ভারত মাতা কী জয়।

ভারত মাতা কী জয়।

ভারত মাতা কী জয়।

মনিপুরগী রাজ্যপাল শ্রী অজয় ভল্লাজী, স্তেত এদমিনিস্ত্রেসনগী অতোপ্পা ওফিসিএলশিং, অমসুং মনিপুরগী ঐগী নুংশিরবা ইচিল-ইনাওশিং! খুরুমজরি!

ঙসি, মনিপুরগী চাউখৎ থৌরাংগীদমক লুপা করোর লিশিং কয়াগী প্রোজেক্তশিংগী উরেপ উয়ুং তমখ্রে অমসুং শঙ্গাখ্রে। প্রোজেক্তশিং অসিনা ময়াম পুম্নমক্কী ইজ ওফ লিভিং হেনগৎহল্লগনি, মফম অসিগী ইনফ্রাস্ত্রকচর মপাঙ্গল কনখৎহল্লগনি, অমসুং মনিপুরগী নহাশিং, মফম অসিগী ইচানুপা অমসুং ইচানুপীশিংগীদমক থবক ফংহন্নবা অনৌবা খুদোংচাবশিংসু শেমগৎলগনি।

মরুপশিং,

ঙসি হৌদোকখিবা থবকশিংগী মরক্তা, প্রোজেক্ত অনি অসি য়াম্না মরু ওই। লুপা করোর 3,600 হেন্না চঙবা মনিপুর অর্বান রোদস প্রোজেক্ত অমসুং লুপা করোর 500 হেন্না চঙবা মনিপুর ইনফোতেক দিবেলপমেন্ত প্রোজেক্ত। প্রোজেক্তশিং অসিনা ইম্ফালদা লম্বীগী ইনফ্রাস্ত্রকচর মপাঙ্গল কনখৎহল্লগনি অমসুং মনিপুরগী মঙাল লৈবা তুংলমচৎকীদমক অনৌবা ইনর্জী পীগনি। চাউখৎ-থৌরাংগী প্রোজেক্তশিং অসিগীদমক ঐহাক্না মনিপুরগী মীয়াম্বু নুংঙাইবা ফোংদোকচরি অমসুং য়াইফ-পাউজেল পীজরি।

মরুপশিং,

নীংতম্লবা মতুংদা, লৈবাক অসিগী নোংচুপ থংবা অমসুং খা থংবা শরুকশিংগী অচৌবা শহরশিং চাউখৎলকখি, মফমশিং অসিদা মঙলানশিং মপুং ফাহনখি, নহারোলশিংদা অনৌবা খুদোংচাবা ফংহনখি। হৌজিক অসি 21শুবা চহিচাগী, নোংপোক্কী, অৱাং নোংপোক্কী মতমনি। মরম অদুনা, ভারত সরকারনা মনিপুরগী চাউখৎ থৌরাংদা লেপ্পা লৈতনা অখন্নবা মীৎয়েং থম্লি। মসিগী মহৈ ওইনা, মনিপুরগী গ্রোথ রেৎ অসি লেপ্তনা হেনগৎলক্লি। 2014গী মমাংদা, মনিপুরগী গ্রোথ রেৎ অসি চাদা অমদগী হন্থরম্মি, চাদা অমা ফাওবা য়ৌরমদে। হৌজিক মনিপুর অসি হান্নদগী শরুক কয়া হেন্না খুমাং চাউশিল্লি। মনিপুরদা ইনফ্রাস্ত্রকচর দিবেলপমেন্তকী অনৌবা চহিচা অমা হৌখ্রে। মনিপুরদা লম্বীশিং অমসুং নেস্নেল হায়ৱেশিং শাবগী খোঙজেল অসি শরুক কয়া হেনগৎলকপা অসিদা ঐহাক্না নুংঙাইবা ফাওই। মফম অসিগী খুঙ্গং খুদিংমক্তা য়ৌশিন্নবগী থবকসু খোঙজেল য়াংনা চত্থরি।

মরুপশিং,

ঐখোয়গী ইম্ফাল অসি ওইথোকপা য়াবা কয়া লৈবা শহর অমনি। ঐহাক্না ইম্ফাল শহরবু চাউখৎলবা ভারতকী শহরশিংগী মনুংদা অমা ওইনা উরি। মসিনা ঐখোয়গী নহাশিংগী মঙলানশিং মপুং ফাহনগনি অমসুং লৈবাক অসিগী চাউখৎপগী খোঙজেল য়াংখৎহল্লগনি। ৱাখল্লোন অসিগা লোয়ননা, স্মার্ত সিতী মিসনগী মখাদা প্রোজেক্ত কয়া অমা লোইশিনখ্রে। লুপা করোর চাম্মরোমগী প্রোজেক্ত কয়া অমা খোঙজেল য়াংনা পায়খৎলি।

