খুদোল তম্লিবা – হৌজিক মুখ্যমন্ত্রী মহিলা রোজগার য়োজনা (চীফ মিনিস্তর্স ৱুমেন এমপ্লোইমেন্ত স্কীম)গী বেনিফিসরীশিংনা মখোয়না থেংনরকপা, মখোয়দা ফাওবা ৱাফমশিং থম্বিগনি। অহানবদা ঐহাক্না ৱেস্ত চম্পরন দিস্ত্রিক্ততগী রঞ্জিতা কাজি দীদীগী মফমদা মহাক্কী ৱাফম থম্বিনবা হায়জরি।

বেনিফিসরী (রঞ্জিতা কাজি) – ইকায়খুম্নরবা প্রধান মন্ত্রী ইবুং অমদি ইকায়খুম্নরবা মুখ্য মন্ত্রী ইবুংগী মফমদা ঐহাক্না নোল্লকপগা লোয়ননা য়াইফ পাউজেল পীজরি। ঐগী মিং রঞ্জিতা কাজি কৌই। ঐহাক ৱেস্ত চম্পরন দিস্ত্রিক্তকী বগাহা-২ ব্লোক্কী বাল্মিকি উমংগী মফমদগীনি। ঐহাক ত্রাইবেল ফুরুপকীনি অমসুং জীবিকা সেল্ফ হেল্প গ্রুপতা য়াওজবনি। ঐখোয়গী লম উমংগী লম্নি। ঐখোয়গী মফমদুদা লম্বী, মৈ, ঈশিং, তোইলেত, অমদি মহৈ মশিংগী খুদোংচাবা ফংগনি হায়বা ঐ কৈদৌঙৈদসু থাজরুদে। অদুবু ঙসিদি, হায়রিবা খুদোংচাবা পুম্নমকসি ফংলে। মসিগীদমক ঐহাক্না ইকায়খুম্নরবা মুখ্য মন্ত্রী ইবুংগী মফমদা থাগৎচবা ফোঙদোকচরি। অদোম্না নুপী ঐখোয়গীদমক থবক কয়া তৌবিরি। অদোম্না নুপীশিংগী রিজর্বেসনগী খুদোংচাবা থম্বিদুনা ঙসিদি নুপী মশিং হেন্না লৈঙাক্কী থবক তৌবা অমদি পঞ্চায়তি রাজ ইন্সতিত্যুসনশিংদা উবা ফংলে। অদোম্না সাইকল স্কীম অমসুং য়ুনিফোর্ম স্কীম হৌদোকপিখ্রে। নুপীমচাশিংনা সাইকল তোংলগা য়ুনিফোর্ম শেৎলগা মহৈ লোয়শঙদা চৎপা উবদা য়াম্না নুংঙাই। ইকায়খুম্নরবা প্রধান মন্ত্রী ইবুং, অদোম্না পায়খৎপিবা উজ্জ্বল স্কীমগী মখাদা, হৌজিক্তি নুপীশিংনা মমল হোংনা গ্যাস সিলিন্দর ফংলে। মসিনা মরম ওইরগা, নুপী ঐখোয়না মৈখু মরক্তা চাক থোংনদ্রে। অদোম্না মখোয়গী হকশেল ফনবা হোৎনবিরি। অদোমগী থৌজালগা লোয়ননা, ঙসিদি ঐখোয়না অৱাস য়োজনানা মরম ওইরগা ইশাগী ওইবা য়ুমদা লৈবা ফংজরে। ইকায়খুম্নরবা মুখ্য মন্ত্রী ইবুং, হন্দক্তা অদোম্না মৈ য়ুনিৎ ১২৫ লেম্না পীবিখি অমদি পেন্সনসু লুপা ৪০০ দগী লুপা ১১০০ দা হেনগৎপিরে। মসিনা মখা তানা নুপীশিংদা থাজবা হেনগৎহল্লে। মুখ্যমন্ত্রী মহিলা রোজগার য়োজনাগী মখাদা নুপীশিংগী একাউন্ততা হাপ্পিরিবা লুপা লাখ অনিগা লিশিং তরাগী শেনফম অসিনা ঐখোয়বু য়াম্না হরাওহল্লে, ঐহাকসু হরাওই। লুপা ১০,০০০ দু ঐগী একাউন্ততা লাকপা মতমদা, ঐনা শেনফম অদুনা পম্প সেত অমা লৈগনি, মরমদি ঐ লৌউ-শিংউ তৌজবা মীশক্নি। ঐহাক্না জোৱার অমসুং বাজ্রা থাগনি। মদুগী তুংদা লুপা লাখ ২ দু ঐগী একাউন্ততা লাক্লবা মতমদা ঐহাক্না জোৱার অমসুং বাজ্রাগী অতাগী করবার অমা হৌদোক্কনি। মসিনা স্বদেসীগী ৱাখল্লোনবুসু য়োকখৎকনি। করিগুম্বা অদোম্না মতৌ অসুম্না লেপ্তনা মতেং পাংবিরবদি ঐখোয় থবক ফংবা হেনগৎলক্কনি, ঐখোয় খুমাঙ চাওশিল্লক্কনি, অমদি ঐখোয় ‘লাখপতি দীদী’ ওইরক্কনি। ঐখোয়গী ইচেল ইনাওশিং হৌজিক য়াম্না হরাওই। নবরাত্রি কুমহৈগা লোয়ননা মখোয়না মুখ্যমন্ত্রী মহিলা রোজগার য়োজনাবু কুমহৈ অমা ওইনা পাঙথোক্লি। ৱেস্ত চম্পরনগী ইচে ইনাওশিংগী মায়কৈদগী ঐহাক্না ইকায়খুম্নরবা প্রধান মন্ত্রী ইবুং অমদি ইকায়খুম্নরবা মুখ্যমন্ত্রী ইবুংগী মফমদা থম্মোয়নুংদগী থাগৎপা ফোঙদোকচরি। অদোমবু থাগৎচরি।

