U Myntri Rangbahduh ka ri u Narendra Modi u la ïakren bad ki nongjop jong ka ICC Women’s World Cup 2025 ha 7, Lok Kalyan Marg, New Delhi hynnin ka sngi. Ka kynhun jong ka India ka la jop pyrshah ïa ka South Africa ha ka phainal ha ka Sngi U Blei, ka 2 tarik Naiwieng 2025. U Myntri Rangbahduh u la ong ba ka dei ka sngi kaba kongsan bha, namar ba ka dei ka sngi kaba rakhe ïa ka Dev Deepawali bad Gurpurab bad u la ai ruh ka jingkitbok kitrwiang sha baroh kiba don ha katei ka sngi.

Haba pynpaw ka jingsngewnguh ïa u Myntri Rangbahduh, u Coach jong ka kynhun, u Amol Mazumdar u la ong ba ka long ka burom bad ka jingkmen ban ïakynduh ïa u. U la pynpaw ia ka jingtrei shitom jong ki nongialehkai kum ka jingiakhih ba la ialam da ki khun kynthei jong ka ri, da kaba iaroh ia ka jingaiti lut kaba kyrpang jong ki ha kine ki ar snem ba la dep. U la ong ba ki nongialehkai ki lehkai ha baroh ki jingpractice da ka bor kaba phylla, bad u la pynskhem ba ka jingtrei shitom jong ki ka la seisoh.

Ka Captain Harmanpreet Kaur ka la pynkynmaw ïa ka jingïakynduh ïa u Myntri Rangbahduh ha u snem 2017 khlem ka jingjop khusnam, bad ka la pynpaw ka jingsngew burom kaba khraw ha kaba mynta ki la aiti ïa ka khusnam kaba ki la trei da ki snem. Ka la ong ba u Myntri Rangbahduh u la pynkiew arshah ka jingkmen jong ki bad ba ka dei ka kam kaba sngew sarong shibun. Ka la bynrap ba ka jingthmu jong ki ka long ban ïai bteng ban ïakynduh ïa u ha ki por ban wan bad ban ïai bteng ia ka jingshondur jong ka kynhun bad u.

U Modi u la iaroh ia ka jingjop jong ki, da kaba ong ba ki la pyndep shisha ia kaei kaei kaba khraw. U la ban jur ba ka cricket ha India kam dei tang ka jingialehkai hynrei ka la long ka bynta jong ka jingim jong ki briew. U la iohi ba haba ka don ka jinglehkai bha ha ka cricket, ka ri ka sngew ba ka la kiew, bad watla ki jingjia kiba rit ruh ki ktah ia ka ri baroh kawei. U la ong kumno ka kynhun ka la ïakynduh ïa ka jingshah kynthoh hadien ba ka la shah rem lai sien lynter.

Ka Harmanpreet Kaur ka la ban biang ba ha u snem 2017, ki la ïakynduh ïa u Myntri Rangbahduh ka ri hadien ba ki la shah rem ha ka phainal, hynrei u la pynshlur ïa ki ban ai kaba bha tam ha kano kano ka por ba ka lad kaba bud ka wan. Ka la pynpaw ia ka jingkmen ba khatduh ka kynhun ka la jop ia ka khusnam bad ioh lad ban iakren biang bad u.

