প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা রাজস্থানগী বন্সৱারাদা লুপা করোর ১,২২,১০০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে অমসুং উরেপ-উয়ুং তমখ্রে
ঐখোয়গী সরকারনা ক্লিন ইনর্জি মিসন মীয়ামগী ইহৌ অমা ওন্থোক্লে: প্রধান মন্ত্রী
খুন্নাইগী কাংলুপ খুদিংমক নুংঙাই য়াইফনবা থবক তৌনবা ৱাখল্লোন অমগা লোয়ননা ঐখোয় থবক তৌরি: প্রধান মন্ত্রী
লৈবাকমচা তাবা অমসুং মশানা মশাবু ইকায়খুম্নবগা লোয়ননা ত্রাইবেল ফুরুপশিং হিংহনবা হায়বসি ঐখোয়গী ৱাশক্নি: প্রধান মন্ত্রী
Posted On:
25 SEP 2025 4:40PM by PIB Imphal
ঙসি প্রধান মন্ত্রী শ্রী নরেন্দ্র মোদীনা রাজস্থানগী বন্সৱারাদা লুপা করোর ১,২২,১০০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে অমসুং উরেপ-উয়ুং তমখ্রে। নবরাত্রিগী মরিনিচনবা নুমিত্ত ইমা ত্রিপুরা সুন্দরিগী শেংলবা লমদম বন্সৱারাদা লাকপদা প্রধান মন্ত্রীনা অপেনবা ফোঙদোকখি। মহাক্না হায়খি কন্থাল অমসুং ভাগাদকী গঙ্গাগুম্না শেংলবা মা মাহি উবা ফংবসি লাইবক ফবনি। মাহিগী ঈশিং অসি ভারতকী ত্রাইবেল ফুরুপশিংগী খাংবা কনবা অমসুং লান্থেংগী খুদমনি। মাহিগী শেংলবা ঈশিংনা অচৌবা থৌদোক অদুগী শাখি ওইদুনা মহায়োগী গোবিন্দ গুরু জিগী লুচিংবগী গুনশিং অসিনা মখা তানা ইথিল পীরি। প্রধান মন্ত্রী মোদীনা ইমা ত্রিপুরা সু্ন্দরি অমসুং ইমা মাহিদা ইকায়খুম্নবা উৎখি অমসুং কৎথোকপা অমসুং থৌনাগী লমদম অসিদগী, মহাক্না মহারানা প্রতাপ অমসুং রাজা বন্সিয়া ভিলদসু মহাক্না ইকায়খুম্নবা উৎখি।
প্রধান মন্ত্রীনা হায়খি মদুদি নবরাত্রি মনুংদা লৈবাক অসিনা শক্তিগী শক্লোন ৯ লাৎলি অমসুং ঙসি বন্সৱারাগী থৌরম অসি উর্জ শক্তি-মৈ পুথোকপদা কৎথোক্লে। রাজস্থানদগী ভারতকী পৱার সেক্তরগী অনৌবা পন্দুব অমা ইরে। রাজস্থান, মধ্য প্রদেস, অন্ধ্র প্রদেস, কর্নাতকা অমসুং মহারাষ্ট্রা শীনবা থুংনা লুপা করোর ৯০,০০০ হেনবগী পৱার প্রোজেকশিং হৌদোক্লে হায়না প্রধান মন্ত্রীনা লাউথোকখ্রে। মহাক্না হায়খি অসিগুম্বা অচৌবা প্রোজেকশিং মতম অমতা হৌদোকখিবা অসিদা, রাজ্যশিং মরুওইনা লৌদুনা লৈবাক অসিগী লমদম খুদিংমক্না থৱায় য়াওনা শরুক য়াদুনা, ইনর্জি সেক্তরদা ভারতনা য়াংনা চাউখৎলকপগী মমি তারে। রাজস্থান্দা ক্লিন ইনর্জি প্রোজেকশিং অমসুং ত্রান্সমিসন লাইনশিংগী উরেপ-উয়ুং তমখি। প্রধান মন্ত্রীনা সোলার ইনর্জি প্রোজেকশিংসু শঙ্গাখি অমসুং বন্সৱারদা রাজস্থান এতোমিক পৱার প্রোজেক হৌদোক্লে হায়না লাউথোকখি। সোলারদগী হৌরগা ন্যুক্লিয়ার ইনর্জি ফাওবদা, পৱার পুথোকপা ঙম্বদা ভারত অনৌবা থাকশিং য়ৌবা ঙম্লে হায়না প্রধান মন্ত্রীনা ফোঙদোকখি।
