ইকায়খুম্নরবা প্রধান মন্ত্রী কৈর ষ্টারমর, রিজার্ব বেঙ্ক ওফ ইন্দিয়াগী গভর্নর, ইন্নোবেতরশিং, লুচিংবশিং অমসুং ফিনতেক তাইবংগী ইনভেষ্টরশিং, ইবেম্মাশিং অমসুং ইবুংঙোশিং! ময়াম পুম্নমক মুম্বাইদা তরাম্না ওকচরি!

মরুপশিং,

ঐনা অরোইবা ওইনা থৌরম অসি শরুক য়াবা মতমদা, ২০২৪ গী মীখল পাংথোক্ত্রি। নুমিৎ অদুদা ঐনা হায়খি মদুদি থৌরম অসিগী মথংগী ইদিসন্দা ঐ অমুক হল্লক্কনি অমসুং মতম অদুদা অদোম ময়াম্না হৌনা থাগৎপা ফোঙদোকখি। মতম অদুদা রাজনিতিগী অখঙ-অহৈশিংনা “মোদী হল্লক্কনি” হায়না মাঙজৌননা ফোঙদোকখ্রবনি।

মরুপশিং,

মু্ম্বাই অসি ইনর্জি, ললোন-ইতিক অমসুং মপান নাইদ্রবা খুদোংচাবশিংগী সহরনি। ঐনা ঐগী মরুপ, প্রধান মন্ত্রী কৈর ষ্টারমর মুম্বাইদা তরাম্না ওক্লি। মহাক্না গ্লোবেল ফিনতেক ফেষ্টিবেল শরুক য়াবগীদমক ঐনা তৌবীমল খঙবা উৎলি।

মরুপশিং,

চহি মঙাগী মমাংদা, গ্লোবেল ফিনতেক ফেষ্টিবেল হৌদোকখিবা মতমদা মালেম অসি লাইচৎ অমা মায়োক্নখি। ঙসিদি ফেষ্টিবেল অসি শেন-থুমগী অনৌবা থবকশিং অমসুং মতেং পাংনবগী মালেমগী ফম্বাক অমা ওইরে। চহি অসিদা য়ু.কে পার্তনর লৈবাক অমা ওইনা শরুক য়ারি অমসুং গনতন্ত্র চৎপা লৈবাক অনিগী মরক্ত পুন্না থবক তৌমিন্নবনা মখা তানা মালেমগী শেন-থুমগী ফিবম ফগৎহনগনি। থৌরম মফমদা অফবা অমসুং পুক্নিং থৌগৎনিঙাই ওইবা ফিবম উবা অসি শিংথানিঙাইনি। মসিদা ভারতকী শেন-থুম অমসুং চাউখৎপদা মালেম্না থম্লিবা থাজবা অদু মমি তারে। থৌরম অসি মাইপাক্না পাংথোকপগীদমক প্রধান মন্ত্রীনা কৃস গোপালকৃষ্ণন জি, রিজার্ব বেঙ্ক ওফ ইন্দিয়াগী গভর্নর সঞ্জয় মলহোত্রা জি, অশীন-অরাং তৌরিবশিং অমসুং শরুক য়ারিবশিং ঐনা থাগৎপা ফোঙদোকচরি।

মরুপশিং,

ভারত গনতন্ত্রগী মমানি। ঐখোয়না গনতন্ত্রগী মরমদা খন্নরকপা মতমদা গনতন্ত্র অসি মীখলশিং নত্ত্রগা থৌশিল শেম্বা খক্তদা ওইদে। ভারতনা গনতন্ত্রগী ৱাখল্লোন অসি লৈবাক অসিগী লৈঙাক-সাসনগী মপাঙ্গল কনবা য়ুম্বী অমা ওইহল্লে। মসিগী গনতন্ত্রগী ৱাখল্লোন অসিগী ময়েক লারবা খুদম অমা তেক্নোলোজিনা ওইরে। মালেম্না মতম শাংনা তেক্নোলোজিগী খেন্নবগী মতাংদা খন্নরিঙৈদা, মতম অমদা ভারতসু ফিবম শোকখি- হৌখিবা চহি ১০ হেনবা অসিদা ভারতনা মাইপাক্না তেক্নোলোজি মীয়ামগী ওইহল্লে। হৌখিবা চহি ১০ দা, ভারতনা তেক্নোলোজি মীওই খুদিংমক্ত ফংহল্লে, ঙসিগী ভারত মালেমদা খুন্নাইগী কাংলুপ খুদিংমক তেক্নোলোজি য়াম্না শীজিন্নবশিংগী মনুংদা য়াওরে।

