য়োর এক্সিলেন্সী, রাস্ত্রপতি বোরিক,

লৈবাক অনিমক্কী দেলিগেৎশিং,

মীদিয়াদগী লাক্লিবা মরুপশিং,

খুরুমজরি! হোলা!

মসি রাস্ত্রপতি বোরিক্কী ভারত্তা লাকপা অহানবা খোঙচৎনি। ভারতকী মাইকৈদা মহাক্কী মরুপ ওইবগী অচেৎপা ৱাখল্লোন অমসুং ঐখোয়গী মরী অসি মপাঙ্গল কনখৎহন্নবগী মহাক্কী অচেৎপা ফিরেপ অসি তশেংনা শিংথানিংঙাইনি। মসিগীদমক্তা ঐহাক্না মহাকপু থম্মোয় শেংনা থাগৎপা ফোংদোকচরি অমসুং মহাক্কা লোয়ননা লাক্লিবা মশক নাইবা মীহুৎ কাংবুবু তরাম্না ওকচরি।

মরুপশিং,

চিলী অসি ভারতকী লেতিন অমেরিকাদা লৈবা মরু ওইবা মরুপ অমসুং পার্তনর লৈবাক অমনি। ঙসি ঐখোয়গী খন্ন-নৈনবদা, লাক্কদৌরিবা দিকেদ অসিদা ঐখোয়গী কোওপরেসনবু হেন্না মপাঙ্গল কনখৎহন্নবা ঐখোয়না অনৌবা খোঙথাং কয়া অমা মশক খঙদোক্লে।

ঐখোয়না ম্যুচুএল ত্রেদ অমসুং ইনভেস্তমেন্ত পাকথোক চাউথোকহনবদা নুংঙাইবা ফোংদোকচরি অমসুং মখা তানা পুন্না থবক তৌমিন্ননবগী অপুনবা পোতেন্সিএল লৈ হায়না ঐখোয়না য়ানরে। ঙসি ঐখোয়না ঐখোয়গী তীমশিংদা নাকল অনিমক্কী কান্নগদবা কম্প্রিহেন্সিব ইকোনোমিক পার্তনরশিপ এগ্রীমেন্ত অমগী মতাংদা খন্ন-নৈনবগী থবক হৌনবা খঙহনখ্রে।

ক্রিতিকেল মিনরেল্সকী লমদা পার্তনরশিপশিংদা অহেনবা মীৎয়েং থমগনি। রেসিলিয়েন্ত সপ্লাই অমসুং ভেল্যু চেনশিং লিংখৎনবা হোৎনগনি। লৌউ-শিংউগী লমদা, ঐখোয়না অমনা অমগী মপাঙ্গলশিং শীজিন্নদুনা ফুদ সেক্যুরিতী হেনগৎহন্নবগীদমক পুন্না থবক তৌমিন্নগনি।

দিজিতেল পব্লিক ইনফ্রাস্ত্রকচর, রিন্যুএবল ইনর্জী, রেলৱেজ, স্পেস অমসুং অতোপ্পা হিরমশিংদা ভারতনা মহাক্কী পোজিতিব ওইবা এক্সপরিয়েন্সশিং অসি চিলীগা লোয়ননা শরুক য়ামিন্ননবা শেম-শারি।

ঐখোয়না চিলীবু এন্তার্ক্তিকাগী গেৎৱে ওইনা উরি। মরুওইবা লমদম অসিদা মতেং পীনবা হেনগৎহন্নবা লেতর ওফ ইনতেন্তকী মতাংদা ঙসিগী য়ানবা অসি ঐখোয়না তরাম্না ওক্লি।

ভারত অসি চিলীগী হেল্থ সেক্যুরিতীদা মতেং পাংবদা থাজবা য়াবা পার্তনর অমা ওইরি অমসুং ঐখোয়না মসিগী কোলাবোরেসন অসি মখা তানা মপাঙ্গল কনখৎহন্নবা য়ানরে। মশা-মউ ফবা পুন্সি মহিং অমগী শরুক অমা ওইনা চিলীগী মীয়াম্না য়োগবু লৌশিনখিবা অসি নুংঙাইবা অমনি। নবেম্বর ৪বু চিলীদা নেস্নেল য়োগ নুমিৎ ওইনা লাউথোকখিবা অসি তশেংনা পুক্নিং থৌগৎনিংঙাইনি। ঐখোয়না চিলীদা আয়ুর্বেদ অমসুং ত্রেদিস্নেল মেদিসিনদা তেংবাং পীনবা হেনগৎহন্নবগী খুদোংচাবশিংসু খন্নখি।

