରାଖଣ୍ଡରେ ବିକାଶକୁ ତ୍ୱରାନ୍ୱିତ କରୁଛି।
ପ୍ରଧାନମନ୍ତ୍ରୀ କହିଥିଲେ ଯେ ଉତ୍ତରାଖଣ୍ଡ ଗତ ୨୫ ବର୍ଷ ମଧ୍ୟରେ ପ୍ରଗତିରେ ଏକ ଲମ୍ବା ଯାତ୍ରା କରିଛି। ସେ ପଚାରିଥିଲେ ଯେ ଆଗାମୀ ୨୫ ବର୍ଷ ମଧ୍ୟରେ ଉତ୍ତରାଖଣ୍ଡ ପାଇଁ ଆମେ କେଉଁ ଉଚ୍ଚତା ହାସଲ କରିବାକୁ ଆକାଂକ୍ଷା କରୁଛୁ। "ଯେଉଁଠାରେ ଇଚ୍ଛାଶକ୍ତି ଅଛି, ସେଠାରେ ଏକ ଉପାୟ ଅଛି" ଏହି କଥାକୁ ଉଦ୍ଧୃତ କରି ସେ କହିଥିଲେ ଯେ ଥରେ ଆମେ ଆମର ଲକ୍ଷ୍ୟ ଜାଣିଗଲେ, ସେଗୁଡ଼ିକୁ ହାସଲ କରିବା ପାଇଁ ରାସ୍ତା ଶୀଘ୍ର ବାହାରିଯାଏ। ସେ କହିଥିଲେ ଯେ ଏହି ଭବିଷ୍ୟତ ଲକ୍ଷ୍ୟଗୁଡ଼ିକ ବିଷୟରେ ଆଲୋଚନା ଆରମ୍ଭ କରିବା ପାଇଁ ନଭେମ୍ବର ୯ ତାରିଖଠାରୁ ଭଲ ଦିନ ଆଉ କିଛି ହୋଇପାରିବ ନାହିଁ।
ଉତ୍ତରାଖଣ୍ଡର ପ୍ରକୃତ ପରିଚୟ ଏହାର ଆଧ୍ୟାତ୍ମିକ ଶକ୍ତିରେ ନିହିତ ଅଛି ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ ଯେ ଯଦି ଉତ୍ତରାଖଣ୍ଡ ଏପରି କରିବାକୁ ସଂକଳ୍ପ ନିଏ, ତେବେ ଆଗାମୀ ବର୍ଷଗୁଡ଼ିକରେ ଏହା ନିଜକୁ "ବିଶ୍ୱର ଆଧ୍ୟାତ୍ମିକ ରାଜଧାନୀ" ଭାବରେ ପ୍ରତିଷ୍ଠିତ କରିପାରିବ। ସେ କହିଛନ୍ତି ଯେ ରାଜ୍ୟର ମନ୍ଦିର, ଆଶ୍ରମ, ଧ୍ୟାନ ଏବଂ ଯୋଗ କେନ୍ଦ୍ରଗୁଡ଼ିକୁ ବିଶ୍ୱ ନେଟୱାର୍କ ସହିତ ସଂଯୋଗ କରାଯାଇପାରିବ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଏବଂ ବିଦେଶରୁ ଲୋକ ସ୍ୱାସ୍ଥ୍ୟ ପାଇଁ ଉତ୍ତରାଖଣ୍ଡକୁ ଆସନ୍ତି ଏବଂ ଏହାର ଔଷଧି ଏବଂ ଆୟୁର୍ବେଦିକ ଔଷଧର ଚାହିଦା ଦ୍ରୁତ ଗତିରେ ବୃଦ୍ଧି ପାଉଛି। ସେ ଗୁରୁତ୍ୱାରୋପ କରିଥିଲେ ଯେ ଗତ ୨୫ ବର୍ଷ ମଧ୍ୟରେ, ଉତ୍ତରାଖଣ୍ଡ ସୁଗନ୍ଧିତ ଉଦ୍ଭିଦ, ଆୟୁର୍ବେଦୀୟ ଔଷଧ, ଯୋଗ ଏବଂ ସ୍ୱାସ୍ଥ୍ୟ ପର୍ଯ୍ୟଟନ କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି କରିଛି। ସେ ପ୍ରସ୍ତାବ ଦେଇଥିଲେ ଯେ ଉତ୍ତରାଖଣ୍ଡର ପ୍ରତ୍ୟେକ ବିଧାନସଭା ନିର୍ବାଚନ ମଣ୍ଡଳୀରେ ଯୋଗ କେନ୍ଦ୍ର, ଆୟୁର୍ବେଦ କେନ୍ଦ୍ର ଏବଂ ପ୍ରାକୃତିକ ଚିକିତ୍ସା ପ୍ରତିଷ୍ଠାନର ଏକ ବ୍ୟାପକ ପ୍ୟାକେଜ୍ ରହିବା ଉଚିତ, ଯାହା ବିଦେଶୀ ପର୍ଯ୍ୟଟକଙ୍କୁ ଆକର୍ଷିତ କରିବ।
ଭାରତ ସରକାର ସୀମାନ୍ତବର୍ତ୍ତୀ ଅଞ୍ଚଳରେ ଭାଇବ୍ରାଣ୍ଟ ଭିଲେଜ୍ କାର୍ଯ୍ୟକ୍ରମ ଉପରେ ବହୁତ ଗୁରୁତ୍ୱ ଦେଉଛନ୍ତି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଉତ୍ତରାଖଣ୍ଡର ପ୍ରତ୍ୟେକ ଜୀବନ୍ତ ଗ୍ରାମକୁ ଏକ କ୍ଷୁଦ୍ର ପର୍ଯ୍ୟଟନ କେନ୍ଦ୍ର କରିବା ପାଇଁ ତାଙ୍କର ପରିକଳ୍ପନା ପ୍ରକାଶ କରିଥିଲେ, ଯେଉଁଠାରେ ହୋମଷ୍ଟେ, ସ୍ଥାନୀୟ ଖାଦ୍ୟ ଏବଂ ସଂସ୍କୃତିକୁ ପ୍ରୋତ୍ସାହିତ କରାଯାଇପାରିବ। ଶ୍ରୀ ମୋଦୀ ସମସ୍ତଙ୍କୁ ଘର ଭଳି ପରିବେଶ ପର୍ଯ୍ୟଟକଙ୍କ ଅନୁଭୂତି ଏବଂ ଦୀପ, ଚୁଡାକାନି, ରୋଟି-ଆରସା, ରସ-ଭାତ ଏବଂ ଝାଙ୍ଗୋରା କି ଖୀର ଭଳି ପାରମ୍ପରିକ ଖାଦ୍ୟର ସ୍ୱାଦ ନେଇ ସେମାନେ ଅନୁଭବ କରୁଥିବା ଆନନ୍ଦ କଳ୍ପନା କରିବାକୁ ନିମନ୍ତ୍ରଣ କରିଥିଲେ। ସେ କହିଥିଲେ ଯେ ଏହି ଆନନ୍ଦ ସେମାନଙ୍କୁ ବାରମ୍ବାର ଉତ୍ତରାଖଣ୍ଡକୁ ଫେରାଇ ଆଣିବ।
ଉତ୍ତରାଖଣ୍ଡର ଲୁକ୍କାୟିତ ସମ୍ଭାବନାକୁ ଉନ୍ମୋଚନ କରିବା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ ହରେଲା, ଫୁଲଦେଇ ଏବଂ ଭିଟୋଲି ଭଳି ଉତ୍ସବଗୁଡ଼ିକ ସେଠାରେ ଯୋଗ ଦେଉଥିବା ପର୍ଯ୍ୟଟକଙ୍କ ଉପରେ ଏକ ସ୍ଥାୟୀ ଛାପ ଛାଡ଼ିଥାଏ। ସେ ନନ୍ଦାଦେବୀ ମେଳା, ଜୌଲଜୀବୀ ମେଳା, ବାଗେଶ୍ୱରର ଉତ୍ତରାୟଣୀ ମେଳା, ଦେବୀଧୂରା ମେଳା, ଶ୍ରାବଣୀ ମେଳା ଏବଂ ମାଖନ ମହୋତ୍ସବ ଭଳି ସ୍ଥାନୀୟ ମେଳା ସଂପର୍କରେ ଉଲ୍ଲେଖ କରି କହିଥିଲେ ଯେ ଉତ୍ତରାଖଣ୍ଡର ଆତ୍ମା ଏହି ପର୍ବଗୁଡ଼ିକରେ ବାସ କରେ। ଏହି ସ୍ଥାନୀୟ ପର୍ବ ଏବଂ ପରମ୍ପରାକୁ ବିଶ୍ୱ ମାନଚିତ୍ରରେ ଆଣିବା ପାଇଁ, ସେ "ଗୋଟିଏ ଜିଲ୍ଲା, ଗୋଟିଏ ମହୋତ୍ସବ" ନାମକ ଅଭିଯାନ ଆରମ୍ଭ କରାଯାଉ ବୋଲି ପ୍ରସ୍ତାବ ଦେଇଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ, ଉତ୍ତରାଖଣ୍ଡର ସମସ୍ତ ପାହାଡିଆ ଜିଲ୍ଲାରେ ଫଳ ଚାଷ ପାଇଁ ଅପାର ସମ୍ଭାବନା ରହିଛି ଏବଂ ଏଗୁଡ଼ିକୁ ଉଦ୍ୟାନ କୃଷି କେନ୍ଦ୍ର ଭାବରେ ବିକଶିତ କରାଯିବା ଉଚିତ। ସେ ବ୍ଲୁବେରି, କିୱି, ଏବଂ ଔଷଧୀୟ ଉଦ୍ଭିଦକୁ କୃଷିର ଭବିଷ୍ୟତ ଭାବରେ ବର୍ଣ୍ଣନା କରିଥିଲେ। ସେ ଖାଦ୍ୟ ପ୍ରକ୍ରିୟାକରଣ, ହସ୍ତଶିଳ୍ପ ଏବଂ ଜୈବିକ ଉତ୍ପାଦ ଭଳି କ୍ଷେତ୍ରରେ ଥିବା ଲଘୁ, କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥାଗୁଡ଼ିକୁ ପୁନର୍ଜୀବିତ କରିବାର ଆବଶ୍ୟକତା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ।
ଉତ୍ତରାଖଣ୍ଡରେ ସାରାବର୍ଷ ପର୍ଯ୍ୟଟନର ସମ୍ଭାବନା ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ପୂର୍ବରୁ ମଧ୍ୟ ପ୍ରସ୍ତାବ ଦେଇଥିଲେ ଯେ ଯାତାୟାତ ବ୍ୟବସ୍ଥାରେ ଉନ୍ନତି ଆସିବା ସହ ରାଜ୍ୟରେ ସବୁ ଋତୁରେ ପର୍ଯ୍ୟଟନ ଜାରି ରହିବା ଆବଶ୍ୟକ । ସେ ଆନନ୍ଦ ପ୍ରକାଶ କରିଥିଲେ ଯେ ଉତ୍ତରାଖଣ୍ଡ ଏବେ ଶୀତକାଳୀନ ପର୍ଯ୍ୟଟନ ଆଡ଼କୁ ଗତି କରୁଛି । ଶ୍ରୀ ମୋଦୀ କହିଥିଲେ ଯେ ସଦ୍ୟତମ ସୂଚନା ଅନୁସାରେ ଶୀତକାଳୀନ ପର୍ଯ୍ୟଟକଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି, ଯାହାକି ବେଶ ଉତ୍ସାହଜନକ। ସେ ପିଥୋରାଗଡ଼ରେ ୧୪,୦୦୦ ଫୁଟରୁ ଅଧିକ ଉଚ୍ଚତାରେ ଅନୁଷ୍ଠିତ ଏକ ଉଚ୍ଚ-ଅକ୍ଷାଂଶ ମାରାଥନର ସଫଳ ଆୟୋଜନକୁ ମଧ୍ୟ ଉଲ୍ଲେଖ କରିଥିଲେ, କହିଥିଲେ ଯେ ଆଦି କୈଳାସ ପରିକ୍ରମା ଦେଶ ପାଇଁ ପ୍ରେରଣାର