মহোদয়সকল,

বিশ্বৰ সৰ্ববৃহৎ গণতন্ত্ৰ ভাৰত আৰু ১৪০ কোটি ভাৰতীয়ৰ তৰফৰ পৰা আপোনালোক সকলোকে শুভেচ্ছা জনাইছো। মানৱ ইতিহাসৰ সৰ্ববৃহৎ নিৰ্বাচনত, শেহতীয়াকৈ জুন মাহত, ভাৰতৰ জনতাই মোক ক্ৰমাগত তৃতীয়টো কাৰ্যকালৰ বাবে তেওঁলোকৰ সেৱা কৰাৰ সুযোগ প্ৰদান কৰিছে। আৰু আজি মই আপোনালোকৰ সন্মুখত মানৱতাৰ এই এক ষষ্ঠ ভাগৰ কণ্ঠস্বৰ লৈ আহিছো।

বন্ধুসকল,

যেতিয়া আমি গোলকীয় ভৱিষ্যতৰ বিষয়ে আলোচনা কৰো, তেতিয়া আমি মানৱ কেন্দ্ৰিক দৃষ্টিভংগীক সৰ্বাধিক অগ্ৰাধিকাৰ প্ৰদান কৰিব লাগিব। বহনক্ষম বিকাশক অগ্ৰাধিকাৰ দি আমি মানৱ কল্যাণ, খাদ্য আৰু স্বাস্থ্য সুৰক্ষা নিশ্চিত কৰিব লাগিব। ভাৰতত ২৫০ মিলিয়ন লোকক দৰিদ্ৰতাৰ পৰা মুক্ত কৰি আমি দেখুৱাইছে যে বহনক্ষম বিকাশ সফল হ'ব পাৰে। আৰু আমি এই সফলতাৰ অভিজ্ঞতা সমগ্ৰ দক্ষিণ বিশ্ববাসীৰ সৈতে ভাগ বতৰা কৰিবলৈ প্ৰস্তুত।

বন্ধুসকল,

মানৱ জাতিৰ সফলতা আমাৰ সামূহিক শক্তিৰ ওপৰত নিৰ্ভৰ কৰে, যুদ্ধক্ষেত্ৰত নহয়। বিশ্ব শান্তি আৰু উন্নয়নৰ বাবে বিশ্বজনীন প্ৰতিষ্ঠানসমূহৰ সংস্কাৰ অপৰিহাৰ্য। সংস্কাৰেই প্ৰাসংগিকতাৰ চাবিকাঠি! নতুন দিল্লীৰ সন্মিলনত আফ্ৰিকান ইউনিয়নত জি-২০ৰ স্থায়ী সদস্য পদ লাভ কৰাটো এই দিশত এক গুৰুত্বপূৰ্ণ পদক্ষেপ আছিল। এফালে সন্ত্ৰাসবাদে বিশ্ব শান্তি আৰু নিৰাপত্তাৰ প্ৰতি গুৰুতৰ ভাবুকি কঢ়িয়াই আনিছে, আনফালে চাইবাৰ, সামুদ্ৰিক আৰু মহাকাশৰ দৰে ক্ষেত্ৰসমূহ সংঘৰ্ষৰ নতুন ক্ষেত্ৰ হিচাপে পৰিগণিত হৈছে। এই সকলোবোৰ বিষয়ত মই গুৰুত্ব দিব বিচাৰো যে বিশ্বজনীন পদক্ষেপ বিশ্বজনীন উচ্চাকাংক্ষাৰ সৈতে মিলিব লাগিব।

বন্ধুসকল,

প্ৰযুক্তিৰ সুৰক্ষিত আৰু দায়িত্বশীল ব্যৱহাৰৰ বাবে সুষম নিয়ন্ত্ৰণৰ প্ৰয়োজন আছে। আমাক বিশ্বব্যাপী ডিজিটেল প্ৰশাসনৰ প্ৰয়োজন, যিয়ে ৰাষ্ট্ৰীয় সাৰ্বভৌমত্ব আৰু অখণ্ডতা ৰক্ষা কৰে। ডিজিটেল ৰাজহুৱা আন্তঃগাঁথনি এখন সেতু হ'ব লাগে, বাধা নহয়! বৈশ্বিক কল্যাণৰ বাবে, ভাৰতে সমগ্ৰ বিশ্বৰ সৈতে ডিজিটেল ৰাজহুৱা আন্তঃগাঁথনি বিনিময় কৰিবলৈ সাজু হৈছে।

বন্ধুসকল,

ভাৰতৰ বাবে "এক পৃথিৱী, এক পৰিয়াল, এক ভৱিষ্যৎ" এক প্ৰতিশ্ৰুতি। এই প্ৰতিশ্ৰুতি আমাৰ 'এক পৃথিৱী, এক স্বাস্থ্য' আৰু 'এক সূৰ্য, এক বিশ্ব, এক গ্ৰীড'ৰ দৰে প্ৰচেষ্টাত প্ৰতিফলিত হৈছে। সমগ্ৰ মানৱতাৰ অধিকাৰ সুৰক্ষিত কৰাৰ বাবে আৰু বিশ্বৰ সমৃদ্ধিৰ বাবে ভাৰতে চিন্তা, কথা আৰু কৰ্মত কাম কৰি যাব।

বহুত ধন্যবাদ।

MJPS/VJ/SR/VK