ঙাকশেলগী লমদা মতেং পীনবা হেনগৎলকপা অসি ঐখোয়গী অচেৎপা অমগা অমগা থাজবগী খুদম অমনি। হীরম অসিদা, ঐখোয়না অমনা অমগী মথৌ তাবশিংগী মতুং ইন্না দিফেন্স ইন্দস্ত্রীএল মেন্যুফেকচরিং অমসুং সপ্লাই চেনশিং শেমগৎনবা মাংলোমদা চংশিনগনি। ঐখোয়না লৈবাক ওর্গানাইজ ক্রাইম, দ্রগ ত্রাফিকিং অমসুং তেরোরিজমগুম্বা মান্নবা শিংনবশিং মায়োক্নবা ঙম্নবা লৈবাক অনিগী এজেন্সীশিংগী মরক্তা তেংবাং পীনবা হেনগৎহল্লগনি।

মালেমগী ওইনা, ভারত অমসুং চিলীনা য়ানখি মদুদি তেনসন অমসুং ৱাথোক পুম্নমক দাইলোগকী থোংদা লোইশিন্নগদবনি। মালেমগী ওইবা শিংনবশিং থেংননবা, য়ুনাইতেদ নেসন্স সেক্যুরিতী কাউন্সিল অমসুং অতোপ্পা ইন্সতিত্যুসনশিং শেমদোকপগী তঙাইফদবা লৈ হায়না ঐখোয়না অমত্তা ওইনা হায়রি। ঐখোয়না পুন্না মালেমগী শান্তি অমসুং তংদু লৈতাবা পুরকপদা মতেং পাংগনি।

মরুপশিং,

ভারত অমসুং চিলী অসি মালেমগী মেপকী তোঙান-তোঙানবা শরুকশিংদা লৈরবসু, অচৌবা সমুদ্রশিংনা খায়দোক্লবসু, ঐখোয়না অখন্নবা মহৌশাগী মান্নবা খরদি লৈরি।

ভারতকী হিমালয় অমসুং চিলীগী এন্দিস মাউন্তেনশিংনা চহি লিশিং কয়াগী মমাংদগী লৈবাক অনি অসিগী পুন্সি মহিং শেমদুনা লাক্লি। ভারত মহাসাগরগী ঈথকশিং অসিনা ভারত্তা চপ মান্নবা ইনর্জীগা লোয়ননা চেনবা অসিগুম্না পসিফিক মহাসাগরগী ঈথকশিংনা চিলিগী সমুদ্র তোর্বানশিংদা শোকলি। লৈবাক অনিমক অসি মহৌশাগী মওং মতৌনা শম্নবতা নত্তনা ঐখোয়গী চৎনবীশিং অসিসু অমগা অমগী মরক্তা নকশিন্নৈ।

অথোইবা চিলীয়ন কবি অমসুং নোবেল লোরিয়েত “গেব্রিয়েলা মিস্ত্রাল”না রবীন্দ্রনাথ তেগোর অমসুং ঔরোবিন্দো ঘোশকী ৱাখল্লোনশিংদা ইথিল ফংখি। চপ মান্ননা, চিলীগী লিতরেচর অসি ভারত্তসু থাগৎপা ফোংদোক্লি। ভারতকী ফিল্মশিং, চিঞ্জাক অমসুং ক্লাসিকেল জগোইশিংগীদমক চিলীগী মীয়ামগী মরক্তা হেনগৎলক্লিবা অপাম্বা অসি ঐখোয়গী কলচরেল বোন্দশিংগী হিংলিবা খুদম অমনি।

ঙসিদি, ভারত মচাগী মীওই লিশিং মরিরোম্না, মখোয়না চিলীবু মখোয়গী য়ুমনি হায়না লৌই, মখোয়না ঐখোয়গী শেয়র হেরিতেজ অসিগী ঙাক্লৌনি। ঐহাক্না রাস্ত্রপতি রোরিক অমসুং মহাক্কী সরকারবু মখোয়গী কেয়র অমসুং মতেং পাংবীবগীদমক থাগৎপা ফোংদোকচরি।

লৈবাক অনিগী মরক্তা কলচরেল একচেঞ্জ প্রোগ্রামগী মতাংদা ঙসি য়ানখিবা অদু ঐখোয়না তরাম্না ওক্লি। ঐখোয়না লৈবাক অনিগী মরক্তা ভিসাগী থৌওং লাইথোকহনবগী মতাংদসু খন্নখি। ঐখোয়না ভারত অমসুং চিলীগী মরক্তা মহৈরোইশিংগী মরক্তা এক্সচেঞ্জ হেনগৎহন্নবা মখা তানা থবক তৌগনি।

এক্সিলেন্সী,

অদোমগী খোংচৎ অসিনা ঐখোয়গী মরীশিংদা অনৌবা ইনর্জী অমসুং থৌনা হাপ্পী। মসিগী ইনর্জী অসিনা ঐখোয়গী বাইলেতরেল রিলেসনশিং অমসুং লেতিন অমেরিকাগী লমদম পুম্বদা ঐখোয়গী কোওপরেসনদা অনৌবা শাহৌ অমসুং মায়োল পীগনি।

অদোমগী ভারতকী খোঙচৎ অমসুং মফম অসিদা লৈবা অসি নুংঙাইবা ওইরসনু।

হন্না-হন্না থাগৎচরি।

গ্রেসিয়স!

খঙহঞ্জবা – মসি প্রধান মন্ত্রীগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***