প্রধান মন্ত্রীনা হায়খি ঙসিগী তেক্নোলোজি অমসুং উদ্যোগকী যুগ অসিদা, ইলেক্ত্রিসিতিগী শক্তিনা চাউখৎহল্লি; ইলেক্ত্রিসিতিনা মঙাল, খোঙজেল, চাউখৎপা, চৎথোক-চৎশিন অমসুং মালেমগী শম্নবা ফংহল্লি। মমাংগী সরকারশিংনা ইলেক্ত্রসিতিগী মরুওইবা মীরাইখি। ২০১৪ দা মহাক্কী সরকার লাকপা মতমদা, ইমুং করোর ২.৫ মৈ ফংলমখিদে অমসুং নিংতম্বা ফংলবা চহি ৭০ গী মতুংদা ফাওবা, খুঙ্গং ১৮,০০০ ইলেক্ত্রিক পোল অমা ফাওবা উখিদে। অচৌবা সহরশিং অমসুং খুঙ্গংশিংদা মতম শাংনা মৈ মুৎখি, পুং ৪-৫ মৈ লাকপদা য়াম্না ফরে হায়না খন্নখি। মৈ লাক্তবদগী ফেক্তরশিং থবক তৌবদা অমসুং অনৌবা উদ্যোগশিং লিংখৎপদা অপনবা পীখি, রাজস্থানগুম্বা রাজ্যশিং অমসুং লৈবাক শীনবা থুংনা অকায়বা পীখি। ফিবম অসি অহোংবা পুরক্নবা ২০১৪ দা মহাক্কী সরকারনা ৱাশকখি। খুঙ্গং খুদিংদা মৈ ফংহল্লে অমসুং য়ুমথোঙ করোর ২.৫ লেম্না মৈ শম্লে। মৈগী লাইনশিং য়ৌবা মফম খুদিংমক্ত মৈ ফংহল্লে- হিংবদা লাইহল্লে অমসুং অনৌবা উদ্যোগশিং লিংখৎপা ঙম্লে।
প্রধান মন্ত্রীনা হায়খি মদুদি ২১শুবা চহিচাদা লৈবাক অমা য়াংনা চাউখৎনবগীদমক, লৈবাক অদুগী মৈ পুথোকপা হেনগৎহনগদবনি। ক্লিন ইনর্জি পুথোকপদা মাঙজিল থাবা লৈবাকশিং খ্বাইদগী মাইপাকপা লৈবাকশিং ওইগনি। ঐখোয়গী সরকারনা ক্লিন ইনর্জি মিসন মীয়ামগী ইহৌ অমা ওন্থোক্লে। পি.এম সুর্য়া ঘর মুফ বিজলি য়োজনা হৌদোক্তুনা সহর অমসুং খুঙ্গংগী মফম অনিমক্ত য়ুমথকশিংদা সোলার পেনেলশিং খিল্লে। লৌমীশিংদা অহোংবা মমলদা মৈ ফংহন্নবা, পি.এম-কুসুম স্কিমনা লৌবুকশিংদা সোলার পম্পশিং খিল্লে। ঙসি রাজ্যশিংদা সোলার প্রোজেক কয়া শঙ্গারিবা অসিনা লৌমী লাখ কয়াদা হকথেংননা কান্নবশিং পীরগনি। পি.এম সু্র্য়া ঘর স্কিমনা য়ুমশিংদা লেম্না মৈ ফংহল্লে অমসুং পি.এম-কুসুমনা লৌবুকশিংদা লেম্না মৈ ফংহল্লে। ঙাইহাক্কী মমাঙদা মহাক্না পি.এম-কুসুম স্কিমগী কান্নবা ফংলবা লৌমীশিংগা ৱারি শানবদা, সোলার পৱারদগী লেম্না মৈ ফংবদগী মখোয়গী পুন্সিদা অচৌবা কান্নবা অমা ওইরে হায়বা মহাক্কী মফমদা ফোঙদোরকখি।