খুদোং তম্লিবা – থাগৎচরি ইচে। হৌজিক অমুক ঐহাক্না ভোজপুর দিস্ত্রিক্ততগী রিতা দেবীগী মফমদা মহাক্কী ৱাফম থম্বিনবা হায়জরি।

বেনিফিসরী (রিতা দেবী) – ঐহাক্না ইকায়খুম্নরবা প্রধান মন্ত্রী ইইবুং অমদি ইকায়খুম্নরবা মুখ্য মন্ত্রী ইবুংগী মফমদা অরা দিস্ত্রিক্ত পুম্বগী মায়কৈদগী ইকায়খুম্নবগা লোয়ননা য়াইফ পাউজেল পীজরি। ঐগী মিং রিতা দেবী হাতে কৌই। ঐহাক অরা দিস্ত্রিক্তকী দৌলতপুর পঞ্চায়ত, কোইলা পুলিস স্তেসনগী মনুং চন্না লৈবা মোহম্মদপুর খুঙ্গংদগীনি। ইং ২০১৫ দা ঐহাক সেল্ফ হেল্প গ্রুপ অমগী মেম্বর ওইখি। মেম্বর অমা ওইরবা মতুংদা, ঐহাক্না অহানবগী ইন্সতোলমেন্ত লুপা ৫০০০ না হামেং মরি লৈখি অমদি হামেং লোইদুনা পুন্সি হিংনবা লম্বী শেম্বা হৌখি। ঐনা শেল তানবা হৌরকপা মীৎকুপ্তগী, ঐনা য়েন ৫০ লৈদুনা য়েরুমগী করবার হৌদোকখি। ঐখোয়না য়েরুম অমদা লুপা ১৫ দা য়োল্লি অদুগা য়েরুমশিংদুসু ঙাগী উপু অমদা মৈ থান্দুনা মচা ওলহন্দুনা ঐগী ইমুংগী শেল-থুমগী ফীভম ফনা য়াম্না ফগৎলকখি। ইবুং, ঐ লাখপতি দীদী অমদি দ্রোন দীদীসু ওইরে। ঐগী ফীভম ফগৎলক্লিববা অসি শিংথানিংঙাইনি। অমুক্কা হন্না অরা দিস্ত্রিক্তকী নুপীশিংগী মায়কৈদগী ঐহাক্না অমুক্কা হন্না ইকায়খুম্নরবা প্রধান মন্ত্রী ইবুং. অমদি ইকায়খুম্নরবা মুখ্য মন্ত্রী ইবুংবু থাগৎচরি। মুখ্যমন্ত্রী মহিলা রোজগার য়োজনা হৌদোকখিবদগী খুঙ্গং অমদি কৈরোয় লৈকায়দা মথুম মরাং হৌনরে। নুপীশিং হরাওবনা খম থেংলে। ইচে খরদি শন লৈরে, হামেং লৈরে হায়, খরনা খুজিগী দুকান হাংদোক্নরে। ঐগী ওইনসু, অহানবা ইন্সতোলমেন্তকী লুপা ১০০০০ গী শেনফম লাকপদা, ঐহাক্না য়েন ১০০ অমগসু লৈশিল্লে, মরমদি নিংথমথা চঙলকপগা য়েরুমগী দিমান্দসু হেনগৎলক্লি। ঐনা য়েন ১০০ লৈশিন্দুনা ঐূগী করবার মখা চত্থরি। লুপা লাখ ২ দু লাকপা মতমদদি ঐহাক্না মেচিন য়াওবা পোল্ত্রী ফশর্ম অমা শেমগত্তুনা ঐগী করবার পাকথোক চাউথোকহনগনি অমদি ঐগী পুন্সি হিংনবগী ল্বী ফগৎহনগনি। লৈঙাক্কী স্কীমশিংনা ঐখোয়গী পুন্সিদা চাউনা অহোংবা পুরক্লে ইবুং। খুদম ওইনা, মমাঙদা ঐখোয় লৈবাক্না শাবা য়ুমদা লৈরম্মি, মদুনা নোংজু মতমদা য়ুই, অদুবু হৌজিক্তি ঐখোয়গী খুঙ্গং পুম্বা প্রধান মন্ত্রী অৱাস য়োজনাগী মখাদা