মরুপশিং,

ঐখোয়না দিজিতেল তেক্নোলোজি মীয়ামগী ওইহল্লে, মীওই খুদিংমক অমসুং লৈবাক্কী মফম খুদিংমক্ত মসি ফংহল্লে। মসি হৌজিক অফবা লৈঙাক্কী ভারতকী নমুনা ওইরে। নমুনা অসিদা, মীয়ামগী য়াইফনবা সরকারনা দিজিতেল ইনফ্রাষ্ট্রকচর শেমগৎলে অমসুং প্লেতফোর্ম অদুদা লনাই কাংবুনা অনৌবা পোৎথোকশিং পুথোক্লে। তেক্নোলোজি অসি খুদোংচানবা খুৎলায় অমা খক নতনা, মসি থোং মান্নবা পুরক্নবা পাম্বৈ অমসুনি হায়বা ভারতনা উৎলে।

মরুপশিং,

মীওই খুদিংমক কোনশিনবা ভারতকী থৌওং অসিনা বেঙ্কগী থবকশিংদা অওনবা পুরক্লে। মতম অমদা ইনাকখুনবশিং খক্তগী ওইরম্বা বেঙ্কগী থবক, দিজিতেল তেক্নোলোজিনা মসি মীয়ামগী ফিবম ফগৎনবা পাম্বৈ অমা ওন্থোক্লে। ভারত্ত দিজিতেল পেমেন্তশিং নুমিৎ খুদিংগী পাংথোকপা থবক ওইরে, মসিনা জাম ত্রিনিত- জন ধন, আধার অমসুং মোবাইল মাইপাকহল্লে। য়ু.পি.আই ত্রান্সসেক্সনশিং য়েংবীয়ু! থা খুদিংগী লুপা করোর লাখ ২৫ গী য়ু.পি.আই ত্রান্সসেক্সন বিল্লিয়ন ২০ পাংথোক্লে। মালেমগী ওইনা খুদক্ত দিজিতেল ত্রান্সসেক্সন ১০০ পাংথোকপদা, ৫০ ভারত্ত পাংথোক্লি।

মরুপশিং,

চহি অসিগী গ্লোবেল ফিনতেক ফেষ্টিবেলগী থিমনা ভারতকী গনতন্ত্রগী গুনশিং মাঙলোমদা পুখৎলে অমসুং মপাঙ্গল কনখৎহল্লে।

