প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা দেহরাদুন্দা উত্তরখন্দ শেমখিবগী সিলভর জুব্লি থৌরমদা ৱা ঙাংখ্রে
প্রধান মন্ত্রীনা লুপা করোর ৮১৪০ হেনবগী তোঙান তোঙানবা চাউখৎ-থৌরাংগী থবকশিং শঙ্গাখ্রে, উরেপ-উয়ুং তমখ্রে
ঙসি উত্তরখন্দগী চাউখৎপশিং উবদা, ফজরবা রাজ্য অসি শেম্নবগীদমক মতম অমদা লান্থেংনখিবা মীওই খুদিংমক হরাওবা হায়বসি মহৌশানি: প্রধান মন্ত্রী
মসি তশেংনা উত্তরখন্দ চাউখৎলকপা অমসুং মপান ফগৎলকপগী মশক থোকপা যুগনি: প্রধান মন্ত্রী
দেবভুমি উত্তরখন্দ ভারতকী অধ্যতিক্কী পুন্সিগী মীহুলনি: প্রধান মন্ত্রী
রাজ্য অসিগী অধ্যাতিক্কী মপাঙ্গলনা উত্তরখন্দগী অশেংবা মশক্নি: প্রধান মন্ত্রী
Posted On:
09 NOV 2025 2:54PM by PIB Imphal
ঙসি প্রধান মন্ত্রী শ্রী নরেন্দ্র মোদীনা দেহরাদুন্দা উত্তরখন্দ শেমখিবগী সিলভর জুব্লি থৌরমদা ৱা ঙাংখ্রে। থৌরম অদুগী মনুংদা, প্রধান মন্ত্রীনা লুপা করোর ৮১৪০ হেনবগী তোঙান তোঙানবা চাউখৎ-থৌরাংগী থবকশিং শঙ্গাখ্রে, উরেপ-উয়ুং তমখ্রে। থৌরম অদুদা ৱা ঙাংবদা, প্রধান মন্ত্রীনা দেবভুমি উত্তরখন্দগী মীয়ামদা মহাক্কী য়াইফ পাউজেল পীখি অমসুং মীয়ামদা মহাক্কী ইকায়খুম্নবা, নোল্লুকপা অমসুং সেবা উৎখি।
প্রধান মন্ত্রীনা হায়খি নবেম্বর ৯ অসি মতম শাংবা অমসুং কৎথোকপা ইহৌ অমগী ফল অমনি অমসুং নুমিৎ অসিদা ঐখোয় খুদিংমক চাউথোকচবা ফাওহনখি। উত্তরখন্দগী ঈশ্বরগুম্লবা মীয়ামগী মতম কয়াগী মঙলান অমা চহি ২৫ গী মমাংদা শ্রী অতল বিহারি বাজপায় জিগী লুচিংবা মখাদা মঙফাওনহনখি। ঙসি উত্তরখন্দগী চাউখৎপশিং উবদা, ফজরবা রাজ্য অসি শেম্নবগীদমক মতম অমদা লান্থেংনখিবা মীওই খুদিংমক হরাওবা হায়বসি মহৌশানি। চীঙজাউশিং নুংশিজবা মীওইশিং, উত্তরখন্দগী নাৎ, মসিগী মহৌশাগী ফজবা পামজবা মীওইশিং অমসুং দেবভুমিগী মীয়ামগী মীনুংশিনা ঙসিদি হরাওবনা পীক থল্লে। কেন্দ্র অমসুং রাজ্যগী মখোয়গী সরকারশিংনা উত্তরখন্দগী তৌবা ঙম্বশিং অনৌবা থাকশিংদা পুখৎনবা থবক পায়খৎলে। উত্তরখন্দগী সিলভর জুব্লি থৌরমদা প্রধান মন্ত্রীনা মীয়াম থাগৎপা ফোঙদোকখি। খোঙজং মনুংদা মখোয়গী থৱায় কৎখ্রবা অথৌবশিংগী মফমদা মহাক্না ইকায়খুম্নবা উৎখি অমসুং মতম অদুগী থৌমী খুদিংমক্ত মহাক্না কোক নোনখি।