U Myntri Rangbahduh u la khot sngewbha ia ka Smriti Mandhana ban iasam ia ki jingmut jong ka. Ka Smriti Mandhana ka la pynkynmaw ba ha u snem 2017, ka kynhun kam shym la jop khusnam, hynrei ka la kynmaw ba ka la buh jingkylli ïa u Myntri Rangbahduh halor ka jingïakhun bad ki jingkhmih lynti. Ka la ong ba ka jubab jong u ka la sah bad ka bad ka la iarap shibun ia ka kynhun ha ki hynriew ne hynniew snem ban wan, wat hapdeng ki jingshah rem bunsien ha ka World Cup kaba pynsngewsih. Ka la ong ba khlem lait ka India ka la dei beit ban pynlong ia ka Women’s World Cup kaba nyngkong. Ka la bynrap ba u Myntri Rangbahduh u la long barabor ka jingai mynsiem, khamtam ha ka rukom ba ki kynthei mynta ki paw ha man la ki bynta—naduh ki jingpynbna jong ka ISRO haduh kiwei kiwei ki jingjop jong ka ri—kaba ka la batai kum ka jingpynshlur kaba jylliew bad kaba ai bor ïa ki ban leh kham bha bad ai mynsiem ïa kiwei pat ki samla kynthei. U Modi u la jubab ba ka ri baroh kawei ka peit bad sngew sarong, bad ba u kwah shisha ban iohsngew ia ki jingshem jong ki. Ka Smriti Mandhana ka la ong ba ka bynta kaba bha tam jong kane ka campaign ka long ba kawei pa kawei ka nongïalehkai ka lah ban leit phai sha la ïing bad ban ïasam ïa ka khana jong ki, namar ym don mano mano ruh ba ka jingnoh synñiang ka duna. Ka la pynkynmaw biang ba ka jingai jingmut jong u Myntri Rangbahduh kaba kham mynshuwa shaphang ki jingkhmih lynti ka la sah ha ka jingmut jingpyrkhat jong ka, bad ka jinglong ba jemnud jong u ka long ka tyllong ai mynsiem.

Ka Jemimah Rodrigues ka la kren shaphang ka jingïaid lynti jong ka kynhun, da kaba ong ba haba ki la shahrem lai sien, ka la paw shai ba ïa ka kynhun ym shym la batai da katno sien ba ka jop, hynrei da kumno ka kiew hadien ba ka la shahrem. Ka la pynskhem ba kane ka kynhun ka la leh ia kata kaba bha tam, dei na kata ka daw ba ka dei ka kynhun kaba jop. Ka la pynpaw shuh shuh ia ka jingiatylli hapoh ka kynhun, da kaba khot ia ka kaba bha tam kaba ka la ju iohi. Ka la ïathuh ba man la ka por ba kano kano ka nongïalehkai ka leh bha, baroh ki lehkmen kum ba ma ki hi ki la ioh ïa ki run ne shim ïa ki wicket. Kumjuh ruh, haba don ba sngewsih sngewkhuslai, ki dkhot jong ka kynhun ki don beit ban ai mynsiem bad ki ban ong, “Wat khuslai, phin sa leh bha ha ka jingialehkai kaban wan.” Ka la bynrap shuh shuh ba kane ka mynsiem kyrshan bad jingïatreilang ka la pynpaw shisha ïa ka jinglong jong ka kynhun.

Ka Sneh Rana ka la mynjur bad ka Jemimah Rodrigues, da kaba ong ba katba baroh ki ieng lang ha ki por jong ka jingjop, hynrei ka kham kongsan shuh shuh ban kyrshan iwei ia iwei pat ha ki por jong ka jingsngewsih. Ka la ban jur ba kum ka kynhun bad kum ka unit, ki la rai ba wat la kaei kaei ka jia, kin ym iehnoh ia iwei ia iwei bad kin iai kyntiew iwei ia iwei pat. Ka la pynskhem ba kane ka dei ka jinglong kaba bha tam jong ka kynhun jong ki.

Ka Kranti Gaud ka la bynrap ruh ba ka Harmanpreet Kaur ka ju pynshlur ïa baroh ba kin ïai don ia ka durkhmat kaba phuh samrkhie. Ka la ïathuh ba lada don kiba don wat khyndiat ruh ka dur khuslai, ka rukom treikam jong ka kynhun ka long ban ïai don ka durkhmat kaba phuh samrkhie khnang ba ka jingïohi ia ka durkhmat phuh samrkhie jong iwei ïa iwei pat kan ïarap ïa baroh ban long kiba kmen bad kiba sngewskhem. U Myntri Rangbahduh u la kylli lada don mano mano ha ka kynhun kiba pynrkhie ia baroh, ha kaba ka Kranti ka la jubab ba ka Jemimah Rodrigues ka la leh ïa kata ka bynta. Ka Jemimah ka la bynrap ba ka Harleen Kaur Deol ruh ka la don bynta kaba kongsan ban pynïatylli ïa ka kynhun.

Ka Harleen Kaur Deol ka la iathuh ba ka ngeit ba man la ka kynhun ka dei ban don iba pynsngewtynnad ia ka jinglong jingman. Ka la ong ba man la ka por ba ka iohi ba don kiba shong marwei ne ka sngew ba ka lait por, ka pyrshang ban iakren bad kiwei. Ka la pynpaw ba ka wanrah jingkmen ia ka haba ki briew kiba don sawdong bad ka ki kmen.