মরুপশিং,

ইম্ফাল ওইগেরা নৎত্রগা মনিপুরগী অতোপ্পা মফমশিং ওইগেরা, স্তার্ত-অপশিং অমসুং তেক্নোলোজীদা য়ুম্ফম ওইবা ইন্দস্ত্রীশিংগীদমক অনৌবা খুদোংচাবশিং শেমগৎলি। IT স্পেসিএল ইকনোমিক জোননা মসিগী ওইথোকপশিং অসি মপাঙ্গল কনখৎহল্লগনি। মসিগী জোন অসিগী অহানবা বিল্দিং অসি হান্ননা শাখ্রে। মনিপুরদা অনৌবা সিবিল সেক্রেতরিয়েৎ বিল্দিং অমা শানবা দিমান্দ অসি য়াম্না কুইরবনি। হৌজিক মসিগী বিল্দিং অসিসু শাবা লোইরে, অনৌবা বিল্দিং অসিনা 'নগরিক দেবো ভব'গী মন্ত্র অসি হেন্না মপাঙ্গল কনখৎহল্লগনি।

মরুপশিং,

মনিপুরগী মরুপ কয়ানা কোলকাতা অমসুং দিল্লীদসু চৎলি। মফম অনিমক্তসু শেল চঙদনা লৈফম ফংহন্নবগীদমক্তা মনিপুর ভবনশিং শাখ্রে। মসিগী বিল্দিংশিং অসিনা মনিপুরগী নুপীমচাশিংদা চাউনা মতেং পাংগনি। অমসুং অঙাংশিং অদু মফম অদুদা সেফ ওইরবা মতমদা, মফম অসিদা লৈরিবা মমা-মপাশিংনসু ৱাখল ৱাবা হন্থরক্কনি।

মরুপশিং,

ঐখোয়গী সরকারনা অদোমগী পুন্সিদা থেংনরিবা খুদোংচাদবশিং অদু মপুং ফানা হন্থহন্নবা হোৎনরি। ঐনা খঙই মদুদি মনিপুরগী মফম কয়াদা ঈশিং-ঈচাউনা অৱাবা কয়া থোকহল্লি। সরকারনা হায়রিবা প্রোব্লেম অসি হন্থহন্নবা প্রোজেক্ত কয়া অমসু পায়খৎলি।

মরুপশিং,

মনিপুর অসি লৈবাক অসিগী রাজ্য অমনি মফম অসিদা ইমাশিং অমসুং ইচে-ইচলশিংনা শেন্মিৎলোনদা মাংজিল থানা হোৎরি। ইমা কৈথেলগী চৎনবী অসি মসিগী অচৌবা খুদম অমনি। ভারতকী চাউখৎ-থৌরাং অমসুং মশা-মরোমদোম লেপচবা ভারতকী মপাঙ্গল অসি নুপীগী শক্তিনি হায়না ঐনা খল্লি। ঐখোয়গী সরকার শেম্লবা মতুংদা মনিপুরদা মসিগী ইথিল অসি ঐখোয়না উবা ফংলি। ঐখোয়না নুপীশিংগীদমক্তা অখন্নবা হাৎ-বাজার, ইমা কৈথেলশিং শেম্বা হৌখি। ঙসি ইমা কৈথেল মরি শঙ্গাখিবা অসিদা ঐহাক নুংঙাইবা ফাওই। ইমা কৈথেলশিং অসিনা মনিপুরগী ইচে-ইচলশিংদা য়াম্না মতেং পাংলগনি।