মহাক্কা উত্তরখন্দগা লৈনবা অচেৎপা মরী অদু নিংশিংলদুনা, প্রধান মন্ত্রীনা হায়খি লমদম অসিদা মহাক্কী অধ্যাতিক্কী খোঙচৎ মনুংদা, চীঙদা লৈরিবা মহাক্কী ইনাওশিং অমসুং ইচলশিংগী হোৎনবা কনবা অমসুং অচেৎপা ফিরেপ্না মতম পুম্নমক্ত মহাক ইথিল পীখি। উত্তরখন্দদা লৈরিঙৈ মতমদা মহাক্না রাজ্য অসিগী তৌবা ঙম্বা কয়া হকথেংননা থেংনখি। মসিগী থাজবা অসিদগী বাবা কেদারনাথ চৎলুরবা মতুংদা, চৎলিবা চহি ১০ অসি উত্তরখন্দগীনি হায়না মহাক্না লাউথোকখিবনি। রাজ্য অসি চহি ২৫ মপুংফারকপগা লোয়ননা, মসি তশেংনা উত্তরখন্দ চাউখৎলকপা অমসুং মপান ফগৎলকপগী মশক থোকপা যুগনি।
চহি ২৫ গী মমাঙদা নৌনা উত্তরখন্দ শেম্বদা থেংনখিবা খুদোংচাদবশিং নিংশিংলদুনা, প্রধান মন্ত্রীনা হায়খি শেন-থুম মরাং কাইখিদে, রাজ্যগী বজেত য়াম্না পীকখি, শেন লাকফম য়াম্না লৈখিদে অমসুং দরকার ওইবা খুদিংমক কেন্দ্রগী মতেংদগী কোন্ননবা হোৎনখি। হৌজিক ফিবম অদু মপুংফানা হোংলে। থৌরম মফমদা লাক্ত্রিঙৈদা, মহাক্না সিলভর জুব্লি থৌরমগী ফজরবা একজিবিসন অমা য়েংখি অমসুং মদুদা হৌখিবা চহি ২৫ গী উত্তরখন্দগী খোঙচৎকী শক্তমশিং উৎখি। মহাক্না হায়খি ইনফ্রাষ্ট্রকচর, লাইরিক-লাইশু, উদ্যোগ, তুরিজম, হকশেল, পৱার অমসুং খুঙ্গং চাউখৎপগুম্বা হিরমশিংগী মাইপাকপগী ৱারিশিং তশেংনা পুক্নিং থৌগৎনিঙাইনি। চহি ২৫ গী মমাংদা উত্তরখন্দগী বজেত লুপা করোর ৪০০০ খক্ত ওইরম্বা অদু হৌজিক লুপা করোর লাখ ১ হেল্লে। রাজ্য অসিদা মৈ পুথোকপা শরুক মরি হেনগৎলে অমসুং লম্বীশিংগী অশাংবা শরুক অনি হেনগৎলে। মমাঙদা, থা তরুক্ত এয়র পেসেঞ্জর ৪,০০০ থুংলখি, ঙসিদি, নোংমদা এয়র পেসেঞ্জর ৪,০০০ থুংলরে।
প্রধান মন্ত্রীনা হায়খি উত্তরখন্দগী ইঞ্জিনিয়ারিং কোলেজ মশিং শরুক ১০ হেনগৎলে। মতম অমদা মেদিকেল কোলেজ অমা খক্ত লৈরম্বা অদু ঙসিদি কোলেজ ১০ লৈরে। চহি ২৫ গী মমাঙদা তিকা থাবগী চাং চাদা ২৫ গী মখাদা লৈরমখি, অদুবু হৌজিক উত্তরখন্দ খুঙ্গং খুদিংমক তিকা লোইনা থারে। পুন্সিগী হিরম খুদিংমক্ত উত্তরখন্দ শিংথাবা য়ানা চাউখৎলে। চাউখৎপগী খোঙচৎ অসি শিংথানিঙাইনি অমসুং উত্তরখন্দগী মীওই খুদিংমক পুন্না চাউখৎনবা অমসুং অপুনবা ৱারেপকী থৌশিলগী অওনবা পুরক্লে। মমাংদা, চীঙজাওশিংগী অঙম্বশিংনা চাউখৎপগী লম্বীদা অপনবা পীরমখি, অদুবু হৌজিক অনৌবা লম্বীশিং হাংদোকপা হৌরে।