প্রধান মন্ত্রীনা হায়খি বিকসিত ভারত অমা ওইনবা অয়াংবা খোঙজেলদা ভারত থবক পায়খৎলি, খোঙচৎ অসিদা রাজস্থান্না মরুওইবা থৌদাং অমা লৌরি। ঈশিং, মৈ অমসুং হকশেলগী খুদোংচাবা ফংবা হেনগৎহন্নবা পান্দমদা, রাজস্থানগী মীয়ামগীদমক লুপা করোর ৩০,০০০ রোমগী অহেনবা প্রোজেকশিং হৌদোক্লে। বন্দে ভারত সর্বিস য়াওনা অনৌবা ত্রেন অহুম প্রধান মন্ত্রীনা লমথাখ্রে। মহা্ক্না হায়খি অনৌবা থবকশিং ফংনবা লৈবাক শীনবা থুংনা পায়খৎলিবা খোঙজংগী মখাদা, ঙসি সরকারগী থবকশিংগীদমক রাজস্থান্দা নহারোল ১৫,০০০ এপোইন্তমেন্ত লেত্তরশিং ফংলে। মখোয়গী পুন্সিদা অনৌবা পন্দুব অমা হৌরবা নহারোলশিং অসিদা য়াইফ পাউজেল পীজরি অমসুং ঙসি হৌদোকখিবা চাউখৎ-থৌরাংগী থবকশিং অসিগীদমক রাজস্থানগী মীয়ামদা হরাওবা ফোঙদোকচরি।
প্রধান মন্ত্রীনা হায়খি রাজ্য অসি চাউখৎনবগীদমক রাজস্থান্দা লৈরিবা মখোয়গী সরকারনা পুকচেল শেংনা থবক পায়খৎলি। লৈবাক ঙাকপা হৈতবা অমসুং মাঙহন-তাকহন্দুনা মমাংগী সরকারশিংনা রাজস্থান্দা চৈথেং পীখিবা অদু হৌজিক পাল্লিবা সরকারনা ফহল্লে। ওপোজিসনগী লৈঙাক মখাদা, রাজস্থান পেপর লিকশিংগী মফম অমা ওইখি অমসুং শেঞ্জা-থুমজনা জল জিবন মিসন ফজনা পায়খৎখিদে। নুপীশিংগী মথক্ত চৎথবা মীওৎ-মীনৈ খম থেংখি অমসুং অরানবা তৌবা মীওইশিং ঙাক-শেনখি। ওপোজিসনগী মতমদা, বন্সৱারা, দুঙ্গারপুর অমসুং প্রতাপগরগুম্বা মফমশিংদা ক্রাইম অমসুং আইন্না য়াদনা য়ু য়োনবা হেনগৎখি। মীয়াম্না মখোয়দা খুদোংচাবা পীবদগী, লো অমসুং ওর্দর ফগৎলে অমসুং চাউখৎপগী খোঙজেল য়াংখৎলে। রাজস্থান্দা হায়ৱেশিং অমসুং এক্সপ্রেসৱেশিংগী নেতৱার্কশিং হেনগৎলকপা লোয়ননা হৌজিক অচৌবা প্রোজেকশিং পায়খৎলে। খা থংবা রাজস্থান য়াওনা, মখোয়গী সরকারনা রাজস্থান চাউখৎপগী অয়াংবা লম্বী অমদা পুদুনা চৎলি।
খুন্নাইগী খ্বাইদগী মনিংদা লৈহৌরবা মীওইগী ফিবম ফগৎহন্নবা-অন্তয়োদয়াগী ফিদম লৈবাক অসিদা শীন্নরম্বা পন্দিৎ দিনদয়াল উপধ্যায়গী ঙসি মপোক নুমিৎ অসিদা, প্রধান মন্ত্রীনা হায়খি মহাক্কী মঙলান হৌজিক সরকারগী মিসন ওইরে। লায়রবা, দিলিতশিং, তোল্লবা ফুরুপশিং অমসুং ত্রাইবেলশিংগী য়াইফনবা অচেৎপা ৱাখল্লোন অমগা লোয়নান লৈঙাক্না থবক পায়খৎলি।
ত্রাইবেল ফুরুপশিং মীরাইবা অমসুং মখোয়গী দরকার ওইবশিং খঙদবগীদমক ওপোজিসন্দা মরাল শীরদুনা, প্রধান মন্ত্রীনা হায়খি অহানবা ওইনা প্রধান মন্ত্রী শ্রী অতল বিহারি বাজপায়গী মখাদা, ত্রাইবেল এফেয়ার্সকী তোখায়বা মিনিষ্ট্রি অমা শেমদুনা, মখোয়গী সরকারনা ত্রাইবেলগী য়াইফনবা কৎথোক্লবা মিনিষ্ট্রি অমা লিংখৎলে। ওপোজিসনগী লৈঙাক মনুংদা, অসুক চাউবা প্রোজেকশিং ত্রাইবেলশিংগী লমদমশিংদা য়ৌগনি হায়বা ৱাখলদা লাম্বা ফংদে। মখোয়গী সরকারগী মখাদা হায়রিবা চাউখৎ-থৌরাংগী থবকশিং মঙফাওনরে। মধ্য প্রদেসকী ধারদা পি.