মরুপশিং,

ঐখোয়গী পান্দমদি লৈবাক অসিগী মীপুম খুদিংমক্কী পুন্সিদা হেন্না লাইথোকহন্নবা হোৎনবনি। মনিপুরদা পোৎলমশিং য়ৌহনবদা অরুবা মতম অমা লৈরম্মি। নুমিৎ খুদিংগী চংবা পোৎশিং অসি মীচম প্রজাগী ইমুং-মনুংশিংনা ফংবা ঙমলমদে। হৌখিবা চহিশিংদা, ঐখোয়গী সরকারনা মনিপুরবু অরিবা সমস্যাশিং অসিদগী কোকহল্লে। ঐহাক্না ময়াম পুম্নমক্কীদমক অতোপ্পা নুংঙাইবা পাউ অমা পুরক্লি। ঐখোয়গী সরকারনা অদোমগী সেভিং হেনগৎহনবা, অদোমগী পুন্সি অসি লায়থোকহনবা পাম্মি। মরম অদুনা, হৌজিক সরকারনা GST চাউনা হন্থহনখ্রে। মসিনা মনিপুরগী মীয়ামদা কান্নবা অনি থোক্না ফংহল্লগনি। মসিনা মরম ওইদুনা, নুমিৎ খুদিংগী শীজিন্নরিবা পোৎলম কয়া, খুদম ওইনা সাপোন-শেম্পু-কোকতৈ থাও, ফি-রোল-খোঙউপনচিংবসি মমল হন্থরক্লগনি। সিমেন্ত অমসুং য়ুম শাবগী পোৎলমশিংগী মমলসু হন্থরগনি। সরকারনা হোতেলশিং অমসুং অচা-অথক অমসুং থক্নবশিংগী GSTসু হন্থহল্লে। মসিনা মফম অসিগী গেস্ত হাউস মপুশিং, তেক্সি ধাবা মপুশিংদসু য়াম্না কান্নবা পীগনি। মসিনা মফম অসিদা তুরিজম হেনগৎহনবদা মতেং পাংগনি।

মরুপশিং,

চহি লিশিং কয়াগী মমাংদগী লৈরক্লবা মনিপুরগী শিংথানিংঙাই ওইবা হেরিতেজ লৈজরি। মফম অসিদা চৎনবীগী হৌরকফম অসি মপাঙ্গল কনবা অমসুং অচেৎপা অমনি। মনিপুর অসি ভারত ইমাগী লুহুপতা তম্ফা থিনবনি। মরম অদুনা, ঐখোয়না মনিপুরগী চাউখৎ-থৌরাংগী ইমেজ অসি লেপ্পা লৈতনা মপাঙ্গল কনখৎহনগদবনি। মনিপুরদা হিংসাগী থৌওং অমা হেক্তা থোকপা হায়বসি নুংঙাইতবা অমনি। অসিগুম্বা হিংসা অসি ঐখোয়গী ইপা-ইপুশিং অমসুং তুংগী মীরোনগীদমক অচৌবা লাইবক থিবা অমনি। মরম অদুনা, ঐখোয়না শান্তি অমসুং চাউখৎপগী লম্বীদা মনিপুরবু লেপ্পা লৈতনা মাংলোমদা পুখৎকদবনি, অমসুং ঐখোয়না মসি পুন্না তৌগদবনি। ভারতকী নীংতম লানফমদা, ভারতকী ঙাকশেলদা মনিপুরগী থৌদাংদগী ঐখোয়না ইথিল লৌবা তাই। ইন্দিয়ন নেস্নেল আর্মিনা ইন্দিয়ন ফ্লেগ অসি অহানবা ওইনা পাইহনখিবা মফম অসি মনিপুরগী লমনি। নেতাজী সুভাসনা মনিপুরবু ভারতকী নীংতম্বগী থোঙনি হায়খি। লমদম অসিনা থৌনা ফবা থৱায় কয়া থাখ্রে। ঐখোয়গী সরকার অসিনা মনিপুরগী অসিগুম্বা শক্নাইরবা মীওই খুদিংমক্তগী ইথিল লৌদুনা মাংলোমদা চংশিল্লি। ঐখোয়গী সরকারনা অতোপ্পা অচৌবা খোংথাং অমা লৌখৎলে। আন্দামান অমসুং নিকোবর ইথৎশিংদা, মাউন্ত হেরিয়েতপু মাউন্ত মনিপুর হায়না মিংথোনখি। মসি ভারতকী লৈবাক মচা করোর 140না মনিপুরীগী নীংতম লান্মীশিংদা ইকায় খুম্নবা উৎপনি।

মরুপশিং,

ঙসিসু মনিপুরগী মচা কয়ানা লৈবাক অসিগী তোঙান তোঙানবা মফমশিংদা ভারত ইমা ঙাক শেনবগী থবক তৌরি। ইকুই কুইদ্রিঙৈদা, মালেম অসিনা ওপরেসন সিন্দুরদা ভারতকী লান্মীগী শক্তি অদু উবা ফংখি। ঐখোয়গী লান্মীশিংনা লান্দাবদা পাকস্তানী লান্মীনা মতেং পাংনবা হায়জরকখি। ভারতকী মাইপাকপগী থৌনা অসিদা মনিপুরগী থৌনা ফরবা ইচানুপা-ইচানুপী কয়াগী থৌনা য়াওরি। ঙসি, ঐহাক্না অসিগুম্বা থৌনা ফরবা অথৌবা দিপক চিঙাখমগী থৌনা অদুদা ইকায় খুম্নবা উৎচরি। ওপরেসন সিন্দুরগী মতমদা মহাক্না কত্থোকখিবা অদু লৈবাক অসিনা মতম পুম্নমক্তা নীংশিংদুনা লৈহৌরগনি।