রাজ্য অসি চাউখৎনবগী হরাওবা লৈরিবা উত্তরখন্দগী নহারোলশিং অমসুং ওন্ত্রেপ্রেন্যুরশিংগা মহাক্কা মমাঙদা উনখিবা অদুসু প্রধান মন্ত্রীনা থমখি। মহাক্না হায়খি ঙসি উত্তরখন্দগী মীয়ামগী ৱাখল্লোনশিং গরহৱালিদা শম্না হায়বা য়াই: “২০৪৭ ফাওবদা, ভারতনা চাউখৎলবা লৈবাকশিংগী মরক্ত য়াওবা মতমদা, ঐগী উত্তরখন্দ, ঐগী দেবভুমি, মপুংফানা শেম শারগনি”।
উত্তরখন্দগী চাউখৎপগী খোঙজেল য়াংখৎনবা ঙসি তোঙান তোঙানবা প্রোজেক কয়া শঙ্গারে অমসুং উরেপ-উয়ুং তম্লে হায়না লাউথোক্লদুনা, প্রধান মন্ত্রীনা হায়খি লাইরিক-লাইশু, হকশেল, তুরিজম অমসুং শান্নবগা মরী লৈনবা প্রোজেকশিং অসিনা লমদম অসিদা অনৌবা থবকশিং ফংহনগনি। দেহরাদুন অমসুং হালদৱানিদা থক্নবা ঈশিং ফংবদগী অৱাবশিং কোকহনবদা জামরানি অমসুং সোং দাম প্রোজেকশিংনা মরুওইবা থৌদাং অমা লৌগনি। হায়রিবা স্কিমশিং অসিদা লুপা করোর ৮,০০০ হেন্না থাদগনি। থবকশিং অসিগীদমক উত্তরখন্দগী মীয়ামদা হরাওবা ফোঙদোকচরি।
প্রধান মন্ত্রীনা হায়খি উত্তরখন্দ সরকারনা এপ্পল অমসুং কিৱি থাবা লৌমীশিংদা দিজিতেল করেন্সিদা সবসিদিশিং পীবা হৌরে। অনৌবা তেক্নোলোজিগী খুৎথাংদা, শেন্থং পীখিবশিং হৌজিক মপুংফানা খোঙ্গুল লীবা ঙম্লে। থবক অসিদা শরুক য়ারিবা রাজ্য সরকার, আর.বি.আই অমসুং মরী লৈনবা খুদিংমক্কী থবকশিং প্রধান মন্ত্রীনা থাগৎপা ফোঙদোকখি।
প্রধান মন্ত্রীনা হায়খি দেবভুমি উত্তরখন্দ ভারতকী অধ্যতিক্কী পুন্সিগী মীহুলনি। গঙ্গোত্রি, যমুনোত্রি, কেদরনাথ, বদ্রিনাথ, জাগেশ্বর অমসুং অদি কাইলাস অসি ঐখোয়গী লাইনিংগী খুদম ওইরিবা শেংলবা লাইফমশিংনি। চহি খুদিংগী হায়রিবা শেংলবা লাইফমশিং অসিদা ভক্ত লাখ কয়া লাক্লি, মসিনা চঙজবগী লম্বী হাংদোকপা খক নত্তনা উত্তরখন্দগী শেন্মিৎলোন্দা অনৌবা থৌনা অমসু পীরি।
উত্তরখন্দ চাউখৎপগা লম্বী-থোঙ ফগৎহনবগা মরী লৈনৈ হায়না ফোঙদোক্লদুনা, প্রধান মন্ত্রীনা হায়খি হৌজিক রাজ্য অসিদা লুপা করোর লাখ ২ হেনবগী প্রোজেকশিং পায়খৎলি। রিসিকেস-কর্নাপ্রায়াগ রেল প্রোজেক য়াংনা পায়খৎলি অমসুং দিল্লি-দেহরাদুন এক্সপ্রেসৱে লোইশিল্লক্লে। গৌরিকুন্দ-কেদরনাথ অমসুং গোবিন্দঘাত-হেমকুন্দ সাহিব রোপৱেশিংগী উরেপ-উয়ুং তমখ্রে। প্রোজেকশিং অসিনা উত্তরখন্দদা চাউখৎপা য়াংশিনহল্লে।
