ইকাই খুম্নরবা রাস্ত্রপতি,

লৈবাক অনিমক্কী শক্নাইরবশিং,

মীদিয়াগী মরূপশিং,

নমস্কার!

কালিমেরা!

হৌরকপদা, ঐহাক্না ইকাই খুম্নরবা রাস্ত্রপতিবু নুংশিজরবা অমসুং নুংশিজরবা ওফিসিয়েল ওইবগীদমক থাগৎপা ফোংদোকচরি। ঙরাং ঐহাক্না সাইপ্রসকী লৈমায়দা খোঙ থাংজিল্লকপা মতম অদুদগী, রাস্ত্রপতি অমসুং লৈবাক অসিগী মীয়ামনা উৎখিবা নুংশি-চান্নবা অদুনা ঐহাক্কী থম্মোয়দা অচেৎপা ইথিল পীখি।

মতম খরগী মমাংদা, ঐহাকপু সাইপ্রসনা ইকাই খুম্নবা অমা উৎপীখি। মসিগী মনা অসি ঐখক্তগী নত্তে, মসি ভারত মচা করোর ১৪০দা ইকায় খুম্নবা অমনি। মসিনা ভারত অমসুং সাইপ্রসকী মরক্তা লৈনরিবা অচেৎপা মরুপ-মপাং ওইবগী মরী অদু উৎলি। মসিগী ইকায় খুম্নবা অসিগীদমক্তা ঐহাক্না অমুক্কা হন্না থাগৎপা ফোংদোকচরি।

মরুপশিং,

ঐখোয়না সাইপ্রসকা লৈনরিবা মরীবু য়াম্না মরুওইনা লৌই। ঐখোয়গী পার্তনরশিপকী মপাঙ্গল কনবা য়ুম্ফম অদুদি দিমোক্রে সি অমসুং আইনগী কাংলোনগী মতুং ইন্না চৎপা ঐখোয়গী মান্নবা ফিরেপ অদুনি। ভারত অমসুং সাইপ্রসকী মরক্তা লৈনরিবা মরুপ-মপাং ওইবগী মরী অসি অকক্নবা ফিভম অমদগী থোক্লকপা নত্তে, ঙমখৈগী মখা পোন্না লৈনবসু নত্তে।

মসিনা মতমগী চাংয়েংদা অমুক্কা হন্না থেংনরি। মতম খুদিংদা, ঐখোয়না কোওপরেসন, ইকায় খুম্নবা অমসুং অমগা অমগগী মতেং পাংনবগী ৱাখল্লোন অদু ঙাক্লি। ঐখোয়না অমগা অমগগী লৈঙাক অমসুং লমদমগী অপুনবগীদমক ইকায় খুম্নবা উৎলি।

মরুপশিং,

মসিগী খোঙচৎ অসি চহী তরাগী খুজিং অনিগী মতুংদা ভারতকী প্রধান মন্ত্রী অমনা সাইপ্রাসতা চৎখিবা অহানবা খোঙচৎনি। মসিনা ঐখোয়গী নাকল অনিগী ওইবা মরীদা অনৌবা চেপ্তর অমা শেম্নবা সনাগী খুদোংচাবা অমা পীরি। ঙসি ঐহাক্না ইকাই খুম্নরবা রাস্ত্রপতিগা লোয়ননা ঐখোয়গী পার্তনরশিপকী হিরম পুম্নমক্তা পাক-শন্না খন্ন-নৈনখি।

সাইপ্রসকী ভিজন ২০৩৫ অমসুং ঐখোয়গী ভিশন ২০৪৭গী ভিশনগী মরক্তা মান্নবা কয়া অমা লৈ। মরম অদুনা, ঐখোয়না ঐখোয়গী মান্নবা তুংলমচৎ শেমগৎনবা পুন্না থবক তৌমিন্নগনি। ঐখোয়গী পার্তনরশিপ অসিদা স্ত্রেতেজিক দিরেক্সন পীনবগীদমক্তা, ঐখোয়না মথংগী চহি মঙাগীদমক কংক্রিৎ রোদমেপ অমা শেম্লগনি।

ঐখোয়গী দিফেন্স অমসুং সেক্যুরিতী কোওপরেসন মখা তানা মপাঙ্গল কনখৎহন্নবা, বাইলেতরেল দিফেন্স কোওপরেসন প্রোগ্রামনা দিফেন্স ইন্দস্ত্রী কোওপরেসনদা মীৎয়েং থমগনি। সাইবর অমসুং মেরিতাইম সেক্যুরিতীদা তোঙানবা দাইলোগশিং হৌদোক্লগনি।

ভারতনা ঙমখৈ লান্না চত্থবা তেরোরিজমগী মায়োক্তা চত্থরিবা লান্থেং অসিদা সাইপ্রসনা লেপ্পা লৈতনা মতেং পাংলিবা অসিগীদমক ঐখোয়না থাগৎপা ফোংদোকচরি। তেরোরিজম, দ্রগ ত্রাফিকিং অমসুং খুৎলাইগী স্মগ্লিং থেংননবা, ঐখোয়গী এজেন্সীশিংগী মরক্তা রিএল তাইম ইনফোর্মেসন একচেঞ্জ তৌনবগী মেকানিজম অমা লিংখৎকনি। নাকল অনিগী ওইবা ললোন-ইতিক অমসুং ইনবেস্তমেন্ত হেঙ্গৎহনবদা অচৌবা পোতেন্সিএল লৈ হায়বা ঐখোয়না য়ানখি।