U Myntri Rangbahduh ka ri u Narendra Modi u la kylli hato kane ka kynhun ka la leh ei ei hadien ba ka la wanpoi. Ka Harleen Kaur Deol ka la ïathuh biria ba baroh ki la ai dak ïa ka namar ba ka kren jam palat bad ki la ong ïa ka ba kan jar jar. Nangta ka la kylli ia u Myntri Rangbahduh shaphang ka rukom sumar sniehdoh jong u, da kaba ong ba u don ka sniehdoh kaba bha. U Myntri Rangbahduh u la jubab, da kaba ong ba um shym la phaikhmat than ia kata ka phang. Kawei ka nongialehkai ka la ong ba kadei ka jingieid jong ki klur ngut ki nong India kaba pynphuh ia ka durkhmat jong u. U Myntri Rangbahduh u la mynjur, da kaba ong ba kum kane ka jingieit na ka imlang sahlang ka long shisha ka bor kaba khraw. U la ong ba u la pyndep 25 snem ha ka sorkar, kynthup kum u khlieh jong ka sorkar, bad ba ka jingïoh ïa kum kine ki jingkyrkhu wat hadien ka samoi kaba jrong kumne ka don ka jingktah kaba iaineh.

U Coach u la kren shaphang ki jingkylli bapher bapher kiba la kylli bad ki jinglong bapher bapher ha ka kynhun. U la ïathuh ba u la long u Head Coach jong ki la ar snem kynthih. U la iathuh ia kawei ka khana na u bnai Jylliew ha England, ha kaba ki la iakynduh ia u Syiem Charles. Namar ki jingpyrkhing, la shah tang 20 ngut, kumta ki nongtrei kiba iarap kim lah ban iashim bynta. Baroh ki nongialehkai bad lai ngut ki coach kiba la pyntbit ki la ia don lang. U la iathuh ha ki nongtrei kiba iarap ia ka kynhun ba u sngewsih haduh katta katta, namar ba katkum ka kyndon ka shah tang 20 ngut. Ha ka jubab, ki nongtrei kiba iarap ia ka kynhun ki la ong ba kim donkam ïa kata ka dur—ki kwah ïa kawei bad u Myntri Rangbahduh u Modi ha ka 4 ne 5 tarik u Naiwieng. Mynta ka sngi, kata ka jingkwah ka la urlong.

Ka Harmanpreet Kaur ka la iathuh ba ki don ki por ba ka sngew kumba ki jingeh ki jia tang ha ki, hynrei ia kita ki jingialeh la thoh ban pynlong ia ki kiba khlain ha ka bor pyrkhat bad ha ka bor met. U Myntri Rangbahduh ka ri u Narendra Modi u la kylli ïa ka Harmanpreet kiei ki jingsngew ba ka sngew haba ka ïasam ïa kane, da kaba ong ba ka long kaba ai mynsiem haduh katta katta. Ka nongialehkai ka la jubab ba ka don beit ka jingngeit ba ha kawei ka sngi kin sa rah ia ka khusnem, bad kata ka jingsngew kaba kyrpang ka la don naduh ka sngi kaba nyngkong ha ka kynhun. U Myntri Rangbahduh u la kubur ïa ki jingeh kiba ju ïakynduh man ka por bad u la ïaroh ïa ka jingshlur bad ka jinglah jong ki ban pynneh ïa ka jingsngew skhem ha kiwei pat wat hapdeng ki jingeh. Ka Harmanpreet u la ai khublei ïa baroh ki dkhot jong ka kynhun, da kaba pynpaw ïa ka jingngeit halade bad ka jingkiew jong ki ha man la ki lympung ïalehkai. Ka la ong ba ha kine ki ar snem ba la leit noh, ki la trei shitom bha halor ka jingkhlain ha ka bor pyrkhat, da kaba pdiang ba ym lah ban pynkylla ia kiei kiei kiba ladep. U Myntri Rangbahduh u la ong ba kane ka jingiaid lynti ka la hikai ia ki ban im ha ka mynta. Ka la mynjur bad ka la ong ba dei thik na kata ka daw ba ka la kylli ia u kaei kawei pat kaba u leh ban pynshlur ia ki dkhot jong ka kynhun jong u—khnang ba kin lah ban pynkhlain ia ka jingngeit jong ki. Ka la pynskhem shuh shuh ba ka jingialam lynti na u Myntri Rangbahduh bad ki coach jong ki ka la buh ia ki ha ka lynti kaba dei.

