ମହାମହିମ, ମାନନୀୟ ରାଷ୍ଟ୍ରପତି,

ଉଭୟ ଦେଶର ପ୍ରତିଷ୍ଠିତ ପ୍ରତିନିଧିଗଣ,

ଗଣମାଧ୍ୟମର ବନ୍ଧୁଗଣ,

ନମସ୍କାର!

କାଲିମେରା!

ପ୍ରାରମ୍ଭରେ, ମୁଁ ମାନନୀୟ ରାଷ୍ଟ୍ରପତିଙ୍କ ପ୍ରତି ଭବ୍ୟ ସ୍ୱାଗତ ଏବଂ ସହୃଦୟ ଆତିଥ୍ୟ ପାଇଁ ମୋର ଆନ୍ତରିକ କୃତଜ୍ଞତା ଜଣାଉଛି। ଗତକାଲି ମୁଁ ସାଇପ୍ରସର ଭୂମିରେ ପାଦ ଦେବା ପରଠାରୁ, ରାଷ୍ଟ୍ରପତି ଏବଂ ଏହି ଦେଶର ଲୋକଙ୍କ ଦ୍ୱାରା ମୋତେ ଦିଆଯାଇଥିବା ଆନ୍ତରିକତା ଏବଂ ସ୍ନେହ ପ୍ରକୃତରେ ମୋ ହୃଦୟକୁ ଛୁଇଁଛି।

କିଛି ସମୟ ପୂର୍ବରୁ, ମୋତେ ସାଇପ୍ରସ ଦ୍ୱାରା ଏକ ମର୍ଯ୍ୟାଦାଜନକ ସମ୍ମାନରେ ସମ୍ମାନିତ କରାଯାଇଥିଲା । ଏହି ପୁରସ୍କାର କେବଳ ମୋର ନୁହେଁ - ଏହା ୧୪୦ କୋଟି ଭାରତୀୟଙ୍କ ପ୍ରତି ଶ୍ରଦ୍ଧାଞ୍ଜଳି। ଏହା ଭାରତ ଏବଂ ସାଇପ୍ରସ ମଧ୍ୟରେ ସ୍ଥାୟୀ ବନ୍ଧୁତାର ପ୍ରତୀକ। ମୁଁ ପୁଣି ଥରେ ଏହି ସମ୍ମାନ ପାଇଁ ମୋର ଆନ୍ତରିକ ଧନ୍ୟବାଦ ଜଣାଉଛି ।

ବନ୍ଧୁଗଣ,

ଆମେ ସାଇପ୍ରସ ସହିତ ଆମର ସମ୍ପର୍କକୁ ବହୁତ ଗୁରୁତ୍ୱ ଦେଉଛୁ । ଗଣତନ୍ତ୍ର ଏବଂ ଆଇନର ଶାସନ ଭଳି ମୂଲ୍ୟବୋଧ ପ୍ରତି ଆମର ମିଳିତ ପ୍ରତିବଦ୍ଧତା ଆମ ସହଭାଗୀତାର ଦୃଢ଼ ମୂଳଦୁଆ ସ୍ଥାପନ କରେ। ଭାରତ ଏବଂ ସାଇପ୍ରସ ମଧ୍ୟରେ ବନ୍ଧୁତା ପରିସ୍ଥିତିରୁ ଉଭା ହୋଇନାହିଁ କିମ୍ବା ଏହା ସୀମା ଦ୍ୱାରା ମଧ୍ୟ ସୀମିତ ନୁହେଁ ।

ଏହା ବାରମ୍ବାର ସମୟର ପରୀକ୍ଷାରେ ଉତ୍ତୀର୍ଣ୍ଣ ହୋଇଛି। ପ୍ରତ୍ୟେକ ଯୁଗରେ, ଆମେ ସହଯୋଗ, ସମ୍ମାନ ଏବଂ ପାରସ୍ପରିକ ସମର୍ଥନର ଭାବନାକୁ ବଜାୟ ରଖିଛୁ। ଆମେ ପରସ୍ପରର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ ସମ୍ମାନ କରୁ।