ঙরাং ঐহাক্না রাস্ত্রপতিগা ৱারী শানখিবা মতমদা, ঐহাক্না ঐখোয়গী শেন্মিৎলোনগী মরীগী মতাংদা বিজিনেস কম্ম্যুনিতীগী মনুংদা চাউরবা থৌনা অমসুং সিনর্জী অমা উবা ফংখি। চহি অসিগী অরোইবা শরুক ফাওবদা ইন্দিয়া-ই.য়ু. ফ্রী ত্রেদ এগ্রীমেন্ত অমা খুৎয়েক পীননবা ঐখোয়না হোৎনরি।

চহি অসিদা,  “ইন্দিয়া-সাইপ্রস-গ্রীস বিজিনেস অমসুং ইনবেস্তমেন্ত কাউন্সিল”সু হৌদোকখ্রে। অসিগুম্বা খোংথাংশিং অসিনা ঐখোয়গী লৈবাক অনিগী মরক্তা নাকল অনিগী ওইবা ললোন-ইতিক অমসুং ইনবেস্তমেন্ত হেনগৎহনগনি।

তেক্নোলোজী, ইন্নোবেসন, হকশেল, লৌউ-শিংউ, রিন্যুএবল ইনর্জী অমসুং ক্লাইমেৎ জস্তিসকুম্বা লমশিংদা মতেং পীনবা হেনগৎহন্নবা ঐখোয়না কুপ্না খন্ন-নৈনখি। সাইপ্রসতা য়োগ অমসুং আয়ুর্বেদনা পাক শন্না পাম্নরক্লিবা অসিনা ঐখোয়দা পুক্নিং থৌগৎপা পোকহল্লি।

সাইপ্রাস অসি ভারতকী তুরিস্তশিংগীসু পাম্নবা মফম অমনি। মখোয়গী খোঙচৎ লাইথোকহন্নবগীদমক ঐখোয়না হকথেংননা এয়র কনেক্তিবিতী শেমগৎনবা থবক পায়খৎকনি। ঐখোয়না মোবিলিতী এগ্রীমেন্ত অমা অথুবা মতমদা ফাইনেল তৌনবা ৱারেপ লৌরে।

মরুপশিং,

য়ুরোপিয়ন য়ুনিয়নগী মনুংদা, সাইপ্রাস অসি ঐখোয়গী থাজবা য়াবা পার্তনর অমনি। লাক্কদৌরিবা চহিদা সাইপ্রাসনা য়ুরোপিয়ন য়ুনিয়নগী প্রসিদেন্সী লৌগদৌরিবা অসিদা ঐখোয়না য়াইফ-পাউজেল পীজরি। অদোমগী লুচিং মখাদা ভারত-য়ুরোপিয়ন য়ুনিয়নগী মরীনা অনৌবা অৱাংবা থাক্তা য়ৌরগনি হায়না ঐখোয়না থাজবা থম্লি।

লৈবাক অনিমক্না য়ুনাইতেদ নেসন্সপু হেন্না রিপ্রজেন্তেতিব ওইহন্নবা রিফোর্ম তৌবগী তঙাইফদবা অদুগী মতাংদা মান্নবা ৱাখল্লোনশিং থম্লি। ভারতনা য়ু.এন. সেক্যুরিতী কাউন্সিলদা পর্মানেন্ত মেম্বর ওইনবগীদমক্তা পীখিবা তেংবাং অদুগীদমক ঐখোয়না সাইপ্রসকী মফমদা থাগৎপা ফোংদোকচরি।

ঐখোয়না নোংচুপ এসিয়া অমসুং য়ুরোপতা চত্থরক্লিবা চয়েৎনবশিংগী মতাংদা খন্ন-নৈনখি। অসিগুম্বা চয়েৎনবা কয়া অসিনা ওইরিবা ফীভমশিং অসি মখোয়না লৈরিবা মফমশিং অদুখক্তদা অকক্নবা ওইদে। ঐখোয়না অনিমক্না মসি লানগী মতম নত্তে হায়না য়ানরে।

দাইলোগ অমসুং স্তেবিলিতী অমুক হন্না শেমগৎপা হায়বসি মীওইবা খুন্নাইগী অপাম্বনি। ঐখোয়না মেদিতেরনেয়ন লমদমগা লোয়ননা কনেক্তিবিতী হেঙ্গৎহন্নবা খন্ন-নৈনখি। ভারত-ময়াই থংবা নোংপোক-য়ুরোপ ইকোনোমিক কোরিদোরনা লমদম অসিদা শান্তি অমসুং চাউখৎপগী লম্বী য়াৎলগনি হায়না ঐখোয়না য়ানখি।

ইকাই খুম্নরবা রাস্ত্রপতি,

ভারততা লাক্নবা ঐহাক্না অদোমদা অপেনবা ফোঙদোকচরি। অথুবা মতমদা অদোমবু ভারত্তা তরাম্না ওকপগী খুদোংচাবা ফংলগনি হায়না ঐনা থাজবা থম্লি।

অখন্নবা হোস্পিতাল অমসুং ইকাই খুম্নবগীদমক ঐহাক্না অমুক্কা হন্না অদোমবু থাগৎচরি।

দিসক্লেমর: মসি পি.এম.গী ৱারোল অদুগী চাউরাকপা হন্দোকপনি। ওরিজিনেল স্পিচ অসি হিন্দীদা পীখি।

***