প্রধান মন্ত্রীনা হায়খি হৌখিবা চহি ২৫ দা উত্তরখন্দনা চাউখৎপগী শাংলবা খোঙচৎ অমা চৎখ্রে। মথং চহি ২৫ দা উত্তরখন্দ করম্বা থাক্ত লৈনবা ঐখোয়না পান্দম থম্লিবগে। “নিংবু নিংলবদি, লম্বী অমা লৈ” হায়নবা লৈরি, ঐখোয়না ঐখোয়গী পান্দমশিং হেক খঙবগা, মখোয় ফংনবা লম্বী অদু য়াংনা উবা ফংগনি। হায়রিবা তুংগী পান্দমশিং অদুগী খন্নবা হৌনবা নবেম্বর ৯ দগী হেন্না ফবা নুমিৎ লৈররোই। রাজ্য অসিগী অধ্যাতিক্কী মপাঙ্গলনা উত্তরখন্দগী অশেংবা মশক্নি। মসি থবক ওইনা পাংথোক্নবা করিগুম্বা উত্তরখন্দনা ৱারেপ লৌরবদি, রাজ্য অসি তুংগী চহিশিংদা মালেমগী অধ্যাতিক্কী কোনুং ওইনা শেমগৎপা য়াগনি। রাজ্য অসিগী লাইশঙশিং, অশ্রামশিং অমসুং ধ্যান অমসুং য়োগগী মফমশিং মালেমগী নেতৱার্ক অমগা শম্নবা য়াগনি।
প্রধান মন্ত্রীনা হায়খি হকচাং নুংঙাইনবা ভারত অমসুং মালেম শীনবা থুংবগী মীয়াম উত্তরখন্দদা লাক্লি অমসুং রাজ্য অসিগী হিদাক ওইনা শীজিন্নবা য়াবা পাম্বীশিং অমসুং অয়ুর্বেদগী হিদাকশিং পাম্নবা হেনগৎলক্লি। হৌখিবা চহি ২৫ দা, মনম নুংশিবা পাম্বীশিং, অয়ুর্বেদগী পাম্বীশিং, য়োগ অমসুং ৱেলনেস তুরিজমদা উত্তরখন্দ শিংথাবা য়ানা চাউখৎলে। উত্তরখন্দগী বিধান সভা কেন্দ্র খুদিংমক্ত মপান লৈবাক্কী লমকোয়বশিংনা পাম্বা য়োগ সেন্তরশিং, অয়ুর্বেদা সেন্তরশিং অমসুং নেচরোপেথি ইন্সতিতুৎশিং লিংখৎকদবনি। ভারত সরকারনা ভাইব্রেন্ত ভিলেজ প্রোগামদা অকনবা মীৎয়েং থম্লি। উত্তরখন্দদা ভাইব্রেন্ত ভিলেজ খুদিংমক অপীকপা তুরিজমগী মফম অমা ওইহনবা, হোমষ্টেশিং, মফম অদুগী ইন্সাং-মথেল অমসুং নাৎ য়োকখৎপা অসি মহাক্কী পান্দমনি। লমকোয়বা মীওইশিংগী নুংঙাইবা, দুবকে, চুরকানি, রোত-অরসা, রাস-ভাত অমসুং ঝানগোর কি খিরগুম্বা হাওনা চাবা অদু মীয়াম্না খন্দুনা য়েংউ। মসিগী হরাওবা অসিনা মখোয় উত্তরখন্দদা হঞ্জিন হঞ্জিন লাকহনগনি। প্রধান মন্ত্রীনা হায়খি উত্তরখন্দগী লোত্তুনা লৈরিবা খুদোংচাবশিং খঙদোপগী তঙাইফবা লৈরে। হরেলা, ফুলদৈ অমসুং ভিতাউলিগুম্বা কুহ্মৈশিং শরুক য়াখিবা লমকোয়বা মীওইশিংদা তুংকোইবা ইথিল অমা পীখি। নন্দা দেবী মেলা, জৌলজিবি মেলা, বাগেশ্বরিগী উত্তরায়ানি মেলা, দেবীধুরা মেলা, শ্রাবানি মেলা অমসুং বত্তর ফেষ্টিবেলগুম্বা থৌরমশিংদা উত্তরখন্দগী থৱয় লৈরি। হায়রিবা কুহ্মৈশিং অমসুং চৎনবীশিং অসি মালেমগী মেপতা য়াওহন্নবা, “ৱান দিষ্ট্রিক, ৱান ফেষ্টিবেল” গুম্বা কেম্পেন অমা পাংথোক্কদবনি।