মরুপশিং,

ভারতকী দিজিতেল ষ্টেক মালেম শীনবা থুংনা খন্ন-নৈনরে। য়ু.পি.আই, আধার ইনেবল পেমেন্ত সিষ্টেম, ভারত বিল পেমেন্ত সিষ্টেম, ভারত-ক্বিউ.আর, দিজিলোক্কর, দিজিযাত্রা অমসুং গভর্নমেন্ত ই-মার্কেতপ্লেস (জি ই এম) গুম্বা মরুওইবা মচাকশিং ভারতকী দিজিতেল ইকোনোমিগী য়াংলেন শরু ওইরে। ইন্দিয়া ষ্টেক হৌজিক অনৌবা ওপন ইকোসিষ্টেম অমা ওইরকপদা অপেনবা ফাওই। মখোয়না লৈবাক শীনবা থুংবগী কৈথেলশিংগা শম্নবা ঙমদুনা, ওপন নেতৱার্ক ফোর দিজিতেল কম্মর্স (ও এন দি সি) অসি অপীকপা দুকান ফম্বশিং অমসুং এম.এস.এম.ইশিংগীদমক বর অমা ওইরে। ওপেন ক্রেদিদ ইনেবলমেন্ত নেতৱার্কনা অপীকপা ওন্ত্রেপ্রেন্যুরশিংনা শেন্থং ফংবদা লাইহল্লে অমসুং এম.এস.এম.ইশিংনা শেন্থং ফংদবগী খুদোংচাদবশিং কোকহল্লে। আর.বি.আইনা পায়খৎলিবা দিজিতেল করেন্সিগী থবক অসিনা অফবা ফলশিং পুরক্কনি হায়না ঐনা থাজৈ। থবকশিং অসিনা শীজিন্নদনা লৈরিবা ভারতকী খুদোংচাবশিং লৈবাক অসি চাউখৎনবা শাফু অমা ওইহনগনি।

মরুপশিং,

ইন্দিয়া ষ্টেক অসি ভারত খক্তগী মাইপাকপা নত্তে। ঐগী অকোনবগী খোঙচত্ত ঐ অমুক হল্লকখিনি হায়না ঐনা হায়রমখি অমসুং ঐ হৌজিক হল্লক্লে। হৌজিক ইন্দিয়া ষ্টেক অসি গ্লোবেল সাউথকী লৈবাকশিং য়াওনা মালেমগী থাজবগী মৈরা অমা ওইরে। লৈবাক অসিগী দিজিতেলগী অনৌবা থবকশিংগী খুৎথাংদা, মালেমগী ওইনা দিজিতেল মতেং পাংনবা হেনগৎহন্নবা ভারতনা পান্দম থম্লি। মরম অদুনা মালেমগী য়াইফনবা ভারতনা মসিগী হৈথোই-শিংথোইবা অমসুং ওপন-সোর্স প্লেতফোর্ম অনিমক পীথোক্লি। ভারত্ত মোদুলার ওপন-সোর্স আইদেন্তিতি প্লেতফোর্ম (এম ও এস আই পি) শেমগৎলে, মখোয় মশাগী মনিংতম্বা দিজিতেল আইদেন্তিতি সিষ্টেমশিং শেমগৎনবা লৈবাক ২৫ হেন্নবা মসি শীজিন্নরে। ভারতনা তেক্নোলোজি পীথোকপা খক নত্তনা মসি চাউখৎনবা অতোপ্পা লৈবাকশিংগী মতেং পাংলি। মসি দিজিতেলগী মতেং পাংবা নত্তে, মসি মসি দিজিতেল ইম্পৱারমেন্তনি।                             

মরুপশিং,

ভারতকী ফিনতেক্কী মীওইশিং থাগৎপা ফোঙদোকচরি, ঐখোয়গী শ্বাদেসিগী পোৎথোকশিং মালেম্না পাম্নবা হেনগৎলক্লি। মফম খুদিংমক্ত শীজিন্নবা য়াবা ক্বিউ.আর নেতৱার্কশিং, ওপন কম্মর্স অমসুং ওপন ফাইনান্স ফ্রেমৱার্কশিং অসি ভারতকী ষ্টার্দঅপশিংনা পুথোকপা মরুওইবা হিরমশিং ওইনা মালেম্না খঙনরে। চহি অসিগী অহানবা থা তরুক্ত, ভারত মালেমদা খ্বাইদগী শেন থাদবা ফিনতেক ইকোসিষ্টেমশিং অহুমগী মনুংদা য়াওরে। অদোমগা মরী লৈনবা মাইপাকপশিং অসিগী মরমদা ঐনা ৱা ঙাংলি।