এম মিত্র পার্ক অমা হৌদোক্লে অমসুং মসিনা ত্রাইবেল লৌমীশিংদা কান্নবা য়াম্না পীগনি। মখোয়গী দলনা হোৎনবদগী লায়রবা ত্রাইবেল ইমুং অমগী মচানুপী, শ্রীমতি দ্রৌপতি মুর্মু, ভারতকী রাষ্ট্রপতি ওইরে। রাষ্ট্রপতি মশামক্না ফিবম য়াম্না চাদ্রবা ত্রাইবেল ফুরুপশিংগী ৱাফম পুখৎলকখি অমসুং মসিনা ইথিল পীদুনা পি.এম জনমন য়োজনা হৌদোক্লে। স্কিম অসিগী মখাদা, ত্রাইবেল খুন্নাইগী খ্বাইদগী ফিবম চাদ্রবা কাংলুপশিংদা অখন্নবা মীৎয়েং থম্লে। ধরতি আবা জনজাতিয়া গ্রাম উতকার্স অভিয়ানগী মখাদা, ত্রাইবেল খুঙ্গংশিং মতমগা চুনবা মওংদা শেমগৎলে, ত্রাইবেল মীয়াম করোর ৫ হেনবদা কান্নবা পীরে। লৈবাক শীনবা থুংনা এক্লব্যা মোদেল রেসিদেন্সিএল স্কুল চা কয়া লিংখৎলে। উমংদা খুন্দারিবশিং অমসুং ত্রাইবেলশিংগী উমং শীজিন্নবগী হকশিং সরকারনা ইকায়খুম্নরে। ভারতকী ত্রাইবেল ফুরুপশিংনা চহি লিশিং কয়া উমংগী পোৎথোকশিং শীজিন্নদুনা লাক্লি। হায়রিবা লনশিং অসি মখোয় চাউখৎনবা পাম্বৈ অমা ওইনবা, সরকারনা বন ধন য়োজনা হৌদোক্লে। উমংগী পোৎথোকশিংগী এম.এস.পি হেনগৎলে অমসুং ত্রাইবেলগী পোৎথোকশিংগী য়োনফম ফংহল্লে। মসিগী ফল ওইনা, লৈবাক শীনবা থুংনা উমংগী পোৎথোকশিং হেনগৎলকপা উরে। ত্রাইবেলশিংগী লাইনিং, মশানা মশাবু ইকায়খুম্নবা অমসুং নাৎকী পুক্কৈ ঙাক-শেনদুনা ইকায়খুম্নবগা লোয়ননা ত্রাইবেল ফুরুপশিং হিংহনবা হায়বসি সরকারগী অচেৎপা ৱাশক অমনি। মীচম মীয়াম অমগী পুন্সি হিংবদা লাইহনবা মতমদা, মখোয়না লৈবাক অসি চাউখৎনবা মাঙজিল থাগনি। চহি ১১ গী মমাংদা ওপোজিসনগী লৈঙাক মনুংদা, মখোয় ওৎ-নৈখি অমসুং মীয়াম শগুন তৌখি। মতম অদুদা তেক্সশিং অমসুং পোৎ-চৈগী মমল য়াম্না ৱাংখি। মীয়াম্না মখোয়গী সরকারদা থৌজাল পীবা মতমদা, সরকারনা ওপোজিসনগী মীওৎ-মীনৈ লোইশিনখি।
প্রধান মন্ত্রীনা হায়খি ২০১৭ দা জি.এস.তি চৎনবদগী তেক্সশিং অমসুং তোলশিংগী অরুবা থবকশিংদগী লৈবাক অসি মনিংতমখি। চহি অসিগী নবরাত্রিগী অহানবা নুমিত্ত, জি.এস.তিগী অওনবা পুরক্তুনা লৈবাক শীনবা থুংনা জি.এস.তি সেভিংস ফেষ্টিবেল পাংথোকখ্রে। নুমিৎ খুদিংগী শীজিন্নবা পোৎলমশিংগী মমল হোঙদোক্লে। চাকখুমগী পোৎলমশিংগী মমল হন্থরে, মসিনা ইমাশিং অমসুং ইচলশিংদা কান্নবা পীরে। ২০১৪ গী মমাঙদা, সাপোন, শম্পু, তুথপেষ্ট অমসুং তুথ পাউদরগুম্বা নোংমগী তঙাইফদবা পোৎলমশিং লৈবদা লুপা ১০০ চাদিং তৌবদা, ওপোজিসন সরকারগী মখাদা তেক্সশিং ৱাংনা লৌবদগী অপুনবা শেনফম লুপা ১৩১ ওইখি। লুপা ১০০ গী পোৎ লৈবা খুদিংগী ওপোজিসন্না লুপা ৩১ তেক্স লৌখি। ২০১৭ দা জি.এস.তি চৎনবদগী, লুপা ১০০ গী পোৎ-চৈ লৈবদা লুপা ১১৮ চঙলে, মসিনা মখোয়গী সরকারগী মখাদা লুপা ১৩ কনবা ঙম্লে। সেপ্তেম্বর ২২ দগী জি.এস.তিগী অওনবা পুরকপদগী লৈবদা চঙবা শেনফম লুপা ১০৫ দা হন্থদুনা অপুনবা ওইনা লুপা ২৬ কনবা ঙম্লে। অনৌবা তেক্স লৌবগী থবক অসিগী মখাদা হৌজিক ইমুংশিংনা লুপা চা কয়া কনবা ঙম্লে।