মশা মশাগী য়ুম অমমম লৈজরে অমদি য়ুমশিংদুদা হরাও তয়াম্না লৈনরি। তোইলেতকী মতাঙদা হায়রবসু ঐখোয় মমাঙদদি লমহাংদা খোঙ হাম্বা থোকপদা য়াম্না ইকায়রম্মি, অদুবু হৌজিক্তি খুঙ্গংদা লৈবা য়ুমথোঙ খুদিংদা তোইলেত অমমম লৈনরে, নুপী অমত্তা লমহাংদা থোক্নদ্রে। নল জে জল স্কীম হৌদোকখিবদগী, ঐখোয়না খুঙ্গংদা থক্নবা অশেংবা ঈশিং ফংলে, অমদি মসিনা ঐখোয়বু লায়না কয়াদগী মনিং তমহল্লে। ইবুং, ঐখোয়না উজ্জ্বল গ্যাস স্কীমগী মখাদা গ্যাস কন্নেক্সন ফংলকপদগী ঐখোয়না চাক থোংবদা মৈখু খুবা লৈরং শীজিন্নখিদ্রে। মমাঙদা, লৈরঙদগী থোক্লকপা মৈখুনা মীৎ থুপ্লম্বনি। হৌজিক্তি ঐখোয় গ্যাসতা চাক থোংলে অমদি য়াম্না নুংঙাইরে। অয়ুস্মান হেল্থ কার্দকী খুত্থাঙদা ঐখোয়না লুপা লাখ ৫ ফাওবগী লেম্না লায়েংবা ফংলে। শেল অমত্তা তিংদ্রে। লুপা লাখ ৫ ফাওবগী লায়েংবদা লেম্না লায়েংবা ফংলে। ঐখোয়না মৈ য়ুনিৎ ১২৫ লেম্না ফংবা হৌরকপদগী মফম খুদিং মৈনা পুমঙান ঙাল্লে। মমাঙদদি ঐখোয় অমম্বা মরক্তা লৈরম্বনি। মমাঙদদি ঐখোয়না অঙাংশিংদা মৈ থুনা মুত্থৎনবা হায়রম্মি, অদুবু হৌজিক্তি মখোয়না চিংনবা লৈতনা লাইরিক ঔরাইজবা ঙম্লে। মখোয়না মৈঙালদুদা হরাওনা লাইরিক তৌনরে। খ্বায়দগী মরুওইবা ৱাফমদি নুপীশিংনা স্কীমশিং অসিদগী কান্নবা ফংলকপা মতমদা, মখোয়গী অঙাংশিংসু কান্নবা ফংলি। মমাঙদা ইচেশিংনা খোঙনা শাংনা চৎনরম্মি, হৌজিক্তি মখোগী অঙাংশিংনা সাইকলদা মহৈ লোয়শঙদা চৎলে। অঙাংশিংনা য়ুনিফোর্ম শেত্তুনা সাইকল তোংদুনা চৎনরে। অঙাং পুম্নমক্না চপ মান্নবা য়ুনিফোর্ম শেৎলগা লম্বীদা সাইকল থৌমিন্নবা উবদা য়াম্ন নুংঙাই। ঐহাকসু স্কুল তম্লিঙৈদা সাইকল অমগা য়ুনিফোর্ম অমগা ফংখি। ঐগী য়ুনিফোর্ম শেৎলগা ঐগী সাইকল তোংলগা স্কুল চৎপদি অখন্নবা মহাও অমনি। মরম অদুননি, অরা দিস্ত্রিক্ত পুম্বগী মহুৎ শিল্লগা, ঐগী ইচে ইনা অমদি নুপী পুম্নমক্কী মহুৎ শিল্লগা, ঐহাক্না ইকায়খুম্নরবা প্রধান মন্ত্রী ইবুং অমদি দিতিস ইবুংগী মফমদা থম্মোয়নুংদগী থাগৎপা ফোঙদোকচরিবা অমদি মপুনা থৌজানবিসনু হায়না থৌনিজরিবা। (দিসক্লেমর – অরা দিস্ত্রিক্ততগী বেনিফিসরী রিতা দেবীনা মহাক্কী ৱাখল্লোন লমদমদুগী লোলদা ফোঙদোকখিবনি, ৱাফমদু ইংলিস্তা হন্দোকপনি।