মরুপশিং,

ভারতকী মপাঙ্গল অসি পাক-চাউবা খক নত্তে। খুদিংমক কোনশিনবা, অৱাবা মায়োক্নবা ঙম্বা অমসুং তুংকোইনা চৎনবা য়াগদবা থবকশিং পুনশিনবা অসিসু য়াওরি। মীচং মীখাই নাইনা ৱারেপ লৌবা হন্থহন্নবা, নমথাক তৌবা মশক খঙদোক্নবা অমসুং তোঙান তোঙানবা থবকশিং ফগৎহনবদা এ.আইনা মরুওইবা থৌদাং লৌরি। মসিগী কান্নবা অসি লৌনবা, দেতা, স্কিলশিং অমসুং লৈঙাক্ত পুন্না শেন থাদবা দরকার ওইরে।

মরুপশিং,

আইগী লমদা, ভারতকী থৌওং অসি মরুওইবা ফিদম অহুমদা য়ুম্ফম ওইরি- মীওই খুদিংমক ফংহনবা, অপুনবা মীশিং স্কিল লৈহনবা অমসুং দাইত্ব লৈনা শীজিন্নবা। ইন্দিয়া-এ.আই মিসনগী মখাদা, ইন্নোবেতরশিং অমসুং ষ্টার্দঅপশিং কান্নবশিং মমল হোংনা অমসুং লাইনা ফংনবা সরকারনা অৱাংবা থাক্কী কম্পুতিং কেপাসিতি শেমগৎলি। লোল খুদিংমক অমসুং খুঙ্গং খুদিংমক এ.আইগী কান্নবশিং ফংনবা থবক পায়খৎলি। থবক অসিদা ভারতকী সেন্তরস ওফ এক্সলেন্স, স্কিল হবশিং অমসুং লৈবাক অসিদা শাজবা এ.আই মোদেলশিংনা পাংথোক্লি।

মরুপশিং,

নিয়ম চুম্না এ.আই শীজিন্ননবা মালেমগী ঙাক্লৌ অমা শেম্নবা ভারতনা মতম পুম্নমক্ত শৌগৎলি। দিজিতেল পব্লিক ইনফ্রাষ্ট্রকচরগী ভারতনা খঙলিবা অমসুং মসি তম্নবা পুক্কৈ অসি মালেমগী ওইনা য়াম্না কান্নগনি। দিজিতেল পব্লিক ইনফ্রাষ্ট্রকচরদা ভারতনা চৎলিবা লম্বী অসি লৈবাক অসিনা এ.আইদা চঙশিল্লিবা অসিগা মান্নৈ। ঐখোয়গী ওইনা, এ.আই হায়বদি ওল ইনক্লুসিপ হায়বনি।

মরুপশিং,

ঙসিদি, এ.আইগী থাজবা অমসুং অশোই-অঙাম থোক্তনবা নিয়মশিংগী মালেম্না মরৈ য়েৎনরিঙৈদা, ভারতনা মাঙজৌননা থাজবগী মরোল অমা শেমগৎলে। ভারতকী এ.আই মিসন অসি দেতা শীজিন্নবা অমসুং অরোন-অথুপ লৈনবগী থবকশিং য়াওরে। ইন্নোবেতরশিংনা অপুনবা এপ্লিকেসনশিং শেমগৎনবা প্লেতফোর্মশিং শেমগৎনবা ভারতকী অপাম্বা লৈরি। পেমেন্তশিংদা ভারতনা খোঙজেল অমসুং থাজবা মরুওইনা লৌরি; ক্রেদিদ পীবদা, অয়াবা পীবা অমসুং মমল হোংহনবদা মীৎয়েং থম্লি; ইন্সুরেন্সতা, অফবা থৌশিলশিং অমসুং মতম চানা ক্লেমশিং পীথোকপদা পান্দমশিং থম্লি; অমসুং শেন থাদবদা, লাইনা ফংহনবা অমসুং অরোন-অথুপ লৈহন্দবগী পান্দম থম্লি। অওনবশিং অসি পুরকপদা এ.আইনা শাফু ওইগনি। মসিগীদমক, মীয়ামগী য়েংলগা এ.আই এপ্লিকেসনশিং দিজাইন তৌগদবনি। অরানবশিং য়াম্না থুনা চুমথোক্কনি হায়বগী থাজবা অহানবা ওইনা দিজিতেল ফাইনান্স শীজিন্নরিবশিংদা থাজবা লৈহনগদবনি। মসিগী থাজবা অসিনা, মখা তানা দিজিতেল ইনক্লসন অমসুং থবকশিংদা থাজবা হেনগৎহনগনি।