প্রধান মন্ত্রীনা হায়খি খোঙউপ অসি মীওই খুদিংমক্কী চঙদ্রবা য়াদ্রবা অমনি। মমাঙ সরকারগী মতমদা, লুপা ৫০০ পীবা খোঙউপ অমা লৈবদা লুপা ৭৫ তেক্স লৌবদগী অপুনবা ওইনা লুপা ৫৭৫ চঙখি। জি.এস.তি চৎনবগী তেক্স অসি লুপা ১৫ দা হন্থখি। অনৌবা জি.এস.তিগী অওনবা লাকপদগী, হায়রিবা খোঙউপ অদুগী মমল লুপা ৫০ তারে। মমাঙদা, লুপা ৫০০ গী মথক্ত লৈবা খোঙউপতা তেক্স হেন্না লৌখি। হৌজিক লুপা ২,৫০০ ফাওবা পীবা খোঙউপশিংদা তেক্স হন্থরে, মসিনা মীচম মীয়ামদা মমল হোঙনা ফংহল্লে।
প্রধান মন্ত্রীনা মখা তানা হায়খি ওপোজিসনগী লৈঙাক মনুংদা ইমুং খুদিংমক্না স্কুতর অমা লৈবা ফাওবা য়াম্না ৱাখি। ওপোজিসন্না লুপা ৬০,০০০ পীবা স্কুতর অমদা লুপা ১৯,০০০ গী তেক্স লৌখি। ২০১৭ দা জি.এস.তি চৎনবদগী হায়রিবা তেক্স অসি লুপা ২,৫০০ দা হন্থরে। সেপ্তেম্বর ২২ দগী রেতশিং শেমদোকপদগী, মোতরসাইকলদা হৌজিক লুপা ১০,০০০ গী তেক্স লৌরে। মসিনা ২০১৪ গা চাংদম্নবদা লুপা ৯,০০০ কান্নবা ফংহল্লে।
প্রধান মন্ত্রীনা হায়খি মমাঙ সরকারগী মতমদা, য়ুম শাবা অসি শেন য়াম্না চঙখি। লুপা ৩০০ পীবা বিলামাতি বেগ অমদা লুপা ৯০ তেক্স লৌখি। ২০১৭ দা জি.এস.তি চৎনবদগী হায়রিবা তেক্স অসি লুপা ১০ দা হন্থরে। হন্দক জি.এস.তি রেতশিং শেমদোকপদগী হায়রিবা বেগ অদুদা লুপা ৫০ খক্তগী তেক্স লৌদুনা লুপা ৪০ কনবা ঙম্লে। ওপোজিসনগী সরকারনা তেক্স ৱাংনা লৌখি অদুগা মখোয়গী সরকারনা মীচম মীয়ামগী শেন কনবা ঙম্বা যুগ অমা ফংহল্লে।
প্রধান মন্ত্রীনা হায়খি জি.এস.তি সেভিং ফেষ্টিবেল মনুংদা ঐখোয়না অত্মনির্ভর ভারতকী পান্দম কাউরোইদবনি। শ্বাদেসিগী লাইৱা কাউরোইদবনি। ঐখোয়না য়োনবা শ্বাদেসি ওইগদবনি অমসুং ঐখোয়না লৈবসু শ্বাদেসি ওইগদবনি। মীয়াম্না য়াম্না চাউথোকচনা, “মসি শ্বাদেসনি” হায়না লাউগদবনি। মীয়াম্না শ্বাদেসি পোৎথোকশিং লৈবা মতমদা, লৈবাক মনুংদা শেন লৈহৌগনি, মসিনা লমদম অসিগী খুৎহৈবশিং, শিন্মীশিং অমসুং ললোনবশিংদা শেন য়ৌগনি। মপান লৈবাকশিংদা চৎখিবগী মহুত্ত হায়রিবা শেনফম অসিনা লৈবাক্কী চাউখৎ-থৌরাংদা হকথেংননা মতেং পাংগনি, অনৌবা লম্বীশিং শেম্বদা মতেং পাংগনি। মীওই খুদিংমক্না শ্বাদেসি অসি লৈবাক অসিগী চাউথোকচবগী খুদম অমা ওইহনগদবনি। কুহ্মৈ মতমদা মীয়াম্না শ্বাদেসিগী পোৎ-চৈ খক্ত লৈনবা ৱাশক লৌগদবনি অমসুং চাউখৎ-থৌরাংগী অমসুং থবক ফংনবগা মরী লৈনবা প্রোজেকশিং হৌদোকপদা মীয়ামদা অমুক হন্না হরাওবা ফোঙদোকচরি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা রাজস্থানগী রাজ্যপাল শ্রী হরিবাভাউ কিষানরাও বাগাদে, রাজস্থানগী চীফ মিনিষ্টর শ্রী ভঞ্জনলাল শর্মা, য়ুনিয়ন মিনিষ্টর শ্রী প্রালহাদ জোসি য়াওখি।