Hadien kata u Myntri Rangbahduh u la kylli ia ka Deepti Sharma halor ka kam Dy Superintendent of Police (DSP) jong ka, da kaba kren biria ba ka synshar lut ia kiei kiei baroh. Ka la jubab ba ki la shu ap ban iakynduh ia u. Ka la pynkynmaw ba ha u snem 2017, u Myntri Rangbahduh u la ong ia ka ba ka nongialehkai ba shisha ka dei kaba nang ban kiew bad ban iaid shakhmat na ka jingshah rem. Ka la ong ba ki kyntien jong u Modi ki ju pynshlur ia ka, bad ka ju sngap ia ki jingkren jong u. Ka la bynrap ba ka jinglong ba jai jai bad ki rukom pyniaid ryntih ia ki jinglong jingman, wat haba bun ki sur ki mih, ka iarap shimet ia ka ha ka jingialehkai jong ka.

U Modi u la kylli ia ka Deepti halor ka Tattoo jong u Hanuman Ji bad kumno ka iarap ia ka. Ka la jubab ba ka kham ngeit ha u Hanuman Ji ban ialade, bad man la ka por ba ka iakynduh ia ki jingeh, ka jingkhot ia ka kyrteng jong u ka ai bor ia ka ban jop ia ki. U Myntri Rangbahduh  u la ong ba ka thoh ruh "Jai Shri Ram" ha ka Instagram account jong ka, ha kaba ka la pynskhem. U la ong ba ka jingngeit ka don ka bynta kaba kongsan ha ka jingim, ka ai ia ka jingsuk ban aiti noh ha ka bor kaba kham halor. Nangta u la kylli shaphang ka jinglong shlur jong ka ha madan bad hato ka don ne em ka jingshisha ha ka jingsngewthuh ia ka bor jong ka. Ka la jubab ba kam dei kumta, hynrei ka la kubur ba ka don khyndiat ka jingtieng kaba ïadei bad ki jingkawang bol jong ka, bad ki paralok bunsien ki ju kren biria ba kan leh jai jai. Ka la sngewnguh ba u Myntri Rangbahduh u la kylli hi dalade shaphang ka tattoo jong ka bad u tip ia ka jingthoh jong ka ha ka Instagram.

Nangta u Myntri Rangbahduh u la kylli ïa ka Harmanpreet Kaur shaphang ka bol kaba ka la buh ha ka pla jong ka hadien ka jingjop— la ka dei ka jingleh ba la thmu ne ba la ïalam da mano mano. Ka Harmanpreet ka la jubab ba ka dei ka jingthmu ba kynja Blei, namar kam shym la khmih lynti ba ka bol bad ka jingkem kaba khatduh kan wan sha ka, hynrei ynda ka jia kumta, ka la sngew kumba ka long ka jingkut jong ki snem jong ka jingpyrshang bad jingap, bad ka la rai ban buh ia ka. Ka la bynrap ba ka bol ka dang don ha ka pla jong ka.

U Myntri Rangbahduh u la phai khmat sha ka Shafali Verma, da kaba ong ba kadei na Rohtak, ka jaka kaba pawnam ha kaba pynmih ia ki nongialehkai wrestling, bad u la kylli kumno ka la kut ha ka jingialehkai cricket. Ka Shafali ka la jubab ba ka jingialehkai wrestling bad ka kabaddi ki long shisha kiba pawnam bha ha Rohtak, hynrei u kpa jong ka u la don ka bynta kaba khraw ha ka jingiaid lynti jong ka ha ka cricket. U Myntri Rangbahduh u la kylli hato ka la ju ialehkai ia ka jingialehkai tynrai ka akhada, bad ka la pynthikna ba kam shym la ju ialehkai. Ka la ïathuh ba u kpa jong ka u la angnud ban long u nongïalehkai cricket hynrei um shym la lah ban pynurlong ïa ka jingangnud, kumta u la pynsah ïa ka jingieit jong u sha ki khun jong u. Ma ka bad u hynmen jong ka ki ju leit peit lang ia ki jingialehkai, kaba la wanrah ka jingsngewtynnat kaba jur jong ka ia ka cricket bad ka la ialam ia ka ban long ka nongialehkai cricket.