প্রধান মন্ত্রী – রিতা দীদী, অদোম য়াম্না থুনা ৱা ঙাংই! অদোম্না স্কীম পুম্নমক্কী মমিংসু পনবিখ্রে। অদোম ৱা ঙাংবা য়াম্না হৈ, অদোম্না পুম্নমক শুগাইনা থমবিখ্রে। অদোম লাইরিক কয়া য়াম্না তম্বিহৌরে, রিতা দীদী?

বেনিফিসরী (রিতা দেবী) – ইবুং, জীবিকা (সেল্ফ হেল্প গ্রুপ) য়াওরবা মতুংদা ঐহাক লাইরিক তম্বা হৌখি। ঐনা মেত্রিক লোইরগা, অদুদগী ইন্তরমেদিএত লোইরগা B.A. লোইশিনখি। হৌজিক ঐহাক্না M.A. দা মিং চনশিঞ্জরে।

প্রধান মন্ত্রী – ওহ, ফৈনে!

বেনিফিসরী (রিতা দেবী) – হৌজিক ঐ জীবিকাগী খুত্থাঙদা তমজবনি। ইবুং মমাঙদদি ঐ লাইরিক তম্লমদে।

প্রধান মন্ত্রী – ফরে, অদোম য়াইফবতা ওইসনু!

বেনিফিসরী (রিতা দেবী) – ইবুং, ইচে ইনাও পুম্নমক্কী মায়কৈদগী অদোমগীদমক থৌনিজরি।

খুদোল তম্লিবা – থাগৎচরি,  রিতা দেবী দীদী. হৌজিক ঐহাক্না গয়া দিস্ত্রক্ততগী নুরজহান খাতুন দীদীবু মহাক্কী ওইবা ৱাফম খরা ফোঙদোকপিনবা নোল্লুকচরি।