প্রধান মন্ত্রীনা হায়খি উত্তরখন্দগী চীঙগী জিলা খুদিংমক উহৈ থাবগী খুদোংচাবা মরাংকাইনা লৈরি অমসুং হোর্তিকলচরগী মফমশিং ওইনা শেমগৎকদবনি। ব্লুবেরি, কিৱি, হিদাক কান্নবা পাম্বীশিং থাগদবনি। ফুদ প্রোসেসিং, হেন্দিক্রাফ অমসুং ওর্গনিক্কী পোৎথোকশিংগুম্বা হিরমশিংদা এম.এস.এম.ইশিংনা ফগৎহনবা তঙাইফদে।
প্রধান মন্ত্রীনা হায়খি উত্তরখন্দদা চহি চুপ্পা তুরিজমগী খুদোংচাবা লৈরি। লম্বী-থোঙ ফগৎহন্দুনা চহি চুপ্পা তুরিজম লৈহন্নবা মমাঙদা মহাক্না খঙহনখ্রে। হৌজিক উত্তরখন্দ ৱিন্তর তুরিজমগী মাইকৈদা চঙশিল্লকপা হরাওই। নিংথম থা মনুংদা লমকোয়বশিং লাকপা মশিং অঙকপা ফংনা হেনগৎলক্লে। ফিত ১৪,০০০ হেনবদা পিথোরাগরদা হায়-অলতিচুৎ মরাথোন অমা মাইপাক্না পাংথোকখ্রে অমসুং অদি কাইলাস পরিক্রমা রন অসি লৈবাক অসিগী ইথিলগী হৌরফম অমা ওইরে। চহি অহুমগী মমাংদা, মীওই ২০০০ অদি কাইলাস যাত্রা শরুক য়াখি, ঙসিদি মশিং ৩০০০০ হেল্লে। নুমিৎ খরগী মমাঙদা, কেদরনাথ লাইশঙগী থোঙশিং কুম অসিগী ওইনা লোনখ্রে অমসুং চহি অসিদা কেদরনাথ ধামদা ভক্ত লাখ ১৭ লাকখি। লাই খুরুম্বা লাকপা অমসুং চহি চুপ্পা লমকোয়বা লাকপা অসিনা উত্তরখন্দ চাউখৎপগী অনৌবা থাকশিং য়ৌহল্লগনি। ইকো-তুরিজম অমসুং এদভেঞ্জর তুরিজমগী ওইথোকপশিংনা ভারতকী নহারোলশিংগী পুক্নিং চিংশিনগনি। হৌজিক উত্তরখন্দ ফিল্ম নম্ফম অমা ওইরে অমসুং রাজ্য অসিগী অনৌবা ফিল্ম পোলিসিনা ফিল্ম নম্বা হেন্না লাইহল্লে। উত্তরখন্দ লুহোংবগী মফম অমা ওইনা মমিং চৎলে। “ৱেদ ইন ইন্দিয়া” থৌরাংগী মখাদা, উত্তরখন্দদা খুদোংচাবশিং শেমগৎকদবনি অমসুং হিরম অসিগীদমক মরুওইবা মফম ৭ মশক খঙদোক্কদবনি অমসুং শেমগৎকদবনি।
প্রধান মন্ত্রীনা হায়খি ভোকেল ফোর লোকেলগী খুৎথাংদা লৈবাক অসি অত্মনির্ভর ওইবা ঙমগনি। উত্তরখন্দনা মতম পুম্নমক্ত পান্দম অসি থম্লি অমসুং লমদম অসিগী পোৎথোকশিং পাম্নরি, মখোয় শীজিন্নরি অমসুং মখোয় লমদম অসিগী চৎনবীগী শরুক অমা ওইনা নোংমগী পুন্সিগী শরুক অমা ওইহল্লি। উত্তরখন্দ সরকারনা ভোকেল ফোর লোকেলগী কেম্পেন য়াংখৎহনবদা হরাওবা ফাওই অমসুং মসিগী ফল ওইনা রাজ্য অসিগী লৌউ-শিংউগী পোৎথোক ১৫ জি.