মরুপশিং,

ঐহাক্না নীংশিংলি মদুদি ঐহাক্না 2014দা মফম অসিদা লাকপা মতমদা, ঐহাক্না ৱাফম অমা হায়খি, ঐহাক্না হায়খি মদুদি মনিপুরী কলচর য়াওদনা ভারতকী চৎনবী অসি মপুং ফাদে, অমসুং মনিপুরী শান্নরোয়শিং য়াওদনা ভারতকী শান্ন-খোৎনবসু মপুং ফাদে। মনিপুরগী নহারোল অসি তিরঙ্গাগী মতিক ময়াই হেনগৎহন্নবা কন্না হোৎনরিবা নহারোল অমনি। ঐখোয়না মসিগী আইদেন্তিতী অসিবু হিংসাগী অমম্বা মমিনা কুপশিনবা তৌহল্লোইদবনি।

মরুপশিং,

ঙসি, ভারতনা মালেমগী স্পোর্তসকী পাৱরহাউস অমা ওইরক্লিবা মতম অসিদা মনিপুরগী নহারোলশিংগী থৌদাং অসি হেন্না চাউই। মরম অদুনা, ভারত সরকারনা অহানবা নেস্নেল স্পোর্তস য়ুনিভর্সিতীগীদমক মনিপুরবু খনখি। ঙসিদি, খেলো ইন্দিয়া স্কিম অমসুং ওলিম্পিক পোদিয়ম স্কিমগী খুত্থাংদা মনিপুরগী শান্নরোয় কয়া পুক্নিং থৌগৎলি। মনিপুরগী নহারোলশিংগীদমক মোদর্ন স্পোর্তস ইনফ্রাস্ত্রকচরসু মফম অসিদা শেমগৎলি। পোলোবু প্রমোৎ তৌনবা, মালেমগী খ্বাইদগী ৱাংবা পোলো স্তেচুগা লোয়ননা মরজিং পোলো কমপ্লেক্স মফম অসিদা লিংখৎখ্রে। ওলিম্পিয়নশিংবু ইকায় খুম্নবা ওইনা ওলিম্পিয়ন পার্ক অমসু মফম অসিদা শাখ্রে। নুমিৎ খরনিগী মমাংদা সরকারনা নেস্নেল স্পোর্তস পোলিসী - খেলো ইন্দিয়া পোলিসী লাউথোকখ্রে। মসিনা লাক্কদৌরিবা মতমশিংদা মনিপুরগী নহারোলশিংদা কান্নবা ফংহল্লগনি।

মরুপশিং,

ঐখোয়গী সরকারনা মনিপুরদা শান্তি অমসুং তংদু লৈতাবা পুরক্নবা, মফম অসিগী মীয়ামগী অপাম্বশিং ঙাক্নবা অমসুং কেম্পশিংদা লৈরিবা মীওইশিংগী পুন্সি মহিং অমুক হন্না শেমগৎনবা লেপ্পা লৈতনা থবক তৌরি। সরকারনা দিস্প্লেস ওইরবা মীওইশিংগীদমক্তা অনৌবা য়ুম লিশিং তরেৎ শানবা অয়াবা পীখ্রে। ইকুই কুইদ্রিঙৈদা কেন্দ্র সরকারনা মনিপুরগীদমক লুপা করোর লিশিং অহুমগী অখন্নবা পেকেজ অমা লাউথোকখ্রে। মসিগী মনুংদা, দিস্প্লেস ওইরবা মীওইশিংবু মতেং পাংনবা লুপা করোর 500 হেনবগী প্রোভিজন অমা শেমখ্রে। হিংসানা শোকহল্লবা মীওইশিং অদু য়ারিবমখৈ থুনা মহৌশাগী পুন্সিদা হঞ্জিনহনবা হায়বসি ঐখোয়গী খ্বাইদগী মরু ওইবা ৱাফম্নি। মনিপুর পুলিসকীদমক্তা শাবা অনৌবা হেদক্বাতর অসিনা অদোমবু মসিদা য়াম্না মতেং পাংগনি।