মরুপশিং,

চহি খরগী মমাঙদা য়ু.কেদা এ.আই সেফতি সম্মিৎ পাংথোকখ্রে অমসুং মথং চহিদা ভারত্ত এ.আই ইম্পেক্ত সম্মিৎ পাংথোক্কনি। অশোই-অঙাম থোক্তনবা য়ু.কেদা ৱারি শানখিবগা লোয়ননা, কান্নবগী মতাংদা হৌজিক ভারত্ত ৱারি শানরগনি। মালেমগী ললোন-ইতিক্ত অনিমক কান্নবা ফংবা পুন্না থবক তৌমিন্নবগী নমুনা অমা ভারত অমসুং য়ু.কেনা মালেমদা উৎলে অমসুং মখোয়না এ.আই অমসুং ফিনতেক্ত পুন্না থবক তৌমিন্নবনা মসিগী ৱাখল্লোন অসি মখা তানা চাউখৎহনগনি। য়ু.কেগী থিজিনবা অমসুং মালেমগী শেন-থুমগী লৌশিং অমসুং ভারতকী পাক-চাউবা অমসুং লৌশিং লৈবা অসি পুন্দুনা মালেমগীদমক খুদোংচাবশিংগী অনৌবা থোঙশিং হাংদোকপা ঙমগনি। ষ্টার্দঅপশিং, মহৈলোয়শঙশিং অমসুং ইন্নোবেসন হবশিংগী মরক্ত পুন্না থবক তৌমিন্ননবা অমুক হন্না থাজবা পীনরে। য়ু.কে-ইন্দিয়া ফিনতেক কোরিদোরনা পাইলোত অমসুং অনৌবা ষ্টার্দঅপশিংদা খুদোংচাবশিং পীগনি অমসুং লন্দন ষ্টোক একচেঞ্জ অমসুং গিফ সিতিগী মরক্ত মতেং পাংনবা হেনগৎনবা লম্বীসু শেমগনি। লৈবাক অনিগী মরক্ত শেন-থুমগী থবক পুনশিনবা অসিনা ফ্রি ত্রেদ এগ্রিমেন্তগী কান্নবশিং য়াম্না লৌনবা ঐখোয়গী কম্পেনিশিংগী মতেং পাংগনি।

মরুপশিং,

ঐখোয় খুদিংমক্কী অচৌবা থৌদাং অমা লৈরি। ফম্বাক অসিদগী, য়ু.কে য়াওনা মালেমগী লৈবাক খুদিংমক প্লেতোফর্ম অসিদা শরুক য়ানবা ঐনা খঙহল্লি। ভারতকী চাউখৎপগা লোয়ননা চৎমিন্ননবা ইনভেষ্টর খুদিংমক শরুক য়ানবা ঐনা হায়জরি। তেক্নোলোজিনা মীয়াম অমসুং গ্রহ অনিমক ফগৎহনবা ফিনতেক্কী মালেম অমা শেম্বা ঐখোয়না দরকার ওইরি। ইন্নোবেসনগী পান্দম অসি চাউখৎপা খক্তগী ওইরোইদবনি, অফবা থবক পাংথোক্নবসু ওইগদবনি অমসুং ফাইনান্স অসি মশিং খক্তগী ওইরোইদবনি, মীওইবগী চাউখৎনবগী ওইগদবনি। মসিগা লোয়ননা, মীয়ামদা ঐগী য়াইফ পাউজেল পীজরি অমসুং আর.বি.আই থাগৎপা ফোঙদোকচরি। অদোম থাগৎচরি!

***