ବନ୍ଧୁଗଣ,

ଏହା ହେଉଛି ଦୁଇ ଦଶନ୍ଧିରୁ ଅଧିକ ସମୟ ମଧ୍ୟରେ ଜଣେ ଭାରତୀୟ ପ୍ରଧାନମନ୍ତ୍ରୀଙ୍କ ଦ୍ୱାରା ସାଇପ୍ରସକୁ ପ୍ରଥମ ଥର ପାଇଁ କରାଯାଇଥିବା ଗସ୍ତ । ଏହା ଆମର ଦ୍ୱିପାକ୍ଷିକ ସମ୍ପର୍କରେ ଏକ ନୂତନ ଅଧ୍ୟାୟ ଲେଖିବାର ଏକ ସୁବର୍ଣ୍ଣ ସୁଯୋଗ ପ୍ରଦାନ କରେ। ଆଜି, ମାନନୀୟ ରାଷ୍ଟ୍ରପତି ଏବଂ ମୁଁ ଆମର ସହଭାଗୀତାର ସମସ୍ତ ଦିଗ ଉପରେ ବ୍ୟାପକ ଆଲୋଚନା କରିଛୁ।

ସାଇପ୍ରସର "ଭିଜନ ୨୦୩୫" ଏବଂ "ବିକଶିତ ଭାରତ ୨୦୪୭"ର ଆମର ଦୃଷ୍ଟିକୋଣ ମଧ୍ୟରେ ଅନେକ ସାମଞ୍ଜସ୍ୟ ରହିଛି । ତେଣୁ, ଆମେ ଆମର ସହଭାଗୀ ଭବିଷ୍ୟତକୁ ଗଢ଼ି ତୋଳିବା ପାଇଁ ଏକାଠି କାମ କରିବୁ। ଆମର ସହଭାଗୀତାକୁ ରଣନୈତିକ ଦିଗ ପ୍ରଦାନ କରିବା ପାଇଁ, ଆମେ ଆଗାମୀ ପାଞ୍ଚ ବର୍ଷ ପାଇଁ ଏକ ସ୍ଥାୟୀ କାର୍ଯ୍ୟଖସଡ଼ା ବିକଶିତ କରିବୁ।

ଆମର ପ୍ରତିରକ୍ଷା ଏବଂ ସୁରକ୍ଷା ସହଯୋଗକୁ ଆହୁରି ମଝବୁତ କରିବା ପାଇଁ, ଦ୍ୱିପାକ୍ଷିକ ପ୍ରତିରକ୍ଷା ସହଯୋଗ କାର୍ଯ୍ୟକ୍ରମ ପ୍ରତିରକ୍ଷା ଶିଳ୍ପ ସହଯୋଗ ଉପରେ ଧ୍ୟାନ ଦେବ। ସାଇବର ଏବଂ ସାମୁଦ୍ରିକ ସୁରକ୍ଷା ଉପରେ ପୃଥକ ଆଲୋଚନା ଆରମ୍ଭ କରାଯିବ ।

ସୀମାପାର ଆତଙ୍କବାଦ ବିରୁଦ୍ଧରେ ଭାରତର ଲଢ଼େଇକୁ ନିରନ୍ତର ସମର୍ଥନ ପାଇଁ ଆମେ ସାଇପ୍ରସ ପ୍ରତି ଗଭୀର କୃତଜ୍ଞ। ଆତଙ୍କବାଦ, ନିଶାଦ୍ରବ୍ୟ ଚାଲାଣ ଏବଂ ଅସ୍ତ୍ରଶସ୍ତ୍ର ଚୋରାଚାଲାଣର ମୁକାବିଲା ପାଇଁ, ଆମର ସମ୍ପୃକ୍ତ ଏଜେନ୍ସିଗୁଡ଼ିକ ମଧ୍ୟରେ ରିଅଲ-ଟାଇମ୍‌ ସୂଚନା ଆଦାନପ୍ରଦାନ ପାଇଁ ଏକ ଯନ୍ତ୍ର ସ୍ଥାପନ କରାଯିବ। ଆମେ ଉଭୟ ସହମତ ଯେ ଦ୍ୱିପାକ୍ଷିକ ବାଣିଜ୍ୟ ଏବଂ ନିବେଶକୁ ବୃଦ୍ଧି କରିବାରେ ଅପାର ସମ୍ଭାବନା ରହିଛି ।