আই তেগশিং ফংলে। হন্দক বেদু উহৈ অমসুং বাদ্রি ষনগী ঘী জি.আই তেগ ফংখিবা অসি চাউথোকচৈ। বাদ্রি ষনগী ঘী অসি চীঙগী য়ুমথোঙ খুদিংমক্কী চাউথোকচনফম ওইরি অমসুং বেদু অসি হৌজিক খুঙ্গংশিংগী ৱাংমদা লৈবা কৈথেলশিংদা য়ৌরে। মসিগী শেম্বা পোৎথোকশিং হৌজিক জি.আই তেগ ফংলগনিক অমসুং মখোয়না উত্তরখন্দগী মশক তাক্লগনি। অসিগুম্বা জি.আই তেগ ফংলবা পোৎথোকশিং লৈবাক শীনবা থুংবগী য়ুমথোঙশিংদা য়ৌহনগদবনি।
মফম অমদা উত্তরখন্দ শক্তম তাকপা ব্রান্দ অমা ওইনা “হাওস ওফ হিমালায়াস” থোক্লকপদা হরাওবা ফোঙদোক্লদুনা, প্রধান মন্ত্রীনা হায়খি মখোয় মালেমগী কৈথেলশিংদা চাংদম্নবা ঙম্নবা ব্রান্দ অসিগী মখাদা রাজ্য অসিগী তোঙান তোঙানবা পোৎথোকশিং অপুনবা মশক অমা তাক্লে। হৌজিক পোৎথোকশিং অসি দিজিতেল প্লেতফোর্মশিংদা ফংলে অমসুং লৌমীশিং, খুৎহৈবশিং অমসুং অপীকপা ওন্ত্রেপ্রেন্যুরশিংগী অনৌবা কৈথেলশিং হাংদোক্লে। ব্রান্দ শেমগৎপগী থবকশিংগা লোয়ননা মীয়ামদা ফংহনবগী থবক ফগৎহনগদবনি। উত্তরখন্দগী চাউখৎপগী খোঙচত্ত খুদোংচাদবা কয়া থেংনরবসু, মখোয়গী মপাঙ্গল কনবা সরকরনা খুদোংচাদবশিং অসি মায়োক্নখি। য়ুনিফোর্ম সিবিল কোর্দ চৎনহনবগীদমক মহাক্না শ্রী পুস্কার সিংহ ধামগী সরকার থাগৎপা ফোঙদোকখি। এন্তি-কনভর্সন লো অমসুং রাইওৎ কন্ত্রোল লোগুম্বা লৈবাক্কী মরুওইবা ৱাফমশিংদা রাজ্য সরকারগী থৌশিলশিং প্রধান মন্ত্রীনা থাগৎপা ফোঙদোকখি। প্রধান মন্ত্রীনা হায়খি লম খোপচিনবা অমসুং মীশিং হেনগৎলকপগুম্বা মরুওইবা ৱাফমশিংদা সরকারনা অকনবা থবক পায়খৎলে। মহৌশাগী ওইবা অমাং-অতা লাকপদা উত্তরখন্দ সরকারনা য়াংনা থবক পায়খৎপা অসি থাগৎনিঙাইনি। প্রধান মন্ত্রীনা হায়খি উত্তরখন্দনা রাজ্য ওইরকপগী সিলভর জুব্লি থৌরম পাংথোকপগা লোয়ননা লাক্লিবা চহিশিংদা চাউখৎপগী অনৌবা থাকশিংদা য়ৌবা ঙমগনি হায়বগী থাজবা থম্লি। উত্তরখন্দনা মখা তানা মসিগী নাৎ অমসুং শক্তম চাউখৎহনগনি। মথং চহি ২৫ গীদমক উত্তরখন্দ পান্দমগীদমক মীয়াম্না মখোয়গী পান্দম থমগদবনি অমসুং থাজবগা লোয়ননা চাউখৎপগী লম্বীদা চৎকদবনি। ভারত সরকারনা খোঙথাং খুদিংমক্ত উত্তরখন্দ সরকারগী শৌগৎকনি। অরোইবদা প্রধান মন্ত্রীনা রাজ্য অসিগী ইমুং খুদিংমক অমসুং মীওই খুদিংমক্ত