নুঙগীৱারোল
মীওই খুদিংমক্ত মমল হোংবা মৈ চাংনাইনা ফংহন্নবা ভারতকী পৱার সেক্তর অওনবা পুরক্নবা প্রধান মন্ত্রগী পান্দমগী শরুক অমা ওইনা, প্রধান মন্ত্রীনা লুপা করোর ৪২,০০০ রোমগী অনুশক্তি ভিধ্যুত নিগম লিমিতেৎস (অসবিনি) মহি বন্সৱারা রাজস্থান এতোমিক পৱার প্রোজেক (৪X৭০০ মেগাৱাত) উরেপ-উয়ুং তমখ্রে। মসি লৈবাক অসিদা খ্বাইদগী চাউবা ন্যুক্লিয়ার প্লান্তশিংগী মনুংদা অমা ওইদুনা মৈ মরাংকাইনা ফংহনগনি অমসুং মহৌশাগী অকোয়বগী ফিবমগী মতাংদা লুচিংবা ওইনবা অমসুং ন্যুক্লিয়ার ইনর্জিগী লমদা ভারতকী ফিবম ফগৎহনগনি।
অত্মনির্ভর ভারতকী ৱাখল্লোন মখা তানা চাউখৎনবা, মহি বন্সৱারা রাজস্থান এতোমিক পৱার প্রোজেক্ত এন.পি.সি.আই.এলনা দিজাইন তৌবা অমসুং শেমগৎপা অশোই-অঙাম থোক্লরোইদবা লৈবাক অসিদা শাজবা মেগাৱাত ৭০০ গী প্রেসরাইজ হেভি ৱাতর রিয়েক্তর মরি য়াওরি। মসি ভারতকী “ফ্লিত মোদ” থবক্কী শরুক অমনি অমসুং চপ মান্নবা দিজাইন অমসুং প্রোক্যুরমেন্ত প্নানশিংগী মখাদা ভারত শীনবা থুংনা চপ মান্নবা মেগাৱাত ৭০০০ গী রিয়েক্তর ১০ শেমগৎলি। প্রোজেক অসিনা শেন চঙবা হন্থহনগনি, য়াংনা থবক হৌগনি অমসুং থবক তৌবদা হৈথোই-শিংথোইবশিং পুনশিনগনি।
ভারতকী ন্যুক্লিয়ার ইনর্জি চাউখৎনবা, প্রধান মন্ত্রীনা রাজস্থান্দা লুপা করোর ১৯,২১০ রোমগী গ্রিন ইনর্জি প্রোজেকশিং শঙ্গাখ্রে অমসুং উরেপ-উয়ুং তমখ্রে। মহাক্না ফালোদি, জাইসালমর, জালোর, সিকার অমসুং অতৈ মফমশিংদা সোলার প্রোজেকশিং শঙ্গাগনি। প্রধান মন্ত্রীনা বিকানরদা সোলার প্রোজেকশিংগীসু উরেপ-উয়ুং তমখ্রে। মসিগী মথক্ত, মহাক্না অন্ধ্র প্রদেসতা রামাগিরিদা সোলার পার্ক অমগীসু উরেপ-উয়ুং তমখ্রে। প্রোজেকশিং অসিনা ভারতনা ক্লিন ইনর্জি পুথোকপা হেনগৎহনবদা মতেং পাংগনি, গ্রিন ইনর্জি য়াম্না পুথোক্তুনা কার্বোন দাইওক্সাইদ তন মিল্লিয়ন কয়া থাদোকপা থিংবা ঙমগনি।
রাজ্য নিপান শীনবা থুংবদা ২০৩০ ফাওবগী মনুংদা গিগাৱাত ১৮১.৫ গী রিন্যুএবল ইনর্জি পুথোক্নবা পান্দম থম্লিবা ভারত সরকারগী রিন্যুএবল ইনর্জি জোন (রেজ) গী মখাদা লুপা করোর ১৩,১৮০ গী পৱার ত্রান্সমিসন প্রোজেক অহুম প্রধান মন্ত্রীনা উরেপ-উয়ুং তমখ্রে। পুথোক্কদৌরিবা রিন্যুএবল পৱারশিং লোদ সেন্তরশিংদা য়ৌহন্নবা অমসুং গ্রিদ লেংদনা লৈবা হেনগৎহন্নবা, রাজস্থান রেজগীদমক পৱার গ্রিদনা মরুওইবা ত্রান্সমিসন সিষ্টেমশিং পায়খৎলি।