ଗତକାଲି, ମାନନୀୟ ରାଷ୍ଟ୍ରପତିଙ୍କ ସହ ମୋର ଆଲୋଚନା ସମୟରେ, ମୁଁ ଆମର ଆର୍ଥିକ ସମ୍ପର୍କ ସମ୍ବନ୍ଧରେ ବ୍ୟବସାୟିକ ସମ୍ପ୍ରଦାୟ ମଧ୍ୟରେ ବହୁତ ଉତ୍ସାହ ଏବଂ ସମନ୍ୱୟ ଅନୁଭବ କରିଥିଲି। ଆମେ ବର୍ଷ ଶେଷ ସୁଦ୍ଧା ଏକ ପାରସ୍ପରିକ ଲାଭଦାୟକ ଭାରତ-ୟୁରୋପୀୟ ସଂଘ ମୁକ୍ତ ବାଣିଜ୍ୟ ଚୁକ୍ତିନାମା ସମାପ୍ତ କରିବା ପାଇଁ କାର୍ଯ୍ୟ କରୁଛୁ।

ଏହି ବର୍ଷ, "ଭାରତ-ସାଇପ୍ରସ-ଗ୍ରୀସ୍ ବ୍ୟବସାୟ ଏବଂ ନିବେଶ ପରିଷଦ" ମଧ୍ୟ ଆରମ୍ଭ ହୋଇଛି। ଏହିପରି ପଦକ୍ଷେପ ଆମ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ଏବଂ ନିବେଶକୁ ବୃଦ୍ଧି କରିବ।

ଆମେ ପ୍ରଯୁକ୍ତିବିଦ୍ୟା, ନବସୃଜନ, ସ୍ୱାସ୍ଥ୍ୟ, କୃଷି, ନବୀକରଣୀୟ ଶକ୍ତି ଏବଂ ଜଳବାୟୁ ଆଇନ ଭଳି କ୍ଷେତ୍ରରେ ସହଯୋଗ ବିସ୍ତାର କରିବା ଉପରେ ବିସ୍ତୃତ ଆଲୋଚନା ମଧ୍ୟ କରିଥିଲୁ। ସାଇପ୍ରସରେ ଯୋଗ ଏବଂ ଆୟୁର୍ବେଦର ବର୍ଦ୍ଧିତ ଲୋକପ୍ରିୟତା ଦ୍ୱାରା ଆମେ ଉତ୍ସାହିତ।

ଭାରତୀୟ ପର୍ଯ୍ୟଟକଙ୍କ ପାଇଁ ମଧ୍ୟ ସାଇପ୍ରସ ଏକ ପସନ୍ଦଯୋଗ୍ୟ ଗନ୍ତବ୍ୟସ୍ଥଳ। ସେମାନଙ୍କ ଯାତ୍ରାକୁ ସହଜ କରିବା ପାଇଁ ଆମେ ସିଧାସଳଖ ବିମାନ ସଂଯୋଗ ସ୍ଥାପନ କରିବା ଦିଗରେ କାର୍ଯ୍ୟ କରିବୁ। ଆମେ ଏକ ଗତିଶୀଳତା ଚୁକ୍ତିନାମାକୁ ତ୍ୱରାନ୍ୱିତ କରିବାକୁ ସଂକଳ୍ପ ନେଇଛୁ।

ବନ୍ଧୁଗଣ,

ୟୁରୋପୀୟ ସଂଘ ମଧ୍ୟରେ, ସାଇପ୍ରସ୍ ଆମର ବିଶ୍ୱସ୍ତ ସହଯୋଗୀ। ଆମେ ଆସନ୍ତା ବର୍ଷ ସାଇପ୍ରସର ୟୁରୋପୀୟ ସଂଘର ରାଷ୍ଟ୍ରପତି ପଦ ପାଇଁ ଶୁଭେଚ୍ଛା ଜଣାଉଛୁ। ଆମେ ନିଶ୍ଚିତ ଯେ ଆପଣଙ୍କ ନେତୃତ୍ୱରେ, ଭାରତ-ୟୁରୋପୀୟ ସଂଘ ସମ୍ପର୍କ ନୂତନ ଶିଖରରେ ପହଞ୍ଚିବ।