হরাওনা, নুংঙাইনা অমসুং অফবা তুংলমচৎ অমা লৈনবা মহাক্কী য়াইফ পাউজেল পীখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা, উত্তরখন্দগী রাজ্যপাল লেপ্তনেন্ত জেনেরেল (পোথারবা) গুরমিত সিংহ, উত্তরখন্দগী চীফ মিনিষ্টর শ্রী পুস্কার সিংহ ধামি, য়ুনিয়ন মিনিষ্টর শ্রী অজয় তামতা য়াওখি।
নুঙগীৱারোল
প্রধান মন্ত্রী শ্রী নরেন্দ্র মোদীনা দেহরাদুন্দা উত্তরখন্দ শেমখিবগী সিলভর জুব্লি থৌরম শরুক য়াখ্রে। প্রধান মন্ত্রীনা থৌরম অদুদা কম্মেমোরেতিপ পোষ্টেল স্তাম্প অমসু ফোঙখি অমসুং মীয়ামদা ৱা ঙাংখি।
থৌরম মনুংদা, প্রধান মন্ত্রীনা লুপা করোর ৮১৪০ হেনবগী তোঙান তোঙানবা চাউখৎ-থৌরাংগী প্রোজেক্তশিং শঙ্গাখি অমসুং উরেপ উয়ুং তমখি। মসিদা লুপা করোর ৯৩০ হেনবগী প্রোজেক্তশিং শঙ্গাবা অমসুং লুপা করোর ৭২১০ হেনবগী প্রোজেক্তশিংগী উরেপ উয়ুং তম্বসু য়াওখি। প্রোজেক্তশিং অসিনা দ্রিঙ্কিং ৱাতর, ইরিগেসন, তেক্নিকেল এজুকেসন, ইনর্জী, অর্বান দিবেলপমেন্ত, স্পোর্তস, অমসুং স্কিল দিবেলপমেন্ত য়াওনা মরুওইবা সেক্তর কয়াদা কান্নবা পীগনি।
প্রধান মন্ত্রীনা পি.এম. ফাসল বিমা য়োজনাগী মখাদা লৌমী ২৮,০০০ হেনবদা মখোয়গী বেঙ্ক একাউন্তশিংদা হকথেংননা লুপা করোর ৬২ গী তেংবাং য়েন্থোকখি।
প্রধান মন্ত্রীনা উরেপ উয়ুং তমখিবা প্রোজেক্তশিং অদুদি অমরুত স্কিমগী মখাদা দেহরাদুনদা জোন ২৩ গীদমক ঈশিং সপ্লাই কভরেজ, পীথোরাগর জিলাদা ইলেক্ত্রিকেল সবস্তেসন, সরকারগী বিল্দিংশিংদা সোলর পাৱর প্লান্তশিং, নৈনিতালগী হলদ্ৱানি স্তেদিয়মদা এস্ত্রোতর্ফ হোকী গ্রাউন্দ অমসুং অতোপ্পা কয়া য়াওখি।
প্রধান মন্ত্রীনা উরেপ-উয়ুং তমখিবা হায়দ্রো সেক্তরগা মরী লৈনবা মরুওইবা প্রোজেক্ত অনি অদুদি - দেহরাদুনদা নোংমদা ১৫০ এম এল দি (মিল্লিয়ন লিতর পর দে) থক্নবা ঈশিং ফংহল্লগদবা সোং দাম দ্রিঙ্কিং ৱাতর প্রোজেক্ত অমসুং নৈনিতালদা থক্নবা ঈশিং ফংহনগদবা, ইরিগেসন অমসুং মৈ পুথোকপদা মতেং ওইগদবা জামারানি দাম মলতিপর্পস প্রোজেকনি। উরেপ-উয়ুং তমখিবা অতোপ্পা প্রোজেক্তশিংগী মনুংদা ইলেক্ত্রিসিতী সব স্তেসনশিং, চম্পাৱত্তা ৱুমেন্স স্পোর্তস কোলেজ শাবা, নৈনিতালদা স্তেৎ-ওফ-দি-আর্ত দাইরী প্লান্ত অমা লিংখৎপা য়াওখি।
***
(Release ID: 2188053)
Visitor Counter : 6