U Myntri Rangbahduh ka ri u Narendra Modi u la pynkynmaw ba u la iohi ia ka jingphuh samrkhie jong ka shwa ba kan kem ia ka bol bad u la kylli ia ka daw. Ka la jubab ba ka khot ha ka jingmut jingpyrkhat ia ka bol ban wan sha ka, bad ynda ka la wan, kam lah khlem da phuh samrkhie. U Myntri Rangbahduh u la ong ba ka long kumba ka sngewskhem haduh katta katta ba ka bol kan ym leit shawei pat. Ka la jubab ba lada ka la leit shawei pat, kan jin da la rynsied ban kem ia ka.

Haba la kylli ia ki jingsngew jong ka ha katei ka por, ka Jemimah Rodrigues ka la batai ba ka dei ha ka por ba iakhun ia ka semi phainal, bad ka kynhun ka la shahrem ha ka Australia. Ka jingthmu jong ka ka long tang ban jop ia ka jingialehkai bad ban ialehkai haduh kaba kut. Ka la ban jur ba ka kynhun ka iai ong ba ki donkam ia kawei ka jingiatreilang kaba jrong ban pynkylla ia ka jingialehkai, bad kata ka jingngeit ka la ialam sha ka jingpyrshang lang jong ka kynhun. Watla ka la kamai shi century, hynrei ka la ai burom ïa ka jingjop sha ki jingnoh synñiang jong ka Harmanpreet Kaur, ka Deepti, ka Richa, bad ka Amanjot. Ka la pynskhem ba baroh ki ngeit ba ka kynhun ka lah ban leh ia kata—bad ki la leh ia kata.

Ka Jemimah ka la bynrap ba u Myntri Rangbahduh u kwah eh ban tip ïa ka jingïashem jong ki ban jop ïa ka World Cup, kumno ka long hadien ba ki la shah rem lai tylli ki jingïalehkai, bad kumno ki la khyllie im biang.

Ka Kranti Gaud ka la ïathuh ba ka jingjop ïa ka World Cup ka long ka jingsngew sarong shimet na ka bynta jong ka bad kumjuh ruh na ka bynta ki briew ka shnong jong ka. Ka la ïathuh ba man la ka por ba ka kawang bol, ka Harmanpreet Kaur ka ju ong ïa ka ba dei ma ka ban shim ïa ka wiket kaba nyngkong, kaba la pynshlur ïa ka ban leh ia kata. Ka Kranti ka la kren ruh shaphang ka jingieid jong u hynmen jong ka ïa ka cricket bad ka jingsngewnguh ïa u Myntri Rangbahduh. U hynmen jong ka um shym la lah ban rung ha kawei ka academy namar ba u kpa jong ki u la duh kam, hynrei u la bteng ban ïalehkai. Da ka jingpynshlur jong u, ka la sdang ban ialehkai bad ki khynnah shynrang da kaba pyndonkam ia ki bol tennis. Ka jingïalehkai cricket jong ka ka la sdang ha lympung ialehkai da bol snieh ha ka thaiñ—ka MLA Trophy—ha kaba la bthah ïa ka ban ïalehkai ha ka jaka jong ka paralok kaba la shitom noh. Watla ka don u shniuh ba jrong, hynrei la khot ia ka ban iadon bynta bad katei ka kynhun, bad ha ka jingiakhun kaba nyngkong jong ka, ka la ioh ban khur ar wiket bad kamai 25 run, kaba la pynlong ia ka ban ioh ia ka khusnam Player of the Match. Kata kalong ka jingsdang jong ka jingialehkai cricket jong ka.