বেনিফিসরী (নুরজহান খাতুন) – ইকায়খুম্নরবা প্রধান মন্ত্রী ইবুং অমদি ইকায়খুম্নরবা মুখ্য মন্ত্রী ইবুংগী মফমদা ইকায়খুম্নবগা লোয়ননা য়াইফ পাউজেল পীজরি। ঐগী মিং নুরজহান খাতুন কৌই। ঐহাক গয়া দিস্ত্রিক্তকী বোধ গয়াগী ঝিকাতিয়া ব্লোক্কী ঝিকাতিয়া খুঙ্গংদগীনি। ঐহাক গুলাব জী বিকাস সেল্ফ-হেল্প গ্রুপকী প্রেসিদেন্তনি। অহানবমক্তদা, ঐখোয়না ঐখোয় খুদিংমক হিংনবগী লম্বী শেম্নবগীদমক অহানবা ইন্সতোলমেন্তকী ওইনা লুপা ১০,০০০ ফংগনি তাবদা মীপুম খুদিংমক হরাওনখি। য়ুম-য়ুমদা, কৈরোয় লৈকায়দা, খুঙ্গং পুম্বদা মথুম মরাং হৌনখি। নুপীশিং মচি মচি তাশিন্দুনা মখোয়না পামজবা থবক থৌরমশিং পায়খচবা ঙম্লগনি খন্নরম্মি। মফম খুদিং হরাও নুংঙাইবগী নুংশিৎ অমা শিৎখি। ঐহাক্নাা অহানবা ইন্সতোলমেন্তকী লুপা ১০,০০০ ফংলকপা মতমদা ঐগী ফি তুফম দুকান মমাঙদা খিন্নবা অচৌবা কাউন্তর অমা শেম্নবা থৌরাং তৌরি। ঐনা মদুদা পোৎশিংদু থম্লগা য়োনগনি। ঐ হান্নদগী ফি তুবগী দুকান অমা হাংদুনা লৈ। মমাঙদা ঐগী ইপুরোইবনা মপান্দা ফি তুরম্মি, অদুবু হৌজিক্তি ঐনা মহাকপু কৌশিন্দুনা ইতৈ-ইনাউ পুন্না দুকান অদু চলাইমিন্নরি। ঐহাক্না মী ১০ সু থবক পীজরি। মখা তানা ঐনা লুপা লাখ ২ গী ইন্সতোলমেন্ত অদু ফংলবদি, ঐগী করবার মখা তানা চাউথোক্কনি, মেচিন মশিং হেন্না লৈশিন্দুনা মী ১০ অমগসু থবক পীগনি। ঐখোয়গী মুখ্য মন্ত্রী ইবুংনা মতম পুম্বদা নুপী ঐখোয়বু নীংশিংবি অমদি ঐখোয় চাওখৎনবা মতেং লেপ্তনা পাংবিনবা থবক পায়খৎপিরি। ঐনা হায়জনিংবা মরুওইবা ৱাফম অমসু লৈ। মমাঙদা ঐখোয় চাকখুমদা লেন্তর্ন নৎত্রগা পোদোন থান্নরম্মি। অদুবু মৈ য়ুনিৎ ১২৫ লেম্না পীবিবদগী ঐ হৌজিক ফাওবা বিল অমত্তা লাকত্রি। মদুদগী তুংশিলহৌবা শেনফমদুনা অঙাংগী মহৈ মশিং তম্বা অমদি তুইসন ফী থিবদা শীজিন্নরি। মমাঙদদি খ্বায়দগী লায়রবা ইমুংশিংনা বিল থিবা ঙম্লোইদবনা মৈ লৌশিন্নরমদে। ঙসিদি, য়ুমথোং ১০০%, খ্বায়দগী লায়রবা ফাওবা য়াওনা মৈ লৌশিন্নরম্লগনি হায়না ঐনা খল্লি, অমদি মখোয়গী অঙাংশিংসু বল্বকী মৈঙালদা লাইরিক পানরম্লগনি। ইবুং, মমাঙথক্তা, ঐখোয়গী সেল্ফ-হেল্প গ্রুপ লৈত্রিঙৈদা, ঐখোয় য়ুমদগী মপান ইথোক থোক্নরমদে। ঐখোয়না ময়াম পুন্না থবক তৌমিন্ননবা য়ুমদগী থোকপা মতমদা ঐখোয়দা চৈবিরম্মি করিগুম্বা মতমদা ইপুরোইবনা ফুবা ফাওবা য়াওরম্মি। কিবনা ঐখোয় মপান কয়া থোক্নরমদে। অদুবু ঙসিদি, কনাগুম্বা মীওই অমা ঐখোয়গী য়ুমদা লাকপা মতমদা ঐখোয়গী ইপুরোইইবা নৎত্রগা ইমুংগী মীওইশিংনা ঐখোয়দা হান্না হায়: “মপান্দা নঙ উনবা মী অমা লাকহৌবনি”। অদুগা ঐখোয়না উনবা থোকপা মতমদা ঐখোয়না মপান্দা থোক্তুনা থবক তৌবা অমদি হিংনবা লম্বী শেম্বা উবদা ইমুং মনুংসু হরাওজরে অমদি চাউথোকচবা পোকচরে। ঐহাক ইশামকসু থবক পীবা ঙম্বদা অমদি অতৈদা তাকপি তম্বিবা ফংবদা নুংঙাইজৈ। ঐগী ইপুরোইবা মখল খুদিংমক হৈবা ফি তুবা মীশক অমনি। ইবুং, মমাঙদদি ঐহাক্না ঐগী ইপুরোইববু ঐখোয়গী ইমুংগী অশেংবা লন্নি হায়না লৌরম্মি। অদুবু ঙসিদি ঐগী ইপুরোইবনা ফাওবা ঐবু লাখপতিনি খন্বিদুনা ঐহাকপু ঐখোয়গী ইমুংগী অশেংবা লন্নি হায়বিরে। ইবুং, ঐখোয় য়াম্না লায়ররম্বদগী হৌগৎলকপনি। ঐখোয় চরুনা কুপ্পা য়ুমদা লৈরম্মি, অদুবু ঙইিদি ঐখোয়না কোনুংগুম্না লুনা লৌজবা য়ুম অমদা হরাওনা লৈরে। গয়া দিস্ত্রিক্তকী নপীশিংগী মহুৎ শিল্্লগা ঐহাক্না প্রধান মন্ত্রী ইবুং অমদি মুখ্য মন্ত্রী ইমুংগীদমক থৌনিজরি।