ଉତ୍ସ ପାଲଟିଛି। ତିନି ବର୍ଷ ପୂର୍ବେ, ଆଦି କୈଳାସ ଯାତ୍ରାରେ ୨,୦୦୦ ରୁ କମ୍ ତୀର୍ଥଯାତ୍ରୀ ଅଂଶଗ୍ରହଣ କରିଥିଲେ; ଆଜି, ଏହି ସଂଖ୍ୟା ୩୦,୦୦୦ରୁ ଅଧିକ ହୋଇଛି। ସେ ଉଲ୍ଲେଖ କରିଥିଲେ ଯେ କିଛି ଦିନ ପୂର୍ବରୁ, କେଦାରନାଥ ମନ୍ଦିରର ଦ୍ୱାର ଶୀତଋତୁ ପାଇଁ ବନ୍ଦ ହୋଇଯାଇଛି ଏବଂ ଏହି ବର୍ଷ, ପ୍ରାୟ ୧.୭ ନିୟୁତ ଭକ୍ତ କେଦାରନାଥ ମନ୍ଦିର ଦର୍ଶନ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ତୀର୍ଥଯାତ୍ରା ଏବଂ ବର୍ଷସାରା ପର୍ଯ୍ୟଟନ ଉତ୍ତରାଖଣ୍ଡର ଶକ୍ତି, ଯାହା ଏହାକୁ ବିକାଶର ନୂତନ ଶିଖରରେ ପହଞ୍ଚାଇବ। ସେ କହିଥିଲେ ଯେ ପରିବେଶ ପର୍ଯ୍ୟଟନ ଏବଂ ଦୁଃସାହସିକ ପର୍ଯ୍ୟଟନର ସମ୍ଭାବନା ଭାରତର ଯୁବପିଢ଼ିଙ୍କୁ ଆକର୍ଷିତ କରିବା ପାଇଁ ଉତ୍କୃଷ୍ଟ ସୁଯୋଗ ପ୍ରଦାନ କରେ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଉତ୍ତରାଖଣ୍ଡ ଏବେ ଚଳଚ୍ଚିତ୍ର ସୁଟିଂ ପାଇଁ ଏକ ଗନ୍ତବ୍ୟସ୍ଥଳ ଭାବରେ ଉଭା ହେଉଛି, ଏବଂ ରାଜ୍ୟର ନୂତନ ଚଳଚ୍ଚିତ୍ର ନୀତି ସୁଟିଂକୁ ଆହୁରି ସହଜ କରିଛି। ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ଉତ୍ତରାଖଣ୍ଡ ବିବାହ ଗନ୍ତବ୍ୟସ୍ଥଳ ଭାବରେ ଲୋକପ୍ରିୟତା ହାସଲ କରୁଛି। "ଓ୍ବେଡ ଇନ ଇଣ୍ଡିଆ ବା ଭାରତରେ ବିବାହ କରନ୍ତୁ" ପଦକ୍ଷେପକୁ ଦୃଷ୍ଟିରେ ରଖି ଉତ୍ତରାଖଣ୍ଡ ବିଭିନ୍ନ ସୁବିଧା ସୁଯୋଗର ବିକାଶ କରିବା ଉଚିତ ଏବଂ ଏହି ଉଦ୍ଦେଶ୍ୟରେ ପାଞ୍ଚରୁ ସାତଟି ପ୍ରମୁଖ ଗନ୍ତବ୍ୟସ୍ଥଳ ଚିହ୍ନଟ ଏବଂ ସେଗୁଡ଼ିକର ବିକାଶ କରିବା ପାଇଁ ସେ ପରାମର୍ଶ ଦେଇଥିଲେ।
