వ్యవసాయ రంగంలో సాధించిన పురోగతిని సమీక్షించేందుకు కేంద్ర వ్యవసాయం, రైతు సంక్షేమం, గ్రామీణాభివృద్ధి మంత్రి శ్రీ శివరాజ్ సింగ్ అధ్యక్షతన ఈ రోజు ఉన్నతస్థాయి సమావేశం జరిగింది. ఖరీఫ్ పంట పరిస్థితులు, రబీ నాట్ల సన్నద్ధత, వరద ప్రభావిత ప్రాంతాల్లో పంటల పరిస్థితి, ధరల స్థితిగతులు, ఎరువుల లభ్యత, రిజర్వాయర్లలో నీటిమట్టాల స్థాయులకు సంబంధించి ఈ సమావేశంలో సమగ్రంగా చర్చించారు. అలాగే సంబంధిత అధికారులకు అవసరమైన ఆదేశాలను సైతం కేంద్ర మంత్రి జారీ చేశారు.

గతేడాదితో పోలిస్తే ఖరీఫ్ పంటల సాగు విస్తీర్ణం 6.51 లక్షల హెక్టార్లు పెరిగిందని అధికారులు తెలియజేశారు. మొత్తం సాగు విస్తీర్ణం 1,121.46 లక్షల హెక్టార్లకు చేరుకుంది. ఇది 2024–25లో 1,114.95 లక్షల హెక్టార్లుగా ఉంది. గతేడాదితో పోలిస్తే ప్రధాన పంటలైన గోధుమ, వరి, జొన్న, చెరకు, పప్పు ధాన్యాల సాగు రికార్డు స్థాయిలో పెరిగిందని వివరించారు. మినుము సాగు విస్తీర్ణం 2024–25లో 22.87 లక్షల హెక్టార్ల నుంచి 2025–26లో 24.37 లక్షలకు అంటే 1.50 లక్షల హెక్టార్ల మేర పెరిగింది.

వరద ప్రభావిత ప్రాంతాల్లో పరిస్థితిని సైతం కేంద్ర మంత్రి సమీక్షించారు. కొన్ని రాష్ట్రాల్లో వరదలు, కొండచరియలు విరిగి పడిన ప్రభావిత జిల్లాలను శ్రీ చౌహాన్ ఇటీవల సందర్శించారు. అధిక వర్షపాతం కారణంగా కొన్ని ప్రాంతాల్లో పంటలు దెబ్బలు తిన్నప్పటికీ, మరికొన్ని ప్రాంతాలు రుతుపవనాల కారణంగా లబ్ధి పొందాయని, ఫలితంగా రబీ నాట్లు, మొత్తం దిగుబడిని పెంచేలా పంట వస్తుందని అంచనా వేస్తున్నట్లు తెలియజేశారు.

టొమాటో, ఉల్లి సాగు ప్రక్రియ సజావుగా సాగుతోందని అధికారులు తెలియజేశారు. ఉల్లిసాగు విస్తీర్ణం 2024–25లో 3.62 లక్షల హెక్టార్ల నుంచి ప్రస్తుతం 3.91 లక్షల హెక్టార్లకు పెరిగింది. అదే సమయంలో బంగాళాదుంప సాగు 0.35 లక్షల హెక్టార్ల నుంచి 0.43 లక్షల హెక్టార్లకు పెరిగింది. అదేవిధంగా.. టొమాటో సాగు విస్తీర్ణం గతేడాది 1.86 లక్షల హెక్టార్ల నుంచి ఈ ఏడాది 2.37 లక్షల హెక్టార్లకు విస్తరించింది. నిర్దేశించిన లక్ష్యాలకు అనుగుణంగా బంగాళాదుంప, ఉల్లి, టొమాటో సాగు విస్తీర్ణం పెరుగుతోందని సమావేశంలో గుర్తించారు.

***