প্রধান মন্ত্রী – নুরজহান দীদী, অদোম্না পুম্নমক ময়েক শেংনা তাকপিরে। ঐনা অদোমদা তৌহন্নিংবা অমখক লৈ।

বেনিফিসরী (নুরজহান খাতুন)– তাকপিয়ু, তৌজগে।

প্রধান মন্ত্রী – অদোম্না পুম্নমক নীংথিনা শন্দোক্না তাকপিরি। করিগুম্বা অদোম্না চয়োল অমদা নুমিৎ অমা কাইথোকপিরগা, মফম নৎত্রগা খুঙ্গংশিংদা চত্তুনা, ইচে ইচল ৫০-১০০ খোমজিবিরগা হায়রিবা ৱাফমশিং অসি মখোয়দা তাকপিরবদি, মখোয়গী পুন্সিদসু চাউনা পুক্নিং থৌগৎনিংঙাই ওইগনি। মরমদি অদোম্না থেংনরকপশিংদুদগী, অদোমগী থম্মোয়নুংদগী ফোঙদোকপিরকপনি, অমদি অদোমগী ইমুংগী খোঙচৎকী ৱারী ফাওবা তম্বিরি। ঐখোয়গী ইমা অমদি ইচে ইচলশিংনা অদোম্না ঙাংবা তাবা মতমদা, মখোয়দা শোয়দনা পুক্নিং থৌগৎকনি হায়না ঐনা থাজৈ। অদোম্না য়াম্না মচা খায়না হায়বিরি।। অদোমগী মফমদা নুংঙাইবা ফোঙদোকচরি, অমদি অদোমবু থাগৎচরি।

বেনিফিসরী (নুরজহান খাতুন)– হোয়, ইবুং, ঐ শোয়দনা মখোয়দা তাকচগে।

খুদোল তম্লিবা – থাগৎচরি, ইচে. হৌজিক অরোয়বদা, ঐহাক্না পুর্নিয়া দিস্ত্রিক্ততগী পুতুল দেবী ইচেবু মহাক্কী ৱাফম খরা থম্বিনববা হায়জরি।