ଶ୍ରୀ ମୋଦି ଏକ ଆତ୍ମନିର୍ଭରଶୀଳ ଭାରତ ପାଇଁ ଦେଶର ସଂକଳ୍ପକୁ ଦୋହରାଇଥିଲେ ଏବଂ କହିଥିଲେ ଯେ ଆତ୍ମନିର୍ଭରଶୀଳତାର ପଥ "ଭୋକାଲ୍ ଫର୍ ଲୋକାଲ୍" ମାଧ୍ୟମରେ ରହିଛି। ସେ ଉଲ୍ଲେଖ କରିଛନ୍ତି ଯେ ଉତ୍ତରାଖଣ୍ଡ ସର୍ବଦା ଏହି ପଦ୍ଧତିକୁ ଗ୍ରହଣ କରିଛି; ସ୍ଥାନୀୟ ଉତ୍ପାଦ ସହିତ ଏହାର ଗଭୀର ସମ୍ପର୍କ, ସେମାନଙ୍କର ବ୍ୟବହାର ଏବଂ ଦୈନନ୍ଦିନ ଜୀବନରେ ସେମାନଙ୍କର ସମନ୍ୱୟ ଏହାର ପରମ୍ପରାର ଅବିଚ୍ଛେଦ୍ୟ ଅଂଶ। ସେ ଖୁସି ପ୍ରକାଶ କରିଥିଲେ ଯେ ଉତ୍ତରାଖଣ୍ଡ ସରକାର "ଭୋକାଲ୍ ଫର୍ ଲୋକାଲ୍" ଅଭିଯାନକୁ ତ୍ୱରାନ୍ୱିତ କରିଛି, ଯାହା ଫଳରେ ରାଜ୍ୟରୁ ୧୫ଟି କୃଷି ଉତ୍ପାଦ ଜିଆଇ ଟ୍ୟାଗ୍ ପାଇଛି। ସେ ବେଦୁ ଫଳ ଏବଂ ବଦ୍ରି ଗାଈ ଘିଅକୁ ନିକଟରେ ପ୍ରଦାନ କରାଯାଇଥିବା ଜିଆଇ ଟ୍ୟାଗ୍ ପାଇଁ ଗର୍ବ ପ୍ରକାଶ କରିଥିଲେ । ସେ ବଦ୍ରି ଗାଈ ଘିଅକୁ ପ୍ରତ୍ୟେକ ପାହାଡିଆ ଘରର ଗର୍ବ ଭାବରେ ବର୍ଣ୍ଣନା କରିଛନ୍ତି ଏବଂ କହିଛନ୍ତି ଯେ ବେଦୁ ଏବେ ଗାଁ ବାହାରେ ବଜାରରେ ପହଞ୍ଚିପାରୁଛି। ଏଥିରୁ ତିଆରି ଉତ୍ପାଦଗୁଡ଼ିକ ଏବେ ଜିଆଇ ଟ୍ୟାଗ୍ ସହିତ ଆସିବ ଏବଂ ଯେଉଁଠାକୁ ଯିବ ସେଠାରେ ଉତ୍ତରାଖଣ୍ଡର ପରିଚୟ ବହନ କରିବ। ଶ୍ରୀ ମୋଦୀ କହିଛନ୍ତି ଯେ ଏପରି ଜିଆଇ ଟ୍ୟାଗ୍ ହୋଇଥିବା ଉତ୍ପାଦଗୁଡ଼ିକୁ ସାରା ଦେଶର ଘରେ ଘରେ ପହଞ୍ଚାଇବା ଉଚିତ।
ପ୍ରଧାନମନ୍ତ୍ରୀ ଆନନ୍ଦ ପ୍ରକାଶ କରିଥିଲେ ଯେ, 'ହାଉସ ଅଫ ହିମାଲୟାଜ୍’ ଏକ ବ୍ରାଣ୍ଡ ଭାବରେ ଉଭା ହେଉଛି ଯାହା ଉତ୍ତରାଖଣ୍ଡର ସ୍ଥାନୀୟ ପରିଚୟକୁ ଗୋଟିଏ ପ୍ଲାଟଫର୍ମରେ ଏକାଠି କରୁଛି। ସେ ଉଲ୍ଲେଖ କରିଥିଲେ ଯେ ଏହି ବ୍ରାଣ୍ଡ ଅଧୀନରେ, ରାଜ୍ୟର ବିଭିନ୍ନ ଉତ୍ପାଦଗୁଡ଼ିକୁ ବିଶ୍ୱ ବଜାରରେ ପ୍ରତିଯୋଗିତା କରିବା ପାଇଁ ସାମୂହିକ ପରିଚୟ ଦିଆଯାଇଛି। ସେ ଉଲ୍ଲେଖ କରିଥିଲେ ଯେ ଏହି ଉତ୍ପାଦଗୁଡ଼ିକ ମଧ୍ୟରୁ ଅନେକ ବର୍ତ୍ତମାନ ଡିଜିଟାଲ୍ ପ୍ଲାଟଫର୍ମରେ ଉପଲବ୍ଧ, ଗ୍ରାହକଙ୍କ ନିକଟରେ ସିଧାସଳଖ ପହଞ୍ଚିବା ସୁନିଶ୍ଚିତ କରୁଛି ଏବଂ ଚାଷୀ, କାରିଗର ଏବଂ କ୍ଷୁଦ୍ର