U Myntri Rangbahduh Modi, u la ong ba ka Shafali Verma, ka la ioh ia ka lad ban ialehkai ha artylli ki jingialehkai ba la dep. Ka Shafali ka la pynthikna, da kaba ong ba ka la ju ïalehkai cricket hapoh ka ri shwa ban shah khot. Ka la pdiang ba kaei kaba la jia bad ka Pratika ka long kaba sngewsih bad kam dei kaei kaei kaba kano kano ka nongialehkai kan kwah ban jia ia kawei pat. Hynrei ynda la khot ia ka, ka la pyni ia ka jingshaniah, bad ka kynhun baroh kawei ka la shaniah ha ka. Ka la kut jingmut ban iarap ia ka kynhun ban jop, da kano kano ka lad kaba donkam.

Ka Pratika Rawal ka la ïathuh ba hadien ka jingmynsaw jong ka, kiba bun ha ka kynhun ki la pynpaw ïa ka jingangnud jong ki ban jop ïa ka World Cup na ka bynta ka Pratika. Watla kam shym la don ha ka kynhun bad ka dei ka nongialehkai kaba 16, hynrei la wan ialam ia ka sha rynsan ha ka wheelchair bad la ai burom pura ia ka. Ka la batai ia ka kynhun kum kawei ka longiing, ha kaba leh mar kumjuh ia kawei pa kawei ka nongialehkai, bad haba kum kane ka kynhun ka ialehkai lang, ka long kaba eh bha ban pynliem ia ki. Ka la pynskhem ba ka kynhun ka dei hok shisha ban jop ïa ka phainal. U Myntri Rangbahduh u la mynjur, da kaba ban jur ba ka mynsiem ïatreilang ka long kaba kongsan bha—ym tang ha madan hynrei wat shabar jong ka. U la ong ba ka jingpynlut por lang ka tei ia ka jingiadei, bad ka jingtip ia ki jingduna bad jingkhlain jong iwei ia iwei pat ka iarap ban pynbiang bad kyrshan iwei ia iwei pat.

Nangta u Modi u la ong ba kawei ka jingioh kem ia ka bol ka la pawnam bha. Ka Amanjot Kaur ka la jubab ba wat la ka la don ka jingioh kem ia ka bol mynshuwa, hynrei ym don kawei ruh kaba la ioh ia ka nam kaba kum kata, bad kalong kaba sngewtynnad wat hadien ba jan lait. U Myntri Rangbahduh ka la ong ba ka jingkem i ka la long ka jingkylla, bad hadien ba ka la shim ia ka, ka la dei ban sdang ban iohi ia ka khusnam. Ka Amanjot ka la jubab ba ka la iohi shisha ia ka khusnam ha kata ka jingkem, bad ka la sngewlyngngoh ia ka jingbun ki briew kiba la kynthih sha ka ha ka jingkmen.

U Myntri Rangbahduh ka ri, u la ong ba ka Suryakumar Yadav, ka la ioh kum katei ka jingkem mynshwa bad u la pynkynmaw ba u la tweet biang ia ka jingkem na uwei na ki nongialehkai, kaba u la shem ba ka long kaba itynnad bha .

Ka Harleen Kaur Deol, ka la ïasam ïa ka jingkynmaw na England, ha kaba ki ju practice ïa kum kine ki jingkem bol la slem bha. Ka la pynkynmaw ia ka jingduh ia kawei ka jingkem bol ha ka fielding, hadien kata ka Harmanpreet Kaur ka la kynhied ia ka, da kaba ong ba ki nongap fielding kiba tbit kim dei ban duh ia kum kine ki jingkem. Ka Jemimah kaba ieng shadien jong ka ka la pynthikna ia ka bad ka la ong ba ka jingkem ka long kaba lah na ka bynta jong ka. Nangta ka la kular ban ialeh ban kem bha hapoh ki artylli ki over kiba hadien, bad hadien kata, ka bol ka la wan bad ka la pyndep ia ka jingkular jong ka. Nangta u Modi u la ong da kaba biria artad ba ka jingpyrshang ka la treikam.

U Myntri Rangbahduh u la ong ba ka Richa Ghosh ka i kumba ka jop ha kano kano ka jaka ba ka ialehkai. Ka la jubab ba kam thikna, hynrei ka la ong ba ka Richa ka la jop ïa ki khusnam ha ki jingïalehkai Under-19, ka thup - senior, bad ka WPL, bad ka la ioh bun ki six kiba jrong. Shuh shuh ka la ïathuh ba ha ka por ba ka tied khamtam haba ka tied six, ka la sngewthuh ïa ka jingshaniah kaba khraw na ki paralok kum ka Harmanpreet Kaur bad ka Smriti Mandhana. Ka kynhun baroh kawei ka ngeit ha ka bor jong ka ban pyndep ha ki jinglong jingman ba ban khia ha kaba donkam ïa ki run hynrei ki bol ki duna bha. Kata ka jingshaniah ka la ai jingssngewskhem ia ka bad ka la paw ha ka rukom pyni jong ka ha man la ka jingialehkai.

Kawei pat ka nongialehkai, ka Radha Yadav ka la pynkynmaw ba wat la ka la rem lai sien, hynrei ka bynta kaba bha tam ka long ka jingiatylli ha ka jingshahrem—baroh ki la kyrshan iwei ia iwei pat bad ki la iakren shai, da ka jingkyrshan kaba shisha bad kaba khuid. Ka ngeit ba kane ka mynsiem iatylli ka dei ka daw ba la kyrkhu ia ki da ka khusnam. U Myntri Rangbahduh ka ri u Narendra Modi u la jubab ba dei ka jingtrei shitom jong ki kaba pynlong ia ki ban ioh ia ka jingjop. U la kylli kumno ka la pynkhreh ialade na ka bynta kane ka jinglehkai. Ka nongialehkai ka la batai ba ka kynhun ka la ialehkai cricket kaba bha la slem bah bad ka la pynkhreh na ka bynta man la ka jinglong jingman—la ka long ha ka liang ka jingkoit jingkhiah, ka jingap fielding, ne ka jingtbit. Ka la ban jur ba ka jingiadonlang ka pynsuk ia kiei kiei, katba ka jingtrei marwei kan jin da la long kaba eh shibun. U Myntri Rangbahduh u la ong ba u iohsngew ba ka la pynlut ia ka khusnam pisa kaba nyngkong jong ka ban kyrshan ia u kpa jong ka. Ka la pynthikna ia kane, da kaba bynrap ba ka iing ka sem jong ka ka la iakynduh ia ki jingeh, hynrei u kpa bad ka kmie jong ka kim ju ailad ba kita ki jingeh kin ktah ia ka jingiaid lyntit jong ka.

Ka Sneh Rana ka la kren shaphang ki snem jong ka jingtrei shitom bad ïathuh kumno ka ju ïakren shaphang ki buit bad u coach kawang bol jong ki, u Aavishkar Salvi, ban ïakhun pyrshah ïa ki nongtied ba kyrpang. Ia kine ki buit la pyniadei bad ka kapten, vice-kapten, bad head coach, bad nangta la pynbud biang ha madan. Watla ym baroh ki jingialehkai ki long katkum ka jingthmu, hynrei ki dang don ka jingangnud ban kyntiew ha ka kabu ka ban wan.

Ka Uma Chetry ka la kubur ba ka la sngewkmen ban iakren markhmat bad u Myntri Rangbahduh ka ri. U la pynshlur ia ka ban kren ia kaei kaei kaba wan ha ka jingmut jong ka. Nangta ka la ïathuh ba ka jingïalehkai ba nyngkong jong ka ka dei ha ka por jong ka World Cup, bad kum manla ka jingïalehkai ba nyngkong jong ka, ka slap ha kata ka sngi. Ka la buh tang ïa ki wiket, hynrei ka la sngewkmen haduh katta katta namar ba ka jingïalehkai nyngkong na ka bynta ka India ha ka World Cup ka dei ka por kaba khraw bha. Ka sngewtynnad ban ïalehkai na ka bynta ka ri bad ka la kut jingmut ban aiti ïa kaba bha tam ban ïarap ïa ka India ban jop. Ka sngewnguh shikatdei ba ka kynhun baroh kawei ka shaniah ha ka bad ka kyrshan ia ka da ka jingialam lynti bad jingai mynsiem. U Coach u la pynpaw ba ka dei ka khynnah kynthei kaba nyngkong eh na ka thaiñ shatei lammihngi ban ïalehkai na ka bynta ka India. U Myntri Rangbahduh u Narendra Modi u la iaroh ba ka dei na Assam.

