عزت مآب، صدر بورک،

دونوں ممالک کے مندوبین،

میڈیا کے دوستو،

نمسکار! ہولا!

یہ صدر بورک کا ہندوستان کا پہلا دورہ ہے۔ ہندوستان کے تئیں ان کی دوستی کا مضبوط احساس اور ہمارے تعلقات کو مضبوط بنانے کا ان کا عزم واقعی حیرت انگیز ہے۔ اس کے لیے میں ان کو تہہ دل سے مبارکباد پیش کرتا ہوں اور ان کا اور ان کے معزز وفد کا پرتپاک استقبال کرتا ہوں۔

دوستو،

چلی لاطینی امریکہ میں ہندوستان کے لیے ایک قابل قدر دوست اور شراکت دار ملک ہے۔ آج کی ہماری بات چیت میں، ہم نے آنے والی دہائی میں اپنے تعاون کو مزید مضبوط بنانے کے لیے کئی نئے اقدامات کی نشاندہی کی۔

ہم باہمی تجارت اور سرمایہ کاری میں توسیع کا خیرمقدم کرتے ہیں اور ہم اس بات سے اتفاق کرتے ہیں کہ مزید تعاون کے لیے کافی امکانات موجود ہیں۔ آج، ہم نے اپنی ٹیموں کو ہدایت دی ہے کہ وہ باہمی طور پر فائدہ مند جامع اقتصادی شراکت داری کے معاہدے پر بات چیت شروع کریں۔

اہم معدنیات کے شعبے میں شراکت داری پر زور دیا جائے گا۔ لچکدار سپلائی اور ویلیو چین قائم کرنے کی کوشش کی جائے گی۔ زراعت میں، ہم ایک دوسرے کی طاقتوں کا فائدہ اٹھاتے ہوئے خوراک کی یقینی فراہمی کو بڑھانے کے لیے تعاون کریں گے۔

ہندوستان ڈیجیٹل پبلک انفراسٹرکچر، قابل تجدید توانائی، ریلوے، خلائی اور دیگر متعدد شعبوں میں چلی کے ساتھ اپنا مثبت تجربہ مشترک کرنے کے لیے تیار ہے۔

ہم چلی کو انٹارکٹیکا کے گیٹ وے کے طور پر دیکھتے ہیں۔ ہم اس اہم خطہ میں تعاون کو مضبوط بنانے کے لیے لیٹر آف انٹینٹ پر آج کے معاہدے کا خیرمقدم کرتے ہیں۔

چلی کی صحت کی حفاظت میں مدد کرنے میں ہندوستان ایک قابل اعتماد پارٹنر رہا ہے اور ہم نے اس تعاون کو مزید مضبوط کرنے پر اتفاق کیا ہے۔ یہ خوشی کی بات ہے کہ چلی کے لوگوں نے یوگا کو صحت مند طرز زندگی کے حصے کے طور پر اپنایا ہے۔ چلی میں 4 نومبر کو قومی یوگا ڈے کے طور پر منانے کا اعلان واقعی متاثر کن ہے۔ ہم نے چلی میں آیوروید اور روایتی ادویات میں تعاون بڑھانے کے مواقع بھی تلاش کئے۔

دفاع کے شعبے میں تعاون میں اضافہ ہمارے گہرے باہمی اعتماد کی علامت ہے۔ اس علاقے میں، ہم ایک دوسرے کی ضروریات کے مطابق دفاعی صنعتی مینوفیکچرنگ اور سپلائی چین بنانے کے لیے آگے بڑھیں گے۔ ہم منظم جرائم، منشیات کی اسمگلنگ اور دہشت گردی جیسے مشترکہ چیلنجوں کا مقابلہ کرنے کے لیے دونوں ممالک کی ایجنسیوں کے درمیان تعاون کو بڑھائیں گے۔

عالمی سطح پر بھارت اور چلی اس بات پر متفق ہیں کہ تمام تناؤ اور تنازعات کو بات چیت کے ذریعے حل کیا جانا چاہیے۔ ہم اس بات پر متفق ہیں کہ عالمی چیلنجز کا مقابلہ کرنے کے لیے اقوام متحدہ کی سلامتی کونسل اور دیگر اداروں میں اصلاحات ضروری ہیں۔ ہم مل کر عالمی امن اور استحکام کے لیے اپنا کردار ادا کرتے رہیں گے۔

دوستو،

اگرچہ ہندوستان اور چلی دنیا کے نقشے کے مختلف سروں پر ہیں، جو کہ وسیع سمندروں سے الگ ہیں، پھر بھی ہم کچھ منفرد قدرتی مماثلت رکھتے ہیں۔

ہندوستان کے ہمالیہ اور چلی کے اینڈیز پہاڑوں نے دونوں ممالک میں ہزاروں سالوں سے زندگی کے انداز کو تشکیل دیا ہے۔ بحر ہند کی لہریں اسی توانائی کے ساتھ ہندوستان میں بہتی ہیں جس سے بحرالکاہل کی لہریں چلی کے ساحلوں کو چھوتی ہیں۔ دونوں ممالک نہ صرف فطرت سے جڑے ہوئے ہیں بلکہ ہماری ثقافتیں بھی اس تنوع کو اپناتے ہوئے ایک دوسرے کے قریب رہی ہیں۔

چلی کے عظیم شاعر اور نوبل انعام یافتہ ‘‘گیبریلا مِسٹرل’’ نے رابندر ناتھ ٹیگور اور اروبندو گھوش کے خیالات میں تحریک پائی۔ اسی طرح چلی کے ادب کو ہندوستان میں بھی سراہا گیا ہے۔ چلی کے لوگوں میں ہندوستانی فلموں، کھانوں اور کلاسیکی رقصوں کی طرف بڑھتی ہوئی دلچسپی ہمارے ثقافتی رشتوں کی زندہ مثال ہے۔

آج، ہندوستانی نژاد تقریباً چار ہزار لوگ، جو چلی کو اپنا گھر سمجھتے ہیں، ہمارے مشترکہ ورثے کے محافظ ہیں۔ میں صدر بورک اور ان کی حکومت کا ان کی دیکھ بھال اور حمایت کے لیے تہہ دل سے شکریہ ادا کرتا ہوں۔

ہم دونوں ممالک کے درمیان ثقافتی تبادلے کے پروگرام پر آج ہونے والے اتفاق رائے کا خیرمقدم کرتے ہیں۔ ہم نے دونوں ممالک کے درمیان ویزا کے عمل کو آسان بنانے پر بھی بات کی۔ ہم ہندوستان اور چلی کے درمیان طلبہ کے تبادلے کو بڑھانے کے لیے کام جاری رکھیں گے۔

عالی مرتبت،

آپ کے دورے سے ہمارے تعلقات میں نئی ​​توانائی اور ولولہ آیا ہے۔ یہ توانائی ہمارے دو طرفہ تعلقات کے ساتھ ساتھ لاطینی امریکہ کے پورے خطے میں ہمارے تعاون کو نئی تحریک اور سمت دے گی۔

میری خواہش ہے کہ ہندوستان کا آپ کا سفر اور یہاں قیام خوشگوار ہو۔

آپ کا بہت بہت شکریہ!

شکریہ!

اعتذار نامہ- یہ وزیر اعظم کے ریمارکس کا  ترجمہ ہے۔ اصل ریمارکس ہندی میں دیے گئے۔

*******

ش ح۔م ع۔ن ع

 (U: 9305)