প্রোজেকশিংগী মনুংদা রাজস্থানগী বিয়াৱারদগী মধ্য প্রদেসকী মন্দাসুর ফাওবা কে.ভি ৭৬৫ গী ত্রান্সমিসন লাইনশিং পুবা অমসুং মরী লৈনবা সবষ্টেসনশিংদা মখা তানা য়ৌহনবা; সিরোহি সবষ্টেসন্দা ত্রান্সফোর্মেসন কেপাসিতি হেনগৎহনবগা লোয়ননা রাজস্থানগী সিরোহিদগী মন্দসুর ফাওবা অসুং মধ্য প্রদেসকী খন্দৱা ফাওবা য়ৌহনবা অমসুং মন্দসুর অমসুং খন্দৱা সবষ্টেসনশিংদা মখা তানা য়ৌহনবা; অমসুং রাজস্থানগী বিকানরদগী হরিয়ানাগী ফতেহবাদ ফাওবা কে.ভি ৭৬৫ অমসুং কে.ভি ৪০০ গী ত্রান্সমিসন লাইন য়ৌহনবা অমসুং বিকানরদা সবষ্টেসনশিং লিংখৎপা অমসুং সিৱানি সবষ্টেন্দা য়ৌহনবা য়াওনা মখা তানা পঞ্জাবগী পাত্রান ফাওবা য়ৌহনবা য়াওরি। প্রোজেকশিং অসিনা রাজস্থানদা মৈ পুথোক্লিবা মফমশিংদগী ভারত শীনবা থুংবগী মৈ দরকার ওইরিবা রাজ্যশিংদা গিগাৱাত ১৫.৫ গী গ্রিন ইনর্জি থাবা ঙমগনি।
প্রধান মন্ত্রীনা গ্রিদ সবষ্টেসন অহুমগী উরেপ-উয়ুং তমখ্রে অমসুং মসিদা কে.ভি ২২০ অমসুং বিকানর অমসুং জাইসালমরদা মরী লৈনবা লাইনশি য়াওরি। প্রধান মন্ত্রীনা বারমর জিলাদা সিবতা কে.ভি ২২০ জি.এস.এস অমসু শঙ্গাখ্রে। লুপা করোর ৪৯০ হেনবগী প্রোজেকশিং অসিনা লমদম অসিদা ইনর্জি মরাংকাইনা ফংহনবদা শিংথাবা য়ানা মতেং পাংগনি।
লৌমীশিংগী ফিবম ফগৎহন্নবা মহাক্কী পান্দমগী শরুক অমা ওইনা, প্রধান মন্ত্রীনা পি.এম কুসুম ( প্রধান মন্ত্রী কিষান উর্জ সুরক্ষা ইভম উতথাম মহাভিয়ান) স্কিম (কম্পোনেন্ত সি) গী মখাদা রাজস্থান, মহারাষ্ট্রা, মধ্য প্রদেস অমসুং কর্নাতকা রাজ্যশিংদা লুপা করোর ১৬,০৫০ হেনবগী মেগাৱাত ৩৫১৭গী ফিদর লেভেল সোলারাইজেসন প্রোজেকশিং শঙ্গাখ্রে। মমল হোংবা অমসুং চাং নাইবা ঈশিং চিংখৎনবা মৈ ফংহন্নবা এগ্রিকলচর ফিদরশিং সোলার ওন্থোক্লে অমসুং মসিনা মৈ পুথোকপদা চঙবা শেনফম হন্থহন্দুনা, ইথৈ পীবগী চাদিং হন্থহন্দুনা অমসুং খুঙ্গংদা মশাগী ওক্নবা মৈ পুথোকপা য়োখৎতুনা লৌমী লাখ কয়াদা কান্নবশিং ফংহল্লে।
রামজাল সেতু লিঙ্ক প্রোজেক ফগৎহন্নবা অমসুং ঈশিং মরাংকাইনা ফংহন্নবা মহাক্কী পান্দম মাইপাক্নবা, প্রধান মন্ত্রীনা রাজস্থান্দা তোঙান তোঙানবা ঈশিংগী প্রোজেকশিং উরেপ-উয়ুং তমখ্রে অমসুং শঙ্গাখ্রে। ইসারদাদা তোঙান তোঙানবা ফিদরশিং শানবা অজমর জিলাদা মোর সাগর আর্তিফিসিএল রিজার্বর অমসুং চিত্তোগরদগী মসিগী ফিদরশিং শেমগৎনবা প্রধান মন্ত্রীনা উরেপ-উয়ুং তমখ্রে। অতোপ্পা থবকশিংগী মনুংদা, বিসালপুরদা ইন্তেক পম্প হাওস, খারি ফিদর নৌনা শেমজিনবা অমসুং তোঙান তোঙানবা ফিদর কেনেলগী থবকশিং য়াওরি। প্রধান মন্ত্রীনা ইসারদা দাম, ধোলপুর লিফ প্রোজেক, তাক্লি প্রোজেক শঙ্গাখি।