ଉଦ୍ୟୋଗୀମାନଙ୍କ ପାଇଁ ନୂତନ ବଜାର ଖୋଲିଛି। ଶ୍ରୀ ମୋଦୀ ବ୍ରାଣ୍ଡିଂ ପ୍ରୟାସରେ ନୂତନ ଶକ୍ତି ପାଇଁ ଆହ୍ୱାନ କରିଥିଲେ ଏବଂ ଏହି ବ୍ରାଣ୍ଡେଡ୍ ଉତ୍ପାଦଗୁଡ଼ିକର ବଣ୍ଟନ ବ୍ୟବସ୍ଥାରେ ନିରନ୍ତର ଉନ୍ନତିର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
ଶ୍ରୀ ମୋଦୀ ସ୍ୱୀକାର କରିଥିଲେ ଯେ ଉତ୍ତରାଖଣ୍ଡର ବିକାଶ ଯାତ୍ରା ଅନେକ ପ୍ରତିବନ୍ଧକର ସମ୍ମୁଖୀନ ହୋଇଛି, କିନ୍ତୁ ତାଙ୍କ ଦୃଢ଼ ସରକାର ଏହି ଆହ୍ୱାନଗୁଡ଼ିକୁ ନିରନ୍ତର ଭାବରେ ଦୂର କରିଛି ଏବଂ ବିକାଶର ଗତି ବଜାୟ ରଖିଛି। ସେ ସମାନ ନାଗରିକ ସଂହିତାର ଆନ୍ତରିକତା ସହିତ କାର୍ଯ୍ୟାନ୍ୱୟନ ପାଇଁ ଶ୍ରୀ ପୁଷ୍କର ସିଂହ ଧାମି ସରକାରଙ୍କ ପ୍ରଶଂସା କରିଥିଲେ, ଏହାକୁ ଅନ୍ୟ ରାଜ୍ୟମାନଙ୍କ ପାଇଁ ଏକ ମଡେଲ ବୋଲି କହିଥିଲେ। ସେ ଧର୍ମାନ୍ତରୀକରଣ ବିରୋଧୀ ଆଇନ ଏବଂ ଦଙ୍ଗା ନିୟନ୍ତ୍ରଣ ଆଇନ ଭଳି ଜାତୀୟ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ରାଜ୍ୟ ସରକାରଙ୍କ ସାହସିକ ନୀତିକୁ ପ୍ରଶଂସା କରିଥିଲେ। ପ୍ରଧାନମନ୍ତ୍ରୀ ଦ୍ରୁତ ଗତିରେ ହେଉଥିବା ଜମି ଜବରଦଖଲ ଏବଂ ଜନସଂଖ୍ୟାଗତ ପରିବର୍ତ୍ତନ ଭଳି ସମ୍ବେଦନଶୀଳ ପ୍ରସଙ୍ଗରେ ସରକାରଙ୍କ ଦୃଢ଼ ପଦକ୍ଷେପକୁ ମଧ୍ୟ ଉଲ୍ଲେଖ କରିଥିଲେ। ବିପର୍ଯ୍ୟୟ ପରିଚାଳନା କ୍ଷେତ୍ରରେ, ସେ ଉତ୍ତରାଖଣ୍ଡ ସରକାରଙ୍କ ତ୍ୱରିତ ଏବଂ ସମ୍ବେଦନଶୀଳ ପ୍ରତିକ୍ରିୟା ଏବଂ ଲୋକଙ୍କୁ ସମସ୍ତ ପ୍ରକାରର ସହାୟତା ଯୋଗାଇବା ପାଇଁ ପ୍ରୟାସ ପାଇଁ ପ୍ରଶଂସା କରିଥିଲେ।
ପ୍ରଧାନମନ୍ତ୍ରୀ ପୂର୍ଣ୍ଣ ବିଶ୍ୱାସ ପ୍ରକାଶ କରିଥିଲେ ଯେ, ଆଗାମୀ ବର୍ଷଗୁଡ଼ିକରେ ଉତ୍ତରାଖଣ୍ଡ ଏହାର ପୂର୍ଣ୍ଣ ରାଜ୍ୟ ହେବାର ରୌପ୍ୟ ଜୟନ୍ତୀ ପାଳନ କରିବ ଏବଂ ବିକାଶର ନୂତନ ଶୀର୍ଷକୁ ଛୁଇଁବ। ସେ କହିଛନ୍ତି ଯେ, ଉତ୍ତରାଖଣ୍ଡ ଗର୍ବର ସହିତ ଏହାର ସଂସ୍କୃତି ଏବଂ ପରିଚୟକୁ ଆଗକୁ ବଢ଼ାଇ ଚାଲିବ। ଶ୍ରୀ ମୋଦୀ ଆଗାମୀ ୨୫ ବର୍ଷ ପାଇଁ ଉତ୍ତରାଖଣ୍ଡ ପାଇଁ ସେମାନଙ୍କର ଦୃଷ୍ଟିକୋଣ ସ୍ଥିର କରିବାକୁ ଏବଂ ଦୃଢ଼ତାର ସହିତ ବିକାଶ ପଥରେ ଆଗକୁ ବଢ଼ିବାକୁ ଲୋକଙ୍କୁ ଅନୁରୋଧ କରିଥିଲେ। ଏହି ଅବସରରେ ଉତ୍ତରାଖଣ୍ଡବାସୀଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ଆଶ୍ୱାସନା ଦେଇଥିଲେ ଯେ ଭାରତ ସରକାର ଉତ୍ତରାଖଣ୍ଡ ସରକାରଙ୍କ ସହିତ ଦୃଢ଼ ଭାବରେ ଠିଆ ହୋଇଛନ୍ତି ଏବଂ ପ୍ରତ୍ୟେକ ପଦକ୍ଷେପରେ ଏହାକୁ ସମର୍ଥନ କରିବାକୁ ପ୍ରତିବଦ୍ଧ। ସେ ରାଜ୍ୟର ପ୍ରତ୍ୟେକ ପରିବାର ଏବଂ ନାଗରିକଙ୍କ ସୁଖ, ସମୃଦ୍ଧି ଏବଂ ଉଜ୍ଜ୍ୱଳ ଭବିଷ୍ୟତ ପାଇଁ ତାଙ୍କର ଶୁଭକାମନା ପ୍ରକାଶ କରିଥିଲେ।
ଏହି କାର୍ଯ୍ୟକ୍ରମରେ ଉତ୍ତରାଖଣ୍ଡ ରାଜ୍ୟପାଳ ଲେଫ୍ଟନାଣ୍ଟ ଜେନେରାଲ (ଅବସରପ୍ରାପ୍ତ) ଗୁରମୀତ ସିଂହ, ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ଶ୍ରୀ ପୁଷ୍କର ସିଂହ ଧାମି, କେନ୍ଦ୍ର ମନ୍ତ୍ରୀ ଶ୍ରୀ ଅଜୟ ଟାମଟା ଏବଂ ଅନ୍ୟାନ୍ୟ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ।

ପୃଷ୍ଠଭୂମି
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉତ୍ତରାଖଣ୍ଡ ରାଜ୍ୟ ପ୍ରତିଷ୍ଠାର ରୌପ୍ୟ ଜୟନ୍ତୀ ପାଳନ ପାଇଁ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ଏହି ଅବସରରେ, ପ୍ରଧାନମନ୍ତ୍ରୀ ଏକ ସ୍ମାରକୀ ଡାକଟିକଟ ମଧ୍ୟ ଉନ୍ମୋଚନ କରିଥିଲେ ଏବଂ ସମାବେଶକୁ ସମ୍ବୋଧିତ କରିଥିଲେ।