ଉଭୟ ରାଷ୍ଟ୍ର ମିଳିତ ଜାତିସଂଘକୁ ଅଧିକ ପ୍ରତିନିଧିତ୍ୱପୂର୍ଣ୍ଣ କରିବା ପାଇଁ ଏହାକୁ ସଂସ୍କାର କରିବାର ଆବଶ୍ୟକତା ଉପରେ ସମାନ ମତ ରଖିଛନ୍ତି। ଜାତିସଂଘ ସୁରକ୍ଷା ପରିଷଦରେ ସ୍ଥାୟୀ ସଦସ୍ୟତା ପାଇଁ ଭାରତର ଦାବିକୁ ସମର୍ଥନ କରିବା ପାଇଁ ଆମେ ସାଇପ୍ରସ ପ୍ରତି କୃତଜ୍ଞ।

ଆମେ ପଶ୍ଚିମ ଏସିଆ ଏବଂ ୟୁରୋପରେ ଚାଲିଥିବା ବିବାଦ ଉପରେ ଚିନ୍ତା ପ୍ରକଟ କରିଛୁ। ଏହି ବିବାଦର ପ୍ରତିକୂଳ ପ୍ରଭାବ କେବଳ ସେମାନଙ୍କ ନିଜ ନିଜ ଅଞ୍ଚଳ ପର୍ଯ୍ୟନ୍ତ ସୀମିତ ନୁହେଁ। ଆମେ ଉଭୟ ସହମତ ଯେ ଏହା ଯୁଦ୍ଧର ଯୁଗ ନୁହେଁ।

ଆଲୋଚନା ଏବଂ ସ୍ଥିରତା ପୁନରୁଦ୍ଧାର ମାନବତାର ଆହ୍ୱାନ। ଆମେ ଭୂମଧ୍ୟସାଗରୀୟ କ୍ଷେତ୍ର ସହିତ ସଂଯୋଗ ବୃଦ୍ଧି କରିବା ଉପରେ ମଧ୍ୟ ଆଲୋଚନା କରିଛୁ। ଆମେ ସହମତ ଯେ ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡର ଏହି ଅଞ୍ଚଳରେ ଶାନ୍ତି ଏବଂ ସମୃଦ୍ଧିର ପଥ ପ୍ରଶସ୍ତ କରିବ।

ମାନନୀୟ ରାଷ୍ଟ୍ରପତି,

ମୁଁ ଆପଣଙ୍କୁ ଭାରତ ଗସ୍ତ ପାଇଁ ଏକ ସୌହାର୍ଦ୍ଦ୍ୟପୂର୍ଣ୍ଣ ନିମନ୍ତ୍ରଣ ଦେଉଛି। ମୁଁ ଆପଣଙ୍କୁ ଶୀଘ୍ର ଭାରତରେ ସ୍ୱାଗତ କରିବାର ସୁଯୋଗ ପାଇଁ ଅପେକ୍ଷା କରୁଛି।

ଆଉଥରେ, ଏହି ଅନନ୍ୟ ଆତିଥ୍ୟ ଏବଂ ସମ୍ମାନ ପାଇଁ ମୁଁ ଆପଣଙ୍କୁ ଆନ୍ତରିକ ଭାବରେ ଧନ୍ୟବାଦ ଜଣାଉଛି।

ସ୍ୱିକାରୋକ୍ତି : ଏହା ପ୍ରଧାନମନ୍ତ୍ରୀଙ୍କ ଭାଷଣର ଆନୁମାନିକ ଅନୁବାଦ। ମୂଳ ଭାଷଣ ହିନ୍ଦୀରେ ଦିଆଯାଇଥିଲା।

*****

MT