বেনিফিসরী (পুতুল দেবী)– ইকায়খুম্নরবা প্রধান মন্ত্রী জী অমদি ইকায়খুম্নরবা মুখ্য মন্ত্রী জী অনিগী মফমদা ঐহাক্না ইকায়খুম্নবগা লোয়ননা য়াইফ পাউজেল পীজরি। ঐগী মিং পুতুল দেবী কৌই। ঐ ভবানিপুরদগীনি, অমদি ঐহাক মুস্কান সেল্ফ-হেল্প গ্রুপকী সেক্রেতরীনি। ঙসি মুখ্যমন্তত্রী মহিলা রোজগার য়োজনাগী মখশদা লুপা ১০,০০০ য়েন্থোকপিবগীদমক ঐ য়াম্না হরাওই। মমাঙদা ঐহাক লদু অমসুং বতাশে (লমদমদুগী মিথাই) য়োনবা দুকান অমা ফম্লম্মি। হৌজিক্তি ঐহাক্না তিক্কি, বলুশহি, জলেবি, অমদি বর্ফিসু শেম্লগনি। হেন্না কন্না হোৎনদুনা, ঐনা লুপা লাখ ২ গী শেনফমদু লৌগনি, মদুনা ঐগী দুকান চাউথোক্কনি অমদি অহেনবা মীশিং নেক্কনি। অদোম্না হৌদোকপিখিবা জীবিকা বেঙ্কতগী ঐহাক্না অপীকপা শেন্দোয়দা লোন লৌগনি অমদি ঐগী শেমথুমগী ফীভম কনখৎহনগনি। ইকায়খুম্নরবা প্রধান মন্ত্রী জীনা থম্বিখিবা স্বদেসীবু শৌগত্তুনা ঐহাক্না লৈবাক্কী মপাঙ্গল কনখৎহনগনি। ঐগী ইনেম্বোক্কী পেন্সন লুপা ৪০০ দগী ১১০০ দা হেনগৎলকপদা, অমদি মৈ য়ুনিৎ ১২৫ লেম্না ফংহনবিবদা এ য়াম্না নুংঙাই। ঐ হৌজিক শেল হেন্না তুংশিনবা ঙম্লগনি অমদি ঐগী অঙাংশিং মখা তানা মহৈ তমহনবা ঙম্লগনি। পুর্নিয়া দিস্ত্রিক্তকী মীয়াম পুম্বগী মায়কৈদগী, ঐহাক্না ইকায়খুম্নরবা প্রধান মন্ত্রী জী অমদি ইকায়খুম্নরবা মুখ্য মন্ত্রী জী অনিবু ঐখোয়বু ইমুং মনুংদা হরাও নুংঙাইবনা থলহনবা অসিগুম্বা স্কীম অমা পুবিরকপগীদমক থম্মোয়নুংদগী থাগৎচবা ফোঙদোকচরি। ঐহাক্না থম্মোয় শেংনা অদোমগী মফমদা ইকোক নোঞ্জরি। অদোমবু থাগৎচরি।

প্রধান মন্ত্রী – পুতুল জী, পুতুল দীদী, অদোমগী করবার হৌরবনিনা অদোম্না হৌরকপা মতমদা অদোমগী ইমুং, অদোমগী কৈরোয় লৈকায়দগী খুদোংচাদবা ফীভমশিং, অমদি খুলগী মীওইশিংগী মফমদগী অদোম্না দুকান্দা ফমদুনা লৈবা উবদা শিথবিবা কয়া থেংনবিরমগনি।

বেনিফিসরী (পুতুল দেবী) – হোয়, সর। মীপুম খুদিংমক্না ঐনা তৌবদুদা নোক্নবিরম্মি, অদুবু ঐ পুক্নিং হনখিদে। ঐনা খোঙফম চেৎনা লেপ্তুনা লদু অমদি বতাশে হৌদুনা পীক্না করবার হৌরকখি। অদুগা ঐনা জীবিকা য়াওবা মতমদা, ঐহাক্না লোন অমা লৌখি। সর মতমদুদা ঐগী য়ুম ফাওবা লৈরমদে, অদুবু লোন অদুনা ঐগী য়ুম শাখি অমদি ঐগী অঙাংবু লাইরিক তমহল্লি। ঙসিদি ঐগী অঙাংনা কতিহারদা বি তেক তম্লি। মহাক্না লৈঙাক্কী মহৈ লোয়শঙ অমদা মহাক্কী মশাগী হৈজ শিংজবনা মিং চনবা ফংজবনি।

প্রধান মন্ত্রী – ওহ, মদুদি য়াম্না ফবা ৱাফম্নি পুতুল দেবী জী। অদোম্না জলেবি পনবিখি। মতম অমদা জলেবিগী মতাঙদা রাজনিতী য়াম্না তৌনরম্বা অদোম খঙবিহৌবরা?

বেনিফিসরী (পুতুল দেবী) – হোয়, খঙজহৌই।

প্রধান মন্ত্রী – য়াম্না ফরে অদুদি, অদোমবু থাগৎচরি।

খুদোল তম্লিবা – অদোমবু থাগৎচরি ইচে। হৌজিক ঐহাক্না ইকায়খুম্নরবা প্রধান মন্ত্রী জী গী মফমদা নুপী বেনিফিসরী লাখ ৭৫ দা অমমমদা লুপা ১০,০০০ গী চাংদা কান্নবা পীগদৌরিবা মুখ্যমন্ত্রী মহিলা রোজগার য়োজনাগী মখাদা লুপা করোর ৭৫,০০০ গী শেনফম থাবিনবা রিমোত বতন অদু নম্বিনবা হঙ্গৎচরি।

***