মরুপশিং,

ঙসি, মনিপুরগী লমদম অসিদগী, ঐহাক্না নেপালগী ঐহাক্কী মরুপশিংগা ৱারী শাগনি। হিমালয়গী তম্পাক্তা লৈবা নেপাল অসি ভারতকী মরুপ অমনি, অচেৎপা মরুপ অমনি। ঐখোয়গী পুৱারী, থাজবনা ঐখোয়বু শম্নহল্লি অমসুং ঐখোয় পুন্না মাংলোমদা চংশিল্লি। ঙসি ভারত মচা করোর 140গী মায়কৈদগী ঐনা নেপালগী ইন্তেরিম সরকারগী প্রধান মন্ত্রী ওইনা শ্রীমতী সুশীলাজীনা থৌদাং লৌরকপদা থম্মোয় শেংনা থাগৎপা ফোংদোকচরি। মহাক্না নেপালদা শান্তি, তংদু লৈতাবা অমসুং চাউখৎপগী লম্বী য়াৎলগনি হায়না ঐনা থাজবা থম্লি। সুশীলাজীনা নেপালগী অহানবা নুপী প্রধান মন্ত্রী ওইরকপা অসি নুপীশিংগী শক্তি লৈহন্নবগী অচৌবা খুদম অমনি। ঙসি মখোয়না অসিগুম্বা তংদু লৈতাদ্রবা ফীভম অমদা দেমোক্রেতিক ভেল্যুশিংবু খ্বাইদগী মরু ওইনা খনবা অসিদা ঐহাক্না নেপালগী মীওই খুদিংমকপু থাগৎচরি।

মরুপশিং,

নেপালদা থোকখিবা থৌদোকশিং অসিদা অতোপ্পা অখন্নবা ৱাফম অমা লৈ, মসি মীওইশিংনা উবা ঙমখিদে। হৌখিবা নুমিৎ নিনি-হুমনি অসিদা, নেপালগী নহা ওইরিবা নুপা অমসুং নুপীশিংনা নেপালগী লম্বীশিং অসি য়াম্না কন্না হোৎনদুনা শেংদোক্লি অমসুং মচু শংলি। ঐহাক্না সোসিএল মীদিয়াদা মখোয়গী ফোতোশিংসু উখি। মখোয়গী অফবা ৱাখল্লোন, অফবা থবকশিং অসি পুক্নিং থৌগৎপতা নত্তনা নেপালগী অনৌবা চাউখৎপগী ময়েক শেংবা খুদম অমসু ওইরি। ঐহাক্না নেপালগী অফবা তুংলমচৎকীদমক য়াইফ-পাউজেল পীজরি।

মরুপশিং,

ঐখোয়গী লৈবাক অসিনা 21শুবা চহিচাদা চাউখৎলবা ভারতকী পান্দম অমা খক্তগা লোয়ননা মাংলোমদা চংশিল্লি। অমসুং মসিগী পান্দম অসি ফংনবগীদমক, মনিপুরগী চাউখৎ-থৌরাংসু মথৌ তাই। ঐখোয়গী মনিপুর অসি লোইনাইদ্রবা ওইথোকপা য়াবা কয়ানা থল্লি। চাউখৎপগী লম্বীদগী খোঙথাং অমত্তা চোইথোকহনদবা হায়বা অসি ঐখোয় পুম্নমক্কী থৌদাংনি। মনিপুরদা তৌবা ঙম্বগী অৱাৎপা লৈতে, তঙাইফদ্রিবা অসি ঐখোয়না ৱারী শানবগী লম্বী অসিবু লেপ্পা লৈতনা মপাঙ্গল কনখৎহনবনি, ঐখোয়না চীং অমসুং তমগী মরক্তা মপাঙ্গল লৈরবা নুংশি-চান্নবগী থোং অমা শেমগদবনি। লৈবাক অসিগী চাউখৎপগী মপাঙ্গল লৈবা সেন্তর অমা ওইনা মনিপুরনা ওইরক্লগনি হায়না ঐহাক্না থাজবা থম্লি। ঐহাক্না অমুক্কা হন্না, চাউখৎ-থৌরাংগী প্রোজেক্তশিং অসিগীদমক ময়াম পুম্নমকপু থাগৎচরি। ঐগা লোয়ননা হায়বিয়ু - ভারত মাতা কী জয়। ভারত মাতা কী জয়। ভারত মাতা কী জয়।

হন্না-হন্না থাগৎচরি।

*****