Haba ïakren bad ka Renuka Singh Thakur, u Myntri Rangbahduh u la kylli hato ka la ïohi ne em ïa ki klew haba ka la wanphai. Ka nongialehkai ka la jubab ba ka la iohi sa kawei pat ka klew bad ka la iasam ba tang kawei kaba ka lah ban dro ka dei ia ki klew, kaba ka la dro bad buh. Ka la bynrap ba kam lah ban dro ia kiwei kiwei bad kam shym la kwah ban pyrshang dro ia ka sim hadien. U Myntri Rangbahduh u la pynpaw ka burom kaba khraw ïa ka kmie jong ka, da kaba kubur ïa ka jingnoh synñiang kaba khraw jong ka ha kaba pynheh pynsan ïa la ka khun kum ka kmie kaba shong marwei bad ban ïarap ïa ka ban kiew shaphrang lyngba ka jingim kaba eh. U la kyrpad ia ka nongialehkai ban ai khublei ia.

Ka Arundathi Reddy, haba ïakren bad u Myntri Rangbahduh, ka la ïathuh ba ka kmie jong ka, ka la phah khubor na ka bynta u Myntri Rangbahduh, da kaba khot ïa u, u riewshlur jong ka. Ka la ong ba ka kmie jong ka ka la phone saw ne san sien ban kylli lano kan iakynduh ia u hero jong ka.

U Myntri Rangbahduh u la kylli kaei kaba ki nongialehkai ki sngew ba ka ri mynta ka khmih lynti na ki hadien ka jingjop jong ki ha madan. Ka Smriti ka la jubab ba man la ka por ba ki pynkhreh ïa ka World Cup, ki ngeit ba ka jingjop kan wanrah ïa ka jingktah kaba khraw ym tang ha ka cricket jong ki kynthei hynrei ha kylleng ki jingïalehkai jong ki kynthei ha India. Ka la ong ba kan sdang ia ka jingkylla, bad ka kynhun ka don ia ka jinglah ban pyniaid ia kata ka jingkylla.

U Myntri Rangbahduh u la ong ba ki don ka bor ai mynsiem kaba khraw namar ka jingjop jong ki. U la ai jingmut ba hadien ba ki la wan phai sha la iing, ki dei ban leit jngoh ia ki skul ba ki la pule bad ban pynlut por shisngi ban iakynduh bad ki khynnah skul. U la ong ba ki khynnah kin kylli bun ki jingkylli bad kin kynmaw ia ki ha ka jingim, bad ba ka jingshem kan pynshlur ruh ia ki nongialehkai. Nangta u Modi u la tyrwa ban jied lai tylli ki skul bad ban leit jngoh ia kawei man la u snem, da kaba bynrap ba kan ai mynsiem ia ki nongialehkai bad kumjuh ruh ia ki khynnah skul.

U Myntri Rangbahduh u la ban jur ia ka jingdonkam ban noh synniang sha ka Fit India Movement, khamtam ban tehlakam ia ka jingsngaid palat. U la ai jingmut ban pynduna ka jingpyndonkam umphniang da 10% ha ka por ba thied bad u la ong ba ka jingiohsngew ia kum kine ki khubor na ki nongialehkai kan wanrah ia ka jingkylla. U la pynshlur ia ki ban kyntiew ia ka Fit India, khamtam ia ki khun kynthei, bad ban noh synniang shitrhem.

U Modi u la pynpaw ka jingkmen ba u la ïoh ïa ka lad ban ïakynduh bad ki, da kaba ong ba watla u la ïakynduh ïa ki katto katne ki nongïalehkai mynshuwa, bun ki dang ïakynduh ïa u ha ka sien kaba nyngkong. U la ong ba u ju khmih lynti ban iakynduh ia ki bad kitbok kitrwiang ia ki ba kin koit kin khiah.

Ka Smriti Mandhana ka la jubab ba kin kynmaw ia ki kyntien jong u bad kin pynphriang ia ka khubor haba ki ioh ia ka lad. Ka la bynrap ba ka kynhun baroh kawei ka long kaba kloi ban kyrshan ïa kum kine ki khubor bad kan iashim bnta ha kano kano ka por.

U Myntri Rangbahduh u la pynkut da kaba ong ba ryngkat, ngi dei ban rah shakhmat ia ka ri bad ai ka jingkitbok kitrwiang ïa baroh.

***