মীওই খুদিংমক্ত অফবা থক্নবা ঈশিং ফংহন্নবা মহাক্কী পান্দমগী মনুংচন্না, অতল মিসন ফোর রিজুবিনেসন এন্দ অর্বান ত্রান্সফোর্মেসন (অমরুত) ২.০ গী মখাদা বন্সৱারা, দু্ঙ্গারপুর, উদয়পুর, সৱাই মাধোপুর, চুরু, অজমর, বিলৱারা জিলাশিংদা লুপা করোর ৫,৮৮০ হেনবগী থক্নবা ঈশিং পীনবা প্রোজেকশিংগী উরেপ-উয়ুং তমখ্রে।
লম্বী-থোঙ ফগৎহন্নবা, প্রধান মন্ত্রীনা ভারতপুর সিতিদা লৈকং থোঙশিং শানবা, বনাস তুরেলদা থোঙ অমা শানবা অমসুং অতল প্রাগাতি পথ প্রোজেক ১১৬ গী উরেপ-উয়ুং তমখ্রে। মহাক্না বারমর, অজমর, দুঙ্গারপুর জিলাশিংদা নেসনেল অমসুং ষ্টেৎ হায়ৱেশিংগা মরী লৈনবা লম্বীগী প্রোজেক কয়া শঙ্গাখ্রে অমসুং মীয়ামদা কৎথোকখ্রে। লুপা করোর ২,৬৩০ হেনবগী প্রোজেকশিং অসিনা লমদম অসিগী লম্বী-থোঙগী ফিবম ফগৎহনগনি, চৎথোক-চৎশিন নুংঙাইবা অমসুং লম্বীগী অশোই-অঙাম থোক্তবা হেনগৎহনগনি।
প্রধান মন্ত্রীনা ভারতপুরদা ফমুং ২৫০ গী আর.বি.এম হোস্পিতাল অমা, জয়পুরদা আই.তি দিবলপমেন্ত অমসুং ই-গভর্নান্স সেন্তর, মাক্রানা সহরদা ত্রিৎমেন্ত প্লান্তশিং অমসুং পম্পিং ষ্টেসনশিং য়াওনা সিৱেরেজ সিষ্টেম অমসুং মন্দৱা অমসুং ঝুনঝুনু জিলাদা ঈশিং পীনবা প্রোজেক শঙ্গাখ্রে।
রেলগী চৎথোক-চৎশিন খুদোংচাবা হেনগৎহন্নবা, প্রধান মন্ত্রীনা বিকানর অমসুং দিল্লি কেন্তগী মরক্ত বন্দে ভারত এক্সপ্রেস ত্রেন, জোধপুর অমসুং দিল্লি কেন্তগী মরক্ত বন্দে ভারত এক্সপ্রেস ত্রেন অমসুং উদয়পুর সিতি- চান্দিগর এক্সপ্রেস, ত্রেন অহুম লমথাখি। হায়রিবা ত্রেনশিং অসিনা রাজস্থান অমসুং অতোপ্পা অৱাং থংবা রাজ্যশিংগী মরক্ত চৎথোক-চৎশিন ফগৎহনগনি।
মীওই খুদিংমক থবক ফংহন্নবা মহাক্কী মঙলানগী শরুক অমা ওইনা, প্রধান মন্ত্রীনা রাজস্থান্দা সরকারগী বিভাগশিং অমসুং লুপশিংদা নৌনা থবক খল্লবা নহারোলশিংদা এপোইন্তমেন্ত লেত্তর ১৫,০০০ হেন্না য়েন্থোকখ্রে। মখোয়গী মনুংদা এনিমেল এত্তেন্দেন্ত ৫৭৭০, জুনিয়ার এসিষ্টেন্ত ৪১৯০, জুনিয়ার ইন্সত্রক্তর ১৮০০, জুনিয়ার ইঞ্জিনিয়ার ১৪৬০, থার্দ-গ্রেদ লেভেল-২ ওজা ১২০০ য়াওরি।
***
(Release ID: 2171528)
Visitor Counter : 7
Read this release in:
Malayalam
,
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Tamil
,
Telugu
,
Kannada