ଏହି କାର୍ଯ୍ୟକ୍ରମ ସମୟରେ, ପ୍ରଧାନମନ୍ତ୍ରୀ ୮,୧୪୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ବିକାଶ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିଥିଲେ, ଯେଉଁଥିରେ ୯୩୦ କୋଟିରୁ ଅଧିକ ମୂଲ୍ୟର ପ୍ରକଳ୍ପର ଉଦଘାଟନ ଏବଂ ୭,୨୧୦ କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ଅନ୍ତର୍ଭୁକ୍ତ। ଏହି ପ୍ରକଳ୍ପଗୁଡ଼ିକ ମଧ୍ୟରେ ପାନୀୟ ଜଳ, ଜଳସେଚନ, ବୈଷୟିକ ଶିକ୍ଷା, ଶକ୍ତି, ସହରାଞ୍ଚଳ ବିକାଶ, କ୍ରୀଡା ଏବଂ ଦକ୍ଷତା ବିକାଶ ସମେତ ଅନେକ ପ୍ରମୁଖ କ୍ଷେତ୍ରକୁ ଅନ୍ତର୍ଭୁକ୍ତ କରାଯାଇଛି ।
ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅଧୀନରେ ୨୮,୦୦୦ ରୁ ଅଧିକ ଚାଷୀଙ୍କୁ ସିଧାସଳଖ ସେମାନଙ୍କ ବ୍ୟାଙ୍କ ଆକାଉଣ୍ଟରେ ୬୨ କୋଟି ଟଙ୍କାର ସହାୟତା ପ୍ରଦାନ କରିଥିଲେ।
ପ୍ରଧାନମନ୍ତ୍ରୀଙ୍କ ଦ୍ୱାରା ଉଦଘାଟିତ ପ୍ରକଳ୍ପଗୁଡ଼ିକ ମଧ୍ୟରେ ଅମୃତ ଯୋଜନା ଅଧୀନରେ ୨୩ଟି ଅଞ୍ଚଳ ପାଇଁ ଡେରାଡୁନ ଜଳ ଯୋଗାଣ କଭରେଜ, ପିଥୋରାଗଡ଼ ଜିଲ୍ଲାରେ ଏକ ବିଦ୍ୟୁତ୍ ସବଷ୍ଟେସନ, ସରକାରୀ କୋଠାରେ ସୌରଶକ୍ତି ପ୍ଲାଣ୍ଟ ଏବଂ ନୈନିତାଲର ହଲଦ୍ୱାନୀ ଷ୍ଟାଡିୟମରେ ଏକ ଆଷ୍ଟ୍ରୋଟର୍ଫ ହକି ପଡ଼ିଆ ଅନ୍ତର୍ଭୁକ୍ତ। 
ପ୍ରଧାନମନ୍ତ୍ରୀ ଦୁଇଟି ପ୍ରମୁଖ ଜଳ କ୍ଷେତ୍ର ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି: ସୋଙ୍ଗ ଡ୍ୟାମ୍ ପାନୀୟ ଜଳ ପ୍ରକଳ୍ପ, ଯାହା ଡେରାଡୁନକୁ ଦୈନିକ ୧୫୦ ନିୟୁତ ଲିଟର ପାନୀୟ ଜଳ ଯୋଗାଇବ, ଏବଂ ନୈନିତାଲରେ ଜାମରାନି ଡ୍ୟାମ୍ ବହୁମୁଖୀ ପ୍ରକଳ୍ପ, ଯାହା ପାନୀୟ ଜଳ ଯୋଗାଇବ, ଜଳସେଚନ ଏବଂ ବିଦ୍ୟୁତ୍ ଉତ୍ପାଦନକୁ ସମର୍ଥନ କରିବ। ଅନ୍ୟ ପ୍ରକଳ୍ପଗୁଡ଼ିକ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯିବ, ସେଥିରେ ଏକ ବିଦ୍ୟୁତ୍ ସବଷ୍ଟେସନ, ଚମ୍ପାୱତରେ ଏକ ମହିଳା କ୍ରୀଡା କଲେଜ ପ୍ରତିଷ୍ଠା ଏବଂ ନୈନିତାଲରେ ଏକ ଅତ୍ୟାଧୁନିକ ଦୁଗ୍ଧ କାରଖାନା ଅନ୍ତର୍ଭୁକ୍ତ।

TKM